Super User
Mədəniyyəti spirtli içki və siqaretin hesabına qaldırmaq olarmış
Elman Eldaroğlu yazır
Uzun illərdir ki, aktyor kimi çalışır. Həm teatr və həm də kinoda müxtəlif obrazlar yaradıb. Təhminə və Zaur filmində oynadığı “Spartak” rolu ilə tamaşaçıların sevgisini qazanıb, məşhurlaşıb. Özünü şanslı sayır- bir sıra uğurlu filmlərdə rol alıb, zəif filmlərə çəkilməyib. Qəribə xüsusiyyətləri çoxdur, hər əsərdə rol almağa cəhd etmir və hər kəslə tərəf müqabili olmaq, hər rejissorun filmində çəkilmək istəmir. Bu xüsusiyyətinə görə çoxları onu kaprizli adam hesab edir, amma özü bunu tələbkarlıq kimi dəyərləndirir...
Haqqında söhbət açdığım Füzuli Hüseynov 1962-ci ildə Balakən rayonunda dünyaya gəlib. 1984-cü ildə M.A.Əliyev adına Azərbaycan Dövlət İncəsənət İnstitutunun Dram və kino aktyoru fakültəsini bitirib. Sonra Azərbaycan Dövlət Akademik Milli Dram Teatrına işə götürülüb. O vaxtdan bu günədək həmin teatrda çalışır. Həm teatrda və həm də filmlərdə müxtəlif obrazlar yaradıb. Azərbaycan Respublikasının əməkdar artisti fəxri adına layiq görülüb, bir neçə ildir ki, Prezident təqaüdü alır...
Deyir ki,- “Nədənsə dəqiq elmlərə heç vaxt həvəsim olmayıb. Etiraf edirəm ki, məhz bu səbəbdən sənədlərimi incəsənət institutuna verdim. Yəni bu sənətə tam təsadüfi gəlmişəm. Heç ailəmizdə də, məndən savayı, ömrünü incəsənətə bağlayan ikinci kimsə yoxdur...”
Xeyli vaxtdır ki, “sehirli qutuda” görünmür. Səbəbini özünəməxsus təmkinlə belə izah edir:- “Mən şou adamı deyiləm və o verilişlərə çıxmıram. Bir də çox heyiflər olsun ki, addım-addım irəliyə getmək əvəzinə, qaçaraq geri getdiyimiz seriallar ortaya çıxır. Təbii, içində normal olanı da var. Hər halda bunları ayırmaq lazımdır, artıq ələkdən keçirmək dövrdür. Bu işi professionala vermək lazımdır, çünki professional adamlar bir az sakit olurlar, özlərinə qapanırlar. Hər halda, onlardan xahiş etmək lazımdır ki, gəlib bu işi öhdələrinə götürsünlər. Ümumiyyətlə, bu kino, serial, teatr sahəsini çox normal yollarla yoluna qoymaq olar. O gün İctimai Televiziyada kino ilə bağlı problemlərdən danışırdılar. Hamının dediyindən belə çıxır ki, maddi tərəfin günahıdır. Bu, doğrudur, çünki maddi tərəfimiz kəsrdədir, ona görə də alınmır. Hələ Lenin demişdi ki, incəsənətin içində ən bahalısı, qiymətlisi kinodur. Bu, bahalı peşədir, amma kinonun görə biləcəyi işi heç bir siyasətçi görə bilməz. Bu baxımdan mən bir neçə dəfə təklif etdim ki, bəzi Avropa ölkələrində olduğu kimi, dövləti bu yükdən azad etmək üçün bir fond yaradılsın, adını nə istəyirsiniz qoyun. Hər satılan spirtli içki şüşəsindən 50 qəpik və hər çəkilən bir qutu siqaretdən 5 qəpik bu fond üçün ayrılsın. Bunu da biz dostlarla hesabladıq, ayda hardasa 6-7 milyon pul edir. Bu məbləğ filmlərin çəkilişinə, gənclərin oxumasına xərclənsin. Sonra professionallardan ibarət bir komissiya düzəldilsin, ssenarilər gəlsin, oxusunlar, fikirlərini bildirsinlər, yəni onlara maaş verərək bunları etmək olar. Təbii ki, bunu etməyəcəklər. Təsəvvür edin, ayda 5-6 milyon pul yığılacaqsa, bununla nələr etmək olmaz. Səhv etmirəmsə, Avstriyada 17 teatr var, onların illik büdcəsi 15 milyon avrodur. Bizdə isə 27-28 teatr var. Əvvəllər ümumi mədəniyyət sahəsinə ayrılan məbləğ 6 milyona yaxın idi. Bununla dövlət yalnız işçilərin maaşını verə bilər, amma qalan şeylərin hamısını bu fond edə bilərdi, vergidən də azad olmaq şərtilə. Ən azı 1-2 ilə bu sahəni çox yüksək səviyyəyə qaldırmaq olar, çünki bacarıqlı gənclərimiz var. Onların hərəsinə 50 min pul verəcəksən ki, gedin 15-20 dəqiqəlik film çəkib gətirin. Şükür Allaha ki, ustad sənətkarlarımızın bir çoxu hələ də yaşayır. Onları bir yerə toplayıb bir komissiya yaradılsın və həmin komissiya kimin filminin daha maraqlı, səviyyəli olduğunu təyin etdikdən sonra həmin qalibin inkişafı üçün nə lazımdırsa edilsin. Deyək ki, Hollivuda, Bollivuda, “MosFilm”ə gedib 6 aylıq kurs keçməlidir, onu maliyyələşdirmək olar ki, gedib öyrənib gəlsin...”
Nə qədər haqlı olduğunu deyə bilmərəm, amma doğrudan da Azərbaycan teatr və kino sənətini dirçəltmək, köhnə şöhrətini özünə qaytarmaq vacibdir...
Deyir ki,- “Götürək bizim serialları. Adam nə qədər eyni mövzuya baxar? Filan oliqarxın evində tərbiyəsizlik, bu onu vurdu, o bunu öldürdü - real heç nə yoxdur. Yazıçılarımız, başbilənlərimiz deyirlər ki, bizim qədər tarixi, mədəniyyəti olan ikinci bir dövlət yoxdur. Şərait yaradılmalıdır ki, ssenaristlər bu haqda yazsınlar. Hazırda kimin ağlına nə gəldi, qələmə alır. Anormal, köpük operalarıdır. Deyirlər ki, pulumuz azdır. Qardaşım, pul yoxdur, çəkmə də! Səni kim məcbur edir? Düzdür, bəzi filmlərimiz festivallarda iştirak edir. Digər tərəfdən, sizə bildirim ki, hər gün haradasa festival keçirilir. Kiməsə diplom verilir. Diplom almaqla kinonun, teatrın siması dəyişirmi? Əlbəttə yox. Artıq neçə ildir ki, "MAP" teatr festivalı keçirilir. Bu çox gözəldir. Maraqlı tamaşalar olur. Bakının teatral şəhər adını qazanması hamımıza xeyir gətirməzmi? Gəlin, bunun üçün çalışaq...
Mənim anlamıma görə, teatr sərbəst və azad olmalıdır. Təəssüf ki, bu cür yanaşma bizdən hələ çox uzaqdır. Peşəkar rejissor və dramaturqların yoxluğundan həmişə şikayət edirlər. Amma mən hesab etmirəm ki, ölkədə yaxşı dramaturq yoxdur. Ola bilər ki, azdır, fəqət bu “yoxdur” demək deyil. Məncə, rejissorlara münasibət dəyişilməlidir. Onlara şərait yaradılmalıdır. İmkan verilməlidir ki, sifarişlə yox, istədikləri əsəri səhnələşdirsinlər. Ümid edirəm ki, 80-ci illərdə gördüyüm teatrın imici nə vaxtsa geri qayıdacaq. Ümumiləşdirib onu da deyim ki, bəli Azərbaycan teatr, kino sənəti bu gün öz tənəzzül dövrünü yaşayır...”
Tələbkar olduğundan hər adam onunla dostluq edə bilmir. Əslində o, sadiq dostlara qarşı çox diqqətlidir, nəvazişini onlardan heç zaman əsirgəmir. Maraqlı həyat tərzi, eləcə də öz şəxsi prinsipləri var. Boş vaxtlarında balıq tutmağı xoşlayır, necə deyərlər, bu hobbidən yaranan ehtiyacını təmin etmək üçün, hətta xüsusi olaraq Rusiyanın Astraxan vilayətinə də gedir. Bir sözlə, əməkdar artist Füzuli Hüseynov məzmunlu adamlardandır, mənalı ömür sürür. Müdriklər kimi, dünənə ötüb keçən, əlçatmaz həqiqət, sabaha isə qismət olacaq güman, ümid kimi baxmağı bacarır və ən başlıcası bu gününü zövqlə yaşayır...
Bu gün - sentyabrın 9-u Füzuli Hüseynovun 60 yaşı tamam olur. Bu münasibətlə Onu təbrik edir, möhkəm cansağlığı arzulayırıq.
Yubileyiniz mübarək!
"Kimin qapısını döyüm ki, mənə sponsorluq et?
“Ədəbiyyat və incəsənət” portalı tanınmış aktyor və aparıcı Azər Axşamın moderator.az saytına müsahibəsini Daycest bölümündə təqdim edir.
-Azər bəy, yeni televiziya mövsümünə necə hazırlaşırsınız?
- Mən artıq heç nə gözləmirəm. Əvvəllər nəsə gözləyirdim, indi isə nə veriliş varsa onu da aparmaq məcburiyyətində qalırsan. Çünki söylədiyin fikirlər, ideyalar onsuz da həyata keçmir. Nə verəcəklər, onu da yeyəcəyik məsələsi. Yenilik ancaq yeniliyin olmamasıdır.
- Bu kimi hallar sizi televiziyadan küsdürmür?
- Küsdürsə də, küsdürməsə də görəcəyim başqa bir iş yoxdur. Televiziyadan küsdüm, nə işləyəcəksən, harada işləyəcəksən?! Başqa seçim varmı?! Bu yaşıma çatmışam indiyə qədər heç bir telekanaldan mənə təkliflər gəlməyib. Kimsə deməyib ki, sizinlə bir layihə etmək istəyirik.
- Bütün bunlar nə ilə əlaqədardır?
- Mən düşünürəm ki, televiziyaların peşəkar, işini bilən insanlarla işləmək istəyi yoxdur. Vallah bu sualın cavabını o qədər də dəqiq bilmirəm. Mən o qədər də bacarıqsız, istedadsız biri deyiləm. Mənə elə gəlir ki, bu gün Azərbaycanda televiziya sahəsində də yaxşı verilişlər, veriliş saatları, imkanlar yalnız tanışa, ya da tanışın, bilişin tanışına, bilişinə görə tətbiq olunur.
- Tanınmış aparıcı Yusif Ağayev bir müddət öncə müsahibəsində bildirmişdi ki, "televiziyalar peşəkar aparıcıların yox, həmin aparıcıların sponsorlarının üzünə açıqdır". Siz də belə düşünürsünüz?
- Təbii ki. Mən sizə deyim ki, insan var ki, gəlib deyir ki, "mənim 4 dənə sponsorum var, veriliş edirəm". Azər Axşamın sponsoru yoxdur, o yaşım deyil ki, özümə sponsor tapım. Bu illər ərzində ona görə çalışdım ki, 50 yaşımda qapı-qapı gəzib, sponsor axtarım?! Kimin qapısını döyüm ki, mənə sponsorluq et?! Azər Axşamın həm yaşı, həm televiziya təcrübəsi ona cavabdır ki, sponsor axtarıb tapıb, onu dəvət edib, potensialından istifadə etmək lazımdır. Bu yoxdur. Mən bilmirəm kimin toyuğuna daş atmışam, kimin pişiyinə brız demişəm?! Hətta televiziya məkanlarında elə layihələr işlənilir ki, fikirləşirsən ki, bu layihəni mən böyük məmnuniyyətlə apara bilərəm. Amma təklif yoxdur. Hətta onlar da bilirlər ki, həmin verilişi Azər Axşamdan yaxşı aparan olmayacaq. Bunu bilə-bilə təklif etmirlər. Hər yerdə tamaşaçılardan böyük sevgi görürəm. Harada at var arpa vermirlər, harada arpa var at yoxdur. Bu duruma gəlib düşmüşük. Elə verilişlər götürüb işləyirlər ki, reytinq verir. Nə olsun ki, reytinq verir? Səviyyə yoxdur! Reytinq verməyinə səbəb dedi-qodudur da. O verilişlərin heç biri insanlara nə mənəvi, nə savad baxımından heç bir şey vermir, öyrətmir. Belə başa düşürəm ki, efirlərə maarifləndirici, düşündürücü verilişlər lazım deyil. Azər Axşam artıq bir televiziya aparıcısı kimi, şoumen kimi tələbatlı deyil?! Vallah 1 ay öz üzərimdə çalışsam efirə çıxıb xəbərləri də apararam. Əvvəl televiziya qərar verəndə ki, bir layihə edək, o dəqiqə göz önünə Azər Axşam kimi aparıcılar gəlirdi. Amma indi yox! Aparıcılığı elə insanlara verirlər ki, efirdə "gəlmərsən" deyir. Onların sponsorları, pul buraxanları var, Azər Axşamın sponsoru, pul buraxanı yoxdur. Azər intelektual, əyləncəli verilişlər aparıcısıdır, şoumendir. Deyəndə də deyirlər ki, "siz özünüz nə fikirləşirsiniz?". Mən çox şey fikirləşə bilərəm, axı sən sonda məndən sponsor istəyirsən.
- "Qız atası" serialına çəkilirsiniz?
- "Qız atası" yeni mövsümdə də davam edəcək. Gördüyümüz işlər içərisində ən uzun ömürlüsü, ən etibarlısı hələ ki, "Qız atası"-dır. Tamaşaçılar da izləyir, hara gediriksə soruşurlar, maraqlanırlar.
- Bir müddət əvvəl uzun illər öncə çalışdığınız Azərbaycan Dövlət Pantomima teatrında yenidən çalışmaq istəyinizi də bildirmişdiniz. O necə oldu?
- Mən belə görürəm ki, heç teatra da lazım deyiləm. Bu təkcə televiziyaların problemi deyil, bu ümumiyyətlə Azərbaycan incəsənətində və mədəniyyətində baş vermiş boşluq və xaosdur...
Bu gün Bakıda “Bilik” kitab sərgi-yarmarkası fəaliyyətə başlayacaq
Bilik Günü ərəfəsində – sentyabrın 9-dan 11-dək paytaxtın Nizami rayonundakı Heydər Əliyev adına parkda “Bilik” kitab sərgisinin keçiriləcəyi ilə bağlı sizə məlumat vermişdik.
“Azərbaycan Nəşriyyatları Assosiasiyası” İctimai Birliyi (ANAİB) və Nizami Rayon İcra Hakimiyyətinin birgə təşkilatçılığı ilə gerçəkləşəcək sərgi bu yaxınlarda yol qəzası nəticəsində həyatını itirən “Bakumoz” kitab evinin sahibi, ANAİB-in kitabçı yoldaşı Nurəddin Məmmədlinin xatirəsinə ithaf edilir.
Sərgidə məktəbli ləvazimatı, test topluları, çantalar, həmçinin bədii əsərlərin satışı olacaq.
Sərgidə iştirak edəcək 24 nəşriyyat və mağaza öz məhsullarına 80 faizədək endirimlər nəzərdə tutub.
Sərgi çərçivəsində həmçinin yazıçıların imza saatları, əyləncəli şou-proqramlar, şeir saatları, canlı musiqi, ustad dərsləri və s. tədbirlə təşkil olunacaq.
Bakı Beynəlxalq Caz Festivalında İsveçin “Bendik Hofset” qrupu çıxış edəcək
Sentyabrın 26-da XVII Bakı Beynəlxalq Caz Festivalı çərçivəsində “Enerji Club”da “Bendik Hofset” qrupu çıxış edəcək.
Bu İsveç qrupunun yaradıcısı Bendik Hofset (saksofon-vokal) pandemiya zamanı “Forest” layihəsi çərçivəsində 4 albom üzərində işləyib. Onlardan “Roots”, “Trunks” və “Branches” albomları rəqəmsal formatda artıq işıq üzü görüb. İfaçının “Pollen and Leaves” albomu isə bu ilin oktyabr ayında musiqisevərlərə təqdim olunacaq.
Qrupun üzvləri uzun illərdir birlikdə çalışır. Eyvind Aarset (gitara) 1985-ci ildən qrupda aparıcı ifaçı kimi çıxış edir. Helge İberq, həmçinin 1995-ci ildə böyük səs-küyə səbəb olan “Plantes, Rivers and IKEA” kompozisiyasına böyük töhfələr verən qrupun digər istedadlı ifaçısıdır. Bas ifaçı Mats Eilertsen 2005-ci ildə qrupa "Itaka" mahnısı ilə daxil olub. O, qrupda dünyasını dəyişən zərb ifaçısı Per Oddvar Yoxanseni əvəz edir.
Diqqət: Yeni rəqs müsabiqəsi təşkil olunacaq
Oktyabr-dekabr aylarında Bakı Şəhər Mədəniyyət Baş İdarəsinin təşəbbüsü və təşkilatçılığı ilə “Xəzərin rəqsi” adlı rəqs müsabiqəsi keçiriləcək.
Baş İdarədən bildirilib ki, rəqs müsabiqəsinin keçirilməsində əsas məqsəd rəqs sənətini inkişaf etdirmək, rəqs sənətinin qədim ənənələrini qoruyub saxlamaq, bu sənətin təbliğini genişləndirmək, həmçinin rəqs sənəti üzrə istedadları aşkar etmək və onlara bu sahədə geniş imkanlar yaratmaqdır.
Müsabiqə iki turdan ibarət olacaq və ilkin olaraq 2022-ci ilin oktyabr-dekabr aylarında Bakı şəhərinin 12 rayonu üzrə keçiriləcək. Gələcəkdə isə bütün ölkə ərazisini əhatə edəcək. Müsabiqədə iştirakçıların yaş həddi 3 qrup üzrə (6-10, 11-15 və 16-18) müəyyənləşdirilib.
Qaliblərin seçimini Bakı Şəhər Mədəniyyət Baş İdarəsi tərəfindən yaradılmış münsiflər heyəti həyata keçirəcək. Müsabiqənin seçim turları Baş İdarənin tabeliyində olan mədəniyyət müəssisələrində olmaqla, ilk seçim turu oktyabrın 1-də H.Abbasov adına Mədəniyyət Mərkəzində keçiriləcək. Müsabiqə qaliblərinin mükafatlandırılması və yekun konserti dekabrında Bakı şəhərində təşkil olunacaq.
Qeyd edək ki, iştirakçılar qeydiyyat və müsabiqə barədə ətraflı məlumat əldə etmək üçün Bu email ünvanı spambotlardan qorunur. Onu görmək üçün JavaScripti qoşmaq lazımdır. elektron poçt ünvanına və ya (012) 492-91-59 telefon nömrəsinə müraciət edə bilərlər.
Bakıda "Üzeyir ənənəsinin sönməyən ulduzları" adlı konsert proqramı təşkil olunacaq
Sentyabrın 22-də Üzeyir Hacıbəyli adına Bakı Musiqi Akademiyasının opera studiyasında "Üzeyir ənənəsinin sönməyən ulduzları" adlı konsert proqramı təşkil olunacaq.
Mədəniyyət Nazirliyinin birgə təşkilatçılığı ilə keçirilən Üzeyir Hacıbəyli XIV Beynəlxalq Musiqi Festivalı çərçivəsində təşkil olunan konsert proqramında "Avanqard" Kamera Orkestrinin təqdimatında kinematoqrafiya tariximizə qızıl hərflərlə yazılmış, milli kinofilmlərimizdə istifadə olunmuş musiqi parçaları səsləndiriləcək. Retro və nostalji hisslərlə dolu musiqi parçaları paytaxt sakinləri və şəhərimizin qonaqlarında xoş əhval-ruhiyə yaradacaq.
Biletləri iTicket.az saytı və şəhərin kassalarından əldə etmək olar.
Bakı Dövlət Sirkində “Fil və dostları” adlı beynəlxalq sirk proqramı təqdim olunacaq
Bakı Dövlət Sirkində “Fil və dostları” adlı beynəlxalq sirk proqramı təqdim olunacaq.
Bu proqramın təşkilatçısı dünyaşöhrətli azərbaycanlı sirk ustası Allahverdi İsrafilovdur.
Budəfəki proqramda fillər sözün əsl mənasında mümkün olmayanı gerçəkləşdirəcək, balaca “dostları” ilə möhtəşəm bir şou yaradacaq.
Bundan başqa, sirk proqramında ərəb atlarının xüsusi performansı, klounların peşəkar ustalığı, möhtəşəm illüziya şousu, hava gimnastların fəndləri və digər beynəlxalq sirk ustalarının çıxışları bütün tamaşaçıları heyrətləndirəcək.
“Fil və dostları” adlı beynəlxalq sirk proqramı oktyabrın 14-dən başlayaraq noyabrın 27-dək davam edəcək. Proqram ilk olaraq şəhid və qazi ailələri üçün xeyriyyə məqsədilə nümayiş olunacaq.
Qeyd edək ki, biletləri şəhərin bütün kassalarından və iticket.az saytından onlayn əldə edə bilərsiniz.
Azərbaycan filmi Venesiya kinofestivalında təqdim olunub
“Banu” filmi 79-cu Venesiya kinofestivalında təqdim olunub.
“Ədəbiyyat və incəsənət” portalı AzərTAC-a istinadən xəbər verir ki, bu barədə filmin rejissoru və baş rolun ifaçısı Təhminə Rafaella premyeradan olan fotoları sosial media hesabında paylaşaraq yazıb.
Azərbaycan, İtaliya, Fransa və İranın birgə istehsalı olan ekran işində Əməkdar artist Mələk Abbaszadə, habelə Zaur Şəfiyev, Kəbirə Həşimli, Cəfər Həsən və Emin Əskərov rol alıblar.
Filmin prodüserliyini “Noori Pictures” şirkəti edib.
Qeyd edək ki, filmdəki hadisələr 44 günlük Vətən müharibəsi fonunda cərəyan edir.
Mədəniyyət Nazirliyi Tarix-memarlıq abidələrinin monitorinqinə başlayıb
Mədəniyyət Nazirliyi yanında Mədəni İrisin Qorunması, İnkişafı və Bərpası üzrə Dövlət Xidməti tərəfindən Bakı şəhərinin mərkəzi küçə və prospektlərində yerləşən tarix-memarlıq abidələrinə edilən qanunsuz müdaxilələrin qarşısının alınması və nəticələrinin aradan qaldırılması məqsədi ilə operativ monitorinq tədbirlərinə start verilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, ilkin olaraq Bakı şəhərində yerləşən dövlət tərəfindən mühafizə olunan daşınmaz tarix-memarlıq abidələrini əhatə edir.
Növbəti monitorinq sentyabrın 7-də Bakı şəhəri Azadlıq prospekti 22 ünvanında keçirilib.
Həyata keçirilən tədbirlər nəticəsində tarixi abidələrin bədii-estetik görünüşünə, memarlıq üslubuna xələl gətirən müdaxilələr aradan qaldırılıb. Obyekt sahibləri ilə maarifləndirici söhbət aparılıb. Xəbərdarlıqlara əməl etməyən obyekt sahibələrinə protokollar tərtib edilib. Həmçinin Dövlət Xidməti ilə abidə (bina) mülkiyyətçiləri və icarədarları arasında ümumi mühafizə öhdəliklərini ehtiva edən, həm də mülkiyyətçinin abidə ilə bağlı hüquqlarının əks olunduğu mühafizə müqaviləsinin bağlanmasının zəruririliyi diqqətə çatdırılıb.
Qeyd edək ki, sentyabrın 1-dən başlayan monitorinqlər nəticəsində 20-də artıq tarix-memarlıq abidəsində monitorinq keçirilib.
Mütəmadi olaraq keçirilməsi nəzərdə tutulan monitorinqlər həm paytaxtda, həm də bölgələrdə yerləşən tarixi abidələri əhatə edəcəkdir. Ona görə də istifadəsində və ya mülkiyyətində tarixi abidələr olan vətəndaşlarımızı abidələrimizin, eləcə də şəhərimizin estetik görünüşünün qorunmasına və gələcək nəsillərə tam şəkildə çatdırılmasına həssas yanaşmağa çağırırıq.
Mədəniyyət Nazirliyi görkəmli sənətşünas Sevil Bədəlova və rəssam Rasim Nəzirovu mükafatlandırıb
8 avqust 2022-ci il tarixində mədəniyyət nazirinin müavini Sevda Məmmədəliyeva görkəmli sənətşünas, professor, Azərbaycan Rəssamlar İttifaqının üzvü Sevil Salman qızı Bədəlova və rəssam, dosent, sənətşünaslıq üzrə elmlər namizədi, Azərbaycan Rəssamlar İttifaqının üzvü Rasim Məmməd oğlu Nəzirov ilə görüşüb.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, görüşdə uzun illər boyu Azərbaycan mədəniyyəti və incəsənətinə verdikləri töhfələri, həmçinin zəngin mədəniyyətimizin ölkə daxilində və xaricində təbliğ edilməsində rollarının qiymətləndirilməsi məqsədilə Azərbaycan Respublikası Mədəniyyət Nazirliyinin "Fəxri Fərman"ı ilə təltif olunan Sevil Bədəlova və Rasim Nəzirova mükafatları təqdim olunub.
Qeyd edək ki, Rasim Nəzirov 1979-cu ildən etibarən ölkədaxili və beynəlxalq sərgilərin fəal iştirakçısı olub. Ona məxsus olan natürmort, portret, mənzərə mövzularındakı əsərlər Gürcüstan, Rusiya, Polşa, Əfqanistan, Türkiyə və digər ölkələrdə sərgilənmişdir. O, “Məryam Ana”, “Apostol”, “Natürmort”, “Qadın portreti”, “Şərgin lampası”, “İlk zərbə”, “Toplumun oyuncusu”, “Süd yolu”, “Model” və digər əsərlərin yaradıcısıdır. Həmçinin Rasim Nəzirov “Müasir incəsənətin aktual problemləri”, “Xəttin təsviri sənətdə rolu”, “Mədəniyyətin sintezi”, “Şərgin miniatür rəngkarlığında impovizasiyanın rolu” adlı elmi məqalələrin müəllifidir.
Görkəmli sənətşünas, professor Sevil Bədəlova isə rəssam H. Nəzərov, karikaturist rəssam R. Qədimov, R. Mehdiyev və Ə. Əzimzadə adına məktəbin 60 illiyinə həsr olunan monoqrafiyaların müəllifidir. Sevil Bədəlova Rəssamlar İttifaqında çalışdığı müddət ərzində təşkil olunmuş sərgilərin bütün kataloqlarının ön sözlərinin, həmçinin “XX əsr dünya incəsənəti”, “Dekorativ tətbigi incəsənət” metodik vəsaitləri və proqramlarının, eləcə də Azərbaycan Ali Məktəb Aspirantlarının II Respublika Elmi Konfransında təqdim edilmiş “Azərbaycan Sovet Qrafika sənəti 1950-1970-ci illər” adlı məruzənin müəllifidir.
Sevil Bədəlova müxtəlif illərdə Bakı şəhərində keçirilmiş fərdi moda sərgilərinin təşkilatçısı olmuşdur.
Mükafatlandırılan sənət adamları onlara göstərilən xüsusi diqqətə görə Mədəniyyət Nazirliyinə təşəkkürlərini bildirdilər.
