Super User
Ankarada Əhməd Cavadın xatirəsi anılıb
13 oktyabr 2025-ci il tarixində Azərbaycan Respublikasının Türkiyədəki Səfirliyi, Səfirliyin nəzdində fəaliyyət göstərən Mədəniyyət Mərkəzi və Əhməd Cavad İnstitutu tərəfindən Azərbaycanın böyük istiqlal şairi Əhməd Cavadın vəfatının 88-ci ildönümü münasibətilə Ankara Hacı Bayram Vəli Universitetində anım tədbiri təşkil edilib.
“Ədəbiyyat və incəsənət” portalına Səfirlikdən verilən məlumata görə, tədbirdə Azərbaycan və Türkiyə ədəbiyyatı sahəsində tanınmış alimlər, diplomatlar, mədəniyyət və incəsənət xadimləri, tələbələr, eləcə də KİV nümayəndələri iştirak ediblər.
Tədbir çərçivəsində Azərbaycan Respublikasının Türkiyə Respublikasındakı səfiri Rəşad Məmmədov, Ankara Hacı Bayram Veli Universitetinin rektoru Mehmet Naci Bostancı və Milliyyətçi Hərəkat Partiyasının sədrinin baş müşaviri, Əhməd Cavad İnstitutunun rəhbəri Ruhi Ersoy çıxış edərək, Əhməd Cavadın həyatı, zəngin ədəbi irsi və Azərbaycan–Türkiyə qardaşlığının möhkəmlənməsinə verdiyi xidmətlər barədə geniş məlumat veriblər.
Əhməd Cavadın “Çırpınırdı Qara dəniz” başda olmaqla ölməz əsərlərinin təkcə Azərbaycan ədəbiyyatına deyil, bütövlükdə Türk dünyasının azadlıq və milli kimlik ruhuna xidmət edən bədii simvollar sırasında xüsusi yer tutduğu vurğulanıb.
Böyük şairin yaradıcılıq irsinin qorunması və gənc nəsillərə ötürülməsi məqsədilə təşkil olunan bu əlamətdar tədbirin Azərbaycan və Türkiyə arasında mədəni və mənəvi əlaqələrin daha da möhkəmlənməsinə mühüm töhfə verəcəyi qeyd olunub.
Tədbirin sonunda Əhməd Cavadın həyat və yaradıcılığını əks etdirən video material nümayiş etdirilib.
“Ədəbiyyat və incəsənə”
(14.10.2025)
Türk Mədəniyyəti və İrsi Fondu Qazaxıstanda “Qorqud və Böyük Çölün Sədaları” mövzulu beynəlxalq festival keçirir
Türk Mədəniyyəti və İrsi Fondu ilə Qızılorda vilayəti Akiminin birgə təşkilatçılığı ilə Qazaxıstan Respublikasının Qızılorda vilayətinin Qarmaqşı bölgəsində yerləşən “Dədə Qorqud” Memorial Kompleksində Türk xalqlarının folklor-musiqi incəsənətinə həsr olunmuş “Qorqud və Böyük Çölün Sədaları” mövzulu VII Beynəlxalq Festivalı açılıbdır.
“Ədəbiyyat və incəsənət” portalına Türk Mədəniyyəti və İrsi Fondundan verilən məlumata görə, festivalda Azərbaycan, Qazaxıstan, Qırğızıstan, Türkiyə, Özbəkistan, Tıva və Altaydan olan 200-ə yaxın sənətçi iştirak edir.Festival Qızılordanın Qazaxıstanın paytaxtı (1925-1927) elan ediməsinin 100 illiyinə həsr olunub.
Beynəlxalq tədbirin məqsədi türk xalqlarının zəngin mədəniyyətini, milli musiqisini və mənəvi dəyərlərini təbliğ etmək, beynəlxalq mədəni əlaqələri möhkəmləndirməkdir.
Təntənəli açılış mərasimində Türk Mədəniyyəti və İrsi Fondunun prezidenti xanım Aktotı Raimkulova və Qızılorda vilayətinin Mədəniyyət, arxiv və sənədləşmə idarəsinin rəhbəri Janmurat Seilov çıxış edərək festival iştirakçılarını təbrik edib və onlara uğurlar arzulayıblar.
Bayram axşamında türk ölkələrindən olan ənənəvi musiqi sənətinin tanınmış ifaçıları tamaşaçıları bənzərsiz çıxışları ilə sevindiriblər.
Növbəti gündəisətürk ölkələrinin folklor-musiqi sənətinə həsr olunmuş “Qorqud və Böyük Çölün sədaları” adlı beynəlxalq festival çərçivəsində “Dədə Qorqud irsi: Türk dünyası üçün ümumi epik dəyərlər” adlı beynəlxalq elmi-nəzəri konfrans keçirilib.
Konfransda Türk Mədəniyyəti və İrsi Fondunun prezidenti xanım Aktotı Raimkulova,Qızılorda vilayətinin Akimi cənab Nurlıbek Nalıbayev, eləcə də mədəniyyət, tarix və ədəbiyyat sahəsində türk ölkələrinin aparıcı alim və ekspertləri iştirak ediblər.
Tədbirin əsas məqsədi Dədə Qorqud irsinin və onun epik ənənələrinin türk xalqlarının mənəvi və mədəni həyatındakı əhəmiyyətinin hərtərəfli müzakirəsi, elmi tədqiqatların inkişaf etdirilməsi və beynəlxalq əməkdaşlığın möhkəmləndirilməsi olub.
Konfrans zamanı Dədə Qorqud dastanının tarixi kökləri, onun türk dünyasındakı rolu, həmçinin müasir mədəniyyət və ədəbiyyatda əksi kimi mövzular ətrafında fikir mübadiləsi aparılıb. Alimlər yeni elmi tədqiqatlarının nəticələrini təqdim edib və Dədə Qorqud irsinin öyrənilməsində müasir nəzəri yanaşmaları bölüşüblər.
Türk Mədəniyyəti və İrsi Fondunun prezidenti Aktotı Raimkulova çıxışında konfrans iştirakçılarını salamlayaraq Dədə Qorqudun böyük irsinin qorunması və dünya miqyasında tanıdılmasının əhəmiyyətini qeyd edib.
Konfrans çərçivəsində elmi məruzələr dinlənilib, panel müzakirələr aparılıb, həmçinin “Türk Folklorİrsi” Antologiya layihəsi çərçivəsində “Türk qəhrəmanlıq eposu” silsiləsinin ilk cildi təqdim olunub.
Tədbirin sonunda Qazaxıstanın Əməkdar incəsənət xadimi, T. Jurgenov adına Qazax Milli İncəsənət Akademiyasının dosenti Uljan Baybosınova “Koroğlu” poeması və Sır diyarının dastançılarına məxsus bir sıra parçaları ifa edib.
Beynəlxalq konfrans türk dünyasında epik yaradıcılıq ənənələrinin birliyinin və qarşılıqlı əlaqələrinin möhkəmləndirilməsi üçün mühüm platforma olmaqla yanaşı, türk xalqlarının mənəvi irsinin qorunması və təbliği istiqamətində əlamətdar addım kimi dəyərləndirilib.
“Ədəbiyyat və incəsənət”
(13.10.2025)
Fazil Mustafanın 60 illik yubileyi ərəfəsində 30-cu kitabı gün üzü gördü
Azərbaycan Milli Məclisinin İctimai birliklər və dini qurumlar komitəsinin sədri, Böyük Quruluş Partiyasının başqanı Dr. Fazil Mustafanın yeni kitabı – “Cəhalət gülləsi, aydınlıq çiləsi” çıxıb.
“Ədəbiyyat və incəaənət” portalı xəbər verir ki, düşüncənin dirənişi və mənəvi qələbənin manifesti kimi dəyərləndirilən kitab “AVE Print”də, Əkbər Qoşalı və Nərgiz Cabbarlının redaktorluğu ilə nəşr olunub. Əsər bir şəxsin yaşam öyküsü olmaqla yanaşı, bütöv bir millətin yaddaşında qalan mübarizənin, dirənişin və düşüncə savaşının sənədidir.
Müəllif bu kitabda şəxsinə 28 mart 2023-cü ildə törədilən terror hadisəsini yalnız özünə qarşı akt kimi deyil, topluma, dövlətçiliyinə və dünyəvi dəyərlərə qarşı yönəlmiş təxribatın ideoloji kökləri ilə birlikdə incələnir. Əsərdə hadisənin istintaq və məhkəmə mərhələləri, terrorun ideoloji-siyasi, ictimai-mədəni motivləri, cəhalətin psixologiyası, din-siyasət münasibətləri və İran təsirinə qarşı mübarizə fəlsəfi-publisistik şəkildə dəyərləndirilir.
Fazil Mustafa kitabın “Sözönü”ndə yazır: “Mənim yaşadığım olay bir insanın həyatına yönəlmiş sui-qəsd kimi görünsə də, əslində, bütöv bir toplumun gələcəyinə tuşlanmış güllələrin qara simfoniyası idi… Cəhalət vurmaq, qorxutmaq, susdurmaq istəyir; aydınlıq isə oyatmaq, düşündürmək, diriltmək anlamlarını daşıyır.”
Əsər həm publisistik ruhu, həm də elmi incələmə dərinliyi ilə seçilir və oxucunu bir həqiqətə inandırır: “Cəhalətin gülləsi insana tuşlansa da, aydınlığın çiləsi xalqın düşüncəsini qoruyur.”
Kitab, müəllifin bu il nəşr olunmuş “Azərbaycan: Qaranlıq keçmişdən aydınlıq tarixə” və “Anladım. Tanıdım. Yaşadım” əsərləri ilə birlikdə bir trilogiyanın son həlqəsini təşkil edir.
“Ədəbiyyat və incəsənət”
(13.09.2025)
Azərbaycanlı pianoçu Londonda solo konsertlə çıxış edib
Beynəlxalq müsabiqələr laureatı və Prezident təqaüdçüsü Vüsalə Babayeva London Transport Muzeyində növbəti dəfə solo konsert proqramı ilə çıxış edib.
“Ədəbiyyat və incəsənət” AzərTAC-a istinadən xəbər verir ki, Vüsalə Babayeva konsertdə xarici bəstəkarların klassik əsərləri ilə yanaşı, Üzeyir Hacıbəylinin “Sevgili Canan”, Tofiq Quliyevin “Qaytağı”, Vaqif Mustafazadənin “Mart” kompozisiyalarını da məharətlə ifa edib.
İfaçı, həmçinin dahi bəstəkar Üzeyir Hacıbəylinin 140 illik yubileyindən bəhs edərək, onun Azərbaycan musiqi mədəniyyətinə verdiyi töhfələr barədə tamaşaçılara məlumat verib. O, tamaşaçıların diqqətinə çatdırıb ki, Üzeyir Hacıbəyli Şərqdə ilk operanın müəllifi kimi dünya musiqi tarixində xüsusi yer tutur.
Virtuoz ifası ilə fərqlənən pianoçu müxtəlif musiqi obrazlarını dinləyicilərə təqdim edərək gurultulu alqışlarla qarşılanıb.
Qeyd edək ki, Vüsalə Babayeva London Transport Muzeyinin xüsusi seçilmiş 10 gənc musiqiçisindən biridir.
“Ədəbiyyat və incəsənət”
(13.10.2025)
Avropa İttifaqı üçüncü “Avropa təamları” kulinariya festivalını təşkil edib
Oktyabrın 11-də Avropa İttifaqının (Aİ) Azərbaycandakı Nümayəndəliyi üzv dövlətlərin səfirlikləri ilə birgə üçüncü “Avropa təamları” kulinariya festivalını keçirib.
Açıq havada keçirilən tədbirin məqsədi Avropa mətbəxini Azərbaycan ictimaiyyətinə nümayiş etdirmək olub.
“Ədəbiyyat və incəsənət” AzərTAC-a istinadən xəbər verir ki, xaricdən Azərbaycana gələnlərin ölkəmizin kulinariya ənənələrinə və qonaqpərvərliyinə heyran olduqlarını bildirən Aİ-nin müvəqqəti işlər vəkili Gediminas Varanaviçius deyib: “Biz Bakıda üçüncü dəfə “Avropa təamları” kulinariya festivalını keçirməyə məmnunuq. Hər kəsi Avropa ölkələrinin kulinariya aləminə təşkil etdiyimiz bu nadir səyahətdə bizə qoşulmağa və təamların unudulmaz ləzzətindən, canlı musiqi proqramından, kulinariya viktorinalarından və daha çox şeylərdən zövq almağa dəvət edirik. Əminəm ki, bu yeni mədəni təcrübə sizi Avropa İttifaqı və ona üzv dövlətlər haqqında daha çox öyrənməyə sövq edəcək”.
Tədbir zamanı Belçika, Fransa, Yunanıstan, Litva, Polşa, Slovakiya, İspaniya, İsveç və Ukrayna səfirlikləri qonaqları öz ölkələrinin mətbəxi ilə tanış ediblər.
Aİ Nümayəndəliyinin stendində tanınmış qida blogerləri Elmira Qədirova və Nəzakət Cəfərovanın iştirakı ilə ustad dərsləri nümayiş etdirilib. Yerli fermerlər Aİ layihəsinin dəstəyi ilə ərsəyə gətirdikləri orqanik ərzaq məhsullarını satışa çıxarıblar.
Həmçinin viktorinalar keçirilib, qaliblər digər mükafatlarla yanaşı, Aİ Nümayəndəliyi tərəfindən nəşr edilmiş və ittifaqa 27 üzv ölkədən Azərbaycan dilinə tərcümə edilmiş ənənəvi reseptlər toplusundan ibarət “Avropa təamları” kitabını da əldə edə ediblər. Kitabı, həmçinin Avropa İttifaqının Azərbaycandakı Nümayəndəliyinin veb-səhifəsindən elektron formada əldə etmək mümkündür.
“Azeri Home Chef” “Facebook” səhifəsi tərəfindən tədbirdən əvvəl təşkil olunmuş Avropa yeməklərinin kulinariya müsabiqəsinin və rəsm müsabiqəsinin mükafatlandırma mərasimləri də tədbir zamanı baş tutub. Müsabiqə iştirakçılarının hazırladıqları yeməklər də burada təqdim olunub. Festival Azərbaycan və Avropa dillərində çıxış edən yerli musiqiçilərin konserti ilə müşayiət olunub.
“Ədəbiyyat və incəsənət”
(13.10.2025)
“İşığa doğru” filminin təqdimatı olub
Xocalı soyqırımı şahidinin danışılmamış hekayəsi ekranlaşdırılıb
“Alternativ” Kommunikasiya və Tədqiqatlar İctimai Birliyinin Qeyri-Hökumət Təşkilatlarına Dövlət Dəstəyi Agentliyinin donorluğu ilə həyata keçirdiyi “Eşidilməyən səslər” layihəsi çərçivəsində “İşığa doğru” adlı filmin və Tədqiqat Hesabatının təqdimatı olub.
Agentlikdən AzərTAC-a verilən məlumata görə, layihə rəhbəri Anar Yusifzadə bildirib ki, film Xocalı soyqırımının canlı şahidlərindən biri, ermənilər tərəfindən girov götürülərək ailəsi ilə birgə amansız işgəncələrə məruz qalan azərbaycanlı qadın – Nərgiz Mahmudovanın həyat hekayəsi əsasında ekranlaşdırılıb.
Layihənin əsas məqsədi müharibə qurbanı olmuş azərbaycanlı qadınların üzləşdiyi zorakılıq, məhrumiyyət və ləyaqətli həyat uğrunda mübarizə təcrübələrinə əsaslanaraq onların səsini dünyaya çatdırmaq, Ermənistanın Azərbaycana qarşı təcavüzünün qadınlara vurduğu dərin mənəvi və fiziki izləri beynəlxalq ictimaiyyətə nümayiş etdirməkdir.
Layihə çərçivəsində çəkilmiş film azərbaycanlı qadınların pozulmuş hüquqlarına, yaşadıqları travmalara və insanlığa qarşı törədilən cinayətlərə həsr olunub. Film ingilis dilinə tərcümə olunub və beynəlxalq auditoriyaya təqdim ediləcək.
Filmin ssenari müəllifi Esmira Qasımova bildirib ki, yaddaşını itirən xalq məhvə məhkumdur və buna görə də xalqımızın yaşadığı dəhşətləri sənədləşdirmək vacibdir: “Film 9 yaşlı qızın timsalında həmin insanların hayqırtısından bəhs edir. Biz burada təkcə dəhşətləri göstərməmişik, eyni zamanda dünyaya çağırış etmişik. Müharibə təkcə statistika deyil, eyni zamanda məhv olan həyatlar deməkdir. İstərdik ki, bu filmlə həm də sülhə çağırış edək”.
İştirakçılar film barədə düşüncələrini bölüşüb və ekran işinin olduqca uğurlu olduğunu bildirib. Qeyd olunub ki, bu kimi filmlər və kitablar Azərbaycan xalqının acılarını dünyaya çatdırmaq baxımından mühüm rol oynayır. Çıxışçılar filmin bir neçə dilə tərcümə olunmasını təklif ediblər. Bildirilib ki, film həm də ədalətə çağırışdır. Qeyri-hökumət təşkilatlarının bu tip hadisələri filmlərə, kitablara köçürərək xalqın tarixinə həkk etməsi olduqca təqdirəlayiqdir. “Prezident İlham Əliyev bir neçə gün əvvəl Qəbələdə Türk Dövlətləri Təşkilatının Zirvə toplantısında qeyd etdi ki, biz gələcəyə doğru addımlayırıq, amma keçmişi də unutmamalıyıq. Bəli, biz 44 günlük Vətən müharibəsindəki qələbəmizlə işığa doğru addımlayırıq”, - deyə çıxışçılar vurğulayıb.
Daha sonra “Alternativ” Kommunikasiya Tədqiqatlar İctimai Birliyinin sədr müavini Jalə Quliyeva Ermənistan işğalının qurbanı olmuş azərbaycanlı qadınların hüquqlarının pozulması, üzləşdiyi zorakılıq, məhrumiyyət və iztirabların onların sağlamlığı və sosial statusu üçün uzunmüddətli nəticələrini təhlil edən Tədqiqat Hesabatını təqdim edib. O, müharibə qurbanı olmuş 50 qadın arasında sorğu keçirildiyini bildirib. Vurğulanıb ki, respondentlər arasında girov götürülərək fiziki, psixoloji və cinsi zorakılığa, müxtəlif ağır işgəncələrə məruz qalan qadınlar olub. Qadınlar məcburi köçkünlük, ailə üzvlərinin itirilməsi, əmlaklarının talan olunması və digər insanlıq əleyhinə əməllərlə üzləşiblər.
Həmçinin bildirilib ki, Ermənistanın Azərbaycana qarşı hərbi təcavüzü nəticəsində 3 990 nəfər itkin düşmüş şəxs kimi qeydiyyata alınıb. Onlardan 3 984 nəfəri ötən əsrin 90-cı illərində, yəni, birinci Qarabağ müharibəsində, 6 nəfəri isə 2020-ci ildə baş vermiş 44 günlük ikinci Qarabağ müharibəsində itkin düşüblər: "3 990 nəfərdən 3 211 nəfəri hərbçi, 779 nəfəri mülki şəxslərdir. Mülki şəxslərdən 71 nəfəri yetkinlik yaşına çatmamış uşaq, 284 nəfəri qadın (25 azyaşlı qız), 316 nəfəri qocadır”.
Tədbir Tədqiqat Hesabatı ətrafında müzakirələrlə davam etdirilib.
“Ədəbiyyat və incəsənət”
(13.10.2025)
“Gələcəm sənə, Vətən!” – Tahirə Kədərlinin 60 illiyinə
Mina Rəşid, “Ədəbiyyat və incəsənət” üçün
Mətbuatda 40 ildən, “Vətən səsi” qəzetində 20 ildən çox çalışan həmkarımız Tahirə Ağamirzə qızı Ağamirzəyeva 60 illik yubileyini qeyd etdi.
Tahirə xanım 1965-ci ildin oktyabr ayının 10-da Qubadlı rayonunun Dəmirçilər kəndində anadan olub. 1973-cü ildə Dəmirçilər kənd 8 illik məktəbinin 1-ci sinfinə gedib, 1983-cü ildə Dondarlı kənd orta məktəbini əla qiymətlərlə başa vurub.
1984 -1987-ci illərdə “Avanqard” (İndiki “Bəgüşad”) Qubadlı rayon qəzetində ədəbi işçi, müxbir vəzifələrində çalışıb. Tahirə Kədərli ədəbi yaradıcılığa məktəb illərindən başlayıb. Yazıları ilə diqqəti cəlb edən gənc şairə redaksiya tərəfindən mükafatlandırılıb.
1995-ci ildən başlayaraq “Yeddi gün”, “Ana Vətən”, “Vətən səsi” və “168 saat” qəzetlərində çalışıb. Yazıları, mənsur şeirləri “Ədalət”, “Şəhriyar”, “Təzadlar”, “Dünyaya pəncərə” və “Bütöv Azərbaycan” qəzetlərində çap olunub.
“Dərdin qucağında böyümüşəm”, “Günahımı gözlərimə bağışla” , “İlahi Nura doğru” və “Sevgi yolları” adlı kitabların müəllifidir. Onun Türkiyə tükcəsində yazdığı iki kitabı Türkiyədə çap olunub.
T.Kədərli müxtəlif mövzularda yazdığı məqalələrinə görə, AKİVHİ tərəfindən “Xan qızı Natəvan” diplomu, “Qafqaz” Media İctimai Birliyi təərfindən “Vicdanlı qələm” mükafatı, ədəbi yaradıcılığının 25 illiyi münasibətilə “Peşəkar jurnalist” adına layiq görülüb. 2011-ci ildə Türkiyənin Azərbaycandakı səfirliyi tərəfindən keçirilən yazı müsabiqəsində uğur qazanaraq Türkiyə səfirliyi tərəfindən diplomla təltif edilib. Şeirləri Türkiyə mətbuatında dərc edilir və “İstanbul Şiir Fırtınası” radiosunda səsləndirilir. “Məhsəti” Şairlər Məclisinin üzvüdür. Hazırda 4 kitab üzərində çalışır.
Tahirə xanımın Yurd sevdalı şeirlərindən oxucularına ərməğan edirik.
Tahirə Kədərli
SALAM, ŞUŞA!
Mən öncə sənə gəldim,
həsrətiylə yandığım
doğulub boy atdığım
dil açıb danışdığım
doğma kəndimə deyil,
Əziz Şuşam, ilk dəfə
sənə gəldim...
daşını, torpağını,
müqəddəs oylağını
mən heç görməmişdim.
səsini, sorağını, o saf növrağını
dillərdən öyrənmişdim.
hələ uşaqlığımdan
üzünü görməsəm də,
qoynuna gəlməsəm də,
mən səni çox sevmişdim.
Əziz Şuşam!
Uşaqkən elə bilirdim
şüşədən bir ev olmusan...
bu sehirli aləmin xəyalıyla yatırdım.
uşaqlıq xəyalıma yuxularda çatırdım...
evdə böyüklərimiz
səni vəsf eyləyirdi.
“Şuşa candır”, deyirdi...
böyüdüm öyrəndim ki,
yenilməz qala olmusan.
dahilər yetişdirib şan-şöhrət qazanmısan...
sən Azərbaycanın tarixi torpağısan...
qoynunda pərvazlanıb
neçə oğulun, qızın.
dillərdə dastan olub
muğamın, tarın, sazın...
İlk dəfədir sənə gəldim, Şuşam.
ey müqəddəs torpağım,
qoy səndə dalğalansın
bu üç rəngli bayrağım!
nələr çəkdi başın sənin,
müqəddəsdir, uludur
torpağın, daşın sənin...
Burda neçə igidin qanlı xatirəsi var...
burda neçə igidin
Şanlı Qələbəsi var.
Burda xain düşmənin
gözləri oyulubdu.
burda xain düşmənin
planı pozulubdu.
bu daşdan, qayalardan
İgidlərim güc alıb.
burda neçə igidim
gözləri gülə-gülə
şəhadətin oxuyub.
Burda neçə igidim
Zəfər səsini duyub...
Kiminin son kəlməsi
kiminin son gülləsi
bu torpağa yazılıb...
Ey müqəddəs torpağım,
qoy səndə dalğalansın
bu üç rəngli bayrağım!.
Salamat qal, əziz Şuşam...
gedirəm, qayıdacam,
bil ki, ölənə kimi
mən səndən doymayacam...
***
Gələcəm sənə, Vətən!
siləcəm göz yaşını...
yarana məlhəm olacam,
söz, heç yana
getməyəcəm,
elə səndə qalacam...
Orda yağış yağır,
hava soyuqmu?
üşümə, gözüm nuru,
üşümə...
Orda gün çıxıb
təpidir yeri...
daşı, torpağı sevinir,
hələ saralmayan,
qürurlanan
yarpağı sevinir
kəndimin...
Orda gecələrin
aydı qonağı...
hələ günəşinin
var parlamağı...
Bir ildir igidlərimin
qanı ilə sivarılsa da
bir ildir ciyərimiz
parça parça olsa da...
azaddır torpağım,
azaddır kəndim,
Şükürlər olsun!
Şəhidlərimin hər
ayaq izlərinə,
tökülən qanlarına...
gedib orda səcdə
etmək istəyirəm...
Məkkəm, Mədinəmdir
Şəhid qanı ilə dolan torpağım!..
Alnımı qoyacağım möhür
donan şəhid qanıdır...
O şəhidlərim ki, bu gün
Azərbaycanımı bütün
Dünyaya tanıdır...
“Ədəbiyyat və incəsənət”
(13.10.2025)
Sənədli filmlər çəkməyi sevir
İnci Məmmədzadə, “Ədəbiyyat və incəsənət”
Sənədli filmlər əslində daha qalıcıdır, çünki onlar bədii təxəyyülün deyil, tarixin məhsulu, reallığın məhsuludur.
Haqqında danışacağımız rejissor da sənədli filmlərin ustadı sayıır.
Azərbaycanın Əməkdar incəsənət xadimi, kinorejissoru Cahangir Zeynallı 13 oktyabr 1949-cu ildə Bakıda anadan olub. ÜDKİ-nun rejissorluq fakültəsində təhsil alıb (1970-1975). 1975-ci ildən “Azərbaycanfilm” kinostudiyasında işləyir.
Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın əməkdar incəsənət xadimi fəxri adına layiq görülüb.
2024-cü ildə Nizami Kino Mərkəzində Cahangir Zeynallının anadan olmasının 75 illiyinə həsr olunmuş yaradıcılıq gecəsi keçirilib
Filmoqrafiya
- 20 yanvar
- Arzuya doğru
- Azərbaycan SSR
- Azərelektromaş
- Dostlar görüşəndə
- Dostların görüşü
- Dostların gözü ilə
- Əbədi iz
- Əbədiyyət yolu
- Əlaqə
- Əsrin kontraktı
- Fikrət Əmirov
- Firəngiz Əlizadə. Lüsern-99
- İlişdim
- Jonqlyor
- Özünü ifşa
- Nə haqla?
Çəkdiyi filmlər tez-tez efirlərdə görünür, demək ki, tarixdə qalıcıdırlar.
“Ədəbiyyat və incəsənət”
(13.10.2025)
ANAR, “Qədim xalq mahnısını dinləyərkən“
Azərbaycan Ədəbiyyat Fondunun “Yazıçı” nəşriyyatında Xalq yazıçısı Anarın “2=3+4, yaxud iki ailədə üç Xalq yazıçısı, dörd Xalq şairi” adlı kitabı işıq üzü görüb. Nəfis tərtibatlı, illüstrasiyalı kitab Azərbaycan ədəbiyyatı irsinə böyük töhfələr vermiş iki nəsildən, onlar barədə həqiqətlərdən və onların ədəbi nümunələrindən ibarətdir.
608 səhifəlik bu unikal kitabı tərtib edən Xalq yazıçısı Anar uzun illər ərzində təkcə öz yazdıqlarını yox, qəhrəmanlarının – Səməd Vurğun, Rəsul Rza, Nigar Rəfibəyli, Vaqif Səmədoğlu, Ənvər Məmmədxanlı və Yusif Səmədoğlunun yazdıqlarını eyni ideya-estetik yaradıcılıq məcrasına qoşaraq, onları eyni axında birləşdirərək ən yeni ədəbiyyatın ən milli paradiqması olaraq təqdim edibdir.
“Ədəbiyyat və incəsənət” portalı kitabdan hissələri oxucularına təqdim edir. Anar qəhrəmanlarının ən populyar əsərlərini bir daha yaddaşlarda təzələyir:
ANAR, ŞEİRLƏR
QƏDİM XALQ MAHNISINI DİNLƏYƏRKƏN
Oymaq-oymaq, qarış-qarış
Gəzmişəm Azərbaycanı.
Qismət olmadı bircə tək
Görəmmədim Zəngilanı.
Ay ana, ana,
Deyirəm yana-yana:
Gedəmmədim Zəngilana.
Gedəmmirəm nə Ağdama,
Nə Şuşaya, nə Laçına.
Yağı gəldi yarasatək,
Ürəyimin yarası tək,
Ürəyimin yarısı tək.
Qarabağ boyanıb al qana
Ay ana, ana.
Taleyimiz, demə, buymuş,
Düşmən yaman tələ qurmuş,
Elimizi viran qoymuş.
Atlarımız yəhərsizmiş,
Üzəngisiz, kəmərsizmiş,
Maşınımız təkərsizmiş,
Əsgərimiz təpərsizmiş,
Sərhədimiz çəpərsizmiş.
Yurdumuz Kəlbəcərsizmiş,
Ana, deyim, dilim yansın,
Sənin oğlun hünərsizmiş.
özlərimdən küsmə, ana,
Övladından bezmə, ana,
Ümidini üzmə, ana.
Lap az qalıb, görəcəksən,
Sevinəcək, güləcəksən.
Bunu özün görəcəksən,
Öz gözünlə görəcəksən,
Atlarımız yəhərlidir,
Üzəngili, kəmərlidir,
Əsgərimiz təpərlidir,
Ana, məndən arxayın ol,
Sənin oğlun hünərlidir.
Ay ana, ana,
Günləri sana,
Mən gedəcəm Zəngilana.
Gedəcəm axı...
Gedəcəm axır...
21 may 2001
“Ədəbiyyat və incəsənət”
(13.10.2025)
Estoniya Azərbaycan musiqisinin sehrinə bürünüb
Azərbaycan Mədəniyyəti Günləri çərçivəsində Estoniyanın paytaxtı Tallinin mərkəzində yerləşən “Mere Mədəniyyət Mərkəzi”ndə Azərbaycanın dahi bəstəkarı, musiqişünas Üzeyir Hacıbəylinin 140 illik yubileyinə həsr olunmuş "Aşıq və Muğam" adlı konsert keçirilib.
“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, tədbir Komitənin dəstəyi, “Buta Art Studio” Azərbaycan Yaradıcılıq Mərkəzinin təşkilatçılığı ilə baş tutub.
Tədbirdə Azərbaycan Milli Konservatoriyasının dosenti, sənətşünaslıq üzrə fəlsəfə doktoru Mübariz Əliyev, Estoniya parlamenti və Mədəniyyət Nazirliyinin nümayəndələri, İnteqrasiya Fondu, diplomatik korpus üzvləri, incəsənət xadimləri və şəhər sakinləri iştirak ediblər.
Tarzən Asim Pirimov, kamança ustası Hüseyn Nağıyev və xanəndə Rəvanə Vəliyeva Azərbaycan muğamının sədaları ilə, aşıq Mübariz Əliyev isə sazın ecazkar ifası ilə tədbir iştirakçılarının ruhunu oxşayıb. Onların ifasında səslənən xalq mahnıları, muğam parçaları eləcə də aşıq musiqiləri sürəkli alqışlarla qarşılanıb.
Gecənin ən yaddaqalan məqamlarından biri də Tallinin məşhur “Gracia” rəqs qrupunun “Sarı Gəlin” ifası olub.
Tədbirin sonunda qonaqlar bu kimi mədəni tədbirlərin davamlı keçirilməsinin əhəmiyyətini vurğulayaraq, Azərbaycan musiqi və rəqs sənətinin Estoniya tamaşaçısına çox doğma gəldiyini bildiriblər. Onlar bu gecəni yalnız bir incəsənət bayramı kimi deyil, eyni zamanda xalqlar arasında mədəniyyət körpüsü kimi qiymətləndiriblər.
“Ədəbiyyat və incəsənət”
(13.10.2025)
