Super User
“Qızılgüləm, qızılgül” deyir balaca Lətifə
Könül, “Ədəbiyyat və incəsənət”
Ölkəmizin ən balaca şairi kimdir? Dəqiq statistika aparılmayıb yəqin. Amma mən bir namizədi təqdim edə bilərəm: İsmayılzadə Lətifə Vüsal qızını.
Lətifə Bakı şəhəri 53 nömrəli məktəbin 1e sinfində təhsil alır. Və əlbəttə ki, boş vaxtlarında həvəslə şeir yazır.
Mən sizə Lətifənin 2 şeirini təqdim edir, balaca şairə sənət yolunda uğurlar arzulayıram.
QIZILGÜL
Qızılgüləm, qızılgül,
Nəğmə oxur şən bülbül.
Səhər tezdən açaram,
Bağa ətir saçaram,
Məni uşaqlar sevər,
Saçlarına gül düzər.
TƏBİƏT
Yayda qızar havalar,
Qışda yağar soyuq qar.
Yazda qayıdıb gələr,
Durnalar qaranquşlar.
“Ədəbiyyat və incəsənət”
(05.02.2025)
Qoca Xocalının ilk körpəsi
Əkbər Qoşalı, “Ədəbiyyat və incəsənət” üçün
Hava hələ qaranlığın sonuncu pərdələrindən qurtulmağa çalışırdı. Dağlarından enən sərin meh Ballıcanın, Xocalının - Qarabağın bu üzünün köhnə yaralarını oxşayır, illərlə boğazda düyünlənmiş bir ah kimi gecənin qaranlığında pıçıldayırdı... Bu gecə fərqli gecəydi…
Bu gecə Xocalı Ballıcasında ilk körpə dünyaya gəlib! - Bal küpü, nur kündəsi, aslanparçası, sevginin özü! - Səhər-səhər belə bir xoş xəbər yayıldı: “Xocalı sakini, 1996-ci il təvəllüdlü Sevanə Məmmədovanın dünyaya gətirdiyi ilk övladı oğlandır. Ballıca kəndində dünyaya göz açan körpəyə babası Mehdinin adını veriblər”… Körpənin atası İlqar Məmmədov Vətən müharibəsinin qazisidir.
Antiterror əməliyyatından sonra yenidən doğulan Xocalıda körpə dünyaya gəlib - bilirsiz bu, nə deməkdir? Ehtişamdır, coşğudur, qürurdur! Özlüyündə, milli dirçəlişin ilahi təntənəsidir bu! Bu, alxışların Tanrı dərgahında qəbul olunmasının təsdiqidir! Xocalı Tanrının yadından çıxmayıb! Yer üzü xocasız ola bilərdi, ancaq Tanrısız ola bilməzdi axı! Zatən biz Haqqın incəlsə də, üzülmədiyinə ruhi güvənlə inananlardandıq. Bəs biz 30 illik ağır işğala necə son verdik, sanırsınız? - Haqqa inandığımız, işimiz Haqq işi olduğu üçün! Biz savaşlarda qızıl ləyaqət göstərən millətik! Bizim sözümüz imzamız qədər keçərlidir, üzümüz ağsaçlı tarix qarşısında apağdır!
Bəli, Xocalıda ilk körpə dünyaya gəlib!
Yəqin onun da ilk işi bütün körpələr kimi ağlamaq olub… Ancaq 33 il öncə Xocalıda baş vermiş vahim ağlaşmadan deyil bu! Çox şükür! Ağlaşma var - dirilişdir, doğuluşdur, ağlaşma var - olmaz olsun!
İlk körpə dünyaya gəlib azad Xocalıda!
Budur, körpənin ilk ağlaşması Qarabağın Xocalısının qaranlığını yararaq, sanki illərdir susqunluğa bürünmüş ana torpağa yaşamın özünün qayıtdığını müjdələyib. Bu ağlayış daşa-divara, ağaca, suya toxunaraq, zamanın donmuş laylarını çatladıb, bəlkə hələ də ruhu Xocalı göylərində dolaşan günahsızların o dünyasına su səpdi...
İlk körpəsini dünyaya gətirən anası göz yaşlarını saxlaya bilməyib yəqin. O göz yaşları, həm sevincdir, həm kədər… Sevanə xanım oğul balasının üzünə baxanda sanki doğma Xocalısının allı-güllü vaxtlarını görüb, elə bilirəm! – Bir zamanların bağlı-bağatlı çağlarını, sevinc dolu cocuqların səsini, qapı önündə əyləşib Gün batımını, Ay doğuşunu izləyən qarı-qocaları…
İndi Xocalıda yeni Xocalı doğulur - qutsal bayraq altında və bəngü azadlıq içində! Orada hər ana elə bil yalnız öz körpəsini deyil, yeni Xocalını, çiçəklənən Xocalını, xoşbəxt gələcəyi doğmuş olacaq…
Xocalıda ilk körpə dünyaya gəlib!
Körpə aslanparçasına babasının adını qoyublar - adı ilə yaşasın! Deyirəm, Xocalıda doğulan körpələrin adını nə qoysalar da, onların rəmzi adı İşıqdır, İşıldır, Ümiddir, İnamdır, Ağgündür! Çünki Xocalıda doğulan hər körpə qaranlığa işıq gətirəcək! Ballıcada doğulan Mehdinin də, bundan sonra doğulacaq aslanparçalarının, Ayparçalarının da doğuluşu, bu torpağın yenidən canlandığının, burada yaşamın yenidən başlanacağının sübutu, təntənəsidir!
Bunlar bizim duyduqlarımız, dediklərimizdir;
bəs görəsən, Xocalı özü nə düşünür?
“Sən azad Xocalının oğlusan!
Sən bu torpağa doğan ilk Günəşsən!..
Sən harada doğulduğunu heç vaxt unutmamalısan!.. Ancaq unutmamaqla yox, yaşatmaqla, qurmaqla, böyütməklə, sevməklə”!.. - Bəlkə belə pıçıldayır Xocalı…
Hər doğan sabaha şükür!
“Ədəbiyyat və incəsənət”
(05.02.2025)
Şəkidə “Gəl ey səhər" adlı yubiley gecəsi keçirilib
Şəfa Vəli, “Ədəbiyyat və incəsənət” portalının Şəki-Zaqatala təmsilçisi
Bu gün - fevralın 4-də Xalq artisti, bəstəkar, müğənni, ictimai-siyasi xadim Polad Bülbüloğlunun doğum günüdür, 80 illik yubileyidir.
Şəki-Zaqatala Regional Mədəniyyət İdarəsinin dəstəyi, Şəki şəhər Heydər Əliyev Mərkəzi, Şəki şəhər 2 nömrəli Uşaq Musiqi məktəbinin və Şəki şəhər MKS-nin 9 nömrəli kitabxana filialının birgə təşkilatçılığı ilə yubileyə həsr olunmuş "Gəl ey səhər" adlı yubiley gecəsi keçirilib.
Tədbirdə Şəki şəhər İcra Hakimiyyətinin nümayəndələri, Şəki-Zaqatala Regional Mədəniyyət İdarəsinin və Şəki-Zaqatala Regional Təhsil İdarəsinin rəhbərləri,mədəniyyət işçiləri və ictimaiyyət nümayəndələri iştirak edib.
Tədbirdə Polad Bülbüloğlunun yaradıcılıq fəaliyyəti işıqlandırılıb, bir-birindən ecazkar bəstələri və repertuarından nəğmələr səsləndirilib.
Tədbirin sonunda Şəki-Zaqatala Regional Mədəniyyət İdarəsinin rəis v.i.e. Emil Bədəlov çıxış edərək, tədbirin yüksək səviyyədə təşkilinə görə minnətdarlığını bildirib.
“Ədəbiyyat və incəsənət”
(04.02.2025)
Polkovnik Cəlil Xəlilov bir qrup veterana üzvlük vəsiqəsi təqdim edib
Müharibə, Əmək və Silahlı Qüvvələr Veteranları Təşkilatının inzibati binasında “Security Operation Services” (SOS) MMC-nin 4 illik fəaliyyətilə bağlı hesabat tədbiri keçirilib.
“Ədəbiyyat və incəsənət” portalına Müharibə, Əmək və Silahlı Qüvvələr Veteranları Təşkilatından verilən məlumata görə, tədbirdə iştirak edən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov “SOS” MMC ilə Respublika Veteranlar Təşkilatı arasındakı əməkdaşlığa diqqət çəkib, bu əməkdaşlığı yüksək qiymətləndirib.
Polkovnik qeyd edib ki, “SOS” MMC hər zaman veteranlara, şəhid ailələrinə yüksək diqqət və qayğı göstərib, veteranların işlə təminatı istiqamətində mühüm addımlar atıb. “SOS” MMC tərəfindən 270 veteran işlə təmin edilib, şəhid ailələri, müharibə əlilləri ilə bağlı mühüm layihələr həyata keçirilib.
Polkovnik Cəlil Xəlilov “SOS” MMC-də yeni fəaliyyətə başlayan veteranlara uğurlar arzulayıb, onlara Müharibə, Əmək və Silahlı Qüvvələr Veteranları Təşkilatının üzvlük vəsiqələrini təqdim edib.
“Ədəbiyyat və incəsənət”
(04.02.2025)
Fazil Mustafa Polad Bülbüloğlunu təbrik edib
MilIi Məclisin İctimai birliklər və dini qurumlar komitəsinin sədri Fazil Mustafa Mədəniyyət komitəsinin sədri Polod Bülbüloğlunu 80 illik yubileyi ilə bağlı təbrik edib.
“Ədəbiyyat və incəsənət” portalı xəbər verir ki, təbrik məktubunda deyilir:
“Hörmətli Polad müəllim,
Milli Məclisin İctimai birliklər və dini qurumlar komitəsi adından, şəxsən öz adımdan Sizi – dünyaşöhrətli sənətkarı 80 illik yubileyinizlə bağlı səmimi qəlbdən təbrik edirəm!
Siz, yalnız Azərbaycan mədəniyyətinin deyil, Türk dünyası mədəniyyətininin inkişafında, beynəlxalq aləmdə tanıdılmasında, klassik irsimizin tərənnümündə özünəməxsus, uzunmüddətli, səmərəli xidmətlər göstərərək, böyük şöhrət qazanmısınız.
Müstəqil Azərbaycanın ilk Mədəniyyət naziri, TÜRKSOY-un ilk Baş direktoru olaraq, Sizin xidmətləriniz unudulmazdır. Həyatınızda, sənətinizdə bir çox “ilk”lər vardır, o cümlədən azad Şuşadan seçilmiş ilk Millət vəkilisiniz, Milli Məclisə ərazi bütövlüyümüz, suverenliyimiz bərpa olunduqdan sonrakı ilk seçkilərdə Mədəniyyət komitəsinin sədri seçilmisiniz, habelə Rusiya Federasiyasında ən uzunmüddətli Fövqəladə və səlahiyyətli səfir olaraq, bütün diplomatik korpusun duaeyni olmusunuz. Azərbaycan, Türkmənistan, Özbəkistan və Başqurdistanın Xalq artisti, Dağıstanın Əməkdar incəsənət xadimi fəxri adlarını daşıyan yeganə sənətkarsınız. Müstəqil Azərbaycanın ən yüksək dövlət təltiflərinə layiq görülmüsünüz və 80 yaşınızın tamam olmasına bir gün qalmış, ölkə Prezidentinin Sərəncamı ilə 1-ci dərəcəli “Vətənə xidmətə görə” ordeni ilə təltif olnmusunuz. Bütün bunlar Sizin sənətinizə, şəxsiyyətinizə dövlət, xalq məhəbbətinin parlaq ifadəsi, o cümlədən beynəlxalq nüfuzunuzun göstəricisidir.
İnanırıq ki, görkəmli ictimai-siyasi, elm və sənət xadimi olaraq, mədəniyyətin zərif gücü və zəngin diplomatik təcrübəniz sayəsində, Vətənə, sənətə xidmətinizi bundan sonra da davam və inkişaf etdirəcəksiniz.
Yubileyiniz ilə bağlı Sizi bir daha təbrik edir, möhkəm cansağlığı, Azərbaycan, Türk dünyası mədəniyyətinin inkişafı yolunda fəaliyyətinizdə yeni uğurlar diləyirəm”!
“Ədəbiyyat və incəsənət”
(04.02.2025)
Beynəlxalq nümayəndə heyətləri “ASAN xidmət”də
Qırğız Respublikasının iqtisadiyyat və ticarət nazirinin müavini Sanjarbek Bolotov, maliyyə nazirinin müavini Ruslan Tatikov, həmçinin Türk Dünyası Mediatorlar Birliyinin sədr müavini Jandildə Jakupovun rəhbərlik etdiyi nümayəndə heyətləri ölkəmizə rəsmi səfərləri çərçivəsində “ASAN xidmət” mərkəzinin fəaliyyəti ilə tanış olublar.
“Ədəbiyyat və incəsənət” portalına “ASAN xidmət”dən verilən məlumata görə, Ruslan Tatikov ilə görüşdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov qurumun müxtəlif fəaliyyət istiqamətləri, o cümlədən Prezident İlham Əliyevin təşəbbüsü əsasında yaradılmış “ASAN xidmət” mərkəzləri və sosial innovasiyalar istiqamətində həyata keçirilən layihələr barədə ətraflı məlumat verib. Həmçinin 2024-cü ilin 24 aprel tarixində imzalanmış “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Qırğız Respublikasının Rəqəmsal İnkişaf Nazirliyi arasında Qırğız Respublikasında dövlət xidmətləri mərkəzlərinin təkmilləşdirilməsinə dair Anlaşma Memorandumu”nun həyata keçirilməsinə dair müzakirələr aparılıb.
Nümayəndə heyətlərinə Dövlət Agentliyinin 2015-ci ildə BMT-nin Dövlət Xidmətləri Mükafatına, 2019-cu ildə BMT-nin rəqəmsal idarəetmənin tətbiqi ilə dövlət xidmətlərinin inkişafı sahəsində xüsusi mükafatına və 2023-cü ildə “Qlobal Hökumət Mükəmməlliyi Mükafatı” Proqramı çərçivəsində “Dünyanın Ən Qabaqcıl Dövlət Xidməti” seçilərək xüsusi mükafata layiq görülməsi, o cümlədən “ASAN xidmət” modelinin müxtəlif ölkələrdə uğurla tətbiq olunduğu bildirilib.
Qonaqlar “ASAN xidmət” mərkəzlərinin fəaliyyətinin, buradakı innovativ yeniliklərin onlarda yüksək təəssürat yaratdığını və sözügedən təcrübənin öyrənilməsində və tətbiqində maraqlı olduqlarını vurğulayıblar.
Görüş çərçivəsində nümayəndə heyətləri “INNOLAND” İnkubasiya və Akselerasiya Mərkəzinin, Səyyar ASAN xidmətin, "ABAD" publik hüquqi şəxsin fəaliyyəti ilə də tanış olublar.
“Ədəbiyyat və incəsənət”
(04.02.2025)
Ermənistan - Gürcüstan bağları: dünən, bu gün, sabah... - IV YAZI
Əkbər Qoşalı, “Ədəbiyyat və incəsənət” üçün
Ermənistan Respublikası ilə Azərbaycan Respublikası arasında mümkün Barış Anlaşması hazırlanması sürəcinin Gürcüstanda da diqqətlə izləndiyi şübhəsizdir.
Empati yapsaq, belə bir Anlaşmanın imzalanması ilə Gürcüstanın Qafqazda neytral və mərkəzi (tranzit) rolunun itirilməsi qorxusu gerçək bir ehtimal kimi görünə bilər, amma bunun baş verməsi üçün önəmli faktorların eyni anda mövcud olması gərəkdir. Qafqazdakı geosiyasi durum və bölgəsəl güclərin dəngəsi, bu planda nələrin gerçək olub-olmamasını müəyyən edəcəkdir.
Gürcüstan, zaman-zaman, hər üç qonşusu - Ermənistan, Azərbaycan və Rusiya ilə müstəqil və dəngəli bağlar qurmağa, qurduğu bağları qorumağa, davam və inkişaf etdirməyə çalışıb. Bu, ona bölgəsəl məsələlərdə bir növ “orta yol” mövqeyi qazandırıb. Lakin:
-Azərbaycan və Ermənistan arasında Barış Anlaşmasının imzalanması, əsasən iki tərəf arasında olan gərginlikləri azaldarsa, Gürcüstanın bu əlaqələrdəki “arabulucu” rolu və “mərkəziyyət”i zəifləyə bilər.
Əgər Azərbaycan və Ermənistan arasındakı barış, hər iki ölkənin strateji bağlarında üçüncü qonşunu nəzərə almadan inkişaf potensialı göstərərsə, Gürcüstanın bu iki qonşusu arasındakı proseslərə (belə demək mümkünsə) “müdaxilə” və ya iştirak imkanları azalacaqdır.
Bəlli olduğu kimi,
Gürcüstan, enerji layihələrində və daşımaçılıq dəhlizlərində önəmli keçid məntəqələrinə sahib ölkə olmanın komfortunu yaşayır. “Komfort zona”dan çıxmaq ehtimalının qonşuda yaratdığı həyəcanı anlamaq çətin deyildir.
Rusiya da hələlik Gürcüstanın strateji tərəfdaşı görüntüsünə sahibdir; lakin bu tərəfdaşlıq, hər an zəifləyə bilər. Rusiya, Ermənistanla olan strateji yaxınlıq (iç-içəlik) təcrübəsinə baxmayaraq, Gürcüstanın neytral mövqeyini dəstəkləyir;
Barış Anlaşmasından sonra, Rusiyanın öz çıxarlarını gücləndirmək üçün Azərbaycanla daha yaxın işbirliyində maraqlı olmayacağını kim deyə bilər?
Hazırkı dönəmdə,
Rusiya Azərbaycanla bərabərhüquqlu münasibətlərdə səmimiyyət nümayiş etdirməli, özəlliklə, məlum uçaq böhranında ləyaqətli mövqe göstərməlidir. Aydındır ki, Rusiya Geney Qafqazdakı təsirini saxlamağa çalışacaq, amma Ermənistan-Azərbaycan barışı ona əlavə zəiflik gətirirsə, Gürcüstanın rolunun kəskin şəkildə dəyişməsi ehtimalı arta bilər.
Gürcüstanın iç siyasi dinamikası da unudulmamalıdır.
Gürcüstanın iç siyasi durumu bu qorxuların gerçəkləşib-gerçəkləşməməsində önəmli rol oynayır. Gürcüstanın Batıya yönəlik siyasəti və Avropaya inteqrasiya cəhdləri, onu ötən illərdə bölgəsəl güclərdən daha müstəqil bir mövqeyə gətirmiş kimi görünürdü. Lakin günümüzdə başqa siyasi şəkillənmələr meydana çıxmış durumdadır…
Məsələn, Avropa Birliyi ilə yaşanan gərginliklərin ardınca, Avropa Şurası Parlament Assambleyasındakı (AŞPA) Gürcüstan nümayəndə heyətinin də cəzalandırıldığını vurğulaya bilərik. Beləki, Gürcüstanın hökumətyönlü deputatlarına AŞPA-da fəaliyyət göstərmək hüququ yalnız sanksiyalar altında və ciddi məhdudiyyətlərlə tanınıb.
Gürcüstan parlament nümayəndə heyətinin rəhbəri Teya Tsulukiani isə AŞPA-dan çıxdıqlarını elan edib...
Gürcüstanın Avropa və NATO ilə daha sıx bağlar qurmaq cəhdinin gürcü cəmiyyətində 50 faizlik dəstəyi var; belə çıxır ki, əgər həmin bağlar davam edərsə, bu, onun Qafqazda neytral və mərkəzi rolunu müəyyən dərəcədə təhdid edə bilər.
Gələcəkdə Gürcüstanın özünün bölgəsəl dəngəsini qorumağa çalışması, başqa dövlətlərin bölgəsəl güclərinin təsirini qəbul etməsi və müəyyən strateji seçimlər etməsi lazım olacaq.
Gürcüstanın intensiv diplomatik çalışmalarına da vurğu edək:
Gürcüstanın neytral rolunun itirilməsi, yalnız rəsmi strateji və diplomatik yanaşmalarla önəmli dərəcədə dəyişə bilər. Gürcüstan öz diplomatik bağlarını inkişaf etdirərək və ərazilərinin təhlükəsizliyini təmin etməyə çalışaraq, iki qonşusu arasındakı Barış Anlaşmasından sonra, bölgəsəl rolunu qorumağa davam edə bilər. Bu, həm beynəlxalq aləmdəki qüvvələrə, həm də Qafqazda mövcud olan təhdidlərə qarşı davamlı bir diplomatik yanaşma tələb edir.
Sonuc olaraq, nələri vurğulamalıyıq? -
Gürcüstanın bölgəsəl işbirliyi və strateji bağlarını necə qurması, eyni zamanda Ermənistan-Azərbaycan Barış Anlaşması sonucunda formalaşan yeni geosiyasi düzənin Qafqaza necə təsir edəcəyini müəyyən edəcək. Gürcüstan hələ də önəmli bir tranzit, diplomatik və təhlükəsizlik rolunu oynaya bilər, amma təzyiqlərlə də qarşılaşa bilər.
Burada çox önəmli və dartışmasız bir faktor vardır, o da, Azərbaycanın hər kəsə münasibətdə ləyaqətli mövqe tutmasına bağlıdır. Yəni, Azərbaycan Gürcüstanla münasibətlərini Ermənistanla münasibətlər konteksində deyil, necə lazımsa, o şəkildə qurur. Ermənistanla Barış Anlaşması bizim işimizdir və o Anlaşmadan Gürcüstana zərər toxunmayacaqdır. - Toxunacaqsa da, bu, qətiyyən bizdən qaynaqlanmış olmayacaq. Azərbaycanın sözünün möhürlü imza qədər keçərli olduğunu Gürcüstanın indiki və keçmiş rəhbərləri dəqiq bilir.
Azərbaycan həmişə qonşularına münasibətdə ədalətli və açıq siyasət yürüdüb. Gürcüstanla olan əlaqələrimiz də bu prinsiplərə əsaslanır və gələcəkdə də bu yanaşma davam edəcək.
Ayrıca,
Qafqazın geostrateji mövqeyi elədir ki, buranın hər bir dövləti üçün imkanlar var və bərabərhüquqluluq prinsipini üstün tutan hər kəs üçün faydalar mövcuddur. Əgər üç respublikadan hər biri “Təhlükəsiz, çiçəklənən Qafqaz”da maraqlı olsa, bu, bütün yaxın-uzaq ölkəkər üçün də xeyirli olardı. Azərbaycan həmişə bir-birinin iç işlərinə qarışmamaq, bir-birinə qarşı əsassız iddialar irəli sürməmək, o cümlədən ərazi bütövlüyünü tanımaq, bir sözlə, beynəlxalq hüquq normalarına sayğı göstərməkdən yana olub. Azərbaycan “3+3” formatında da səmimi şəkildə öncül mövqe tutub.
Bax, məsələ də ondadır ki,
Ermənistan: Azərbaycan və Türkiyəyə münasibətdə Konstitusiya düzeyində, Gürcüstana münasibətdə siyasi təcrübə düzeyində haqq-ədalətə gəlməlidir;
Gürcüstan: öz türk-müsəlman əhalisinin hüquqlarını adil şəkildə qorumağı, onların yer adları ilə, təhsillə və s. ilə bağlı haqlı çağırışlarına diqqət yetirməyi bacarmalıdır;
Rusiya: Gürcüstana münasibətdə Güney Osetiya və Abxaziya ilə bağlı doğru-dürüst, ədalətli mövqeyə gəlməlidir;
İran: öz Qafqaz siyasətində “süni doğmalar” tapıb-tutmamalı, Azərbaycanın dövlət müstəqilliyini dərinləməsinə və üfüqgenişliyinədək sinirməli, bir sözlə, səmimi olmalıdır.
DÖVLƏTİMİZ ZAVAL GÖRMƏSİN!
Şəkildə: Tbilisi küçələri bu sayaq nümayişlərə alışıb.
(Foto: AP)
“Ədəbiyyat və incəsənət”
(04.02.2025)
Azərbaycanın turizm imkanları Pakistanda nümayiş etdirilib
Azərbaycan Turizm Bürosunun təşkilatçılığı ilə Pakistanın Karaçi şəhərində keçirilən “Pakistan Travel Mart” sərgisində Azərbaycanın turizm imkanları nümayiş etdirilib.
Turizm Agentliyinin yaydığı məlumatda bildirilir ki, “Azərbaycan Hava Yolları” QSC və ölkəni təmsil edən altı turizm şirkətinin iştirak etdiyi sərgidə stend ziyarətçilərinə UNESCO-nun Ümumdünya İrs Siyahısına daxil edilmiş tarixi və mədəni abidələr, milli mətbəx, turizm marşrutları və müasir turizm infrastrukturu barədə məlumat verilib.
Sərgi çərçivəsində Azərbaycan Turizm Bürosunun İdarə heyətinin sədri Florian Zenqstşmid “Destinasiyaların yenidən təyin edilməsi: Dayanıqlı turizm və davamlı gələcək” adlı panel müzakirəsində, eləcə də İslam Ticarət və İnkişaf Palatası (ICCD) tərəfindən təşkil edilən “Dayanıqlı Turizm Forumu”nda çıxış edərək, Azərbaycanın dayanıqlı turizm təcrübələri və turizm sahəsində dövlət-özəl tərəfdaşlığı mövzularında ətraflı danışıb.
Qeyd edək ki, AZAL tərəfindən Pakistanın İslamabad və Lahor şəhərlərindən Bakıya birbaşa uçuşlar həyata keçirilir. 2024-cü ildə Azərbaycana səfər edən Pakistan vətəndaşlarının sayı 80 min 924 nəfər təşkil edib ki, bu da 2023-cü illə müqayisədə 47 faiz artım deməkdir.
“Ədəbiyyat və incəsənət”
(04.02.2025)
Üzeyir Hacıbəylinin 140 illiyi qeyd ediləcək SƏRƏNCAM
2025-ci ilin sentyabr ayında dahi Azərbaycan bəstəkarı, Şərqdə ilk operanın yaradıcısı, böyük musiqişünas-alim, istedadlı publisist, dramaturq və pedaqoq, tanınmış ictimai xadim, Xalq artisti, Dövlət mükafatları laureatı, Azərbaycan Elmlər Akademiyasının həqiqi üzvü Üzeyir Əbdülhüseyn oğlu Hacıbəylinin anadan olmasının 140 ili tamam olur.
“Ədəbiyyat və incəsənət” portalı AzərTAC-a istinadən xəbər verir ki, Prezident İlham Əliyev Azərbaycan mədəniyyətinin inkişafına misilsiz töhfələr vermiş qüdrətli sənətkar Üzeyir Hacıbəylinin anadan olmasının 140-cı ildönümünün layiqincə keçirilməsini təmin etmək məqsədilə Sərəncam imzalayıb.
Sərəncama əsasən Mədəniyyət Nazirliyi Elm və Təhsil Nazirliyi və Azərbaycan Milli Elmlər Akademiyası ilə birlikdə dahi Azərbaycan bəstəkarı Üzeyir Hacıbəylinin anadan olmasının 140-cı ildönümünə dair tədbirlər planını hazırlayıb həyata keçirməlidir. Nazirlər Kabineti isə bu Sərəncamdan irəli gələn məsələləri həll etməlidir.
Sərəncamda qeyd edilib ki, Üzeyir Hacıbəyli çoxşaxəli yaradıcılığı ilə Azərbaycan mədəniyyəti tarixində silinməz iz qoymuş qüdrətli şəxsiyyətlərdəndir. Ömrünü cəmiyyətin mədəni tərəqqisinə həsr edən fədakar ziyalının yüksək mənəvi-estetik dəyərə malik irsi Azərbaycan xalqının XX əsrin ilk onilliklərindən vüsət almış ədəbi-mədəni intibahının aynasıdır. Azərbaycan bəstəkarlıq məktəbinin banisi olan Üzeyir Hacıbəyli novator sənətkar kimi milli musiqi xəzinəsini unikal forma və janrlarla zənginləşdirmişdir. O, Şərqin və Qərbin musiqi nailiyyətlərinin dərin vəhdətində dünya musiqisinin qızıl fondunda fəxri yer tutan nadir sənət inciləri meydana gətirmiş, Azərbaycan mədəniyyətinə beynəlxalq miqyasda geniş şöhrət qazandırmışdır. Üzeyir Hacıbəyli eyni zamanda parlaq bədii dühası sayəsində Azərbaycan dramaturgiyasına dəyərli töhfələr vermiş, alovlu publisistikası ilə mətbuat salnaməsinə yeni səhifələr yazmışdır. Onun azərbaycançılıq məfkurəsi ilə yoğrulmuş dolğun ictimai-siyasi fəaliyyəti əsl vətənpərvərlik nümunəsidir.
“Ədəbiyyat və incəsənət”
(04.02.2025)
Mədəniyyət Nazirliyi və ARKA-nın dəstəyi ilə hazırda 26 filmin istehsalı davam edir
Mədəniyyət Nazirliyi və ARKA-nın dəstəyi ilə 2023-cü ildə 3, 2024-cü ildə 21 film çəkilib. Hazırda 26 filmin istehsalı davam etdirilir.
AzərTAC xəbər verir ki, bunu mədəniyyət naziri Adil Kərimli nazirliyin 2023–2024-cü illərdəki fəaliyyətinə dair geniş kollegiya iclasında çıxışı zamanı deyib.
Nazir bildirib ki, ötən dövr ərzində ölkə rəhbərliyi tərəfindən teatr xadimlərinin maddi rifahının, teatrların maddi-texniki təchizatının yaxşılaşdırılması sahəsində diqqətəlayiq işlər görülüb.
“Azərbaycan Dövlət Gənc Tamaşaçılar və Gəncə Dövlət Dram teatrlarına “milli”, Şuşa Dövlət Musiqili Dram Teatrına “aparıcı”, Beynəlxalq Muğam Mərkəzinə isə “beynəlxalq” statusu verilib. Həmçinin bölgələrdə mədəni iştirakçılığın səviyyəsinin artırılmasına da diqqət yetirilib. 2023-cü ildə “Teatr-tamaşa müəssisələrinin illik repertuarlarının və dövlət sifarişi əsasında hazırlanan tamaşaların məzmununun qiymətləndirilməsi üzrə Ekspert şurası” yaradılıb, - deyə o əlavə edib.
“Ədəbiyyat və incəsənət”
(04.02.2025)
