Norveçdə 28 May – Müstəqillik  Günündə görkəmli bəstəkar, Şərqdə ilk operanın müəllifi Üzeyir Hacıbəylinin anadan olmasının 140 illiyi münasibətilə musiqili videolayihə hazırlanıb.

“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, Norveçdə yaşayan azərbaycanlı musiqiçilər — pianoçu və bəstəkar Tural Rafael və pianoçu Aida Ramazanovanın hazırladığı videonun əsasını Üzeyir Hacıbəylinin “Arşın mal alan” musiqili komediyasından seçilmiş bir hissənin iki fortepiano üçün işlənmiş orijinal interpretasiyası təşkil edib. Fortepiano üçün aranjeman və nota işləmə Tural Rafaelə məxsusdur.

Videolayihənin ideya müəllifi Skandinaviya Azərbaycanlıları Koordinasiya Şurasının Norveç üzrə koordinatoru Fariz Nadir Rzayevdir. Çəkilişlər onun təsis etdiyi və Norveçdə fəaliyyət göstərən “FNR Art” şirkətinin dəstəyi ilə baş tutub. Layihənin vizual tərtibatı üçün isə Almaniyadan peşəkar azərbaycanlı operator Orxan Bari dəvət olunub.

Videonun Azərbaycan Respublikasının Müstəqillik Günü – 28 May tarixində təqdim edilməsinin təsadüfi olmadığını, bəstəkarın əsərlərinin, xüsusilə “Arşın mal alan”ın Azərbaycanın zəngin musiqi irsinin təbliğində mühüm rol oynadığını vurğulayıb. Fariz Nadir Rzayev layihədən danışarkən bildirib ki, bu layihə dahi bəstəkarın irsinə ehtiram əlaməti olmaqla yanaşı, Azərbaycanın zəngin musiqi mədəniyyətinin Avropada tanıdılmasına xidmət edir.

Qeyd edək ki, Tural Rafael “Kongsberg Jazzfestival”, “Musikkfest Oslo” kimi nüfuzlu festivalların iştirakçısı olub. O, Fransa, Almaniya, İtaliya, İsveçrə kimi ölkələrdə Azərbaycan musiqisini uğurla təmsil edib. Aida Ramazanova isə Qriq Akademiyasının məzunu, beynəlxalq müsabiqələr laureatı kimi klassik musiqi layihələrində fəal iştirak edir.

Bu layihə Azərbaycan musiqisinin beynəlxalq səviyyədə tanıdılması və mədəni irsinin qorunması baxımından böyük əhəmiyyət daşıyır.

“Ədəbiyyat və incəsənət”

(01.06.2025)

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” 1 İyun – Uşaqların Beynəlxalq Müdafiəsi Günü ilə əlaqədar sosial təşəbbüs reallaşdırıb.

Təşəbbüs çərçivəsində Heydər Əliyev Beynəlxalq Aeroportunda ölkəyə gələn xarici qonaqları “ASAN Viza” əməkdaşları əvəzinə uşaqlar qarşılayıblar.

Marqlıdır, deyilmi?

“Ədəbiyyat və incəsənət” portalına Agentlikdən verilən məlumata görə, məqsəd uşaqlar üçün bu əlamətdar gündə xoş təəssürat və sevincli anlar yaşatmaq, yaddaqalan təcrübə əldə etmələrinə dəstək olub.

Xarici qonaqlar uşaqlar tərəfindən ölkəmizin mədəniyyəti, qonaqpərvərliyi və digər istiqamətlərdə məlumatlandırılıblar.

Bu təşəbbüs “ASAN xidmət” brendinin sosial məsuliyyət tədbirlərinə önəminin artırılması, həm də ölkəmizdə multikulturalizm və tolerantlıq dəyərlərinin təbliği istiqamətində atılan növbəti addımdır.

Xatırladaq ki, Azərbaycan Respublikasının Prezidenti İlham Əliyevin 1 iyun 2016-cı il tarixli Fərmanı əsasında yaradılan “ASAN Viza” sisteminin idarəedilməsi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən həyata keçirilir.

“ASAN Viza” www.evisa.gov.az elektron viza portalı vasitəsilə və Azərbaycan Respublikasında yerləşən beynəlxalq hava limanlarında vizaların verilməsi istiqamətləri üzrə fəaliyyət göstərir.

“Ədəbiyyat və incəsənət”

(01.06.2025)

Millət vəkili, Milli Məclisin İctimai birliklər və dini qurumlar komitəsinin sədri Fazil Mustafa AMEA Şəki Regional Elmi Mərkəzinin direktor müavini, ADPU-nun Şəki filialının dosenti Kamil Adışirini 65 illik yubileyi ilə bağlı təbrik edib.

“Ədəbiyyat və incəsənət” portalına Komitədən verilən məlumata görə, yubilyar alimə ünvanlanan təbrik məktubunda onun ictimai, elmi-pedaqoji fəaliyyətinin ən ümdə məqamlarına vurğu edilib:

“Hörmətli Kamil müəllim,

Sizi - Şəkidə yaşayıb-yaradan ictimai və elm xadimi, ədəbiyyatşünas, publisist, pedaqoq, filologiya elmləri doktorunu 65 illik yubileyinizlə bağlı səmimi qəlbdən təbrik edirəm! Siz ictimai fikrin, milli-mənəvi dəyərləriin, ədəbi-tarixi yaddaşın yorulmaz araşdırmaçısı kimi tanınırsınız.

Sizin elmi, publisistik və ictimai fəaliyyətiniz yalnız bir tədqiqatçılıq zəhməti deyil, eyni zamanda milli-mənəvi kimliyə, bölgə ədəbiyyatına verilmiş dəyərli töhfədir. 

Şəki ədəbi mühiti ilə bağlı araşdırmalarınız, yazıçı və maarifçilərimizin irsini işıqlandıran monoqrafiya və esseləriniz milli yaddaşın qorunmasına bir töhfədir.

Siz, ədəbiyyatla yanaşı ictimai dəyərin, mədəni kimliyin və maarifçilik gələnəyinin də daşıyıcısı olaraq, elmi və mənəvi məsuliyyəti, öz çalışmalarınızda prinsipə çevirmisiniz.

Milli Məclisin İctimai birliklər və dini qurumlar komitəsi olaraq biz, aydınlarımızın fəaliyyətini həm də vətəndaş cəmiyyəti institutlarının, ümumən cəmiyyətin mənəvi gücü və ictimai məzmunu baxımından önəmli hesab edirik. Cəmiyyətin öz əsl köklərinə bağlı qalmasında, bölgə ədəbi-mədəni, ictimai mühitinin dəyərləndirilməsində, milli ruhun söz sənəti üzərindən ifadəsində Sizin kimi aydınların rolu təqdirəlayiqdir.

Sizi yubileyi münasibətilə bir daha təbrik edir, möhkəm cancansağlığı, ictimai, elmi-pedaqoji fəaliyyətdə yeni uğurlar arzulayıram”!

“Ədəbiyyat və incəsənət”

(01.06.2025)

Kübra Quliyeva, “Ədəbiyyat və incəsənət”

Əziz uşaqlar, bilirsinizmi, bu gün əslində sizin bayramınızdır. Amma təəssüf ki, bu gün belə biz böyüklər çox vaxt özümüzü düşünürük. Halbuki bu gün biz yetkin fərdlərə bir xatırlatma üçün mövcuddur – sizin, yəni özünü müdafiədən məhrum mələklərin varlığını, hüquqlarını, göz yaşlarını və arzularını yadımıza salmaq üçündür.

Bir kitab sərgisində bir yazıçı belə bir sual verdi: "Əziz gənclər, ideal gənc necə olmalıdır?" Hamı susdu. Səssizliyin ortasında fikrimi bölüşdüm: "İdeal gənc və ya ideal yaşlı anlayışı yoxdur. İdeallarından vaz keçməyən, haqq, hüquq və ədalət üçbucağını qoruyaraq, uğura gedən yolda heç kimin ayağını tapdamadan irəliləyə biləndirdir ideal insanlar."

Lakin bu məsələ sonradan məni daha dərin düşünməyə vadar etdi. Anladım ki, idealizm bizə çox erkən yaşlardan, uşaqlığımızdan yüklənir. Hələ nə istədiyimizi bilmədiyimiz vaxtlarda çiyinlərimizə başqasının – "xalqın uşağı" obrazı və valideynlərimizin yarımçıq qalmış arzularını həyata keçirmək missiyası yüklənir. Biz isə bu missiyanı ideallaşdıraraq, gələcəyimizin mərkəzinə yerləşdiririk.

Əminəm ki, bu yazını oxuyan əziz dostlarımın çoxu elə bu sətirlərdə özlərinin yaşaya bilmədiyi uşaqlığının tozlu səhifələrini görəcəklər.

Bu yazının sonunda isə bir etirafım var: Mənim üzr istəməli olduğum uşaqlar var – bu dünya və insanlıq naminə…

Əziz Zəhra, səndən üzr istəyirəm. Düşmən gülləsi sənin balaca ürəyinə sinə gərdi, biz isə yasını tez unutduq.

Əziz Nərmin, səndən də üzr istəyirəm. Körpə bədənin təcavüzə məruz qaldı, amma qatilin aydın şəkildə tapılmadı.

Əziz 13, 14, 15 yaşlı qız uşaqları, sizdən üzr istəyirəm. Təhsil haqqınız əlinizdən alındı, öz bədəninizə belə düz-əməlli bələd olmadan qanlar içində ana oldunuz.

Əziz fələstinli körpələr, sizdən üzr istəyirəm. Mən evimdə Yeni İl şənliyi keçirərkən, sizin bədənləriniz dağıdılmış evlərin altında küknar oyuncaqları kimi asılmışdı.

Əziz Elgün, səndən üzr istəyirəm. Harayına səssiz qaldım, səsimi çıxarmağa qorxdum.

Və əziz Kübra, ən sonda səndən üzr istəyirəm – içimdəki körpənin səssiz qatili olduğum üçün…

“Ədəbiyyat və incəsənət”

(01.06.2025)

Murad Vəlixanov, "Ədəbiyyat və incəsənət"

Bu gün iyunun 1-dir və bu günü biz Uşaqların Beynəlxalq Müdafiəsi Günü kimi qeyd etməyə alışmışıq.

Niyə məhz bu gün?

Gəlin tarixə nəzər salaq.

İyunun 1-ni Uşaqların Beynəlxalq Müdafiəsi Günü kimi qeyd etmək 1950-ci ildə BMT Baş Assambleyası tərəfindən qərara alınıb. Həmin gün təşkil olunan "Qadınların Beynəlxalq Konfransı"nda uşaq hüquqlarının təmin edilməsi ilə bağlı təkliflər səslənib və elə həmin tədbirdə də 1 iyun tarixini uşaqların beynəlxalq müdafiəsinə həsr etmək qərarı verilib. Bundan sonra iyunun 1-i Uşaqların Beynəlxalq Müdafiəsi Günü kimi tarixə düşüb. Dünyanın əksər ölkələrində olduğu kimi, bu gün Azərbaycanda da qeyd edilir.

Bu bayramla yanaşı BMT-nin Baş Assambleyası tərəfindən 20 noyabr tarixində Ümumdünya Uşaqlar Günü də qeyd olunur. "Ümumdünya Uşaqlar Günü" 1954-cü ildə BMT -nin Baş Assambleyasının № 836 (IX) saylı qətnaməsində 1956-cı ildən bütün dövlətlərdə uşaqların şərəfinə keçirilməsi tövsiyə olunan bayram kimi qeyd olunub.

BMT tərəfindən 1959-cu ilin 20 noyabrında "Uşaq Hüquqları Bəyənnaməsi, 1989-cu ildə isə "Uşaq Hüquqları Konvensiyası qəbul edilmişdir.

BMT-nin Uşaq Fondu Birləşmiş Millətlər Təşkilatının Baş Məclisi tərəfindən Uşaq Hüquqları Konvensiyası (UHK) uşaqların insan hüquqlarını təsdiq edən ilk icbari hüquqa malik beynəlxalq konvensiyadır. 1989-cu ildən bu günədək BMT-yə və ya Cenevrə Konvensiyasına üzv olan ölkələrin sayını üstələyən 193 ölkə tərəfindən ratifikasiya edilmiş UHK demək olar ki, bütün dünyada qəbul edilib.

Azərbaycan Respublikasının Prezidenti İlham Əliyevin Azərbaycan Respublikasında uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədilə 22 dekabr 2008-ci il tarixli sərəncam imzalamışdır. Sərəncama görə 2009-cu il "Uşaq ili" elan olunmuşdur.

Uşaqların Müdafiəsi Günü 1857-ci ilin iyun ayının ikinci bazar günü Massaçusets ştatının Chelsea şəhərindəki Xilaskarın Universalist Kilsəsinin keşişi Möhtərəm Dr Çarlz Leonard tərəfindən başladı: Leonard uşaqlara və balacalara həsr olunmuş xüsusi xidmət keçirdi. Leonard bu günü Gül Günü adlandırdı, sonradan Çiçək Bazar günü, Uşaq Günü adlandırıldı.

Uşaqların Müdafiəsi Günü ilk dəfə 1920-ci ildə Türkiyə Cümhuriyyəti tərəfindən 23 aprel tarixi ilə rəsmi olaraq milli bayram elan edilib. Uşaqların Müdafiəsi Günü 1920-ci ildən bəri hökumətin və dövrün qəzetlərinin bunu uşaqlar üçün bir gün elan etməsi ilə milli səviyyədə qeyd olunur. Bununla belə, qərara alındı ki, bu bayramı aydınlaşdırmaq və əsaslandırmaq üçün rəsmi təsdiqə ehtiyac var və rəsmi bəyannamə 1929-cu ildə Türkiyə Cümhuriyyətinin qurucusu və Prezidenti Mustafa Kamal Atatürk tərəfindən milli səviyyədə verildi.

1924-cü ildə ilk dəfə olaraq Uşaqların hüquqlarını təmin edən bəyənnamə qəbul edilmişdir. Bu bəyənnamədə deyilirdi ki, "bəşəriyyət məcburdur ki, uşaqları ən yaxşı şeylərlə təmin etsin". Bu bəyənnaməni qəbul edilməsində ilk işlər Eqlantine Gebb tərəfindən edilmişdir.

Birinci dünya müharibəsinin dəhşətlərinin şahidi olan Eqlantine Gebb müharibənin dəhşətlərindən sarsılaraq uşaqların xüsusi müdafiəyə ehtiyac duyduğlarını anladı. Bacısı Doroti Bakston köməyi ilə 1919-cu ildə, uşaqlara yardım, kömək göstərib, onların müdafiəsini təmin etmək üçün Londonda "uşaqlara yardım fondu"nun əsasını qoydu.

Uşaqların Beynəlxalq Müdafiəsi Günü ilk dəfə 1925-ci ildə Cenevrədə Uşaqların Rifahı üzrə Ümumdünya Konfransı zamanı elan edilmişdir. 4 noyabr 1949-cu ildə Moskvada Qadınların Beynəlxalq Demokratik Federasiyası tərəfindən 1 iyun Uşaqların Beynəlxalq Müdafiəsi Günü kimi təsis edilmişdir. 1950-ci ildən etibarən bir çox kommunist və post-kommunist ölkələrində 1 iyun Uşaqların Müdafiəsi Günü kimi qeyd olunur.

1954-cü il dekabrın 14-də Hindistan və Uruqvay tərəfindən BMT Baş Assambleyasında bütün ölkələri Ümumdünya Uşaqlar Gününün təsis edilməsinə təşviq etmək, uşaqlar arasında qarşılıqlı mübadilə və anlaşmanı təşviq etmək, uşaqların ideallarını təşviq etmək üçün fəaliyyətə başlamaq üçün birgə qətnamə qəbul edildi.

20 noyabr 1959-cu ildə Birləşmiş Millətlər Təşkilatı Uşaq Hüquqları Bəyannaməsini qəbul etdi. 20 noyabr 1959-cu il tarixdə Birləşmiş Millətlər Təşkilatının Baş Assambleyası'nda Uşaq Hüquqları Bəyannaməsini xatırlamaq üçün Ümumdünya Uşaqlar Günü qeyd olunur.

Əlbəttə, bu günlə bağlı mənbələr və məlumatlar boldur, biz də ən zəruri saydıqlarımızı sizlərə çatdırdıq. Sonda hamıya sələnirik: bu gün hələ də uşaqlar döyülür, öldürülür. Uşaqlara qarşı zorakılığa biz qətiyyətlə yox deyirik!

“Ədəbiyyat və incəsənət”

(01.06.2025)

Neymət Tahir, “Ədəbiyyat və incəsənət” portalının Qqarabağ təmsilçisi

Ağdamda Həydər Əliyev Mərkəzində “Peşəkar Karyera İdarəçiliyi” mövzusunda panel müzakirəsi baş tutub.

Moderator qismində Ağdam Dövlət Sosial-İqtisadi Kollecinin tələbəsi Nurcan Hüseynova, panelistlər qismində isə Ağdam Dövlət Sosial-İqtisadi Kollecinin direktoru Neymət Rüstəmli, Ağdam Dövlət Aqrar İnkişaf Mərkəzinin direktoru Ramal Məmmədov, Qarabağ Regional Gənclər və İdman İdarəsinin Ağdam rayonu üzrə baş məsləhətçisi Kənan Qədirli iştirak edib.

150-yə yaxın gəncin iştirak etdiyi panel müzakirəsində “Akademik Təhsil və Praktik Bacarıqlar: Hansı daha vacibdir?”, “Peşəkar İmici Gücləndirmək”, “Karyera üçün Doğru Seçim: İstək, Bacarıq və Tələb” mövzuları ətrafında bir sıra önəmli fikirlər səsləndirilib. Çıxışların sonunda gənclərin sualları spikerlər tərəfindən cavablandırılıb.

"LevelUP" şəbəkəsi Ağdam Dövlət Sosial-İqtisadi Kollecində Gənclərin İnkişaf və Karyera Mərkəzinin Ağdam regional nümayəndəliyinin təşkilatçılığı ilə keçirilib.

“Ədəbiyyat və incəsənət”

(31.05.2025)

İnci Məmmədzadə, “Ədəbiyyat və incəsənət”

Serkan Çayoğlu adı sizə nə deyir?

Hətta bəzilərinə heç nə deməsə belə, şəklinə baxan kimi əksəriyyət onu tanıyacaq. Söhbət tanınmış türk modeli və aktyorundan gedir.

Bu gün Serkan Çayoğlunun doğum günüdür. O, 31 may 1987-ci ildə Almaniyada dünyaya göz açmışdır. Təhsilini Almaniya universitetlərindən birinin İqtisadiyyat bölməsində tamamlamışdır.

Əvvəllər modellik etməyi düşünsə də, bir müddət sonra aktyorluğa yönəlmiş və Ümid Çıraq, Dolunay Soysərt kimi adlardan peşəkar aktyorluq təhsili almışdır.

İlk olaraq 2012-ci ildə "Kuzey-Güney" teserialının mövsüm finalında Mərvə Boluğurun İtaliyadan gələn yoldaşını canlandırmış, sonra "Zeytun təpəsi" teleserialında oynamışdır.

Handə Yenərin "Ya Ya Ya" klipinə də çəkilmişdir.

2014-cü ildə başlayan "Gilas mövsümü" teleserialında Ayaz Dinçər rolunu canlandırmışdır. Teleserial 2015-ci ildə başa çatmışdır. Aktyor daha sonra "Həyatımın eşqi" teleserialında Dəmir Cərrahoğlu rolunu oynamışdır.

Filmoqrafiyası

- Kuzey Güney

- Şefkat Tepe

- Zeytun Təpəsi

- Kiraz Mevsimi

- Hayatımın aşkı

 - Börü

Mükafatları

- Yaxın Doğu Üniversiteti 5-ci Video Musiqi

- 6-cı KTÜ Media

- 42-cı Pantene Altın Kələbək (2015)

- 1-ci YBU Media

- 42-cı Pantene Altın Kələbək (2016)

Allah xeyirli ömür nəsib etsin!

“Ədəbiyyat və incəsənət”

(31.05.2025)

İnci Məmmədzadə, “Ədəbiyyat və incəsənət”

Oqtay Zülfüqarov 1929-cu il mayın 31-də Bakı şəhərinin Pirşağı qəsəbəsində hakim ailəsində anadan olub. Musiqi Məktəbinin violoncel sinfini, A. Zeynallı adına Musiqi Məktəbi və Dövlət Konservatoriyasının violonçel sinfini bitirib, professor Qara Qarayevin tələbəsi olub.

O, uşaqlar üçün yazılan "Qız-ulduz", "Pişik və Sərçə" və "Meşə nağılı" operalarını da yazıb. "Şəngülüm, Şüngülüm və Məngülüm" adlı musiqili komediya, violoncel və fleyta üçün konsertlər, simfonik poemalar, kantatalar, dörd simfoniya, instrumental pyeslər, teatr və kino üçün musiqi yazan bəstəkarın böyük simfonik orkestr üçün yaratdığı "Şənlən, mənim xalqım" uvertürası kimi bir çox məşhur musiqi əsərlərinin müəllifidir.

2010–2012 illərdə O. Zülfüqarov "Məlik Məmməd" nağılı əsasında uşaqlar üçün "Sehrli alma" iki hissəli balet, eyni zamanda musiqi dərslikləri yazıb. Uzun illər "Tumurcuq" və "Aysel" Uşaq Mahnı Teatrı Oqtay Zülfüqarovun rəhbərliyi altında Azərbaycan Dövlət Televiziyasında verilişlər hazırlayıb. Musiqi ilə yanaşı bəstəkar həm də şeirlər yazıb və onlar "Oxuyur Aysel" adlı topluda işıq üzü görüb.

1957-ci ildə üçüncü kursda oxuyarkən Azərbaycan bəstəkarlarının qurultayında gənc bəstəkarın fortepiano triosu uğur qazanıb. 1958-ci ildə Qara Qarayevin sinfini uğurla başa vuran Oqtay Zülfüqarov müəlliminin məsləhəti ilə uşaqlar üçün silsilə mahnılar yaratmağa başlayıb. Eyni zamanda o, Qız-ulduz, Pişik və Sərçə və Meşə nağılı operalarını da yazıb. Şəngülüm, Şüngülüm və Məngülüm adlı musiqili komediya, violoncel və fleyta üçün konsertlər, simfonik poemalar, kantatalar, dörd simfoniya, instrumental pyeslər, teatr və kino üçün musiqi yazan bəstəkarın böyük simfonik orkestr üçün yaratdığı Şənlən mənim xalqım uvertürası 1962-ci ildə Moskvada laureat adına layiq görülüb.

Əsərləri

Baletlər

 "Əlibaba və 40 quldur" /libretto müəllifindir

"Sehrli alma" /libretto müəllifindir

Kukla teatrı tamaşalarına musiqi

"Cırtdan" "İ voüt i bleüt" /libretto — H. Hüseynov

 "Dovşanın məhkəməsi" /libretto — M. Quliyev

"Göyçək Fatma" /libretto — M. Dilbazi

"Repka" /rus xalq nağılı əsasında

Uşaq mahnıları

"Ala bula boz keçi" — Sözləri: Abdulla Şaiq

 "Ay pipiyi qan xoruz" — Sözləri: Abdulla Şaiq

 "Balaca ovçu" — Sözləri: Hikmət Ziya

 "Can nənə" — Sözləri: Teymur Elçin

 "Cırcırama" — Sözləri: Yusif Həsənbəy

"Kiçik aşpaz" — Sözləri: Yusif Həsənbəy

 Uşaq mahnı məcmuələri

"Aşıq mahnısı"

"Uşaqlar özləri haqqında"

"Novruz bayramı"

 "Ad günün mübarək",

 "Gedək gəzək"

"Təbiətin qoynunda"

Instrumental

- Solist, xor və xalq çalğı alətləri orkestri üçün "Azərbaycan gəncləri" Odası

- 4 əl üçün piano variasiyaları

 - Piano üçün konsert Pyesi

 - Piano üçün "Beşik mahnısı" pyesi

Romanslar

"Cananə yetmişəm" romansı (fortepiano ilə oxumaq üçün)- sözləri: Məhəmməd Füzuli

"Yad eylərəm" romansı (fortepiano ilə oxumaq üçün)- sözləri: Məhəmməd Füzuli

Filmoqrafiya

80 kilometr yerin altı ilə qısametrajlı sənədli film) (ANS TV)

Aslan və iki öküz

Ayı və siçan

Cırtdan

Cırtdanın yeni sərgüzəşti

 Leyla və onun dostları

 Qayınana

Səkkiz dəqiqəlik düşüncə və ya xarı bülbül

 Ustalar-qızıl əllər

Üfüqü ötənlər

 Təltif və mükafatları

"Azərbaycan SSR əməkdar incəsənət xadimi" fəxri adı

 "Azərbaycan Respublikasının xalq artisti" fəxri adı

 "Şöhrət" ordeni

Oqtay Zülfüqarov 31 avqust 2016-cı ildə 87 yaşında vəfat etmişdir. Bəstəkar II Fəxri Xiyabanda dəfn edilmişdir. Allah rəhmət eləsin!

“Ədəbiyyat və incəsənət”

(31.05.2025)

İnci Məmmədzadə, “Ədəbiyyat və incəsənət”

Həqiqətən də gözəl əsərlər müəllifləri var ki, ədəbiyyat tariximizdə elə də reklam olunmayıblar və yaddaşlarda qalmayıblar. Halbuki, qalmağa layiqdirlər.

Şair, nasir Arif Abdullazadə 1940-cı il aprelin 5-də Şəki şəhərində anadan olmuşdur. Orada 11 saylı şəhər orta məktəbini bitirəndən sonra ADU-nun filologiya fakültəsində təhsil almışdır. Azərbaycan SSR Elmlər Akademiyasının əsaslı kitabxanasında və Nizami adına Ədəbiyyat muzeyində redaktor mütəxəssis, kiçik elmi işçi, Nizami adına Ədəbiyyat İnstitutunda kiçik elmi işçi, böyük elmi işçi, aparıcı elmi işçi, Müasir Azərbaycan ədəbiyyatı şöbəsində müdir vəzifəsində çalışmışdır.

Türkiyədə tərcüməçi kimi fəaliyyət göstərmişdir.

Ədəbiyyatşünas və tərcüməçi Arif Abdullazadə 1966-cı ildə "Öztəmirin həyat və yaradıcılığı" mövzusunda namizədlik, 1977-ci ildə "Azərbaycan poeziyasında yaradıcılıq üslubları" mövzusunda doktorluq dissertasiyalarını müdafiə etmişdir. İlk bədii əsəri 1957-ci ildə dərc olunmuşdur. 5 romanın, 5 monoqrafiyanın və s. əsərlərin müəllifidir.

 A.Abdullazadə Cəlil Məmmədquluzadənin Novruzəli, Usta Zeynal, Qurbanəli bəy, İskəndər, Hacı Həsənağa, Şeyx Nəsrullah və s. ədəbi qəhrəmanları haqqında silsiləvi şeirlər yazmışdır. Bu şeirlərdə həmin personajların poetik üslubda təhlili verilir, xarakter cizgiləri əks etdirilir.

Əsərləri 1. Arzular 2. Könüllərin dünyası 3. Hər yerdə, hər zaman 4. Ana dünyamız 5. Novatorluq və üslub 6. Sevin Azərbaycanı 7. Bir ovuc torpaq 8. Səninlə sənsiz 9. Şairlər və yollar 10. Duyum (roman)

2002-ci il mayın 31-də Bakıda vəfat etmişdir. Allah rəhmət eləsin!

“Ədəbiyyat və incəsənət”

(31.05.2025)