Super User
Vəhdət Partiyasının sədri Azərbaycan Prezidentinə müraciət ünvanlayıb
Vəhdət Partiyasının sədri, yazıçı, publisist, politoloq Adəm İsmayıl Bakuvi Azərbaycanın böyük şairi Əfzələddin Xaqani Şirvaninin 900 illiyinin dövlət səviyyəsində qeyd olunması barədə Sərəncam imzalaması səbəbindən Azərbaycan Prezidenti İlham Əliyevə müraciət ünvanlayıbdır. Müraciətdə sərəncamın əhəmiyyəti vurğulanır, milli ədəbiyyatımızın unudulmamasına, böyük sənətkarların xatirəsinin daim yaşadılmasına və cəmiyyətimizdə mənəvi irsin qorunmasına yönəlmiş bu mühüm təşəbbüs alqışlanır.
Prezident.az saytında yerləşdirilən müraciətin mətnini “Ədəbiyyat və incəsənət” portalı oxucularına təqdim edir:
Hörmətli Cənab Prezident!
Azərbaycanın milli-mədəni irsinin qorunması, klassik ədəbiyyatımızın yaşadılması və gələcək nəsillərə ötürülməsi sahəsində həyata keçirdiyiniz ardıcıl və məqsədyönlü siyasət cəmiyyət tərəfindən daim yüksək qiymətləndirilir. Bu siyasətin mühüm tərkib hissəsi olan mədəniyyət və ədəbiyyata göstərdiyiniz diqqət, xalqımızın tarixi yaddaşının möhkəmlənməsinə və mənəvi dəyərlərin gələcək nəsillərə ötürülməsinə xidmət edir.
Azərbaycanın böyük şairi Əfzələddin Xaqani Şirvaninin 900 illiyinin dövlət səviyyəsində qeyd olunması barədə imzaladığınız Sərəncam ölkəmizdə ədəbiyyata və milli-mədəni irsə verilən yüksək önəmin bariz göstəricisidir. Bu Sərəncam yalnız tarixi yubileyin qiymətləndirilməsi ilə məhdudlaşmır, eyni zamanda, gənc nəsillərin Azərbaycan klassiklərinin zəngin yaradıcılığı ilə tanış olmasına, onların əsərlərini dərindən mənimsəməsinə və milli-mənəvi dəyərlərə hörmətlə yanaşmasına işıq tutur. Belə bir addım milli ədəbiyyatımızın unudulmamasına, böyük sənətkarların xatirəsinin daim yaşadılmasına və cəmiyyətimizdə mənəvi irsin qorunmasına yönəlmiş mühüm təşəbbüsdür.
Xaqani Şirvani Azərbaycan klassik poeziyasının ən parlaq simalarından biri olmaqla yanaşı, əsərlərində insan ləyaqəti, azadlıq idealları, ədalət uğrunda mübarizə və vətənpərvərlik kimi universal dəyərləri yüksək bədii-estetik səviyyədə ifadə etmişdir. Onun zəngin irsi yalnız ədəbiyyat və sənət sahəsində deyil, həm də ictimai-mənəvi maariflənmə və gənc nəsillərin tərbiyəsi üçün əvəzsiz nümunədir.
Olduqca mühüm əhəmiyyət daşıyan bu Sərəncam Şirvan camaatı, xüsusilə Xaqaninin doğulduğu bölgənin sakinləri və partiya üzvlərimiz tərəfindən böyük sevinc və minnətdarlıqla qarşılanmışdır. Sizin zaman-zaman ölkəmizin görkəmli klassiklərinin unudulmaması, xatırlanması və dəyərləndirilməsi istiqamətində atdığınız ardıcıl addımlar Azərbaycan mədəniyyətinə göstərdiyiniz qayğının bariz nümunəsi olaraq xalqımız tərəfindən yüksək qiymətləndirilir.
Cənab Prezident, bu addımın Azərbaycan mədəni irsinin qorunmasında, klassiklərin xatirəsinin yaşadılmasında və gənc nəsillərin maariflənməsində oynadığı əvəzsiz rolu xüsusi qeyd edir və Vəhdət Partiyası, onun üzvü olan elm adamları, ictimai xadimlər və bütün üzvlər adından Sizin bu sərəncamı imzalamağınıza görə dərin ehtiram və minnətdarlığımızı bildiririk.
Hörmət və ehtiramla,
Adəm İsmayıl Bakuvi, Vəhdət Partiyasının sədri
Azərbaycan Respublikası, Bakı şəhəri.
“Ədəbiyyat və incəsənət”
(07.02.2026)
Onun əsərləri Azərbaycan dövlətinin milli sərvətidir
İnci Məmmədzadə, “Ədəbiyyat və incəsənət”
"Onun əsərləri Azərbaycan dövlətinin milli sərvətidir" kəlmələri Ümummilli lider Heydər Əliyevə məxsusdur vəbu kəlmələr rəssam Bəhruz Kəngərlinin şəninə söylənibdir.
Bəhruz Kəngərli 1892-ci ilin yanvar ayının 22-də Naxçıvan şəhərində anadan olub. Atası Şirəli bəy gimnaziyada təhsil alıb, fars və rus dillərini öyrənib, Şərq və Avropa ədəbiyyatı ilə tanış olub, qabaqcıl ziyalı kimi tanınıb, şəhər məhkəməsində tərcüməçi vəzifəsində işləyib. O, oğlunu "Xeyriyyə" adlı yeni tipli şəhər məktəbində oxumağa qoyub.
Bəhruz Kəngərli atasının evə gətirdiyi kitab və şəkilli kitablardan faydalanıb, kiçik yaşlarından rəsm çəkməyə maraq göstərib, şəkillərin surətini çıxarmaqla məşğul olub, rus dilini öyrənərək özünün bilik səviyyəsini artırmağa çalışıb. Kiçik ikən eşitmə qabiliyyətini itirən Bəhruz özünün xəyal aləminə qapılaraq bütün vaxtını şəkil çəkməyə sərf edib.
Atasının abunəçi olduğu "Molla Nəsrəddin" jurnalını varaqlamaq Bəhruzun mənəvi aləminə qida verib. O, jurnalda dərc olunan felyetonlarla, karikaturalarla tanış olub, məzəli şəkillərin üzünü çıxarmaqla rəsm çəkməyin sirlərini öyrənib. Bu ilk vərdişlər Bəhruzun rəssamlıq sənətinə sevgisini gücləndirib.
Bu məqsədlə Bəhruz Kəngərli 1910-cu ildə Tiflis rəssamlıq məktəbinə daxil olub və 5 il ərzində orada təhsil aldıqdan sonra 1915-ci ildə Naxçıvana qayıdıb. Zaqafqaziyanın mühüm mədəni mərkəzi Tiflis şəhərində "İncəsənəti təşviq cəmiyyəti" nəzdində təşkil edilən rəssamlıq məktəbinin ilk azərbaycanlı məzunu Bəhruz Kəngərli orada özünün istedadının hərtərəfli inkişafı üçün əlverişli zəmin tapıb.
Məktəbdə təhsil rus akademik təhsili sisteminə əsaslanıb və şəhərin qabaqcıl rəsm müəllimləri tərəfindən aparılıb. Gürcü rəssamları Qiqo Qabaşvili, Aleksandr Mrevleşvili, heykəltaraş Yakov Nikoladze, "Molla Nəsrəddin" jurnalı ilə əməkdaşlıq edən Oskar Şmerlinq kimi müəllimlər öz tələbələrinə peşəkar rəssamlıq prinsiplərini, Avropa mədəniyyətinin nailiyyətlərini aşılayıblar.
Bəhruz Kəngərlinin tələbəlik illərində "Molla Nəsrəddin" jurnalının təsiri altında çəkdiyi rəsm və şarjları bunu aydın sübut edib. Təhsil illərində Bəhruz Kəngərli yay tətillərini Gürcüstanın səfalı yaylaqlarında, Qara dəniz sahillərində, eləcə də doğma Naxçıvanda keçirib və görüb müşahidə etdiyi həyat lövhələrini, müasirlərinin surətlərini fırçaya alıb, sevdiyi peşəsini yorulmadan təkmilləşdirməyə, rəsm qabiliyyətini cilalamağa çalışıb.
Hələ tələbə ikən 1914-cü ildə Naxçıvanda onun ilk fərdi sərgisi təşkil olunub, sənət həvəskarlarının diqqətini cəlb edib, mətbuat səhifələrində rəğbətlə işıqlandırılıb. Şəhərin qabaqcıl ziyalıları sərgini yüksək qiymətləndirib, mətbuatda verilən məqalədə "Bəhruz bəy cənablarının bundan daha gözəl, bundan daha artıq rəsmlər yaratmağa nail olmasını" arzu ediblər.
Akademik M. C. Cəfərovun xatirəsində Bəhruz Kəngərlinin 1919-cu ildə balaca bir otaqda nümayiş etdirdiyi sərgisi haqqında maraqlı məlumat verilir:
"O, bir-bir əsərlərini göstərib həvəslə uşaqlara izahat verirdi və arabir gülümsəyib deyirdi: "Əl vurmaq olmaz, olmaz əl vurmaq". Mən həmişə üzü tutqun, qaşları çatılmış olan rəssamı birinci dəfə gülümsəyən gördüm"
Bəhruz Kəngərlinin tərcümeyi-halı göstərir ki, bədəncə zəif, mülayim təbiətli, yumşaq xasiyyətli, çalışqan və işgüzar ziyalı qısa həyatı boyu maddi çətinliklərə, mənəvi məhrumiyyətlərə məruz qalıb, rəsmi dövlət idarələrindən, imkanlı şəxslərdən lazımi qayğı və yardım görməyib, mədəni cəhətdən geri qalmış adam və cahil insanların laqeyd münasibətinin şahidi olub. O, 1922-ci ildə fevralın 7-də 30 yaşında ciyər xəstəliyindən vəfat edib
Azərbaycan Milli İncəsənət Muzeyinin təşəbbüsü ilə 1947-ci ildə Bakıda, 1957-ci ildə Moskvada Bəhruz Kəngərlinin fərdi yaradıcılıq sərgiləri keçirilib. Hal-hazırda Bəhruz Kəngərlinin əsərləri Azərbaycan Milli İncəsənət Muzeyindən başqa Naxçıvan Dövlət Tarix Muzeyində, Moskva Dövlət Tarix Muzeyində saxlanılır. Naxçıvan şəhərində adına küçə var.
Allah rəhmət eləsin!
“Ədəbiyyat və incəsənət”
(07.02.2026)
Komitə sədri Şura sədri ilə görüşüb
Azərbaycan Respublikası Milli Məclisinin İctimai birliklər və dini qurumlar komitəsinin sədri Fazil Mustafa Qeyri-Hökumət Təşkilatlarına Dövlət Dəstəyi Agentliyi Müşahidə Şurasının sədri, professor Fuad Məmmədovla görüşüb.
“Ədəbiyyat və incəsənət” portalına Milli Məclisdən verilən məlumata görə, Milli Məclisdə keçirilən görüş zamanı komitə sədri Fuad Məmmədovu Agentliyin Müşahidə Şurasının sədri seçilməsi münasibətilə bir daha təbrik edib, ona bu məsuliyyətli fəaliyyətdə uğurlar arzulayıb.
Görüşdə ictimai iştirakçılıq haqqında qanunvericilik, qeyri-hökumət təşkilatlarının fəaliyyəti ilə bağlı müvafiq qanunlar, Prezidentin fərman və sərəncamlarından irəli gələn məsələlər, eləcə də Agentliyin fəaliyyət təcrübəsi, formalaşmış konstrjktiv ənənələri, qarşıda duran vəzifələr və yeni çağırışlar müzakirə olunub. Komitə sədri bu istiqamətdə komitə ilə agentlik arasında əməkdaşlığın inkişaf etdirilməsinin vacibliyini vurğulayıb.
Görüşə və səmimi təbrikə görə təşəkkürünü bildirən professor Fuad Məmmədov qarşılıqlı faydalı əməkdaşlığın ümumi işə töhfə verəcəyini deyib. O, bu əməkdaşlığın yalnız Agentliyin Müşahidə Şurası ilə Milli Məclisin müvafiq komitəsi arasında deyil, bütövlükdə vətəndaş cəmiyyəti institutları ilə parlament arasında əlaqələrin möhkəmlənməsinə xidmət edəcəyinə inandığını bildirib.
Professor Məmmədov birgə fəaliyyətin ictimai maraqların qorunmasına, dövlət–vətəndaş cəmiyyəti institutları arasında əlaqələrin inkişafına, habelə qalib Azərbaycanın yeni dövrün reallıqlarına uyğun olaraq beynəlxalq platformalarda layiqincə təmsil olunmasına töhfə verəcəyini bildirib.
Görüşdə Komitə sədrinin müavini Sahib Alıyev iştirak edib.
Görüşün sonunda Komitə sədri Fazil Mustafa müəllifi olduğu yeni kitabları professor Fuad Məmmədov üçün imzalayıb.
“Ədəbiyyat və incəsənət”
(06.02.2026)
Milli Məclisdə dövlət–din münasibətləri və ictimai iştirakçılıq mövzusu müzakirə olunub
Azərbaycan Respublikasının Milli Məclisinin İctimai birliklər və dini qurumlar komitəsində Dini qurumlarla iş üzrə Dövlət Komitəsi yanında İctimai Şuranın üzvləri ilə görüş keçirilib.
“Ədəbiyyat və incəsənət” portalına Milli Məclisdən verilən məlumata görə, görüşdə Milli Məclisin İctimai birliklər və dini qurumlar komitəsinin üzvləri, Dövlət Komitəsi yanında İctimai Şurada təmsil olunan elmi ictimaiyyətin, vətəndaş cəmiyyəti institutlarının nümayəndələri, ilahiyyatçılar iştirak edib.
Qonaqları salamlayan Milli Məclisin İctimai birliklər və dini qurumlar komitəsinin sədri Fazil Mustafa görüşün məqsədi, önəmi barədə məlumat verib. O bildirib ki, dövlət–din münasibətləri sahəsində ictimai dialoqun gücləndirilməsi, ictimai iştirakçılığın dərinləşdirilməsi və ictimai nəzarət mexanizmlərinin inkişafı müasir çağırışlar fonunda xüsusi aktuallıq daşıyır.
Komitə sədri vurğulayıb ki, Azərbaycanın dünyəvilik modelinə əsaslanan dövlət–din münasibətləri sistemi tolerantlıq, qarşılıqlı hörmət və hüquqi tənzimləmə prinsipləri üzərində qurulub. Bu model həm ölkə içində sabitliyin və dini harmoniyanın təmin olunmasına xidmət edir, həm də beynəlxalq miqyasda maraq doğuran örnək kimi dəyərləndirilir.
Görüş zamanı dövlət–din münasibətlərinin mövcud durumu, dini maarifləndirmə siyasətinin gücləndirilməsi, radikal və təhrif olunmuş dini təsirlərin qarşısının alınmasında maarifçilik amilinin rolu, ictimai şuraların fəaliyyət mexanizmlərinin təkmilləşdirilməsi, eləcə də bu sahədə qanunvericilik təşəbbüsləri və tətbiq təcrübəsi ətrafında geniş fikir mübadiləsi aparılıb.
İctimai Şuranın sədri – AMEA-nın Z.Bünyadov ad. Şərqşünaslıq İnstitutunun “Din və ictimai fikir” şöbəsinin müdiri Elnur Mustafayev, Şura üzvləri – “Simurq” Azərbaycan Mədəniyyət Assosiadiyasının prezidenti, professor Fuad Məmmədov, AMEA-nın A.Bakıxanov ad. Tarix və Etnologiya İnstitutunun “Qərbi Azərbaycan tarixi” şöbəsinin müdiri, professor Cəbi Bəhramov, AMEA-nın Fəlsəfə və Sosiologiya İnstitutunun direktoru, professor İlham Məmmədzadə,
AMEA-nın müxbir üzvü Könül Bünyadzadə, “Qafqaz Tarixi Mərkəzi” İctimai Birliyinin sədri Rizvan Hüseynov, ilahiyyatçı Tural İrfan (Əhmədov), “Azərbaycan Jurnalustlər Şəbəkəsi” İctimai Birliyinin sədri Ayaz Mirzəyev öz çıxışlarında dini məsələlərin mədəniyyət, mənəviyyat və ictimai şüur kontekstində dəyərləndirilməsinin vacibliyini vurğulayıb. Bildirilib ki, din universal sosial sistem fenomeni, mədəniyyətin ayrılmaz tərkib hissəsi kimi təqdim edilməli, sağlam dini düşüncə elmi yanaşma və milli dəyərlərlə uzlaşdırılmalıdır. Bu baxımdan maarifləndirmə fəaliyyətinin gücləndirilməsi, gənclərlə sistemli işin təşkili, eləcə də bölgələrdə mövcud olan intellektual potensialın proseslərə cəlb edilməsi önəm daşıyır.
İctimai Şura üzvləri əməkdaşlığın genişləndirilməsi, dövlət qurumları ilə vətəndaş cəmiyyəti institutları arasında əlaqələrin daha sistemli qurulması, ictimai güvənin möhkəmləndirilməsi və ictimai iştirakçılığın institusional əsasda təşkili ilə bağlı fikirlərini bölüşüblər. Qanunvericilik təşəbbüslərinin hazırlanması prosesində ictimai rəyin və ekspert baxışlarının nəzərə alınmasının vacibliyi vurğulanıb.
Millət vəkilləri – İctimai birliklər və dini qurumlar komitəsin sədr müavini Sahib Alıyev, komitə üzvləri – Elşad Musayev, Cavanşir Paşazadə, Tənzilə Rüstəmxanlı, Günay Ağamalı qaldırılan məsələlərlə bağlı fikirlərini bölüşüb.
Komitə üzvləri dini irsin qorunması və dini abidələrin xəritələndirilməsi, tarixi dini məkanların elmi əsaslarla tədqiqi və gələcək nəsillərə ötürülməsi, məscidlərin yalnız ibadət məkanı deyil, həm də maarifləndirici mədəni platforma kimi fəaliyyətinin genişləndirilməsi ilə bağlı öz düşüncələrini bölüşüb, təkliflərlə çıxış ediblər. Vurğulanıb ki, bu yanaşma cəmiyyətdə dini savadlılığın artmasına, xurafat və yanlış təsəvvürlərin qarşısının alınmasına töhfə verə bilər.
Görüş açıq və konstruktiv müzakirə ortamında keçib. Sonda komitə sədri Fazil Mustafa yekun söz söyləyərək, görüşü dövlət–cəmiyyət münasibətlərinin inkişafı, ictimai dialoqun dərinləşdirilməsi, eləcə də dövlət–din münasibətləri sahəsində qarşılıqlı anlaşma və əməkdaşlığın möhkəmlənməsi baxımından faydalı olacağını bildirilib.
Görüşdə Milli Məclisin İctimai birliklər və dini qurumlar komitəsin eksperti Əkbər Qoşalı, Dini qurumlarla iş üzrə Dövlət Komitəsinin Media və kommunikasiya şöbəsinin müdir müavini Vüsalə Hüseynova iştirak edib.
“Ədəbiyyat və incəsənət”
(06.02.2026)
Böyük türklər – Mustafa Kamal Atatürk
Nigar Xanəliyeva, “Ədəbiyyat və İncəsənət”
Türk Mədəniyyəti və İrsi Fondu ilə Azərbaycan Ədəbiyyat Fondunun “Ədəbiyyat və incəsənət” portalında yayımlanan “Türk dünyası” layihəsində bügünkü söhbətimiz Böyük türklərdən Mustafa Kamal Atatürk barədədir.
Türkiyə Respublikasının qurucusu, modernləşmə və islahatların müəllifi olan görkəmli dövlət xadimi, hərbi lider və ideoloqdur. O, Osmanlı İmperiyasının süqutundan sonra türk xalqının müstəqillik mübarizəsini idarə etmiş və 1923-cü ildə müasir Türkiyə Respublikasını yaratmışdır. Mustafa Kemal Atatürk həm siyasi, həm də sosial sahələrdə dərin dəyişikliklər həyata keçirərək türk cəmiyyətini müasir dünyaya uyğun şəkildə təşkil etmişdir.
Atatürkün islahatları müxtəlif sahələri əhatə etmişdir. Təhsil sahəsində məktəb sistemini modernləşdirərək vəzifəli şəxslərin və gənc nəsilin maariflənməsini təmin etmiş, milli və çağdaş təhsil proqramlarını tətbiq etmişdir. Hüquq sahəsində isə Şəriət qanunlarını ləğv edib müasir vətəndaş hüququna əsaslanan qanunvericilik sistemini qurmuş, bu sahədə Avropa hüquq normalarını tətbiq etmişdir. Dil və mədəniyyət islahatları çərçivəsində Atatürk türk dilini sadələşdirmiş, latın qrafikasına keçid etmiş və milli mədəniyyətin qorunmasını və inkişafını təşviq etmişdir.
Atatürk həmçinin qadın hüquqları və sosial islahat sahəsində böyük irəliləyişlər təmin etmişdir. O, qadınlara seçki hüququ verərək cəmiyyətin bütün sahələrində iştirakını təmin etmiş, cinslər arasında bərabərliyin təşviq olunmasına nail olmuşdur. Eyni zamanda iqtisadi sahədə müasir dövlətçilik prinsiplərinə əsaslanan sənaye, kənd təsərrüfatı və maliyyə islahatları aparmış, türk xalqının iqtisadi müstəqilliyini gücləndirmişdir.
Atatürkün ən mühüm ideyalarından biri milli kimlik və dövlətçilik şüurunun formalaşdırılmasıdır. O, türk xalqının müstəqilliyini qorumaq, milli birliyi gücləndirmək və modern dövlət modeli yaratmaq məqsədilə həm siyasi, həm də mədəni sahədə geniş tədbirlər həyata keçirmişdir. Onun rəhbərliyi altında aparılan dəyişikliklər Türkiyəni Avropa standartlarına yaxınlaşdırmış, həm milli həm də beynəlxalq səviyyədə türk xalqının modern bir dövlət kimi tanınmasına imkan yaratmışdır.
Mustafa Kamal Atatürk həm də strateq və hərbi lider kimi tanınır. Çanaqqala və İstiqlal müharibələrində qazandığı qələbələr onun hərbi dəyanətini və xalqının azadlıq ideyalarına sadiqliyini göstərir. Onun həm hərbi, həm siyasi, həm də mədəni sahələrdə göstərdiyi liderlik xüsusiyyətləri onu yalnız Türkiyədə deyil, dünya tarixində də nadir və təsirli dövlət xadimi kimi tanıdır.
Nəticə etibarilə, Atatürk yalnız Türkiyə Respublikasının qurucusu deyil, həm də türk xalqının modernləşməsi və müasir dövlətçilik ideyasının əsasını qoyan liderdir. Onun həyata keçirdiyi islahatlar, inkişaf strategiyaları və milli kimlik ideyaları bu gün də Türkiyənin və türk dünyasının siyasi, mədəni və sosial həyatına dərin təsir göstərir.
“Ədəbiyyat və incəsənət”
(06.02.2026)
Həftənin beynəlxalq lətifələri
Sərtyel, “Ədəbiyyat və incəsənət”
İNGİLİS LƏTİFƏSİ
Söruşacaqsınız, Britaniya niyə Avropa İttifaqından çıxdı? Cavabı sadədir.
Pifaqorun teoremi – 24 sözdür;
Arximedin qanunu – 67 sözdür;
Müqəddəs on tövsiyyə - 179 sözdür;
ABŞ-ın müstəqillik deklorasiyası – 1300 sözdür;
Avropa İttifaqının kələm satışı üzrə qaydaları isə – 26911 sözdür.
Çıxmayıb neyniyəydi?
ÖZBƏK LƏTİFƏSİ
-Sən Daşkənddə neynəyirsən?
-Qeyri maddi mədəniyyət abidəsini məhv edirəm.
-Başa düşmədim.
-Plov yeyirəm yəni.
QAZAX LƏTİFƏSİ
Qazaxıstanda şahmatda qələbə şahı mat etmək deyil, qələbə rəqibin hər iki atını vura bilməkdir.
MİSİR LƏTİFƏSİ
İskəndəriyyə şəhəri yaxınlığında qazıntı zamanı faraon II Ramzesin bürünc qalxanını tapıblar. Çin istehsalıdır.
ERMƏNİ LƏTİFƏSİ
Ər və arvad küçə ilə kedirlər.
Bir başqa kişi üzbəüz gəlir, papağını çıxarıb təzim edir.
Ər deyir:
-Çox mədəni insandır. Necə gözəl tərzdə salamlaşdı.
Arvad ağzını büzür:
-Fu, nəyi mədənidir? Yatanda elə pis xoruldayır ki.
“Ədəbiyyat və incəsənət”
(06.02.2026)
Qəbələdə “Qış nağılı” II Beynəlxalq Musiqi Festivalına start verilib
Azərbaycanın dilbər guşələrindən olan Qəbələ şəhəri yenidən öz qapılarını sənətsevərlərin, Beynəlxalq Musiqi Festivalı iştirakçılarının üzünə açıb.
Üzeyir Hacıbəyli adına Bakı Musiqi Akademiyasının təşkilatçılığı, Heydər Əliyev Fondu, Mədəniyyət Nazirliyi və “Gilan”ın dəstəyi ilə Qəbələdə artıq ikinci ildir keçirilən “Qış nağılı” II Beynəlxalq Musiqi Festivalı 2009-cu ildən bu şəhərdə ənənəvi təşkil olunan Qəbələ Beynəlxalq Musiqi Festivalının davamı olaraq sənətsevərləri yenidən bir araya gətirib.
“Ədəbiyyat və incəsənət”
portalı AzərTAC-ın bölgə müxbiri istinadən xəbər verir ki, festivalın proqramına uyğun olaraq, fevralın 5-də axşam Qəbələ şəhərindəki Heydər Əliyev Konqres Mərkəzində musiqisevərlərə ilk konsert proqramı təqdim olunub. Dahi bəstəkar Qara Qarayevin musiqi irsinə həsr olunacaq konsertdə Xalq artistləri Fərhad Bədəlbəyli və Murad Adıgözəlzadə, Azərbaycan Dövlət Simli Kvarteti çıxış edib.
Konsertdən əvvəl Üzeyir Hacıbəyli adına Bakı Musiqi Akademiyasının professoru, Xalq artisti Zəhra Quliyeva çıxış edərək, ikinci dəfədir təşkil edilən Qəbələ “Qış nağılı” II Beynəlxalq Musiqi Festivalının mədəniyyətimiz üçün əlamətdar hadisə olduğunu vurğulayıb. Bildirilib ki, Qəbələ Beynəlxalq Musiqi Festivalının əsas xüsusiyyətlərindən biri də odur ki, hər zaman festivalın açılışından əvvəl kamera musiqisi axşamları təşkil edilir. Bugünkü kamera konserti isə dünya musiqi xəzinəsinə əvəzolunmaz töhfələr verən görkəmli bəstəkar, ictimai xadim, bütöv bir bəstəkarlar nəsli yetişdirmiş misilsiz müəllim, Xalq artisti Qara Qarayevin əziz xatirəsinə həsr olunub.
Konsertdə Qara Qarayevin “2 saylı simli kvartet a-moll” (iki hissə), “İnsan məskən salır” kinofilmindən musiqi, “Prelüd A-dur, F-dur”, R.Şumanın “Piano kvinteti” (III və IV hissələr), İ.Bramsın “Piano kvinteti” (III və IV hissələr) əsərləri səsləndirilib.
Xalq artistləri Fərhad Bədəlbəyli (piano) və Murad Adıgözəlzadənin (piano), həmçinin Azərbaycan Dövlət Simli Kvartetin üzvləri – Nəzrin Aslanlı (violin), Xəyalə Abdullayeva (violin), Vaxtanq İmanov (viola) və Aleksey Miltıxın (violençel) təqdim etdikləri əsərlər tamaşaçıların ürəyincə olub.
Qeyd edək ki, Qəbələ “Qış nağılı” II Beynəlxalq Musiqi Festivalının proqramı çox zəngindir. Musiqisevərlər festival günlərində Əməkdar artist Əyyub Quliyevin dirijorluğu ilə Azərbaycan Dövlət Akademik Opera və Balet Teatrının Simfonik Orkestrinin maraqlı konsert proqramından zövq alacaq, “Bakı-Neapol: Musiqi Körpüsü” kamera musiqi axşamında Azərbaycan və İtaliya bəstəkarlarının əsərlərini dinləyəcək, “Azərbaycan-İspaniya: iki ölkə, bir musiqi” adlı flamenko-caz musiqi gecəsində İspaniyadan dəvət alan ifaçı və rəqqasların çıxışlarını izləmək imkanı əldə edəcəklər.
“Ədəbiyyat və incəsənət”
(06.02.2026)
Kanadada Azərbaycan Gənclərinin Birinci Forumu keçirilib
2 Fevral – Azərbaycan Gəncləri Günü münasibətilə Kanadanın Toronto şəhərində “Növbəti Nəsil Kanadalılar” (“The Next Generation Canadians”) adlı Kanada Azərbaycan Gənclərinin Birinci Forumu keçirilib. Forum Azərbaycan Respublikasının Diasporla İş üzrə Dövlət Komitəsinin dəstəyi, “Vətən” Azərbaycan İncəsənət və Mədəniyyət Mərkəzinin təşkilatçılığı ilə baş tutub.
“Ədəbiyyat və incəsənət” portalına Azərbaycan Respublikasının Diasporla İş üzrə Dövlət Komitəsindən verilən məlumata görə, forumda komitənin sədr müavini Vaqif Seyidbəyov, Azərbaycan Respublikasının Kanadadakı müvəqqəti işlər vəkili Vüsal Süleymanov, Kanada parlamentinin üzvləri Ali Ehsassi, Roman Baber və Sima Acan, Ontario Əyalət Parlamentinin üzvü Andrea Hazell, Kanadanın Toronto, Kalqari, Alberta, Ottava, Karlton, Qərb, York və Toronto Metropolitan universitetlərində təhsil alan azərbaycanlı tələbələr, həmçinin müxtəlif sahələrdə işləyən, uğur qazanan gənc sahibkarlar iştirak edib.
Diasporla İş üzrə Dövlət Komitəsinin sədr müavini Vaqif Seyidbəyov forumun Kanadada yaşayan azərbaycanlı gənclərin şəbəkələşməsi, liderlik bacarıqlarının inkişafı və milli kimliyin qorunması baxımından mühüm platforma olduğunu vurğulayıb. Gənclərin yaşadıqları cəmiyyətə inteqrasiyası ilə yanaşı, Azərbaycanla bağlarının daha da möhkəmlənməsinə töhfə verəcəyinə əminliyini ifadə edib.
Kanadada fəaliyyət göstərən Azərbaycan Evinin rəhbəri Lalin Həsənova gənclərin Azərbaycan Evinin imkanlarından səmərəli istifadə etməsinin, milli kimlik və mədəni dəyərlərə daim önəm verməsinin, məskunlaşdıqları ölkədə Vətənimizi layiqincə təmsil etməsinin vacibliyindən danışıb.
Forumda Ontario vilayətinin Turizm, Mədəniyyət və Oyun Biznesi üzrə naziri və Ontario Əyalət Parlamentinin üzvü Stan Çonun 'Vətən' Azərbaycan İncəsənət və Mədəniyyət Mərkəzinə göndərdiyi rəsmi təbrik məktubu səsləndirilib. Məktubda forumun işinə və gənclərə uğurlar arzulanıb.
Digər çıxışçılar gənclərin inkişafına yönələn və onlar üçün faydalı ola biləcək imkanları müzakirə edərək, gənc soydaşlarımızın şəbəkələşməsinə xidmət edən bu addımları yüksək qiymətləndiriblər.
Forumun işi sessiya və panellərlə davam edib.
Təlimçi Pərvin Abdullayeva “Gələcəyin Qurucuları: Gənclər necə innovativ ola bilər, sahibkarlar kimi ünsiyyət qura və idarə edə bilər?” adlı sessiyada gənclərə innovativ düşüncə və liderlik bacarıqlarının inkişafı ilə bağlı tövsiyələr verib. Təlimçi Stiv Elliot isə “Sürətli düşün, təsirli danış: Gələcək liderlər üçün ünsiyyət” mövzusunda ictimai natiqlik təlimi ilə iştirakçıların effektiv ünsiyyət və təqdimat bacarıqlarını gücləndirməsi üçün maraqlı məsləhətlər səsləndirib.
Forumda, həmçinin “Böyük ideyalar, real hekayələr: uğurlu sahibkarların düşüncələri”, “Öyrənmək, qazanmaq və böyümək: dərslər və karyera arasında”, “Təcrübə səsləri: dərsliklərdə tapmayacağınız dəsrlər” adlı panellərdə gənclərlə yanaşı, Kanadanın müxtəlif universitetlərində akademik təcrübəsi olan azərbaycanlı professorlar da çıxış edib, öz maraqlı və faydalı təcrübələrini bölüşüblər.
Qeyd edək ki, bu kimi forumların ənənəvi təşkil olunmasının əsas məqsədi xaricdə yaşayan azərbaycanlı gənclərin yaşadıqları cəmiyyətə inteqrasiyasını gücləndirmək, əlaqələrini genişləndirmək və həmvətənlərimiz arasında dayanıqlı icma birliyinin formalaşmasına töhfə verməkdir.
“Ədəbiyyat və incəsənət”
(06.02.2026)
"Bizi Birləşdirən Mədəniyyət" İctimai Birliyi "Xalqın mədəni sərvəti" layihəsini təqdim edib
"Bizi Birləşdirən Mədəniyyət" İctimai Birliyinin təşkilatçılığı ilə Beynəlxalq Muğam Mərkəzində "Xalqın mədəni sərvəti" layihəsi çərçivəsində görkəmli Azərbaycan bəstəkarı, Xalq artisti Qara Qarayevin doğum gününə həsr olunmuş konsert proqramı baş tutub.
“Ədəbiyyat və incəsənət” portalına İctimai Birlikdən verilən məlumata görə, gecədə Əməkdar artist Əyyub Quliyevin dirijorluğu və bədii rəhbərliyi ilə Qara Qarayev adına Azərbaycan Dövlət Kamera Orkestri, beynəlxalq müsabiqələr laureatı, pianoçu Səidə Tağızadə çıxış ediblər.
Konsert proqramında "Yeddi gözəl" baletindən Vals, Ayşənin rəqsi, "İldırımlı yollarla" baletindən Qızların rəqsi, Pavana ("Don Kixot" simfonik qravürlərindən), Fortepiano Prelüdləri No. 7 və 24 (simli orkestr üçün işləmə), "Eskiz", Fortepiano və orkestr üçün Prelüdlər (2 və 23), "İnsan məskən salır" kinofilmindən musiqi, "Matəm odası" səsləndirilib.
“Ədəbiyyat və incəsənət”
(06.02.2026)
Beyləqanda “Ağıllı gənclik: Sağlam gələcək” adlı maarifləndirici tədbir keçirilib
Rəqsanə Babayeva, “Ədəbiyyat və incəsənət”
Beyləqan rayon Mədəniyyət Mərkəzinin İmamverdili kənd klubunun və kənd tam orta ümumtəhsil məktəbinin birgə təşkilatçılığı ilə “Narkotik vasitələrin psixotrop maddələrin, onların prekursorlarının qanunsuz dövriyyəsinə və narkomanlığa qarşı mübarizəyə dair 2025-2030-cu il Dövlət Proqramı”nın icrasına dair tədbirlərə uyğun olaraq “Ağıllı gənclik: Sağlam gələcək” adlı maarifləndirici tədbir keçirilib.
Tədbirdə Beyləqan rayon İHB-nın İmamverdili kənd İnzibati Ərazi Vahidi üzrə nümayəndəsi, kənd Agsaqqallar şurasının və Kənd bələdiyyəsinin üzvləri, məktəbin müəllim və şagird kollektivi, kənd ictimaiyyətinin nümayəndələri və mədəniyyət müəssisələrinin əməkdaşları iştirak edib.
Dövlət Himninin səsləndirilməsi, Ümummilli Lider Heydər Əliyevin və torpaqlarımızın azadlığı uğrunda canlarından keçmiş qəhrəman şəhidlərin əziz xatirəsinin bir dəqiqəlik sükutla yad edilməsi ilə başlayan tədbirdə çıxış edənlər narkomaniyanın insan sağlamlığına, həyat keyfiyyətinə və cəmiyyətin sosial-iqtisadi inkişafına ciddi mənfi təsirlər göstərdiyini diqqətə çatdırıblar.
Bildirilib ki, bu təhlükəli problemin doğurduğu fəsadlara qarşı mübarizə bu gün daha da aktuallaşıb və bu sahədə ardıcıl və məqsədyönlü tədbirlər həyata keçirilir.
Sonda narkomaniyanın fəsadlarını özündə əks etdirən videoçarx nümayiş olunub.
“Ədəbiyyat və incəsənət”
(06.02.2026)
