Super User
Toronto şəhərində Turkuaz Türk Multikultural Festivalı keçirilib
Kanadanın Toronto şəhərində fəaliyyət göstərən Turkuaz Türk İncəsənət və Mədəniyyəti Fondunun təşkilatçılığı ilə Turkuaz Türk Multikultural Festivalı keçirilib. Festivalın əsas məqsədi Kanadada türk mədəniyyətinin tanıdılması, qorunması və gələcək nəsillərə ötürülməsidir.
“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, festival Təbriz Musiqi və Rəqs Ansamblı, Hamilton Azərbaycan İcmasının istedadlı uşaqlarının rəngarəng çıxışları ilə başlayıb. Həmçinin Kanada Azərbaycan Evinin nəzdində fəaliyyət göstərən “Mənim Azərbaycanım” həftəsonu məktəbinin rəqs qrupu da səhnəyə çıxaraq izləyicilərə unudulmaz anlar yaşadıb.
Turkuaz Fondunun rəhbərləri Nəsrin Attari və Şervin Şadpur fondun Kanadada türk mədəni irsinin təşviqi istiqamətindəki fəaliyyətindən danışıblar. Mədəniyyətlərarası dialoqun gücləndirilməsinin və müxtəlif icmalar arasında qarşılıqlı anlaşmanın önəmini vurğulayıblar.
Festivalda səslənən Azərbaycan şeirləri, “Ay işığında” adlı üç hissəli musiqili konsert proqramı, uyğur rəqsi, eləcə də rəqqasə Lina Şimminin çıxışı maraqla qarşılanıb.
Tədbirdə Ontario əyalətinin Vaughan şəhərinin meri Steven Del Duka (Steven Del Duca), Kanada parlamentinin üzvü Françesko Sorbara (Francesco Sorbara), Ontario əyalət parlamentinin deputatı (MPP) Laura Smit (Laura Smith), şəhər şurasının üzvləri Kris Eynsvörzs (Chris Ainsworth) və Toni Ruprext (Tony Ruprecht) kimi ictimai-siyasi xadimlər də iştirak edib. Qonaqlar çıxışlarında türk birliyinin Kanada cəmiyyətinə verdiyi mühüm töhfələrdən bəhs ediblər.
“Ədəbiyyat və incəsənət”
(16.10.2025)
Gənclər Kitabxanasında Fazil Mustafanın 60 illik yubileyi münasibətilə elektron məlumat bazası hazırlanıb
Cəfər Cabbarlı adına Respublika Gənclər Kitabxanasında Azərbaycan Respublikası Milli Məclisinin İctimai birliklər və dini qurumlar komitəsinin sədri, hüquqşünas, fəlsəfə üzrə fəlsəfə doktoru Fazil Mustafanın 60 illik yubileyi münasibətilə elektron məlumat bazası hazırlanıb.
“Ədəbiyyat və incəsənət” portalına Kitabxanadan verilən məlumata görə, əməkdaşlar tərəfindən hazırlanan elektron məlumat bazasında fəlsəfə üzrə fəlsəfə doktoru Adəm İsmayıl Bakuvinin “Fazil Mustafanın fəlsəfi metamorfizmi”, nasir, şair, publisist Əkbər Qoşalının “İdeoloji oxudan mədəni sorğuya doğru: tarix, təfəkkür və türkün intellektual keçidi” məqalələrinin tam mətni, Fazil Mustafanın müəllifi olduğu kitablar, dövrü mətbuat nümunələri təqdim edilir. Elektron məlumat bazasında millət vəkilinin müəlifi olduğu “Dirilən adamın düşüncələri” kitabının təqdimatı zamanı söylədiyi fikirlər, onun haqqında qələmə alınan məqalələrin siyahıları da yer alır. “Millət vəkili Fazil Mustafa 60” adlı elektron məlumat bazasında “Xronologiya”, “Təltif və mükafatlar”, “Foto və videoqalereya” bölmələri ilə yanaşı müəllifin kitablarından ibarət virtual kitab sərgisi də təqdim olunur.
Elektron məlumat bazası kitabxananın rəsmi saytında yerləşdirilib.
“Ədəbiyyat və incəsənət”
(16.10.2025)
Sağlam qidalanma, Şef və Evsiz pişiklər günüdür bu gün
Kənan Məmmədli, “Ədəbiyyat və incəsənət”
Bu günə hansı əlamətdar hadisələr təsadüf edir? Gəlin birlikdə təqvimimizi vərəqləyək.
16 oktyabr. Ümumdünya Anestezioloq Günü
Ağrıya qarşı hamı həssasdır. Ən mürəkkəb tibbi müdaxilələrdə “narkoz” deyə tanıdığımız anestezioloji preparat ağrının şiddətini azaldaraq, yaxud tam kəsərək bizim bu müdaxilələrə tab gətirməyimizə yardımçı olur. Bu prosesi icra edən mütəxəssislər anestezioloqlardır ki bu gün də onların günüdür. Tarixin ilk belə mütəxəssisi qədim yunan təbibi və filosofu Dioskorid hesab olunur, o, eramızdan əvvəl 1-ci əsrdə Roma ordusunda təbiblik edərkən imperator Nerona məruzə edib ki, mandraqordan hazırlanmış yuxugətirici və ağrıkəsici məlhəmləri yaralı əsgərlərə içirdəndən sonra onların üzərində cərrahi əməliyyat aparmaq daha rahat və asan olur. 1846-cı ilin 16 oktyabrında isə amerikalı stomatoloq və cərrah Uilyam Morton ümumi narkoz düzəltmək üçün anesteziyadan ilk dəfə istifadəni publikaya göstərib.
Anestezioloqları təbrik etməyəkmi? Edək. Yetər ki onu da deyək ki, mədəniyyət xadimləri də cəmiyyətin anestezioloqlarıdır, onlar ədəbiyyat, musiqi, kino kimi janrlarla mənəvi insan ağrılarını keyləşdirməyə borcludurlar. Keyləşdirə bilirlərmi, bax bu ayrıca söhbətin mövzusudur.
16 oktyabr. Ümumdünya Sağlam Qidalanmaq günü
Həmən bu gün fəst-fud yeməkdən, qazlı şirin içkilər içməkdən, tütün və alkoqoldan uzaq durun. Bircə günsə bunu edin. Süfrələrdən uzaq düşmüş təbii ərzaq düzün süfrəyə. Nehrə yağı, camış qaymağı, şanı balı, kənd yumurtası, xaş-xaşlı şor yeyin səhər-səhər, günortaya unudulmuş dədə-baba yeməklərindən hazırladın, məsələn, birinciyə əvəlikli isti. İkinciyə səbzi-qovurma. Üstündən təzə sıxılmış nar, yaxud üzüm çirəsi için. Bəh-bəh. Şam yeməyinə də bir cam camış qatığı ilə təzə inək südünü qarışdırıb təzə təndir çörəyi ilə birlikdə doğramac edib gözünüzə təpin. Bundan sağlam qidanı ağlınıza belə gətirməyin. (Bunları əldə etməyin göydən ulduz qoparmaq qədər çətin olduğunu üzümə vurmayın, siz öz canınız).
16 oktyabr. “Sonuncu mogikan”
Ümumdünya ərzaq günüdür həm də bu gün. Soyuducusu ərzağa tamarzı insanlara yetər ki, bir-iki ərzaq alıb verəsiniz.
Şef günüdür. Müdirləri təbrik etmək təvəqqe olunur. Bunu etməsəniz də olar. Əksər müdirlər onsuz da tabeçiliklərində olan işçilərinin hüquqlarını pozub özləri üçün cənnəti bu dünyada təmin edirlər.
Allerqoloq günü. Pis bəladır, Allah qorusun sizi, allerqoloqlara işiniz düşməsin. Mən burdaca sizə bu mərəzin ən ağlagəlməz növü barədə danışmaq istəyirəm. Çiyələkdən, sitrusdan, göbələkdən allergiyası olanlar var, tozdan, günəşdən allergiyası olanlar var. Deməzsənmiş, pul əskinaslarından da allergiya mümkündür. Adam var ki, əli pula toxunanda bədəni səpib alışıb-yanır. Yazıçı Varis bu mövzuda bir hekayə də yazıb, “Sonuncu mogikan” adlanır. İnternetdə adını yazsanız çıxacaq, oxuya bilərsiniz.
Ümumdünya onurğa günüdür. Onurğanızı qoruyun mütləq.
Evsiz pişiklər günüdür. Rastınıza çıxan küçə pişiklərinə bir şey verin yesinlər.
Bədnam qonşularımızda mətbuat günüdür. Qaraya ağ, ağa qara yazmaq üzrə ixtisaslaşmış erməni mətbuatı bu gün ən böyük yalançıları mükafatlandıracaq. ABŞ bəs neynəyəcək? Milli likyör gününü qeyd edəcək. Vur ki vurasan.
“Ədəbiyyat və incəsənət”
(16.10.2025)
“Maraqlı söhbətlər”də tarix yazan afrikalı idmançı
Nemət Tahir, “Ədəbiyyat və incəsənət” portalının Qarabağ təmsilçisi
Bugünkü maraqlı söhbətimiz idman barəsində olacaqdır. Tarix yazan afrikalı qaçışçı barədə.
1960-cı ildə Romada keçirilən Yay Olimpiadasında sponsoru “Adidas” firması olub. Bütün idmançılar bu brendin ayaqqabılarında çıxış etməli idilər.
Amma Efiopiyadan olan marafon yarışının iştirakçısı Abebe Bikiliyə heç bir idman ayaqqabıları uyğun gəlmir. Belə olan tərzdə idmançı cəsarətli bir qərar verir: marafonu ayaqyalın qaçmaq.
Nəticə dünyanı heyran qoyur: Bikila nəinki yarışı 1-ci yeri tutdu, həm də dünya rekordu qazanır və olimpiadada qızıl medal qazanan ilk qaradərili afrikalı olur.
Onun qələbəsi “Adidas” üçün ağrılı bir zərbə sayılır: axı, ayaqyalın qaçan idmançı, bu firmanın idman ayaqqabıları geyinən 68 idmançını üstələmişdi.
4 il sonra 1964-cü il Tokio Olimpiadasında Bikila yenidən qızıl medal alır və tarixdə 2 dəfə olimpiya marafonunu qazanan ilk idmançı olur.
1969-cu ildə avtomobil qəzasından sonra ağır xəsarətlər almış Bikili artıq qaçış yarışlarında iştirak edə bilmir. Amma o, idmandan əl çəkmir və oxatma yarışlarında iştirak etməyə davam edir.
Təəssüf ki, 1973-cü ildə Abebe Bikila 41 yaşında beyinə qan sızmasından dünyasını dəyişir. Onu milli qəhrəman və idman əfsanəsi kimi son mənzilə 75 000 nəfər insan müşayiət edir.
Bəzən tarix yazmaq üçün sadəcə dayanmamaq lazımdır.
“Ədəbiyyat və incəsənət”
(15.10.2025)
Xalq artisti Ramiz Quliyev İkinci Fəxri xiyabanda dəfn olunacaq
Görkəmli tarzən, pedaqoq, Dövlət mükafatı laureatı, Xalq artisti, professor Ramiz Quliyevlə vida mərasimi sabah - oktyabrın 16-da Beynəlxalq Muğam Mərkəzində keçiriləcək.
“Ədəbiyyat və incəsənət” portalı xəbər verir ki, bu barədəMədəniyyət Nazirliyi məlumat yayıb.
Məlumatda bildirilir ki, görkəmli sənətkar İkinci Fəxri xiyabanda dəfn olunacaq.
“Ədəbiyyat və incəsənət”
(15.10.2025)
ANONS: Nobel almış macar Laslo Krasnohorkai kimdir?
Xəbər verdiyimiz kimi, Nobel mükafatları komissiyası 2025-ci il üçün Ədəbiyyat üzrə Nobel mükafatını macar yazıçı Laslo Krasnohorkaiyə təqdim etdi.
Adətən, macar ədəbiyyatı elə də ad-san qoparmayan bir ədəbiyyat olduğundan, sual doğur? Niyə məhz o?
Bu barədə əməkdaşımızın hazırladığı yazı ilə sabah tanış ola biləcəksiniz.
“Ədəbiyyat və incəsənət”
(15.10.2025)
Gənclər Kitabxanası Üzeyir Hacıbəylinin 140 illiyinə
2025-ci ildə Azərbaycan bəstəkarı, Şərqdə ilk operanın yaradıcısı, böyük musiqişünas-alim, istedadlı publisist, dramaturq və pedaqoq, tanınmış ictimai xadim, Xalq artisti, Dövlət mükafatları laureatı, Azərbaycan Elmlər Akademiyasının həqiqi üzvü Üzeyir Hacıbəylinin anadan olmasının 140 ili tamam olur. Prezident İlham Əliyevin dahi bəstəkarın 140 illik yubileyinin keçirilməsinə dair imzaladığı Sərəncamdan irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında mütəmadi olaraq materiallar hazırlanır.
“Ədəbiyyat və incəsənət” portalına kitabxanadan verilən məlumata görə, istifadəçilərə təqdim edilən növbəti materiallar kitabxananın rəsmi saytında yer alan videomaterial və təqvimdir. “Üzeyir Hacıbəyli 140” adlı təqvimdə “İlk mədəniyyət nümunələrinin yaradıcısı” başlığı altında bəstəkarın həyat və fəaliyyəti haqqında məlumat, bir sıra görkəmli şəxslərin onun haqqında söylədikləri dəyərli fikirlər, rəsmi sənədlərin tam mətni yer alır. Təqvimdə dahi bəstəkarın layiq görüldüyü orden, mükafat və fəxri adlarla yanaşı, müəllifi olduğu operaları, musiqili komediyaları, instrumental müşaiyətli xor əsərləri haqqında da məlumat verilir. Kitabxana əməkdaşları tərəfindən hazırlanan materialda “Musiqi dühası”, “Milli Musiqi Günü və Beynəlxalq Musiqi Festivalı”, “Tələbələr”, “Xatirəsinin əbədiləşdirilməsi” kimi bölmələr də sərgilənir.
“Üzeyir Hacıbəyli 140” adlı təqvim kitabxananın rəsmi saytında yerləşdirilib:
https://ryl.az/our-activity/uzeyir-hacibeyli-140-teqvimi
Kitabxanada dahi bəstəkarın 140 illik yubileyi münasibətilə "Musiqi dühası Üzeyir Hacıbəyli" adlı videomaterial da hazırlanıb. Materialda Ulu Öndər Heydər Əliyevin Üzeyir bəy haqqında söylədiyi dəyərli fikirlər, Azərbaycan Respublikasının Prezidenti İlham Əliyevin Şuşada bəstəkarın büstü qarşısında səslndirdiyi tarixi çıxışın videogörüntüləri təqdim edilir. Kitabxananın rəsmi saytında yerləşdirilən materialda Üzeyir bəyin dünya musiqisi tarixində tutduğu mövqedən, musiqi mədəniyyətimizin inkişafındakı misilsiz xidmətlərindən, Azərbaycan xalq musiqisini nota salınaraq elmi əsaslarla tədqiq edilməsindən, 1908-ci ildə səhnəyə qoyulan “Leyli və Məcnun” operası ilə ölkəmizdə professional bəstəkarlıq məktəbinin, müsəlman Şərqində isə opera sənətinin əsasının qoyulmasından bəhs edilir.
https://ryl.az/multimedia/musiqi-duhasi-uzeyir-hacibeyli
“Ədəbiyyat və incəsənət”
(15.10.2025)
Sözdən yaranan incilər – SƏDİ ŞİRAZİDƏN NÖVBƏTİ 10 KƏLAM
Əziz oxucular!
Tanınmış ictimai-siyasi xadim, yazıçı-publisist, filologiya üzrə fəlsəfə doktoru, mərhum Sadıq Murtuzayev, publisist, Əməkdar hüquqşünas Müzəffər Ağazadə və yazıçı-rejissor, publisist-jurnalist, Əməkdar incəsənət xadimi Ağalar İdrisoğlu səmavi insanların, dünya dahilərinin və Azərbaycan mütəfəkkirlərinin on mindən çox kəlamlarını, sitatlarını, aforizmlərini toplayıb, tərcümə eləyib və “Sözdən yaranan incilər” adlı çox qalın bir kitabı çapa hazırlayırlar.
“Ədəbiyyat və incəsənət” portalı olaraq belə qərara gəldik ki, bu sayımızdan başlayaraq həmin kəlamları, sitatları, aforizmləri səhifələrimizdə çap edək.
İnanırıq ki, sözdən yaran bu incilər sizin xoşunuza gələcək və onları öz yaddaşınıza köçürəcək, gündəliyinizə yazacaq, dostlarınızla, yaxınlarınızla bölüşəcəksiniz.
Çünki bu incilər, hər insana lazım olan ən qiymətli sözlərdir. Onun daha yaxşı, mükəmməl kamilləşməsi üçün əvəzsiz bir məktəbdir.
SƏDİ ŞİRAZİ (1203, 1210 arası – 1292-ci illər)
- Canavar çobanlıq, zalım insan da padişahlıq edə bilməz. Zülmün təməlini qoyan padişah, öz səltənət binasını dağıtmış olur.
- Canavar balası insanlar arasında böyüsə də yenə canavardır.
- Sağlamlığın əsl dəyəri xəstəlik zamanı bilinər.
- Qadının zülfü ağıllı kişi üçün zəncir, yelbeyin kişi üçün isə tələdir.
- Sağlam olmaq istəyirsinizsə heç vaxt doyunca yeməyin.
- Qənaət etməyi bacarsaydıq, dünyadakı qayğılar daha tez həll olunardı. Var-dövlət sərvətə deyil, qənaətə söykənir.
- Cahillə mübahisə etməyə dəyməz.
- Özünü elə apar ki, dost gizli düşmənə çevrilməsin.
- Peşiman olmamaq üçün danışmazdan öncə fikirləş.
- Əvvəlcə fikirləş, sonra danış. Sənə “sus” deyilməmiş sus.
“Ədəbiyyat və incəsənət”
(15.10.2025)
ANAR, “Ənvər Məmmədxanlının xatirəsinə“
Azərbaycan Ədəbiyyat Fondunun “Yazıçı” nəşriyyatında Xalq yazıçısı Anarın “2=3+4, yaxud iki ailədə üç Xalq yazıçısı, dörd Xalq şairi” adlı kitabı işıq üzü görüb. Nəfis tərtibatlı, illüstrasiyalı kitab Azərbaycan ədəbiyyatı irsinə böyük töhfələr vermiş iki nəsildən, onlar barədə həqiqətlərdən və onların ədəbi nümunələrindən ibarətdir.
608 səhifəlik bu unikal kitabı tərtib edən Xalq yazıçısı Anar uzun illər ərzində təkcə öz yazdıqlarını yox, qəhrəmanlarının – Səməd Vurğun, Rəsul Rza, Nigar Rəfibəyli, Vaqif Səmədoğlu, Ənvər Məmmədxanlı və Yusif Səmədoğlunun yazdıqlarını eyni ideya-estetik yaradıcılıq məcrasına qoşaraq, onları eyni axında birləşdirərək ən yeni ədəbiyyatın ən milli paradiqması olaraq təqdim edibdir.
“Ədəbiyyat və incəsənət” portalı kitabdan hissələri oxucularına təqdim edir. Anar qəhrəmanlarının ən populyar əsərlərini bir daha yaddaşlarda təzələyir:
ANAR, ŞEİRLƏR
ƏNVƏR MƏMMƏDXANLININ XATİRƏSİNƏ
Gedənlə getmək olmur,
Gələnlə gəlmək olmur,
Nə çox gülməli şeylər,
Gülənlə gülmək olmur.
Həyatın hər üzünü,
Söhbətini, sözünü,
Əyrisini, düzünü
Bilənlə bilmək olmur.
Gözüm yaşı durulub,
Gözüm yaşdan yorulub,
Dünya belə qurulub,
Ölənlə ölmək olmur.
Dekabr, 1990
“Ədəbiyyat və incəsənət”
(15.10.2025)
“Bir direktor və bir şagird” layihəsində Mehriban Hacıyeva və Banu Muradlı
Ülviyyə Əbülfəzqızı, “Ədəbiyyat və incəsənət”
“Ədəbiyyat və İncəsənət” portalının media dəstəyi ilə Azərbaycan Ədəbiyyat Fondunun Bakı Şəhəri Üzrə Təhsil İdarəsi ilə birgə keçirdiyi “Bir direktor və bir şagird” adlı layihəsinin məqsədi nümunəvi məktəblərimizi, istedadlı şagirdlərimizi üzə çıxarmaq, onların ədəbiyyata olan marağına diqqət yönəltməkdir.
Hazırda təqdimatda Bakı şəhəri 96 nömrəli tam orta məktəbdir.
DİREKTOR:
Hacıyeva Mehriban Vaqif qızı
1981-ci il oktyabrın 21-də Naxçıvan MR-in Culfa şəhərində anadan olub.1988–1998-ci illərdə orta məktəbi əla qiymətlərlə başa vurub. Bakı Avrasiya Universitetinin Sinxron Tərcümə fakültəsini bitirib. Daha sonra Azərbaycan Dillər Universitetində ingilis dili müəllimliyi ixtisası üzrə yenidənhazırlanma təhsili alıb. 2017-ci ildə Xəzər Universitetində “Potensial məktəb direktorları” adlı ixtisasartırma proqramını keçib.
2008-ciildənpedaqojifəaliyyətə ingilisdilimüəllimikimibaşlayıb. 2015-ci ildən müxtəlif məktəblərdə təşkilatçı müavini, təlim-tərbiyə işləri üzrə direktor müavini vəzifələrində çalışıb. 2021-ci ildən 96 nömrəli tam orta məktəbin direktoru vəzifəsində fəaliyyət göstərir.
Azərbaycan Respublikası Elm və Təhsil Nazirliyinin keçirdiyi Təhsildə İnkişaf və İnnovasiyalar üzrə VI Qrant Müsabiqəsinin qalibidir. Eyni zamanda ETR resursları üzrə təlimçidir.
ŞAGİRD:
Mən, Banu Natiq qızı Muradlı 25 noyabr 2012-ci il tarixində Bakı şəhərində anadan olmuşam. 2018-ci ildə İlqar Əliyev adına 96 nömrəli tam orta məktəbin birinci sinfinə qəbul olunmuşam. Hazırda 8-ci sinif şagirdiyəm.
Məktəbin ictimai işlərində fəal iştirak edir, dərslərimi mükəmməl oxuyuram. Buna görə də “Yaşıl – rəğbətləndirmə kartı”na layiq görülmüşəm.
Məqsədim məktəbi uğurla bitirib, ali təhsil ocağına – Azərbaycan Dövlət İqtisad Universitetinə qəbul olmaq, gələcəyə xeyir verəcək bir mütəxəssis kimi yetişməkdir.
ESSE:
Təbəti sevək və qoruyaq
Yaşadığımız dünya, bizi əhatə edən maddi aləm olan son dərəcə gözəl, zəngin və rəngarəngdir. Bu ətraf aləm təbiət adlanır. Əslində biz özümüz də bu təbiətin bir zərrəsiyik, onun tərkib hissəsiyik. Təbiət bizim hamımızın anasıdır.
Təbiət – dünyanın yaranmasından bu günə qədər mövcud olan bir quruluşdur.
Təbiət dedikdə, daim inkişafda olan, dəyişən bütün canlı və cansız varlıqlar nəzərdə tutulur.
Təbiət həyatımızda mühüm yer tutur. Onun varlığı ilə həyatımız gözəlləşir. Bizim hər an ona ehtiyacımız var. İstirahət etmək, dincəlmək üçün təbiət qoynuna axışırıq. Sakitləşməyi, rahatlanmağı onda tapırıq. Ağaclar oksigenlə havanı zənginləşdirir, dinclik yaradır, bizi gərginlikdən uzaqlaşdırır.
Ağaclara, bitkilərə sevgi hissimiz təbiətə sevgidir. Ağaclar, bitkilər olmadan nə həyat olar, nə də təmiz hava sayəsində nəfəs almaq.
Mən təbiəti çox sevirəm. Təbiətlə təmasda olanda bütün problemlərimi unuduram. Təbiətlə baş- başa qalanda özümü çox xoşbəxt hiss edirəm. Çünki təbiət insanları daha güclü və sağlam edir. Onunla necə rəftar etsək, o da eyni şəkildə cavab verir. Həyat bir bumeranq kimidir. Nə ediriksə, onun qarşılığını görürük. Təbiəti nəzərdən qaçırmamalıyıq. Təbiəti qorumaq bütün vətəndaşların mənəvi borcudur. Təbiət yox olduqda insan yaşaya bilməz. Təbiət yoxdursa, bütün canlılar da yoxdur.
Bizim hər birimiz insanlara təbiət sevgisi aşılamalı, gələcək nəslin sağlam və xoşbəxt gələcəyini düşünməliyik. Unutmayaq ki, biz təbiəti qoruduqca təbiət də bizi qoruyur.
“Ədəbiyyat və incəsənət”
(15.10.2025)
