Murad Vəlixanov, “Ədəbiyyat və incəsənət”

1969-cu ildə Arif Babayevin ekranlaşdırdığı "Uşaqlığın son gecəsi" filmi barədə danışmaq istəyirəm.  

Filmdə mərkəzi fiqurlar olan Murad və Rüstəmin  hekayəsindən söhbət açılır.

Məktəbi yeni bitirən Murad ali məktəbə daxil ola bilməyib. Onun qohumu və dostu Rüstəm isə institutu bitirərək təyinatını mühəndis kimi ət kombinatına alır. Kombinatda onlar ət oğurlayan, qazandıqları pullar hesabına qlamur həyat keçirən dəstəylə toqquşur. Dəyərlər arasında ziddiyyətlər, məsuliyyət hissi, vətəndaş mövqeyi süjetdə ön plana çıxır.

Ət kombinatında baş verən cinayətkarlıq, onun üstünün açılmasında qəhrəmanların göstərdiyi köməklik, müxtəlif insanlarla tanışlıq onlara ciddi həyat dərsi verir, yetkinləşdirir, bərkidir və uşaqlıqlarından daha bir neçə addım ayırır. Əhvalat eyni zamanda hər iki qəhrəmanın ilk sevgisindən bəhs edir. Murad və Rüstəm obrazlarının xarakterindəki əksliklər süjeti daha da dinamikləşdirir, bəzən komik ziddiyyətli situasiyalar yaradır.

Film haqqında

• Filmin hazırlıqlarına 1967-ci ildən başlanılır və 1968-ci ildə çəkilişlərə start verilir. Film 6 aya çəkilib. 1969-ci ildə ekranlara çıxmışdır.

• Film aktyor Səməndər Rzayevin kinoda ilk işidir.

• Filmin bəstəkarı, xalq artisti Polad Bülbüloğludur. Final səhnəsindəki "Gəl, ey səhər!" rejissora elə təsir etmişdi ki, bəstəkara "Görərsən, bu mahnı sənin ən məşhur mahnılarından birinə çevriləcək" deyib. Filmdə eyni zamanda The Beatles qrupunun məşhur "In My Life", "Michelle" mahnılarından istifadə edilib.

• Muradla Rüstəmin işə getdiyi kadrlar Böyük Qala küçəsində lentə alınıb və bu zaman filmdə ayaqqabı ustası öz köşkündən çıxaraq Muradı səsləyir. Həmin ayaqqabı ustası Əhməd dayının işlətdiyi köşk, həqiqətən də, pinəçi köşkü idi. Həmin köşk uzun illər İçərişəhərdə fəaliyyətdə olub və ayaqqabı ustası Məmməd kişi həmin köşkdə çalışıb. O, populyar müğənni Elarizin atasıdır.

• Filmin ilk səhnələri İçərişəhərdə Şirvanşahlar sarayının yanındakı məhəllədə aparılıb. Digər ev səhnələri isə Prezident Administrasiyasının arxasındakı məhəllədir. Davudun dama çıxdığı səhnənin həyət çəkilişi Çəmbərəkənddə, dam səhnəsi isə İçərişəhərdə aparılıb. Tikinti səhnəsi indiki Milli Məclisin binası yerləşən yerdir. Daha sonra ət kombinatında, “Yaşıl teatr”da, bulvarda, şəhərin küçələrində, binaların girişlərində çəkilişlər aparılıb. Yeməkxana səhnəsi kinostudiyanın yeməkxanasında nahar vaxtı çəkilib.

• Filmdə məşhur Davud obrazı rejissorun qardaşı Akifin prototipidir. Akif özü də quş saxlayan və baməzə adam olduğu üçün Arif Babayev Davudun timsalında qardaşının surətini filmə gətirib. Məmmədsadıq Nuriyev də Akifi yaxşı tanıdığı üçün obrazı məharətlə yaradıb. Nənə rolunu oynayan Törəxanım Zeynalova Musiqili Komediya Teatrında kostumer vəzifəsində çalışırdı. Elya obrazını yaradan Meqi Kejeradze Gürcüstandan dəvət olunmuşdur. Megi Kejeradze 1960-65-ci illərdə Tbilisi Xarici Dillər İnstitutunda təhsil alıb.

“Ədəbiyyat və incəsənət”

(14.04.2025)

İnci Məmmədzadə, “Ədəbiyyat və incəsənət”

Şamaxı mətbəxi Azərbaycanın zəngin və qədim kulinariya ənənələrini əks etdirən bölgə mətbəxlərindən biridir. Qafqaz dağlarının ətəyində yerləşən bu bölgə həm təbii sərvətləri, həm də mədəni irsi ilə fərqlənir. Şamaxı mətbəxində həm ət yeməkləri, həm də təbii məhsullardan hazırlanan ləzzətlər mühüm yer tutur.

Şamaxı mətbəxinin bəzi məşhur yeməkləri:

1. Piti – Balqabaq, noxud, qoyun əti və quyruq yağı ilə gil qabda bişirilən milli yeməkdir. Şamaxı usulunda bəzi fərqli ədviyyatlar da əlavə olunur, bu da Şamaxı pitisini fərqləndirir.

2. Düşbərə – Kiçik ölçülü, ətlə doldurulmuş xəmirdən hazırlanan bu şorba həm ləzzətli, həm də doyumludur.

3. Sürhüllü – Ət bulyonunda bişirilmiş ev xəmiri, üstünə sarımsaq və sirkə əlavə edilərək yeyilir.

4. Qutab – Ətli, göyərtili və ya balqabaqlı içliklərlə hazırlanır.

5. Ərik turşulu bozbaş – Şamaxıya məxsus ləzzətlərdən biridir. Ərik turşusu yeməyə xüsusi dad verir.

6. Şirəli plov – Meyvələrlə və ya şirniyyatlı əlavələrlə bəzədilən plov növüdür.

7. Xəngəl - Şamaxı mətbəxində xəngəl kimi xəmir yeməyi də geniş yayılıb.

8. Toyuq ləvəngi - Ləvəngi əsasən Lənkəran bölgəsi ilə tanınsa da, Şamaxıda da xüsusi tərzdə hazırlanır. Soğan, qoz, nar şərbəti və müxtəlif ədviyyatlarla doldurulmuş toyuq sobada bişirilir. Ləzzətli və ətirli olur.

9. Ərməki aş - Bu, Şamaxıya xas olan maraqlı düyü yeməyidir. Ərmək (xırda yaşıl noxud növü) ilə düyü birgə bişirilir, bəzən üstünə kərə yağı əlavə olunur. Xüsusilə kənd toylarında və xüsusi günlərdə süfrəyə verilir.

10. Şamaxı dolması - Üzüm yarpağından hazırlanan dolmalar fərqli ədviyyat qarışıqları ilə seçilir. 

Qoyun əti, düyü, göyərti və bəzən qozla bəzədilir.

11. Doğramac - Yay aylarında çox məşhur olan bu yemək qatıq, göyərti, soğan və xıyarla hazırlanır. Bəzən qayğanaq doğranaraq əlavə edilir.

Şirniyyatlar və içkilər:

*Paxlava və şəkərbura* – Novruz bayramında hazırlanır, bölgənin ənənəvi şirniyyatlarındandır.

*Ətirləndirilmiş təbii meyvə kompotları və mürəbbələr* – Şamaxının bağlarında yetişən meyvələrlə hazırlanır. Şamaxının meyvələri (xüsusilə alma, armud, albalı) ilə hazırlanan şərbətlər və kompotlar süfrələrdə mühüm yer tutur.

*Şamaxı şərabı* – Təbii ki bölgənin kulinariyasında süfrə şərabı mədəniyyəti xüsusi yer tutur. Min illik ənənəsi olan Şirvan şərabçılığı dünyaca məşhurdur. Mədrəsə və Meysəri – buranın əsl şərab mərkəzləridir.

Çörək və təndir mədəniyyəti

Şamaxıda təndir çörəyi çox məşhurdur.

Əllə yoğrulan xəmir xüsusi təndirdə bişirilir. Bəzi kəndlərdə bu çörəyə zirə və ya digər ədviyyatlar əlavə edilir.

Şamaxı kulinariyası həm təbii iqlim şəraitindən, həm də tarixi və mədəni təsirlərdən bəhrələnir.

“Ədəbiyyat və incəsənət”

(14.04.2025)

Nemət Tahir, “Ədəbiyyat və incəsənət” portalının Qarabağ təmsilçisi

Sağ olarkən quşlar qarışqaları yeyir. Quş öləndən sonra qarışqalar onu yeyir. Sadə, lakin dərindən düşündürücü bir həqiqət gizlənir bu cümlədə. Təbiətin, həyatın, bəlkə də, kainatın yazılmamış qanunudur bu: Hər şey bir-birinə bağlıdır və heç nə sonsuz gücə sahib deyil.

Bir gün səmada azadcasına qanad çalan quş torpağın üstündə qaçan kiçik qarışqanı ovlayır. Onu yediyində özünü qalib sayır. Güclüdür, çevikdir, havadadır. Amma zaman keçər, küləklər dəyişər, həyat tərsinə dönər. O quş da ölər və bu dəfə torpağın dərinliyindən çıxan yüzlərlə qarışqa onun ətini yeyər. Eyni dünya, eyni planet, eyni həyat – başqa rollarda, başqa vəziyyətdə.

Bu, sadəcə bioloji bir tarazlıq yox, eyni zamanda insana dərs verən bir metaforadır. Həyatda üstün olanlar, özünü toxunulmaz sayanlar, “mən yuxarıdayam, digəri aşağıda”- deyənlər bir gün eyni torpağa qarışırlar. Güclü zəifi, varlı kasıbı, vəzifəli adi insanı yediyində zaman susur. Amma zaman unutmur. O, yadda saxlayır. Və vaxtı gələndə hər şeyi yerinə qoyur.

Bəlkə də, elə buna görədir ki, insan təvazökar olmalı, etdiyi hər hərəkətin sonrasını düşünməlidir. Bu gün sən zirvədəsən, sabah isə səssiz bir torpağın dərinliyində. Bu gün sənin sözün qanundur, sabah isə susqun bir daşın altında olacaqsan, adını belə xatırlayan olmayacaq.

Qarışqalar öz işlərini görür. Təkbaşına çox zəifdirlər, amma birlikdə dağlar aşarlar. Quş isə təkdir, sərbəstdir, amma ölümsüz deyil. Təbiət bir tərəzidir – orada hər şey ölçülür, hər şey balanslanır.

Bu yazı bir xəbərdarlıq deyil, bir xatırlatmadır. Hər kəs bir gün sıraya düzüləcək. Kimin nə yediyi, kimin nə geyindiyi, kimin necə yaşadığı yox, kimin necə davrandığı, nə qədər yaxşılıq etdiyi, kimlərə əl uzatdığı yadda qalacaq.

Unutma: quş da, qarışqa da həyatın iştirakçısıdır. Heç kim həmişə yuxarıda, heç kim həmişə aşağıda qalmaz. Əsas odur ki, harda olursansa, ol, ədalətli ol, mərhəmətli ol. Çünki fırlanan dünya bir gün səni də yerini dəyişməyə məcbur edəcək!

“Ədəbiyyat və incəsənət”

(14.04.2025)

İnci Məmmədzadə, “Ədəbiyyat və incəsənət”

Vantroloq (və ya vantrolog) – səhnədə kuklalarla çıxış edən və danışarkən dodaqlarını tərpətmədən səsini idarə edən bir sənətkardır. Tamaşaçılarda elə təəssürat yaranır ki, sanki danışan kukladır, insan deyil. Bu sənət Türkiyədə "karnından danışmaq" (yəni qarından danışmaq) adı ilə də tanınır. Vantroloqlar müxtəlif səslərlə kukla obrazlarına fərqli xarakterlər verirlər və tamaşalar yaradırlar. Əyləncə dünyasında, xüsusilə uşaqlar üçün maraqlı və sevilən bir performans növüdür. Məhz Türkiyə təcrübəsinə əsaslanaraq bu sənət barədə danışacağıq.

Necə vantroloq olmaq olar?

1. Bacarıq inkişafı:

Vantroloq olmaq üçün ilk növbədə dodaqları tərpətmədən danışmağı öyrənmək lazımdır. Xüsusilə “B”, “F”, “M”, “P”, “V” kimi səslər çətin hesab olunur və xüsusi texnika ilə öyrədilir.

2. Təlim və Məşq:

Peşəkar vantroloq olmaq üçün mütəmadi məşq vacibdir. Bəzi universitetlər və akademiyalar bu sahədə kurslar və təlimlər keçirir. Bu kurslarda səs texnikası, kukla idarəsi və səhnə davranışı öyrədilir. Məsələn Karabük Universiteti və  İstanbul Gedik Universiteti bu sahədə təlimlər təşkil edir.

3. Yaradıcılıq və Doğaçlama:

Vantroloqlar doğaçlama bacarığına malik olmalıdır. Kuklalarla dialoq qurmaq, fərqli səs tonları ilə fərqli kukla xarakterləri canlandırmaq və tamaşaçını əyləndirmək əsasdır.

4. Səhnə Təcrübəsi:

Təcrübə qazanmaq üçün tədbirlərdə, məktəblərdə, tədbirlərdə çıxış etmək faydalıdır. Hər çıxış yeni təcrübə və bacarıq deməkdir.

Vantroloqluqda istifadə olunan kuklalar

Vantroloqlar müxtəlif növ kuklalardan istifadə edirlər. Bunlar arasında:

Əl kuklaları: Əl ilə idarə olunan sadə kuklalardır.

Mexaniki kuklalar: Göz, ağız və bəzən əlləri hərəkət edə bilən kuklalardır. Bu cür kuklalar tamaşalara daha çox canlılıq qatır.

Təbiətə bənzər kuklalar: İnsan və ya heyvan formasında olan, daha real görünüşlü kuklalardır. Tamaşa zamanı kukla ilə vantroloq arasında sanki canlı bir dialoq yaranır.

Vantroloqun səhnə hazırlığı

Hər vantroloqun çıxışı xüsusi ssenariyə əsaslanır. Bu ssenarilərdə zarafatlar, situasiyalar və tamaşaçı ilə interaktiv səhnələr olur. Həmçinin vantroloq bir neçə kukla obrazı ilə çıxış edə bilər, hər birinin səsi və şəxsiyyəti fərqli olur.

Məsələn:

- Bir kukla gülməli və dəcəldir.

- Digəri ağıllı və ciddi danışır.

- Başqası yerli dialektdə danışa bilər.

Bu müxtəliflik tamaşanı daha maraqlı edir və vantroloqun peşəkarlığını göstərir.

Uşaqlar və böyüklər üçün Vantroloqluq

Uşaqlar üçün: Kuklalarla nağıllar danışmaq, əxlaqi dərslər vermək, əyləncəli dialoqlar qurmaq çox effektlidir.

Böyüklər üçün: Sosial mövzulara toxunan, yumorlu, bəzən satirik çıxışlar təqdim oluna bilər.

Başlamaq üçün nə lazımdır?

1. Sadə bir əl kuklası alın və ya özünüz düzəldin.

2. Kuklaya ad, xarakter və səs verin.

3. Güzgü qarşısında dodaqları hərəkət etdirmədən danışmağa çalışın.

4. Qısa səhnələr quraraq məşq edin – məsələn, kukla ilə dialoq.

5. Çıxışlarınızı video ilə qeyd edib analiz edin.

Başlanğıc üçün sadə məşqlər

Vantroloqluqda ən vacib məsələ dodaqları hərəkət etdirmədən danışmaqdır. Xüsusilə bəzi hərflər çətinlik yaradır. Budur, bu bacarığı inkişaf etdirmək üçün bir neçə məşq:

1. Dodaqsız danışma məşqləri

Aşağıdakı cümlələri güzgü qarşısında tələffüz edin və dodaqlarınızın hərəkət etmədiyinə əmin olun:

- “Salam, mən sənin dostunam!”

- “Bu gün hava çox gözəldir, elə deyilmi?”

- “Mən şokolad yeməyi sevirəm!”

2. Əvəzedici səslər

Dodaq hərəkətinə səbəb olan səsləri aşağıdakı kimi əvəz etməyi öyrənin:

B → D

P → T

M → N

Məsələn, “Baba” əvəzinə “Dada”, “Papa” əvəzinə “Tata”, “Məmnunam” əvəzinə “Nənnunam” kimi deyərək məşq edin.

3. Kuklanın səsini tapın

Kuklanı əlinizə alaraq onun danışıq tərzini müəyyən edin:

- Hündür səsli, enerjili?

- Alçaq tonlu və sakit?

- Dialektli və ya spesifik aksentli?

Səs tonunu tapdıqdan sonra sadə sual-cavablarla məşq edin:

-Sən kimsən? – Mən Dodo kuklayam!

-Necə hiss edirsən özünü?– Çox şadam, çünki səhnədəyəm!

Səhnə Performansı üçün tövsiyələr

1. Tamaşaçı ilə təmas qurun: Kukla vasitəsilə zarafatlar edin, suallar verin.

2. Göz kontaktı saxlayın: Tamaşaçı ilə deyil, kukla ilə danışın – bu daha inandırıcı görünür.

3. Ssenari yazın: Kuklanın kim olduğu, nə danışacağı və tamaşanın başdan sona quruluşunu əvvəlcədən planlaşdırın.

4. Çeşidli xarakterlər yaradın: Əgər birdən çox kukla istifadə edirsinizsə, hər birinin fərqli danışıq tərzi və şəxsiyyəti olmalıdır.

İlhamverici nümunələr

Dünyada tanınmış vantroloqlar arasında:

*Jeff Dunham* – Böyüklər üçün komedik çıxışları ilə tanınır.

*Terry Fator* – Musiqi və komediyanı birləşdirən çıxışları ilə məşhurdur.

*Darci Lynne Farmer* – Gənc yaşında vantroloqluqla məşhurlaşıb və musiqi ilə çıxış edir.

Onların çıxışlarına baxmaq, sizə texnika, səhnə idarəsi və kukla xarakterləri barədə yeni ideyalar verə bilər.

Karyera imkanları və gəlir

Vantroloqlar televiziyada, uşaq şənliklərində, teatr səhnələrində və tədbirlərdə çıxış edə bilərlər. Təcrübəyə, tanınırlığa və səhnə bacarığına görə qazanc da dəyişə bilər.  Türkiyədə orta aylıq maaşları 4,250 TL ilə 5,50 TL arasında dəyişir. Bu sahədə uğur qazanan şəxslər şəxsi şoular, YouTube kanalları və ya təlim proqramları ilə daha geniş auditoriyaya çıxış əldə edə bilirlər.

Təlim və sertifikat Proqramları

Qardaş Türkiyədən 3 ünvan nümunə gətiririk:

- Karabük Universiteti Vantroloq Sertifikat Proqramı 

- İstanbul Gedik Universiteti Vantroloq Təlimi

- Edessa Akademi Vantroloq Təlimi.

Bəs Azərbaycanda vəziyyət necədir? Bu barədə ayrıca danıçacağıq.

“Ədəbiyyat və incəsənət”

(14.04.2025)

Kübra Quliyeva, “Ədəbiyyat və incəsənət”

Hər bir insanın daxilində iki səs var: biri işıqdan, digəri qaranlıqdan danışır. Biri sevgi, mərhəmət, anlayış, digəri isə nifrət, eqoizm və güc arzusu ilə danışır. Ədəbiyyat, fəlsəfə və psixologiya bu daxili qarşıdurmanı əsrlərlə analiz edib. Amma sual budur: əgər içimizdəki şeytan danışsa, bizə nə deyərdi? Və daha vacibi – bu səs bizi necə öz oyununa alıb cəmiyyəti məhv edə bilərdi?

Hər bir insanın içində bir nur və bir zülmət daşıdığı çoxdan bəlli bir həqiqətdir. Həmin zülmət – içimizdəki şeytan – çox vaxt sükutda gizlənir, amma fürsət tapanda boy göstərir.

Lakin şeytan bəzən qırmızı boynuzlu, quyruqlu mistik bir varlıqdan çox, sadəcə içimizdə böyütdüyümüz eqo, həsəd, nifrət və səssiz qaranlıqlardır. Bu esse içimizdəki bu qaranlığın — şeytanın cəmiyyətləri necə içəridən çökdürdüyünü, məhz o şeytani tərəfin necə cəmiyyətləri məhv edə biləcəyini, bəzən isə artıq etməkdə olduğunu analiz edir. 

1. Mənəviyyatın aşınması

Əgər bir şeytan cəmiyyəti məhv etmək istəsə, ilk olaraq mənəviyyatı hədəf alardı. Dəyərlərin sual altına alındığı, doğrularla yanlışların yer dəyişdiyi bir atmosfer yaratmaqla insanların vicdanlarını zəiflədərdi. Bu prosesi çox uzaqda axtarmağa ehtiyac yoxdur. Məsələn, sosial şəbəkələrdə “nə qədər qazanırsansa, o qədər dəyərlisən” mesajı durmadan təbliğ olunur. Bu isə mərhəmət, təvazökarlıq, fədakarlıq kimi dəyərlərin dəyərsizləşməsinə gətirib çıxarır.

2. İnsanlar arasında güvənsizliyin yayılması

İçimizdəki şeytan insanları bir-birinə qarşı qoymaqla, parçala və hökm sür prinsipi ilə hərəkət edər. Qonşunun qonşuya, dostun dosta inamsızlığı artırılarsa, cəmiyyətin təməli olan sosial bağlar qopar. Bugünkü dünyada artan yalan xəbərlər (fake news), dezinformasiya və nifrət nitqləri bunun açıq göstəricisidir.

3. Ailənin və təhsilin zəiflədilməsi

Əgər bir şeytan sistemli şəkildə cəmiyyətə zərbə vurmaq istəsə, ailə institutunu və təhsili sarsıdardı. Ailənin gücsüzləşdiyi, valideynin övlad üzərində nüfuzunun qalmadığı və təhsil müəssisələrinin kommersiyalaşdığı bir mühitdə yetişən nəsil, istər-istəməz mənəvi boşluqda böyüyər. Məsələn, bir çox gəncin sosial mediadan gördüyü görüntülü “dəyərlər” ailə və müəllimin söylədiklərindən daha təsirli olur.

4. İstehlakçılığın artırılması

Cəmiyyətlərə yeridilən “daha çox al, daha çox istehlak et, özünü mallarla ifadə et” psixologiyası da şeytani bir təlqindir. Bu yanaşma insanı öz mahiyyətindən uzaqlaşdırır, maddiyyatın əsirinə çevirir. Məsələn, yeni nəsil artıq insanın xarakterinə deyil, geyiminin markasına görə onu dəyərləndirir.

5. Xüsusi bir şeytan: Laqeydlik

Ən təhlükəli şeytan, bəlkə də, insanların baş verənlərə laqeyd qalmasını təmin edəndir. Zülmə qarşı susmaq, haqsızlığa göz yummaq – içimizdəki şeytanın qələbəsidir. Ətrafda nə baş verməsindən asılı olmayaraq “mənə nə” deyə yaşamaq, cəmiyyətin çürüməsini sürətləndirir.

Cəmiyyətlərin məhvi üçün atom bombasına, qılınc-qalxana ehtiyac yoxdur. Yetər ki, insan öz içindəki şeytanla barışsın, onu qəbul etsin, hətta bəsləsin. Və biz artıq bunu görürük — sürətli, parlaq, amma içi boş bir həyat tərzi.

Bu esse bir çağırışdır: içimizdəki şeytanı tanıyaq, onu idarə etməyi öyrənək, yoxsa bir gün o bizi idarə edəcək.

“Ədəbiyyat və incəsənət”

(14.04.2025)

“Ədəbiyyat və incəsənət” portalının Kino etüdləri rubrikasında bu gün Anar Tağıyevin qeydləri ilə tanış olacaqsınız.

Azərbaycandan danışanda həmişə gözlərim yaşarır. Fransanın Azərbaycan əsilli aktyoru və rejissoru, prodüseri, “Marina” teatrının rəhbəri Robert Oseyn (əsl adı Rüstəm Hüseynov) bir neçə dəfə tarixi vətəni Bakıda olub, müxtəlif tədbirlərdə iştirak edib.

2015-ci ildə görüşlərin birində o demişdi: “Mən bütün qəlbimlə sevdiyim Bakıya ilk dəfə deyil ki, gəlirəm, görürəm ki, Bakı necə dəyişir, necə gözəl, tolerant və mehriban şəhərdir. Mən burada yaşayıb işləyə bilərdim. Azərbaycandan danışanda, Bakı küçələrində gəzəndə həmişə gözlərim yaşarır. Bilmirəm, niyə belə olur. Görünür, atam azərbaycanlı olduğu üçün. Atam tarda gözəl ifa edirdi və mənə bunu öyrədirdi. Yalnız sonralar skripkada ifa etməyə başladı, möhtəşəm musiqilər - baletlər, operalar, simfoniyalar yazdı”.

Aktyorun “Peşəkar”, “İkinci həqiqət”, “Bir və digəri”, “Qatil”, “Düsseldorfdan olan vampir”, “Kim bilir?” kimi çəkildiyi 100-dən çox filmi var. O, 17 filmin ssenariləri üzərində işləyib. Bundan başqa, Hüseyn 17 filmin rejissoru olub.

“Ədəbiyyat və incəsənət”

(14.04.2025)

Hafiz Ataxanlı, yazıçı, ssenarist, kulturoloq – “Ədəbiyyat və incəsənət” üçün

Bu tamaşaya illər öncə Akademik Milli Dram Teatrında baxdım. Evə çatan kimi bu yazını qələmə aldım. Necə oldusa, yazdıqlarımı itirdim. Bu günlərdə  arxivimdən tapdım. Düşündüm ki, əməkdar incəsənət xadimi Ramiz Həsənoğlunun təvəllüd bayramına hədiyyə olar.

Vaqif Səmədoğlunun yazdığı, Ramiz Həsənoğlunun quruluş verdiyi "Generalın son əmri" tamaşası haqqında 

Günah- düşüncə.

"Oxunmaq istəyirəm- əvvəldən axıradək, oxumaq"

...Allah günaha yazmasın, dünyanın işinə bax ki, Cəllad da qorxu və xofdan danışır.Özü də elə bəlağət növü qatır danışığına ki, elə biləsən, məhəbbət qəzəlinin fəlsəfi məqamını xırdalayır. Başının üstündə də yiyəsini gözləyən etibarlı(?!) dar ağacı. İş o yerə çatır ki, Cəlladı cəllad  kimi görmürsən, bir nağılçı, meydanbəyi kimi qəbul edibən izləyirsən. Hələ Generalı demirsən?!

Binəva əsgəri qəbirdən xortladıb şeypur çaldırır. Qoymur ki, bədbəxtin balası gorda rahat yata. Hərçənd, nə yatmaqdı o? Allah kəssin elə yatmağı. Yatdığın yerin ki adı qardaşlıq məzarı ola, o yerdə ki, qaynaqçının əli dəymədən sümük sümüyə calana, qol qıça pərçim ola, hansı dinçilikdən danışasan?

Yox, yox, əstəğfirullah! Mənə elə baxmayın!Bu ironiya, lağlağı, məsxərə məndən gəlmir, əttövbə! Allah sənə rəhmət eləsin,Vaqif Səmədoğlu, necə zərif yumorun varmış?! Sən nə oyun çıxartmısan?!Rejissorlar da ölmürlər, mayası sosial qroteksdən yoğrulmuş əsər üçün?

İllah da, belə material düşə pirolmuş Ramiz Həsənoğlunun əlinə.

...Ərinməyəsən, Ramiz müəllim, iki hissəli tragikomik misteriyanı götürüb uğurlu truppanın əyninə ölçüb - biçəsən, kəsəsən, doğrayasan, bəzəyəsən, özündənnaxışları bir düzəsən, bir düzəsən, əsəri gətirib çıxarasan mistik xoxma halına.Məzarın nurla dolsun, ay Vaqif İbrahimoğlu, ustad, sənin bu iki məhdudlaşdırıcı ədatının idraka verdiyi qüvvət, ideyaya suvadığı şövq, ruhi tam o qədər yerinə düşür ki...Amma və lakin... Xoxma nə xoxma! Tamaşaçı uğunub gedir. Yenə də amma və lakin ki, baxıb görürsən; tamaşaçı əvvəl düşünür, sonra gülür. Demək ki, qəm yeməyə dəyməz. Qaymağı intellekt olan yumora tələbat varmış hələ.

MÜƏLLİFİN "GÜNAHI"

Mən bir üfüq olmuşdum,

duman çökdü dənizə...

görünmədim.

Mən bir cığır olmuşdum,

gedib- gələn olmadı,ot basdı üstümü...

görünmədim

Mən bir gün təbəssüm olmuşdum,

nə oldu,bilmədim...

görünmədim...

İtmiş üfüqdən boylanan, ot basmış cığırı tapdalayıb keçən şairin donmuş təbəssümünü xatırladınızmı? Mən xatırladım. Gözümdən bir damla yaş gəldi. Satira, yumor, sarkazmla sosial- ictimai fəlsəfənin ideal sintezindən yaranan tamaşaya bir də baxdım.

Göz yaşımı səmanın duruluğuna bənzədib dərdini yüngülləşdirən, kədəri ömrün  katarsis dayanacağı sayan, hıçqırığı hələ yazılmamış sənət əsəri - simfoniya qəbul edən, bir gözü ağlayan, bir gözü gülən şair- dramaturqun bütün yaradıcılıq imkanları tragikomik misteriyada göstərilə bilir.

Qulaqlarda şapalaq kimi şappıldayan, fəqət, dodaqlarda təbəssüm kimi parıldayan, gözlərdə sevinc tək yaşaran Vaqif Səmədoğlu gülüşü mükəmməl bir əsər doğurub.

Mistik aləmlə gerçək dünyanın keçid məntəqəsində yaşamaq rolunu oynayan General, onun vecsiz nəvələri, içki düşkünü, məkrli, avantürist qonşu, atasının qisasını almaq istəyən qazaxıstanlı qız, sonacan nə baş verdiyini anlamayan polislər, dar ağacının fəlsəfəsini açmaq, qorxunun mahiyyətini anlatmaq və törətdiyi cinayətlərə missiya donu geyindirmək istəyən Cəllad, virtual həyatın məchul obrazları - Məşuqə, Fərari, Şeypurçalan əsgər - bu qəhrəmanların hər biri tipajlar, koloritli obrazlar olsa da, yenə də hər birini günah və Vaqif Səmədoğlu sarkazmı birləşdirir, bir- birinin ardınca dar ağacına doğru aparır. Əslində, bütün obrazlar günah simvollarıdır və müəllifin bir himinə bəndmiş kimi günahlarını asmaq istərkən, növbəti günaha yol verirlər ( axı şəriətdə intihar günah sayılır), günahı günahla yuyurlar.

....Və Vaqif Səmədoğlunun yaratdığı obrazların adı, soyadı, milliyəti, irqiyyəti yoxdur. Sadəcə cəmiyyətdə tutduqları sosial status ( bəlkə də statusuzluq), yaş həddi var. Bu, müəllif mesajının qlobal spektri ehtiva etməsinin, bəşəri düşüncəsinin göstəricisidir.

...Və bir də Vaqif Səmədoğlu dramaturgiyasının özəyi - Azərbaycan dilinin şəhdi- şirəsini vermək, canlı xalq dilində dialoq  qurmaq, el hikmətindən, el nəsihətindən mayalanan yumoru qara yumora çevirmək üstünlüyü özünü göstərə bilib.

REJİSSOR YOZUMUNDAKI İPUCU

Heykəllərin çoxundan soyuq gəlir, buz qoxuyur

qardan yonulub bu abidələr

Günəş çıxsa, açılsa istiyə qapılar

Əriyəcək heykəllərin çoxu- buz qoxuyan abidələr.

Günaha batıb yalandan söyləyə bilmərəm: Ramiz Həsənoğlu  bu şeiri konkret oxuyub, ya yox? Amma və lakin, zənnimcə, elə rejissor yozumundakı  ipucu bu üşüyən misralardadır.

Quruluşçu rejissor əsərə açarı müəllifin digər əsərindəki açardan götürüb.Amma bu açara qədər uzun bir gəlişmə var axı. "Günahı günahla yumağın günahıdır günahımız! "Bu günah fikri götürüb quruluşçu rejissor, " getdik"-, deyibən günahın dabanına tüpürüb, əsərin alt qatına  baş vurub,Günahı elə bir metaforaya, arxitipə döndərib ki, axşam- axşam səhnədə qarabasma kimi yepyekə bir günah görürsən.

Ramiz müəllim,sağ olmuş Cəlladı da qoşub oyuna.Günah fəlsəfəsinin portret cizgiləri tamamlansın deyə, fırçanı da verib Cəlladın əlinə. Cəlladın da nə vecinə. Araz aşığından, Kür topuğundan. Sobası, isti çayı, çaydanı yanında, qalaq- qalaq kitabları da qarşısında. Hər səhnə fırlananda da durub bir- iki kəlmə ibarəli söz deyir. Söz də ki, nə söz? Dəymişin qalar, kalın tökülər. Bir yandan da hər şeyi qanuniləşdirir, kitab- dəftərə salır. Odur, yazıq Fərari Generalın son əmrinə əsasən asılmaq xahişi ilə ağız açır. Di gəl ki, Cəllad zalımoğluna söz təsir eləmir ha!

Əslində rejissor günahı bir kabusa çevirib, asıb bu ikimərtəbəli qədim, insafən, bir az da koloritli taxta məhəccərli evin üstündən. Cəllad isə Ramiz müəllimin yozum tapşırığında rüzgar qələmidir, peydərpey Generalı - zaman yolçuluğunun karıxmış döngələrində itib-batmış, əslində heç yaşamayan, bəzən yüngül yük kimi suyun üzünə çıxıb üzən, batmaq bilməyən günahın günahsızlığını daban daşında kirə çıxarmaq istəyən kabusun ümumiləşmiş günah obrazını qırmanclayıb, 2 saat ərzində göz qırpmağa imkan vermir. General əsasən 2- ci mərtəbədə olur, digərləri zirzəmidə. Hər kəs öz günahı dərəcəsində üzə çıxır, ya da batır. Yaxşısı budur, günahların siyahısına nəzər yetirək.

Generalın günahı Şeypurçalan əsgərdir, Fəraridir ki, onun ayaqlarını gerçəklik müstəvisindən qoparıb, yəni ayaqlarını yerdən üzüb dallarınca sürüyürlər, zavallı qocanı qaranəfəsə döndərirlər.

İkincisi- Qazaxstandan gəlmiş qisasçı qadındır. Ölümünə fərman verdiyi kişinin, atasını qəhrəman zənn edən qızı.

Üçüncüsü- işini səliqəli və qanuni görən Cəlladdır, bəlkə də Generalın dünənki obrazıdır.

Dördüncüsü- içki düşkünü olan oğlan nəvədir ki, hər dəqiqə babasının ölümünü arzulayır və bu ölümün ucunda var- dövlət var.

Beşincisi- çilçıraqdan özgə beyninə heç nə girməyən qız nəvədir.

Altıncısı- yağlı tikə axtaran və nəvələri qızışdıran qonşudur.

Amma bəzən günah ədalət mühakiməsinə, həqiqət şişinə də çevrilir, başqa bir günahı üzə çıxarır.

Qisasçı qadın atasının vaxtilə Generala yazdığı donoslarla tanış olduqda  əlində tutduğu silahın tuşlanma yönünü dəyişir.Demə, aydan arı, sudan duru  bildiyi atası nə boyda günah yükü daşıyırmış?!

Fərarinin günahı ayrı- ayrı ictimai- siyasi  formasiyaların sərhəddində, zamansızlıq xaosunda gülləyə çevrilib olmayan ömrünü qana boyayır. Bir sözlə, quruluş yiyəsi ştangetin iplərini  də, avansəhnənin örtüyünü də, səhnənin dərinliyini də, səhnə güzgülərini də  bir zəncirə çevirib asıb personajların boğazından.

Özü gorbagor olmasa da, ruhu didərgin düşdükdən sonra məkanını tapa bilməyən Generalın təbəddülatları, ictimai- siyasi fərqlərin təzad dərəcələri, üzbəüz durmuş nəsillərin qollarına keçirilmiş qırmızı dilemma kələfinin düyünə düşmüş məqamı rejissor tərəfindən dürüst mizanlarla verilib. Qərinənin sərhədsizliyində, varlıqla yoxluğun qarşılıqlı  məkanında Ramiz Həsənoğlu mistika ilə  gerçəklik, ölülərlə dirilər arasında elə gözəl mizan ünsiyyəti yaradıb ki, ilk anda tamaşaçı  karıxa bilər; ölü kimdir, diri kim? Müəllifdən gələn mistik fəlsəfəni quruluşçu rejissor elə yoğurub ki, bir günah fəlsəfəsinin soyulduqca soyulan  çoxqatlı mahiyyəti səhnədən diş ağardır.

Bir də Generalın bu günkü evi, dünənki istintaq otağı, hökmranlıq taxtı,sabahın yel vurub yengələr oynayan xaraba dəyirmanı rejissor ixtiyarında bir məzhəkə meydanıdır, oyun guşəsidir, katarsis dəyirmanıdır.Bu katarsis dəyirmanının qulaqbatırıcı uğultusunda ölülər və dirilər, gerçəklər və miflər "Mənə sükut əl çalır, belə alqış olarmı?"poetikasını doğru ünvana çatdırmağa tələsirlər.

Birnəfəsə baxılan tamaşanın maraqlı məqamlarından biri də Ramiz Həsənoğlunun televiziya təfəkkürünün, ekran vərdişinin özünü işin xeyrinə qabartmasıdır. Rejissor bu təfəkkür diktəsini zərurətə çevirib. Bibinin monitordan tənəsi, qara zanbaqların ağarması maraqlı effekt yaradır. Habelə dekorasiyanın çevik oyuna qoşulmasında, epizodların dinamik əvəzlənməsində, musiqi, hərəkət, dialoq, işıq aksentlərinin mükəmməl sinxronluğunda rejissorun televiziya düşüncəsi xüsusilə qabarıqdır. İkinci maraqlı teledüşüncədən gələn bir priyom diqqət çəkir.

Tamaşanın birinci hissəsi başa çatır.

Qisasçı qadın 2- ci mərtəbəyə qalxıb qapını döyür. Bütün məsələlərdən agah General qapını açır, özü qapının arxasında gizlənir. Tamaşaçı nigarançılıqla, bəlkə də bəziləri sevinc hissi ilə fonoqramdan Generalı yerə sərəcək güllə səsini gözləyirlər. Fəqət, bu yerdə pərdə bağlanır, antraktdır. İkinci hissə başlandıqda aktyorlar yenidən 1- ci hissənin sonundakı mizanı təkrar edirlər. Yenidən Qisasçı qadın pillələri çıxır.

CƏFƏR NAMİQ KAMALIN GENERALI

Yuxumda bir ömür gördüm pozulmamışdı,

Yuxumda bir yol gördüm azılmamışdı,

Yuxumda bir şeir gördüm yazılmamışdı,

Yuxumda bir məzar gördüm qazılmamışdı.

Xalq artisti Cəfər Namiq Kamal səhnə şöhrətini zəhmətkeş arı güllərdən bal  toplayırmış kimi zərrə- zərrə toplamış, öz üzərində işləməyi sevən, oynadığı rolun sosial- fəlsəfi strukturunu öyrənib onun təqdimat yönümünü düzgün çeşidləyən çoxprofilli  oyun imkanına malik aktyorlardandır.General obrazında Cəfər müəllimin potensial imkanları Vaqif Səmədoğlu- Ramiz Həsənoğlu tandeminin yoğurub ortaya qoyduğu prikolun mayası ilə  üst- üstə düşür. Öz aramızdı, belə sərrast hədəf hələm- hələm ələ düşən deyil.

Cəfər Namiq Kamalın ətə-qana gətirdiyi Generalı izlədikcə yenə rəhmətlik Səmədoğlunun bir poetik ovqatını xatırlamalı olursan:

Çörəksiz- susuz qalmaq olar, vay o gündən

Salam verməyə adamın olmaya yer üzündə.

General tənhadır.Nəvələri ondan həzər edirlər. Xəsisliyindən gileylənirlər. Qonşu oğlanın "bu kişi niyə ölmür?" qınağı hər dəfə bir oxa çevrilib batır qocanın kürəyinə, Cəllad da bir tuği- lənət kimi keçib qocanın xılxına. Qisasçı qadın o boyda yolu basa- basa durub gəlib, arsız- arsız çeçendən silah da alıb ki, çaxsın Generalın başına.

Şeypurçalan əsgər də, Fərari də onu girinc ediblər. Bir sözlə, yerlə- göylə əlləşən Generala hər kəsin, hətta tamaşa salonunda oturan hövsələsiz tamaşaçıların da  gözlərindən "ah, qoca əbləh" nifrəti yuxu kimi tökülür. Fəqət, bu qoca əbləhin öz dərdi özünə bəsdir. İçi özünü yandırır, çölü özgəni. Özü də bilmir, yaşayır, ya ölüb? Yaşayırsa, harada yaşayır, ölübsə, niyə gorbagor olub qalıb ortalıqda?

Bir ayağı gorda, bir ayağı bizim yanımızda olan, səhər dirilərlə salamlaşan, axşam ölülərə xeyirli gecə arzulayan General əslində bütün günah yiyələrinin yükünü atıb çiyninə.Yükü ağırdır,o səbəbdən də gor götürmür, axır məcburən girir  rejissorun qurduğu  katarsis meydanına ki, bəlkə təmizlənə...Cəfər Namiq Kamalın plastikası, səs tempindəki yerinə düşən ziqzaqlar, xarakterin açılışına, dramaturgiyaya xidmət edən artikuliyasiya jestləri, göz yaşı içində gülüşə yönəlik mükəmməl oyun tərzi, tərəf müqabillə qüsursuz işləmək vərdişi və etikası musiqi duyumu, bədii dekorasiya sınırlarına uyğunlaşdırılmış, ölçülüb- biçilmiş mizanlar, dinamika, həlim, sakit danışığın üstündə həyatın hər boz üzünü görmüş qocanın uğurlu təqdimatı, Cəfərin aktyorluq bacarığı tamaşanı sevdirən önəmli şərtlərdəndir. Ümumilikdə, Cəfər Namiq Kamalın  oyun tərzi, aktyorluq imkanları sərhədsizdir, məhdud ölçüdə deyil, bir janrın tələbləri çərçivəsində qalmır. Amma bu məqamda - "Generalın son əmri" tamaşasında istedadlı aktyor sonsuz üfüqlərin işıq salma bucağını çox dəqiq riyazi hesablamalarla, dürüst koordinasiya bucaqlarında paylaşdıra bilib və mükəmməl tragikomik obrazın konturlarını cızıb.

BİVEC NƏVƏNİN İSLAH MƏQAMI

Ömür yolu açıq yoldir 

nə getdi, getdi...

Əlində bir gün də qalmır 

nə itdi, itdi...

Bu dünya dəmyə günahdır

nə bitdi, bitdi...

Birinci mərhələdə, həyatın dibində gününü otaran oğul nəvə əməkdar artist Sabir Məmmədovun oyun tərzində fərqli çalar bəxş edir.

Oğul nəvə içkidən qısa müddət ayrılmaq istəsə də, iradəsi nəfsi qarşısında əl qaldırır. Ən böyük arzusu nifrət etdiyi babasının ölümünü görmək, onun mirasının şəriksiz yiyəsi olmaqdır. Hətta, arabir gözünə görsənən  bibisinə - virtual obraza verdiyi vədi də unutmur. Gah qonşusu ilə razılaşır, gah da Qisasçı qadının plan qurmasına yol göstərir. Sabirin dramatik- dedektiv səs tempri  çox böyük peşəkarlıqla komik çalara keçir. Aktyorun tapdığı lirik- psixoloji nüanslar, komik- dramatik mizanlar, tragikomik xarakterin düşdüyü stiasiyaya uyğun manevrlər, davranış cizgiləri obraza rəngarənglik qatır.

QIZ NƏVƏNİN DƏRDİ

...di gəl, əlacsızam, yaddaşsızam,

zəifəm,deyəsən

bəlkə də xatirələrim əlsiz- ayaqsız,

dayaqsızdır artıq...

Yadıma sala bilmirəm özümü.

Bu qızın da dərdi- səri, azarı anasından qalma çil- çıraqdır.Nə babasının keçmişdə törətdiyi cinayətlər, nə qardaşının avaragorluğu, tüfeyli həyatı, nə qonşu oğlanın tamah dolu baxışları, nə Qisasçı qadının ölüm planı, nə də Cəlladın isti soba qırağında  söylədiyi poetik ölüm dastanları vecinə deyil. Allah saxlamış Dilarə də canında nə qədər zarafat, məzə, duz var, hamısını götürüb keçirib obrazın əyninə. Nəvə bütün tamaşa boyu zar- zar ağlayır, anasını xatırlayır, babasına nifrin yağdırır, qardaşını yamanlayır. Elə ki mövzu bitdi, yenidən baş vurur "lyustra"ya. O, ağlayır, zarıncı olur,xöşbəxtlik düsturunun babasının ondan zorla qopartdığı çil- çıraqda gizləndiyini bəyan edir, hətta sonda misteriyanın janr tələbləri qarşısında bütün bədənində çil- çıraq "bitirir".Amma yenə tamaşaçı uğunub gedir. Çünki obrazın tipologiyası, tiragik - komik rəng həlli, qroteks həddi, sosial- mənəvi strukturu, fəlsəfi yükü əməkdar artist Dilarə Əliyevanın oyun  tərzində mükəmməl cizgilərlə oturuşub.

QONŞU QONŞU DEYİL

Birdən gəlir, birdən gedir,

Unudulmuş köhnə sözlər.

İşıqda da heç nə görmür,

Qaranlıqdan çıxan gözlər.

Avantüra, günah, avaraçılıq, korazehinlik, haramzadəlik, intriqabazlıq, tüfeylilik, içki düşkünlüyü - bütün bu naqisləri Qonşu oğlanda məharətlə canlandıran istedadlı aktyor Rövşən Kərimduxt da gözəl oyun nümayiş etdirir və ampula fərqi uğurla sınaqdan çıxır.

GÜNAHLARIN QƏNİMİ- GÜNAHKAR

Nə varım var, nə barxanam,

Ömür yükü bağlamağa.

Allah, məni yarı öldür,

Yarı saxla ağlamağa.

Əməkdar artist Ayşad Məmmədovun Cəlladı hüdudsuz günahları, azıb- karıxan, qaçıb canını qurtara bilməyən möhnətləri, xotdamışları, qorxan qorxuları yolun yarısından tutub buxovlayır, qaldırır dar ağacına.Günahları boğazından asır ki, bəlkə bu yolla özü də günahdan təmizlənə. Bəlkə də, Allahım, elə dövrün, mühitin, despotizmin simvoludur Ayşadın Cəlladı. O səbəbdən işini heç cürə bitirə bilmir. Amma sonda çarə tapır, bütün günahları qəlbini dəlib keçən ağrılara bələyib çıxır dar ağacına.

Ayşad Məmmədovun fəlsəfi- duyğusal oyun tərzi obrazın tanıtımında yerinə düşür.

ÖLÜM MƏLƏYİNİN MİSSİYASI

...Gəlmə, gəlişindən yaman qorxuram...

...Yox,bu,Generalın sevgilisi, ilk məhəbbəti, məşuqəsi deyil.Qız qalasının başında çiçək açacaq nar ağacı da deyil. Ölüm mələyidir, vəssalam. İntəhası, gəl bunu Generala anlat, görüm necə anladırsan?! Bir tərəfdən də Generalı qınaya bilmirsən.

Əməkdar artist Sənubər İskəndərlinin naz- qəmzəsi, xanım- xatınlığı məşuqə obrazının başı üstünə necə çətir salıbsa, ölüm mələyi nəinki Generalı, tamaşaçıları belə ahənrüba kimi özünə çəkir.

Sənubər İskəndərlinin lirik- dramatik oyun tərzi faciəvi sonluğu romantikaya çevirə bilir.

Bu nə gözəl ölüm mələyi imiş, gəldi, gəlişi ilə Generalı zillətdən, xaosdan, məchulluqdan qurtardı, yüngülləşdirdi, ruhunu təbəddülatların məngənəsindən çıxartdı.

QİSASÇI QADIN DA GÜNAHA BATDI

Bura bağmı, meşəmi,

Kim deyə bilər indi?

Yerdə qalan izləri

Bir yağış silər indi.

Qisasçı qadın bəlkə də, yeganə günahsız obrazdır... fəqət, pilləkənləri qalxana qədər. Tamaşanın gedişatında ilk dəfə  günahı soyundu, bütün çılpaqlıq üzə çıxdı. Məlum oldu ki, uğrunda cinayətə belə, hazır olduğu atasının günah köynəyinə hələ neçə adam sığınıb. Qolları qırılıb yanına düşür. O boyda hay- küylə, ədalət bayrağı ilə gələn Qadın lal olub geri qayıdır və əməkdar artist Almaz Amanova bu lal dönüşün ağırlığını- mənəvi şoku fiziksəl sapmaya uğurla transfer edə bilir.

ÖLÜ FƏRARİNİN ÖLÜM DİLƏYİ

Deyirlər ki, Ay çıxıb,

Ömrümün eşiyində.

Ömürsə yırğalanır,

Ölümün beşiyində.

Əməkdar artist Pərviz Məmmədrzayevin oyuna saldığı Fərari zaman sərhədlərində, daha doğrusu, sərhədsizliyində dolaşan ruh, əmri yerinə yetirməyə cəsarəti  və iradəsi çatmayan mistik obrazdır. Əzab çəkən, utanan, usanan, özünü yamanlayan Fərari obrazının mənəvi- fizioloji qarabasmaları xüsusi səhnə plastikası ilə seçilən Pərvizin oyununda mükəmməldir.

Habelə, əməkdar artistlər Hicran Nəsirovanın, Əjdər Həmidovun, Telman Əliyevin, aktyor Rəşad Bəxtiyarovun yaratdıqları obrazlar koloriti ilə maraqlıdır.

Xalq rəssamı, Dövlət mükafatı laureatı Nazim Bəykişiyevin bədii tərtibata verdiyi ştrixlət, əməkdar incəsənət xadimi, bəstəkar Cavanşir Quliyevin musiqisi bütöv harmoniya yaradır.

...İki saatlıq tamaşada Vaqif Səmədoğlu - Ramiz Həsənoğlu  tandemi istedadlı bir truppanın köməyi ilə insan- ölüm məsafəsini apaydın göstərə bildi. Həm də göz yaşarıncaya qədər güldürdü.

Allah sizi güldürsün və düşündürsün!

“Ədəbiyyat və incəsənət”

(14.04.2025)