Super User
“Yaşıl dünya naminə həmrəylik ili” – Gənclər Kitabxanasının növbəti təqdimatı
Könül, “Ədəbiyyat və incəsənət”
Bildiyiniz kimi COP29 - İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası bu il ölkəmizdə keçiriləcək. Üstəlik, 15 may Beynəlxalq İqlim Günü idi. Təbii ki, istənilən aktual mövzunu dərhal gündəminə gətirən Cəfər Cabbarlı adına Respublika Gənclər Kitabxanası bu mötəbər tədbiri də diqqətdən kənar qoya bilməzdi. Yolumu kitabxanadan saldım bu əməkdaşlara maraqlandığım mövzunu izhar etdim. Və dərhal qarşımda COP29-la bağlı o qədər məlumatsız olduğum mətləblər açıldı ki.
Əməkdaşlar bildirdilər ki, kitabxananın Yaşıl dünya naminə həmrəylik ili çərçivəsində elan etdiyi “Təmiz planet-sağlam həyat” layihəsi davam edir. Ötən günkü 15 may Beynəlxalq İqlim Günü ilə əlaqədar isə Respublika Gənclər Kitabxanasında “Yaşıl dünya naminə həmrəylik ili” adlı elektron məlumat bazası hazırlanıb.
Məlumat bazasında Yaşıl dünya naminə həmrəylik ili ilə əlaqədar qəbul edilən rəsmi sənədlər, beynəlxalq ekoloji konvensiyalar, COP29 - İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası haqqında məlumat, rəsmi çıxışların mətni, bu mövzuda çap edilən kitabların, dövrü mətbuat nümunələrinin siyahısı təqdim edillir.
Elektron məlumat bazasında işğaldan azad edilmiş Qarabağ və Şərqi Zəngəzur, eləcə də Naxçıvan Muxtar Respublikasının yaşıl enerji zonası elan olunması, azad edilmiş ərazilərdə “ağıllı şəhər”, “ağıllı kənd” kimi innovativ yanaşmaların tətbiq edilməsi, ekosistemin bərpa olunması kimi məlumatlar da öz əksini tapır.
Kitabxana əməkdaşları tərəfindən hazırlanan elektron bazada “Ulu Öndər Heydər Əliyev və Azərbaycan təbiəti”, “İDEA İctimai Birliyi”, “Ekoloq alimlər”, “Qoruqlar”, “Ekoloji terror”, “Ekoloji təqvim” kimi bir sıra bölmələr nümayiş olunur.
“Yaşıl dünya naminə həmrəylik ili” adlı elektron məlumat bazası kitabxananın rəsmi saytında yerləşdirilib və maraqlananlar tanış ola bilərlər. Mənə isə xüsusilə “Ekoloji terror” bölümü maraqlı gəldi.
Ermənistanın 30 il işğal altında saxladığı Azərbaycan ərazilərində həyata keçirdiyi ekoloji terror təbii ki, misilsiz səviyyədə olub. Meşələr qırılıb, torpağın təki istismar olunub, təbii su mənbələri çirklənməyə məruz qalıb, faunaya divan tutulub. Məncə, bu vandalizmı bacardıqca dünyaya faş etməli, humanizmdən danışan və Qərbdə özünə dəstək axtaran bir xalqın iç üzü aşkar görünməlidir.
“Ədəbiyyat və incəsənət”
(16.05.2024)
“ULDUZ” – Sevimli jurnalın aprel sayında nələr var?
Könül, “Ədəbiyyat və incəsənət”
Gənclər üçün nəzərdə tutulsa da bütün yaş təbəqələrinin sevə-sevə oxuduqları “Ulduz” jurnalının növbəti – aprel sayı işıq üzü görüb. Jurnalı əldə etməyə səbirsizlənsək də daha öncə Baş redaktor Qulu Ağsəsə telefon aşdıq və ona “Aprel “Ulduz”u bizi nələrlə sevindirəcək” sualını ünvanladıq. Qulu Ağsəs bizə aşağıdakıları bildirdi:
“Ulduz” jurnalının aprel sayı Xanım Anelanın “Özüylə söhbəti...” və hekayələri ilə açılır.
“Tənqid” rubrikasında filologiya elmləri doktoru, professor Bədirxan Əhmədli “Üç hekayəyə bir baxış” yazısını təqdim edir. Bu yazı Xalq yazıçısı Anarın 85 illik yubileyi münasibətiylə “Ulduz” jurnalı ilə Ədəbiyyat Fondunun birgə keçirdiyi hekayə müsabiəqsinin qaliblərinin hekayələri barədədir.
Elə hekayələr də bu sayımızda yer alıb. Cavid Babayevin, Orxan Cuvarlının və Xan Abdullanın uğur qazanmış hekayələrini, düşünürəm ki, oxucular böyük maraqla oxuyacaqlar. Yeri gəlmişkən, bu müsabiqənin informasiya dəstəkçisi sizin “Ədəbiyyat və incəsənət” portalınız olub.
“Şeir vaxtı”nda bu dəfə Gülnar Ümid, Seyid Aynur, Kəmaləddin Qədim, Vasif Əlihüseyn, Elnur İrəvanlı, Elman İsgəndərdi.
“Nəsr”də Elçin Hüseynbəyli, Nemət Mətin, Günel Mehri, Məmməd Məmmədli, Xatirə Salahzadənin hekayələrini oxuya bilərsiniz.
“Qısa fikirlər xəzinəsi”ndə ənənvi olaraq dühalar yer alır.
“Tərcümə saatı” Fərid Hüseynin tərcüməsində iraqlı şair Əli Əl–Şəlahın şeirlərini təqdim edir.
“Müsahibə” rublikası Günel Natiqin təqdimatında “SSS: Seyran Səxavətlə söhbət” i oxucularla bölüşür.
“Düzülüş və mövcudluq” essesiylə “Esse”də Sadiq Qarayevdir.
Filologiya üzrə fəlsəfə doktoru Qürbət Mirzəzadə “Adiliyin poeziyası və ya poetik düşüncəsin bənzərsiziliyi” yazısında unudulmaz şairə Fərqanə Mehdiyevanın yaradıcılığından söz açır.
“Dərgidə kitab”da şeirləriylə Xəyal Rzadır.
Bunlar hamısı deyil, “Ulduz”un aprel sayında yeni imzalar, yeni yazılar, yeni baxışlar yolunuzu gözləyir.”
Qulu Ağsəsə təşəkkürümüzü bildirib oxucularımızı “Ulduz” almağa və oxumağa dəvət edirik. Jurnala abunə yazılmaq isə rahat əldə etməyin yeganə yoludur.
“Ədəbiyyat və incəsənət”
(16.05.2024)
III “Kitabqurdu” Yaz Oxu Marafonu çərçivəsində “Buknik” keçirildi
III “Kitabqurdu” Yaz Oxu Marafonu çərçivəsində “Buknik” layihəsi keçirilib.
“Ədəbiyyat və incəsənət” portalı marafonun təşkilatçısı olan Azərbaycan Nəşriyyatlar Assosiasiyasına istinadən xəbər verir ki, 70-dən çox şagirdin, onların valideynlərinin, eləcə də ətraf ərazidə yaşayan sakinlərin iştirakı ilə baş tutan “Buknik” layihəsi kifayət qədər uğurlu alınıb.
Əvvəlcə komandalar şəklində parkın girişində toplanan uşaqlar arasında ünsiyyət təmin edilib. Uşaqlar fəaliyyətin sonunda dostlaşıb, növbəti görüşləri planlaşdırmağa başlayıblar.
Daha sonra oyun məkanında iştirakçılar komandalara bölünüb və aralarında müxtəlif yarışlar keçirilib. Qaliblərə kitab hədiyyələri təqdim ol.
Ardınca komandalar parkın müxtəlif yerlərində quraşdırılan imza köşklərində müəlliflərlə görüşüb, şəkil çəkdirib, kitablarını imzalatdırıb, yeni kitablar haqqında məlumat alıblar.
Sonda aktyor Kamal Yaşarın təqdimatında nağıl saatı baş tutub.
Qeyd edək ki, Azərbaycan Nəşriyyatları Assosiasiyası ilə yanaşı, Təhsilin İnkişafı Fondu və “SİMART” Sağlam İnkişaf Platformasının da təşkilatçılığı ilə keçirilən III “Kitabqurdu” Yaz Oxu Marafonuna 6 – 10 yaşlı uşaqlar qoşula bilərlər.
Daha az yaşı olan uşaqların iştirakı isə valideynin tövsiyə və nəzarəti əsasında mümkündür. Kitablar 6 – 10 yaşlı uşaqlar (ibtidai siniflər) üçün nəzərdə tutulub. İştirakçılar marafonun rəsmi teleqram səhifəsinə qoşulmalıdırlar. Səhifədə kitablar, eləcə də imtahan mərhələsi ilə bağlı məlumatlar paylaşılər.
İştirakçılar seçilmiş 6 kitabı iyunun 25-dək oxumalıdırlar. Müsabiqə iki mərhələdən ibarətdir.
Suallar iştirakçıların mütaliə etdiyi 6 kitab əsasında hazırlanacaq. İmtahanın ilk mərhələsi onlayn qaydada həyata keçiriləcək. Bu mərhələdə ən yüksək göstəriciyə malik on nəfər finala vəsiqə qazanacaq.
Final mərhələsi təyin olunmuş studiyada on nəfər arasında baş tutacaq.
Birinci yeri tutan iştirakçıya 1000, ikinci yeri tutan iştirakçıya 500, üçüncü yeri tutan iştirakçıya isə 300 AZN mükafat, digər 7 nəfərə isə kitab hədiyyələri və sertifikatlar veriləcək.
İştirakçılar marafonda iştirak etmək üçün aşağıdakı kitabları oxumalıdırlar:
- Amin Sükut – “Dovşan nə üçün Yeni il şənliyinə qatılmadı?”
- Elgüsel – “Yumağın macəraları”
- Fatimə Alxaz – “Buku, qaranlıq və Toki”
- Xəyalə Murad – “Bir yarpağın arzusu”
- Sevinc Elsevər – “Novruz nağılı”
- Zahid Xəlil – “Bizim kəndin nağılları”
Marafonun teleqram kanalına bu link vasitəsilə qoşula bilərsiniz: https://t.me/IIIkitabqurdu_marafonu
“Ədəbiyyat və incəsənət”
(16.05.2024)
Füzulinin 530 illiyi bütün türk dünyasında qeyd ediləcək - AKTOTI RAİMKULOVA
“Ədəbiyyat və incəsənət” portalı Türk Mədəniyyəti və İrsi Fondunun prezidenti Aktotı Raimkulovanın fondun növbəti layihəsi olan "Heydər Əliyev və Məhəmməd Füzuli" kitabı barədə fikirlərini diqqətinizə çatdırır.
Türk ədəbiyyatının parlaq ədəbi incilərini yaratmış, türk dünyasının bədii irsini zənginləşdirmiş dahi şair Məhəmməd Füzuli hər əsrlə təzələnən, yeni-yeni mənalar qazanan, heç zaman köhnəlməyən əsərlər yaratmışdır.
Unudulmaz söz ustadının bədii irsi türk dünyasının ortaq ədəbi abidələrindəndir. Zaman keçdikcə biz həmin ədəbi irsin bənzərsiz nümunələrini təkrar-təkrar oxuyur və onların dünəndən bu günə və gələcəyə ünvanlanan dərin mənalı, hikmətli ismarışlar olduğunu anlayırıq.
Məhəmməd Füzuli orta əsr türk ədəbiyyatının ədəbi məktəb yaratmış sənətkarlarındandır və altı əsrdir ki, türk xalqlarının yenilənən nəsilləri onun əsərlərinə müraciət edirlər. Bu xoşbəxtlik dünyada çox az şairə nəsib olur. Ötən altı əsr müddətində dünyanın bir sıra yerlərində yaşayıb-yaratmış Füzuli ədəbi məktəbinin davamçılarının sayı yüzlərlədir və onlar dünyanın ayrı-ayrı coğrafiyalarında ölməz sənətkarın yaradıcılıq yolunu uğurla davam etdirirlər.
Bu il 530 yaşı tamam olan dahi şairin yubileyi Azərbaycanda və bütün Türk dünyasında, o cümlədən müxtəlif ölkələrdə təntənəli şəkildə qeyd ediləcək.
Azərbaycan Respublikasının Prezidenti cənab İlham Əliyev cari ilin 25 yanvar tarixində Məhəmməd Füzulinin 530 illik yubileyinin keçirilməsi ilə bağlı sərəncam imzalamışdır. Sərəncamın mətnindən aydın olur ki, mədəniyyətə və ədəbiyyata daim böyük diqqət göstərən cənab İlham Əliyev Füzuli yaradıcılığını olduqca yüksək qiymətləndirir və onun ədəbiyyat tarixindəki müstəsna rolunu xüsusi qeyd edir.
Eyni zamanda sərəncamda Azərbaycan Xalqının Ümummilli Lideri, görkəmli siyasi xadim Heydər Əliyevin Məhəmməd Füzulinin yaradıcılığının beynəlxalq müstəvidə tanıdılması, adının əbədiləşdirilməsi istiqamətində müstəsna xidmətlərindən bəhs edilir: "Füzulinin yubileyinin UNESCO tərəfindən qəbul edilmiş qərarla beynəlxalq səviyyədə layiqli şəkildə qeyd edilməsi milli dəyərlərin qorunmasına həmişə xüsusi diqqət və qayğı göstərmiş Ümummilli Lider Heydər Əliyevin adı ilə bağlıdır. Ölməz şairin 500 illiyi müstəqil Azərbaycan Respublikasında keçirilən ilk dünya miqyaslı möhtəşəm mədəniyyət və sənət bayramı olmuşdur".
Biz də Türk Mədəniyyəti və İrsi Fondu olaraq daim türk dünyasının maddi və mədəni irsini təbliğ edir, görkəmli sənətkarların əsərlərinin beynəlxalq müstəvidə tanıdılmasına çalışırıq. Fondun növbəti layihəsi olan "Heydər Əliyev və Məhəmməd Füzuli" kitabı dahi şairin ədəbi irsinin tanıdılmasında, adının əbədiləşdirilməsində danılmaz xidmətləri olmuş görkəmli siyasi xadim Heydər Əliyevin bu yöndəki tarixi fəaliyyətinə həsr edilmişdir.
Kitaba Heydər Əliyevin Məhəmməd Füzulinin yubileyləri və adının əbədiləşdirilməsi ilə bağlı fərman və sərəncamları, qüdrətli söz ustadının Bakı, Ankara, Moskva şəhərlərində keçirilən yubileylərindəki nitqləri, həmin tədbirlərə aid fotolar, həmçinin Heydər Əliyevin Məhəmməd Füzulinin 500 illik yubileyi ilə əlaqədar yaradılmış Dövlət Komissiyasının iclaslarındakı çıxışları və digər materiallar daxil edilib.
Həmçinin nəşrdə Heydər Əliyevin Məhəmməd Füzuli irsinin təbliği ilə bağlı gördüyü tarixi işlər haqqında elm xadimlərinin məqalələri yer alıb. Kitabdakı həmin məqalələri görkəmli rəssamların əsərləri müşayiət edir.
Fond tərəfindən Türk dünyasının əbədiyaşar söz sənətkarı Məhəmməd Füzulinin 530 illik yubileyinə həsr edilən bu kitab unudulmaz lider, görkəmli siyasi xadim Heydər Əliyevin işıqlı xatirəsinə ithaf olunur.
“Ədəbiyyat və incəsənət”
(16.05.2024)
Sabah Mədəniyyət Nazirliyi tərəfindən təlim təşkil olunacaq
Sabah - 17 may tarixində Bakı şəhər Mədəniyyət Baş İdarəsi və Abşeron-Xızı Regional Mədəniyyət İdarələrinin tabeliyində olan musiqi, incəsənət məktəb və mərkəzlərinin direktor və direktor müavinləri üçün Mədəniyyət Nazirliyi tərəfindən təlim təşkil olunacaq.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, təlimdə iştirakçılar 70 nəfər olmaqla 6 qrupa bölünəcəklər. Təlim 15 saatlıq olmaqla 5 istiqamət üzrə -"İdarəçinin düşüncə tərzi", "Effektiv ünsiyyət", "Emosional zəka", "Liderin 4 xüsusiyyəti", "SWOT analiz və planlaşdırma" və "Vaxtın idarə edilməsi" mövzularını əhatə edəcək.
Təlim müasir dünya təcrübəsi əsasında, yeni dövrün tələblərinə uyğun rəhbər vəzifəli şəxslərdə peşəkar idarəetmə biliklərinin artırılması, onlara məsul olduğu proseslər və tabeliyində olan işçilərin daha effektli idarə edə bilmə səriştələrini, məktəb idarəetməsində müasir yanaşmalar, mədəniyyət və yaradıcılıq sahələrində idarəetmə bacarıqlarının təkmilləşdirilməsi, həmçinin güclü və zəif tərəfləri, imkanları və təhdidləri müəyyən etmək, təhsildə keyfiyyətin və digər mövzular üzrə bilik və bacarıqlarını artırmasını özündə ehtiva edir.
Təlim başa çatdıqdan sonra iştirakçılara sertifikat veriləcək.
Təlim Prezident İlham Əliyevin 2022-ci il 22 iyul tarixli Sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın Tədbirlər planının müvafiq yarımbəndinə əsasən təşkil olunur.
Onu da qeyd edək ki, ilk analoji təlim mayın 13-də keçirilib.
“Ədəbiyyat və incəsənət”
(16.05.2024)
Ötən gün gənc bəstəkarların yaradıcılığına həsr edilmiş plenumun açılış mərasimi olub
Mayın 15-də “Azərbaycan Bəstəkarlar İttifaqı - 90” silsiləsindən Bəstəkarlar İttifaqının Ü.Haclbəyli Konsert salonunda Gənc bəstəkarların yaradıcılığına həsr olunmuş plenumun açılış mərasimi keçirilib.
“Ədəbiyyat və incəsənət” portalı xəbər verir ki, Bəstəkarlar İttifaqı plenumun ilk gününün gənc bəstəkarların kamera musiqisindən ibarət əsərlərinə həsr olunduğunu bildirib.
Açılış mərasimində çıxış edən Azərbaycan Bəstəkarlar İttifaqının sədri, Xalq artisti, professor Firəngiz Əlizadə 2007-ci ildən etibarən gənc bəstəkarların yaradıcılığına həsr olunmuş doqquz plenumun keçirildiyini qeyd edib. Bununla yanaşı, Bəstəkarlar İttifaqında gənc bəstəkarların yaradıcılığına dair tədbirlərin, onların əsərlərindən ibarət konsertlərin təşkili, İttifaqın digər tədbirlərində fəal iştirakı, görkəmli sənətkarların yubileylərinin keçirilməsi və bu kimi məsələlərdən söhbət açıb. Firəngiz Əlizadə onu da vurğulayıb ki, gənc bəstəkarların təqaüdlərlə təmin olunması, Gənclər Günü ilə əlaqədar olaraq mükafatların verilməsi və bu işdə Bəstəkarlar İttifaqının gənclərə göstərdiyi qayğı və diqqət onların yaradıcılığının inkişafı üçün mühüm əhəmiyyət daşıyır.
Azərbaycan Bəstəkarlar İttifaqının sədri plenumun iştirakçılarının fəal olmasını tövsiyə edib. Sonra plenumun proqramına uyğun olaraq gənc bəstəkarların əsərləri ifa olunub.
Proqrama İlahə Qismət-Abdullanın “Rəngli lövhələr” – fortepiano məcmuəsindən pyeslər, Sevinc Əliyeva-Qəmbərovanın “Payız gecəsində düşüncələr” romansı, 3 hissəli Sonata, Vəfa Bağırzadənin “Mərhəba” romansı, “Bir ümid işığı” violin və piano üçün pyesi, Fərid Fətullayevin “Ay üzlü nigarım” romansı, Tural Məmmədlinin “Ay işığında” piano üçün pyesi, Elvin Quliyevin Skertso-vals (tar, kamança və piano üçün) kimi kamera-instrumental əsərləri daxildir.
Gənc bəstəkarların musiqisini tamaşaçılar da rəğbətlə qarşılayıblar.
Üç gün davam edəcək plenumun növbəti günlərində “Gənc bəstəkarların yaradıcılığı” mövzusunda gənc musiqişünasların çıxışlarından ibarət elmi konfrans (Azərbaycan Bəstəkarlar İttifaqının Konfrans salonu) və gənc bəstəkarların əsərlərindən ibarət simfonik konsert (M.Maqomayev adına Azərbaycan Dövlət Akademik Filarmoniyası) olacaq.
Mayın 20-də isə plenumun nəticələri ilə bağlı Azərbaycan Bəstəkarlar İttifaqında dəyirmi masada müzakirələr keçiriləcək.
“Ədəbiyyat və incəsənət”
(16.05.2024)
Ölkəmizdə beynəlxalq incəsənət simpoziumu keçirilir
Ölkəmizdə Bakı 2024 - Beynəlxalq incəsənət simpoziumu keçirilir.
AzərTAC xəbər verir ki, tədbir Azərbaycan Rəssamlar İttifaqı və Beynəlxalq Rəssamlar Klubu tərəfindən təşkil olunub.
Simpoziumda müxtəlif ölkələrdən olan rəssamlar iştirak edir. Tədbir rəssamlar arasında canlı ünsiyyət və təcrübə mübadiləsi üçün unikal məkan olacaq, eləcə də ölkələr arasında mədəni zənginləşməni və qarşılıqlı anlaşmanı təşviq edəcək. İştirakçılar tədbir boyu onları müşayiət edəcək yaradıcılıq və ilham atmosferinə qərq ola biləcəklər.
Mayın 24-dək davam edəcək simpoziumun başa çatması münasibətilə sərgi açılacaq. Sərgidə simpozium zamanı rəssamların yaratdığı əsərlər təqdim olunacaq.
“Ədəbiyyat və incəsənət”
(16.05.2024)
Frankfurt sərgisində Azərbaycanın turizm potensialı təbliğ edilir
Almaniyada turizm peşəkarlarının ən böyük görüş yerlərindən olan “IMEX Frankfurt 2024” sərgisi keçirilir.
AzərTAC xəbər verir ki, Azərbaycandan olan bir qrup turizm şirkəti beynəlxalq sərgidə ölkəmizi təmsil edir.
“IMEX Frankfurt” beynəlxalq sərgisində ölkəmizin turizm potensialı və bu il Bakıda keçiriləcək COP29 barədə məlumatlar həmsöhbət tərəfdaşlara çatdırılıb.
“IMEX 2024” sərgisində dünyanın 200 ölkəsindən 2500-dən çox turizm şirkəti və digər təşkilatlar stend və pavilyonla iştirak edir. Mayın 16-dək davam edəcək sərgini 15 mindən çox beynəlxalq peşəkar turizmçinin ziyarət edəcəyi gözlənilir.
Azərbaycanın bu cür tədbirlərdə iştirak etməsi xarici sərmayələrin cəlb olunması və ölkəmizin dünya turizm bazarında görüşlər məkanına çevrilməsinə xidmət edir.
Xatırladaq ki, MICE tipli sərgilərin məqsədi görüşlər, təşviqlər, konfranslar və sərgilərin təşkilidir.
“Ədəbiyyat və incəsənət”
(16.05.2024)
İntizar ədəbiyyatı - Mədinə Gülgün, "Təbrizi görməyincə"
Təqdim edir: Heyran Zöhrabova, “Ədəbiyyat və incəsənət”
Könlümdə tufan olar,
Könlüm boşalar,dolar,
Könlüm yollarda qalar
Təbrizi görməyincə.
Sazdan,neydən betərəm,
Nə susar,nə yataram.
Dərdli-dərdli ötərəm
Təbrizi görməyincə.
Bilin ey əzizlərim.
Yuxu görməz gözlərim.
Alov saçar sözlərim
Təbrizi görməyincə.
Sınasınlar kaş məni.
Bu torpaq doğmuş məni.
Yormaz yol,yoxuş məni,
Təbrizi görməyincə.
El dərdinə qalanam,
Hər gün oda qalannam.
Vüsal deyib dolannam.
Təbrizi görməyincə.
Sözlə doludur sinəm.
Şam deyiləm mən sönəm.
Bir dərdli quşa dönəm.
Təbrizi görməyincə.
Qırılmazdır qanadım.
Məni yaşadar andım.
Belə keçər həyatım
Təbrizi görməyincə.
Hələlik gəlmirəm mən,
Kamımca gülmürəm mən.
Ölmərəm,ölmərəm mən
Təbrizi görməyincə.
“Ədəbiyyat və incəsənət”
(16.05.2024)
“YAŞAT” Fondu tərəfindən dəstək tədbirləri davam edir
Abbas Əliyev Vətən müharibəsinə könüllü olaraq qatılıb. Cəbrayılın, Füzulinin, Xocavəndin azadlığı uğrunda gedən döyüşlərdə iştirak edib. Xocavənddə döyüşlər zamanı şəhidlik zirvəsinə ucalıb.
“YAŞAT” Fondunun əməkdaşları şəhidimizin ailəsini ziyarət edib, övladının təhsil aldığı məktəbə baş çəkiblər. Bu barədə “Ədəbiyyat və incəsənət” portalına “YAŞAT” fondundan məlumat verilib.
“Ədəbiyyat və incəsənət”
(15.05.2024)