Super User
Sezen Aksu “Disney Plus”un reklam siması seçilib
“Geri dön”, “Sən ağlama”, “Biliyorsun”, “Şinanay”, “Dəli qızın türküsü”, “Yalnızca sitəm” kimi onlarca mahnılarla adını qızıl hərflərlə türk musiqi tarixinə yazan Sezen Aksunu içi Azərbaycan qarışıq bütün dünyada sevirlər. Bu günlərdə isə ünlü sənətçi ilə bağlı çox gözəl bir xəbər paylaşılıb.
“Ədəbiyyat və incəsənət” portalı SonDakika xəbər ajansına istinadən məlumat verir ki,
Türkiyənin məşhur sənətçisi “Disney Plus”un reklam siması seçilib. Müğənni barədə filmin çəkiləcəyi də nəzərdə tutulub.
Bu il 68 yaşını haqlayacaq məşhur sənətçinin həyatı və karyerası barədə ekranlaşdırılacaq ekran əsəri “Disney Plus”da yayımlanacaq.
Qeyd edək ki, tanınmış türk sənətçisi aktrisa kimi də özünü sınayıb. O, məşhur türk filmlərində yaddaqalan obrazlar canlandırıb. Onlardan biri isə həqiqətən unudulmazdır. Söhbət “Minik sərçə” filmindəki Hülya obrazından gedir.
Sevgi dəftərçəsindən - “Bilirsən necə olur, biləyinin yerinə ümidlərini kəsmək?”
Bilirsən, necə olur,
ürəyi səksəkəli
gözləri açıq yatmaq?!
Ürəyinin səsindən,
ya da öz nəfəsindən
çəkinib gecə yarı,
canbəsər ümidlərlə
qaçmaq qapıya sarı...
Bilirsən necə olur,
Biləyinin yerinə
ümidlərini kəsmək?!
bütün xəyallarını
bir gecədə doğramaq...
Xatırlayıb torpağın
səndən aldıqlarını,
bilirsən, necə olur,
ölüm üçün darıxmaq?!
Qəlbindəki üsyanı
duyan olmasın deyə,
saxta qəh-qəhələrlə
nə bilim, daha nələrlə,
özünə rol oynamaq.
sənə aid olanı
bir suç kimi gizləmək,
özündən itgin düşüb,
özündən firar etmək
bilirsən, necə olur?
Bilirsən, necə olur,
Qəlbini yola salmaq
özgəsinin köçündə.
Sonra...
sonra bircə günün içində
xəyalını boşamaq.
Bilirsən, necə olur,
səni sənsiz yaşamaq?!
bilirsən, necə olur...?
Bilmirsən... heç bilmə də...
Ceyhunə Mehman
Tbilisidə “Perxuli” musiqi festivalında Azərbaycan da təmsil olunub
Tbilisidə “Perxuli” musiqi festivalı keçirilib. Festivalda Azərbaycanın “Xarıbülbül” mahnısı və rəqsi ifa olunub.
“Ədəbiyyat və incəsənət” portalı AzərTAC-a istinadən xəbər verir ki, festivalda Azərbaycanı Tbilisidə fəaliyyət göstərən “Ceyran” rəqs anamblı təmsil edib.
Ansamblın gənc rəqqasələri müğənni, Azərbaycanın Xalq artisti Azərinin (Anaxanım Tağıyeva) ifa etdiyi “Xarıbülbül” mahnısı əsasında gözəl rəqs nümunəsi nümayiş etdiriblər. Onların rəqsləri alqışlarla qarşılanıb.
Festivalın aparıcısı David Tamaşaşvili AZƏRTAC-a müsahibəsində deyib ki, “Perxuli” qədim gürcü rəqsidir. Bu gün Tbilisinin qədim mərkəzi hesab olunan “Şeytanbazar” ərazisində bu festivalı təşkil etməklə biz musiqi tariximizə nəzər salmaq istədik. Festivalda Gürcüstanda yaşayan milli azlıqların nümayəndələri, eləcə də Litvadan gəlmiş qonaqlar iştirak ediblər. Azərbaycan rəqs qrupunun ifa etdiyi “Xarıbülbül” mahnı və rəqsi tamaşaçılar tərəfindən coşqu və alqışlarla qarşılanıb.
“Azərbaycanlıların mahnı və rəqsi hamının xoşuna gəldi. Azərbaycan rəqsləri həmişə hamının ürəyini oxşayır. Gurultulu alqışlar da məhz bu sevginin göstəricisidir”, – deyə D.Tamaçaşvili vurğulayıb.
Qeyd edək ki, Tbilisidəki 164 saylı məktəbin müəllimi Ceyran Qurbanovanın rəhbərlik etdiyi “Ceyran” rəqs ansamblı paytaxtda və Gürcüstanın bölgələrində Azərbaycan mahnı və rəqslərini uğurla təqdim edir.
Beynəlxalq Türk Akademiyası Anarı təltif edib
IX Qlobal Bakı Forumunda iştirak edən Beynəlxqlq Türk Akademiyasının prezidenti Darxan Kıdırəlı və Akademiyanın vitse prezidenti Füzuli Məcidli Azərbaycan Yazıçılar Birliyini ziyarət ediblər.
“Ədəbiyyat və incəsənət” portalı xəbər verir ki, Yazıçılar Birliyinin mətbuat katibi qonaqlara Azərbaycan Yazıçılar Birliyinin fəaliyyəti, Birliyin yerləşdiyi tarixi bina haqqında məlumat verib.
Beynəlxqlq Türk Akademiyasının prezidenti Darxan Kıdırəli Azərbaycan Yazıçılar Birliyinin sədri Anarın Türk dünyası ədəbiyyatındakı yeri, yaratdığı əsərləri barədə fikirlərini bölüşüb və ədibin Akademiyanın Əlişir Nəvai Qızıl medalına layiq görüldüyünü bildirib.
Medalı təqdim edən D.Kıdırali Əlişir Nəvai Qızıl medalının türk dünyası ədəbiyyatı sahəsində böyük xidmətləri olan tanınmış insanlara verildiyini diqqətə çatdırıb. Eyni zamanda bir neçə həftə əvvəl Azərbaycan Yazıçılar Birliyinin təşəbbüsü ilə keçirilən I Türk Dünyası Kitab Festivalından danışıb.
Azərbaycan Yazıçılar Birliyin sədri Anar Darxan Kıdırəliyə ona verdiyi dəyərə görə öz minnətdarlığını bildirib. Və Beynəlxalq Türk Akademiyasının türk dünyasının elm və ədəbiyyat, tarixi irsimizin qorunması və araşdırılması sahəsində ortaya qoyduğu uğurlu nəticələrin bütün Türkdilli xalqlar üçün əhəmiyyətindən danışıb.
Xalq yazıçısı qeyd edib ki, Əlişir Nəvai qızıl medalını alması onun Azərbaycan Yazıçılar Birliyinə sədirlik etməsinin 35-ci ildönümünə təsadüf edir və rəmzi mənası vardır.
Qeyd edək ki, görüşdə Azərbaycanın Misirdəki səfiri Tural Rzayev, Azərbaycan Yazıçılar Birliyi sədrinin müavini Rəşad Məcid, Azərbaycan Yazıçılar Birliyinin katibləri Çingiz Abdullayev, Elçin Hüseynbəyli, Səlim Babullaoğlu, İlqar Fəhmi, Səyyad Aran, mətbuat katibi Xəyal Rza, sədrin müşaviri Salman Aruz, eləcə də Azər Turan, Şahin Musa, Aida Eyvazlı işirak ediblər.
Yazıçı Varisin sumqayıtlı gənclərlə görüşü keçirilib
Sumqayıt şəhərində Sumqayıt Gənclər Klubu və D&B Kitablı kafenin birgə təşkilatçılığı ilə yazıçı Varislə görüş keçirilib.
“Ədəbiyyat və incəsənət” portalı xəbər verir ki, şəhərin 9-cu mikrorayonda, Sərvər Bədəlbəyli küçəsi 50/56 ünvanında, Hədəf kursları binasının birinci mərtəbəsinə yerləşən D&B Kitablı kafesi (D- dədə, B- baba anlamında) yarandığı qısa müddətdə Sumqayıt gənclərinin sevimli məkanına çevrilib. Xüsusən tələbələr burada bir fincan çay, qəhvə içərək müasir ədəbiyyatımızı, bədii kitabları müzakirə edirlər, kimlərsə yeni kitablar alır, kimlərsə kitab mübadiləsinin üstünlüklərindən yararlanır. Buranın ən böyük üstünlüyü isə ən çox tələb olunan yazıçıları müəyyənləşdirib onlarla görüşlərin təşkil edilməsidir.
Layihənin təşkilatçı rəhbəri Elvir Musayev, eləcə də Sumqayıt Gənclər Klubunun sədri Aqil Abdullayev tədbirə təşrif buyuran gənclərə tədbirin mahiyyəti barədə məlumat verdikdən sonra Ayşə Əmrahovanın moderatorluğu ilə əslən Sumqayıtdan olan yazıçı ilə görüşə start verilib.
Görüşdə yazıçının həyat yoluna, ölkədə və xaricdə qazandığı uğurlara işıq salınıb, mütaliənin rolundan danışılıb, müasir gənci kitaba cəlb etməyin əsas prioritetlərinə toxunulub, eləcə də yazıçı gənclərə dünya məşhurlarının uğur listəsində kitabların rolu, Arzuların reallaşdırılması barədə metafizika qanunu barədə maraqlı söhbətlər eləyib.
Sonra yazıçı oxucuların suallarını cavablandırıb, sonda da Ailə fotosu çəkilib.
Azərbaycanın mədəniyyət naziri bu gün İrana səfər edəcək
Bu gün - İyunun 20-də Azərbaycan Respublikasının mədəniyyət naziri Anar Kərimov İran İslam Respublikasının mədəniyyət və islam irşad nazirinin dəvəti ilə Tehrana səfər edəcək.
Bu səfər çərçivəsində Anar Kərimov İranın mədəniyyət və islam irşad naziri Məhəmməd Mehdi İsmaili, milli irs, əl işləri sənayesi və turizm naziri İzəyullah Zərqami və digər rəsmi şəxslərlə görüşləri nəzərdə tutulub.
Görüşlərdə mədəniyyət sahəsində əməkdaşlıq əlaqələrinin inkişafı perspektivləri müzakirə ediləcək.
Köşklərdən bu gün “Ədəbiyyat qəzeti” almaq yaddan çıxmasın
Bugünkü “Ədəbiyyat qəzeti”nin anonsunu təqdim edirik:
Anar – Ömrün ləzzəti (Tofiq Mirzəyev haqqında)
“Vətən dili” dərsliyinin yetişdirdiyi nəsil sonradan Azərbaycan milli məfkurəsinin, dövlət müstəqilliyinin qurucuları oldu” – ("İki sahil" qəzetinin filologiya elmləri doktoru, tənqidçi-ədəbiyyatşünas Elnarə Akimova ilə milli müəyyənlik, xarici dilə maraq və qloballaşmanın dil üzərində təhdidləri mövzusunda müsahibəsinin “Ədəbiyyat qəzeti” oxucularına təqdimi)
Görkəmli italyan şair və nasiri Tonino Querranın “Ağ saqqallı şir” hekayəsi Azad Yaşarın tərcüməsində
Cavanşir Yusifli – Gələcəyin sözünü keçmişdən gətirmək (Camal Yusifzadə haqqında)
Azər Turan – Turanın Troyaya dəxli varmı...
Həsən Kür – Şeirlər
“Yaxşı sənətkar inanır ki, heç kim ona məsləhət verəcək qədər yaxşı deyil” – Vilyam Folknerdən bədii əsər yazmaq istəyənlərə 7 məsləhət Nilufər Hacılının təqdimatında
Kənan Hacı – Sözün Fədaisi (Dünyadan vaxtsız getmiş şair Ağasəlim Fədainin xatirəsinə)
“Poeziya nəsrdən daha ciddi hadisədir...” – Fikir bucağı”nın qonağı şair, esseist Rəvan Caviddir (Söhbətləşdi: Tural Cəfərli)
Yusif Nazim Ərəbsoy – Şeirlər
Məmməd İsmayıl – Ruhun yaşam macərası, sözün nüvəsinə enmək istedadı (Rüstəm Kamalın 60 illiyinə)
Ağacəfər Həsənli – Seyran Səxavət “şineli”
Eminquey – Şair xalq və onun şeir anlayışı
Cavid Fərzəli – Şeirlər
Nadir Yalçın – Şeirimizin üç kəlməsi (Rəşad Nağı Mustafanın poeziyası barədə qeydlər)
Anar Qasımov – “Allahverdinin arzusu” (Hekayə)
İsa Həbibbəyli, Elnarə Qaragözova – Çoxmetodlu ədəbiyyatda detektiv və sənədli nəsr xətti
Nurlana İşıq – “Ayçil yuxu gördü” (Hekayə)
Adilə Nəzərova – “Ağ dəvə düzdə qaldı” Həcəri bir yazıçı kimi yaratdı (Həcərin “Ağ dəvə düzdə qaldı” kitabındakı povestlər haqqında)
Etibar Əbilov – Ədəbi qeydlər
Sərvaz Hüseynoğlu – Şeirin təbəssümü (Qəşəm İsabəylinin seçilmiş əsərlərinin birinci cildi haqqında)
Süleyman Abdulla, Fazil Əsəd, Müzəffər Məzahim, Kamil Araz, Fuad Biləsuvarlı, Qədiməli Əhməd – Şeirlər
Qurban Bayramov – Dəmir Çeşməli – öz statusu olan sözübütöv şair...
Səma Muğanna – “Qeyb olan açar” (Hekayə)
Mənbə: Edebiyyatqazeti.az
Ən çox oxunan: Dünya mətbuat azadlığı üçün qara gün
“Mətbuat azadlığı və Britaniya demokratiyası üçün qara gün " - Böyük Britaniya hökumətinin WikiLeaks saytının qurucusu Culian Assancın ABŞ-a verməsi faktına bu cür qiymət verib və bu adda manşet dünya mediasında ötən gün ən çox rast gəlinən olub.
“Ədəbiyyat və incəsənət” portalı Euronews-a istinadən xəbər verir ki, Culian Assancı ABŞ dövləti casusluqda ittiham edir. Buna səbəb jurnalistin İraqla Əfqanıstandakı hərbi kampaniyalara dair məxfi sənədlərin icazəsiz dərc etdirməsi göstərilir. Böyük Britaniyada sığınacaq tapmış Assanc 175 ilədək həbs cəzası ilə təhdid edilir.
Aprel ayında Londonda jurnalistin ekstradisiyası üçün order verilmişdi, lakin yekun qərarı Daxili İşlər Nazirliyi verməli idi. İdarənin məhkəmə instansiyalarına istinadən verdiyi bəyanatda deyilir ki, ekstradisiya Assancın hüquqlarını pozmur və ədalətsiz tədbir hesab edilə bilməz.
Müdafiə tərəfi Apellyasiya vermək niyyətindədir, buna 14 gün möhlət verilib.
Amnesty International Julian Assanca qarşı ittihamlar aradan qaldırılmasını tələb edir. Qeyd edək ki, ötən il də Assancın ABŞ-a verilməsi barədə qərar çıxarılmışdı, lakin vəkillər ekstradisiya haqqında qərarı ləğv edə bilmişdilər. Amma bu il vəziyyət daha ümidsizdir. Demokratiyanın beşiyi demokratiyanı qundaqdaca boğmaqda israrlıdır.
Günün fotosu: Ukraynanın rənglərində geyinən Avrokomissiyanın sədrindən gözəl bir jest gördük
Günün fotosu: Ukraynanın rənglərində geyinən Avrokomissiyanın sədrindən gözəl bir jest gördük
Ukraynanın sarı-göy bayrağı rəngində geyinən Ursula fon der Lyayen - Avrokomissiyanın sədri dünən çıxış edərək Ukraynaya Avroittifaqa daxil olmaq üçün namizəd statusunun verilməsinin vacibliyi barədə fikir bildirib.
Şəhid Mehrab Niftəliyeva ithaf edilmiş “Cəsur ürək” kitabının təqdimatı keçirilib
Abdulla Şaiqin mənzil-muzeyində yazıçı-publisist Arzu Hacızadənin Vətən Müharibəsi Qəhrəmanı “Terminator” ləqəbli Mehrab Söhrab oğlu Niftəliyevin qəhrəmanlıq yoluna həsr olunmuş “Cəsur ürək” kitabının təqdimatı keçirilib.
Muzeydən AzərTAC-a bildirilib ki, “Şuşa İli” çərçivəsində təşkil edilən tədbirlər silsiləsinə aid olan tədbirdə əvvəlcə torpaqlarımızın azadlığı uğurunda candan keçən Vətən övladlarının xatirəsi bir dəqiqəlik sükutla yad edilib.
Abdulla Şaiqin mənzil-muzeyinin direktoru Ülkər Talıbzadə kitabın təqdimatının məhz muzeydə keçirilməsinin xüsusi əhəmiyyətə malik olduğunu qeyd dib. O, Abdulla Şaiq və qardaşı Yusif Ziya Talıbzadənin də türkçülük, vətənpərvərlik ideyalarını öz yaradıcılıq və həyatlarında geniş təbliğ etdiklərini, Abdulla Şaiqin yaradıcılığında vətənpərvərlik mövzusunun xüsusi yer tutduğunu, Yusif Ziya Talıbzadənin də ömrü boyu vətənin müstəqilliyi, millətin bütövlüyü uğrunda mübarizə apardığını və onun da şəhidlik zirvəsində ucaldığını vurğulayıb.
Kitabın müəllifi yazıçı-şair Arzu Hacızadə kitabın ərsəyə gəlmə səbəblərindən danışıb.
Çıxışlarda qeyd edilib ki, kitab Xüsusi Təyinatlı Qüvvələrin baş giziri, sağlığında əfsanəyə çevrilən “Terminator” ləqəbi ilə tanınan Mehrab Niftəliyevin Vətən müharibəsində Murovdağ yüksəkliyindən Şuşa qalasına kimi qəhrəmanlıq yolu keçdiyi ağır döyüş yolundan bəhs edir. O, bu döyüşlərdə düşmənin 70-ə yaxın hərbi qulluqçusunu, neçə-neçə döyüş texnikasını məhv edib.
Mehrab Niftəliyev 2005-ci ildə Azərbaycan Respublikası Silahlı Qüvvələrinin Təlim və Tədris Mərkəzinin “Gizirlərin hazırlanması kursu”nu bitirib. 2016-cı ilin Aprel döyüşlərində də qəhrəmanlıqlar göstərib.
Mehrabın ən böyük arzusu Şuşaya Azərbaycan bayrağını sancmaq idi. Məhz elə bu arzu ilə 2020-ci il noyabrın 8-də Şuşa şəhəri ərazisində gedən hərbi əməliyyatlar zamanı döyüş tapşırığını yerinə yetirərkən qəhrəmancasına şəhid olub.
Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zaman igidlik və mərdlik nümayiş etməsinə görə Prezident İlham Əliyevin müvafiq Sərəncamına əsasən “Vətən Müharibəsi Qəhrəmanı” , “Vətən uğrunda” və müxtəlif rayonların alınmasında göstərdiyi şücaətə görə medalları ilə təltif olunub.
Şəhidin atası Söhrab Niftəliyev oğlunun keçdiyi qəhrəmanlıq yolundan, igidlik zirvəsindən danışaraq qeyd edib ki, Mehrab hər zaman Vətəninə bağlı olub, onu ürəkdən sevib.
Sonra tarix elmləri doktoru Təranə Turan Rəhimli kitab və şəhidin keçdiyi döyüş yolu haqqında fikirlərini bölüşüb.
Tədbir bədii hissə ilə davam edib.
Bədii hissədə 58 nömrəli tam orta məktəbin şagirdləri “Cəsur ürək” əsərindən səhnəciklər göstərib, vətənpərvərlik mövzusunda müxtəlif şeirlər səsləndiriblər.
