İmran Verdiyev,

Azərbaycan Respublikasının Əməkdar müəllimi.

“Ədəbiyyat və incəsənət” portalının Oğuz təmsilçisi

Bəşəriyyətin yaranışından bu günə qədər yer üzündən milyardlarla insan   gəlib keçmişdir. İlk baxışda hamımız eyni anatomik quruluşa, oxşar bioloji ehtiyaclara və ümumi insani duyğulara sahibik. Lakin əl izlərimizin təkrarolunmazlığı kimi, yaşadığımız həyatın fəlsəfəsi və daxili dünyamız da yalnız bizə məxsusdur. Hər bir insan özü ilə birlikdə tamamlanmamış bir roman, yazılmaqda olan bir dastan və ya kainatda yalnız bir dəfə ifa olunan unikal bir simfoniya gətirir. “Hər insanın hekayəsi fərqlidir” fikri yalnız romantik bir deyim deyil; bu, insan varlığının, kimliyinin və mənəvi mövcudluğunun təməl fəlsəfəsidir.

Bu fərqlilik və unikal dəst-xətt öz köklərini ilk növbədə insanın ayaq basdığı torpaqdan, doğulduğu coğrafiyadan alır. Dağ kəndinin sakitliyində, təbiətlə iç-içə boy-başa çatan bir insanın dünyagörüşü ilə metropolun gurultulu küçələrində böyüyən insanın baxış bucağı eyni ola bilməz.

Lakin doğulduğumuz torpaq bizə dil, mədəniyyət və həyata baxış çərçivəsi bəxş etsə də, məkan yalnız bir səhnədir. Həmin səhnədə hansı rolu oynayacağımızı, eyni küçədə və ya eyni dam altında böyüsək belə, hansı cığırı seçəcəyimizi öz daxili dünyamız müəyyənləşdirir. Çünki insanı formalaşdıran yalnız gördüyü mənzərə deyil, həmin mənzərəyə yüklədiyi mənadır.

Torpağın və mühitin verdiyi bünövrə üzərində zamanla insanın həqiqi simasını cilalayan sınaqlar və daxili mübarizələr boy göstərir. Hər bir insanın hekayəsində görünən və görünməyən tərəflər vardır. Biz çox vaxt insanları xarici uğurları və ya sosial statusları ilə qiymətləndiririk. Lakin insanın həqiqi hekayəsi onun təkbaşına qaldığı zaman keçirdiyi hiss-həyəcanlarda, səssizcə apardığı daxili döyüşlərdə və heç kimə danışa bilmədiyi sınaqlarda gizlənir. Yaşanan bir itkinin buraxdığı kədər, məğlubiyyətdən sonra yenidən ayağa qalxmaq cəsarəti və ya kiməsə bəlli etmədən çəkilən ağrılar insan obrazına dərinlik qatır. Xaricdən sakit görünən dənizin dərinliklərində nə kimi fırtınaların qopduğunu və hansı gəmilərin batdığını yalnız o dənizi yaşayan bilər. Məhz bu daxili vulkanlar və gilə-gilə toplanan təcrübələr insanın hekayəsini başqalarından fərqləndirən əsas mənəvi sütundur.

Bu sınaqlar qarşısında bizi taleyin axarına buraxmayan, hekayəmizin süjetini dəyişdirən ən qüdrətli qüvvə isə iradəmiz və seçimlərimizdir. Həyat bizə müəyyən şərtlər təqdim edir, lakin o şərtlər daxilində hansı yolu tutacağımız tamamilə öz əlimizdədir. İki insan eyni acını yaşaya bilsə də, birinin bu təcrübədən kin və nifrət, digərinin isə mərhəmət və müdriklik çıxarması onların daxili seçiminin nəticəsidir. Oxuduğumuz hər bir kitab, dinlədiyimiz hər bir musiqi, əməyə, sənətə və insanlara verdiyimiz dəyər hekayəmizdə yeni bir fəsil açır. Bəzən kiçik və əhəmiyyətsiz görünən bir qərar bütün ömür xəritəmizin istiqamətini dəyişməyə qadir olur.

Məhz hər bir insanın özünəməxsus kədərlərdən, sınaqlardan və seçim pillələrindən keçdiyini anlamaq insana ən ali mənəvi keyfiyyəti — empatiyanı bəxş edir. Başqalarının hekayəsinə hörmətlə yanaşmaq bizi ön mühakimələrdən azad edir, insanları zahiri görünüşünə görə mühakimə etməyin yanlışlığını göstərir. Hər kəsin öz daxili cəbhəsində böyük bir mübarizə apardığını dərk etmək cəmiyyətdə mərhəmət, səbir və anlayış işığını artırır. Heç kimin hekayəsini tam bilmədən onun haqqında qəti hökm çıxarmaq mümkün deyil, çünki hər kəs öz ömür səhnəsində unikal bir qəhrəmandır.

Nəticə olaraq, hər insanın hekayəsinin fərqli olması dünyanı rəngarəng və mənalı edən ən böyük möcüzədir. Həyat bizə bəxş edilmiş məhdud bir zaman kəsiyidir və bu zaman ərzində başqalarının hekayəsini təkrarlamağa çalışmaq öz varlığımıza qarşı haqsızlıq olardı. Əsas məsələ hekayənin nə qədər uzun yazılması değil, onun nə dərəcədə dürüst, ləyaqətli və mənalı olmasıdır. Yaxşılıqla, zəhmətlə, mənəvi ucalıqla və sevgi ilə yazılan hər bir hekayə yalnız bir fərdin ömür yolu olaraq qalmır, həm də gələcək nəsillər üçün bir işıq, bir təcrübə mənbəyinə çevrilir.

Öz unikal hekayəmizi ləyaqətlə yazmaq və başqalarının hekayəsinə hörmətlə yanaşmaq insan olmağın ən ali məqsədidir.

“Ədəbiyyat və incəsənət”

(29.10.2026)

Murad Vəlixanov,

"Ədəbiyyat və incəsənət" portalının İncəsənət şöbəsi

Azərbaycan kino sənətinin əfsanəvi siması, unudulmaz aktyor və rejissor Şahmar Ələkbərovun yaratdığı məktəb bu gün sərhədləri aşaraq dünya kinosunun mərkəzi olan Hollivuda qədər uzanır. Böyük sənətkarın genetik və yaradıcılıq irsini çiyinlərində daşıyan nəvəsi Eldar İsgəndərov, son illərdə beynəlxalq müstəvidə qazandığı uğurlarla Azərbaycanın adını uca tutur. O, gənc yaşında dünyanın ən nüfuzlu kino platformalarında diqqət mərkəzinə düşməyi bacaran unikal istedadlardandır.

Eldar İsgəndərov kökləri Azərbaycana bağlı olsa da, uşaqlıq və gənclik illərini Avropada keçirib. Ailəsinin 2012-ci ildən xaricə köçməsi ilə əlaqədar olaraq Eldar Niderland və Belçikada böyüyüb boya-başa çatmışdır. Lakin onun daxilindəki sənət sevgisi onu hərbi və ya texniki sahələrə deyil, birbaşa babası Şahmar Ələkbərovun yoluna yönəldib. Aktyorluq təhsilini mükəmməlləşdirmək üçün ABŞ-yə yollanan Eldar, Amerikanın ən məşhur incəsənət ocaqlarından biri olan Savanna İncəsənət və Dizayn Kollecinin (SCAD) məzunu olmuşdur.

Eldar İsgəndərovun karyerasında ən böyük sıçrayış 2026-cı ilin may ayında baş tutdu. O, dünya kinosunun zirvəsi hesab olunan məşhur Kann Film Festivalında nümayiş etdirilən və festivalın ən çox müzakirə edilən ekran işlərindən biri olan “Club Kid” bədii filmində rol aldı. Filmdə "Nicky" obrazını canlandıran gənc aktyorun performansı təkcə tamaşaçıların deyil, nüfuzlu xarici media orqanlarının da xüsusi diqqətini çəkdi. Dünyaca məşhur "The Hollywood Reporter" jurnalı Eldar İsgəndərovun oyununu yüksək qiymətləndirərək, onun filmin ən yaddaqalan və komik səhnələrinə xüsusi bir rəng qatdığını yazdı. Xarici tənqidçilər onu “maraqlı və qeyri-adi obraz yaradan istedad” kimi təqdim etdilər.

Kann uğurundan əvvəl də böyük studiyaların diqqətini çəkən Eldar, məşhur "A24" və "Fruit Tree" studiyalarının birgə istehsalı olan və tanınmış aktyor Cessi Ayzenberqin (Jesse Eisenberg) rəhbərliyi ilə hazırlanan musiqili komediya layihəsində rol almışdır. Bunun ardınca isə o, Hollivudun nüfuzlu rejissorlarından sayılan Qrant Singerin (Grant Singer) “Reenactment” adlı bədii filminin əsas aktyor heyətinə daxil edilib. Benisio del Toro, Kameron Dias və Ana de Armas kimi dünya ulduzlarının adları ilə yanaşı bir azərbaycanlı gəncin adının hallanması onun peşəkarlığının bariz nümunəsidir.

Eldar İsgəndərov müsahibələrinin birində "Şahmar Ələkbərovun nəvəsi olmaq mənə böyük qürur verir. Onun sənət yolunu və yaradıcılıq irsini dünyada yaşatılmaq mənim üçün xoşbəxtlikdir" deyərək öz köklərinə olan bağlılığını nümayiş etdirmişdir. O, bu gün sadəcə Şahmar Ələkbərovun ailəsinin deyil, bütövlükdə Azərbaycan mədəniyyətinin dünya kinosundakı fəxr xəbərinə çevrilməkdədir.

“Ədəbiyyat və incəsənət”

(29.10.2026)

Vətən sərhədlərinin məğrur keşikçisi: Şəhid Çavuş Əlibəy Əlibəyov

Murad Vəlixanov,

"Ədəbiyyat və incəsənət" portalının İncəsənət şöbəsi

Azərbaycan hərb tarixinə qızıl hərflərlə yazılan 44 günlük Vətən müharibəsi və 2023-cü ilin sentyabrında həyata keçirilən lokal antiterror tədbirləri xalqımızın gücünü və ordumuzun qətiyyətini bütün dünyaya nümayiş etdirdi. Bu şanlı qələbələrin qazanılmasında uzun illər hərbi xidmətdə qüsursuz fəaliyyət göstərən, gənc əsgərlərə örnək olan təcrübəli hərbçilərin rolu əvəzsizdir. Belə qəhrəmanlardan biri də təqaüdə çıxmasına çox az qalmış, lakin gəncləri qorumaq üçün canını sipər edərək şəhadətə ucalan Xaçmazın igid oğlu, çavuş Əlibəy Mirkərim oğlu Əlibəyovdur.

Erkən illəri və hərbi peşəkarlıq yolu

Əlibəy Əlibəyov 29 oktyabr 1983-cü ildə Xaçmaz rayonunun Bostançı kəndində anadan olmuşdur. O, orta təhsilini Xudat şəhər 1 nömrəli tam orta məktəbində almışdır. Erkən yaşlarından hərb sənətinə olan sonsuz marağı və Vətənə bağlılığı onu müddətdən artıq həqiqi hərbi xidmət hərbi qulluqçusu (MAHHXHQ) olmağa sövq etdi. Azərbaycan Silahlı Qüvvələrində "Çavuş" rütbəsində xidmət edən Əlibəy, intizamlılığı və döyüş hazırlığı ilə seçilirdi. Uzunmüddətli qüsursuz xidmətlərinə görə o, hələ sağlığında Azərbaycan Respublikası Silahlı Qüvvələrinin 95 və 100 illik yubiley medalları, həmçinin I, II və III dərəcəli "Qüsursuz xidmətə görə" medalları ilə təltif olunmuşdur.

Vətən müharibəsi döyüşləri

2020-ci il sentyabrın 27-də başlayan Vətən müharibəsi çavuş Əlibəyov üçün böyük sınaq və şərəf yolu oldu. O, peşəkar və təcrübəli hərbçi kimi cəbhənin ən çətin və strateji nöqtələrində döyüş tapşırıqlarını yerinə yetirdi. Füzuli, Cəbrayıl və Xocavənd rayonlarının işğaldan azad edilməsi əməliyyatlarında bilavasitə iştirak edərək xüsusi mərdlik və rəşadət nümayiş etdirdi. Müharibə bitdikdən sonra dövlət tərəfindən "Vətən müharibəsi iştirakçısı", "Füzulinin azad olunmasına görə", "Cəbrayılın azad olunmasına görə" və "Xocavəndin azad olunmasına görə" medalları ilə mükafatlandırıldı.

Lokal antiterror tədbirləri və ali fədakarlıq

2023-cü ilin sentyabrında Qarabağdakı qanunsuz erməni silahlı birləşmələrinin təxribatlarına son qoymaq məqsədilə başladılan lokal antiterror tədbirləri zamanı Əlibəy yenə də ön cəbhədə idi. Ömrünün 40-cı baharına addımlayan və təqaüdə çıxmaq ərəfəsində olan çavuş, döyüş yoldaşlarının xatirələrində silinməz iz qoyacaq bu tarixi sətirləri söyləmişdi: “Mən yaşlıyam, mən qabağa gedirəm. Siz hələ ki, cavansınız, sonra gələrsiniz”.

O, 19 sentyabr 2023-cü ildə Ağdərə istiqamətində gedən şiddətli və qanlı döyüşlərdə gənc əsgərləri qorumaq üçün öndə vuruşarkən qəhrəmancasına şəhid oldu. Şəhidimizin nəşi doğulduğu Xaçmaz rayonunun Bostançı kənd qəbiristanlığında böyük izdiham və hərbi ehtiramla torpağa tapşırıldı.

Əbədi irsi və təltifləri

Əlibəy Əlibəyov ailəcanlılığı ilə seçilirdi; ondan geriyə Vətənə əmanət 2 qız və 1 oğlan övladı qaldı. Ölümündən sonra Azərbaycan Respublikası Prezidentinin müvafiq sərəncamları ilə o, ərazi bütövlüyünün təmin olunmasındakı xidmətlərinə görə "Vətən uğrunda" medalı və III dərəcəli "Vətənə xidmətə görə" ordeni ilə təltif edilmişdir. Onun qəhrəmanlıq hekayəsi gələcək nəsillər üçün əsl vətənpərvərlik məktəbidir.

“Ədəbiyyat və incəsənət”

(29.10.2026)

İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Bu gün doğum günü qeyd edilən Rufus Syuell (Rufus Sewell) — İngiltərə kino, televiziya və teatr aktyorudur. O, xüsusilə tarixi filmlərdə canlandırdığı zadəganlar, hökmdarlar və mürəkkəb xarakterli obrazlarla tanınır. Aktyor həmçinin The Illusionist, A Knight's Tale və The Diplomat kimi ekran əsərlərindəki rolları ilə geniş tamaşaçı auditoriyasının diqqətini cəlb edib.

Rufus Syuellin anası Co Syuell (Jo Sewell) rəssam, atası Uilyam Syuell (William Sewell) isə animasiya sahəsində çalışan mütəxəssis olub. Atası Rufus 10 yaşında olarkən vəfat edib. O, uşaqlıq illərindən sonra aktyorluğa maraq göstərib və Londondakı Mərkəzi Nitq və Dram Məktəbində təhsil alıb. 1989-cu ildə üçillik təhsilini başa vuraraq peşəkar fəaliyyətə başlayıb.

Rufus Syuellin aktyorluq karyerası teatr səhnəsində başlayıb. O, teatrda qazandığı təcrübə sayəsində emosional dərinliyi olan, mürəkkəb və xarakter baxımından fərqli obrazları canlandırmaq bacarığını inkişaf etdirib. 1990-cı illərdə filmlərdə və televiziya layihələrində rol almağa başlayıb. 1990-cı illərin sonlarından etibarən daha çox tanınıb. Aktyorun fərqli tarixi dövrləri, siyasi hadisələri və insan münasibətlərini əks etdirən ekran əsərlərindəki çıxışları onun yaradıcılığında mühüm yer tutur.

Ən məşhur filmləri

1. Dark City (1998)

Elmi-fantastika, triller

Syuell bu filmdə Con Merdok (John Murdoch) obrazını canlandırır. Hadisələr sirli şəhərdə baş verir və baş qəhrəman öz keçmişini, kimliyini və ətrafında baş verənlərin səbəbini anlamağa çalışır.

2. A Knight's Tale (2001)

Tarixi macəra

Aktyor burada qraf Ademar (Count Adhemar) rolunda çıxış edir. Orta əsrlərdə cəngavərlik yarışları və şöhrət uğrunda mübarizə filmin əsas mövzularındandır.

3. The Illusionist (2006)

Mistik dram, detektiv

Syuell vəliəhd Leopold rolunu oynayır. Sehrbazın qeyri-adi çıxışları, sevgi, hakimiyyət və gizli planlar filmin əsas xəttini təşkil edir.

4. The Holiday (2006)

Romantik komediya

Bu filmdə Jasper rolunu canlandırır. Ekran əsəri münasibətlər, sevgi və insanların həyatlarında yeni başlanğıclar etməsi haqqındadır.

5. Tristan & Isolde (2006)

Tarixi romantik dram

Syuell Kral Marke obrazını canlandırır. Film sevgi, sədaqət, hakimiyyət və faciəli seçimlər ətrafında qurulub.

Rufus Syuellin aktyorluğunun əsas xüsusiyyətləri bunlardır:

- Güclü xarakterlər: Hakimiyyət sahibi, aristokrat və siyasi fiqurların obrazlarını inandırıcı canlandırır.

- Psixoloji dərinlik: Obrazlarının daxili ziddiyyətlərini və gizli niyyətlərini ifadə etməyi bacarır.

- Janr müxtəlifliyi: Tarixi dram, romantik komediya, triller və elmi-fantastika janrlarında çalışıb.

- Teatr uğurları: Tom Stoppardın Rock ’n’ Roll tamaşasındakı roluna görə 2006-cı ildə Lourens Olivye mükafatına layiq görülüb və Toni mükafatına namizəd olub.

“Ədəbiyyat və incəsənət”

(29.10.2026)

İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Potensialı tam açılmayan daha bir aktyor - Ağaxan Salmanlı.

O, bəlkə də dramatik, bəlkə də komedik rollarıyla əsl ulduz ola bilərdi, amma xəsisliklə verilmiş epizodik rollarıyla əsla parlaya bilmədi.

Heyif.

Bu gün anadan olmasının 85 illiyi qeyd edilən Ağaxan Salmanlı 29 oktyabr 1941-ci ildə Suraxanıda anadan olub. 1949–1959-cu illərdə orta məktəbdə təhsil alıb. İlk sənət təhsilini Suraxanıda fəhlə gənclər dram dərnəyində, daha sonra Teatr İnstitutunun dram-kino aktyorluğu fakültəsində Rza Təhmasibin kursunda təhsil alıb. Peşəkar səhnə fəaliyyətinə Gənc Tamaşaçılar Teatrında Seyfəddin Dağlının "Bahar oğlu" əsəri əsasında Cəfər Cabbarlı rolu ilə başlayıb. Bir neçə Mozalan kinojurnalında çəkilib. Xalq artistidir.

9 may 2012-ci ildə, 30 aprel 2014-cü ildə və 6 may 2015-ci ildə Prezident Mükafatına layiq görülüb. 10 mart 2016-cı ildə Azərbaycan Teatr Xadimləri İttifaqının "Sənətkar" medalı ilə təltif edilib. 6 may 2016-cı ildə Azərbaycanın Respublikası Prezidentinin fərdi təqaüdünə layiq görülüb. 29 fevral 2020-ci ildə səhər saatlarında qəflətən vəfat edib. Suraxanı qəbiristanlığında dəfn olunub.

Teatr sahəsindəki rolları

1. Cəfər Cabbarlı — ("Aydınlığa doğru" Seyfəddin Dağlı)

2. Romeo — ("Romeo və Cülyetta" Vilyam Şekspir)

3. Dinar — ("Yadındamı" Altay Məmmədov)

4. Səməd — ("Sən nə üçün yaşayırsan?" İmran Qasımov, Həsən Seyidbəyli)

5. Doktor — ("Yuxulama" Kamal Aslanov)

6. Kazım — ("Məhəbbət bir bəladır" Əhməd Orucoğlu)

7. Qulam — ("Pul dəlisi" Əhməd Orucoğlu)

8. Artur — ("Ovod" Eteri Voyniç)

9. Hacı Murad — ("Tamahkar" Süleyman Sani Axundov)

10. Kərbəlayi Mirzalı — ("Danabaş kəndinin məktəbi" Cəlil Məmmədquluzadə)

Filmoqrafiya

1. İstintaq davam edir

2. Axırıncı aşırım 

3. Tülkü həccə gedir

4. Maqarıç

5. 1001-ci qastrol

6. Pıspısa xanım və Siçan bəy.

Allah rəhmət eləsin!

“Ədəbiyyat və incəsənət”

(29.10.2026)

BU GÜN AKTRİSANIN YUBİLEYİDİR, 55 YAŞI TAMAM OLUR

İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Vinona Rayder Amerika kino sənayesinin tanınmış aktrisalarından biridir. O, xüsusilə 1980-ci illərin sonu və 1990-cı illərdə çəkildiyi filmlərlə məşhurlaşıb. Aktrisa həm dramatik, həm romantik, həm də fantastik və qorxu janrlarında yaratdığı obrazlarla tamaşaçıların diqqətini cəlb edib. Sonrakı illərdə isə Stranger Things serialındakı rolu sayəsində yeni nəsil tamaşaçılar arasında da böyük şöhrət qazanıb.

Vinona Rayder 29 oktyabr 1971-ci ildə ABŞ-ın Minnesota ştatında dünyaya gəlib. O, yazıçı və nəşriyyat fəaliyyəti ilə məşğul olan Maykl Horovitsin və yazıçı, video prodüseri Sintiya Horovitsin qızıdır. Ailəsi incəsənətə, ədəbiyyata və mədəniyyətə maraq göstərirdi. Vinona uşaqlıq illərində Kaliforniyada yaşayıb və erkən yaşlarından aktyorluğa maraq göstərməyə başlayıb.

Yeniyetməlik dövründə San-Fransiskodakı American Conservatory Theater aktyorluq məktəbində təhsil alıb. Onun əsl soyadı Horovitz olsa da, peşəkar fəaliyyətində atasının sevdiyi musiqiçi Mitç Rayderin (Mitch Ryder) adından ilhamlanaraq Ryder soyadını seçib. Vinona Rayder 1986-cı ildə çəkilmiş Lucas filmi ilə kino fəaliyyətinə başlayıb. Həmin vaxt onun cəmi 15 yaşı var idi. İlk rollarından etibarən fərqli xarakterlər yaratmaq bacarığı ilə seçilib.

1988-ci ildə rejissor Tim Börtonun (Tim Burton) Beetlejuice filmində Lidiya Dits obrazını canlandırması onun tanınmasına böyük təsir göstərib. Ardınca 1989-cu ildə Heathers filmində çəkilərək gənclər arasında şöhrətini daha da artırıb. 1990-cı ildə isə Edward Scissorhands filmində Conni Depp (Johnny Depp) ilə birlikdə rol alıb. Bu film onun karyerasının ən yadda qalan ekran işlərindən birinə çevrilib.

Ən məşhur filmləri

1. Beetlejuice (1988)

Fantastika, komediya, qorxu

Rayder bu filmdə qeyri-adi və qaranlıq üslubu ilə seçilən Lidiya Dits obrazını canlandırıb. Bu rol onun karyerasında mühüm dönüş nöqtəsi olub.

2. Heathers (1989)

Qara komediya, dram

Filmdə Veronika Soyer rolunu oynayıb. Ekran əsəri məktəb həyatı, sosial təzyiq, dostluq və zorakılıq mövzularını satirik şəkildə təqdim edir.

3. Edward Scissorhands (1990)

Fantastik romantik dram

Rayder Kim Boqs obrazını canlandırıb. Film cəmiyyətə uyğunlaşmaqda çətinlik çəkən qeyri-adi bir insanın hekayəsindən bəhs edir.

4. Bram Stoker's Dracula (1992)

Qorxu, romantika

Frensis Ford Koppolanın rejissorluğu ilə çəkilən filmdə Mina Marrey və Elizabeta obrazlarını canlandırıb.

5. The Age of Innocence (1993)

Tarixi romantik dram

Martin Skorsezenin (Martin Scorsese) çəkdiyi bu filmdə Mey Uellend rolunu oynayıb. Bu ifa ona “Qızıl Qlobus” mükafatını qazandırıb.

2016-cı ildə Vinona Rayder Stranger Things adlı elmi-fantastik və qorxu serialında Coys Bayers (Joyce Byers) obrazını canlandırmağa başlayıb. Serialda Coys itkin düşmüş oğlunu tapmağa çalışan, ailəsini qorumaq üçün çətinliklərə sinə gərən anadır. Rayder obrazın qorxusunu, qətiyyətini və ana sevgisini inandırıcı şəkildə təqdim edib. Bu rol onun karyerasına yeni nəfəs gətirib və ona “Qızıl Qlobus” namizədliyi qazandırıb. Serial 2016–2025-ci illərdə yayımlanıb.

Vinona Rayder karyerası ərzində bir sıra nüfuzlu mükafatlara layiq görülüb və müxtəlif mükafatlara namizəd olub.

- “Qızıl Qlobus” (Golden Globe): 1994-cü ildə The Age of Innocence filminə görə ikinci planda ən yaxşı aktrisa mükafatını qazanıb.

- “Oskar” (Academy Awards): The Age of Innocence və Little Women filmlərindəki ifalarına görə iki dəfə namizəd olub.

- Screen Actors Guild Awards: Müxtəlif fərdi və kollektiv nominasiyalar əldə edib.

- BAFTA: Kino fəaliyyətinə görə namizədliklər qazanıb.

Bu nailiyyətlər onun həm 1990-cı illərdə, həm də sonrakı dövrdə kino sənayesində əhəmiyyətli yer tutduğunu göstərir.

“Ədəbiyyat və incəsənət”

(29.10.2026)

İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Hər bazar günü uşaqların maraqla dinlədikləri "Biləyən" radio verilişinin yaradıcısı, müəlliflərindən biri və redaktoru olub o. O dövrün uşaqları dərhal bildilər ki söhbət kimdən gedir.

Rafiq Savalan (Ağayev Rafiq) 1940-cı il dekabrın 1-də Bakı şəhərində fəhlə ailəsində anadan olub. İbtidai təhsilini Bakıda, orta təhsilini Neftçalada alıb. Eyni zamanda neft mədənlər idarəsinin elektrik quraşdırma sexində fəhlə işləyib. ADU-nun filologiya fakültəsində təhsilini davam etdirib.

Əmək fəaliyyətinə Azərbaycan Dövlət Televiziya və Radio Verilişləri Şirkətində Azərbaycan radiosu təbliğat və xəbərlər baş redaksiyasında müxbir kimi başlayıb. Kiçik redaktor, böyük redaktor, siyasi icmalçı, radionun uşaqlar üçün proqram baş redaksiyasının baş redaktoru vəzifələrində çalışıb. Teleşirkətdə "Səhər" proqramının baş redaktor müavini vəzifəsində işləyib.

Ədəbi fəaliyyətə 60-cı illərdən başlayıb. Onun hekayələri, felyetonları, publisist yazıları və tərcümələri dövri mətbuatda müntəzəm çap olunub, efirdə səslənib. Son illər televiziya və dövri mətbuatda islam tərbiyəsi mövzusunda çıxışlar edib, "İmam Əli" və "İmam Rza filmlərinin dublyajına rəhbərlik edib.

Əsərləri

1. Nigarın nağılları

2. Ağ qızılın nağılı

Tərcümələri

1. L. N. Tolstoy. Əsərləri. XII c.

2. L. N. Tolstoy. Əsərləri. XVI c.

3. V. V. Ovçinnikov. Palıd kökləri

4. M. M. Zoşşenko. Lenin haqqında hekayələr.

5. F. Məmmədova. Azərbaycanın siyasi tarixi və tarixi coğrafiyası

Filmoqrafiya

1. Dağlı çörəyi

2. Bakı milyonçuları. Ağa Musa Nağıyev

Ədib 29 oktyabr 2023-cü ildə vəfat edib.

Allah rəhmət eləsin!

“Ədəbiyyat və incəsənət”

(29.10.2026)

Gülxarə Əhmədova,

Naxçıvan Muxtar Respublikası Ali Məclisinin deputatı.

“Ədəbiyyat və incəsənət”

“Biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik”

       İlham Əliyev, Azərbaycan Respublikasının Prezidenti

Azərbaycanın beynəlxalq nüfuzu, milli-mənəvi dəyərlərə bağlılığı və müstəqil dövlətçilik ənənələri ölkəmizin inkişaf yolunu səciyyələndirən mühüm amillərdəndir. Prezident İlham Əliyevin VII Ümumdünya Mədəniyyətlərarası Dialoq Forumunda səsləndirdiyi fikirlər bu məsələlərin qarşılıqlı əlaqəsini, mədəniyyətlərarası münasibətlərin müasir dünyada əhəmiyyətini və Azərbaycanın beynəlxalq əməkdaşlıqda tutduğu yeri əks etdirir.

Müasir dünyanın siyasi mənzərəsi ziddiyyətlərlə zəngindir. Bir tərəfdə dövlətlər arasında əməkdaşlığın genişləndirilməsi, xalqların yaxınlaşması və ortaq problemlərin birgə həlli zərurəti dayanırsa, digər tərəfdə müharibələr, qarşıdurmalar, dini və etnik ayrı-seçkilik, beynəlxalq münasibətlərdə ikili standartlar özünü göstərir. Belə bir şəraitdə mədəniyyətlərarası dialoqun əhəmiyyəti daha aydın görünür. Çünki xalqlar arasında qarşılıqlı anlaşma, dövlətlər arasında etimad və davamlı sülh, hər şeydən əvvəl, bir-birinin tarixinə, milli kimliyinə və mənəvi dəyərlərinə hörmətlə bağlıdır.

Oktyabrın 27-də Bakıda keçirilən VII Ümumdünya Mədəniyyətlərarası Dialoq Forumunda Azərbaycan Respublikasının Prezidenti İlham Əliyevin çıxışı bu baxımdan mühüm məqamlarla yadda qaldı. “Ortaq gələcək naminə dialoq” mövzusuna həsr olunan Forumda dövlət başçısı Azərbaycanın tarixi ənənələrini, müstəqillik illərində qazandığı nailiyyətləri, ərazi bütövlüyünün və suverenliyinin bərpasını, ölkəmizin beynəlxalq münasibətlərdəki mövqeyini geniş təhlil etdi. Çıxışda səslənən fikirlər Azərbaycanın keçdiyi yolun ayrı-ayrı mərhələlərini bir-biri ilə əlaqələndirməklə yanaşı, qarşıdakı dövr üçün mühüm istiqamətləri də müəyyənləşdirirdi.

2011-ci ildə Azərbaycan təşəbbüsü ilə əsası qoyulan Forum ötən illər ərzində beynəlxalq fikir mübadiləsinin nüfuzlu məkanlarından birinə çevrilmişdir. Budəfəki tədbirdə 100-dən artıq ölkədən 500-dən çox qonağın iştirakı, qeydiyyatdan keçmiş iştirakçıların sayının 2000-i ötməsi bu platformaya göstərilən marağın miqyasını nümayiş etdirir. Lakin Forumun əhəmiyyəti iştirakçıların sayı ilə məhdudlaşmır. Burada əsas məsələ müxtəlif mədəniyyətlərin, dinlərin və dünyagörüşlərinin təmsilçilərini ortaq müzakirə ətrafında bir araya gətirmək, fikir ayrılıqlarının qarşıdurmaya deyil, anlaşmaya çevrilməsi üçün şərait yaratmaqdır.

Azərbaycanın bu sahədə təşəbbüskar mövqeyi təsadüfi deyil. Ölkəmiz tarixən Şərqlə Qərbin, Avropa ilə Asiyanın qovuşuğunda yerləşmiş, müxtəlif xalqların və mədəniyyətlərin qarşılıqlı əlaqələrində mühüm yer tutmuşdur. Bu coğrafi mövqe zaman keçdikcə tarixi-mədəni təcrübə ilə zənginləşmiş, qarşılıqlı hörmət və birgəyaşayış ənənələri ilə tamamlanmışdır. Prezident İlham Əliyevin vurğuladığı kimi, multikulturalizm, dini və etnik dözümlülük Azərbaycan xalqının əsrlər boyu yaşatdığı dəyərlərdir.

Bu dəyərlərin gücü onların gündəlik ictimai həyatda təzahür etməsindədir. Azərbaycanda müxtəlif etnik qrupların və dini icmaların nümayəndələri ümumi dövlətçilik mənafeyi ətrafında birləşir, ölkənin inkişafında iştirak edirlər. Konstitusiya ilə təsbit edilmiş bərabərlik prinsipi, milli-mənəvi irsə münasibət və cəmiyyətdəki qarşılıqlı hörmət ölkəmizin sabitliyini möhkəmləndirən amillərdəndir. Azərbaycançılıq ideyası da məhz bu ümumi mənafeyin, vahid vətən anlayışının və ortaq gələcəyə inamın ifadəsi kimi əhəmiyyət daşıyır.

Prezidentin çıxışında bu birliyin ən sınaqlı dövrlərdə özünü göstərməsinə xüsusi diqqət yetirildi. Ermənistanın hərbi təcavüzü və torpaqlarımızın işğalı illərində, eləcə də 2020-ci ilin Vətən müharibəsində ölkəmizdə yaşayan müxtəlif xalqların nümayəndələri Azərbaycanın ərazi bütövlüyünün bərpası uğrunda çiyin-çiyinə mübarizə apardılar. “Dəmir yumruq” rəmzinə çevrilən həmrəylik milli birliyin siyasi şüardan ibarət olmadığını, xalqın taleyüklü məsələlərdə ortaq mövqe nümayiş etdirmək bacarığını təsdiqlədi. Bu təcrübə göstərdi ki, dövlətin möhkəmliyi iqtisadi və hərbi imkanlarla yanaşı, cəmiyyətin mənəvi bütövlüyündən, vətəndaşların öz ölkəsinə bağlılığından da asılıdır.

Azərbaycanın müstəqillik tarixi də milli iradənin davamlılığını təsdiqləyən mühüm nümunədir. Prezident İlham Əliyev qeyd etdi ki, ölkəmiz müxtəlif siyasi sistemlərdə yaşasa da, öz dilini, ənənələrini, milli hisslərini və həyat tərzini qoruyub saxlaya bilmişdir. Müstəqilliyin bərpasından sonra isə xalqımız öz taleyinin sahibinə çevrilmiş, dövlət quruculuğu və inkişaf yolunu müstəqil müəyyənləşdirmək imkanı qazanmışdır. Bu il müstəqilliyimizin bərpasının 35-ci ildönümünün qeyd olunması həmin tarixi yolun əhəmiyyətini bir daha önə çəkir.

Müstəqilliyin möhkəmləndirilməsi Azərbaycan qarşısında ən mühüm vəzifələrdən birini - ərazi bütövlüyünün bərpasını gündəmə gətirmişdi. Uzun illər davam edən danışıqların nəticəsiz qalması, BMT Təhlükəsizlik Şurasının 1993-cü ildə qəbul etdiyi qətnamələrin yerinə yetirilməməsi münaqişənin həllini uzatdı. Dövlət başçısının çıxışında beynəlxalq hüququn tələbləri ilə onların icrası arasındakı bu uyğunsuzluq xüsusi vurğulandı. Azərbaycan özünümüdafiə hüququna və beynəlxalq hüququn normalarına əsaslanaraq ərazi bütövlüyünü bərpa etdi. 2020-ci il Vətən müharibəsində qazanılan Qələbə və 2023-cü ildə həyata keçirilən antiterror əməliyyatı ölkəmizin suverenliyinin tam bərpası ilə nəticələndi.

Bu hadisələrin əhəmiyyəti yalnız hərbi nəticələrlə ölçülmür. Söhbət onilliklər boyu həllini gözləyən münaqişənin arxada qalmasından, yüz minlərlə insanın doğma yurdlarına qayıtması üçün tarixi imkanın yaranmasından, beynəlxalq hüququn müdafiəsi naminə göstərilən siyasi iradədən gedir. Prezidentin çıxışında BMT Təhlükəsizlik Şurasının qətnamələrinin icrasını təmin edən mexanizmlərin vacibliyinin vurğulanması da təsadüfi deyildi. Beynəlxalq təşkilatların qərarları kağız üzərində qaldıqda hüququn nüfuzu zəifləyir, ədalətə inam sarsılır. Hüququn aliliyi bütün dövlətlərə eyni ölçü ilə yanaşıldığı təqdirdə real məna qazana bilər.

İkili standartlara münasibət çıxışın mühüm istiqamətlərindən biri idi. Azərbaycan uzun illər işğalın nəticələri, insanların doğma torpaqlarından didərgin salınması, tarixi və dini abidələrin dağıdılması ilə üzləşdi. Buna baxmayaraq, Ermənistanın işğal siyasətinə görə müvafiq beynəlxalq sanksiyaların tətbiq edilməməsi beynəlxalq münasibətlərdə ədalət prinsipinin nə dərəcədə qorunduğu barədə ciddi suallar doğurdu. Dövlət başçısının mövqeyi ondan ibarət idi ki, beynəlxalq siyasətdə seçici yanaşmaya son qoyulmalı, müstəqil dövlətlərin suveren hüquqlarına hörmət edilməlidir.

Azərbaycanın müharibədən sonra sülh təşəbbüsü ilə çıxış etməsi də diqqətəlayiq məqamdır. Prezident İlham Əliyev bildirdi ki, ölkəmiz qisas niyyəti güdmür və sonsuz qarşıdurmanın tərəfdarı deyil. Ermənistanla sülh sazişinin layihəsinin 2025-ci ilin avqustunda Vaşinqtonda paraflanması, ABŞ Prezidentinin iştirakı ilə üçtərəfli Bəyannamənin imzalanması Cənubi Qafqazda yeni siyasi mərhələnin formalaşması baxımından mühüm hadisə kimi qiymətləndirildi. Müharibəni başa çatdırmaq, yaranmış reallıqları sülh münasibətlərinə çevirmək və gələcək qarşıdurmaların qarşısını almaq dövlətçilik məsuliyyətinin mühüm göstəricisidir.

Azərbaycanın beynəlxalq mövqeyi bu gün siyasi dialoq, iqtisadi inkişaf, enerji təhlükəsizliyi və nəqliyyat əlaqələri kimi bir-birini tamamlayan istiqamətlər üzrə möhkəmlənir. Çinlə 2025-ci ildə hərtərəfli strateji tərəfdaşlıq Bəyannaməsinin, həmin ilin avqustunda ABŞ-la Strateji Xartiyanın imzalanması, Avropa İttifaqının üzv dövlətləri ilə qurulan tərəfdaşlıq münasibətləri ölkəmizin xarici siyasət əlaqələrinin genişliyini göstərir. Azərbaycanın 2027-ci ildə İslam Əməkdaşlıq Təşkilatının Zirvə Görüşünə ev sahibliyi etməsi və 2028-ci ildə Avropa Siyasi Birliyinin Zirvə Görüşünü qəbul edəcək olması da beynəlxalq əməkdaşlıq məkanında ölkəmizə göstərilən etimadın ifadəsidir.

Bu mövqenin arxasında müstəqil siyasət, iqtisadi imkanlar, müasir infrastruktur və qonşularla münasibətlərin qurulmasına verilən əhəmiyyət dayanır. Azərbaycanın enerji resurslarının beynəlxalq bazarlara etibarlı təchizatçısı olması, nəqliyyat bağlantılarında oynadığı rol və maliyyə dayanıqlılığı ölkənin regional proseslərdəki çəkisini artırır. Bununla yanaşı, multikulturalizm ənənələri və müxtəlif tərəfdaşlarla dialoqa açıq siyasət Azərbaycanın beynəlxalq münasibətlərdə özünəməxsus yerini müəyyənləşdirir.

Prezident İlham Əliyevin VII Ümumdünya Mədəniyyətlərarası Dialoq Forumundakı çıxışının əsas məzmunu bu məqamların vəhdətində açılır: milli kimliyi qorumaq, dövlət müstəqilliyini möhkəmləndirmək, beynəlxalq hüququ müdafiə etmək və əməkdaşlıq üçün yeni imkanlar yaratmaq bir-birindən ayrı məqsədlər deyil. Azərbaycanın təcrübəsi göstərir ki, öz tarixinə və dəyərlərinə bağlı dövlət dünya ilə açıq münasibətlər qura, müxtəlif xalqlar arasında anlaşmanın möhkəmlənməsinə xidmət edə bilər.

Bu gün qarşıda duran vəzifə əldə edilmiş nailiyyətləri qorumaq, sülh imkanlarını genişləndirmək, milli birliyi daha da möhkəmləndirmək və beynəlxalq əməkdaşlığın faydasını artırmaqdır. Bakı Forumunun ətrafında birləşən fikir də məhz budur: ortaq gələcək qarşılıqlı hörmət, bərabərhüquqlu münasibətlər və dialoq mədəniyyəti üzərində qurulmalıdır. Azərbaycan öz tarixi təcrübəsi, dövlətçilik iradəsi və beynəlxalq təşəbbüsləri ilə bu istiqamətdə mövqeyini ortaya qoyur.

“Ədəbiyyat və incəsənət”

(29.10.2026)

İmran Verdiyev,

Azərbaycan Respublikasının Əməkdar müəllimi.

“Ədəbiyyat və incəsənət” portalının Oğuz təmsilçisi

Dilək ağacı – insanların öz arzu və diləklərinin həyata keçəcəyinə inanaraq müəyyən ağaclara parça, sap, lent bağladıqları, ağacın yanında dua etdikləri və niyyət tutduqları ənənəvi inanc məkanıdır.

Bu cür dilək ənənələri İslamdan çox-çox əvvəlki dövrlərə – Şamanizm və qədim türk tayfalarının Ağac kultuna gedib çıxır. Qədim inanclara görə, uca və qocaman ağaclar yerlə göyü birləşdirən vasitəçidir – Həyat ağacıdır. O, həyatın, ömrün davamlılığının, təbiətin yenilənməsinin və görünməyən qüvvələrlə əlaqənin rəmzi sayılırdı. Və onların xüsusi qoruyucu ruhları (onqonları) varmış. Ona görə də insanlar bu ağacların başına dolanaraq və ya budaqlarına rəngli parçalar bağlayaraq arzularının çin olacağına hələ də inanırlar.

Ağaclara dilək bağlamaq mədəniyyəti Azərbaycana qədim Şamanizm köklərindən gəlmiş və sonradan yerli İslami inanclarla sintez olunaraq qorunub indiyə kimi saxlanmışdır.

Bu yazıda niyyətimiz heç də prosesin tarixindən uzun-uzadı bəhs etmək deyil. Əsas məqsədimiz Azərbaycanın digər bölgələrində olduğu kimi Oğuzda da həmin adətin müqəddəs sayılan ağacların, pir və ziyarətgahların ətrafında indiyə kimi yaşamasına diqqəti cəlb etməkdir.  

Oğuz sakinləri ilə aparılan sorğular da bu ənənənin davam etdiyini sübut edir. Həmin sorğuların nəticəsinə görə, rayonun əksər kəndlərində (Xaçmaz, Filfilli, Zərrab, Xalxal, Muxas, Kərimli, Sincan, Qarabaldır, Bucaq, Tərkeş, Padar, Qarabulaq, Bayan və s.) hələ də dilək ağacları var və əhali vaxtaşırı bu məkanları ziyarət edir.

Maraqlıdır ki, bu ağacların çoxu uzunömürlü çinar, palıd, dağdağan, çökə, cağan və digər ağaclardır. Həm də əksəriyyəti ziyarətgahların və ya müqəddəs şəxslərin qəbirlərinin yaxınlığında bitən ağaclardır.

Bəzi ağaclar pir, ziyarətgah və müqəddəs şəxslərlə bağlı rəvayətlərə görə, xüsusi ehtiram qazanır. Məsələn, rayonun Qumlaq kəndindən Xalxal kəndinə gedən yolun kənarındakı palıd ağacı burada dəfn olunan müqəddəslərə (Mikayıl və Cəbrayıl əfəndilərə), Qarabaldır kəndinin yuxarı hissəsindəki palıd ağacı burada dəfn olunmuş bir şeyxin, Sincanda türk əsgərinin məzarının başındakı çinar ağacı Tahir əfəndi adlı həmin igid əsgərin sayəsində daha da müqəddəs olmuşdur.

Bəs bu ağaclara parça, sap, lent bağlanması nə anlama gəlir? Bəri başdan deyək ki, bu adətin arxasında sadəcə bir parça bağlamaq hərəkəti deyil, minilliklər ərzində formalaşmış mürəkkəb inanclar, təbiətə münasibət və insanın ümid axtarışı dayanır. İnsan ağacın budağına bir parça bağlayarkən ürəyindəki arzusunu ifadə edir, onun gerçəkləşəcəyinə ümid bəsləyir. Bağlanmış parça, sap, lent bu halda insanın diləyini maddi şəkildə ifadə edən bir nişanəyə çevrilir.

Bu adət-ənənə dini ayin deyil. Bunu fetişizm hesab etmək də düz olmaz. Ağaca parça bağlayıb, nə isə diləməyi Allaha şərik qoşmaq adlandırmaq da doğru deyil.  

Bu, əsasən müəyyən bölgələrdə yaşadılan xalq adətidir, həm də müxtəlif xalqlarda müşahidə olunur. Onun mənası yerli inanclardan və ənənələrdən asılıdır. Əski bağlama adətini insanın təbiət qarşısında özünü, qorxularını və ümidlərini ifadə etməsinin qədim formalarından biri kimi qiymətləndirmək daha doğrudur.

Sorğuda iştirak edən Oğuz sakinləri  öz müşahidələrinə əsasən bildirirlər ki, insanlar ağaclara parçaları əsasən şəfa və sağlamlıq arzusu ilə bağlayırlar. Xəstələr və onların yaxınları müqəddəs sayılan ağaclara müraciət edir, şəfa diləyirlər. Beləliklə, xalq təsəvvüründə ağaca bağlanan parça ilk növbədə xəstəlikdən qurtulmaq ümidini təmsil edir.

Bəziləri isə bunu övlad arzusu ilə edirlər. Övladı olmayan qadınlar da pir-ağacları ziyarət edib, dua söyləyir və ağacların budaqlarına əski bağlayırlar. Bu ənənənin arxasında isə ağacın doğum, artım və nəslin davamı ilə əlaqələndirilməsi dayanır.

Niyyət və nəzir edənlər də diləklərinin həyata keçməsi üçün əhd edir, müqəddəs sayılan yerə parça bağlayır, arzusuna çatdıqdan sonra isə verdiyi sözü yerinə yetirməyi öhdəsinə götürür.

Beləliklə, budaqda yellənən kiçik və rəngli əskilər bəzən dilə gətirilməyən dərdin, bəzən bir ailənin övlad həsrətinin, bəzən də xəstə yaxınının sağalacağına dair ümidin nişanəsi olur.

Burada mühüm bir məqam da var: əski bağlamaqla arzunun gerçəkləşməsi arasında elmi cəhətdən sübut edilmiş səbəb-nəticə əlaqəsi yoxdur. Lakin bu, həmin adətin xalqın mənəvi tarixindəki və mədəni yaddaşındakı əhəmiyyətini azaltmır. Çünki bu işlər ən azından insana psixoloji və mənəvi rahatlıq gətirir.

Müasir psixologiyada bu tür rituallar xurafat kimi qiymətləndirilmir, bunlara həm də psixoloji rahatlama (katarsis) mexanizmi kimi baxılır. Ümid vizuallaşır. İnsan daxili narahatlığını, arzularını və ya çarəsizliyini bir fəaliyyətə yönəldəndə qismən də olsa, rahatlaşır. Parçanı bağlamaq "mən öz addımımı atdım" hissi yaradıb, təskinlik gətirir.

Stress azalır. Təbiət qoynunda gəzinti zamanı edilən bu ritual insanı gündəlik qayğılardan uzaqlaşdırır, daxili dinclik bəxş edir.

Meşədə və ya bir ziyarətgahda başqalarının bağladığı parçaları görmək onda yalnız olmadığını, başqa insanların da oxşar ümidlər, arzular və çətinliklərlə yaşadığını xatırladır. Bu, isə bir növ gizli kollektiv həmrəylik duyğusu yaradır.

Dilək ağacları insanoğlunun səmimi ümidlərinin, dualarının və təbiətlə bölünməz birliyinin meşələrdə və ziyarətgahlarda ucalan səssiz şahididir.

“Ədəbiyyat və incəsənət”

(29.10.2026)

Bakıda “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunun açılış mərasimi keçirilib. Açılış mərasimində Azərbaycan Respublikasının Prezidenti  İlham Əliyev çıxış edib.

Azərbaycan Prezidenti çıxışında qeyd edib ki, ötən 15 il ərzində Forum mədəniyyətlərarası dialoq və qlobal məsələlərin müzakirəsi üçün mühüm beynəlxalq platformaya çevrilib. Dövlət başçısı beynəlxalq tərəfdaşların, xüsusilə BMT-nin Sivilizasiyalar Alyansının dəstəyini yüksək qiymətləndirib.

“Ədəbiyyat və incəsənət” portalına Türk Mədəniyyəti və İrsi Fondundan verilən məlumata görə, Fondun prezidenti, professor Aktotı Raimkulova Beynəlxalq təşkilatların 3-cü yüksək səviyyəli görüşü və Bakı Prosesi çərçivəsində nazirlərin 6-cı görüşünün xüsusi birgə sessiyasında çıxış edib.

Professor Aktotı Raimkulova çıxışında türk dünyasının ortaq mədəni irsinin qorunub saxlanılmasının və təbliğinin əhəmiyyətini vurğulayaraq, bu istiqamətdə rəqəmsal texnologiyaların və süni intellektin roluna diqqət çəkib. Fondun prezidenti, həmçinin təşkilatın mədəni irsin rəqəmsallaşdırılması sahəsində həyata keçirdiyi təşəbbüs və layihələr, xüsusilə Türk Mədəniyyəti və İrsi Fondunun üzv dövlətlərinin mütəxəssisləri ilə birgə hazırlanan “TurkicHeritage” rəqəmsal platforması haqqında məlumat verib.

Professor Aktotı Raimkulova mədəniyyətlərarası dialoqun təşviqinə göstərdiyi davamlı dəstəyə görə Azərbaycan Respublikasının Prezidenti Zati-aliləri cənab İlham Əliyevə, Forumun yüksək səviyyədə təşkilinə və beynəlxalq mədəni əməkdaşlığın inkişafına verdiyi töhfəyə görə isə Azərbaycan Respublikasının Mədəniyyət Nazirliyinə təşəkkürünü bildirib.

Tədbirdə 100-dən çox ölkədən 500-dən artıq qonaq iştirak edir. İştirakçılar arasında Azərbaycanda akkreditə olunmuş diplomatik korpusun nümayəndələri, beynəlxalq təşkilatların rəhbərləri və təmsilçiləri, müxtəlif ölkələrin dövlət və hökumət nümayəndələri, parlament üzvləri, siyasətçilər, dini xadimlər, elmi və akademik dairələrin təmsilçiləri, mədəniyyət xadimləri, beynəlxalq qeyri-hökumət təşkilatlarının nümayəndələri, kütləvi informasiya vasitələrinin təmsilçiləri, ekspertlər, tədqiqatçılar, eləcə də gənclər və özəl sektorun nümayəndələri yer alırlar.

“Ədəbiyyat və incəsənət”

(28.10.2026)