Ülviyyə Əbülfəzqızı, “Ədəbiyyat və incəsənət”

Salam " Ədəbiyyat və İncəsənət" portalının dəyərli izləyiciləri.

“Psixologiya və Şeir” rubrikası insanın daxili aləmini iki fərqli, lakin bir-birini tamamlayan prizmadan təqdim edir. Psixologiya insan davranışlarını, duyğularını və düşüncələrini izah edir, şeir isə həmin duyğulara bədii çalar qataraq onları daha təsirli şəkildə ifadə edir. Bu rubrikada elmin dərinliyi ilə poeziyanın incəliyi bir araya gələcək və oxuculara həm düşünmək, həm də hiss etmək imkanı verəcəkdir.

Beləliklə, qonaqlarımızı Sizə təqdim edirik: Şair qonağımız BDU- nun SEP- fakültəsinin Fəlsəfə ixtisasının məzunu, AYB-nin üzvü, " Sükutdan asılmış ruh", "Qəfəs darlığı", “Bir sərbəst şeir, iki qafiyə kədər", Türkiyədə dərc olunan  "Günüm gecəylə başlar" şeir kitablarının müəllifi , “Zərif kölgələr" antologiyasının və "Vətən mücahidləri" kitabının həmrəhbəri sevimli xanım Aysel Nəsirzadə, psixoloq qonağımız CİBS Psixologiya və Təlim Mərkəzinin psixoloqu Müjqan Məmmədovadır.

Ruh bədəndə yerin danır…

Bilsən necə qəm çəkirəm

Divar nəmi çəkən kimi.

Göz yaşlarım selə dönür

Gün gecəyə keçən kimi.

Düyünlənib acı qəhər,

Boğur məni yenə gecə.

Ürəyimə verir kədər,

Həsrət olub bir bilməcə.

Bilmirəm ki, bu nə sirdir?..

Bilməm, niyə narahatam...

Yadıma gəlmir, bir ildir

Başım atıb rahat yatam.

Vücudumun təpəri yox ,

Ruh bədəndə yerin danır.

Nə göylərə təslim olur,

Nə yerdəki yerin anır.

Yazan özü belə yazıb,

Taleyi mən seçməmişəm.

Ölüdən betərəm onsuz,

Bir dünyadan köçməmişəm.

Ruh–bədən konfliktinin təsviri

Şeirin əsas xətti ruhun bədəndə yerini tapa bilməməsidir. Bu, eksistensial narahatlığın və özünü identifikasiya böhranının poetik ifadəsidir. İnsan özünü nə tam bu dünyaya aid, nə də başqa bir dünyaya hazır hiss edir. Bu, dərin daxili boşluq və məna axtarışı yaşayan şəxslərdə rast gəlinir.

“Ruh bədəndə yerin danır,

Nə göylərə təslim olur, 

Nə yerdəki yerin anır.”

Bu misralar insanın mənəvi bir limbo vəziyyətində olduğunu göstərir — nə göy (ilahi) ilə, nə də yer (maddi) ilə tam uyğunlaşa bilir.

Qəm və həsrət motivləri

“Düyünlənib acı qəhər 

 Boğur məni yenə gecə” bu misralar boğulma hissini, yəni emosional bloklanmanı ifadə edir. Bu həm də ifadə olunmamış hisslərin, xüsusilə həsrətin daxildə düyünlənməsi deməkdir. Həsrətin “bilməcə” adlandırılması onun adını, səbəbini tam dərk etməmək deməkdir.

Psixoloji mənzərə

Bu şeir eksistensial böhran, daxili boşluq, özünə və həyata aidiyyət hissinin itməsi, uzunmüddətli narahatlıq və ümidsizlik kimi halın bədii təsviridir. Şeirdəki obrazların hamısı bu psixoloji tabloya uyğun gəlir:

Divar nəmi → İçə işləyən, yığılan kədər.

Selə dönən göz yaşı → Emosional daşqın, amma hələ də boşalmamış ağrı.

Düyün → ifadə olunmamış, açılmamış emosiyalar.

Bu şeir şairin ozunə aid hisslərdirsə, bu bir ruhi transformasiya mərhələsinin başlanğıcı da ola bilər. Ruh bədəndə yerini tapmadıqda, bu çox vaxt köhnə kimlikdən çıxıb yenisinə keçmə prosesində olur. Bu, mənəvi oyanış və ya şəxsi böhranın eyni üzüdür.

Taleyi mən seçməmişəm  bu, nəzarət itkisi hissinin ifadəsidir. Şəxs öz həyatını idarə edə bilmədiyini, sadəcə yazılan bir ssenarini yaşadığını düşünür. Bu isə passivlik, ümidsizlik və ozü ölü olmadan ölmüş kimi hiss metaforası ilə tamamlanır.

“Ədəbiyyat və incəsənət”

(02.10.2025)

Leyla Səfərova, “Ədəbiyyat və incəsənət”

Bugün uşaqlığımla görüşdüm yenə. Görüşə gələrkən məndən eyni geyinməyimizi istəyəndə tərəddüd etdim, amma sonra onun ən sevdiyi rəngi geyinməkdə razılaşdıq. 

Görüş yerimiz evimizə yaxın olan mağazanın həyətindəki balaca bağça idi. Ancaq ora gedə bildiyini, başqa yerləri tanımadığını dedi. Görüşdük. Onu gəzməyə aparmağı təklif etdikdə oyuncaqlarını evdə tək qoya bilməyəcəyini dedi.

 Onunla nə edəcəyimi bilmirdim. O mənim sadəcə keçmişim deyildi, bugün də içimdə saxladığım, bugün də qoruduğum, qəlbimdə yaşatdığım bir parçam idi. 

Onun 6 yaşı var idi. Bu il artıq məktəbə başlamışdı, 1-ci sinfə gedirdi. Mənsə bu il universitetdən məzun olmuş, həyatın başqa yollarına atılmışdım. 

Keçmişi gələcəyə birləşdirəm bir körpü çəkdik onunla bugün. Mənə ən çox hansı oyunları sevdiyini, hansı çizgi film qəhrəmanı olduğunu, böyüyəndə kim olacağını, necə bir həyatı olacağını xəyal etdiyini danışdı. Elə şirin danışırdı ki, hər dediyi gözlərimi doldurdu, üzümə səmimi, qəlbdən bir təbəssüm qoydu. Onunla danışarkən özümü ondan sonrakı 15 ildə olmadığım qədər hüzurlu hiss etdim bəlkə də. Doya-doya baxdım o şən, hər şeydən xəbərsiz, tək qorxusu istədiyi şirniyyatları almadan evə gələn valideynlər idi. Heç müəllimlərdən də qorxmurmuş, sinif birincisi imiş.

Əlimdən tutub dartaraq məni birgə qurduğumuz o körpüyə apardı. "Getmə, gəl bizə gedək, bizdə qal, heç hara getmə" deyə dartırdı. Balaca əlləri, balaca biləkləri 2 barmağımı sarmalamışdı. Onu qucağıma alanda bir şey hiss etdim. Onu geridə qoymaq onu tək qoymaq demək olacaqdı. Boynuma elə möhkəm sarılmışdı ki, bu təkliyi nə ona, nə özümə yaraşdıra bildim. Onu da özümlə aparmaq qərarına gəldim. "Anamı tək qoyacıq?" deyə soruşduqda onun bizi gözlədiyini dedim. Hoppanaraq qucağımdan enib körpünün gələcək istiqamətinə qaçdı. "Gəl gedək, mən tez böyümək istəyirəm" deyə qışqırdı. 

Yerimdə dayandım. Yavaş yavaş ona yaxınlaşıb bir daha qucaqladım və onu özümlə aparmaqdan vazkeçdim. Səssizcə qulağına pıçıldadım:

-Mən heç vaxt icazə verməyəcəm ki, sən böyüyəsən....

“Ədəbiyyat və incəsənət”

(02.10.2025)

İnci Məmmədzadə, “Ədəbiyyat və incəsənət”

Gülşəndə açıb səba ilə gül tək,

Könlüm düşdü bir aşiqə könül tək.

Ey Natəvan, bu sevda bir atəşdir,

Yandırar canı, qoymaz səni tək-tək.

Azərbaycanın görkəmli  şairəsi Xurşidbanu Natəvan 6 avqust 1832-ci ildə Şuşa şəhərində anadan olub. O, Qarabağ xanlığının sonuncu hakimi olan Mehdiqulu xan Cavanşirin qızı olub. Belə nəcabətli ailədən gəlməsi və xan nəslinə mənsub olması səbəbindən "Xan qızı" ləqəbi ilə tanınınıb. Onun ailəsi Azərbaycan tarixində görkəmli iz qoyan nəsillərdən biri sayılır.

Təhsil və Dünyagörüşü:

Natəvan yaxşı təhsil alıb, ərəb və fars dillərini öyrənib, Şərq poeziyasını dərindən mənimsəməyib. Onun ədəbi və fəlsəfi bilikləri dövrün bir çox kişi müasirlərindən belə üstün olub. O, həm də klassik Şərq ədəbiyyatının – xüsusən də Sədi, Hafiz, Füzuli kimi sənətkarların əsərlərini dərindən bilirdi.

Ədəbi Fəaliyyəti:

Xurşidbanu Natəvan poeziyada əsasən qəzəl və rübai janrlarında yazıb. Əsərlərində sevgi, tənhalıq, ayrılıq, insani dəyərlər, könül çırpıntıları və qadın hissləri əsas mövzular olub. Natəvan ilk dövrlərdə "Xurşid" təxəllüsündən istifadə etsə də, sonradan "Natəvan" (aciz, gücsüz) adını seçib. Bu təxəllüs onun həyatda üzləşdiyi faciələrə – xüsusilə oğlunun  ölümünə – bir işarə olub.

Natəvanın şeirləri həm klassik, həm də milli ruhla yoğrulub. Onun dili bədii, zəngin və hissiyyatla doludur. Natəvanın qəzəlləri sonralar Azərbaycan xalq musiqisində və muğamlarında da ifa olunub. 

Ədəbiyyat Məclisi – "Məclisi-üns":

1864-cü ildə Natəvan Şuşada "Məclisi-üns" adlı ədəbi bir cəmiyyət yaradıb. Bu məclis Qarabağda və ümumilikdə Azərbaycanda ədəbi həyatın canlanmasında mühüm rol oynayıb. Məclisdə dövrün görkəmli şair və ədibləri toplaşır, ədəbi müzakirələr aparılır, yeni əsərlər təqdim edilib. Bu məclis qadın rəhbərliyi altında fəaliyyət göstərən ilk ədəbi qurumlardan biri olub.

Xeyriyyəçilik və İctimai Fəaliyyət:

Xurşidbanu Natəvan təkcə şair deyil, həm də böyük xeyriyyəçi və ictimai xadim olub.

 O, Şuşada bir çox sosial layihələr həyata keçirib. Ən məşhuru 1872-ci ildə Şuşa şəhərini içməli su ilə təmin etmək üçün çəkdirdiyi su xətti – "Xan qızı bulağı" olub. Bu bulaq Natəvanın öz şəxsi vəsaiti hesabına tikilib, şəhər əhalisinin böyük ehtiyacını qarşılayıb.

Bundan başqa, o, yoxsul ailələrə kömək edib, məktəblərin, məscidlərin və digər ictimai binaların tikilməsinə maddi dəstək göstərib. Onun bu fəaliyyəti dövrün ziyalıları və xalqı tərəfindən yüksək qiymətləndirilib.

Ölümü və Xatirəsi:

2 oktyabr 1897ci ildə vəfat edib. Onun cənazəsi Şuşadan Ağdama qədər piyada daşınıb və İmarət qəbiristanlığında dəfn olunub. Onun vətənə, ədəbiyyata, insanlara olan sevgisi bu gün də xatırlanır və dərin hörmətlə anılır.

Mirası və Əhəmiyyəti:

Xurşidbanu Natəvan Azərbaycan ədəbiyyatının ilk qadın nümayəndələrindən biri olaraq milli poeziyamıza yeni nəfəs gətirib, qadın şairlərin yolunu açıb. Onun həm ədəbiyyatda, həm də xeyriyyəçilikdə qoyduğu iz bu gün də yaşayır.

Onun adı məktəblərə, küçələrə verilib, onun irsi əsasında sənədli filmlər çəkilib. Natəvan həm poetik istedadı, həm də yüksək mənəviyyatı ilə Azərbaycan tarixinə unudulmaz bir qadın kimi daxil olub.

Allah rəhmət eləsin!

“Ədəbiyyat və incəsənət”

(02.10.2025)

İlhamə Məhəmmədqızı, “Ədəbiyyat və incəsənət” portalının Sumqayıt təmsilçisi

“Başlanğıcda Söz vardı. Söz Tanrı ilə birlikdəydi və Söz Tanrı idi. Hər şey Onun vasitəsilə var oldu, var olan heç bir şey Onsuz olmadı.”

Sözün şərəfinə min illərdir şeirlər yazılır, nəğmələr qoşulur. Söz əbədiyaşarlığını və diriliyini daim qoruyub saxlayır.

Azərbaycan Yazıçılar Birliyinin Sumqayıt bölməsi yarandığı vaxtdan bəri, bölmənin yaradıcısı və uzun müddət rəhbəri olmuş mərhum şair Sabir Sarvanın ideya və təşəbbüsü ilə şəhərimizdə hər il “SÖZ” bayramı keçirilir. Artıq ənənəyə çevrilmiş bu bayram bu il Poeziya Evində gerçəkləşdi.

Tədbir Vətən torpaqlarının bütövlüyü uğrunda canlarını fəda etmiş şəhidlərimizin və dünyasını dəyişmiş qələm adamlarının xatirəsinin bir dəqiqəlik sükutla yad edilməsi ilə başladı.

Poeziya Evinin direktoru İbrahim İlyaslı qonaqları salamlayaraq sözün ilahi gücündən və qüdrətindən danışdı.

AYB Sumqayıt bölməsinin sədri Gülnarə Cəmaləddin ölməz Füzulinin “Söz” qəzəlini səsləndirərək tədbirin məqsəd və məramından bəhs etdi.

Daha sonra söz ədəbi ictimaiyyətin nümayəndələrinə verildi. Ofelya Babayeva, Rauf Qaraişıq, Avtandil Ağbaba, Rafiq Oday, Gülnar Ümid, Akif Amal, Asif Asiman, Zakir Zahir, Elşad Xaqan Davudoğlu, Hikmət Fərzəli, Elçin Nur, Sübhan Quliyev, Mədaxil Cavadlı, İlqar Həbibi, Kəramət Əmirli, Əliyar Mərdiyev, Polad İbrahimoğlu, İlhamə Müslümova, Rəna Təbəssüm, Almaz Ərgünəş Bəyazid, Hafiz Ataxanlı, Cabir Ağaoğlu Albantürk və Əli Niyazbəyli öz ürək sözlərini bölüşdülər, yeni şeirlərini səsləndirdilər.

Tədbirin sonunda AYB Sumqayıt bölməsinin sədri Gülnarə Cəmaləddin təşkilati işlərdə əməyi keçənlərə və iştirakçılara təşəkkürünü bildirdi və Sabir Sarvanın “Mən varam” şeiri ilə “SÖZ–2025” mərasimini yekunlaşdırdı.

Beləliklə, payızın poetik ab-havasına köklənmiş şəhərin şeirli-sözlü bayramı bir daha yaddaşlara həkk olundu və tarixə qovuşdu.

“Ədəbiyyat və incəsənət”

(02.10.2025)

İnci Məmmədzadə, “Ədəbiyyat və incəsənət”

Tərcqmə işi çətin işdir. Xüsuaən də bədii tərcümə. Azərbaycan Yazıçılar Birliyinin üzvü,  Əməkdar incəsənət xadimi Səyavuş Məmmədzadə ən yaxşı tərcüməçilərdən olub. 

1935-ci il oktyabrın 2-də Bakıda müəllim ailəsində anadan olub. Orta məktəbi bitirdikdən sonra ADU-nun filologiya fakültəsində təhsil alıb. Ədəbi fəaliyyətə tələbəlik illərindən başlayıb. "Sınaq" adlı ilk şeiri və A. Əlizadənin şeirinin rus dilinə tərcüməsi 1956-cı ildə universitetin çoxtirajlı "Lenin tərbiyəsi uğrunda" qəzetində dərc olunub.

Həmin vaxtdan "Molodyoj Azerbaydjana" qəzetində mütərcim, sonralar ədəbi işçi işləyib. Onun ədəbi fəaliyyətində poeziya, nəsr, publisistika, bədii tərcümə xüsusi yer tutur. Moskvada M. Qorki adına Ədəbiyyat İnstitutunun bədii tərcümə bölməsini bitirib. Azərbaycan Dövlət Nəşriyyatında redaktor, "Literaturnıy Azerbaydjan" jurnalında ədəbi işçi, tənqid və publisistika şöbəsinin müdiri, Azərbaycan Yazıçılar Birliyində referent-məsləhətçi vəzifəsində işləyib.

Azərbaycan poeziyasından rus dilinə ilk poetik tərcüməsi – Ağacavad Əlizadənin Səməd Vurğuna həsr etdiyi şeiri 1956-cı ildə "Lenin tərbiyəsi uğrunda" qəzetində çıxıb. Azərbaycan klassik və müasir ədəbiyyatından rus dilinə, eləcə də rus, bolqar, Ukrayna, Polşa ədəbiyyatından Azərbaycan dilinə etdiyi tərcümələri dövri mətbuatda çap etdirib.

Bakı şəhəri Səbail rayon İcraiyyə Komitəsi zəhmətkeş deputatları Sovetinin deputatı olub, Azərbaycan Kommunist Partiyasının XXIX qurultayına nümayəndə seçilib. Bolqarıstanda dəfələrlə yaradıcılıq ezamiyyətində olub, klassik macar şairi Endre Adinin anadan olmasının 100 illiyi yubileyində iştirak edən Sovet nümayəndə heyətinin tərkibində Macarıstana gedib.

Əsərləri 

1. Небо

2. Тверской бульвар (повести)

3. Самоутверждение (стихи, переводы)

4. Bir yuxusuz gecə (oçerklər)

5. Ночные яблоки (рассказы)

6. Günəbaxan insanlar (şeirlər)

7. Komendant saatı (şeirlər)

Tərcümələri

(rus dilinə)

1.Кямал Талыбзаде. Аббас Сиххат. Баку: Детюниздат, 1963,

2.Мамед Араз. Пой Аракс. M.: Советский писатель, 1966, 66 стр.

3.Сохраб Тахир. Песня мужества. M.: Советский писатель, 1966, 90 стр.

(bolqar dilindən):

1. Bolqar hekayələri

2. Georgi Strumski. Odlar yurdu

3. Yordan Milev. İnsanlar və səhralar

4. Bolqar çələngi

3 sentyabr 2022 tarixində vəfat edib.

Allah rəhmət eləsin!

“Ədəbiyyat və incəsənət”

(02.10.2025)

Könül, “Ədəbiyyat və incəsənət”

Eşidəndə ki, Azərbaycan tədqiqaçı-alimi Seymur Nəsirov Misir Ərəb Respublikası ilə Azərbaycan Respublikası arasında elmi - mədəni əlaqələrin inkişafında xidmətlərinə görə Misir Təhsil Nazirliyinin medalı ilə təltif olunub, xəbərə sevindik. Və Seymur müəllimlə telefon əlaqəsi yaradıb təfərrüatları öyrəndik. 

Mükafatı Bakıda Misir Mədəniyyət Mərkəzinin direktoru professor Tariq Əbu Əl-Futuh təqdim edib.

S.Nəsirov Misirdə Azərbaycan diasporunun sədri, Misir-Azərbaycan Dostluq Cəmiyyətinin İdarə Heyətinin sədri, Qahirə Universitetində Azərbaycan dili müəllimi, Dünya Azərbaycanlı Alimlər Birliyinin həmtəsisçisi və həmsədridir. Misirdə 23 il ərzində onun rəhbərlik etdiyi müəssisələrdə dünyanın əksər ölkələrindən olan minlərlə tələbə təhsil alaraq ölkələrinə qayıdıb. Hazırda dünyanın 65 ölkəsindən Misirdə təhsil alan 1700-dən çox tələbə bu müəssisələrdə təhsillərini davam etdirirlər.

O, 25 ildən çoxdur ki, ərəb mənbələrində Azərbaycanla bağlı tədqiqatlar aparır. Bu tədqiqatlardan ərsəyə gələn, 250-dən çox əslən azərbaycanlı alim haqqında iki kitabın müəllifidir. S.Nəsirov 1600-dən çox misirliyə Azərbaycan dilini tədris edib. Onun yazdığı məqalələr və elmi-ictimai fəaliyyətlər ərəb mediasında geniş şəkildə dərc olunur.

Qeyd edək ki, Seymur Nəsirov bu ilin sentiyabır ayının əvvəlində Misir Prezidenti Əbdül Fəttah əl-Sisi tərəfindən birinci dərəcəli “Elm və Fənlər” ordeni ilə təltif olunub. Misir Prezidentinin şəxsən özü tərəfindən təqdim olunan bu orden elmin inkişafı və yayılması sahəsində müstəsna xidmətləri olmuş görkəmli alim və maarifpərvər şəxslərə verilir.

“Ədəbiyyat və incəsənət”

(02.10.2025)

İnci Məmmədzadə, “Ədəbiyyat və incəsənət”

Dahi Hüseyn Cavod çox kəşməkeşli bir ömür yaşayıbdır. Faciə, əzab, gərginlik içrə bir ömür. Şübhəsiz, ailəsi də bu çətinliklərə tuş gəlməli olubdur. 

Turan Cavid şair Hüseyn Cavid ailəsində, 2 oktyabr 1923-cü ildə Bakı şəhərində dünyaya göz açıb, 1940-cı ildə Bakı şəhəri 189 N-li məktəbi, 1950-ci ildə isə Azərbaycan Dövlət Teatr İnstitutunu fərqlənmə diplomu ilə bitirib. Müharibə illərində — 1942–1943-cü illərdə Azərbaycan Radio Verilişləri Komitəsində arxivarius, 1943–1944-cü illərdə həmin komitədə məsul redaktor, 1944–1945-ci illərdə Nizami adına Ədəbiyyat Muzeyində kiçik elmi işçi, 1945–1949-cu illərdə Azərbaycan Dövlət Teatr İnstitutunun Teatrşünaslıq fakültəsində baş laborant, 1950–1953-cü illərdə müəllim (1983-cü ilə kimi), 1953–1967-ci illərdə, eyni zamanda C. Cabbarlı adına Azərbaycan Dövlət Teatr Muzeyində elmi işçi, 1968–1991-ci illərdə həmin muzeyin direktoru vəzifələrində çalışıb.

 Hüseyn Cavidin ev muzeyi yarandığı gündən ömrünün sonuna qədər həmin muzeyə rəhbərlik edib. Muzeyin yaradılmasında, eksponatların toplanıb sərgiyə hazırlanmasında, onların tədqiqi və təbliğ edilməsində çox böyük xidmətləri olub.

 Onun gərgin əməyi nəticəsində bu gün muzeyin əsas fondunda 5000, elmi-köməkçi fondlarında isə 300-dən artıq eksponat toplanıb. O, Hüseyn Cavidin ev muzeyinin ekspozisiya və fonotekasını Hüseyn Cavid irsinə aid yeni audio və video yazılarla zənginləşdirib. Turan xanım Hüseyn Cavidin 120 illik yubileyi ərəfəsində H. Cavidin əsərlərini öz qələmindən çıxan kimi, onun üslubunda latın qrafikası ilə nəşr edilməsi üçün böyük zəhmət çəkib 

Turan Cavid "Əməkdar mədəniyyət işçisi" fəxri adına layiq görülmüş, "Əmək rəşadətinə görə" medalı, Azərbaycan Milli Elmlər Akademiyasının "Fəxri Fərmanı" ilə təltif edilmişdir, Azərbaycan Respublikası Prezidentinin fərdi təqaüdçüsü olub. 2004-cü il sentyabrın 12-də ömrünün 81-ci ilində vəfat edib.

Filmoqrafiya

1. Cavid ömrü 

2. Cavidi xatırlarkən

3. Əbədiyyət elçisi

4. Qayıdış 

5. Liderlik missiyası. 1-ci hissə 

6. Memar 

7. Səma şairi 

8. Tikdim ki, izim qala 

9. Topal Teymur 

Allah rəhmət eləsin!

“Ədəbiyyat və incəsənət”

(02.10.2025)

İlqar İsmayılzadə,

fəlsəfə üzrə fəlsəfə doktoru, AJB və AYB-nin üzvü, «Ədəbiyyat və incəsənət» portalının Cənub təmsilçisi

Cəlilabad rayon Veteranlar Təşkilatı tərəfindən Azərbaycan Yazıçılar Birliyinin üzvü, qəzəlxan, şair-dramaturq İman Abdullanın vətənpərvər, ictimai və lirik şeirləri ilə yanaşı Azərbaycanın qəhrəman övladları haqqında qələmə alınmış poemalar toplusu olan "Hədəfdən yayınan güllə", həmçinin əziz şəhidlərimiz barədə qələmə aldığı "Zirvələrə ucalanlar" adlı kitablarıının təqdimatı keçirilmişdir.

Əziz şəhidlərimizin xatirəsini əziz tutmaq hədəfi ilə 1 dəqiqəlik sükutla başlayan, eyni halda AYB və AJB-nin üzvü, tanınmış yazıçı-nasir Meyxoş Abdullahın aparıcılığı ilə keçirilən tədbirdə Cəlilabad rayonunun tanınmış ziyalıları, siyasət, ictimaiyyət, din və media nümayəndələri, şəhid ataları və qazilər, Cəlilabad Rayon İcra Hakimiyyətinin şöbə müdiri qazi Füzuli Cəfərov və Cəlilabad Bələdiyyəsinin sədr müavini Elçin Hüseynov, "TarTvAz" İnformasiya Agentliyinin rəsmisi Marif Bayramov, Qarabağ qaziləri İctimai Birliyinin rayon filialının sədri  Maşalla Əliyev, həmçinin, Cəlilabad ədəbi mühitinin tanınmış nümayəndələrindən: Ədalət Salman, İman Abdulla, Meyxoş Abdullah, Mikayıl İncəçaylı, Gülbala Teymur, Bilal Alarlı, Sakit Üçtəpəli, Qurban Əhməd, Ruhiyyə Abaszadə və İlqar İsmayılzadə yaxından iştirak edərək öz çıxışlarında el şairi İman Abdullanı yeni nəşr olunmuş kitabları münasibəti ilə müəllifi təbrik edib, şəhidlər və qazilər barədə yazılan hər bir kitab, məqalə və yazının dəyərindən söz açdılar. Tarixin unudulmaması və vətənpərvərlik hissinin daim diri saxlanılmasına təkid edilən tədbirdə Ali Baş Komandan Prezident İlham Əliyev və onun qalib ordusunun rəşadətindən danışılmış, şəhidlər və qazilər barədə ərsəyə gəlmiş kitablarla bağlı müəyyən təkliflər irəli sürülmüşdür.

Tədbirdə AYB və AJB-nin üzvü, "Sözün işığı" mətbu orqanının təsisçisi və baş redaktoru, Prezident təqaüdçüsü, yazıçı-publisist, şair Ədalət Salman tərəfindən şair İman Abdullaha Veteranlar Təşkilatının Fəxri Diplomu, həmçinin, fəlsəfə üzrə fəlsəfə doktoru, "Həməşəra" mətbu orqanının təsisçisi və baş redaktoru, AJB və AYB-nin üzvü, "Ədəbiyyat və incəsənət" portalının Cənub təmsilçisi İlqar İsmayılzadə tərəfindən şair İman Abdulla Cəlilabad ədəbi mühitində davamlı və səmərəli fəaliyyətinə görə "Həməşəra" Fəxri Fərmanı, müqəddəs Azərbaycan Bayrağı və Cəlilabad ədəbi mühitinin xanım yazarları barədə ilk dəfə yazılıb çap olunmuş "Qələm tutan incə əllər" təqdimat kitabı təqdim edilmişdir. Tədbir xatirə şəkillərinin çəkilməsi ilə sona çatmışdır.

“Ədəbiyyat və incəsənət”

(02.10.2025)

İnci Məmmədzadə, “Ədəbiyyat və incəsənət”

İncəsənət get-gedə “bozbaş” meyillərə, bayağılığa yönəlir. Birada elitar baletə yer qalmaz belə getsə. 

İslam İslamov 2 oktyabr 1982-ci ildə Bakıda anadan olub. 2000-ci ildə Bakı Xoreoqrafiya Məktəbinin klassik rəqs şöbəsini bitirib. 1998-ci ildən Azərbaycan Dövlət Akademik Opera və Balet Teatrının balet truppasında çıxış edir.

İslam İslamov "Sevil" (Fikrət Əmirov), "Karmen" (Jorj Bize), "Aşıq Qərib" (Zülfüqar Hacıbəyov), "Vaqif" (Ramiz Mustafayev), "Koroğlu" (Üzeyir Hacıbəyov) operalarında solo rəqsləri ifa etmişdir. Onun ifa etdiyi əsas partiyalar:

1. Mitifyo ("Arlezianka", Jorj Bize)

2. Şəhrizad ("Şəhrizad", Nikolay Rimski-Korsakov)

3. Alov rəqsi ("Xəzər balladası", Tofiq Bakıxanov)

4. Oğuz xan ("Eşq və ölüm", Polad Bülbüloğlu)

5. Şah ("Rast", Niyazi)

6. Toreador, Espada və Qaraçı rəqsi ("Don Kixot", Lüdviq Minkus)

7. Şəhriyar ("Min bir gecə", Fikrət Əmirov)

8. Xasay xan ("Qafqaza səyahət", Aqşin Əlizadə)

9. Cahangir xan ("Qız qalası", Əfrasiyab Bədəlbəyli)

10. Məcnunun dostu, Montesinos ("Leyli və Məcnun" və "Don Kixot", Qara Qarayev)

Mükafatları

1. "Qızıl Dərviş" mükafatı

2. "Azərbaycan Respublikasının əməkdar artisti"

3. Azərbaycan Respublikası Prezidentinin mükafatı.

“Ədəbiyyat və incəsənət”

(02.10.2025)