Kənan Məmmədli, “Ədəbiyyat və incəsənət”

Bu günə təsadüf edən tarixi hadisələr barədə sizləri məlumatlandıracağıq. Bu günə Beynəlxalq Menecer günü, ingilisdilli ölkələrdə Qay Foks – yəni alov və atəşfəşanlıq günü, böyük satirikimiz Baba Pünhanın doğum günü və sair hadisələr təsadüf edir. İndi isə daha ətraflı.

5 noyabr. Beynəlxalq sunami barədə informasiyaların yayılması günü

Sunami böyük təlafat və dağıntılar gətirməklə bir çox ölkələrə ziyan vurur. Ən dəhşətli sunamilərin tarixinə nəzər yetirsək belə bir mənzərə görərik: 2011-ci il, Yaponiya, 2009-cu il, Samoa və Tonqa, 2004-cü il, Hind Okeanı sahilləri dövlətləri, 2001-ci il, Peru, 1999-cu il, Türkiyənin Aralıq dənizi sahilləri, 1998-ci il, Papua-Yeni Qvineya, 1976-cı il, Filippin və 1960-cı il, Çili.

BMT-nin təşəbbüsü ilə qeyd edilən bu gündə sahil hövzəsi əhalisinə sunami təhlükəsi barədə tam məlumat verilir, təhlükəsizlik qaydaları başa salınır.

5 noyabr. Beynəlxaql Layihə menecerliyi, yaxud Menecer günü

Baxırsan, indi toya gedən müğənnilərin disk daşıyanları deyirlər ki, mən prodüsserəm. Toyuq fabrikinin marketlərə toyuq paylayanları da mən menecerəm deyirlər. Amma menecment kifayət qədər ciddi sahə, menecersə ciddi peşədir. 2004-cü ildən təqvimə salınan bu gündə layihə müxtəlifliyi, komanda idarəçiliyi sayəsində uğur qazanan menecment təsisatları qeyd edilir, uğur qazanan menecerlər fərqləndirilirlər. Ensiklopedik nəşrlərdə menecerlərə belə tərif verilir: ”inzibati-təsərrüfat müstəqilliyinə malik olan istehsalın, satışın, servisin təşkili və idarə edilməsi üzrə professional şəxslər menecerlər adlanır”. Menecerlərin əsas işi maliyyə, informasiya, insan resurslarından effektiv və səmərəli şəkildə istifadə edərək şirkəti məqsədlərinə çatdırmaqdır. Bir sözlə, idarə müdirinin muzdla tutduğu iş idarəçisidir menecer. Yoxsa ki, mağazalara toyuq paylayan hara, menecer hara.

5 noyabr. Üçlərin hərbi kəşfiyyat günü

Ruslar hərbi kəşfiyyat gününü qeyd edəcəklər. Yəqin ki, bu qeydetmə Dağlıq Qarabağda məskunlaşmış rus hərbçilərindən də yan ötməyəcək. Belaruslar da qonşularından dala qalmayaraq hərbi kəşfiyyat gününü qeyd edəcəklər. Belarusda isə hərbi kəşfiyyat işinin prioritet tərəfi hakimiyyətə gəlmək istəyən müxalifəti zərərsizləşdirməkdir yəqin ki. Amma bədxah qonşularımızda da bu gün hərbi kəşfiyyat günüdür. Axı onlar ruslar və beloruslarla hərbi ittifaqdadırlar. Hərblərinin və kəşfiyyatlarının nə gündə olmasını isə biz bir il öncə - 44 günlük müharibə zamanı görmüşük, bizə nağıl danışmağın yeri yoxdur.

İrlandiyada çox qəribə bir gündür – Milli sarışın saçlıları bəyənənlər günü. Cənubi Afrikada malyariya əleyhinə mübarizə günüdür. Qay Foks gegəsini dünən britanlar keçirirdi, bu günsə Yeni Zelandiyada və Kanadada qeyd edəcəklər. Hinduslar od festivalından qopub indi də Kanakadas Cayanti festivalını qeyd edəcəklər, bol məhsul arzulayacaqlar. ABŞ-da isə Milli Çin yeməyini evə sifariş vermək günüdür. Günün dəqiqliyinə baxın siz. Milli Çin yeməyi günü olsaydı sadə görsənərdi, amma belədə cizgilər tam bəlli olur. Üstəlik, hegemon dövlət bu gün Milli ponçik gününü də qeyd edir. Ponçik nədir? Yağda qızardılmış kökə deyim də.

5 noyabr. Baba Pünhan günü

1948-ci ilin bu günündə Kürdəxanıda Baba Pünhan dünyaya gəlib. Düzü düz, əyrini əyri yazan satirik şair.

Əsrlər itirdik illər içində,
Qanqallar bitirdik güllər içində,
Çaqqallar dolaşır ellər içində,
Aslanlar, pələnglər daş qəfəsdədir,
Bakının dərdi var, Bakı xəstədir.

Bu gün Vilayət Quliyevin, Mələkxanım Əyyubovanın, Oleq Bloxinin, Co Dassenin, Brayan Adamsın və digər çox sayda ünlülərin doğum günüdür həm də.

“Ədəbiyyat və incəsənət”

(05.11.2025)

Xalq yazıçısı, akademik Kamal Abdullanın əsəsrlərindən seçilmiş bir sıra qranula – cövhər sayıla biləcək məqamları “Ədəbiyyat və incəsənət” oxucularına təqdim edir.

Kamal Abdulla özü seçilmiş bu cövhərlər barədə yazır: “İllərdən bəri yazdığım müxtəlif şeirlərin, esselərin, pyeslərin, hekayə və romanların, publisistik məqalələrin və elmi əsərlərin, verdiyim intervülərin hər birinin içində yer almış və bu gün də öz məzmunu, tutumu, forması ilə diqqətimi çəkən misralar, cümlələr günlərin bir günü sanki dil açıb mənə dedilər ki, bizim bir-birimizdən zaman və məkanca ayrılığımıza son qoy və bizi bir-birimizin yanında yerləşdir. Sən görəcəksən ki, bu zaman biz tamamilə yeni bir cazibədə zühur etmişik. Onlar qeyri-səlis məntiq dili ilə desək, içində olduqları mətnin qranulaları (ilkin vacib hissəcikləri) idi. Qranula, başqa cür ifadə etsək, cümlədən (mətndən) bütün artıq hissələri siləndən sonra yerdə qalan cövhərdir.”

Beləliklə, hər gün Kamal Abdulladan 7 qranula:

1.

Eramızın əvvəllərində ilk xristianları təqib və məhv edən romalılar yatıb yuxularında belə görməzdilər ki, onların törəmələri bir müddət sonra xristianlıq uğrunda öldürəcək və öləcəklər.

2.

“ Sular səni aparırdı dərinə

Əlin nəyə çatırdısa əl atdın.

Bircə saman çöpü keçdi əlinə,

O da səni su üzünə çıxartdı.”

3.

Göydəkinə inam, əslində, dolayı bir məqsəd güdür – səni sənin özünə oxşayan yerdəkilərə inanmağa çağırır. Atanın oğula və oğulun ataya, qardaşın qardaşa və bacının bacıya, min illər boyu tanıdığın adama və küçədə ilk dəfə gördüyün kiməsə inam – bu deyilmi gözəllik?!

4.

Bizə bir dəfə bu dünyada yaşamaq imkanı verilib. Əminəm ki, o biri paralel dünyalarda yaşayanlar da belə düşünür.

5.

Qoqol yazırdı: Çox az quş tapılar ki, Dneprin ortasına qədər uça bilsin. Səməd Vurğun ona belə cavab verib: Göylərə baş vurur Göyəzən dağı.

6.

X.L.Borxes: “Mən ədəbiyyata kitabdan gəlmişəm və bununla fəxr edirəm.” Kitabdan gəlmək artıq hər şey deməkdir.

7.

Çox adam tanıyıram ki, həyatı boyu bir, ya iki kitab oxuyub. Heç bir universitet bitirməyib. Amma müdrikdir, uzaqgörəndir, səbirli və hər hansı hadisələr kələfinin içindən doğru-düzgün xətti seçə bilir. O sənə yüz universitet məzu nundan və yüzlərlə kitab oxuyandan daha xeyirli məsləhətlər verə bilər. Deməli, çoxlu kitab oxumaqla deyil. Həyat özü insanı daha doğru şəkildə formalaşdıra bilirmiş. Təki, sən onun təbii axarına düşə biləsən.

“Ədəbiyyat və incəsənət”

(05.11.2025)

BU, MİR CƏLAL ADINA ƏNƏNƏVİ HEKAYƏ MÜSABİQƏSİNİN SAYCA 5-CİSİDİR

Könül, “Ədəbiyyat və incəsənət”

Budur, “Ədibin Evi” Ədəbiyyata Dəstək Fondu ənənəvi müsabiqəsinə başlayıb. Mir Cəlal adına V hekayə müsabiqəsi qələm sahiblərindən yeni işlər gözləyir. 2026-cı il fevralın 1-dək davam edəcək müsabiqə həm peşəkar, həm də həvəskar yazarlara açıqdır. Hekayə müsabiqəsinin şərtləri bu dəfə də dəyişməz qalır.

Təqdim edilən işlər:

-Azərbaycan dilində yazılmalı,

-həcmi 1500 sözdən çox olmamalı,

-yeni olmalı, əvvəllər çap və ya elektron şəkildə yayılmamalı,

-müəlliflərin adı, soyadı, əlaqə məlumatı ilə birgə növbəti il fevralın 1-dək elektron şəkildə  Bu email ünvanı spambotlardan qorunur. Onu görmək üçün JavaScripti qoşmaq lazımdır.  ünvanına göndərilməlidir.

-hekayə mövzusu sərbəstdir.

Müsabiqəyə 2026-cı il aprelin sonunda yekun vurulacaq.

Mükafat fondu:

I yer üçün 3000 manat,

II yer üçün 2000 manat,

III yer üçün 1000 manat nəzərdə tutulub.

Ən obyektiv seçimə əsaslanan, ölkənin ədəbi xəritəsinə daim yeni-yeni ünvanlar həkk edən müsabiqə ilk dəfə 2017-ci ildə elan edilibdir, müsabiqəyə bu günə qədər iki mindən çox hekayə təqdim olunubdur.

Azərbaycan ədəbi irsinin tədqiq və təbliği ilə məşğul olan “Ədibin Evi” Ədəbiyyata Dəstək Fondu Azərbaycan ədəbiyyatının inkişafına və gənc qələm sahiblərinin təşviqinə töhfə vermək məqsədilə Azərbaycan nəsrinin görkəmli nümayəndəsi, hakayə janrının ustadı Mir Cəlal adına müsabiqə keçirərkən, həm də Mir Cəlal ədəbi irsinin yaşadılması, klassik və müasir ədəbiyyat arasında körpü qurulması, eləcə də hekayə janrının populyarlaşdırılması məqsədini də güdür.

-Müsabiqə gənc və peşəkar yazıçıları, həmçinin ədəbiyyata marağı olan hər kəsi qısa hekayə yazmağa ruhlandırır. Layihə çərçivəsində orijinal, bədii dəyəri və ədəbi dili ilə seçilən əsərlərin üzə çıxarılması, onların ictimaiyyətə təqdim edilməsi planlaşdırılır.

-Qiymətləndirmə münsiflər heyəti tərəfindən həyata keçirilir və əsas meyarlar bədii dil, ideya orijinallığı, kompozisiya bütövlüyü və obrazların canlılığıdır.

-Müsabiqənin qalibləri hər il Mir Cəlalın doğum günü ərəfəsində elan edilir. Qaliblər diplom, pul mükafatı və “Ədibin Evi”nin dəstəyi ilə əsərlərinin toplusu şəklində nəşr olunmaq imkanı qazanırlar. Bundan əlavə, seçilmiş hekayələr “Ədibin Evi”nin rəsmi saytında və ədəbi jurnallarda dərc edilir.

-Mir Cəlal adına hekayə müsabiqəsi artıq illərdir ki, ölkəmizdə gənc yazıçıların ədəbi sferaya çıxış nöqtəsinə çevrilib. Bu layihə sayəsində bir çox gənc müəlliflər ilk dəfə oxucu auditoriyasına tanıdılıb, ədəbiyyat aləminə addım atıblar.

Beləliklə, 5-ci müsabiqəyə start verildi. Biz həm müsabiqənin təşkilat komitəsinə, həm də öz gücünü sınayacaq yazarlara uğurlar arzulayırıq.

“Ədəbiyyat və incəsənət”

(05.11.2025)

“Ədəbiyyat və incəsənət” portalının “Ulduz” jurnalı ilə birgə Biri ikisində layihəsində bu gün Şeir vaxtıdır, sizlərə çağdaş türk dünyasının gənc şairlərinin  şeirləri təqdim edilir.

Sayat KAM­­ŞI­­QER

(Qazaxıstan)

1 may 1978-ci il­­də Qa­­za­­xıs­­ta­­nın Se­­mey şə­­hə­­ri­­nin Ke­­zen­­su kən­­din­­də do­­ğu­­lub. Qa­­za­­xıs­­tan Ya­­zı­­çı­­lar Bir­­li­­yi­­nin üz­­vü, Dün­­ya Gənc Türk Ya­­zar­­lar Bir­­li­­yi­­nin Məs­­lə­­hət Şu­­ra­­sı­­nın üz­­vü­­dür.

SƏNƏ...

Minlərcə sual var, buraxmaz məni,
Quşları gözləyən bir bağ kimisən.
Çalış ki, itirmə, itirsən əgər,
Tapmazsan, min il də məni sən gəzsən.

Damarlar təzyiqdən gərilir sanki,
Qışqırmaq üzrədir gücüm-qüvvətim.
Ruhum istədiyi yeganə şey var –
Şirin sözün və qoynundur həsrətim.

Minlərcə sual var, buraxmaz məni,
Gələcək günlər də müəmma dolu.
Qırma ürəyimi, qırma heç zaman,
Qırılsam, tapmaram toplanmaq yolu.

Susadım bu eşqin yağmuruna mən,
Duyğularım saralmadı, solmadı.
Səndən tək istəyim yanımda olmaq,
Gülüşündən, gözlərindən doymadım.

 Uyğunlaşdırdı: İntiqam Yaşar

“Ədəbiyyat və incəsənət”

(05.11.2025)

Rəsmiyyə Sabir, professor, “Ədəbiyyat və incəsənət” üçün

Son illərdə ədəbiyyatımızda yeni imzalar görünməkdədir. Onların içərisində istedadlıları da az deyil. Doğrudur, ədəbiyyatda zaman amili mühüm rol oynayır. Bəzən istedadlı biri müəyyən müddətdən sonra yaradıcılıqdan vaz keçir, öz potensialını başqa sahədə reallaşdırır. Lakin yaradıcılığı həyat tərzi edənlərin də sayı az olmur.

Teymur Padar Aydınoğluda son illərin yeni imzalarındandır.

Əvvəlcə Teymuru, çalışdığım Azərbaycan Respublikası Elm və Təhsil Nazirliyi İqtisadiyyat İnstitutunun doktoranturasına qəbul olunmaq istəyən biri kimi tanımışam. Elə ilk görüşdə, qısa söhbətdən sonra bu tərbiyəli gəncin iqtisadi biliyi məni qane etdi. Onun doktoranturaya qəbul olunacağına əmindim. Teymur bütün imtahanları uğurla verərək doktoranturaya qəbul olundu. Doktoranturada təhsil aldığı müddətdə İnstitutun Elmi katibi olduğum üçün müxtəlif məsələlərlə bağlı tez-tez yanıma gəlirdi. Belə görüşlərin birində: “Rəsmiyyə xanım, istəyərdim ki, mənim şeirlərimlə tanış olub fikrinizi bildirəsiniz” – deyə, xahiş etdi.

Hər zaman istedadlı gənclərə kömək edən (istər iqtisadiyyat, istərsə də ədəbiyyat sahəsində) biri olaraq böyük məmnuniyyətlə razılıq verdim. Beləliklə, Teymur yeni yazdığı şeirləri ara-sıra mənə gətirirdi. Mən də oxuyub münasibətimi bildirirdim, qeydlərimi söyləyirdim. Həmin vaxtdan bir neçə il keçib. Teymurun son şeirləri ilə tanışlığım onun yaradıcılığındakı irəliləyişdən xəbər verir. 

Vaxtilə ilk kitabıma yazdığı ön sözdə Xalq şairi Sabir Rüstəmxanlı mənim haqqımda qeyd edirdi: “İstedad sahibini adi qafiyə pərdazdan fərqləndirməyə bircə şeir də bəs edir; əlyazma müəllifinin şair olub olmadığını bəzən bir misrayla da ayırmaq mümkündür”.

Bu misraları Teymur Padar Aydınoğlunun yaradıcılığı haqqında da demək olar. Onun şeirlərində maraqlı tapıntılara rast gəlmək mümkündür:

Bir qırıq nəfəsin qopsun küləkdən,

     Qaç, gətir bağçadan beldən, kürəkdən,

Təmizlə ruhumu, solmuş çiçəkdən,

  Saralmış yarpaqdan, ay payız adam.

***

         Bir nöqtədən yaranmışdır viranlıq,

             Bax dünyaya, sən də düşün bir anlıq,

             Qaranlıqdan gəldim, sonum qaranlıq,

     İki zülmət arasında nur mənəm.

Teymur Padar Aydınoğlunun yaradıcılığında dünya, həyat, sevgi, tale, qismət, ayrılıq və s. mövzulara rast gəlmək olur. Onun şeirlərində bütün gənc yazarlar kimi dünyadan, həyatdan, yaşantılardan giley var:

Qara qar ələndi ömür yazıma,

                                      Tanrı da baxmadı etirazıma,

Qələm qara saldı alın yazıma,

         Axdı mürəkkəbi sətrimdən mənim.

Və ya

                    Şeh çəkib, pas tutub, ağlım kütləşib,

                       Dünyadan heç bir şey kəsmir ey daha,

           Başqa aləmlərə qoşulub qaçıb,

       Dünyayla barışıb, küsmür ey daha.

Bu misralarda şairin həyatla, taleylə barışdığını görürük, lakin “şair olan qəm də yeyir”. Başqa şeirlərində Teymur Padar Aydınoğlu yenə də həyatdan, dünyadan gileylidir. Ancaq bu giley-güzar özünəməxsus formadadır və poetikdir:

   Xətrimə çox dəydi bu dünya, lələ,

Çağırdım, gəlmədi mənlə duelə,

 Qoyma haa, məzarda incidə belə,

Məni yaxşı-yaxşı torpağa tapşır.

Teymur Padar Aydınoğlunun poeziyası insan ruhunun dərinliklərindən süzülüb gəlir. “Qız ovucumda” şeirində o, ata məhəbbətini elə incəliklə ifadə edir ki, oradakı hər misra valideynin uşağına baxışındakı şəfqəti xatırladır.

                                          Zaman zəmisini biçənə qədər,

Yaxşını pislərdən seçənə qədər,

Ruhumla səmaya köçənə qədər,

                               Bir qız böyüdəcəm öz ovucumda.

“Bir qız böyüdəcəm öz ovucumda” misrası sadəcə bir ata vədi deyil, sevginin ən mühafizəkar, ən ülvi formasının ifadəsidir. Bu şeir, həm də onun yaradıcılığının təməlində dayanan insan şəfqətini, saflığı və mərhəməti təcəssüm etdirir.

Bu kitabda toplanan şeirlər sevginin, məhəbbətin və ilahi bağlılığın müxtəlif çalarlarını əks etdirir. Şairin qəlbi bəzən Tanrıya, bəzən qadına, bəzən də öz taleyinə yönəlir - amma hər misrasında eyni təməl duyğu hökm sürür: sevgi.

Teymur Padar Aydınoğlunun poeziyasında sevgi təkcə insana yönəlmir. Onun “Din kimi bir şey” adlı şeiri məhəbbətin metafizik qatına  toxunur. Burada eşq artıq sadəcə hiss deyil - bir inanc, bir məzhəb, bir təriqət kimi təqdim olunur.

Saat əqrəbindən gözüm yıxılır,

   Eşqim sözlərimdən daşıb dağılır,

Tanrı dərgahından qəlbə yığılır,

                               Yaranır köksümdə din kimi bir şey.

“Yaranır köksümdə din kimi bir şey” misrası şairin öz iç dünyasında ilahi eşqin təcəlla tapdığını göstərir. Bu məhəbbət bəzən onu yandırır, bəzən saflaşdırır, amma heç vaxt tərk etmir.

“Gərəksən” şeirində isə sevgi bəşəri ölçülərə yüksəlir. Burada şair sevgilisinə səcdə edir, onu “Tanrıdan, dindən belə gərəkli” sayır.

   Cənnətə getməkdir niyyətim mənim,

Sənədir namazım, rükətim mənim,

Dizlərin üstüdür cənnətim mənim,

                             Sən tanrıdan, dindən belə gərəksən.

Bu misralar yalnız bir qadına deyil, həyatın özünə, varlığın mənasına yönəlmiş bir təslimiyyətin ifadəsidir.

Teymur Padar Aydınoğlunun şeirlərində insanın mənəvi bütövlüyü, ilahi sevgi ilə dünyəvi eşqin birləşməsi hiss olunur. “Kosmik məhəbbət” şeirində o, artıq bu dünyanın sərhədlərini aşır. O, kainatla, ulduzlarla, zamanla dialoqa girir. Eşqi bir kosmik hadisə kimi təqdim edir: “Bir hidrogen atomudur eşqimiz” deyərək, sevginin elmi, enerjili, əbədi təbiətini poetik dillə ifadə edir.

           Bir hidrogen atomudur eşqimiz,

             Zərrəciyəm mən nüvəyə dolanan,

              Bu məhəbbət nurlu günəş yaradıb,

                                    Səyyarəyəm sitarəyə dolanan.

Teymur Padar Aydınoğlu sevginin bütün rənglərini, ağrısını, işığını, təbəssümünü misralarına hopdurub. Onun qələmində sevgi bir anın emosiyası deyil - həyat fəlsəfəsidir. Bu kitab, oxucunu təkcə şeirlərlə tanış etmir, həm də onu sevginin min bir halı ilə üz-üzə qoyur: ata sevgisi, qadın sevgisi, Tanrı sevgisi, insan sevgisi…

Şairin misralarında bir səmimiyyət var - saxta pafosdan uzaq, sanki içdən gələn, dərin bir nəfəs kimi. Onun poeziyasının dili sadədir, amma məna yükü ağırdır. “Səndən danışır” deyərkən, o, həm sevgilisindən, həm kainatdan, həm də insanın öz varlığından danışır.

   Bu nəhəng kainat gözlərdədi tək,

Həyatın mənası sözlərdədi tək,

Sözlərin qüdrəti cüzlərdədi tək,

   “Ta, ha”lar, “ha, mim”lər səndən danışır.

Hər oxucu bu kitabda öz “səndən danışır”ını tapacaq - çünki sevgi hər kəs üçün başqa cür, amma eyni dərəcədə müqəddəsdir. Bu şeirlər toplusu, əslində, bir insan ömrünün, bir qəlbin gündəliyidir. Hər şeir bir hissin, bir təcrübənin, bir ömür parçasının səsi kimi səslənir.

Teymur Padar Aydınoğlu sevgini həm yaşayır, həm öyrədir, həm də ona əfsanəvi bir dəyər verir. Onun üçün sevgi həyatın başlanğıcı, davamı və sonudur. Oxucu bu kitabı vərəqlədikcə, Teymur Padar Aydınoğlunun misralarında öz ürəyinin ritmini tapacaq. Çünki sevgi - insanın ən böyük səbəbidir.

           Yaşamağı bilər, sevmək öyrənən,

        Zəlalətə düşər eşqdən iyrənən,

          Varlıq nəticədir eşqdən törənən,

Səbəbi olmayan, səbəbdir sevgi.

Bu kitab oxucuya sadəcə şeir deyil, həm də bir həyat nəfəsi təqdim edir.  Sevginin hər halında bir dua, bir təsəlli, bir Tanrı işığı var. 

Teymur Padar Aydınoğlunun ilk kitabına yazdığım ön sözü onun özünün misralarıyla yekunlaşdırmaq istəyirəm:

               Teymuram fərəhim, dilşadım oldu,

               Zülmətdə mayakım, irşadım oldu,

                 Böyütdüm, bəslədim övladım oldu,

                                     Mən onun atası, balamdı şeir.

Sonuncu misra yaradıcılığını çox sevdiyim Məlahət Yusifqızının aşağıdakı misralarını mənə xatırlatdı:

Axı mənim nəyimdi söz,

     Basdım bağrımdan o yana...

Bilmirəm, Teymur Padar Aydınoğlu ömrünü ədəbiyyata həsr edəcək, yoxsa iqtisadiyyata?... Bəlkə də hər ikisinə. Bunu zaman göstərəcək. Mən isə Ona poeziyanın çətin və şərəfli yollarında uğurlar diləyirəm. Yaradıcılığı ilə Azərbaycan ədəbiyyatına töhfələr verməsini, öz yolunun olmasını arzulayıram! İstəyirəm ki, Teymur Padar Aydınoğlu “balası” bildiyi sözü “böyüdə” bilsin!...

“Ədəbiyyat və incəsənət”

(05.11.2025)

Əkbər Qoşalı, “Ədəbiyyat və incəsənət” portalının redaktoru

Qardaş Özbəkistanın Səmərqənd şəhərində keçirilən UNESCO-nun 43-cü Baş Konfransında 15 dekabr – Dünya Türk Dili Ailəsi Günü haqqında qərar qəbul edildi. Bu qərar qardaş Türkiyənin digər qardaş dövlətlərlə birlikdə hazırladığı və 26 ölkənin birgə təqdim etdiyi ortaq təşəbbüsün nəticəsidir. Əlbəttə, türk dillərinin tanıdılması üçün çalışmaları yüksəldən belə bir addım, tarixi səciyyə və səviyyə daşıyır və olan türk dilinin qorunması, gələcək nəsillərə ötürülməsi yönündə işbirliyini daha da gücləndirəcəkdir.

Biz ortaq keçmişdən ortaq gələcəyə məhz ortaq yaddaşla, deməli, ilk sırada dil yaddaşı ilə gedə bilərik. Bizim bu yeni Günümüz – UNESCO-nun qərarı – əslində, öz dilinə biganə olmayan bütün xalqların bölüşə biləcəyi bir gözəllikdir.

Bəli, bundan sonra hər təqvim ilinin son ayının 15-i Dünya Türk Dili Ailəsi Günü olaraq vurğulanacaq, bizim – Türk dünyasının dil bayramı olacaq. Bu məqamda, Müzəffər Ali Baş Komandan, Prezident İlham Əliyevin ailə vurğusu edən çox vacib və mövzumuza tam uyğun düşüncələrini yada salmaq istərdim:

“Biz beynəlxalq təşkilatlarla bağlı bundan sonra da öz addımlarımızı atacağıq, ilk növbədə, Türk Dövlətləri Təşkilatı çərçivəsində səylərimizi davam etdirəcəyik. Bu, bizim üçün prioritetdir. Bu, bizim üçün əsas beynəlxalq təşkilatdır, çünki bu, bizim ailəmizdir. Bizim başqa ailəmiz yoxdur. Bizim ailəmiz Türk dünyasıdır”. – Dövlət başçımız 2024-cü il fevralın 14-də Milli Məclisdəki Andiçmə mərasimində belə deyirdi.  Hər iki ailə vurğusu özünəxas dərin məzmun və üfüqgenişliyi daşıyır.  Əgər qəbul etsək ki, bu dünyada təsadüf yoxdur, o zaman dünən başqa bir tarixi çıxışı da Prezident İlham Əliyevin 2024-cü ilin ikinci ayındakı çıxışı ilə eyni səviyyədə, səciyyədə tuta bilərik. Azərbaycanın dövlət başçısının Milli Elmlər Akademiyasının 80 illik yubiley ilə bağlı tədbirdəki çıxışında bütün digər vacib istiqamətlərlə yanaşı, dilimizin saflığı, qorunması məsələlərinə də tarixi vurğular vardı:

“Azərbaycan dili çox zəngin dildir. Bu gün 50 milyondan çox insan üçün Azərbaycan dili ana dilidir. Ancaq təmiz, saf, ədəbi Azərbaycan dilinin qoruyucuları bizik – müstəqil Azərbaycan dövləti. Mən azərbaycanlıların yaşadıqları müxtəlif bölgələrdə vəziyyətlə müntəzəm surətdə olaraq tanış oluram, diqqətdə saxlayıram, lazımi tədbirlər görürəm. Görürəm ki, bəzi yerlərdə bizim ədəbi dilimiz digər ölkələrdə yaşayan azərbaycanlılar arasında itirilir. Daha çox məişət dili kimi istifadə olunur, xarici kəlmələrlə dolu olur. Ona görə biz öz dilimizi qorumasaq, dilimizi təmiz, saf saxlamasaq, onda yavaş-yavaş dilimizi itirə bilərik. Hər bir millət, hər bir xalq üçün onun Ana dili onun milli mənsubiyyətinin əsas amilidir və bu istiqamətdə bütün ictimai fəallar, bütün ictimaiyyət bir nöqtəyə vurmalıdır. Bizim dilimiz qədimdir. Yenə də deyirəm, 50 milyondan çox insan üçün Ana dilidir, çox zəngindir və xarici kəlmələrə ehtiyac da yoxdur. Düzdür, beynəlxalq leksikon var və hər birimiz bu leksikondan istifadə edirik. Amma əgər Azərbaycan dilində əzəli bir kəlmə varsa, başqa dildən kəlməni gətirib əvəzləmək nə məqsəd daşıyır? Bu, ya səhvdir, ya təxribatdır. Hər ikisi də qəbuledilməzdir”.

​Prezidentin Akademiyadakı nitqini dinləyən, oxuyan hər kəs, oradan obyektiv nəticələr, vəzifələr çıxara bilər. Nitqin Zəfərimizlə, tariximizlə, mədəniyyət coğrafiyamızla, həqiqətlərimizlə, qarşıda duran hərtərəfli quruculuq vəzifələri ilə, o cümlədən elmi yeniliklərlə bağlı bölümləri də dövlət dilimizlə bağlı tapşırıqları özündə daşıyır. Biz öz dilimizdə, türkcəmizdə qalib gəlmişik. – Zabitimiz əsgərimizə “İrəli”dən öncə “Ardımca!” deyir, bir sözlə, sözünü öz türkcəmizdə buyururdu. Cəbhədə vurulmuş, götürülmüş, indi Hərbi Qənimətlər Parkında sərgilənən düşmən texnikası başqa dildəydi... İşğalçının tunelləri, səngərləri, minaları, silah-sursatı, ərzaqı, palı-paltarı başqa dildəydi, başqa dildəydi... Zəfərimiz tamamən türkcəydi, öz ailəmizcəydi; qələbəmizi özümüz qazandıq; öz şəhidlərimiz, öz qazilərimiz, öz ordumuz Ali Baş Komandanımızın buyruğu əsasında olmazları olar etdi! Zəfərimizin işığı da bütün Türk dünyasına düşdü – bilənlər bilir; az sonra (21 yanvar, 2021) Türkmənistanla anlaşmamız oldu. Bizim “Kəpəz”, türkmən qardaşlarımızın “Sərdar” dediyi neft-qaz yatağı “Dostluq” adı ilə birgə çıxarıma verildi. Bir qədər keçdi Azərbaycan – Türkiyə arasında tayı-bərabəri olmayan “Şuşa Bəyannaməsi” imzalandı (15 iyun 2021) və o, digər qardaşlarımıza da ilham qaynağı oldu. Zəfərin birinci ildönümündə isə Türkdilli Ölkələrin Əməkdaşlıq Şurası Türk Dövlətləri Təşkilatına çevrildi və həmin tarixi qərarın verildiyi toplantıda Azərbaycan Prezidentinə məhz Zəfər vurğusu ilə “Türk Dünyasının Yüksək Ordeni” verildi (12 noyabr 2021)!

Təməli 2009-cu il oktyabrın 3-də imzalanmış Naxçıvan Sazişi ilə qoyulan Türk Dövlətləri Təşkilatının Dövlət Başçıları Şurasının 12-ci Zirvə Görüşü ötən ayın 7-də Qəbələdə keçirildi. Azərbaycan ailəmizin güclənməsi üçün dünən çalışıb, bu gün çalışır, gələcəkdə də çalışacağı Gün kimi, elə həm də Dünya Türk Dili Ailəsi Günü kimi aydındır!

1926-cı ildə Bakıda keçirilmiş Birinci Türkoloji Qurultayın 100 illik yubileyinin keçirilməsi haqqında Azərbaycan Respublikası Prezidentinin Sərəncamı da bugünlərə– ötən ayın 22-nə təvafüq edir.

Yeri gəlmişkən, hər halda o da heç təsadüfi deyil ki, AMEA-nın ulu Nəsiminin adını daşıyan Dilçilik İnstitutunun son illərdəki ən möhtəşəm işi “Türk dilləri sözlüyü”nü (“Divanü Lüğat-it-Türk”ü‎) – Türk dünyasının ilk ensiklopedik əsərini nəşr etməsidir. Söhbət, Türk dünyasının böyük bilgini, XI yüzildə yaşayıb-yaratmış Qaşqarlı Mahmudun 1072-1074-cü illər arasında Bağdadda yazdığı türkcə-ərəbcə sözlüyün akademik nəşrindən gedir. Belə ki, ötən yüzilin 30-cu illərində keçmiş SSRİ Elmlər Akademiyasının Azərbaycan filialında işləmiş özbəkəsilli Azərbaycan alimi Xalid Səid Xocayev Qaşqarlı Mahmudun bu ünlü əsərini türkologiya tarixində ilk dəfə ərəb dilindən Azərbaycan dilinə çevirib. Xocayev bundan sonra “əksinqilabi pantürkist təşkilatın üzvü kimi, həm də Türkiyənin xeyrinə kəşfiyyat işi aparmış şəxs” damğası ilə ittiham olunaraq, 1937-ci ildə güllələnib. Alimin evində axtarış aparılan zaman “Divan” üzə çıxmayıb, itmiş sayılıb. Türk dünyasının ən qiymətli kitablarından biri olan bu ensiklopedik əsəri 86 il sonra – 2023-cü ildə AMEA-nın Nəsimi adına Dilçilik İnstitutunun direktoru Prof.Dr. Nadir Məmmədli institutun arxivindən tapıb.

Sonra “Divanülüğat-it-türk” 3 cilddə akademik nəşrə hazırlanıb və nəfis şəkildə gün üzü görüb. Bu böyük hadisə nəinki 2024-cü ildə “Divanü lüğat-it-türk”ün yazılmasının 950 illiyinə, ümumən türkologiyaya, dilçiliyə dəyərli töhfədir.

Türkcənin bizə bəlli ən qədim sözlüyü, bu gün də, dəyərlidir, önəmlidir, yəqin gələcəkdə də belə olacaq.

Bəli, “Divanü lüğat-it-türk”ün Akademiyanın 80 illiyinə də dəyərli töhfə olduğunu deyə bilərik. Sanki zaman özü onu bu ərəfədə üzə çıxardıb... –  Azərbaycanın tarixi Zəfərindən sonra, ərazi bütövlüyümüz və suverenliyimiz bərpa olunduqdan sonra və AMEA-nın Zəfərsonrası ilk yubileyi ərəfəsində...– Mən bu kimi işlərə təsadüf yox, təvafüq kimi, kainatın ruhunun üzə vurması (təcəllası) kimi baxıram...

“Mən bütövlükdə bildirmək istəyirəm ki, elm iqtisadiyyatla, sənaye ilə sıx bağlı olmalıdır. Burada bu kürsüdən dövlət strukturlarına da göstəriş vermək istəyirəm ki, Azərbaycan alimləri ilə daha sıx işləsinlər”. – Bu sözlər də, dövlət başçımızın Akademiyadakı nitqindəndir. Bu sözlər, elə bilirəm, həm də, dilimizin elmlə, iqtisadiyyatla, sənaye ilə sıx bağlı olmasını göstərişini, tapşırığını da daşımaqdadır.

Yuxarıda da vurğuladığımız kimi, həmin proqram xarakterli, tarixi nitqdə bir neçə istiqamət önplana çıxarıla bilər:

-Tarix,

-Mədəniyyət coğrafiyamız,

-Süni intellekt,

-Rəqəmsallaşma,

-kibertəhlükəsizlik,

-hərbi sənaye,

-İqtisadiyyat,

-Zəngəzur dəhlizi,

-İşğaldan azad edilmiş ərazilərdə tikinti-quruculuq, abadlıq işləri və s. – Bax, bütün bu və bənzəri sahələrin hər birində dövlət dilimiz tətbiq imkanları, dərinliyi, üfüqötəsi ilə iştirak etməli, yaradıcılığımız doğma dilimizdə olmalı, öz dilimizdə qanadlanmalıdır. Dilimiz yaddaşımızdır, ruhumuzdur. Zəngəzuru, Göyçəni başqa dildə necə belə dərindən duya, duydura bilərik? Ulusumuzun kədəri də, sevinci, həyəcanı da, gələcəyi də öz dilimizdəki dərinliyi, üfüqü ilə doğmadır, əzizdir...

“Azərbaycan xalqının tarixi, dövlətçilik tariximiz, xalqımızın qurub-yaratma qabiliyyəti çoxəsrlidir. Azərbaycan xalqı böyük coğrafiyada yaşayıb və yaşayır. Təkcə onu demək kifayətdir ki, bizim hüdudlarımızın o tayında hər istiqamət üzrə Azərbaycan əhalisi yaşayır”. – Bax, bu, əvəzsiz sözlər hər tərəfdən öz tarixi torpaqları, öz mədəniyyət coğrafiyası ilə həmhüdud olan respublikamızın vətəndaşlarının dilinin, ruhunun, ruhi gücünün, tarixinin, mədəniyyətinin, ləyaqətinin dərəcəsini, keyfiyyətini, üfüqünü göstərir. Bizim dilimizin həmhüdud ərazilərdə məişət səviyyəsinə düşməməsi üçün elmlə mədəniyyətin, dövlətlə vətəndaş cəmiyyəti institutlarının, yaradıcı qüvvələrin birgə çalışmaları gərəkdir, gərəkdir, gərəkdir.

“Bir neçə gündən sonra biz tarixi Zəfərimizin beş illiyini qeyd edəcəyik. Hərbi parad təşkil ediləcək. Beş il əvvəl, 2020-ci ilin dekabrında Zəfər paradı keçirilmişdir. 2023-cü ildə Xankəndidə hərbi parad keçirilmişdir ki, Azərbaycanın suverenliyi tam bərpa edilmişdir. Bir neçə gündən sonra Azadlıq meydanında hərbi paradın keçirilməsi böyük hadisədir, qürurverici hadisədir. Azərbaycan xalqı bu Şanlı Zəfərlə bundan sonra əbədi fəxr edəcək.

Mən sizi, bütün Azərbaycan xalqını həm Milli Elmlər Akademiyasının 80 illiyi münasibətilə, həm də qarşıdan gələn Zəfər Günü və Bayraq Günü münasibətilə təbrik edirəm. Sizə cansağlığı, uğurlar arzulayıram”! – Dilimizin, dövlətimizin qayğısını çəkən Müzəffər Ali Baş Komandan belə dedi, belə bayramlaşdı.

DİLİMİZ DƏ, DÖVLƏTİMİZ DƏ ZAVAL GÖRMƏSİN!

“Ədəbiyyat və incəsənət”

(05.11.2025)

"Ədəbiyyat və İncəsənət” portalının media dəstəyi ilə Azərbaycan Ədəbiyyat Fondunun Bakı Şəhəri Üzrə Təhsil İdarəsi ilə birgə keçirdiyi “Bir direktor və bir şagird” adlı layihəsinin məqsədi nümunəvi məktəblərimizi, istedadlı şagirdlərimizi üzə çıxarmaq, onların ədəbiyyata olan marağına diqqət yönəltməkdir.

Hazırda təqdimatda Bakı şəhəri 84 nömrəli tam orta məktəbdir.

Layihəni təqdim edir: Ülviyyə Əbülfəzqızı

DİREKTOR:

İslamova Röya Sərvər qızı 03.02.1986-cı ildə anadan olmuşdur. Orta məktəbi bitirdikdən sonra 2004-2008-ci illərdə Azərbaycan Dövlət Pedaqoji Universitetində Azərbaycan dili və ədəbiyyat ixtisası üzrə bakalavr, 2008-2011-ci illərdə isə Azərbaycan Dövlət Pedaqoji Universitetində Azərbaycan ədəbiyyatı ixtisası üzrə magistr təhsili almışdır. Müəllimlərin işə qəbul müsabiqəsində iştirak edərək 15.09.2012-ci il tarixdə 262 nömrəli tam orta məktəbə Azərbaycan dili və ədəbiyyat müəllimi təyin olunmuşdur.

2015-2021-ci illərdə Cəbrayıl rayon C.Əhmədov adına şəhər tam orta məktəbdə təlim-tərbiyə işləri üzrə direktor müavini işləmişdir. Bakı Şəhəri üzrə Təhsil İdarəsi tərəfindən keçirilən "Direktor müavinlərinin işə qəbulu " müsabiqəsində uğur qazanaraq 15.09.2021-ci il tarixindən Bakı şəhəri 146 nömrəli tam orta məktəbə təlim-tərbiyə işləri üzrə direktor müavini təyin olunmuşdur. Pedaqoji fəaliyyəti dövründə yüzə yaxın seminar, təlim, konfranslarda iştirak etmişdir. 2014-cü ildə Azərbaycan Respublikası Təhsil Problemləri İnstitutunun təşkil etdiyi Azərbaycan dili və ədəbiyyat fənn kurikulumlarının tətbiqi ilə əlaqədar "Öyrədənlərin öyrədəni" kursunun,2022-ci ildə Azərbaycan Respublikasının Təhsil Nazirliyi və Azərbaycan Dövlət Pedaqoji Universitetin Strateji İnkişaf Mərkəzinin birgə layihəsi olan "Məktəb liderliyi" proqramının iştirakçısı olmuşdur. 2025-ci ildə Azərbaycan Respublikası Elm və Təhsil Nazirliyi və “ORT İsrail” məktəblər şəbəkəsinin birgə əməkdaşlığı ilə Təhsil İnstitutu tərəfindən həyata keçirilən “İnnovativ məktəb” layihəsində uğur qazanaraq  İsraildə keçirilən “Təhsildə liderlik” mövzusunda təlimlərdə iştirak etmişdir. 2022-ci ildə Azərbaycan Respublikası Elm və Təhsil Nazirliyinin "Direktorların işə qəbulu" müsabiqəsində uğur qazanaraq 01.12.2022-ci il tarixindən Bakı şəhəri 84 nömrəli tam orta məktəbə direktor vəzifəsinə təyin edilmişdir. Hal-hazırda Azərbaycan Dövlət İqtisad Universitetinin “Dövlət və bələdiyyə idarəetməsi” fakültəsində təhsil alır.

ŞAGİRD:

Mən, Kazımlı Fidan, 2013-cü ildə 21 fevral tarixində Bakı şəhəri, Suraxanı rayonu Əmircan qəsəbəsində anadan olmuşam. Hal-hazırda Aslan Muradov adına 84 nömrəli tam orta məktəbdə 7c pilot sinfində təhsil alıram. Məsuliyyətli, çalışqan və məqsədyönlü bir şagirdəm. Dərslərimə ciddi yanaşıram. Müəllimlərimin tapşırıqlarını vaxtında və dəqiqliklə yerinə yetirməyə çalışıram. Sinif yoldaşlarımın arasında ünsiyyətcil, yardımsevər və dürüst olmağa xüsusi önəm verirəm.

Kitablarla olan dostluğum çox erkən yaşlarımdan başlayıb. Bu sevgi zamanla yalnız oxumaqla kifayətlənməyib, zamanla yazmağa olan marağımı da artırıb. Artıq bir kitabım dərc olub. “Macəralı sinfim”. Hazırda isə 2-ci kitabım olan “Tənbəl gündəliyi” dərc olunmaq üzrədir. Bununla yanaşı, gələcək üçün daha böyük və əhatəli bir layihə üzərində çalışıram.

Ən böyük arzularımdan biri Azərbaycan dili və ədəbiyyatı müəllimi olmaqdır. Müəllim şagirdin dünyasını işıqlandıran memardır. Mən də gələcəkdə bu missiyanı layiqincə yerinə yetirmək üçün əlimdən gələni edəcəyəm.

Ədəbiyyat mənim üçün sadəcə bir fənn deyil. Hisslərimin, arzularımın dilidir. Həyatda məni ifadə edən ən gözəl yol elə məhz yazmaqdır.

ESSE

“Yazarlıq mənim üçün nə deməkdir”

Bəzən bir fikir beynimdə parlayar elə bil ki, içimdə bir qığılcım yanır. O an qələm götürüb yazmağa başlayıram. Yazarlıq mənim üçün sadəcə sözləri ard-arda düzmək deyil, hiss etdiklərimi, düşündüklərimi və xəyəl etdiklərimi başqaları ilə paylaşmaq deməkdir.

Mən yazmağa çox kiçik yaşlarımdan başlamışam. Hər dəfə yazanda elə bilirdim ki, özüm üçün yeni bir dünya yaradıram. Kağız və qələm mənim ən yaxın dostlarımdır. Bəzən sözlər axır, bəzən isə çox çətinliklə tapılır. Amma hər dəfə yazını bitirəndə içimdə bir sevinc olur sanki uzun bir səfərdən qayıtmışam.

Yazarlıq təkcə istedaddan deyil, həm də əmək, plan və səbrlə bağlıdır. Mən adətən yazacağım kitabı əvvəlcə dəftarıma yazır, kiçik bir plan qururam. Daha sonra yazını kompüterdə köçürürəm. Hər bir yazı üzərində dəfələrlə işləyir, dəyişikliklər edirəm. Əsasən sakit bir mühitdə yazmağı sevirəm, çünki o zaman beynimdə milyonlarla yazılacaq cümlə yaranır.

Əsərlərimin çoxunda yaşadığım hadisələrdən ilham alıram. Həyatda qarşılaşdığım hisslər, maraqlı insanlar və hadisələr mənim üçün yeni hekayələrin başlanğıcı olur. Bu da mənim çoxlu ssenari yazmağıma imkan yaradır. Amma gələcəkdə daha çox planlaşdırdığım layihələr tamamilə xəyali qəhrəmanlardan ibarət olacaq.

İlk kitabım “Macəralı Sinifim” mənim üçün bir başlanğıc oldu. Bu kitab mənə öyrətdi ki, yazarlıq məsuliyyət, səbr və ən əsas özünə inan tələb edir.

Yazarlıq mənim həyatımın bir hissəsidir. Hər yeni hekayə, hər yeni cümlə mənim üçün yeni bir mənaya çevrilir. Gələcəkdə də yazmaq, yeni kitablar yaratmaq və oxucularımın qəlbində iz qoymaq istəyirəm.

Mən inanıram ki, sözlərin gücü ilə hər ürəyə bir işıq salmaq mümkündür.

“Ədəbiyyat və incəsənət”

(05.11.2025)

İlqar İsmayılzadə,

fəlsəfə üzrə fəlsəfə doktoru, "Həməşəra" mətbu orqanının təsisçisi və baş redaktoru, Azərbaycan Jurnalistlər Birliyi və Azərbaycan Yazıçılar Birliyinin üzvü, yazıçı-publisist, "Ədəbiyyat və incəsənət" portalının Cənub təmsilçisi

AYB Lənkəran Bölməsi və Lənkəran Mərkəzləşdirilmiş Kitabxana sisteminin birgə təşkilatçılığı ilə kitabxananın akt zalında Azərbaycan Yazıçılar Birliyinin üzvü, tanınmış qələm sahibi Salman Məmmədoğlunun 75 illik yubileyi və yeni nəşr olunmuş "Ötən ömrün bir günü" adlı kitabının təqdimatı keçirildi.

Tədbiri giriş sözü ilə AYB Lənkəran Bölməsinin sədri, yazıçı-dramaturq Qafar Cəfərli açdı. Şəhidlərin xatirəsi bir dəqiqəlik sükutla yad edildi. Azərbaycan Respublikasının Dövlət Himni səsləndirildi. Sonra Qafar Cəfərli Salman Məmmədoğlunun həyat və yaradıcılığı haqqında məlumat verib, qısa zaman kəsiyində onun nəşr olunan kitabları barədə danışdı. Vaxtının və sözünün qədrini bilən, ədəbi cameədə fəallığı ilə seçilən şair, yazıçı, publisist olduğunu bildirib, yubileyi münasibətilə təbrik edərək AYB Lənkəran Bölməsinin Fəxri Fərmanını ona təqdim etdi.

Sonra sabiq mədəniyyət işçisi Cəfər Fətullayevin Salman Məmmədoğlu haqqında çəkdiyi filmdən fraqmentlər nümayiş olundu. Filmdə yubilyarın doğulub boya-başa çatdığı doğma Boladi kəndinin və rayonun tanınmış ziyalılarının şair haqqında fikirləri dinlənilib, şeirləri səsləndirildi.

Sonra yazıçı Səyavuş Süleymanlı Salman Məmmədoğlunun yaradıcılığı haqqında ətraflı çıxış edib, onun təkcə şair yox, həm də gözəl nasir olduğunu bildirdi. "Seyid və Fatimə" romanı barədə məlumat verib qələm dostunu təbrik etdi. Daha sonra söz digər iştikçılara verildi. Kitabxananın əməkdaşı Günay Əsədova, Boladi kənd 1 saylı tam orta məktəbin direktoru Seyran Məmmədov, şair, jurnalist Xudaverdi Cavadov, Boladi kənd kitabxanasının müdiri Könül İsmayılova, AYB Lənkəran Bölməsinin ədəbi məsləhətçisi Ağamir Cavad, Lənkəran Dövlət Diyarşünaslıq Muzeyinin direktoru Leyla Məcidova, İcra Hakimiyyətinin Boladi kəndi üzrə İcra nümayəndəsi Nizami Hüseynov, Azərbaycan Jurnalistlər Birliyinin Lənkəran Bölməsinin sədri Şəfahət Şəfi, Əməkdar məşqçi, şair Əlizadə Əsədov, Boladi kənd Folklor Klubunun müdiri Əfiqə Qafarova, yubilyarın kürəkəni və qızı Ənsar və Çimnaz Rəcəbovlar çıxış edərək Salman müəllimin həyat və yaradıcılığının müxtəlif məqamlarına toxundular, onun gözəl şair, məhsuldar yazıçı və publisist olduğundan, müəllimlik fəaliyyətindən, gözəl ailə başçısı, valideyn, yaxşı dost, yoldaş olduğundan söz açdılar. Onu təbrik edib, cansağlığı, uzun ömür və yaradıcılıq uğurları arzuladılar. Yazıçı-publisist Şəfahət Şəfi AJB-nin Fəxri Fərmanını ona təqdim etdi. Çıxışlar arası Cəfər Fətullayev və onun şagirdlərin ifasında yubilyarın şeirləri səsləndi.

Sonda söz Salman Məmmədoğluna verildi. Salman Məmmədoğlu tədbirin təşkilatçılarına, iştirak edənlərə və çıxış edib onun haqqında xoş söz söyləyənlərə dərin təşəkkürünü bildirib, yeni qələmə aldığı şeirlərindən oxudu. Tədbiri Q.Cəfərli yekunlaşdırdı. Tədbir xatirə şəkilləri çəkilməklə başa çatdı...

“Ədəbiyyat və incəsənət”

(05.11.2025)