Super User
Beynəlxalq Silkway ədəbiyyat festivalı major notlarla başa çatıb
Ədəbiyyatımızın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun final mərhələsi Qubada, “Şahdağ Quba Truskavets” Sanatoriyasında keçirilib.
“Ədəbiyyat və incəsənət” portalı xəbər verir ki, Silkway International Writers Union təsisatının və “Şahdağ Quba Truskavets” Sanatoriyasının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən festivalın seçim turunda 300-ə yaxın namizədi qabaqlayan 30 gənc yazar fərqlənərək final mərhələsinə vəsiqə qazanıblar. Onların arasında ədəbi gəncliyin Fərid Hüseyn, Ramil Əhməd, İntiqam Yaşar, Cavid Zeynallı, El Roman, Faiq Hüseynbəyli, Eminquey, Ulucay Akif, Nargis İsmayılova, Bahəddin Salman, Emin Piri, Ruslan Dost-Əli, Mehdi Dostəlizadə, Ayxan Ayvaz, Nadir Yalçın, Ələsgər Əhməd, Ümid Nəccari, Rəvan Cavid, Nigar Arif, Cavid Qasımov, Səddam Laçın, Həsən Kür kimi parlaq imzalarına rast gəlmək olar.
Aprel ayının 30-dan may ayının 2-dək 30 nəfər finalçı səfalı Quba bölgəsinə səfər edərək üç gün iki gecə “Şahdağ Quba – Truskavets” sanatoriyasında yaşayıb, öz əsərlərini özləri səsləndirməklə münsiflərdən 10 ballıq qiymətləndirmə yolu ilə qiymət alablar. Quba görməli yerlərinə ekskursiyalar, “Çölçü” obasına yürüş də təşkil olunub.
Ayrıca, xalq yazıçısı, Azərbaycan Yazıçılar Birliyinin sədri Anar gənc yazarlara ustad dərsi keçib, Milli Elmlər Akademiyasının vitse-prezidenti, akademikİsa Həbibbəyli, Milli Məclisin deputatı, akademik Nizami Cəfərov “Müasir Azərbaycan ədəbiyyatının inkişaf tendensiyaları”, Azərbaycan Milli Konservatoriyasının rektoru, xalq artisti Siyavuş Kərimi “Dünya ədəbiyyatının mədəniyyətdə rolu” mövzusunda məruzələr ediblər.
Qubadakı “Azərkitab” mərkəzində AYB sədri Anarın bölgə yazarları ilə görüşü, bölgə şairlərinin Bakıdan gələn qonaqlar qarşısında öz şeirlərini oxumaları da festivalın tərkib hissəsi kimi bölgə ədəbiyyatının inkişafına bir təkan olub. Bölgənin tanınmış şairi Ramiz Qusarçaylının AYB tərəfindən yeni təsis edilmiş Əhməd Cavad mükafatına layiq görülməsi mərasimi də festivala bir rəng qatıb. Həmçinin yazıçı, motivasiya spikeri Əlibala Məhərrəmzadənin gənclərə uğur qazanmaq təlimini açması, onlara kitablarını hədiyyə etməsi də xüsusi rəğbət doğurub.
Festivalın münsifləri Nizami Cəfərov başda olmaqla AYB sədrinin müavini Rəşad Məcid, AYB katibləri Elçin Hüseynbəyli, Xəyal Rza, AYB sədrinin müşaviri Sayman Aruz, “Ədəbiyyat qəzeti”nin baş redaktoru Azər Turan, tənqidçi Nərgiz Cabbarlı, “Söz” layihəsinin rəhbəri Nigar Həsənzadə, şairlər Ramiz Qusarçaylı və Əkbər Qoşalı, yazıçı Varis olublar.
Təkilat Komitəsinin həmsədrləri yazıçılar Əlibala Məhərrəmzadə və Varis olan Beynəlxalq Silkway ədəbiyyat festivalının Azərbaycan turunun may ayının 1-də təşkil edilmiş Qala gecəsində Xalq artisti Malik Mansurovun bədii rəhbəri olduğun “Naz-nazı” muğam qrupunun ecazkar musiqisinin, təbrik nitqlərinin, banket süfrəsinin müşayiəti ilə bütün iştirakçılar “Festivalın finalçısı” Fəxri Diplomları ilə, 3 ən yüksək bal toplayan iştirakçı isə 1-ci, 2-ci və 3-cü yerləri tutmaqla qiymətli hədiyyə və Sertifikatlarla mükafatlandırılıblar. Daha bir iştirakçı-qalib isə 30 iştirakçının səsverməsi nəticəsində müəyyənləşib.
1-ci yeri Ruslan Dost-Əli, 2-ci yeri Ulucay Akif və 3-cü yeri Cavid Qasımov tutublar. İştirakçıların səsverməsi nəticəsində isə El Roman fərqlənib.
Növbəti mərhələlərdə festivalın qalibinin kitabının nəşri, piarı, mükafatçıların beynəlxalq miqyasda tanıdılması, eləcə də finalçıların əsərlərindən ibarət antologiyanın dərci də nəzərdə tutulur.
Dünyadakı anologi layihələrdən ödənişli olmaması üstünlüyü ilə seçilən və devizi “Sonda ədəbiyyat qalib gələcək!” olan Beynəlxalq Silkway ədəbiyyat festivalının Azərbaycan turunun hər il keçirilməsi nəzərdə tutulur.
Günün fotosu: Əl-Aksa məscidində qanlı olaylar baş verib
Günün fotosu: Əl-Aksa məscidində qanlı olaylar baş verib
Şərqi Qüdsdəki Əl-Aksa məscidində ötən gün fələstinlilərlə İsrail polisi arasında toqquşma bərpa edilib. 40-dan artıq insan yaralanıb.
İsrail polisi günahı onlara daş atan fələstinlilərdə görür, buna görə gözyaşardıcı qazdan istifadə edildiyini bildirir.
Yeri gəlmişkən, Qədir gecəsində burda 250 min müsəlman ibadət etmişdi.
Foto: Euronews
Sevilən “Koroğlu” operası növbəti dəfə səhnədə
Bu gün - Aprelin 30-da dahi Azərbaycan bəstəkarı Üzeyir Hacıbəylinin “Koroğlu” operasının ilk tamaşasının 85 illiyi tamam olur.
Bu münasibətlə elə həmin gün Azərbaycan Dövlət Akademik Opera və Balet Teatrında “Koroğlu” operası təqdim olunacaq.
Yubiley tamaşasında Koroğlu partiyasını Azərbaycan Dövlət Akademik Opera və Balet Teatrının aparıcı solisti, Respublikanın Əməkdar artisti, istedadlı vokal ustası Ramil Qasımov ifa edəcək.
Tamaşada Xalq artistləri Əli Əskərov, Əkrəm Poladov, Fidan Hacıyeva, Əməkdar artistlər İlahə Əfəndiyeva, Cahangir Qurbanov, Tural Ağasıyev və başqaları çıxış edəcəklər.
Opera tamaşasını Əməkdar artist, dirijorların beynəlxalq müsabiqələrinin və “Humay” milli mükafatının laureatı Əyyub Quliyev idarə edəcək.
Qeyd edək ki, "Koroğlu" Üzeyir Hacıbəyli yaradıcılığının şah əsəri, ən yüksək zirvəsidir. Bu əsər milli opera sənətimizin ən dəyərli nümunələrindən biri olub yarandığı gündən Azərbaycan Dövlət Akademik Opera və Balet Teatrının repertuarında möhkəm yer tutur.
Filarmoniyada “Yeni adlar layihəsi” çərçivəsində növbəti konsert keçirilib
Aprelin 29-da Müslüm Maqomayev adına Azərbaycan Dövlət Akademik Filarmoniyasında "Yeni adlar layihəsi" çərçivəsində Üzeyir Hacıbəyli adına Azərbaycan Dövlət Simfonik Orkestrinin konserti keçirilib.
Beynəlxalq müsabiqələr laureatı Orxan Həşimovun rəhbərli ilə təqdim olunan konsertdə solistlər beynəlxalq müsabiqələr laureatları, Ü.Hacıbəyli adına Bakı Musiqi Akademiyasının konsertmeysteri Rüstəm Zeynalov və BMA-nın məzunu Ceyhun Əzizov çıxış ediblər.
Musiqili gecədə tamaşaçılar dünya musiqi klassiklərinin incilərini dinləyiblər.
Musiqili Teatrın may repertuarı maraqlı tamaşalarla zəngindir
Azərbaycan Dövlət Akademik Musiqili Teatrı may ayında maraqlı səhnə əsərləri ilə çıxış edəcək.
Sənət ocağının may repertuarını təqdim edirik:
1 may – “Yatmış gözəl və cırtdanlar”, “999-cu gecə”
6 may –“Bəxtiyar” (premyera)
7 may – “Bremen musiqiçiləri və Pen”, “Bəxtiyar”
8 may – “Qırmızı papaq və Redmüzi” (premyera), “Paris Notr–Dama ithaf”
13 may – “Bir dayan, canavar”
14 may – “Meşə çaqqalsız olmaz”, “Qafqazlı qardaşqızı”
15 may – “Qızıl cücə”, “Mən dəyərəm min cavana”
21 may – “Dəcəl çəpişlər”, “Qızıl toy”
22 may – “Qırmızı papaq”, “Psix”
27 may – “Fransızsayağı qarnir”
28 may – “Buratino”, “Ər və arvad”
29 may – “Qoğalın macərası”, “Beş manatlıq gəlin”
Yuğ” teatrının may repertuarını təqdim edirik
Azərbaycan “Dövlət” Yuğ Teatrı may ayında maraqlı tamaşalar göstərəcək.
1 may -“Vəsvəsə”
7 may - “KLOUN Z”
8 may - “Təklif”
14 may - “Lənət”
15 may - “Quş dili”
21 may - “Lənət”
22 may - “KLOUN Z”
28 may - “Metamorfoza”
29 may - “Vəsvəsə”
Qeyd edək ki, A.Şaiq adına Azərbaycan Dövlət Kukla Teatrının binasında göstəriləcək tamaşalar müvafiq olaraq saat 19.00-da başlanır.
Biletləri teatrın kassasından əldə etmək olar.
Bu gün Nizami Kino Mərkəzində “Köhnə çamadanlar” bədii filminin premyerası olacaq
Bu gün Nizami Kino Mərkəzində İkinci Qarabağ müharibəsində şanlı Qələbəmiz münasibətilə ekranlaşdırılan “Köhnə çamadanlar” bədii filminin premyerası olacaq.
Qeyd edək ki, müharibənin ana xətt olaraq keçdiyi filmin ssenari müəllifi Sevda Sultanova, quruluşçu rejissoru Səidə Haqverdiyeva, görüntü rejissoru Şahmar Səfəroğlu, quruluşçu rəssamı Əfşan Əsədova, bəstəkarı Vüqar Camalzadə, montaj rejissoru Rza Almasi Pərqu, prodüserləri Kəmalə Nəhmətova və Nicat Məmmədov, art direktoru Tahir Tahiroviç, baş prodüseri Pərvinə İsmayılovadır.
Real hadisələr əsasında çəkilən tammetrajlı bədii filmin qəhrəmanları müharibənin həyatlarında dərin ağrılı izlər buraxdığı insanlar, əsas etibarilə qadınlardır.
Tamaşaçı ekran əsərində döyüşçü, şəhid anası, bacısı, yoldaşı, həkim, əsir və qaçqın düşmüş Azərbaycan qadınlarının ümumiləşmiş obrazında müharibə və onun ağrılarının fərqli çalarlardakı təsvirini görə biləcəklər.
Ekran işində Birinci və İkinci Qarabağ müharibələrində baş verən hadisələr kəsişir, hər iki dövrü əhatə edən ayrı-ayrı epizodlar dramaturji və vizual baxımdan bir-birini tamamlayaraq hekayənin vahid strukturunu yaradır. Final səhnələri Azərbaycan Ordusunun qələbəsini əks etdirən sənədli və bədii kadrlarla tamamlanır.
Əsas rolları Xalq artistləri Məmməd Səfa, Pərvanə Qurbanova, Əməkdar artistlər Zemfira Əbdüsəmədova, Gülzar Qurbanova, Qızılgül Quliyeva, Şəfəq Əliyeva, Nəsibə Eldarova, aktyorlar Könül Qasımova, Rəsmiyyə Nurməmmədova, Zülfiyyə Qurbanova, Zümrüd Qasımova, Ülviyyə Əliyeva və başqaları ifa edirlər. Uşaq rollarını isə “Oyuq” teatr-studiyasının yetirmələri oynayırlar. Ekran işində peşəkar aktyorlarla yanaşı, hər iki müharibənin canlı şahidləri – əlil və qaziləri, həmçinin əlilliyi olan həvəskar aktyorlar da rol alıblar.
Film Əmək və Əhalinin Sosial Müdafiəsi Nazirliyi, “RS Prodakşn” və "OYUN" inklüziv teatrının birgə layihəsidir.
“Əli bəy Hüseynzadənin Azərbaycan İstiqlal Muzeyində qorunan irsi” kitab-albomu ictimaiyyətə təqdim edilib
Milli İrsi Mədəni Tarixi Araşdırmalar (MİMTA) Fondu və Azərbaycan İstiqlal Muzeyinin birgə layihəsi əsasında çap olunmuş “Əli bəy Hüseynzadənin Azərbaycan İstiqlal Muzeyində qorunan irsi” kitab-albomunun təqdimat mərasimi keçirilib.
Bu tədbirdə Azərbaycan İstiqlal Muzeyinin direktoru Sədi Mirseyibli çıxış edərək kitab-albomun əhəmiyyətindən söhbət açıb. O bildirib ki, kitab Əli bəy Hüseynzadənin qızı Feyzavər Turanın Azərbaycan Respublikası Mədəniyyət Nazirliyinə – Azərbaycan İstiqlal Muzeyinə hədiyyə etdiyi, şəxsi təşəbbüsü ilə atasına, qardaşına və özünəməxsus 161 ədəd maddi-mədəniyyət nümunəsindən ibarət kolleksiyanı əhatə edir.
MİMTA Fondunun icraçı direktoru Pərviz Əmirov deyib: “Əli bəyin bu kitab-albomda bizlərə təqdim olunan şəxsi əşyalarına baxarkən biz bir daha o böyük mütəfəkkirin nə qədər kübar, alicənab və milli mənsubiyyətinə yüksək dəyər verən şəxsiyyət olduğunu görürük. İnanıram ki, MİMTA Fondunun və Azərbaycan İstiqlal Muzeyinin birgə layihəsi əsasında çap olunmuş bu nəfis kitab Əli bəyin həyat və fəaliyyətini araşdıranlar üçün faydalı bir tədqiqat materialı olacaqdır”.
Həmçinin “Füyuzat” jurnalının baş redaktoru Mübariz Yunus bildirib ki, kitab-albom “Füyuzat” dərgisinin 15 illiyinə gözəl töhfədir: “Bu kitab-albomda XIX əsrin sonu – XX əsrin əvvəllərində Azərbaycanın böyük mütəfəkkiri, milli məfkurənin yaranmasında, milli maarifçilik hərəkatının tərəqqisində böyük xidmətləri olan Əli bəy Hüseynzadənin mirası toplanmışdır. İnanırıq ki, bu kitab xalqımız və ziyalılarımız tərəfindən rəğbətlə qarşılanacaq”.
Türkiyə-Azərbaycan ortaq tarixində Əli bəyin xidmətlərini diqqətə çatdıran Bakı Yunus Əmrə İnstitutunun müdiri Selçuk Karakılıç Ə.Hüseynzadənin yaradıcılığına toxunaraq onun fikirlərinə nəzər salmağın vacibliyini vurğulayıb.
Tarix elmləri doktoru, professor Solmaz Tohidi çıxışında Əli bəyin düşüncə tariximizdəki roluna diqqət çəkib, onun irsinə sadiqliyin vacibliyini vurğulayaraq ərsəyə gətirilən işi yüksək qiymətləndirib.
Akademiyanın müxbir üzvü, professor Könül Bünyadzadə də Əli bəy ideyalarının yaşadılmasını milli şüurun müasir nəslə aşılanması baxımından mühüm hesab edərək kitabın hazırlanmasına görə MİMTA Fonduna və İstiqlal Muzeyinə minnətdarlığını bildirib.
Çıxış edən digər qonaqlar da Əli bəy Hüseynzadənin Azərbaycan milli məfkurəsinin formalaşmasında böyük rolundan bəhs edib, Əli bəy irsinin tədqiqi, təbliği və gələcək nəsillərə çatdırılması baxımından kitab-albomun Azərbaycan mədəniyyətinə və elminə gözəl töhfə olduğunu bildiriblər.
“Hələ də öz rəngindədir xatirələr” (Gülay Tahirli) - SW ekspertlərinin seçimi
Ədəbiyyatımızın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun final mərhələsinə bu gün start verilir.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən və devizi “Sonda ədəbiyyat qalib gələcək” olan festivalın əsas favoritləri ilə oxucuları tanış etməkdəyik.
Gülay Tahirli
20.08.1999 tarixində Naxçıvan Muxtar Respublikasının Babək rayonunun Cəhri kəndində doğulub. 2020-ci ildə Naxşıvan Dövlət Universitetinin Azərbaycan dili və ədəbiyyatı müəllimliyi ixtisasını bitirib. Hazırda BDU-nun Filologiya fakültəsinin II kurs magistrantıdır.
Şeirləri ilə mütəmadi olaraq dövri mətbuatda çıxışlar edir.
Gülay Tahirli obrazlı ifadələr işlətməyi xoşlayır, aforizmlər qurur, didaktikaya meyl edir. Hardasa başa düşüləndir. Poeziyada müdriklik atmosferi qurmağa çalışır gənc yazar.
***
Qanadlarını açaraq yox,
Gözlərini qapayaraq uçur adamlar.
Hərəkətsiz dayananda atılır
Ən böyük addımlar.
Ən uzun yollar da beləcə fəth edilir.
Şüşədən yox,
Sevgidəndir ürəyin eynəyi.
Nə qədər çox sevsən,
O qədər çox görərsən.
Kirpiklərin qovuşmağı söküb atırmış
bütün tikanlı məftilləri,
Sərhəd yox,
Hüdud yox,
Hər şey əlçatandır.
Bir buludun ətəyindən yapışıb
Dünyanı damla-damla gəzə bilirəm.
Sonra yolumu günəşdən salıb
Sevgilimin yanaqlarında üzə bilirəm.
Nə zaman darıxsam,
Əlimi ürəyimin üstünə qoyub
səndə oluram,
Yeri gələndə mən sən də oluram, Allah!
Nə bilim, bəlkə də, günahkaram,
Bağışla...
Bağışla,
Bütün sərhədlərini aşıram, Allah!
***
Sərv boylu qadınlar axtarma daha,
Sərv boyunda kitab oxuyan qadınlar var axı...
Neyləyirsən kaman qaşları,
Yoxdursa dərin baxışları?
Bəsdir daha düşdün ox kirpiklərin izinə,
Nəyinə gərək o kirpiklər
Bir Şəhriyar misrasında,
Bir Füzuli beytində
islanıb-islanıb bükülmürsə?
Qönçə dodaqlar solar bir gün,
Elə qadın sev ki,
Solmayan şeirlər pıçıldasın dodağı
Günün hər çağı...
Zülfün kəməndinə düşdüyün bəsdir,
Ruhun azadlığını,
Fikrin genişliyini qucaqla.
Aldatdılar səni alma yanaqlarla,
Bal dodaqlarla,
Sənə gözəllik anlayışını yanlış öyrətdilər, adam.
Elə qadın sev ki,
Dərinliyində üzə biləsən,
Minlərlə dayaz ürəkdə yaşamaqdansa,
Bir ürəyin dərinliyində boğulub öləsən...
***
Nə olsun, aradan çox zaman keçib,
Nə olsun, salamımız-sağolumuz yox.
Üzümün rəngi ilə həmahəng neçə payız,
Ürəyinlə həmahəng neçə qış keçib.
Qorxma!
Unudulmaqdan qorxma!
Hələ də öz rəngindədir xatirələr!
Ağ-qaraya uduzmamışam hələ.
Sarılar, mavilər öz yerində,
Heç nə əskilməyib parıltılardan.
Qorxma, kölgələrdə azmamışam hələ.
Oğrun-oğrun dəmlədiyimiz
Pürrəngi çay da soyumayıb.
Neçə-neçə payız keçib,
Neçə-neçə külək əsib,
O qollu-budaqlı ağacların
Xəzəli qol-budağındadır yenə.
Hörümçəklər tor qura bilməyib
Söykəndiyimiz divarların küncündə,
O kəpənəklər bir günə ölmədi,
Çiçəklərin üstündən uçuşurlar hələ də.
Mən "niyə"lərin üstünə
Çoxdan torpaq atmışam.
Ruhu şad olsun bütün "kaş ki"lərin!
Arxaya dönüb baxan da deyiləm,
Arxadakılar məndən xəbərsiz hopub canıma.
Unudulmaqdan qorxma!
Yanaqlarım islanır dayanan yerdə,
Beyin öz işindədir, ürək öz işində..
***
Göz yaşı axır həyatımın hər anından,
Saatların, dəqiqələrin ruhu sızıldayır
Nəfəsim hər ötüb keçdikcə canımdan...
Mənə gələndə mürəkkəbinmi qurtardı, Tanrı?
Dərddən başqa bir şey tapa bilmədinmi
Qələmini doldurmağa?
Ehhh, mən alışmışam
Hər gün bir ümidi pəncərəndə soldurmağa...
Sən məni boş ver, Tanrı!
Anladım ki, mən gözəl günlərə,
Xoşbəxt adamlara gedən yolam sadəcə.
Çətin olur yaradıcılığın ilk dövrü,
Fəqət zaman keçdikcə
daha gözəl şeirlər yazır şair.
Ən gözəl binalar ən son qurulanlardır.
Rəssamın bir ilk rəsminə bax,
Bir də sonradan çəkdiklərinə...
Sən də bacaraqsan, Tanrı!
Məni boş ver...
Zaman keçəcək,
Gün gələcək,
Daha gözəl adamlar yaradacaqsan!
Ağrısız, acısız, xoşbəxt adamlar...
Amerikada Firəngiz Əlizadənin yubiley konsertləri keçirilib
Musiqimiz sərhədləri aşmaqdadır. Hələ ilin əvvəlində elan olunmuş ABŞ-ın “Kronos” kvartetinin festivalı apreldə, onların doğma şəhəri San-Fransiskodan start götürərək, Kaliforniyanın bir neçə şəhəri - Los-Anceles, San Dieqo və Sakramentoda davam etdirilir.
Kvartetin saytında qeyd edildiyi kimi festivalın proqramında xüsusi olaraq ansambl üçün bəstələnmiş əsərlər səsləndiriləcək.
AzərTAC xəbər verir ki, Morton Feldman və Stiv Rayxın əsərləri ilə yanaşı Firəngiz Əlizadənin üç əsəri – “Muğam Sayağı”, “Oasis” və “Dance” proqramda əsas yer tutur.
Məşhur bəstəkarın yubileyi onun yalnız kamera əsərləri ilə qeyd olunmur. Simfonik orkestr üçün yazılmış əsərlərə də proqramda geniş yer verilib. Almaniyada uğurlu premyerası baş tutan “Sommer-Eindruck” və İngiltərədəki “NİZAMİ Cosmology” misteriyası ilə yanaşı, ABŞ-ın Sent Luis şəhərində Amerikanın məşhur simfonik orkestri St.Louis Symphony Orchestranın ifasında iki gün ərzində ardıcıl olaraq Azərbaycan bəstəkarının “Nağıllar” əsəri səslənib. Povell Hall konsert zalının dinləyicilərlə dolu məkanında tanınmış Ukrayna dirijoru Kirill Karabitsin təqdim etdiyi maraqlı simfonik konsert alqışlarla qarşılanıb.
S.Prokofyevin Beşinci simfoniyası və Argentina bəstəkarı Alberto Xinasteranın fortepiano konserti ilə yanaşı, Firəngiz Əlizadənin füsunkar “Nağıllar”ı səslənib.
Amerikalı jurnalist Fred Blumenthal qeyd edib ki, bu gecənin konsert proqramında yeganə “canlı” bəstəkar olan F.Əlizadə artıq klassiklər dəstəsinə aiddir. St. Louis Symphony Orchestra ifasında ilk dəfə səslənən bu əsər, Fred Blumenthalın göstərdiyi kimi aydın musiqi dilinə, parlaq orkestrləşməyə və tembr boyaları seçimində ixtiralara malikdir. Məlum olduğu kimi “Nağıllar”ı bəstəkar İsveçrə Beynəlxalq Festivalı “Luzerne Musikfestwochen” üçün yazıb və ilk dəfə 2005-ci ildə Finlandiya dirijoru Süzanna Myayalkinin rəhbərliyi ilə Sviss Symphony Orchestr tərəfindən ifa edilib. Lyutsern premyerasından sonra bu əsər dəfələrlə Avropanın ən nüfuzlu orkestrlərinin ifasında səslənib.
F.Əlizadənin yubiley konsertləri davam etdikcə “ciddi”, eləcə də maraqlı musiqi həvəskarlarına yeni sevinclər bəxş edir.
