Super User
Dünya çempionları qalib gəldi, yoxsa məktəblilər?
Şahmat idmandırmı, yoxsa mədəniyyət, ya elm? Bu suallar hey təkrarlanır, amma cavabı tapılmır.
Keçmişdə bu oyuna şətrənc deyirdilər. Dahi Nizami Gəncəvinin əsərlərindən agah oluruq ki, hələ 12-ci əsrdə Azərbaycanda bu oyun çox populyar olub. Bu gün də dünya şahmatında Azərbaycan şahmatçıları öz sözlərini deməkdədirlər. Bizim Teymur Rəcəbovumuz, Şəhriyar Məmmədyarovumuz var. Elə bu günlərdə 20 yaşadək şahmatçılar arasında dünya çempionatının qalibləri, beynəlxalq qrossmeysterlər Abdulla Qədimbəyli və Gövhər Beydullayeva oldular - iki həmyerlimiz.
Bu gün həm ölkəmizin şahmat ənənəsini davam etdirmək, həm də uşaq və yeniyetmələri ən azı zərərli internet təsirindən qoparmaq vacibdir.
Azərbaycan Şahmat Federasiyası və Dövlət Təhlükəsizliyi Xidmətinin Mədəniyyət Mərkəzinin şahmat dərnəyinin təşkilatçılığı ilə məktəblilərin tanınmış şahmatçılarla görüşünün keçirilməsi xəbəri əlbəttə ki sevindirici oldu. Özü də görüşdə elə-belə şahmatçılar yox, 20 yaşadək şahmatçılar arasında dünya çempionatının qalibləri, beynəlxalq qrossmeysterlər Abdulla Qədimbəyli və Gövhər Beydullayeva iştirak edirdilər. Şahmatçılarla şagirdlər arasında eyni anda seans görüşü təşkil olundu. Əlbəttə vacib deyil, neçə lövhədə neçə nəfər çempionlara müqavimət göstərdi. Vacib olanı odur ki, əqil qalib gəldi.
Bu təşəbbüsün digər qurumlarda da dəstəklənməsi çox gözəl olardı.
“Ədəbiyyat və incəsənət”
(28.02.2023)
Azərbaycan xalqının qeyri-maddi mədəni irs nümunələri qanunla tənzimlənir
Azərbaycan xalqının qeyri-maddi mədəni irs nümunələri qanunla tənzimlənir. AzərTAC xəbər verir ki, bununla bağlı məsələ Milli Məclisin Mədəniyyət komitəsinin fevralın 28-də keçirilən iclasının gündəliyinə daxil edilib. Mədəniyyət Nazirliyi və Əqli Mülkiyyət Agentliyinin birgə dinləməsində “Qeyri-maddi mədəni irs haqqında” yeni qanun layihəsi müzakirə edilib.
Bildirilib ki, “Qeyri-maddi mədəni irs haqqında” Qanunun müddəaları Azərbaycan ərazisində Azərbaycan xalqı, ayrı-ayrı sosial qruplar və ya fərdi şəxslər tərəfindən yaradılan, qorunan və nəsildən-nəsilə ötürülən, Azərbaycan xalqının mədəni ənənələrini təmsil edən qeyri-maddi mədəni irs nümunələrinə şamil olunmur.
Qeyri-maddi mənəvi irs nümunələrinin qorunmasının maliyyələşdirilməsinə gəlincə, bu məsələ dövlət büdcəsindən ayırmalar, qeyri-maddi mədəni irs sahəsində fəaliyyətdən əldə olunan gəlir və qanunla qadağan olunmayan digər mənbələr hesabına formalaşacaq.
Qanunun pozulmasına görə şəxslər Mülki və İnzibati Xətalar məcəllələrində nəzərdə tutulan hallarda məsuliyyət daşıyırlar.
“Ədəbiyyat və incəsənət”
(28.02.2023)
Amma iztirablı qadın taleyinin kulminasiyası sözləri boğazımızda düyünlətdi…
Xəyal Rzanın “Maya” filmi ASAN könüllüləri üçün təqdim edildi
Cəmi bir neçə gün öncə Nizami Kino Mərkəzində premyerası olan və dərhal səs salan “Maya” filmi günümüzdə çox aktual olan bir mövzudan bəhs edir: Qarabağ müharibəsindən. Qaçqınlıq, şəhidlik, məhrumiyyət və təhdidlər - bunlarla yanaşı sınmamaq, əyilməmək çabaları… Azərbaycan Yazıçılar Birliyinin mətbuat katibi, şair Xəyal Rzanın “Maya” filmi barədə təbii ki, hələ çox yazılacaq və çox deyiləcək.
Filmə sosial sifariş hədsizdir. Elə bu səbəbdən də “ASAN Könüllüləri” Təşkilatının “Mədəniyyət Carçısı” proqramı çərçivəsində Xocalı soyqırımının 31-ci ildönümü ilə əlaqədar “Maya” filminin ASAN könüllüləri üçün təqdimatı keçirildi. Filmin ssenari müəllifi və rejissoru Xəyal Rza Birinci və İkinci Qarabağ müharibəsinin təsiri altında qalan Azərbaycan qadınının keşməkeşli həyatından bəhs etməklə cəmiyyətə ötürdüyü mesajlardan bəhs etdi.
ASAN-ın mətbuat katibi Elnur Niftəliyev filmə baxdıqdan sonra təəssüratlarını bu cür bölüşdü:
-Xalqımızın, vətəndaşlarımızın başına gələn ağrılı-acılı minlərlə həyat hekayəsindən daha biri. Yaşanmış hekayə, daim yaşayacaq bir hekayə… “Maya”! Əziz dostumuz Xəyal Rzanın ssenari müəllifi və rejissoru olduğu ekran əsəri məhz belə adlanır. Biz iki müharibə görən bir qadının hekayəsini dinlədik, izlədik… Düzünü deyəcəyəm… İlk 10-15 dəqiqədə axı bu hekayə niyə çəkilib deyə düşünürdüm…
Amma əzablı, iztirablı qadın taleyinin kulminasiyası hər birimizi kədərə boğdu, sözlər boğazda düyünləndi… Qürur hissləri isə öz yerində. Xəyal Rza, əhsən!
Filmin operatoru Rafiq Əliyev, operator assistenti Kənan Fərzəliyev, montaj rejissoru Aydan Əhmədova, prodüseri Tahir Tahiroviç, bədii rəhbəri görkəmli kinorejissor, Xalq artisti Oktay Mir Qasımdır.
“Bir gün bütün bağlı qapılar açılar. Bunun üçün sadəcə dözməyin, dözüb də mübarizə aparmağın yetərlidir” deyir “Maya” filmi. Və haqqına deyir.
“Ədəbiyyat və incəsənət”
(28.02.2023)
Azad olunmuş ərazilərdəki mədəniyyət abidələri öz bərpalarını gözləyirlər
Baxırsan, bəzən bir fikir min problemin həllinə rəvac verir, yaxud əksinə, min fikir bir problemin çözülməsini təmin edə bilmir. Azad olunmuş ərazilərin bərpası işi bir sağlam fikirdən qaynaqlanan çox vacib bir məsələdir və bu sahədə 44 günlük müharibədən sonra görülən işlər diqqətçəkəndir.
Bərpa prosesində mədəniyyət abidələrinin taleyi də vacib yer tutur, şübhəsiz, Mədəniyyət Nazirliyinin üzərinə çox ağır və məsul vəzifələr qoyulub.
Milli Məclisin Mədəniyyət komitəsi ilə Mədəniyyət Nazirliyi və Əqli Mülkiyyət Agentliyinin təşkil etdiyi birgə ictimai dinləmələr sözügedən məsələdə müəyyən aydınlıq yaradıb.
Dinləmələr zamanı mədəniyyət nazirinin birinci müavini, mədəniyyət naziri vəzifəsini icra edən Adil Kərimli çox gərəkiyən bir məsələyə toxunub:
“Ucqar kəndlərdə kitabxanaların və orada 20 min kitab fondunun olduğu deyilir, amma baxırsan ki, heç 2 min kitab yoxdur. Kənddə yaşayan əhalinin həmin kitabları oxuyub-oxumaması sualına cavab tapmaq lazımdır. Rayonlarda, ucqar kəndlərdə 7 minə yaxın mədəniyyət müəssisəsi var. Mədəniyyət müəssisələrində çalışan və büdcədən əmək haqqı alan 30 min işçinin hamısı yerlərdədir.
Bəlkə bu yükü azaldıb mədəniyyətin zəruri olan sferasına yönəldə bilərik. Mətbuatda da haqlı olaraq qeyd olunur ki, tarixi mədəni abidələrimiz təhlükədədir. Bu gün 6308 tarixi mədəni abidəmizin 4000-ə yaxını məhz nazirliyin nəzarətindədir. Təbii ki, həmin abidələrə mütəmadi şəkildə investisiya ayrılır. Bu gün işğaldan azad olunmuş ərazilərdə 700-800 tarixi mədəniyyət abidəsi qeydiyyata alınıb və proses davam etdirilir. Onların bərpasına da ciddi ehtiyac var”.
Bəli, göründüyü kimi, problem qoyulur, onun həlli yolları da göstərilir. Qalır, təkcə əməl etmək!
“Ədəbiyyat və incəsənət”
(28.02.2023)
Xalq artisti Mustafa Mərdanovun doğum günüdür
Azərbaycanın kino və teatr səhnəsində maraqlı obrazlar qalereyası yaratmış görkəmli aktyor, Xalq artisti Mustafa Mərdanovun anadan olmasından 129 il ötür.
Tiflisdə anadan olan Mustafa Mərdanov kiçik yaşlarından teatra böyük maraq göstərib, 1910-cu ildən dram dərnəklərində çıxış edib. Daha sonra Tiflisdə Azərbaycan Dövlət Teatrının direktoru vəzifəsində çalışıb. Ali təhsil almağı ən böyük arzusu hesab edən gənc aktyor Moskva Dövlət Teatr Sənəti İnstitutuna daxil olub. Burada sənətin sirlərini öyrənən aktyor 1924-cü ildə Bakıya gəlib və Azərbaycan Dövlət Dram Teatrında fəaliyyətini davam etdirib.
Yüksək aktyorluq texnikası, yumşaq yumor hissi Mustafa Mərdanovun sənəti üçün çox xarakterik olan cizgilər idi. O, teatr səhnəsinə gəlişi ilə milli aktyorluq sənətimizi zənginləşdirib, ona yeni rənglər, çalarlar gətirib.
Mustafa Mərdanov hələ teatrda işlədiyi vaxtlarda tez-tez filmlərdə çəkilmək dəvəti alıb. “Bismillah” filmində Muzdur Qulu obrazı onun kinoda ilk rolu idi. Abbas Mirzə Şərifzadənin ilk rejissor işi olan bu film 1925-ci ildə ekranlara çıxıb. Bir il sonra isə ekranlara Aleksandr Litvinovun “Müxtəlif sahillərdə” filmi çıxıb. Aktyor bu filmdə Abbas rolunda çəkilib. O dövr üçün Mustafa Mərdanovun kinoda ilk böyük rolu isə “Hacı Qara” filmindəki Kərəməli olub. Sonralar aktyor “Sevil” filmində Atakişi, “Lətif” filmində Ələsgər, “İyirmi altı komissar”da menşevik rolunu böyük məharətlə oynayıb.
Onun qardaşı, kinorejissor Səməd Mərdanovun “Kəndlilər” filmi aktyorun yaradıcılığında yeni bir hadisə olub. O, bu filmdə bir-birinə zidd olan iki rolu - kəndli Təhməz və menşevik obrazlarını yüksək sənətkarlıqla yaradıb.
Amma sənətkarın milli kinomuzda ən uğurlu rollarından biri bu gün də tamaşaçılar tərəfindən sevilə-sevilə baxılan “O olmasın, bu olsun” filmindəki “intelligent” Həsən bəy obrazıdır. Bu obraz Mustafa Mərdanovun yeni aktyorluq keyfiyyətlərini üzə çıxarıb.
Sonralar “Əhməd haradadır” filmində oynadığı Məmməd kişi, “Qanun naminə”də Murtuzov rolları görkəmli səhnə ustasını daha da şöhrətləndirib. 1968-ci ildə çəkilən “Qanun naminə” filmindəki rolu aktyorun kinoda son işi olub. Mustafa Mərdanov həmin il dekabrın 12-də dünyasını dəyişib.
Ruhu şad olsun!
“Ədəbiyyat və incəsənət”
(28.02.2023)
Bu gün ikinci çərşənbə - Od çərşənbəsidir
Bu gün ölkəmizdə Od çərşənbəsi qeyd olunur. Bildiyiniz kimi, Novruz bayramı dörd çərşənbəni – Su, Od, Yel və Torpaq çərşənbələrini özündə birləşdirir. Bunlardan ikincisi Od çərşənbəsidir. Su çərşənbəsinin əsas ayinləri su ilə bağlı idi, bugünkü od çərşənbəsində isə şübhəsiz, diqqət mərkəzində od olacaq, yanan şamlar, tonqal olacaq.
İnanclara görə, insan odu nə qədər əzizləsə, bir o qədər yüngül olar, çətinlikləri azalar. Bu çərşənbə qədim insanların Günəşə, oda inamından irəli gəlir. Adət-ənənəyə görə, bu gün insanlar tonqal qalayıb, alovun üzərindən tullanmaqla daxildə olan bütün çirkabı və azar-bezarları yandırırlar.
Od, tonqal istiliyin rəmzidir və yazın gəlişi də havaların isinməsinin əsas göstəricisidir. Od çərşənbəsi günündə qazanlar qaynamalı, ocaqların üstü boş qalmamalıdır. El arasında deyilənə görə, od çərşənbəsində ocağı yandırıb, qazanı qaynatsan ilin sonuna qədər “ocağın yanar, qazanın qaynar” olar. Bir sözlə, ruzi-bərəkətin bol olar. Od çərşənbəsində də su çərşənbəsində olduğu kimi, bütün ailə üzvləri süfrə başına yığılar ki, ailə bütöv olsun. Aş dəmlənər, süfrə açılar, şəkərbura, paxlava bişirilər.
Od çərşənbəsi tədqiqatçılar tərəfindən qədim zamanların əsas dinlərindən olan və Azərbaycan ərazisində yayılan atəşpərəstlik dini ilə bağlanılır. Çünki Zərdüşt tərəfindən yaradılan “Avesta” kitabındakı odun müqəddəsliyi və insanların ona inamı, sitayişi tarix boyu özünü çox güclü göstərib. Bakının Suraxanı qəsəbəsində yerləşən “Atəşgah” məbədi buna əyani misaldır.
Tonqal haqqında ümumi məlumatlara “Kitabi-Dədə Qorqud” dastanında rast gəlmək mümkündür. Burada tonqala münasibət və onun müqəddəsliyi haqqında danışılır. Deməli, hələ qədim zamanlardan Azərbaycanda od həmişə qorunub. Xalqın həm şad, həm də kədərli günündə tonqal köməyə gəlib, müjdəçi, carçı rolunu oynayıb.
Od çərşənbəsinə və oda aid, ümumiyyətlə, bir çox atalar sözləri və məsəllər də vardır. “Odu su ilə söndürmək olmaz”, “Od çərşənbəsində ocağı boş qoymazlar” və s.
Ümumiyyətlə, Novruz bayramı özündə insana və bəşəriyyətə faydalı olan ən gözəl ünsürləri birləşdirərək, əcdadlarımızın dünyagörüşünü, düşüncə tərzini əks etdirir.
Novruz müjdəçiləri olan yel və torpaq çərşənbələrində də torpağımızda ocaqlar çatılacaqdır.
Qeyd edək ki, martın 7-də Yel, martın 14-də isə axırıncı - Torpaq çərşənbəsi qeyd olunacaq. Novruz bayramı axşamı isə martın 20-nə təsadüf edəcək.
Xatırladaq ki, bu il üçün yaz fəslinin Azərbaycana gəlişi martın 21-i Bakı vaxtı ilə saat 01:24:24-ə təsadüf edəcək. Bu zaman gecə ilə gündüz bərabərləşir. Yaz fəslinin uzunluğu 92 gün 17 saat 33 dəqiqə 23 saniyə olacaq.
Od çərşənbəniz mübarək!
“Ədəbiyyat və incəsənət”
(28.02.2023)
Günün fotosu: İran rialı can verir
Günün fotosu: İran rialı can verir
Yanvar ayında İranda inflyasiya 53,4 faizə yüksəlib, son bir ildə İran rialı öz dəyərinin 50 faizini itirib. İndi İranda 1 dollar 600000 riala bərabərdir.
Foto: Euronews
“Ədəbiyyat və incəsənət”
(28.02.2023)
Lütfi Zadənin qeyri-səlis məntiq nəzəriyyəsindən istifadə etməklə hazırlanan kulturoloji formulların faydası
“Simurq” Azərbaycan Mədəniyyət Assosiasiyasının 30 illiyi münasibəti ilə: 5-ci məqalə
“Simurq” Azərbaycan Mədəniyyət Assosiasiyası ciddi elmi, pedaqoji və ekspert potensialına malikdir. İlk olaraq məhz onun tərəfindən Lütfi Zadənin qeyri-səlis məntiq nəzəriyyəsindən istifadə etməklə kulturoloji metodologiya və təhlil metodları, “kulturoloji piramida” universal metodu, “mədəniyyətin iki qanadı”, “mədəni insan”, “firavan ailə”, “mədəniyyətin səmərəliliyi”, “idarəetmənin səmərəliliyi”, “sosial-mədəni tərəqqinin səmərəliliyi”, “humanitar təhlükəsizlik”, “dövlətin rəqabətqabiliyyətliliyi”, “meritokratik tərbiyə və idarəetmə” və digər kulturoloji formullar hazırlanıb. Assosiasiyanın elmi nailiyyətləri sırasında innovativ kulturoloji anlayışları – “mədəniyyətin elmi tərifi”, “mədəni inkişafın amilləri”, “mədəniyyət sosial sistem kimi”, “insan kapitalı inkişaf edən sistem kimi”, “universal mədəni identiklik” və s. misal göstərmək olar. Bu anlayışlar cəmiyyətdə mədəniyyətin düzgün başa düşülməsinə və onun insan inkişafı, cəmiyyətin tərəqqisi üçün yaradıcılıqla istifadəsinə kömək edir.
Kulturoloji tədqiqatların “Simurq” AMA tərəfindən yaradılan innovativ metodologiyası və metodları öyrənilən obyektlərin mahiyyəti, xüsusiyyətləri, tarixi və inkişaf qanunauyğunluqlarının açıqlanmasına, proseslərin və hadisələrin inkişafı metodları və texnologiyalarının, nailiyyətlərin təsdiqlənmiş qiymətləndirilməsinə, bütöv sistem kimi ruhi mədəniyyətin yeni dəyişdirici imkanlarının aşkarlanmasına və gələcəyin proqnozlaşdırılmasına kömək edir.
Assosiasiya tərəfindən innovativ kulturoloji konsepsiyalar, layihələr və modellər – “Azərbaycanda demokratik cəmiyyətin və hüquqi dövlətin formalaşdırılmasına doğru”, “ “Simurq” Azərbaycan Mədəniyyət Assosiasiyası layihəsi”, “Beynəlxalq dünya mədəniyyəti universiteti layihəsi”, ““Simurq” Beynəlxalq kulturoloji jurnalı layihəsi”, “Yüksək mədəniyyətli insan konsepsiyası”, “Beynəlxalq kulturologiya mərkəzi layihəsi”, “ “Zəka” qeyri-hökumət təşkilatları Assosiasiyası layihəsi”, ““Homo Culturalis” antropoloji modeli”, “Azərbaycanda kulturoloji islahatlar layihəsi”, “Azərbaycan 2020: gələcəyə baxış” Milli inkişaf konsepsiyasına” təkliflər, “YUNESKO-nun qlobal kulturologiya üzrə şəbəkə kafedrası konsepsiyası”, “İnsan kapitalının inkişafı Mərkəzi konsepsiyası”, “Şuşada Beynəlxalq kulturologiya mərkəzinin yaradılması konsepsiyası” və başqalarıdır.
Assosiasiyanın konsepsiyaları, layihələri və elmi nəticələri aşağıdakılara kömək edir:
✓ Şəxsiyyətlərin və liderlərin yetişdirilməsinə, sosial, etik, hüquqi və idarəetmə mədəniyyəti, iqtisadi və ekoloji mədəniyyət, sosial-mədəni siyasət sahələrində ən yeni kulturoloji biliklərin, habelə müasir dünyanın mədəniyyətləri və siviliasiyaları, beynəlxalq sosial-
mədəni siyasət haqqında biliklərin yayılmasına.
✓ Rifah, həyat keyfiyyəti və təhlükəsiz inkişaf; gənclərin düzgün sosiallaşması və əhalinin
demokratikləşmə proseslərinə uyğunlaşması səviyyəsinin yüksəldilməsinin əsasları kimi yüksək ruhi mədəniyyətin yaradıcı imkanlarının siyasətçilər və idarəçilər, qeyri-hökumət təşkilatları və biznes strukturları tərəfindən ən yaxşı şəkildə dərk edilməsinə.
✓Peşəkar biliklər və vərdişlərin artımına, yoxsulluğun azaldılmasına təkan verən vətəndaşların sosial fəallığının yüksəldilməsinə, ölkədə davamlı sosial inkişaf və siyasi stabilliyə nail olmağa, münaqişələrin aradan qaldırılmasına və sülh mədəniyyətinin bərqərar olmasına.
Assosiasiyanın bir sıra konsepsiyaları, layihələri və elmi nəticələrinin müasir sivilizasiyada analoqu yoxdur və dövlətin davamlı və enklüziv inkişafı, habelə mədəniyyətlərin və sivilizasiyaların dialoqunun təkmilləşməsi, qloballaşma, sürətli dəyişikliklər və zamanın çağırışları şəraitində ekstremizmin qarşısının alınması baxımından təcrübi maraq kəsb edə bilər.
30 ildən artıq fəaliyyəti dövründə “Simurq” AMA Azərbaycan xalqının ruhi mədəniyyətinin inkişafına və ölkədə rəqabətqabiliyyətli milli insan kapitalının əsasını təşkil edən ləqayətli, yüksək mədəniyyətli insanların yetişdirilməsinə layiqli töhfə verib. Məhsuldar tədqiqatları ilə o, Azərbaycan elmində yeni istiqamətin – kulturologiyanın əsasını qoyub. Onun yaradıcılıq fəaliyyəti Azərbaycan Respublikasının dünya kulturologiya elminin, təhsil və maarifləndirmənin nüfuzlu inkişaf mərkəzlərindən biri kimi tanınmasında önəmli rol oynayıb.
Assosiasiyanın yaradıcılıq fəaliyyətinin qiymətləndirilməsi
Kulturologiya elmi, təhsil və maarifləndirmə sahələrində çoxillik məqsədyönlü fəaliyyətinin nəticələri sayəsində “Simurq” Azərbaycan Mədəniyyət Assosiasiyası beynəlxalq şöhrət qazanıb.
Assosiasiyanın kulturoloji tədqiqatlarının nəticələri dünya mədəniyyətinin tarixi və nəzəriyyəsi, liderlik, üçüncü sektor, konfliktologiya, dünya mədəniyyəti, qlobal idarəçilik, mədəniyyətlərin yaxınlaşması problemləri üzrə Azərbaycan, Norveç, Rusiya, Tatarıstan, Almaniya, Türkiyə, Fransa, Macarıstan, Belçika, ABŞ, Tailand, Cənubi Koreya, Hindistan, İran, Qazaxıstan, Qırğızıstanda keçirilmiş onlarla beynəlxalq konfrans və seminarlarda, forumlarda təqdir edilib.
“Simurq” AMA-nın Azərbaycan və dünya kulturologiyasının inkişafına, dünya mədəniyyəti və beynəlxalq əməkdaşlığın inkişafına verdiyi töhfə müxtəlif illərdə “İntellektual İnkişaf Problemləri” Beynəlxalq Elmlər Akademiyası, Beynəlxalq Pedaqoji və Sosial Elmlər Akademiyası, “Avropa- Asiya” Beynəlxalq Humanitar Akademiya, Beynəlxalq Qlobal Tədqiqatlar Akademiyası,
Beynəlxalq Söz Akademiyası, Rusiya Təbiət Elmləri Akademiyası tərəfindən yüksək qiymətləndirilib.
Bu töhfə həmçinin ABŞ Bioqrafiya İnstitutunun fəxri medalı, Misir Təhsil Nazirliyinin qızıl medalı, Moskva Hökumətinin “Beynəlxalq əməkdaşlığa verilən töhfəyə görə” medalı, YUNESKO Dünya mədəniyyəti İnstitutu və “Avropa-Asiya” Beynəlxalq Humanitar Akademiyasının “Sülh qızılgülü” qızıl medalı, Ümumdünya Braxma Kumaris Ruhi Universitetinin “Cisimsiz ali ruh” ali mükafatı, “Dövrün yaradıcısı” beynəlxalq ordeni, “Sülh Səfiri” fəxri adları (Assosiasiyanın 100-dən çox məşhur üzvü «Ambassador for Peace» beynəlxalq diplomlarına layiq görülüb), bir sıra başqa milli və beynəlxalq ictimai təşkilatların mükafatları ilə təltif edilib.
Beynəlxalq şöhrətin göstəricisi odur ki, Assosiasiya 2000-ci ildə BMT-də Minilliklə bağlı beynəlxalq konfransın plenar iclasında çıxış etmiş və Avropa Şurasının mədəniyyət siyasəti üzrə ekspertlərinin siyahısına daxil edilmişdir. 2014-2018-ci illərdə o, Beynəlxalq Lixaçev Elmi Oxunuşlarının təşkilati komitəsində təmsil olunub. “Simurq”AMA tərəfindən təklif olunan “insanların mədəni identikliyinin formalaşmasına dəstək haqqında” baza prinsipi 2016-ci ildə YUNESKO-nun humanitar təhlükəsizlik üzrə Kazan Bəyannaməsinə daxil edilib.
“Simurq” AMA-nın yaradıcılıq fəaliyyəti Azərbaycan Respublikasının Mədəniyyət və Turiz Nazirliyinin, Təhsil Nazirliyinin fəxri fərmanları, Ailə, Uşaq və Qadınların problemləri üzrə AR Dövlət Komitəsinin diplomları, mədəniyyət işçilərinin Respublika həmkərlar komitəsinin, Azərbaycan Respublikasının Ombudsmanının döş nişanları, “Humay”, “Zəka”, “Qızıl qələm” milli ictimai mükafatları ilə də qiymətləndirilib.
Ədəbiyyat və incəsənət”
(28.02.2023)
Məşhur Kral Milli Baleti Bakıya gələcək
Gürcüstanın dünyaşöhrətli Kral Milli Baleti Avropa və Amerikaya möhtəşəm qastroldan sonra – aprelin 21-də Heydər Əliyev Sarayında “Gürcüstan atəşi” rəqs tamaşasını təqdim edəcək.
“Gürcüstan atəşi” adlı xoreoqrafiya proqramı – ayrı-ayrı rəqs nömrələrindən seçimlər deyil, ümumi ideya və süjet xətti ilə birləşmiş bütöv tamaşadır. Bütün bunlar gözəl kostyumlar və möhtəşəm dekorasiyalar ilə ahəng təşkil edərək tamaşaçının diqqətini özünə çəkir. “Gürcüstan atəşi” tamaşaçıya bənzəri olmayan gürcü mədəniyyəti ilə tanış olmaq və məftunedici rəqs aləminə səyahət etmək imkanı verən rəngarəng lirik şoudur.
Qeyd edək ki, Kral Milli Baleti 2008-ci ildə Gürcüstanda xoreoqraflar Gela Potshişvili və Maya Kiknadze tərəfindən yaradılıb. Gürcü milli rəqs ənənələrini qoruyub saxlayan ansambl novatorluğu və yüksək peşəkarlıq səviyyəsi ilə seçilir.
“Ədəbiyyat və incəsənət”
(28.02.2023)
Onu “Arka sokaklar”dan tanıyırdıq
Türkiyənin məşhur aktyoru Muhlis Asan dünyasını dəyişib
“Ədəbiyyat və incəsənət” qafqazinfo-ya istinadən xəbər verir ki, aktyor infarkt səbəbindən 40 gündür reanimasiyada idi.
Qeyd edək ki, Muhlis Asan "Yedi Numara", "Üvey Baba", "En Son Babalar Duyar", "Sırlar Dünyası", "Arka Sokaklar", "Akasya Durağı" kimi baxımlı filmlərdə rol alıb.
“Ədəbiyyat və incəsənət”
(28.02.2023)
