Türkiyənin məşhur teleaparıcısı Acun İlıcalı avtomobil qəzası keçirib.

“Ədəbiyyat və incəsənət” oxu.az-a istinadən xəbər verir ki, iş adamı İstanbulda qarşı tərəfdən gələn avtomobillə toqquşub.

Xəstəxanada aparılan şoumenin ilk yoxlamada qolunun sındığı aşkarlanıb. İlıcalının ümumi səhhətinin yaxşı olduğu bildirilib.

Qeyd edək ki, Acun vaxtilə valideynlərini də yol qəzasında itirib.

Türkiyənin məşhur kino və serial aktrisası Başak Özel 51 yaşında vəfat edib.

“Ədəbiyyat və incəsənət” APA-ya istinadən bildirir ki, aktrisanın vəfat xəbərini sənət dostları sosial şəbəkədə bildiriblər.

Onun vəfat səbəbi qeyd edilməyib.

Xatırladaq ki, aktrisa "Kurtlar vadisi", "İhlamurlar altında", "Melekler adası" kimi böyük televiziya layihələrində yer alıb.

Avropanın ən qədim xanədanlarından biri olan Meklenburq Hersoqluğunun vəliəhd Şahzadəsi Corc Aleksandr Meklenburq Türkiyənin Mersin bölgəsindən olan Hande Macit adlı xanımla ailə qurub.

“Ədəbiyyat və incəsənət” olay-a istinadən xəbər verir ki, cütlük 17 sentyabrda evləniblər.

Almaniyanın şimalında təşkil edilən toyda 200-ü şəxsi qonaq olmaqla, Avropanın siyasi elitasından olan 500 nəfər iştirak edib.

Oktyabrın 14-də M. Maqomayev adına Azərbaycan Dövlət Akademik Filarmoniyasında bəstəkar Cavanşir Quliyevin yaradıcılıq gecəsi keçiriləcək. 

Həmin musiqili gecədə ilk dəfə Mikayıl Müşfiqin faciəvi taleyinə həsr olunmuş “Müşfiq ağıları” adlı oratoriya səslənəcək. Oratoriyanı dirijor Mustafa Mehmandarov və bədii rəhbər Gülbacı İmanovanın rəhbərliyi ilə Ü. Hacıbəyli adına Azərbaycan Dövlət Simfonik Orkestri və Azərbaycan Dövlət Xor Kapellası təqdim edəcək.

Bu il ölkəmizdə Mədəniyyət Nazirliyinin təşkilatçılığı ilə XIV Üzeyir Hacıbəyli Beynəlxalq Musiqi Festivalı keçirilir. Həmin festivalın proqramına uyğun olaraq Milli Kitabxananın əməkdaşları tərəfindən “Müasir Azərbaycan Musiqisinin Banisi: Üzeyir Hacıbəyli” adlı elektron məlumat bazası hazırlanıb.

Kitabxananln yaydığı məlumata görə, elektron məlumat bazası “Rəsmi sənədlər”; “Həyat və yaradıcılığı”; “Həyat və yaradıcılığının əsas tarixləri”; “Görkəmli şəxslər Üzeyir Hacıbəyli haqqında”; “Əsərləri”; “Haqqında”; “Xatirəsinin əbədiləşdirilməsi”; “Mükafatlar”; “Fotoqalereya”; “Filmoqrafiya” və “Videoqalereya” bölmələrindən ibarətdir.

Elektron məlumat bazası ilə tanış olmaq istəyənlər http://anl.az/el/emb/uhacibeyli/index.html linkindən istifadə edə bilərlər.

Sentyabrın 20-də Şuşada Üzeyir Hacıbəyli XIV Beynəlxalq Musiqi Festivalı çərçivəsində konsert proqramı təqdim olunub.

“Ədəbiyyat və incəsənət” AzərTAC-a istinadən xəbər verir ki, əvvəlcə Natəvan, Bülbül və Üzeyir Hacıbəylinin güllələnmiş heykəllərinin qarşısına tər güllər düzüb və Vətən uğrunda canlarından keçmiş şəhidlərimizin xatirəsi bir dəqiqəlik sükutla yad edilib. 

Bütün qonaqları salamlayan Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov qala-şəhərdə belə bir möhtəşəm tədbirlərin keçirilməsinin qürurverici olduğunu bildirib: “Burada istənilən tədbir bizə gözəl hisslər bəxş edir. Gördüyünüz kimi, Azərbaycan mədəniyyətinin paytaxtı Şuşa özünün yeni inkişaf dövrünə qədəm qoyub. Bu gün biz Şuşada milli musiqimizi eşidirik və bu bizi çox qürurlandırır. Bu baxımdan Şuşamızın, ümumən bütün torpaqlarımızın azadlığı uğrunda öz canlarından keçərək, şəhid olmuş əsgər və zabitlərimizin ruhu qarşısında baş əyirik".

Festivalı çərçivəsində keçirilən konsert proqramında bədii rəhbər və dirijor, Xalq artisti Ağaverdi Paşayevin rəhbərliyi ilə Azərbaycan Dövlət Xalq Çalğı Alətləri Orkestri çıxış edib. Üzeyir Hacıbəylinin heykəli qarşısında açıq havada təşkil olunan konsertin solisti, Xalq artisti Fərhad Bədəlbəylidir. Proqramda Üzeyir Hacıbəyli "Koroğlu" operasından uvertüra, eləcə də dahi bəstəkarın tələbələrinin əsərləri yer alıb.

Qeyd edək ki, Azərbaycan xalqının ümummilli lideri Heydər Əliyevin müvafiq Fərmanına uyğun olaraq, dahi bəstəkarın dünyaya göz açdığı gün ölkəmizdə hər il ənənəvi şəkildə Milli Musiqi Günü kimi qeyd olunur. 2009-cu ildən etibarən sentyabr ayında Azərbaycan bəstəkarlıq məktəbinin banisi Üzeyir Hacıbəyliyə həsr olunmuş Beynəlxalq Musiqi Festivalı keçirilməyə başlayıb və dünyada böyük əks-səda doğurub. Həmin ildən başlayaraq ənənə halını almış bu festivalda görkəmli musiqiçilər, bədii kollektivlər, solistlər, dirijorlar iştirak edirlər. 

Şuşa Üzeyir musiqisi üçün çox darıxmışdı. Nəhayət ki, o gün də gəlib çatdı, azad Şuşada Azərbaycan professional musiqi sənətinin banisi, dahi bəstəkar Üzeyir Hacıbəylinin ölməz əsərləri səsləndirilir. Şuşanın dağlarında indi Üzeyir musiqisinin sədası yayılır. Erməni işğalından azad edilən Şuşada belə bir tədbirin keçirilməsi hər bir azərbaycanlının arzusu idi və bu arzu artıq bu gün reallığa çevrildi.

“Cultural Network House” Assosiasiyası (“Mədəniyyət Şəbəkələr Evi”) ötən həftə Türkiyə-Azərbaycan Dostluq, İşbirliyi və Dayanışma vakfının sədri Aygün Attarın rəhbərliyi ilə Azərbaycanda səfərdə olan ATİV, TİKA, Türkiyə Mədəniyyət Nazirliyinin, Türk Tarix Qurumumun təmsilçiləri, ictimai xadimlər, hüquqşünaslar və müxtəlif sahələri təmsil edən elm adamlarından ibarət heyəti öz ofisində qonaq edib.

“Ədəbiyyat və incəsənət” AzərTAC-a istinadən xəbər verir ki, “Köklü keçmiş, güclü gələcək” simpoziumun iştirakçıları, səfərin ikinci günündə “Cultural Network House” tərəfindən təşkil olunan mədəniyyət mübadiləsi gecəsində iştirak ediblər.

Şəhidlərin xatirəsini bir dəqiqəlik sükutla yad olunduqdan sonra, tədbirə ev sahibliyi edən assosiasiyanın sədri Aynur Süleymanzadə qonaqlara assosiasiya və onun ərsəyə gətirdiyi layihələr haqqında ətraflı məlumat verib. 

Mədəniyyət Nazirliyinin Mədəni İrsin Qorunması, İnkişafı və Bərpası üzrə dövlət xidmətinin rəisi Azad Cəfərli öz təqdimatında 30 illik işğal dönəmində Azərbaycanın mədəni abidələrinə vurulan zərər və azad edilmiş torpaqlarımızda yerləşən abidələrin bərpası, qorunması və bu mədəni irsin dünyaya tanıdılması istiqamətində aparılan işlər barədə qonaqları məlumatlandırıb. 

Tədbirdə Qarabağın mədəni abidələrinin işğaldan sonrakı vəziyyəti və bərpasını özündə əks etdirən “Şuşa” kitabının təqdimatı keçirilib.

Qonaqlar "Cultural Network House” Assosiasiyasının fəaliyyətini yüksək qiymətləndirərək, mümkün ola biləcək elm və mədəni işbirliyinin yolları barədə müzakirələr aparıblar.

“Konsert zamanı həddindən çox həyəcanlı idim, bəlkə də bir az bu səbəbdən qüsurlar da var idi. Bir tərəfdən Şuşa, bir tərəfdən Üzeyir bəyə həsr olunmuş konsert, bu, böyük xoşbəxtlikdir. Düşünürəm ki, bu festivalda bir az hüzn də var idi. Mən ikinci hissəni ifa edəndə, o kədərli hissləri çalışırdım yerində çatdırım.”

Bu sözləri jurnalistlərə açıqlamasında Üzeyir Hacıbəyli XIV Beynəlxalq Musiqi Festivalı çərçivəsində Şuşada keçirilən konsertin solisti, Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli deyib.

“Bildiyimiz kimi, bu dəfə məlum hadisələrə görə bu festivalın bütün əyləncə proqramlarını təxirə salmalı olduq. Şuşa daim qonaqlar qəbul etməli bir şəhərdir. Digər ölkələrdən bura turistlər gəlməlidir, bu, çox vacibdir. Çünki biz musiqi ilə yoğurulmuşuq və bizim silahımız musiqidir. Əsgərlərimiz necə döyüşlərdə şücaət göstərirlərsə, biz də öz musiqimizlə sözümüzü deməliyik. O bədxahlar bizim bu cür mötəbər festivallarımızın şahidi olsunlar və görsünlər ki, onlar yaşamırlar. Qoy görsünlər ki, biz necə yaşayırıq, yaradırıq və inkişaf edirik. Mən hər dəfə Şuşaya gələndə yüksək bayram əhval-ruhiyyəsi yaşayıram”.