Super User
Qəbələdə Türk Dövlətləri Təşkilatının Xarici İşlər Nazirləri Şurasının toplantısı keçirilib
TÜRK MƏDƏNİYYƏTİ VƏ İRSİ FONDUNUN PREZİDENTİ AKTOTI RAİMKULOVA TOPLANTIDA ÇIXIŞ EDİB
7 oktyabr 2025-ci il tarixində Azərbaycanın Qəbələ şəhərində Türk Dövlətləri Təşkilatının (TDT) Xarici İşlər Nazirləri Şurasının toplantısı keçirilib. Toplantı TDT Dövlət Başçıları Şurasının Qəbələdə keçiriləcək 12-ci Zirvə Görüşü çərçivəsində baş tutub.
Toplantıda Azərbaycan Respublikasının Xarici İşlər naziri Ceyhun Bayramov, Qazaxıstan Respublikasının Xarici İşlər naziri Yermek Koşerbayev, Qırğızıstan Respublikasının Xarici İşlər naziri Jeenbek Kulubayev, Türkiyə Respublikasının Xarici İşlər naziri Hakan Fidan, Özbəkistan Respublikasının Xarici İşlər naziri Baxtiyor Saidov, Macarıstanın Xarici İşlər və Ticarət naziri Peter Siyarto, Türk Dövlətləri Təşkilatının baş katibi Kubanıçbek Omuraliev eləcə də hökumət nümayəndələri və beynəlxalq təşkilatların rəhbərləri iştirak ediblər. Türk Mədəniyyəti və İrsi Fondunun prezidenti Aktotı Raimkulova toplantıda iştirak və çıxış edib.
“Ədəbiyyat və incəsənət” portalı xəbər verir ki, xanım Raimkulova Azərbaycan tərəfinə səmimi qonaqpərvərlik və Zirvə Görüşünün yüksək səviyyədə təşkilinə görə təşəkkür edib. O, qeyd edib ki, sülh və təhlükəsizlik mövzusu dövlətlər arasında əməkdaşlığın möhkəmləndirilməsi və gələcək nəsillər üçün mədəni irsin qorunması baxımından xüsusi əhəmiyyət daşıyır.
Çıxışının davamında Türk Mədəniyyəti və İrsi Fondunun cari ildə gördüyü işlər barədə ətraflı məruzə edərək xanım Raimkulova söyləyib:
“2025-ci ildə biz restavrasiya, muzeyləşdirmə, rəqəmsallaşdırma və mübadilə proqramlarını əhatə edən 65 layihəhəyata keçirdik. Bütün təşəbbüslərimizdə inteqrasiya, əməkdaşlıq və birliyə üstünlük veririk. Türk Dünyasına Baxış-2040 sənədinə və Astana Nizamnaməsinə uyğun olaraq biz ilk “Türk Dünyası Mədəni İrsinin Çoxdilli Kataloqu”nu nəşr etdik. Bu nəşr gələcəkdə “Turkic Heritage” (“Türk İrsi”) adlı Rəqəmsal Platformanın əsasını təşkil edəcək.
Eyni zamanda, Özbəkistan Respublikasının Prezidenti Zati-Aliləri cənab Şavkat Mirziyoyevin təşəbbüsü və Türk Dövlət Başçılarının dəstəyi ilə çoxcildli “Türk Folklor İrsi” Antologiyasını həyata keçirdik.
YUNESKO Parisdəki baş-qərargahında “Divani Lüğət ət-Türk”-ün 950 illiyinə həsr olunan beynəlxalq konfrans təşkil etdik.
Fondumuz “Türk Dünyasına Baxış 2040” və “TURKTIME” sənədlərinə əsaslanaraq YUNESKO, İSESKO və Türk əməkdaşlıq təşkilatları ilə tərəfdaşlıqları gücləndirməyə davam edir”.
Xanım Aktotı Raimkulovanın sözlərinə görə, bu ilin may ayında Budapeştdə keçirilən Qeyri-rəsmi Zirvə Görüşündə Özbəkistanın Türk Mədəniyyəti və İrsi Fonduna tamhüquqlu üzv kimi qəbul olunması barədə tarixi qərar qəbul edilib ki, bu da Türk ailəsini daha da zənginləşdirib.
Fond rəhbəri, həmçinin, Türkmənistanın müşahidəçi kimi qoşulmaq istəyini mühüm addım kimi qiymətləndirib və bu ölkənin yaxın gələcəkdə tamhüquqlu üzv qismində ailəyə qatılacağına ümid etdiyini bildirib.
Fondun prezidentinin çıxışı Türk dövlətləri arasında mədəni həmrəyliyin və birliyin daha da güclənməsinə çağırışla yekunlaşıb.
“Ədəbiyyat və incəsənət”
(07.10.2025)
“Azərbaycan - müharibənin qalibi, sülhün müəllifi” mövzusunda konfrans keçirilib
7 oktyabr 2025-ci il tarixində Müharibə, Əmək və Silahlı Qüvvələr Veteranları Təşkilatında şəhid ailələrinin, veteranların, tələbələrin, zabitlərin, ziyalıların iştirakı ilə “Azərbaycan - müharibənin qalibi, sülhün müəllifi” mövzusunda konfrans keçirilib.
“Ədəbiyyat və incəsənət” portalı xəbər verir ki, konfransdan öncə Azərbaycan Respublikasının Dövlət Himni səsləndirilib, Ümummilli lider Heydər Əliyevin və Azərbaycanın müstəqilliyi, ərazi bütövlüyü uğrunda canlarından keçmiş şəhidlərin əziz xatirəsi 1 dəqiqəlik sükutla yad edilib.
Konfransda açılış nitqi ilə çıxış edən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov Müzəffər Ali Baş Komandan, Prezident İlham Əliyevin rəhbərliyi ilə xalqımızın 44 günlük Vətən müharibəsində əldə etdiyi tarixi qələbəyə diqqət çəkib, bu zəfərin hərbi önəmi ilə yanaşı, iqtisadi-siaysi və mənəvi əhəmiyyətinə toxunub:
“Prezident İlham Əliyevin liderliyi ilə Silahlı Qüvvələrimizin 44 günlük Vətən müharibəsində əldə etdiyi zəfər, eləcə də, 2023-cü ildə həyata keçirilən suverenliyin tam bərpası əməliyyatı böyük hərbi, tarixi, siyasi və mənəvi əhəmiyyətə malikdir. Bu qələbələr göstərdi ki, Azərbaycan xalqı, Azərbaycan dövləti öz ərazi bütövlüyünü təmin etməyə, suverenliyini qorumağa qadirdir və heç vaxt heç bir təzyiq qarşısında boyun əyməyəcək.
Azərbaycan dövləti müharibədən öncə olduğu kimi, post-müharibə dönəmində də sülh səylərini aktiv şəkildə davam etdirdi. Prezident İlham Əliyevin rəhbərliyi ilə diplomalarımızın apardığı sülh uğrunda mübarizə cari ilin 8 avqust tarixində Vaşinqtonda Azərbaycanla Ermənistan arasında sülh müqaviləsi mətninin paraflanması ilə yekunlaşdı. Dövlətimiz müharibədə olduğu kimi sülh müstəvisində də qələbə çaldı, milli maraqlarını uğurla təmin etdi. Azərbaycan mühribənin qalibi olmaqla yanaşı, həm də sülhün müəllifinə çevrildi”.
Konfransa çıxış edən Azərbaycan Milli Məclisinin deputatı, Beynəlxalq münasibətlər və parlamentlərarası əlaqələr komitəsinin sədr müavini Nigar Arpadarai Azərbaycanın həm müharibə, həm də diplomatik müstəvidəki uğurlarına diqqət çəkib. Millət vəkili bildirib ki, hər iki platformada Prezident İlham Əliyevin rəhbərliyi ilə əldə edilən zəfərlər dövlətimizin gücündən, onun mübarizə əzmindən xəbər verir.
Müasir gəncliyin qalib gənclik olduğunu vurğulayan millət vəkili, Prezident İlham Əliyevin rəhbərliyi altında xalqımızın yeni-yeni uğurlar əldə edəcəyindən əmin olduğunu bildirib.
ƏTRAFLI
Azərbaycan Dövlət Pedaqoji Universitetinin rektoru, professor Cəfər Cəfərov Prezident İlham Əliyevin rəhbərliyi ilə Silahlı Qüvvələrimizin əldə etdiyi tarixi zəfərin önəminə toxunub, məhz bu zəfər sayəsində ərazi bütövlüyümüzün, suverenliyimizin bərpa edildiyini vurğulayıb. 44 günlük Vətən müharibəsi şəhidləri arasında ADPU-nun da məzunlarının olduğunu bildirən rektor, şəhidlərin xatirəsinin əziz tutulduğunu, onların hər zaman hörmət və ehtiramla yad edildiyini bildirib.
Nərimanov Rayon İcra Hakimiyyətinin başçı Elgin Həbibullayev də çıxışında 44 günlük Vətən müharibəsindəki tarixi zəfərin Azərbaycanın dünyadakı nüfuzunu artırdığını, dövlətimizin inkişafı üçün yeni imkanlar və perspektivlər yaratdığını bildirib.
İcra başçısı qeyd edib ki, müasir dövrdə müharibə yalnız hərb meydanında raketlərlə aparılmır. Həm də sosial şəbəkələrdə, digət platformalarda aparılır. Buna görə də hər kəsin milli maraqlarımızın müdafiəsində xüsusi fəallıq və ayıq-sayıqlıq sərgiləməsi vacibdir.
Azərbaycan Dövlət Pedaqoji Universitetinin müəllimi, ehtiyatda olan polkovnik Qabil Talıbov, Azərbaycan Dövlət Pedaqoji Universitetinin İncəsənət və fiziki tərbiyə fakültəsinin IV kurs tələbəsi Ülvi Həsənzadə, Azərbaycan Respublikasının Prezidenti yanında Dövlət İdarəçilik Akademiyasının Siyasi İdarəetmə fakültəsinin Beynəlxalq münasibətlər ixtisası üzrə IV kurs tələbəsi Nəzrin Abdullayeva, 44 günlük Vətən müharibəsi veteranı Xəzər Abdullayev də 44 günlük Vətən müharibəsi və 2023-cü ilin 19-20 sentyabr tarixlərində gerçəkləşən suverenliyin tam bərpası əməliyyatının önəmindən danışıblar. Natiqlər qeyd ediblər ki, məhz Azərbaycan Respublikası Prezidenti İlham Əliyevin qətiyyəti, Silahlı Qüvvələrimizin fədakarlığı, xalqımızın həmrəyliyi tarixi zəfərimizi təmin edib, uzun illərdir davam edən işğal probleminə son qoyub.
Azərbaycan Respublikasının Prezidenti yanında Dövlət İdarəçilik Akademiyasının tədris işləri üzrə müavini professor Əlikram Abdullayev də konfransda iştirak edib.
Konfransın sonunda təhsildə fərqlənən tələbələrə Fəxri Fərmanlar verilib, xatirə şəkli çəkilib.
“Ədəbiyyat və incəsənət”
(07.10.2025)
Respublika Uşaq Kitabxanası Kitab Sərgisində
5-6 oktyabr 2025-ci il tarixlərində Respublika Uşaq Kitabxanası XI Bakı Beynəlxalq Kitab Sərgisində uşaqlar üçün nəzərdə tutulan tədbirlər proqramı ilə çıxış edib. Proqram çərçivəsində uşaqların oxu mədəniyyətinin və yaradıcılıq bacarıqlarının inkişafına yönəlmiş oxu saatları, kitab təqdimatları və master-klasslar təşkil olunub.
“Ədəbiyyat və incəsənət” portalına kitabxanadan verilən məlumata görə, müasir uşaq ədəbiyyatının tanınmış nümayəndələri Mehriban Nağıyeva, Gülzar İbrahimova və Zahirə Cabir sərginin qonağı olublar. Müəlliflərlə keçirilən oxu saatları uşaqların həm maariflənməsinə, həm də əylənməsinə xidmət edib.
İlk görüşdə yazıçı Mehriban Nağıyeva 143 nömrəli tam orta məktəbin şagirdləri ilə bir araya gələrək vətənpərvərlik mövzusunda şeirlər səsləndirib, əsərlərindən parçalar oxuyub. Sorğu-sualda fəallıq göstərən uşaqlara müəllif tərəfindən imzalı kitablar hədiyyə olunub. Daha sonra yazıçı Gülzar İbrahimova ilə keçirilən görüşdə uşaqlarla nağıllar əsasında müzakirələr aparılıb, maarifləndirici mövzularda söhbətlər edilib və məntiq oyunu təşkil olunub.
Tədbirin davamında yazıçı Zahirə Cabirin “Səndəli, Fəli və Şəli” adlı qaravəlli kitabının təqdimatı baş tutub. Kitabın rəssamı Ayişə İlqar qızıdır. Müəllif təqdimatda kitabın əsas qəhrəmanları və ideyası haqqında ətraflı məlumat verib. Bununla yanaşı, kiçik yaşlı oxucuların təqdimatında Sevinc Nuruqızının “Melissa” adlı kitabından kompozisiya təqdim olunub. Təqdimatda əsərin baş qəhrəmanı Melissa obrazı uşaqlara əsərin məzmununu təqdim edib, kitabxana əməkdaşı tərəfindən hazırlanan kukla isə aktiv iştirak edən uşaqlardan birinə hədiyyə olunub.
Sərginin növbəti hissəsində türk uşaq yazarı və rəssam Məryəm Kurt tərəfindən uşaqlara master-klass keçirilib. Rəssam uşaqlara boyama texnikaları və rəsm sənətinin əsas prinsipləri barədə məlumat verib, onların yaradıcılıq bacarıqlarının inkişafına dəstək olub.
F.Köçərli adına Respublika Uşaq Kitabxanasının sərgi çərçivəsində keçirdiyi bu tədbirlər uşaqların mütaliəyə marağının artırılmasına, yaradıcılıq potensiallarının üzə çıxarılmasına və asudə vaxtlarının səmərəli təşkilinə xidmət edib.
“Ədəbiyyat və incəsənət”
(07.10.2025)
S.Yeseninin yubileyinə həsr olunmuş musiqili-poetik gecə
Bakı Şəhər Mədəniyyət Baş İdarəsinin Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının informasiya dəstəyi, “Müasir şeirlər” poeziya klubu və “Doqquz hiss” İncəsənət Mərkəzinin birgə təşkilatçılığı ilə tanınmış rus şairi Sergey Yeseninin anadan olmasının 130 illiyinə həsr olunmuş “Ruh cənnətə həsrətdir” adlı musiqili-poeziya gecəsi keçirilib. Bu barədə “Ədəbiyyat və incəsənət” portalına Kitabxanadan məlumat verilib.
Kitabsevərlər və poeziya həvəskarları şeir, musiqi və gözəlliklə dolu bir gecə yaşayıblar.
Gecəni giriş sözü ilə AYB-nin üzvü, Ümumdünya Yazıçılar Təşkilatının (WOW) üzvü, M.Ş.Vazeh adına Mərkəzi Kitabxananın fəal oxucusu Lalə Həsənova açdı.
İlham və ülvi söz ab-havasında istedadlı qiraətçilərin ifasında şairin sevimli şeirləri səsləndi. “SanSara” Beynəlxalq Gimnastika, Akrobatika və Rəqs Akademiyasının hazırladığı möhtəşəm rəqs nümayişi gecənin parlaq bəzəyi oldu.
S.Yeseninin sətirləri xüsusi əhval-ruhiyyə yaradırdı. Yazılmasından bir əsrdən artıq vaxt keçməsinə baxmayaraq, onlar öz təravətini, saflığını və dərinliyini itirməmişdir. Şairin yaradıcılığı yaddaşlarda yaşayır, poeziyanın sehrini qoruyur və dünyanın hər yerində insanların qəlblərinə toxunmaqda davam edir.
Poeziya gecəsinin iştirakçıları rəssamlıq studiyasının direktoru, Azərbaycan Rəssamlar İttifaqının üzvü Fidan Alimova, Yasamal rayon Mərkəzləşdirilmiş Kitabxana Sisteminin direktoru, Fəxri mədəniyyət işçisi Lətifə Məmmədova, bəstəkar və teleaparıcı Oksana Vəliyeva, aktrisa Renata Asyanova, poeziyasevərlər Məryəm Xaspolatova, Günatay Hüseynova, Samirə Şıxıyeva, Bayram Məhərrəmov, Marina Kolomazova, Alina Dudinova, Məsumə Qasımova, Zarema Manafova, yazıçı Nell Currie və Elmira Əsədova S.Yeseninin şerlərini söylədilər.
Gecənin əsas mövzusu S.Yeseninin Bakıya sevgisi və məhəbbəti, onun İran təranələri olub. İştirakçılar yazıçı-publisist, M.Ş.Vazeh adına Mərkəzi Kitabxananın Fəxri oxucusu R.Mirzəzadənin “Salam, Sergey Yesenin” kitabı ilə də tanış oldular.
Hər bir tamaşa sadəcə oxumaq deyil, təkrarolunmaz təcrübə idi – Yeseninin sətirlərini dolduran obrazların və duyğuların canlanması. Söz, musiqi və rəqsin vəhdəti gecəni əsl ruh şənliyinə çevirdi, burada şeir və incəsənət birləşdi.
“Ədəbiyyat və incəsənət”
(07.10.2025)
Cavanşir Feyziyev: “Türk dövlətləri birliyi. Qlobal inteqrasiyanın türk modeli”
XI Bakı Beynəlxalq Kitab Sərgisi çərçivəsində Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin təşkilati dəstəyi ilə Milli Məclisin deputatı, fəlsəfə doktoru Cavanşir Feyziyevin “Türk dövlətləri birliyi. Qlobal inteqrasiyanın türk modeli” kitabının yeni nəşrinin təqdimatı və imza günü keçirildi.
“Ədəbiyyat və incəsənət” portalına Mərkəzləşdirilmiş Kitabxana Sistemindən verilən məlumata görə,“Şərq-Qərb” nəşriyyatının baş redaktoru, filologiya üzrə fəlsəfə doktoru Nərgiz Cabbarlı tədbiri giriş sözü ilə açaraq kitabın məzmunundan yüksək elmi-nəzəri əhəmiyyətindən danışaraq vurğuladı ki, müəllif əsasən dünya türklüyünün bütövlük və gerçəkliyi üzərində dayanaraq real faktlar əsasında vacib məqamları əsərdə işiqlandırıb. Kitabda türk dövlətçiliyinin genezisi, türk sivilizasiyasının, türk siyasi mədəniyyətinin dərin qatları, ümumtürk birliyi ideyasının tarixi təkamülü, türkçülüyün mahiyyəti yeni yanaşma kontekstində təhlil edilir.
Monoqrafiyanın türk dünyasının tarixi və bu günü haqqında sanballı bir araşdırma əsəri olduğunu tədbir iştirakçılarının diqqətinə çatdıran Azərbaycan Milli Elmlər Akademiyasının prezidenti, akademik İsa Həbibbəyli kitabın elmi və tarixi əhəmiyyətindən danışaraq, əsərdə türk dünyasının gələcəyi ilə bağlı mühüm inkişaf istiqamətlərinin perspektivləri haqqında mülahizələrin yer aldığını, türkdilli ölkələr arasında inteqrasiyanın prinsip və strategiyası barədə yeni təkliflərin irəli sürüldüyünü vurğuladı. Akademik qeyd etdi ki, kitabda türk dünyasının birləşməsi üçün irəli sürülən mülahizələrdə demokrat, hüquq və ədalətlik prinsipləri önə çəkilib və bu qaydalar hər zaman qədim türklərin yaşam tərzi olub. Əsər elm ocaqları üçün dolğun dərs vəsaitidir, elmi araşdırmaçılar, müəllim və tələbələr kitabdan dəyərli məlumatlar alacaqlar. Çıxışının sonunda türk dünyası qarşısında xidmətlərinə görə Cavanşir Feyziyevə Türk Dünyası Araşdırmaları Beynəlxalq Elmlər Akademiyasının təsis etdiyi “Atatürk” mükafatını təqdim edən İsa Həbibbəyli qardaş Türkiyə elm adamlarını təbrikini müəllifə çatdırdı.
Şimali Kipr Türk Cumhuriyyətinin ölkəmizdəki təmsilçisi Ufuk xanım Turganer bu akademik nəşrin və onunla bağlı keçirilən elmi müzakirənin türk ideoloji fikrinə qatdığı dəyərdən, kitabın müəllifi Cavanşir Feyziyevin elmi yaradıcılığı ilə yanaşı, eyni zamanda Azərbaycan-ŞKTC Parlamentlərarası əlaqələr üzrə işçi qrupun sədri kimi hədəfli və çoxşaxəli fəaliyyətindən söz açdı. Şimali Kipr Türk Cumhuriyyətinin ölkəmizdəki təmsilçisi U.Turganer bu akademik nəşrin və onunla bağlı keçirilən elmi müzakirənin türk ideoloji fikrinə qatdığı dəyərdən, kitabın müəllifi Cavanşir Feyziyevin elmi yaradıcılığı ilə yanaşı, eyni zamanda Azərbaycan-ŞKTC Parlamentlərarası əlaqələr üzrə işçi qrupun sədri kimi hədəfli və çoxşaxəli fəaliyyətindən söz açdı.
“Şərq-Qərb” ASC-nin Nəşriyyat Departamentinin direktoru Sevil İsmayılova, ADPU-nun professoru Elman Quliyev, Türk Dünyası Strateji Araşdırmalar Mərkəzinin rəhbəri Naci Yengin və b. çıxışlarında vurğuladılar ki, Türk Dövlətləri Birliyi ideyasının ilk dəfə olaraq sistemli şəkildə konseptual bir model kimi, geniş və dərin təhlillər əsasında irəli sürülməsi, kitabda 300-dən çox elmi ədəbiyyat və mənbədən istifadə olunması, əksəriyyətinin türk, ingilis, rus və digər xarici mənbələr olması kitabın müstəsna dəyərini daha da artırır.
Tədbirin bədii hissəsində MKS-in direktoru, tarixçi-alim, Fəxri mədəniyyət işçisi Lətifə Məmmədova çıxışında Cavanşir Feyziyevin maarifçi ziyalı kimi yüksək insani məziyyətlərindən, gənc nəslin təhsilinə göstərdiyi xidmətlərdən söz açaraq ona rəhbərlik etdiyi kitabxananın Fəxri oxucusu Diplomunu təqdim etdi. O, Mahmud Kaşqari adına Beynəlxalq Fondun prezidenti Cavanşir müəllimin rəhbərliyi ilə keçirdiyi respublika və beynəlxalq miqyasda konfranslardan danışıb, millət vəkilinin bu yaxınlarda Türkiyənin ucqar əyalətlərindən olan Toqat vilayətinin Rəşadiyyə bölgəsində kitabxana yaradılmasına yaxından göstərdiyi dəstəyi iştirakçıların diqqətinə çatdırıb.
AMEA-nın Folklor İnstitunun əməkdaşı, istedadlı sənətkar, aktrisa Həlimat Sultanın Yunus Əmrə yaradıcılığına müraciətlə hazırladığı “Eşq” kompoziyası, şair Qadir Hüseynovun Cavanşir Feyziyevə həsr etdiyi şeirin Azərbaycan Milli Konservatoriyasının nəzdində İncəsənət Gimnaziyasının şagirdi Zəhra Sayadzadə səsləndirdi, bədii qiraətçi Bəhiyyə Nağıyevanın çıxışı, tanınmış xanəndə, muğam ustası, müəllim Maya Cəbrayılovanın “Çanaqqala” türküsü tədbir iştirakçılarının alqışları ilə qarşılandı.
Tədbir iştirakçılarına dərin minnətdarlığını ifadə edən müəllif Cavanşir Feyziyev müasir dünyada baş verən qlobal proseslərin türk dünyasından da yan keçmədiyini qeyd edərək, yeni şəraitdə türk dövlətlərinin inteqrasiya proseslərinə fəal şəkildə qoşulmaq zərurətindən danışdı. O, 30 il əvvəl müstəqilliyini bərpa etmiş türk dövlətlərinin tarixi, milli, mədəni birliyi və ortaq sivilizasiya mənsubiyyəti əsasında vahid siyasi platforma ilə çıxış edə biləcəyini vurğuladı. Bu gün dünya siyasi xəritəsində yer alan müstəqil türk dövlətlərinin beynəlxalq hüquq əsasında və bərabərhüquqlu müttəfiqləşməyə dayanan siyasi birliyinin mümkünlüyünü və türkdilli xalqların gələcək taleyi baxımından bu birliyin taleyüklü məsələ olduğunu qeyd edən deputat, mövcud türk dövlətlərinin gələcək inteqrasiya mərhələlərinə daha fəal dəstək verəcəklərinə inandığını söylədi.
Sonda Cavanşir Feyziyev oxucuların suallarını cavablandırdı və çoxsaylı oxucularına “Türk dövlətləri birliyi. Qlobal inteqrasiyanın türk modeli” kitabını imzaladı.
Təqdimatda ziyalılar, ictimaiyyət və KİV nümayəndələri, tələbələr, müəllim və şagirdlər, kitabxanaçılar və geniş oxucu kütləsi iştirak etdi.
“Ədəbiyyat və incəsənət”
(07.10.2025)
Bakı Uşaq və Gənclər Teatrı yeni layihəyə start verdi
Leyla Həşimova,
Bakı Uşaq və Gənclər Teatrının ədəbi hissə rəhbəri, “Ədəbiyyat və incəsənət” üçün
Bakı Uşaq və Gənclər Teatrı yarandığı ilk gündən çox maraqlı layihələri ilə özünü yenilikçi teatr kimi sübut edib. Əlbəttə, bütün ideyalar bilavasitə teatrın bədii rəhbəri və direktoru, bu kollektivin yaradıcısı, Əməkdar artist İntiqam Soltanın təfəkkürünün məhsuludur. Məhz bu maraqlı ideyalarına, layihələrinə, yeniliklərinə görə bu kollektiv başqa teatrlardan seçilir və tamaşaçıların da bu teatra marağını artırır.
Kollektiv bu maraqlı layihələrinə, yeniliklərinə görə xarici ölkələrdəki çıxışlarına görə hər yerdə maraqla qarşılanır. Məhz ona görə də yarandığı 24 ildə, təkcə xarici ölkələrdən otuzdan çox mükafat gətirib.
Qələbəmizin 5 illiyinə həsr olunmuş “Addım-Addım Vətəndə” adlanan yeni layihə çərçivəsində kollektiv ayda bir gün Azərbaycanın müxtəlif bölgələrində fəaliyyət göstərən teatr kollektivləri ilə əməkdaşlıq etməklə, “açıq qapı” prinsipi ilə birgə tamaşa və tədbirlər keçirmək niyyətindədir.
Layihənin əsas məqsədi gənclərdə vətənpərvərlik ruhunun yüksəldilməsi, Bakı Uşaq və Gənclər Teatrının bölgə teatrları ilə arasındakı əməkdaşlığı gücləndirmək, regionların mədəni inkişafına dəstək vermək, bölgə tamaşaçıları ilə birbaşa ünsiyyətdə olmaqdan ibarətdir.
Sözügedən layihə 30 sentyabr 2025-ci il tarixdə ilk olaraq Lənkəran Dövlət Dram Teatrı ilə birgə həyata keçirilib və tamaşaçılar tərəfindən çox maraqla qarşılanıb.
Tədbirin aparıcıları Lənkəran Dövlət Dram Teatrının aktyoru Səyad Əliyev, Bakı Uşaq və Gənclər Teatrının aktyoru Mehman Piriyev tamaşaçıları salamladıqdan sonra hər iki teatrın yaranma tarixi, repertuarı, iştirak etdiyi beynəlxalq və daxili festivallar haqqında ətraflı məlumat veriblər.
Bu da iki teatr kollektivi haqqında tamaşaçılarda əlavə bilgi yaradıb.
Daha sonra səhnəyə hər iki teatrın direktorları - Azərbaycan Respublikasının Əməkdar mədəniyyət işçisi, Dağıstan Respublikasının Əməkdar artisti, rejissor, aktyor Laləzar xanım Hüseynovanı, Azərbaycan Respublikasının Əməkdar artisti, rejissor, aktyor İntiqam Soltanı dəvət ediblər. Laləzar xanım Hüseynova Bakı Uşaq və Gənclər Teatrının kollektivini salamlayaraq, bu layihənin əhəmiyyətini xüsusi vurğulayaraq onlara uğurlar arzulayıb. Bakı Uşaq və Gənclər Teatrının direktoru, bədii rəhbəri, layihənin rəhbəri İntiqam Soltan Lənkəran Dövlət Dram Teatrına Bakı Uşaq və Gənclər Teatrının layihəsinə verdiyi dəstəyə görə təşəkkürnamə təqdim edib.
Proqramda Bakı Uşaq və Gənclər Teatrının repertuarında olan tamaşalardan parçalar - "Ağıllı Tülkü" (Yapon xalq nağılı, rejissor Respublikanın Əməkdar artist İntiqam Soltan), "Danışan Gəlincik" (Abdulla Şaiq, rejissor İlhamə xanım Əhmədova), "Şəngülüm, Şüngülüm, Məngülüm" (Azərbaycan Xalq nağılı, rejissorlar Mehman Piriyev və Rauf Huseynli), Tofiq İsgəndərlinin təqdimatında illuziya nömrələri, Lənkəran Dövlət Dram Teatrının aktyorları Gülər Kərimova, Günel Bağırova, Murad Kərimli, Cəfər Səlimovun ifasında mahnı və rəqs nömrələri nümayiş olunub.
Bu layihəyə teatr ilinin sonunda Bakı şəhərində bölgə teatrlarının iştirakı ilə festivalla yekun vurmaq niyyətindəyik. Və inanırıq ki, bu layihəmiz də başqa layihələrimiz kimi maraqla qarşılanacaq.
Bəli. Bu gün elm və texnikanın çox inkişaf etdiyi bir vaxtda, hər bir tamaşaçının əlində ağılll telefon olduğu bir vaxtda insanların internetdən, tik-toktdan, votsapdan, Yutubdan yüksək səviyyədə istifadə etdiyi dönəmdə tamaşaçıları teatralara cəlb etmək üçün teatrlar yüksək peşəkar tamaşalar hazırlamaqla yanaşı, həm də özlərinin maraqlı ideyaları ilə texnologiyadan bir neçə addım qabaqda olmalıdır ki, onları yuxarıda sadaladığım vasitələrdən ayırıb, teatr tamaşalarına cəlb etsinlər. Bax, belə olduqda teatr həqiqətən də bir müqəddəsliyini qoruyub saxlaya biləcək.
“Ədəbiyyat və incəsənət”
(07.10.2025)
Marqarita Al, Semicenk və Şarlotta Perelli - 7 OKTYABR
Kənan Məmmədli, “Ədəbiyyat və incəsənət”
Bu gün 7 oktyabrdır.
Bu gün dünyaya gəlmiş mədəniyyət xadimləri kimlərdir? Əlifba sırası ilə təqdim edirəm:
KİRA NİKOL KOSARİN
Amerikalı aktrisa və musiqiçi. Nickelodeon telekanalında gedən “İldırım adamlar” teleserialı ilə məşhurlaşlb. Fibi obrazına çoxu məftun olub.
İlk albomu - “Markasız0 2029-cu ildə çıxıb, bu dəfə Kira musiqi aləmində sevilib.
1997-ci ildə Nyu-Cersidə anadan olub.
MARQARİTA AL
Qazax əsilli rus şairi, rus avanqardizminin və kosmizminin parlaq nümayəndəsi. Ümumdünya Yazıçılar Təşkilatının (WOW) prezidentidir.
Dünya ədəbiyyat xadimlərinin həmrəyliyi uğrunda fəal mübarizdir.
2019-cu ildə Bakıda, Heydər Əliyev Fondunun həmtəşkilatçılığı ilə keçirilən Avrasiya materikinin LiFFt festivallar festivalına rəhbərlik edib.
2021-ci ildə Bakıda keçirilən Nizami Gəncəvi Beynəlxalq Forumunda spiker olub.
4 poetik kitabı bir neçə dilə tərcümə olunub.
1959-cu ildə Alma-atada anadan olub.
SEMİCENK
Əsl adı Cenk Baş - yeni dalğa tanınmış türk müğənnisi, Eva Records albom şirkətinin siması.
“Düşer Aklıma” sinqlı ilə məşhurlaşıb. Funda Ararla oxuduğu “Al sevgilim” dueti isə YouTube platformasında miluonlarla izləmə sayı əldə edib.
1998-ci ildə Orduda dünyaya gəlib.
ŞARLOTTA PERELLİ
İsveçrəli müğənni, 1999-cu il Avroviziya Musiqi Yarışmasının qalibi.
Həmin il çıxmış Charlitte albomu ona hədsiz populyarlıq gətirib. Disko musiqisi ənənələrini yaşadan azsaylı müğənnilərdəndir.
1974-cü ildə doğulub.
Allah bütün vəfat edənlərə rəhmət eləsin, sağ olanlara cansağlığı versin!
“Ədəbiyyat və incəsənət”
(07.10.2025)
Güney Azərbaycan Ədəbiyyatı Antologiyasında Yalçın Türkayın “Düşünmək ağrımız bizim” şeiri
“Ədəbiyyat və incəsənət” portalının Güney Azərbaycan Ədəbiyyatı Antologiyası layihəsində Təbriz təmsilçimiz Əli Çağlanın növbəti təqdim etdiyi şair Təbrizdə yaşayan Yalçın Türkaydır.
Şüirlərin orfoqrafiyasına toxunulmayıbdır.
Yalçın Türkay
Təbriz
DÜŞÜNMƏK AĞRIMIZ BİZİM...
Sezmək zorunda
Olmamağımız üzrə,
Düşünməyin -
“Baş ağrı”-sına dəyməz-”dir(liyini)”
Başa düşüb - düşərkən
Gündəm həyatın
Ənənəvi gedişatına qoşulduq!
İşsiz ikən düşünmək
“Elə bətər bir iş deyil”-diri
Iliyimizlə mənimsədiyimiz üzdən
Proses keçirə biləcəyimiz açıdan
Fəlsəfəni fantastik”-dir” düşünüb,
Səhər-səhər yola düşdük.
Uğur qazanacağımızı inanaraq
Alışaraq, yanaraq...
Bir də -
Yandığımız ucbatından
Yanmağımızı anaraq
Səhər- səhər yola düşdük...
Səhər-səhər yürüşdük...
...İşsiz ikən düşünmək
“Elə bətər bir işdə deyil”-diri
Düşünərək yürüşdük!
Başımızın ağrımasını
Tənimizin ağrımamasına
Tərcih bilərəkdən
Bilərəkdən
Əkdən
Dən...
“Ədəbiyyat və incəsənət”
(07.10.2025)
ANAR, “Səssizlik”
Azərbaycan Ədəbiyyat Fondunun “Yazıçı” nəşriyyatında Xalq yazıçısı Anarın “2=3+4, yaxud iki ailədə üç Xalq yazıçısı, dörd Xalq şairi” adlı kitabı işıq üzü görüb. Nəfis tərtibatlı, illüstrasiyalı kitab Azərbaycan ədəbiyyatı irsinə böyük töhfələr vermiş iki nəsildən, onlar barədə həqiqətlərdən və onların ədəbi nümunələrindən ibarətdir.
608 səhifəlik bu unikal kitabı tərtib edən Xalq yazıçısı Anar uzun illər ərzində təkcə öz yazdıqlarını yox, qəhrəmanlarının – Səməd Vurğun, Rəsul Rza, Nigar Rəfibəyli, Vaqif Səmədoğlu, Ənvər Məmmədxanlı və Yusif Səmədoğlunun yazdıqlarını eyni ideya-estetik yaradıcılıq məcrasına qoşaraq, onları eyni axında birləşdirərək ən yeni ədəbiyyatın ən milli paradiqması olaraq təqdim edibdir.
“Ədəbiyyat və incəsənət” portalı kitabdan hissələri oxucularına təqdim edir. Anar qəhrəmanlarının ən populyar əsərlərini bir daha yaddaşlarda təzələyir:
ANAR, ŞEİRLƏR
SƏSSİZLİK
Hər il budaqlarda təzə yarpaqlar
tir-tir titrəşər,
pıç-pıç pıçıldar,
sonra
sovrular,
xəzəl olar,
ayaqlar altda
Xış-xış xışıldar.
Torpağın altında ağac kökləri
yüzillər boyu qalar
səssiz.
Dağlarda ruzigar
ulayar, ulayar...
Dağlar səssiz.
Cır-cır cırıldar
mancanaqlar,
yerin dibində
susuz quyular –
səssiz.
Qayalara çırpılar,
uğum-uğum uğuldar dalğalar.
Qayalar durar
Səssiz.
Göydə şimşəklər çaxar,
göyü ildırım yaxar,
göylər gur-gur guruldar.
Ulduzlar – səssiz.
Pır-pır pırıldar quşlar,
Yuvalar səssiz.
Şır-şır şırıldar sular,
Sular altında daşlar
əbədi yatar
Səssiz.
Meydanlarda kütlələr
hey çığırar, bağırar.
Sızım-sızım sızlayar
qəlbimdəki yaralar,
sızıldar səssiz.
16 oktyabr 2003
Strasburq
“Ədəbiyyat və incəsənət”
(07.10.2025)
“Biri ikisində” Adil Quliyevin hekayəsi ilə
“Ədəbiyyat və incəsənət” portalının “Ulduz” jurnalı ilə birgə Biri ikisində layihəsində bu gün sizlərə Adil Quliyevin “Təpələr” hekayəsi təqdim edilir.
Adil QULİYEV
Sankt-Peterburq
TƏPƏLƏR (XƏYALİ CƏNNƏT)
"Bizim özümüzə ən çox oxşayan
nəsnələr – xəyallarımızdır".
Viktor Hüqo
İstidir. Sanki bu dəqiqə başımın içində beynim qaynayacaq. Od üstündə pıqqıldayan çaydanın lüləyindən havalanan buxar kimi burnumun deşiklərindən qaynar buğ çıxacaq.
Avqust Azərbaycanda ilin ən isti ayıdır. Günortalar insanlar, adətən, evdən bayıra çıxmırlar, ya da ağacların və ya binaların kölgəsində daldalanmağa çalışırlar. Bəzən heç bu da onları dözülməz istidən qorumur. Günəş osminoq kimi yandırıcı şüaları ilə sürünərək hər yerə sirayət etməyə, ondan gizlənən bütün canlıları tapmağa çalışır.
Mən kəndimizin kənarında bitən qocaman, qollu-budaqlı çinar ağacının kölgəsində gizlənmişdim. Ağacın torpaqdan çıxan, damara bənzəyən köklərinin üstündə yerimi rahatlayıb tarlaya tərəf baxırdım. Əkin sahəsinin qurtardığı yerdə kiçik təpəciklər sıra ilə dəvə karvanı kimi düzülmüşdülər. Təpələr gur işıq selinin fonunda qırıq-qırıq əks olunur, ilğım adlanan optik görüntü yaradırdılar.
Bizim kəndimiz düzənlikdə yerləşir. Onu yovşan, dəvətikanı, saksaul bitən ucsuz-bucaqsız sahələr dövrəyə alıb. Səhra bitkisi adlandırılan saksaul şoran torpaqda yetişən, quraqlığa dözümlü, balıq pullarına oxşayan boz yarpaqlı, ağac gövdəli xırda koldur.
Yayda biz tərəflərdə, adətən, yağış yağmır. Bütün yaşıllıqları – otları, kolları günəş yandırıb külə döndərir. Boz təpələrin fonunda qurumuş sahələr kədərli bir mənzərə yaradır. Uşaq vaxtı bir dəfə fikrimə gəldi ki, görəsən, o sirli boz təpələrin arxasında nə var? Bu təpələr insan gözündən inadla nəyi gizlədir? Bəlkə, orda xurma ağacları bitən yaşıl çiçəkli çəmənliklər var?
İnsan hər şeyi bilməyə can atan varlıqdır. Mənə elə gəlir ki, meymunun pəncəsində tutduğu ağac onu insana çevirməyib. Əksinə, bu heyvanın hər şeyi sınamaq və öyrənmək istəyi zaman keçdikcə onu şüurlu varlığa çevirib.
Mən, bəlkə də, yüz dəfə kəndin kənarda dayanıb o cansıxıcı təpələrə baxmışam. Təsəvvürümdə o dağların arxasında yaşıl düzləri, meşələri, gur sulu çayları, güzgü kimi gölləri olan bir dünya canlandırırdım: orda quşlar cəh-cəh vurur, rəngbərəng tovuzquşları gəzir, maraqlı, görmədiyim heyvanlar yaşayırdı.
Ordakı təpələr məni maqnit kimi özünə çəkirdi. Mən ora tək getməyə qorxurdum. Təpələr çox uzaq idi. Həmin yerə gedib çatmaq üçün tikanlı kolluqlarla dolu çöllükdən keçmək lazım idi. Oralarda, yəqin ki, vəhşi heyvanlar da vardı. Lakin dünyanı gəzmək, öyrənmək istəyi mənim uşaq qəlbimə rahatlıq vermirdi. O məchul yerlər barədə suallarıma atam həmişə eyni cavabı verirdi: “Oralarda elə bir maraqlı şey yoxdur. Təpənin bu tərəfindəki kimi, ora da düzənlikdir. Böyüyəndə gedib özün görərsən”. Ancaq mən ona inanmırdım. O oğlunun – balaca uşağın o uzaq səfərdə azmağını istəmirdi.
Nə qədər çalışsam da, sehrli təpələrin arxasında gizlənən, xəyalımda yaratdığım və canlandırdığım cənnəti görmək arzumu boğa bilmədim. O kiçik dağların arxasına gedən yol nə qədər təhlükəli və çətin görünsə də, mənim yel qanadlı xəyallarımın qarşısını heç nə ala bilməzdi. Uşaq fantaziyasının və arzularının sərhədi yoxdur. Xəyallarımız ən uca dağların zirvəsinə qalxar, saniyədə on kilometrlərlə yol qət edib öz ünvanına çata bilər. Uşaq təsəvvürümdə canlandırdığım dünyanı görmək arzusu saksaul kolluqları basmış çöllərdə azmaq qorxusundan və yolda vəhşi heyvana, qurd-quşa rast gəlmək təhlükəsindən güclü idi.
Bir dəfə səhər tezdən bir şüşə su götürüb xəyalımda yaratdığım möcüzələr ölkəsinə yollandım. Əvvəlcə heç nədən qorxmurdum, hər şey yaxşı idi. Görünür ki, insanlar açıq, geniş yerlərdə özlərini daha güvənli hiss edirlər.
Bu təpələrə yol yox idi. Mən yovşan, sıx dəvətikanı kolluqları basmış və ara-sıra cırtdan saksaul kolları bitən düzənliklə addımlayır, arzuma doğru inamla gedirdim. Susuzluqdan cadar-cadar olmuş torpağı ağ duz təbəqəsi örtmüşdü. Hər nəfəs aldıqca torpaqdan gələn duz iyini dodaqlarımda və ciyərlərimdə hiss edirdim. Yerdəki dərin çatlar susuzluqdan ciyəri yanan insan dodaqlarına bənzəyirdi. Hərdən özümlə götürdüyüm içməli suyu bu suya həsrət qalmış, çat-çat olmuş torpağa tökmək istəyirdim. Heyhat, bu bir şüşə su onun dərdinə çarə olmazdı.
Yolumu bir azdan sıx saksaul kolluqları kəsdi. Əvvəllər mən bu cırtdan ağacların belə qol-budaqlı və böyük olduğunu görməmişdim. Bu qorxunc, sıx meşəliyə girməzdən əvvəl dincəlməyi qərara aldım. Ayaqlarım yorğunluqdan göynəyirdi. Ağcaqanadlar bədənimdə sağ yer qoymamışdı, hər yerim bərk qaşınırdı.
Günəş artıq ən yüksək nöqtəsinə çatmışdı, onun qızmar şüaları amansızlıqla hər yeri qarsmağa başlamışdı. Bu dözülməz istiyə baxmayaraq, hər yandan quşların cəh-cəhi, həşəratların ciyiltisi gəlirdi. Təəssüf ki, bir hovur dincələ bilmədim. Yorğun yolçunu görən ac ağcaqanadlar və mığmığalar qurbanlarına hər tərəfdən hücum etməyə başladılar. Saksauldan qopartdığım budaqla ora-buramı yelləyir, özümü onlardan qorumağa çalışırdım. Ancaq həyasız həşəratlar, görünür məndən əl çəkmək istəmirdilər. Yoluma davam etməyim lazım idi, yoxsa bu azğın qaniçənlər mənim qanımı son damlasınadək soracaqdılar.
Yolu azmamaq üçün saksaul meşəsinin dərinliyindən yan keçib məqsədimə doğru inamla getməyə başladım. Bir azdan cırtdan ağac meşəsini yarıdan bölən arxa rast gəldim, onun aşağısında bir cığır vardı. Mən ilan kimi qıvrılan əyri-üyrü, ensiz yolla çox getdim. Yolun sonu görünmürdü.
Artıq peşman olmaq üzrəydim. Birdən qarşımda heyrətamiz, gözəl bir mənzərə açıldı. Saksaul kollarının qurtardığı yerdə geniş yaşıl çəmənlik uzanırdı. Yaşıl otluğun o biri tərəfində isə həmin əlçatmaz təpəciklər sıralanmışdı.
Təpələrin ətəyində iki göl görünürdü: biri kiçik, o birisi ondan bir qədər böyük. Onları balaca bir boğaz ayırırdı. Həmkəndlilərim bu göllərə “ağ göllər” deyirdilər. Mən onlar haqda çox eşitmişdim, amma görməmişdim. “Ağ göllər”i ilk dəfə idi görürdüm.
Göllərin ikisi də hər tərəfdən sıx qamışlıqla dövrələnmişdi. Göllər gözə, qamışlar isə onların kirpiklərinə oxşayırdı. Adama elə gəlirdi ki, yer arxası üstə uzanıb bir gözünü qıyaraq günəşə, o biri gözü ilə səmaya baxır. Hər tərəfi səs-küy bürümüşdü. Qazlar, ördəklər çığırışır, qurbağalar quruldayırdı. Sanki böyük bir simfonik orkestr nataraz, qeyri-ahənglə alətlərini kökləyirdi. Mən göllərin kənarında durub təbiətin bu əsrarəngiz gözəlliyinə tamaşa etmək, bu yerlərin gözəlliyindən zövq almaq istəyirdim. Lakin hava qaralmamış evə dönməliydim. Ona görə də vaxt itirmədən sürətli addımlarla yoluma – xəyali məkanıma doğru irəliləməyə başladım.
Təpələr kəndin kənarından göründüyü kimi deyildi və onlar bir neçə cərgədə sıralanmışdı. İlk cərgələr çox da hündür deyildi, o biri cərgə bir az onlardan hündür, daha sonrakı cərgələr daha uca idi – təbiətin yaratdığı amfiteatr. Adamlar da şəkil çəkdirəndə fotoqrafın önündə belə dayanırlar.
Birinci cərgəni tez adladım, sonra ikincini, daha sonra üçüncünü... Mən tezliklə axırıncı – ən hündür təpənin zirvəsinə çatmağa çalışırdım. Elə tələsirdim ki, gözüm ayağımın altını görmürdü, bununla da həyatımı çox böyük riskə atırdım. Yüksəkliklərin üçüncü cərgəsində ayağımı az qala nəhəng bir gürzənin üstünə basacaqdım. Bəxtim gətirdi, bu zəhərli ilanı tez gördüm, növbəti addım üçün qaldırdığım ayağımı havada saxladım.
Qorxudan az qaldı ürəyim dayansın. Gürzə başını qaldırdı, hücuma hazır vəziyyət aldı. Lakin nədənsə fikrini dəyişdi, dəcəl qız kimi mənə dilini çıxartdı və sürünüb öz işlərinin dalınca getdi. Şokdan özümə gələndən sonra yenidən yoluma davam etdim. İndi hər tərəfi – tikanlı, kollu yerləri diqqətlə nəzərdən keçirir, ehtiyatlı olmağa çalışırdım.
Daha bir sıranı ötüb buranın ən uca zirvəsi olan təpəyə çatdım. Səfərimin ali məqsədinə çatmağına iyirmi-otuz metr qalmışdı. Çox isti idi, susuzlamışdım. Şüşəni başıma çəkdim. Öz “Everest”imi fəth etməyə başladım. Son addımlarımı çətin atırdım. Təpənin başına çatanda gözlənilməz mənzərədən yerimdə donub qaldım, gözlərimdən yaş axdı.
Bu məyusluq göz yaşları, peşmançılıq göz yaşları idi. Qarşımda tikanlarla örtülmüş, yovşan, cırtdan saksaul ağacları bitən boz çöllük vardı. Təpələrin o biri üzündəki kimi. Mənə elə gəldi ki, kiminsə məkrli əli mənim xəyalımda yaratdığım cənnətimi oğurlayıb apardı. Xurma ağacları bitən, yaşıl gölləri olan vahə bir ilğım kimi yoxa çıxdı. Özümü insafsızcasına aldadılmış kimi hiss etdim. Taqətim kəsildi, yerə oturdum, dizlərimi qucaqlayıb gözümü uzaqlara dikdim. Birdən ayağımın altındakı boz, darıxdırıcı, hamının tərk etdiyi bu ölü torpağa yazığım gəldi.
İsti külək öz nəfəsi ilə sifətimi dalayır, saçlarımı sığallayır, köynəyimin içinə girib mənim uşaq bədənimi qıdıqlayırdı. Yəqin, külək də gənc səyyahın əhvalını anlayır, onunla oynamaq istəyirdi. Külək sanki mənim gözləmədiyim mənzərədən məyus olduğumu hiss eləyirdi.
Bir qədər təpədə oturandan sonra kəndə qayıtmağı qərara aldım. Evə gedəndə yolda güclü yağışa düşdüm, qəfil başlayan yağış tez də kəsdi. Halbuki bayaqdan səmada bir dənə də olsun bulud yox idi. Cənubda belə təbiət hadisələri tez-tez baş verir. Yağış nəfəsimə sərinlik və rahatlıq gətirdi. Yaş köynəyimdən bədənimə yayılan sərinliyi hiss etdim. Yağış qızmar havadan sonra lap ləzzət elədi. Hətta yorğunluğum da keçdi.
Kəndin qırağına çatanda günəş də dincəlməyə gedir, hava qaralmağa başlayırdı. Mən dayandım, cansıxıcı, boz təpələrə sarı baxdım. Yeddi rəngli göy qurşağı təpələrin üstündə körpü salmışdı. Uşaq xəyallarımın yaratdığı gözəl nağıllar aləmi, sanki mənə dostcasına salam göndərirdi.
Rus dilindən çevirdi: Dürdanə İbrahimova-Hüseynbəyli
“Ədəbiyyat və incəsənət”
(07.10.2025)
