Ülviyyə Əbülfəzqızı, “Ədəbiyyat və incəsənət”

"Çeşmə" Ədəbi Məclisi ilə "Bəzmgah" təşkilatı birgə tədbir keçirdilər. Bu, növbəti bir əruz məclisi idi.

Tədbiri giriş sözü ilə "Çeşmə" Ədəbi Məclisinin sədri, Azərbacan Yazıçılar və Jurnalistlər Birliklərinin üzvü, tanınmış şair-qəzəlxan Lilpar Cəmşidqızı açdı. O, tədbirdə iştirak edən qonaqları salamladıqdan sonra ilk olaraq sözü Azərbaycan Yazıçılar Bilyinin üzvü, şair-qəzəlxan Gülarə Munisə verdi. Gülarə xanım, “Çeşmə” Ədəbi Məclisi ilə “Bəzmgah” təşkilatının birgə görüşlərinin tez-tez keçirilməsini alqışladı və təşkilatçılara, həmçinin iştirakçılara uğurlar dilədikdən sonra öz qəzəllərindən bir neçəsini səsləndirdi.

Məclisdə Azərbaycan Yazıçılar Birliyinin üzvü, şair Əhməd Haqsevərə söz verildi. O da məclis üzvlərini təbrik elədikdən sonra qəzəllərindən səsləndirdi.

Sonra məclisin üzvü AzərbaycanYazıçılar Birliyinin Xəzər Bölməsinin üzvü, ustad şair-qəzəlxan Əşrəf Pirşağılıya söz verildi. O, məclis iştirakçılarını salamladıqdan sonra özünün qələmə aldığı son qəzəllərindən bəzilərini səsləndirdi. Sonra Azərbaycan Yazıçılar Birliyinin üzvü, tanınmış şair- qəzəlxan Xatirə Xatuna söz verildi. Xatirə xanım da bu Ədəbi Məclisin Əruzun və gənc şairlərin inkişafında, formalaşmasında çox böyük əhəmiyyət daşıyacağını qeyd edib, məclisin sədrinə gələcək işlərində uğurlar arzuladı, tədbirə dəvət olunduğu üçün təşəkkürünü bildirdi və axırda qəzəllərindən bir neçəsini səsləndirdi.

Sonra növbə ilə digər şairlərə söz verildi və onlar da hər biri öz qəzəlini səsləndirdi. Məclisdə iştirak edən istedadlı şair Ceyhun Rəşidov, Nicat Nəsri, Əliyar Mərdiyev, əruzun bilicilərindən biri olan Rüstəm Hacıyev, gənc şairlər Həsən Lütfi, Əli Əkbər, Əlhəm Dəşti, İsa Salim, Xəzər Bölməsinin üzvü Araz Əfəndi, Murad Mahir, Azər Vahid qəzəllərindən nümunələr səsləndirdilər. Şairə Sevinc Murad və ağsaqqal şair Mirnəzər Mirkazımlı da öz şeirlərini səsləndirdikdən sonra böyük coşğuyla başlayan Ədəbi Məclis uğurla başa çatdırıldı.

Sonda "Çeşmə" Ədəbi Məclisinin sədri Lilpar Cəmşidqızı məclisin keçirilməsində göstərdiyi qayğı və dəstəyə görə “Şahənşah” restoranın rəhbəri Rəşid Süleymanova öz adından və iştirakçılar adından təşəkkürünü bildirdi.

Növbəti görüşü keçirmək ümidi ilə məclis iştirakçıları görüş yerindən ayrıldılar.

“Ədəbiyyat və incəsənət”

(01.05.2025)

“Ədəbiyyat və incəsənət” portal Cavid Aslanovun qeydlərini təqdim edir.

Federiko Fellini ölümündən iki gün əvvəl bu sözləri demişdi: “Kaş bir də aşiq olsaydım!”

Mən, açığı, heyrətə gəldim! Ölümün astanasında olan bir insan yenidən sevmək, yerdən ucalmaq, tabe olmaq istəyinə tabe olmaq, ruhunda orkestrin musiqisini eşitmək istəyirdi… O, qadından danışmırdı, demək istəyirdi ki, sevgi — həyatın sehrli anlarından biridir.

Aşiq olanda, sadəcə insan olmaqdan çıxırsan, bir ətirə çevrilirsən. Yerimirsən, sanki havada süzürsən. Bax, bu vurğunluq halı həyatın ən vacib halıdır. Və fərqi yoxdur, nəyə vurğunsan — qadına, işə, dünyaya, həyata…

Sevgi — nə sevinci, nə də kədəri, nə mükafatı, nə də sınağı ifadə edir, bu onların hamısının birləşməsidir — nağıllar aləminə səyahət, kəşf olunacaq sirrə aparan bir cığırdır. Sevgi həmişə keçib gedir, hər şeyin sonu olur. Amma bir hal digərinə çevrilir və bu yeni hal vurğunluqdan da güclü hiss ola bilər.

Bu gün evliliklər uzunömürlü deyil və keçmiş aşiq insanlar böyük bir kəşfdən məhrum qalırlar — birgə ölümə doğru əl-ələ getməyin necə gözəl olduğunu başa düşməkdən. Çoxlarına elə gəlir ki, yeni münasibətlər daha güclü hisslər gətirəcək. Bu belə deyil.

İtalyan dilində bir söz var, onu başqa dillərə tərcümə etmək mümkün deyil — “volere bene”. Sözbəsöz tərcüməsi “yaxşı istəmək”dir. “Amare” — sevgi deməkdir, amma “volere bene” — bir insana qarşı elə bir münasibətdir ki, sənin üçün ondan yaxın insan yoxdur. “Amare” fiziki həzz üzərində qurulub. Yer üzündəki ən güclü hiss — “amare”nin “volere bene”yə çevrilməsidir. Dünyada bundan daha güclü hiss yoxdur. Bu hiss yalnız birlikdə keçən illərlə yaranır və bu illər etibarı itirməməlidir. Belə uzun münasibətin itkisi sevginin və ya fiziki həzzin itkisindən daha faciəlidir.

“Volere bene”nin itkisi — əsl dərin tənhalıq, tam bir boşluqdur..

Böyük bir “volere bene” Federiko Fellini və Culietta Mazina arasında da vardı. Dünyadakı bütün qadınlar Fellinini sevirdi, amma onun son jesti Culiettaya olan sevgisinin həqiqi himni oldu — demək olar ki, iflic olmuş halda klinikadan qaçdı, çünki Culiettanın Romadakı xəstəxanada ölüm ayağında olduğunu eşitmişdi. Beş yüz kilometr yol qət etdi və onun yanına uzandı.

Fellini öldükdən sonra Culietta da yaşamadı.

“Ədəbiyyat və incəsənət”

(01.05.2025)

Azərbaycan Ədəbiyyat Fondunun “Yazıçı” nəşriyyatında Xalq yazıçısı Anarın “2=3+4, yaxud iki ailədə üç Xalq yazıçısı, dörd Xalq şairi” adlı kitabı işıq üzü görüb. Nəfis tərtibatlı, illüstrasiyalı kitab Azərbaycan ədəbiyyatı irsinə böyük töhfələr vermiş iki nəsildən, onlar barədə həqiqətlərdən və onların ədəbi nümunələrindən ibarətdir.

608 səhifəlik bu unikal kitabı tərtib edən Xalq yazıçısı Anar uzun illər ərzində təkcə öz yazdıqlarını yox, qəhrəmanlarının – Səməd Vurğun, Rəsul Rza, Nigar Rəfibəyli, Vaqif Səmədoğlu, Ənvər Məmmədxanlı və Yusif Səmədoğlunun yazdıqlarını eyni ideya-estetik yaradıcılıq məcrasına qoşaraq, onları eyni axında birləşdirərək ən yeni ədəbiyyatın ən milli paradiqması olaraq təqdim edibdir.

“Ədəbiyyat və incəsənət” portalı kitabdan hissələri oxucularına təqdim edir. Anar qəhrəmanlarının ən populyar əsərlərini bir daha yaddaşlarda təzələyir:

RƏSUL RZA

DÖRDÜMÜZÜN SÖHBƏTİ

Sığınmışıq qəlbimə:

Ümid,

Şübhə,

Kədər

və mən.

Xeyli keçib gecədən.

Yağış yağır,

külək əsir,

Ümid deyir:

–        Yağış kəsəcək,

külək kəsəcək.

Qaranlıq əriyib

sabah olacaq.

Günəş doğacaq,

qızıl telləri saçaq-saçaq.

Şübhə deyir:

– Haçaq?

Haçaq

Yağış qara çevrilə bilər,

külək tufana dönə bilər,

gecə uzana bilər?

Kədər deyir:

– Yağış qurusa da,

səhər olsa da,

külək kəssə də,

nə təsəlli var,

nə son var

içimdəki yetim səsə.

Ümid deyir...

Şübhə yeyir...

Şübhə deyir...

Kədər yeyir...

Mən dinləyirəm:

Ümidi,

Şübhəni,

Kədəri.

Gözləyirəm səhəri.

Doğsun günəş

qızıl telləri saçaq-saçaq.

Soruşmuram: "Haçaq?"

Danış, ümid!

Danış!

Köhnə tanış!

                  Moskva, iyul, 1960

“Ədəbiyyat və incəsənət”

Nigar Həsənzadə, “Ədəbiyyat və incəsənət”

Ötən gün – aprelin 30-da Bakı Dövlət Universitetində“BDU Könüllüləri” təşkilatının təşəbbüsü ilə “Fərqli Fərdlər” adlı himn əsasında çəkilən klipin təqdimat mərasimi keçirildi. Layihə Mədəniyyət Nazirliyinin dəstəyi, PAŞA Holdinq-in sponsorluğu və “Ümid Var” İnklüziv Yaradıcılıq Birliyi ilə “Uşaqların Xoşbəxt Gələcəyi” İctimai Birliyinin təşkilatçılığı əsasında reallaşıb.

Azərbaycanda ilk dəfə inklüziv cəmiyyətə həsr olunan himn geniş ictimaiyyətə təqdim olunurdu. Tədbir proqramına aşağıdakılar daxil idi: “Fərqli Fərdlər” klipinin nümayişi, Əlilliyi olan uşaqların bədii çıxışları, Qısa konsert proqramı. Tədbirin aparıcısı Nuranə Abiyeva açılış nitqində vurğuladı ki, bu layihə Azərbaycanda inklüziv cəmiyyət üçün yazılan ilk himnə əsaslanır: "Bu gün qarşımızda 15 nəfərlik bir heyət dayanır. Burada gəzə bilmə, görmə və eşitmə məhdudiyyəti olan gənclər, eləcə də onlara dəstək verən şəxslər yer alır. Onlar səhnəyə çıxaraq öz bacarıqlarını nümayiş etdirəcəklər."

Daha sonra söz Bakı Dövlət Universitetinin Humanitar məsələlər və gənclər siyasəti şöbəsinin müdiri Ramin Səmədova verildi. O, çıxışında universitetin sosial layihələrə verdiyi önəmdən danışdı: "BDU hər zaman sosial məsuliyyətli gənclərin formalaşmasına, onların cəmiyyətə faydalı vətəndaş kimi yetişməsinə dəstək verir. Bu gün keçirilən tədbir universitetin və 'BDU Könüllüləri' təşkilatının təşəbbüskarlığının cəmiyyətə verdiyi güclü mesajlardan biridir."

Tədbir çərçivəsində bir daha vurğulandı ki, fərqlilik əngəllilik deyil, cəmiyyət üçün bir zənginlik hesab olunmalıdır. Daha sonra layihənin rəhbərlərindən biri, “Ümid Var” İnklüziv Yaradıcılıq Birliyinin sədri və “Fərqli Fərdlər” layihəsinin rəhbəri Nazilə Məhərrəmova tədbir iştirakçılarına layihənin məqsədləri barədə məlumat verdi.

Qeyd edim ki, himnin musiqisini bəstəkar Tural Məmmədli, sözlərini isə Leyla Quliyeva yazıb. Klipin rejissoru Ülviyyə Könüldür. “Fərqli Fərdlər” himnində yalnız tədbirə qatılan 15 nəfər deyil, həmçinin Xalq artisti Alim Qasımov və Əməkdar artist Fərqanə Qasımova da ifaçı kimi yer alıb.

Tədbirdə autizm üzrə araşdırmaçı, ictimai spiker və autizmli övladın valideyni olan Əsmər Əskərova da çıxış etdi. O, inklüziv cəmiyyətin inkişafı və autizmli şəxslərin sosial həyata inteqrasiyası haqqında fikirlərini bölüşdü.

Sonda tədbirin bədii hissəsində “Fərqli Fərdlər” himninin canlı təqdimatı və autizmli uşaqların hazırladığı müxtəlif çıxışlar nümayiş olundu.

“Ədəbiyyat və incəsənət”

(01.05.2025)

Elman Eldaroğlu, “Ədəbiyyat və incəsənət”

Gözəl zəmanədir vallah. Allah interneti yaradanın atasına rəhmət eləsin! Evdən çölə çıxıb kimisə axtarmağa da ehtiyac qalmır. Nə məlumat istəyirsən burada var. Qarşımda bir stəkan pürrəngi çay, internetə qoşulu kompyuter və gözəl musiqi sədası. Oxuyur xalq artisti Zabit Nəbizadə. Bəli, bu dəfə sizə muğam ustası Zabit bəydən söhbət açmaq istəyirəm.

İnternetdə tapdığım müsahibələrindən birində deyir ki: “Bu sənətə uşaq vaxtından həvəsim olub. Gözümü açandan ailəmizdə musiqi səsi eşitmişəm. Dayım Musaxan Güləliyev zurna-balaban ifaçısı idi. Hərdən evdə züm-zümə də edərdi, rəhmətlik. Bir oğlu xanəndə, bir oğlu aşıq idi. Hətta onlar 1997-ci ildə Moskvada “Ailə” ansmablı ilə çıxış ediblər. Onların ən kiçik musiqisi mənim balaban ifaçım və həmyaşıdım Abuzər Güləliyev idi. Xatırlayıram, biz dərsdən çıxandan sonra onlara gedərdik. O balaban ifa edər, mən də onun üçün dəm saxlayardım. Belə-belə məndə bu sənətə həvəs yarandı. Amma bir nüansı qeyd etmək istəyirəm. Mənim ilk pedaqoji fəaliyyətim Uşaq Filarmoniyasında olub. Mən oraya öz övladlarını gətirən valideynlərə həsəd aparırdım. Çünki ailəm mənə bu məsələdə təkan vermirdi. Valideynlərim həmişə mənə deyirdilər ki, səndən oxuyan olmaz. Get, özünə sənət tap. O vaxtlar kəndimizin uşaq klubu var idi. 6-cı sinifdə oxuyarkən ilk dəfə həmin səhnədə mahnı ifa etmişəm. Özfəaliyyət dərnəyi həmin tədbiri 8 Mart Beynəlxalq Qadınlar Günü münasibətilə təşkil etmişdi. Mən isə “Anacan” adlı mahnı  oxumuşdum.”

17-18 yaşlarında bayağı musiqiyə çox həvəsli olub. Bir dəfə böyüdüyü kəndin toylarından birinə gələn Alim Qasımovun gözəl ifası onun bu həvəsini necə deyərlər, altüst eləyib. Alimi diqqətlə dinlədikdən sonra qərar verib ki, hökmən muğam ifaçısı olmalıdır. Və başlayıb Hacıbaba Hüseynova, Arif Babayevə, İslam Rzayevə, Yaqub Məmmədova qulaq asmağa. Beləliklə onları, xüsusən də Alim Qasımovu dinləyə-dinləyə bir neçə muğam öyrənib...

“O zamanlar Asəf Zeynallı adına Musiqi Məktəbində təhsil almaq üçün Bakıya qeydiyyatın olmalı idi. Bu da mənim üçün çətinlik törədirdi. Ona görə də mən çalışırdım ki, hansısa zavoda işə düzələrək Bakıya qeydiyyata düşüm. Lakin bu mənə ilk dəfədən qismət olmadı. Sonra Ələt qəsəbəsində yerləşən Ağac Emalı Kombinatında işə düzəldim və Bakıya qeydiyyata düşdüm. 2 il orada çalışdım. Həmin illər ərzində kombinatın nəzdində ansambl yaratdıq. Ayda bir dəfə kombinatın işçilərinə konsert verirdik.”- söyləyir.

Zabit Nəbizadə 1965-ci il may ayının 1-də Şamaxı rayonunun Şıxzahırlı kəndində anadan olub. 1991-1995-ci illərdə A.Zeynallı adına Azərbaycan Dövlət Musiqi Texnikumunun "Solo oxuma" (xanəndəlik) şöbəsində, 1996-2000-ci illərdə isə Azərbaycan Dövlət Mədəniyyət və İncəsənət Universitetinin "Teatr kollektivinin rejissoru" fakültəsində təhsil almıb. 2000-ci ildən Bakı Musiqi Kollecində müəllim kimi fəaliyyət göstərən muğam ustası, 2003-cü ildən Azərbaycan Milli Konservatoriyasının muğam şöbəsində pedaqoq kimi çalışır. 2005-ci ildə Əməkdar Artist fəxri adına layiq görüldükdən sonra, 2011-ci ildə Xalq artisti fəxri adına layiq görülüb. Bu yaxında Turan İbrahimovun onun haqqında tərtib etdiyi "Zabit Nəbizadə- 60, Azərbaycan muğamının zabiti" adlı kitab da nəşr olunub...

 Deyir ki:- “Mən uşaq olanda fikirləşirdim ki, görəsən müəllim çay içir, yemək yeyir? İndi isə müəllim şagirdinə müraciət edir ki, siqaretindən birini mənə də ver. Hərdən fikirləşirəm ki, səhv edib bu sənətə gəlmişəm. Çünki indi yaxşı bilən ilə bilməyənin, öyrədə bilənlə bilməyənin fərqi yoxdur...”

Bir dəfə xaricə səfərlərinin birində bayatı ifa edib, alqışlayıblar. Konsert bitdikdən sonra səfirliyin işçiləri ona yaxınlaşaraq şəkil çəkdirmək istəyibər. Söyləyib ki, digər həmyerlilərimiz də gəlsin çəkdirərik. Bu arada fürsət tapıb onlardan soruşub ki, əcnəbilər məni niyə musiqi bitməmiş alqışladılar? Onlar da cavab veriblər ki, tamaşaçılar dilimizi anlamasalar da gözəl ifanı duyurlar...

“Avropada çıxış etməyə nə var ki, dili anlamırlar deyə səhv də oxuyumaq olur. Amma öz millətimiz olan yerdə harada ki, dilimizi başa düşürlər, məsələn: Türkiyədə, İranda  səhv etməyə çəkinirsən. Fikirləşirsən ki, birdən tamaşaçı səhvini tutar.”- söyləyir.

Yaxşı adamdır, səmimiyyətini qoruyub saxlaya bilir. Yalan danışmağı xoşlamır. Sağlam ruhu var, hamıya, hər kəsə xoşbəxtlik arzulayır. Bəxtə, taleyə, bir sözlə alın yazısına çox inanır...

Deyir ki:- “Mənə elə gəlir ki, uğur qazanmaq üçün insani keyfiyyət deyil, bəxtin olmalıdır. İndiki zamanın tələbinə görə isə uğur qazanmaq üçün gedib kimlərinsə qapısını döyməlisən. Mən isə o cür xasiyyətə malik insan deyiləm. Belə bir atalar misalı var: “Ağlamayana pəpə yoxdur”. Amma düşünürəm ki, özümdən başqa düşmənim yoxdur. Özüm öz qədrimi bilmirəm. Bir dəfə maşında “AvtoFM”-ə qulaq asırdım. Orada belə bir mövzu müzakirə olunurdu. “Hansı xasiyyətinizi tərgidə bilmirsiniz?” Bir nəfər dinləyici mesaj yazmışdı ki, mən yayda da, qışda da qapını-bacanı soyuq su ilə yuyuram. Bu xasiyyətimi tərgidə bilmirəm. Mən də elə xasiyyətdəyəm. Mənə soyuq su qətiyyən olmaz. Səsimin düşmənidir. Bilirəm ki, ziyandır amma içirəm...”

Sənətdə ona heç kim təkan verməyib. Hətta hiss edib ki, onu hansısa festivallardan, konkurslardan bilərəkdən uzaqlaşdırırlar. O isə buna görə heç vaxt ruhdan düşməyib...

“Həmişə tələbələrimə deyirəm ki, mənim zirvəyə gedən yolda bir nəfər əlimdən tutmayıb. Necə deyərlər, iynə ilə gor qaza-qaza gəlib bu yerə çıxmışam. Mənə dəyən zərbələrdən yıxılmamışam, öz yerimi daha da möhkəmlətmişəm. Sizdə çalışın ki, özünüzə güvənin, əziyyət çəkib sənəti dərindən öyrənsəniz, uğur sizin də qapınızı döyəcək...”

 Bel yırtığı olduğu halda həkimlər ona səhvən xərçəng diaqnozu qoyub kimyəvi şüalar veriblər. Dörd dəfə əməliyyat da olunub. Hətta bir əməliyyatı narkozsuz, "novakain"lə ediblər. Ağrıları o dərəcədə güclü olub ki, çığırtısını aşağı mərtəbədə eşidənlər də olub. Amma şükür Allaha ki, sağdır, yaşayır və bu gün də öz məlahətli səsi ilə muğamlarımızı ifa edir.

Nə isə, bugün, mayın 1-ionundoğumgünüdür. Bu dəfə 60 yaşı tamam olur. Ona möhkəm can sağlığı, uzun ömür, yeni-yeni uğurlar arzulayırıq.

Çox yaşasın!

“Ədəbiyyat və incəsənət”

(01.05.2025)

Aysel Fikrət, Azərbaycan Milli Konservatoriyasının mətbuat katibi, “Ədəbiyyat və incəsənət” üçün

29 aprel 2025-ci il tarixində Azərbaycan Milli Konservatoriyası tərəfindən gerçəkləşdirilən "Miras” layihəsi çərçivəsində "Səfiəddin Urməvi: sələfdən xələflərə" adlı "Urməvi günü" layihəsi həyata keçirilib.

İlk olaraq, Əməkdar artist, dosent, bəstəkar Vüqar Camalzadənin təqdimatında XIII əsr görkəmli Azərbaycan alimi Səfiəddin Urməviyə həsr olunan “Səfiəddin Urməvinin Ədvar sistemi və onun müasir musiqiyə inteqrasiyası” mövzusunda elmi seminar təşkil olunub. Azərbaycan Milli Konservatoriyasının elmi işlər üzrə prorektoru, Əməkdar incəsənət xadimi, sənətşünaslıq üzrə fəlsəfə doktoru, professor Lalə Hüseynova seminar iştirakçılarını salamlayaraq, tədbiri açıq elan edib. 29 aprel tarixinin AMK üçün əlamətdar gün olduğunu qeyd edən professor, məruzəçinin böyük əhəmiyyət kəsb edən mövzuya elmi və yaradıcı yanaşmasını yüksək qiymətləndirdiyini vurğulayıb.

Seminar çərçivəsində Vüqar Camalzadənin Urməvi irsi və Ədvar sisteminin əhəmiyyətindən bəhs edən məruzəsi dinlənilib, Urməvi irsindən bəhrələnərək bəstələdiyi əsərlər səsləndirilib, həmçinin, Şuşada baş tutan Vaqif Poeziya Günləri çərçivəsində həyata keçirilən konsert proqramı və Hindistanda təşkil olunan beynəlxalq tədbirdən görüntülər, foto və video materiallar nümayiş etdirilib. Seminarın sonunda Humanitar fənlər kafedrasının müdiri, filologiya üzrə fəlsəfə doktoru Firudin Qurbansoyun və Etnomusiqişünaslıq kafedrasının müəllimi, filologiya üzrə fəlsəfə doktoru Fəxrəddin Salimin Urməvi irsi, Azərbaycan musiqisinin Urməvidən günümüzə keçdiyi tarixi inkişaf mərhələləri və bir sıra terminoloji məsələlərlə, sonda isə məruzə ilə bağlı fikirləri dinlənilib. 

Elmi seminarın sonunda Azərbaycan Milli Konservatoriyasının rektoru, Əməkdar incəsənət xadimi, sənətşünaslıq doktoru, professor Kamilə Dadaş-zadə layihənin məxsusi əhəmiyyətindən bəhs edib. Elmi seminarla bağlı təəssüratlarını bölüşərək bu mövzunun və ümumilikdə layihənin bu sahədə müasir yanaşmanın formalaşmasına, yeni əsərlərin yaranmasına təkan verə biləcəyini də qeyd edib.

Layihənin davamında AMK-nın foyesində Qədim musiqi alətlərindən ibarət ekspozisiyanın təqdimatı həyata keçirilib. Qeyd edək ki, alətlər Azərbaycan Milli Konservatoriyasının “Milli musiqi alətlərinin təkmilləşdirilməsi” laboratoriyasının rəhbəri Məmmədəli Məmmədov tərəfindən rekonstruksiya olunub.  

Günün sonunda isə AMK-nın tələbələrindən ibarət “Miras” qədim musiqi alətləri ansamblının müşayiəti ilə "Səfiəddin Urməvi: sələfdən xələflərə" 

adlı konsert proqramı təqdim olunub. Konsertdə Səfiəddin Urməvi irsindən “Novruz”, “Hicazi”, “Zirəfkənd”, “Gəvəşt” avazı, Əbdülqadir Marağayinin yaradıcılığından “Naxış bəstə”, “Üşşaq kar", "Hüseyni bəstə” əsərləri ifa edilib.

Qeyd etmək lazımdır ki, sözügedən əsərlər, Məmmədəli Məmmədovun bərpa etdiyi alətlərdən ibarət “Miras” ansamblının bədii rəhbəri, Sənətşünaslıq üzrə fəlsəfə doktoru, Dirijorluq kafedrasının müdiri, bəstəkar Pikə Axundova tərəfindən nota köçürülüb. 

Konsert proqramının davamında III Muğam Televiziya Müsabiqəsinin qalibi Mirələm Mirələmovun ifasında Orta əsrin əks-sədası - Segah (udda - Yavər Zəndəbadi, kamançada - Ariyən Zəmiri, zərb alətlərində - Səbuhi İsmayılov); Əməkdar incəsənət xadimi Aqil Məlikovun təqdimatında Rast təsnifi (tarda - Xalq artisti Möhlət Müslümov, kamançada - Əməkdar artist Toğrul Əsədullayev) və Səfiəddin Urməvinin “Zirəfkənd" melodiyaları əsasında Əməkdar artist Emil Əfrasiyab tərəfindən səsləndirilən “Çahar mirzab” kompozisiyası (udda - Yavər Zəndəbadi, şıdırğıda - Kənan Sadıqov, zərb alətlərində - Səbuhi İsmayılov) təqdim olunub.

Tədbirin aparıcısı AMK Tələbə Elmi Cəmiyyətinin sədri Zeynəb Bağır olub.

Sonda qeyd edək ki, Azərbaycan Milli Konservatoriyası qədim musiqinin zəngin irsini yaşatmaq və inkişaf etdirmək məqsədilə yeni layihələrə imza ataraq, bu sahədəki ənənələri davam etdirir və gələcək nəsillərə bu unikal mədəniyyətə bağlılıq hissinin aşılanmasına xidmət edir.

“Ədəbiyyat və incəsənət”

(30.04.2025)