Super User
Qeyri-Hökumət Təşkilatlarına Dövlət Dəstəyi Agentliyi 2026-cı il qrant müsabiqələrini elan etdi
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi 2026-cı il üzrə kiçik, orta və böyük qrant müsabiqələrini elan edib.
Müsabiqələr üzrə QHT-lərin layihə təkliflərinə dair sənədlərin qəbuluna 2025-ci il sentyabr ayının 22-də başlanacaq. Müraciət üçün son tarix 2025-ci il 22 oktyabrdır.
“Ədəbiyyat və incəsənət” portalı Qeyri-Hökumət Təşkilatlarına Dövlət Dəstəyi Agentliyinin sosial media paylaşımına istinadən xəbər verir ki, sənəd qəbulu bitdikdən sonra QHT-lərin təqdim etdiyi layihə təkliflərinə dair sənədlərin ekspertizası aparılacaq, layihələr təhlil ediləcək və qaliblər müəyyənləşdiriləcək. Müsabiqənin nəticələri 2026-cı ilin I rübü ərzində elan olunacaq.
Müsabiqələr Azərbaycan Respublikası Nazirlər Kabinetinin 14 sentyabr 2023-cü il tarixli 327 və 328 nömrəli Qərarlarına uyğun təşkil edilir.
Qrant məbləğlərinin yuxarı həddi və icra müddəti:
• Kiçik qrant müsabiqələri üzrə: 15000 manat (icra müddəti 6 ayadək);
• Orta qrant müsabiqəsi üzrə: 30000 manat (icra müddəti 9 ayadək);
• Böyük qrant müsabiqəsi üzrə: 50000 manat (12 ayadək).
Müsabiqələr aşağıdakı mövzuları ehtiva edir:
1. WUF13 ilə bağlı beynəlxalq təşəbbüslər
Bu istiqamət üzrə QHT-lər yalnız koalisiya şəklində iştirak edə bilər. Əsas tələblər:
- Koalisiya minimum “1 yerli QHT (Azərbaycan Respublikasında dövlət qeydiyyatına alınmış) + 1 xarici QHT” formatına uyğun gəlməlidir;
- Koalisiyada əsas icraçı yalnız yerli QHT olmalıdır;
- Koalisiyanın yaradılması barədə üzv olan bütün yerli və xarici QHT-lər tərəfindən təsdiqlənmiş protokol təqdim olunmalıdır (azərbaycan və ingilis dillərində);
- Koalisiyada təmsil olunan xarici təşkilatlar haqqında ətraflı məlumat təqdim olunmalıdır (təmsil etdiyi ölkə, fəaliyyət sahəsi, təcrübəsi, saytı və s. digər məlumat mənbələri);
- Koalisiyada iştirak edən QHT-lərin işçi heyətinin beynəlxalq formatda layihə idarəetmə təcrübəsi və imkanları olmalıdır;
- 1 QHT yalnız 1 koalisiyada təmsil oluna bilər;
- Koalisiya hər 3 müsabiqəyə (kiçik, orta, böyük qrant müsabiqələrinə) layihələr təqdim edə bilər, bu halda müsabiqə tələblərinə cavab verən layihələrdən yalnız 1-i maliyyələşdiriləcək.
Bu istiqamət üzrə üstünlük verilən məsələlər:
- Əsas icraçı QHT-nin özünün və ya koalisiyada xarici tərəfdaş qismində iştirak edən təşkilatın əvvəlki WUF tədbirlərində beynəlxalq təcrübəsinin olması;
- Xarici tərəfdaş qismində iştirak edən təşkilatın Qlobal Cənub QHT Platforması şəbəkəsində təmsil olması;
- Təqdim olunan layihə ilə bağlı koalisiyada təmsil olunan xarici tərəfdaşdan dəstək məktubunun olması;
- Əsas tədbirin WUF13 zamanı forum məkanında (pavilyonlar, konfrans zalları və forumun digər yan tədbir məkanları) keçirilməsi.
2. Ətraf mühitin və sağlamlığın qorunması, insan alveri ilə mübarizə, ənənəvi ailə dəyərlərinin möhkəmləndirilməsi, həssas qruplarla iş
(Ekoloji məsələlərin həllinə kömək, sağlam və təhlükəsiz həyat tərzinin (narkotik vasitələrin istifadəsi, tütünçəkmə, yoluxucu xəstəliklər ilə mübarizə, yaşıl nəqliyyatın, yol hərəkətinin təhlükəsizliyinin təşviqinə, həssas əhali qrupları (uşaqlar, qadınlar, ahıllar, əlillər, aztəminatlı ailələr, insan alveri qurbanları və s.) ilə işə, erkən nikahlarla mübarizə, məişət zorakılığının, məşğulluq probleminin (xüsusilə qadınların məşğulluğunun) həllinə yönəlmiş, ənənəvi ailə dəyərlərinin möhkəmləndirilməsinə xidmət edən təşəbbüslərə üstünlük verilir)
3. Azərbaycan Respublikasının əsir, itkin düşmüş, girov götürülmüş vətəndaşlarının hüquqlarının müdafiəsi, azad edilmiş ərazilərdə mina və partlamamış hərbi sursatların yaratdığı təhlükə və onunla mübarizə
(Azərbaycan Respublikasının əsir, itkin düşmüş, girov götürülmüş vətəndaşlarının naməlum taleyinin araşdırılması, onların ailələri ilə iş aparılması, dünyanın müxtəlif ölkələrində bu kateqoriyadan olan şəxslərin hüquq və azadlıqlarının birgə müdafiəsi, işğaldan azad edilmiş ərazilərin mina və PHS-dan təmizlənməsinə dəstək verilməsi, təhlükələr barədə əhalinin maarifləndirilməsi, mina qurbanları, onların ailələri ilə iş aparılması, BMT-nin Davamlı İnkişaf Məqsədlərindən biri kimi “minasız dünya”nın müəyyənləşdirilməsi istiqamətində fəaliyyətin təşviqi üzrə təşəbbüslərə üstünlük verilir)
Bu istiqamət üzrə QHT-lər yalnız koalisiya şəklində iştirak edə bilər. Əsas tələblər:
- Koalisiya minimum “1 yerli QHT (Azərbaycan Respublikasında dövlət qeydiyyatına alınmış) + 1 xarici QHT” formatına uyğun gəlməlidir;
- Koalisiyada əsas icraçı yalnız yerli QHT olmalıdır;
- Koalisiyanın yaradılması barədə üzv olan bütün yerli və xarici QHT-lər tərəfindən təsdiqlənmiş protokol təqdim olunmalıdır (azərbaycan və ingilis dillərində);
- Koalisiyada təmsil olunan xarici təşkilatlar haqqında ətraflı məlumat təqdim olunmalıdır (təmsil etdiyi ölkə, fəaliyyət sahəsi, təcrübəsi, saytı və s. digər məlumat mənbələri);
- Koalisiyada iştirak edən QHT-lərin işçi heyətinin beynəlxalq formatda layihə idarəetmə təcrübəsi və imkanları olmalıdır;
- 1 QHT yalnız 1 koalisiyada təmsil oluna bilər;
- Koalisiya hər 3 müsabiqəyə (kiçik, orta, böyük qrant müsabiqələrinə) layihələr təqdim edə bilər, bu halda müsabiqə tələblərinə cavab verən layihələrdən yalnız 1-i maliyyələşdiriləcək;
Bu istiqamət üzrə üstünlük verilən məsələlər:
- Əsas icraçı QHT-nin özünün və ya koalisiyada xarici tərəfdaş qismində iştirak edən təşkilatın müvafiq sahə üzrə beynəlxalq təcrübəsinin olması;
- Təqdim olunan layihə ilə bağlı koalisiyada təmsil olunan xarici tərəfdaşdan dəstək məktubunun olması;
- Əsas tədbirin xarici ölkədə keçirilməsi.
4. Qərbi Azərbaycana qayıdış prosesi
(Qərbi Azərbaycanlıların Qayıdış Konsepsiyasından irəli gələn məsələlərə, dinc yolla qayıdışın insan hüquqları prizmasından təhlilinə dair təşəbbüslərə üstünlük verilir)
Bu istiqamət üzrə QHT-lər yalnız koalisiya şəklində iştirak edə bilər. Əsas tələblər:
- Koalisiya minimum “1 yerli QHT (Azərbaycan Respublikasında dövlət qeydiyyatına alınmış) + 1 xarici QHT” formatına uyğun gəlməlidir;
- Koalisiyada əsas icraçı yalnız yerli QHT olmalıdır;
- Koalisiyanın yaradılması barədə üzv olan bütün yerli və xarici QHT-lər tərəfindən təsdiqlənmiş protokol təqdim olunmalıdır (azərbaycan və ingilis dillərində);
- Koalisiyada təmsil olunan xarici təşkilatlar haqqında ətraflı məlumat təqdim olunmalıdır (təmsil etdiyi ölkə, fəaliyyət sahəsi, təcrübəsi, saytı və s. digər məlumat mənbələri);
- Koalisiyada iştirak edən QHT-lərin işçi heyətinin beynəlxalq formatda layihə idarəetmə təcrübəsi və imkanları olmalıdır;
- 1 QHT yalnız 1 koalisiyada təmsil oluna bilər;
- Koalisiya hər 3 müsabiqəyə (kiçik, orta, böyük qrant müsabiqələrinə) layihələr təqdim edə bilər, bu halda müsabiqə tələblərinə cavab verən layihələrdən yalnız 1-i maliyyələşdiriləcək;
Bu istiqamət üzrə üstünlük verilən məsələlər:
- Əsas icraçı QHT-nin özünün və ya koalisiyada xarici tərəfdaş qismində iştirak edən təşkilatın müvafiq mövzuda beynəlxalq təcrübəsinin olması;
- Təqdim olunan layihə ilə bağlı koalisiyada təmsil olunan xarici tərəfdaşdan dəstək məktubunun olması;
- Xarici ölkələrdə konfransların, beynəlxalq və regional təşkilatlarda yan tədbirlərin təşkili, birgə hesabatların hazırlanması və yayılması.
5. Şəhid ailələri, veteranlar, müharibə iştirakçıları ilə iş
(şəhid ailələri və müharibə iştirakçıları, veteranları ilə iş, hüquqi və psixoloji xidmətin təşkili, Azərbaycan Respublikasının istiqlaliyyətinin, ərazi bütövlüyünün və suverenliyinin bərpası prosesinin təhlilinə, uşaqların və gənc nəslin milli ruhda tərbiyəsinə dair təşəbbüslərə üstünlük verilir);
6. Regionların sosial-iqtisadi inkişafına ictimai dəstək
(İşğaldan azad edilmiş ərazilərdə, Naxçıvan Muxtar Respublikasında tədbirlərin təşkilinə üstünlük verilir)
7. Milli, ictimai və beynəlxalq əhəmiyyətli digər təşəbbüslər (sərbəst mövzu)
(Yuxarıda qeyd olunan istiqamətlər üzrə mövzulardan kənarda qalan, milli, ictimai, beynəlxalq əhəmiyyətli digər bütün təşəbbüsləri əhatə edir. İdeoloji təxribatlara, hibrid təhdidlərə qarşı profilaktikaya, zərərli xarici təsirlərə qarşı sayıqlılığın artırılmasına, təhsilin, mədəniyyətin, ana dilinin saflığının qorunmasının, vicdan azadlığının, qida təhlükəsizliyinin, korrupsiyaya qarşı mübarizənin, ictimai nəzarətin təşviqinə dair təşəbbüslərə üstünlük verilir)
Azərbaycan Respublikası Nazirlər Kabinetinin 14 sentyabr 2023-cü il tarixli, 327 nömrəli Qərarına uyğun olaraq müsabiqə üçün tələb olunan sənədlər:
• layihə təklifi;
• layihənin icra planı;
• layihənin xərclər smetası;
• layihə büdcəsinin maliyyə əsaslandırılması (orta və böyük qrant müsabiqələrinə təqdim edilən layihələrə münasibətdə);
• QHT-nin nizamnaməsinin, qeydiyyat şəhadətnaməsinin və hüquqi şəxslərin dövlət reyestrindən çıxarışının surətləri;
• QHT-nin vergi uçotu haqqında şəhadətnaməsinin surəti;
• QHT-nin səlahiyyətli nümayəndəsinin şəxsiyyətini təsdiq edən sənədin surəti;
• qrant məbləğinin köçürüləcəyi QHT-nin bank hesabı barədə məlumatlar;
• orta və böyük qrant müsabiqələrinə münasibətdə layihə təqdim edən QHT-nin Azərbaycan Respublikası Prezidentinin 2015-ci il 21 oktyabr tarixli 654 nömrəli Fərmanı ilə təsdiq edilmiş “Azərbaycan Respublikasının dövlət büdcəsindən maliyyələşdirilən, fəaliyyət sahələrinə uyğun olaraq Azərbaycan Respublikasının hüquqi və fiziki şəxslərinə, habelə bələdiyyələrə qrant verə bilən qurumların siyahısı”nda nəzərdə tutulan qurumlardan qrant alıb-almaması haqqında məlumat;
• orta qrant müsabiqəsinə münasibətdə layihə təqdim edən QHT-nin son 3 il ərzində fəaliyyəti, həyata keçirdiyi layihələr, habelə proqramlar barədə azı 10 fərqli informasiyanın media subyektlərində yayılmasını təsdiq edən sənəd;
• böyük qrant müsabiqəsinə münasibətdə layihə təqdim edən QHT-nin müvafiq olaraq son 5 il ərzində fəaliyyəti, həyata keçirdiyi layihələr, habelə proqramlar barədə müvafiq olaraq azı 20 fərqli informasiyanın media subyektlərində yayılmasını təsdiq edən sənəd.
Aşağıdakı layihələr müsabiqəyə buraxılmır:
• Məzmunu Azərbaycan Respublikasının Konstitusiyası, Azərbaycan Respublikasının qanunları və digər normativ hüquqi aktları və Azərbaycan Respublikası Nazirlər Kabinetinin 14 sentyabr 2023-cü il tarixli 327 və 328 nömrəli Qərarları ilə ziddiyyət təşkil edən layihələr;
• Əvvəllər keçirilən müsabiqələrin nəticələrinə görə dövlət büdcəsinin vəsaiti hesabına maliyyələşdirilmiş eyni məzmunlu layihələr;
• QHT-nin nizamnamə məqsədlərinə uyğun olmayan layihələr;
• Qrant müqaviləsi üzrə öhdəliklərini pozduğuna görə Agentlik tərəfindən müsabiqədə iştirak hüququndan məhrum edilmiş QHT-lərin layihələri;
• Agentliyin əvvəlki qrant müsabiqələrində qalib olan, öhdəliyi yerinə yetirməyən və debitor borcu olan QHT-lərin layihələri.
Meyarlar:
Texniki ekspertizadan keçdikdən sonra layihələr aşağıdakı meyarlar üzrə 100 ballıq sistem üzrə qiymətləndirilir:
• layihənin məqsədinin aydınlığı;
• layihənin innovativliyi;
• layihənin icra müddətinin əsaslandırılması və davamlılığı;
• layihənin büdcəsinin qrant məbləğinə uyğun olması;
• QHT-nin və işçi heyətin müvafiq layihə mövzusuna uyğun təcrübəsi;
• layihə üzrə risklərin təhlili;
• layihə üzrə benefisiarların düzgün müəyyən edilməsi;
• layihənin icrası zamanı müvafiq tərəfdaşlarla və media ilə əməkdaşlıq;
• QHT-nin təqdim etdiyi layihə mövzusunun nizamnamə məqsədlərinə uyğunluğu;
• layihədən gözlənilən nəticələr.
Texniki tələblər:
• QHT-lər layihə təkliflərini Agentliyin saytında xüsusi bölmə vasitəsilə elektron qaydada təqdim edir (müvafiq bölmə 2025-ci il sentyabr 22-dən oktyabrın 22-dək Agentliyin elektron xidmətlər portalında (e-ərizə bölməsi) aktiv olacaq);
• Şəxsən, poçtla və ya e-poçt vasitəsilə təqdim olunan layihə təkliflərinə dair sənədlər qəbul olunmur;
Tövsiyə
• QHT geniş seçim imkanına malikdir, layihə təklifinin kiçik, orta, yoxsa böyük qrant müsabiqəsinə uyğunluğunu özü sərbəst müəyyən edir, hətta bütün müsabiqələrə uyğun fərqli layihələr təqdim etməkdə məhdudiyyət yoxdur. Lakin nəzərə alınmalıdır ki, Agentlik eyni QHT-nin təqvim ili ərzində kiçik, orta və böyük qrant müsabiqələri üzrə yalnız 1 layihəsini maliyyələşdirilə bilər. QHT-nin seçimini düzgün aparması, 1 layihə təklifi üzrə kiçik, orta və böyük qrant müsabiqələrindən yalnız birinə müraciət etməsi tövsiyə edilir.
Əlaqə vasitələri:
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi,
Yasamal rayonu, Hüseyn Cavid prospekti, 520-ci məhəllə, ev 20.
Bu email ünvanı spambotlardan qorunur. Onu görmək üçün JavaScripti qoşmaq lazımdır.
(+994 12) 493-15-81
“Ədəbiyyat və incəsənət”
(25.08.2025)
Saz: beşikdən məzara kimi…
Əkbər Qoşalı, “Ədəbiyyat və incəsənət” portalının redaktoru
Türk dünyasının görkəmli ədəbiyyat və ictimai xadimi Məmməd İsmayılın “Ruhani” saz havası və özünün anlamlı şeiri ilə haqq dünyasına yola salınması birmənalı qarşılanmamış ola bilər, lakin bu, nə ilk deyil, yəqin nə də son olacaq. Uzağa getməyək, nə vaxtsa, mənim özümüm sonərk etmək fürsətim olsa, bir qızılbarmaq aşığın ifasında “Dilqəmi”ni istərdim…
Demək istəyirəm, Azərbaycanımızda, özəlliklə də Tovuz bölgəsində, ümumən Günbatar bölgəsində bu cür törənlər az olmayıb.
Əslində, burada əsas meyar insanın öz istəyi və doğmalarının münasibətidir. Əgər mərhumun özü belə bir vəsiyyət edibsə, yaxud ailəsi, yaxınları bu ruhani ahəngi münasib biliblərsə – bu, artıq sayğı duyulmalı seçimdir. Biz ərəb deyilik, fars deyilik, türkük və türkün tarixində də, mədəniyyətində də, sənətində də sazın özünəxas uca yeri var. Körpənin beşiyi başında da çalınıb, igidin toyunda da, ərənin, ustadın yasında da… Deməli, saz təkcə musiqi aləti deyil, həm də ruhaniyyətin daşıyıcısıdır.
Bəli, bəziləri bu halı “dini qaydalara zidd” kimi qələmə verir; lakin unutmamalıyıq ki, İslamdan öncə də türk ulusunun özünəxas inanc sistemi, ritualları vardı. Əcdadımız dövlətimizi qutsal bilib, deyərdim, bəlkə məhz bu amal – dövlətçilik uğrunda dinini də dəyişib – bütün səmavi dinləri qəbul edib. Amma sazı, sözü, musiqini heç vaxt yaddan çıxarmayıb, necə deyərlər, davam və inkişaf erdirib. Bu gün də həmin ruhaniyyətin yaşaması, ulusun yaddaşına bağlı qalması təbii sayılmalıdır.
Mənim üçün Məmməd İsmayılın sazla – “Ruhani” havası ilə haqq dünyasına yola salınması təsadüfi deyildi. O, ömrü boyu bütün Türk dünyasına səslənmişdi, sözünün gücü ilə həm Azərbaycana, həm Qafqaza, Anadoluya, Türk dünyasına və nəhayət, uzaq coğrafiyalara yol açmışdı. Bu gün isə onun ruhunun sazla, sazın ruhani nəfəsi ilə yad olunması, uzaq Saxa-Yakutiyadan üzübəri Türk dünyasından qələm yoldaşlarınının, oxucularının minnətdarlıqla, sevgiylə xatırlaması çox anlamlıdır.
Demək istəyirəm, burada ziddiyyət axtarmaq yox, əksinə, həm inancın, həm də milli ruhun, mədəni yaddaşın birləşməsini görmək daha uhulət-suhulətli yanaşma olardı. Çünki bir ustadı haqq dünyasına doğru müşayiət edən saz havası, əslində, bizləri də birliyə, vicdana, haqq-ədalətə çağırır…
“Ədəbiyyat və incəsənət”
(25.08.2025)
Faciəyə tuş gəlmiş unudulmaz ziyalı NƏSİMAN YAQUBLU
İnci Məmmədzadə, “Ədəbiyyat və incəsənət”
Görkəmli ziyalımız, fədakar alimimiz, Cumhuriyyət dönəminin misilsiz tədqiqatçısı Nəsiman Yaqublu ötən il deputatlığa namizəd idi. Ötən ilin bugünkü 25 avqust günündə o, namizəd olduğu 125 saylı Zəngilan-Qubadlı seçki dairəsinin seçiciləri ilə görüşmək məqsədilə Zəngilan rayonuna etdiyi səfərdən geri dönərkən Cəbrayıl rayonu ərazisində idarə etdiyi "Nissan" markalı avtomobillə hərəkətdə olan zaman idarəetməni itirdi və maşını yol kənarına aşırdı.
Nəticədə müxtəlif dərəcəli bədən xəsarətləri alaraq Füzuli xəstəxanasına çatdırıldı. Nəsiman Yaqublu saat 18:30 radələrində Füzuli Rayon Mərkəzi Xəstəxanasının Təcili tibbi yardım şöbəsinə hospitalizasiya olundu, ona qapalı kəllə-beyin travması, döş qəfəsinin küt travması, hemotoraks, sol said sümüklərinin yerdəyişən sınığı, qarın boşluğunun küt travması, travmatik şok diaqnozları təyin edildi. Həkimlərin səylərinə, aparılan tibbi müdaxilələrə baxmayaraq o, saat 18:43-də vəfat etdi. Vəfatı ilə bağlı Bakı Dövlət Universiteti, Varşava Universitetinin Şərqi Avropa Araşdırmaları Mərkəzi başsağlığı dərc etdi. O, 26 avuqst 2024-cü ildə Zabrat qəsəbəsində dəfn olundu.
Beləcə, Azərbaycan öz görkəmli ziyalı oğlunu itirdi.
Azərbaycan Yazıçılar Birliyinin üzvü Nəsiman Yaqublu 1962-ci il fevral ayının 22-də Zəngilan rayonunun Zəngilan kəndində anadan olub. Zəngilan rayonunda orta təhsilini başa vurduqdan sonra Bakı Dövlət Universitetinin Jurnalistika fakültəsinə daxil olub. 1983-cü ildə təhsilini davam etdirmək üçün Rusiyaya gedib, Sankt-Peterburq Universitetinin Jurnalistika fakültəsində oxuyub.
1986-cı ildə Leninqrad Universitetini bitirdikdən sonra Bakıya qayıdıb. "Yazıçı" nəşriyyatında redaktor vəzifəsində çalışıb. 1990-cı ildə stalinizmin azərbaycanlı qurbanları haqqında "Ağrılı ömürlər" kitabını, 1991-ci ildə isə Azərbaycan Xalq Cümhuriyyəti və onun yaradıcısı olan Məhəmməd Əmin Rəsulzadə haqqında əsərini nəşr etdirib. 1992-ci ildə Xocalı faciəsi haqqında "Xocalı qırğını" kitabını yazıb və 30000 tirajla çap etdirib.
Mətbuat tarixi və jurnalistika ilə bağlı da bir çox kitabın müəllifi olub. 1993-cü ildə, Qarabağ Savaşında könüllü olaraq Azərbaycan ordusunda xidmətə başlayıb, "Azərbaycan ordusu" qəzetinin Baş redaktoru vəzifəsində çalışıb. 1993-cü ildən Bakı Dövlət Universitetinin Jurnalistika fakültəsində baş müəllim olaraq fəaliyyət göstərib.
Hacı Zeynalabdin Tağıyev adına Milli Mükafatın və Həsən bəy Zərdabi Mükafatının laueratıdır. Tarixi və publisistik yazıları Azərbaycanda, Türkiyədə və Polşada çap edilib.
Kitabları
1. Ağrılı ömürlər
2. Xocalı qırğını
3. Bakının qurtuluşu
4. Azərbaycanda yaşayan milli azlıqların nəşrləri
Mükafatları
- "Azərbaycan Xalq Cümhuriyyətinin 100 illiyi" yubiley medalı
- "Bakı Dövlət Universitetinin 100 illiyi" yubiley medalı
Allah rəhmət eləsin!
“Ədəbiyyat və incəsənət”
(25.08.2025)
İlk və son görüşümüz – DAVUD NƏSİBİN XATİRƏSİNƏ
Ramiz Göyüş, yazıçı-publisist. “Ədəbiyyat və incəsənət” üçün
Avqustun 25-i Azərbaycan ədəbiyyatı tarixinə şair, tərcüməçi və publisist kimi daxil olmuş Davud Nəsibin doğum günüdür. Yaşasaydı 83 illiyin qeydə edəcəkdi. Düz 22 ildir ki, onun yeni-yeni şeirlərini, publisist yazılarını oxumuruq, duzlu və şirin söhbətlərini eşitmirik.
Kimin yaddaşında necə qalıbsa, elə o boyda, o biçimdə, o görkəmdə, o simada da donub qalıb Davud Nəsib və hələ yaşayacaq onu sevənlərin yaddaşında. Ən azı köç edənədək...
Davud Nəsib ilə ilk tanışlığım telefon vasitəsilə olmuşdu. 2001-ci ilin sentyabr ayı idi. İş telefonum zəng çaldı. Uzun zəng idi. Dəstəyi götürdüm. Xəttin o başında tanımadığım bir səs...
Şirin Qazax ləhcəsində mənimlə hal-əhval tutdu. Sonra isə ərklə özünü təqdim etdi: "Davud Nəsibdi danışan, Eloğlun". Bildirdi ki, mənimlə əlaqə yaratmağı ona Mingəçevirdə yaşayan, mehriban insan, duzlu hekayələr və maraqlı romanlar müəllifi, ümumi tanışımız rəhmətlik Nəsib Bayramoğlu məsləhət bilib. Bir qədər mehriban söhbətdən sonra "Cavanşir" romanının 1-ci cildinin çapdan çıxdığını, bu əsərin, gənclərin vətənpərvərlik tərbiyəsində mühüm rol oynayacağını, hazırda Qarabağ savaşının hələ davam etdiyi bir zamanda aktual mövzu olduğunu nəzərə alaraq, onun Mingəçevirdə yayılmasına tövsiyyə etdi. Eyni zamanda öz avtoqrafı ilə mənə "Cavanşir" romanının bir nüsxəsini göndərdiyini bildirdi. Avtoqrafda yazmışdı: "Eloğlu! Oxu gör Qazağın (Kasak) iyini duya bilsən, mənə işarə elə"
Romanın 2-ci cildinin nəşrindən bir müddət keçəndən sonra ona zəng edib hal-əhval tutdum, çox yüksək əhvalı var idi. Sanki uzun illər içində cücərib göyərən arzuları öz bəhrəsini vermişdi.
Onu Mingəçevirə dəvət elədim və dəvəti məmnuniyyətlə qəbul etdi. Bir neçə gündən sonra artıq Mingəçevirdə idi. Eloğlumuz şair-jurnalist rəhmətlik Amil Aveylə gəlmişdi. Mingəçevirdə olduğu müddətdə demək olar ki, bütün 3 günü bir yerdə olduq.
Onun Mingəçevirdə ilk görmək istədiyi yer Mingəçevir su anbarı idi və biz elə birinci gün su anbarının sahilinə getdik. Davud, bir tərəfə çəkilərək xeyli müddət sulara tamaşa etdi. Mənə elə gəlirdi ki, o öz-özündə nəsə danışır, nəyi isə təhlil edir, nəyinsə haqq-hesabını aparır.
Sonradan bildim ki, niyə o, "Cavanşirsiz Məmləkət" romanının son hissəsində və son vərəqində "Özümüz də qənim kəsildik özümüzə: İçərişəhərin, Ordubadın, Şəkinin, Gəncənin, Qəbələnin, Bərdənin, Kasakın (Qazax), Dərbəndin, saymaqla qurtaran deyil, yatmış yeraltı abidələrinin altını üstünə çevirdik. Bəli, bəli, biz! - Mən, sən, o! Sularda qərq elədik daş dilli naxışları, izləri, Mingəçevirdə" sözlərini niyə yana-yana yazmışdı. Davud Nəsib Mingəçevir su anbarının sularına qərq olmuş qədim Samux dərəsi, onun yerüstü, yeraltı abidələri haqqında ürək ağrısı ilə danışır, Samux vadisini Qafqazın Mesapotomiyası adlandırırdı...
Üç gün çox sürətlə keçdi. Bir tərəfdən o, yeni nəşr etdirdiyi "Cavanşir" və "Cavanşirsiz Məmləkət" romanlarının bədii dəyərindən, onun aktuallığından, gələcək nəsillər üçün əhəmiyyətindən həvəslə danışır, arada duzlu-məzəli söhbətlərə keçir, Xalq şairi Hüseyn Arifin dillər əzbəri olan lətifələrindən söhbət açır, şeir söyləyir, bəzən də bir tərəfə çəkilərək xəyallara dalırdı.
Davud, xalq qəhrəmanı Cavanşir haqqında elə maraqla danışdırdı, sanki onunla bir zamanda yaşamış, qəhrəmanlıqlarının şahidi olmuşdu. Mənə elə gəlirdi ki, Davud öz içində bir Cavanşir obrazı yaratmışdı və tarixi şəxsiyyət olan Cavanşirdən başqa bir də Davudun yaratdığı Cavanşir var idi...
... Cavanşir barədə gələcək planlarından danışır, böyük Vətənimizin bir hissəsi olan Qazaxda at belində abidə ucaldılmasının zəruri olduğunu bildirir, gələcəkdə yazdığı romanlar əsasında bir kinossenari yazacağını və Cavanşir barədə tarixi-bədii film çəkəcəyi barədə həvəslə danışırdı.
Sən demə, bu görüş mənim Davud Nəsiblə ilk və son görüşüm imiş...
***
Davud Nəsib poeziyaya hələ çox gənc yaşlarında - 14 yaşı olanda yazdığı və Qazax rayonunda çıxan "Qalibiyyət bayrağı" qəzetində çap olunan "Mənim doğma çayım, mənim Kür çayım" şeiri ilə gəlib. Onun yaradıcılığına diqqət yetirərkən "ata" mövzusunda yazdığı şeirlər və poemalar istisna olmaqla, adama elə gəlir ki, Davud Nəsib heç uşaq olmayıb və ya uşaqlıq dövrünü yaşamayıb, elə birdən-birə böyük olub. Bu baxımdan Davud Nəsib poeziyası sanki yaşa dolmuş, püxtələşmiş bir şairin poeziyasıdır:
Mən odla, ocaqla alışmamışam,
Qəlbimin odundan alışıram mən.
Dərdimi heç kimə danışmamışam,
Dərdi dərd bilənə danışıram mən.
Davudun şeirlərində Vətənə, elə, obaya, doğma insanlara bağlılıq çox güclüdür. Bu bağlılığı onun yaradıcılığında çox tez-tez duyulur. Belə olmasaydı:
Vətən məhəbbətli, Vətən ünvanlı,
Bir ürək döyünür, köksümün altda -
kimi gözəl misralar yaranmazdı.
Doğma insanlara, ataya, anaya, qardaşa, övlada, qohumlara münasibət, böyük, kiçik yerini, insanların, xüsusən doğma insanların qədir-qiymətini bilmək Davudun genetik yaddaşından, onun tərbiyəsindən, xarakterindən irəli gəlir və bu hisslər onun yaradıcılığından qabarıq keçir.
Və nəhayət bir neçə cümlə Davudun ata mövzusuna həsr etdiyi şeirlər barədə fikirlərimi bölüşmək istərdim. Davudun həyatı haqqında bir qədər məlumatlı olanlar bilirlər ki, o atasını görməyib. Davud hələ dünyaya gəlməmiş atası müharibəyə getmişdi.
Ata həsrətini dünyaya göz açdığı gündən hiss edən Davud böyüdükcə bu nisgili də onun bərabər böyümüş və sonradan onun yaradıcılığında bir mövzuya çevrilmişdir. Fikrimcə, bu mövzu Davudun yaradıcılığında ən çox müraciət olunan mövzudur. Mənim qənaətimcə, Ata həsrətli şeirləri ilə Davud Nəsib poeziyamıza bir "Ata müqəddəsliyi" mövzusu gətirmişdir:
Bilməyənlər qoy bilsin...
...Qoy hamıya deyilsin.
Ata dəlisiyəm mən,
Ata vurğunuyam mən.
Bu dərddən Davud xəstə,
Eşitsin, bilsin hamı.
Mən ölsəm, qəbrim üstə,
Salın yada laylamı:
Çalın mənim mahnımı,
Çalın ata laylamı.
(“Ata laylası”)
Ruhun şad olsun, Davud Nəsib!
Hər zaman xatirimizdəsən.
“Ədəbiyyat və incəsənət”
(25.08.2025)
GÜLTEN AKIN ŞİİR MÜKAFATI – Türkiyədə şeir müsabiqəsinə start verilir
Gülten Akın şiir mükafatı – qardaş Türkiyədə poeziyanı stimullaşdıran növbəti bir törəndir. Mükafatı qazanan şairə 20000 lirə, 100 kitab və plaket təqdim ediləcək. Son müraciət tarixi – 31 dekabr, 2025-ci ildir.
“Ədəbiyyat və incəsənət” portalına mükafatın təşkilat komitəsində təmsil edilən Kərim Özbəklərin verdiyi məlumata görə:
· Yarışmanın mövzusu: sərbəstdir.
· Mükafata qatılacaq şairlər, müraciətin son tarixində 35 yaşını keçməməlidirlər.
· Seçici komitənin üzvləri və Gülten Akın’ın yaxınları mükafata qatıla bilməzlər.
· Namizədlər, kitab bütövlüyü daşıyan və daha əvvəl mükafat almamış bir faylla müraciət edə bilərlər.
· Namizədlər, iştirak etdikləri faylın orijinal olduğunu və mükafat şərtlərini qəbul etdiklərini bildirmiş sayılırlar.
· Namizədlər, fayllarını Word proqramında 1,5 sətir aralığında, 12 punto Times New Roman şrifti ilə, hər səhifənin üzərinə əsərin adını yazaraq PDF formatında göndərməlidirlər. Faylın ilk səhifəsində isə yalnız əsərin adı və rumuz olmalıdır.
· Namizədlər, şəxsiyyət məlumatlarını (ad, ünvan, telefon, şəkil), həyat hekayələrini və hansı rumuzla iştirak etdiklərini göstərən ayrı fayl hazırlayıb göndərməlidirlər.
· Nəşriyyat, münsiflər heyəti qiymətləndirməsini bitirənə qədər mükafata namizəd şairlərin şəxsiyyət məlumatlarını münsiflərlə paylaşmır.
· Mükafat alan şair növbəti il üçün münsif heyətinə seçilmiş sayılır.
· Seçici komitə qiymətləndirməsini 15 Mart 2026-cı ilədək tamamlayır, mükafat nəticəsi 21 Mart Dünya Şeir Günündə Balad Şeir Fondu tərəfindən elan edilir.
· Mükafat alan şairə mükafat, avqust ayında Yozgatın Bahadın qəsəbəsində keçirilən Beynəlxalq Bahadın Mədəniyyət Festivalında təqdim olunur.
· Mükafat alan əsər, mükafat mərasimindən əvvəl Balad Şeir Fondu tərəfindən Kanguru Nəşriyyatı etiketi ilə nəşr olunur. Şairə 20.000 TL, 100 kitab və bir plaket verilir.
· Mükafat bir əsərə verilir, bölünmür və digər namizədlər barədə məlumat verilmir. Bundan əlavə, mükafat alan şair gələcək illərdə yarışmaya qatıla bilməz.
· Mükafata qatılacaq fayllar ən gec 31 Dekabr 2025-ci il tarixinə qədər Bu email ünvanı spambotlardan qorunur. Onu görmək üçün JavaScripti qoşmaq lazımdır. ünvanına göndərilməlidir (müddətdən sonra göndərilən və şərtlərə uyğun olmayan fayllar qiymətləndirilməyəcək).
· Münsiflər:Özkan Mert (münsif başçısı) - Arzu K. Ayçiçek - Gültekin Emre - Engin Fırat - Bircan Çelik - Haydar Eroğlu - İbrahim Canpolat.
“Ədəbiyyat və incəsənət”
(25.08.2025)
Bu gün Xalq şairi Fikrət Qocanın 90 illik yubileyi günüdür
İnci Məmmədadə, “Ədəbiyyat və incəsənət”
Azərbaycan Sovet ədəbiyyatının müstəqillik dönəminə adlayan ən adlı-sanlı şairlərindən, eləcə də ən sonunculardan biri idi Fikrət Qoca. 4 il öncə dünyasını dəyişdi. Bu gün isə onun 90-cı doğum günüdür. Ruhu şad olsun!
Mütləq ondan başlayım ki, bir çox şeirlərinə musiqi bəstələnib. Bunlardan bəziləri illərdir ki, hit mahnılar olaraq qalırlar. "Anacan dostum evlənir", "Könlüm", "Günay", “Çiçək tapa bilmədim", "Gecə yaman uzundur", "Payız gəldi" və əlbəttə ki, Polad Bülbüloğlunun ifa etdiyi"Gəl ey səhər" mahnıları ölməzlik statusu qazanan mahnılardır.
Fikrət Qoca 1935-ci il avqustun 25-də Ağdaş rayonunun Kotanarx kəndində anadan olub. Əsərləri 1956-cı ildən mətbuatda çap edilir. Azərbaycan Radio və Televiziya Verilişləri Komitəsində, "Azərbaycan gəncləri" qəzetində, "Azərbaycan" jurnalında fəaliyyət göstərib, Azərbaycan Yazıçılar Birliyinin beynəlxalq əlaqələr üzrə məsul katibi olub. 1987-ci ildən "Qobustan" incəsənət toplusunun baş redaktoru, 1998-ci ildən Azərbaycan Yazıçılar Birliyinin birinci katibi olub.
Çap etdirdiyi şeir kitablarında vətən məhəbbəti, vətənpərvərlik duyğuları, insan və zaman haqqında düşüncələri öz əksini tapıb. Dünyanın bir çox ölkəsində yaradıcılıq səfərlərində olub, həmin ölkələrə gedən milli azadlıq hərəkatlarına şeirlər həsr edib, o cümlədən Kubanın azadlıq mübarizi Ernesto Çe Gevara ("Ünvansız məktublar"), Qvineya-Bisaunun azadlıq hərəkatı xadimi Amilkar Kabral ("Amilkar Kabral"), Filippinin milli qəhrəmanı Xose Risal ("Xose Risal"), vyetnamlı gənc Li Vi Tom ("Li Vi Tom") və b. haqqında poemalar yazıb.
1990-cı illərdə yazdığı "Oddan keçənlər", "İnsan səviyyəsi", "Adi həqiqətlər" və s. poemalarında Azərbaycanda gedən azadlıq mübarizəsindən bəhs olunur. Onun bir sıra nəsr əsərləri də var. "Ölüm ayrılıq deyil" (1990), "Hələlik, — qiyamətədək" (2000) povestlərində 1990-cı ilin 20 Yanvar hadisələri əksini tapıb. Mixail Lermontov, Taras Şevçenko, Eduard Mejelaytis, İ. Volker, X. Risal, İ. Taufer və b.-ndan tərcümələri var. Əsərləri bir sıra xarici dillərə tərcümə olunub.
Gənclərin qəhrəmanlıq və fədakarlığından bəhs edən "Təkərlər geri fırlanır", "Yaralı çiçəklər" və "Rəssam düşünür" poemalarına görə 1968-ci ildə Azərbaycan komsomolu mükafatına, 1990-cı illər yaradıcılığına görə "Humay" mükafatına (1998) layiq görülüb. Azərbaycan Respublikasının "Şöhrət" ordeni, "Şərəf"ordeni, "İstiqlal" ordeni ilə təltif olunub. Azərbaycan Dövlət Mükafatına layiq görülüb.
Kitabları
1. Qağayı
2. Hamıya borcluyam
3. Yatmadığım gecələrdə
4. Günlərin bir günü
5. Gül ömrü
6. İnsan xasiyyəti
7. Ömürdən səhifələr
8. Mavi dünyanın adamları
9. Taleyin ağır taleyi
Filmoqrafiya
- Uşaqlığın son gecəsi
- Mürafiə vəkillərinin hekayəti
- Qayınana
- Romeo mənim qonşumdur
- Qonşu qonşu olsa...
Mükafatları
Azərbaycan SSR əməkdar incəsənət xadimi
Xalq şairi
"Humay" mükafatı
Azərbaycan Respublikası Prezidentinin fərdi təqaüdü
Azərbaycan Respublikası Prezidentinin fəxri diplomu
Fikrət Qoca 5 may 2021-ci ildə vəfat edib.
Allah rəhmət eləsin!
“Ədəbiyyat və incəsənət”
(25.08.2025)
Türk Mədəniyyəti və İrsi Fondu 13 yaşını qeyd edir
Bu gün Türk Mədəniyyəti və İrsi Fondunun yaranmasından 13 il ötür!
Fond 23 avqust 2012-ci il tarixində Türk Dövlətləri Təşkilatının Bişkek şəhərində keçirilmiş Zirvə Toplantısı zamanı Azərbaycan Respublikası Prezidentinin təşəbbüsü və Qazaxıstan, Qırğızıstan, Türkiyə Dövlət Başçılarının dəstəyi ilə yaradılmışdır.
“Ədəbiyyat və incəsənət” portalı bu 13 illik tarixə, xüsusən son ildəki misilsiz fəaliyyətə diqqət yönəldərək qeyd edir ki, Türk dünyasının ecazkar və günəşli şəhəri Bakıda yerləşən Fond türk xalqlarının sənətkarlıq, folklor, tarix, ədəbiyyat və digər mədəniyyət sahələrində irsinin qorunub saxlanması, inkişafı, möhkəmləndirilməsi və təbliği istiqamətində fəaliyyətini uğurla davam etdirməkdədir
Türk Mədəniyyəti Fondunun prezidenti, Qazaxıstanın və dünyanın tanınmış bəstəkarı Aktotı Raimkulova deyir ki, Türk Mədəniyyəti və İrsi Fondunun yaradılması Azərbaycan Respublikası Prezidentinin təşəbbüsündən qaynaqlanıb, Qazaxıstan, Qırğızıstan və Türkiyə prezidentlərinin dəstəyi ilə Türk Şurasının - indiki Türk Dövlətləri Təşkilatının 23 avqust 2012-ci il tarixində Bişkekdə keçirilən Zirvə Görüşündə qərara alınıb. Yarandığı gündən bu günədək əsas məqsədimiz Türk dünyasının zəngin irsinin və çoxəsrlik tarixinin öyrənilməsi, qorunması və təbliği olmuşdur. Bu missiya çərçivəsində Türk Mədəniyyəti və İrsi Fondu bir sıra mühüm tədbirlərə imza atmış, mədəni əməkdaşlığın genişləndirilməsinə və ortaq dəyərlərin dünyaya tanıdılmasına töhfə vermişdir.
Gələcəkdə də Fond, Türk dövlətləri arasında mədəni əlaqələrin möhkəmləndirilməsi, ortaq türk tarixi və irsinin yeni tədqiqatlarla zənginləşdirilməsi, həmçinin müasir texnologiyalar vasitəsilə daha geniş auditoriyaya çatdırılması istiqamətində fəaliyyətini davam etdirəcəkdir.
Türk dünyasının birliyi və irsi gələcək nəsillər üçün ən böyük mirasımızdır!
Qeyd etdiyimiz kimi, Azərbaycan Prezidentinin təşəbbüsü, Qazaxıstan, Qırğızıstan və Türkiyə Dövlət başçılarının dəstəyi ilə yaradılan, sonradan Özbəkistanla sıralarını genişləndirən, Macarıstan və Türkmənistan ilə bir qədər də genişlənəcəyi gözlənilən bu təşkilat türk xalqlarının milli və mənəvi dəyərlərinin təbliği sahəsində bir çox dəyərli layihələrə imza atır: kitablar nəşr edilir, görkəmli tədqiqatçı alimlərin iştirakı ilə sərgilər, konfranslar təşkil olunur. Türk dünyasının maddi mədəniyyət abidələrinin bərpası sahəsində işlər aparılır.
Xanım Raimkulova söyləyir ki, türk dünyasının tarixini və mədəniyyətini birgə araşdırmaq üçün bütün türk birliklərinin bir araya toplanması və birgə işləməsi üçün əlimizdən gələni əsirgəməyəcəyik.
Əlbəttə ki, bu cür nəcib və lazımlı missiyanı həyata keçirən bu komandaya yalnız uğurlar və uğurlar arzulamaq olar.
“Ədəbiyyat və incəsənət”
(23.08.2025)
Misilsiz skripka ifaçısı
İnci Məmmədzadə, “Ədəbiyyat və incəsənət”
Azərbaycan Respublikasının xalq artisti Zəhra Quliyevanı haqlı olaraq misilsiz skripka ifaçısı hesab edirlər. Onun dilləndirdiyi skripka həqiqətən də lap Paqanini ifası kimi gözəl, mükəmməldir.
Bu gün Zəhra xanım barədə boş yerə danıçmıram. Təqvimdə 23 avqust günüdürsə, demək ki, Zəhra xanım çoxsaylı təbrikləri qəbul edir. Axı bu gün onun doğum günüdür. Ustad sənətkar 74 yaşını qeyd edir.
Zəhra Quliyeva 23 sentyabr 1951-ci ildə Bakı şəhərində anadan olub. Uşaqlıqdan skripkaya olan sevgisi onu bu sehirli çalğı aləti ilə ilk təmasa gətirib və o, bu təmasdan əsla ayrılmayıb. İlk təhsilini 1959–1970-ci illərdə Bülbül adına orta ixtisas musiqi məktəbində alıb. 1970-ci ildə Üzeyir Hacıbəyov adına Azərbaycan Dövlət Konservatoriyasına daxil olduqdan sonra burada Sərvər Qəniyev və M.Tağıyevin siniflərində təhsil alıb və buranı 1975-ci ildə fərqlənmə diplomu ilə bitirib.
Zəhra Quliyeva 1976–1978-ci illərdə N.A.Rimski-Korsakov adına Leninqrad Dövlət Konservatoriyasının aspiranturasında assistent-stajor bölməsində Boris Qutnikovun sinfində təhsilini davam etdirib.
Azərbaycan Dövlət Konservatoriyasında təhsil aldığı müddətdə Rostov şəhərində Azərbaycan bəstəkarlarının əsərlərindən ibarət konsertlə çıxış edib, Leninqrad Dövlət Konservatoriyasında təhsilini davam etdirdiyi zaman isə burada bir sıra konsert salonlarında çıxış edib və Qərb bəstəkarlarının əsərləri ilə yanaşı, Azərbaycan bəstəkarlarının əsərlərini də ifa edib.
O, 1978-ci ildən Azərbaycan Dövlət Konservatoriyasında pedaqoji fəaliyyətə başlayıb. Həmin ildən 1993-cü ilədək burada "Simli alətlər" kafedrasında müəllim işləyib.
1983–1990-cı illər arasında Azərbaycan Dövlət Televiziyasında "Zəriflik" adlı müəllif proqramını yaradır. O, burada həm Azərbaycan, həm də dünya şöhrətli rəssam və musiqiçilərin sənətindən, onların həyat və yaradıcılığından söhbət açır. 1990-cı ildə Zəhra Quliyeva Azərbaycan Musiqi Xadimləri İttifaqının sədrinin I müavini vəzifəsinə təyin olunur. Bu illərdə o, bir sıra konsert qastrol səfərlərinə çıxıb, İngiltərədə Aberdin musiqi festivalında iştirak edib.
Azərbaycana qayıdan Zəhra Quliyeva hazırda ifaçılıq və müəllimlik fəaliyyətini davam etdirir. Bakı Musiqi Akademiyasının skripka kafedrasında, ifaçılıq sinfiylə yanaşı, o, həm də "Skripka sənəti tarixi" fənnindən də tələbələrə məruzələr oxuyur.
Mükafatları
- "Azərbaycan Respublikasının əməkdar artisti" fəxri adı
- Azərbaycan Respublikasının xalq artist
- Azərbaycan Respublikası Prezidentinin fərdi təqaüdü.
“Ədəbiyyat və incəsənət”
(23.08.2025)
Mədəniyyət Nazirliyi tarix-mədəniyyət abidələrinin qorunmasına diqqəti artırmaqdadır
MİNDƏN ÇOX ABİDƏYƏ MƏLUMAT LÖVHƏSİ QURAŞDIRILACAQ
Könül, “Ədəbiyyat və incəsənət”
Mədəniyyət Nazirliyinin mədəni irsimizin qorunub saxlanmasını prioritet hesab etməsi əlbəttə ki, alqışlanan haldır. Nazirlik yanında Mədəni İrsin Qorunması, İnkişafı və Bərpası üzrə Dövlət Xidməti tarix-mədəniyyət abidələrinə məlumat lövhələrinin yerləşdirilməsi ilə bağlı yeni layihənin icrasına başlayıb. Bu barədə Dövlət Xidməti məlumat yayıb.
“Ədəbiyyat və incəsənət” portalı xəbər verir ki, məlumatda layihənin əsas məqsədinin abidələrin mühafizəsinin gücləndirilməsi, bu sahədə ictimai maarifləndirmənin təmin olunması, insanların diqqətinin abidələrin qorunmasına yönəldilməsi, həmçinin abidələrin təbliği ilə qanunsuz müdaxilələrin vaxtında qarşısının alınması olduğu bildirilir.
Mərhələli şəkildə həyata keçiriləcək layihə çərçivəsində 2025-ci il ərzində Bakı şəhəri və bölgələrdə yerləşən 1200-dən artıq abidəyə məlumat lövhəsinin quraşdırılması planlaşdırılır.
Lövhələrdə yer alan bütün məlumatlar Azərbaycan Respublikası Nazirlər Kabinetinin 2 avqust 2001-ci il tarixli, 132 saylı Qərarı ilə təsdiq olunmuş məlumatlar əsasında hazırlanır. Yeni lövhələrdə hər bir tarixi abidənin adı, tarixi, inventar nömrəsi və əhəmiyyət dərəcəsi barədə zəruri məlumatlar öz əksini tapır. Bu da həm yerli sakinlər, həm də ölkəmizi ziyarət edən turistlər üçün abidələrimiz haqqında aydın və etibarlı mənbə rolunu oynayacaq.
Dövlət Xidməti bir daha bütün vətəndaşları tarix-mədəniyyət abidələrinin qorunmasına dəstək göstərməyə, xalqımızın zəngin mədəni irsinin gələcək nəsillərə bütöv şəkildə çatdırılmasına həssas yanaşmağa çağırır.
Əlbəttə ki, çağırışa qoşulmaq hər bir vətəndaşımızın ümdə vəzifəsi olmalıdır.
“Ədəbiyyat və incəsənət”
(23.08.2025)
Ağdərə sakinləri məşğulluqla təmin olunurlar - AKTUAL
Tahirə Ağamirzə, “Ədəbiyyat və incəsənət” üçün
Böyük Qayıdış proqramı çərçivəsində Ağdərə rayonuna köç etmiş vətəndaşların məşğulluq imkanlarının artırılması istiqamətində işlər davam edir.
Doğma yurduna qayıdan sakinlər özünəməşğulluq proqramına cəlb olunaraq müxtəlif istiqamətlər üzrə aktivlərlə təmin edilirlər. Proqram çərçivəsində onlar həm dayanıqlı gəlir mənbəyi formalaşdırır, həm də regionun sosial-iqtisadi inkişafına dəstək olurlar.
Sizlər üçün onlardan bəzilərinin fikrini aldıq.
Aktivlərlə təmin olunmuş Ağdərə sakini Reyhan Həsənova:
-Biz Ağdərə rayonunun Kərəmloi kəndindən məcburi köçkün düşmüşük. Bərdədə yaşamışıq. Yenidən doğma Vətənə qayıtmışıq, burda yaşayırıq. Çox şükür. Allah Prezidentimizin canın sağ, ömrün uzun eləsin. Biz bura köçdükdən sonra Məşğulluq Agentliyinə müraciət elədik. Sağ olsunlar, bizə təsərrüfatda çalışmaq üçün heyvanlar verdilər. Biz də çalışacağıq ki, doğma yurdda heyvandarlığımızı genişləndirək. Öz sahələrimizdə kənd təsərrüfatı məhsullarını əkib-becərək, halal zəhmətimizlə qazanc əldə edək.
Aktivlərlə təmin olunmu Ağdərə sakini Səriyyə Alıyeva:
-Müraciət elədik Məşğulluq Agentliyinə, işsizlikdən əziyyət çəkirdik, çünki ayrı bir gəlir yerimiz yox idi. Çox sağ olsunlar, heyvandarlıqla məşğul olmaq üçün bizə xeyli sayda iribuynuzlu və xırda buynuzlu heyvarlar verdilər. Dövlət Məşğulluq Agentliyinə minnətdarlığımızı bildiririk.
Şəkildə: Ağdəfrə rayonunun Kolatağ kəndinə çatan ilk köç karvanındakı 26 ailəyə mənzil açarları təqdim edilərkən.
“Ədəbiyyat və incəsənət”
(23.08.2025)
