Super User
Bakıda Abay Günü münasibətilə xatirə tədbirləri keçirilib
Avqustun 10-da Bakıda Abay Kunanbayev küçəsində böyük qazax şairi və mütəfəkkiri Abay Kunanbayevin anadan olmasının 177 illiyi münasibətilə tədbir keçirilib.
AzərTAC xəbər verir ki, xatirə tədbirdə yaradıcı ziyalılar, abayşünas alimlər və yazıçılar iştirak ediblər.
Əvvəlcə tədbir iştirakçıları Abayın xatirə lövhəsinin önünə gül dəstələri qoyub, onun xatirəsini ehtiramla anıblar.
Qazaxıstan Azərbaycandakı səfiri Serjan Abdıkarimov qonaqları Abay Günü münasibətilə təbrik edərək bildirib ki, onun misilsiz yaradıcılıq irsi qazax xalqının gələcək nəsillər üçün daim əhəmiyyəti kəsb edən mənəvi sərvətidir. Səfir Abayın mənəvi düsturu olan “Adam bol!” (Adam ol!) fikrinin mahiyyəti, onun humanizmə, əməksevərliyə və maarifçiliyə çağırışları haqqında söz açıb. Qeyd edib ki, onun ən yaxşı tələbələri sonradan qazax əhalisinin öz torpağa sahib olma hüququ, özünüidarəetmə, dilin qorunması, milli mədəniyyəti və ənənələri uğrunda mübarizə aparan “Alaş” partiyasını və Alaş muxtariyyətını yaradıblar.
Diplomat Abayın əsərlərinin Azərbaycan dilinə tərcümə edilməsi ilə bağlı uzunmüddətli işə, bütün türk dünyası və dünya ədəbiyyatı üçün əhəmiyyət kəsb edən onun irsinə qarşı hörmət və sevgiyə görə abayşünaslara minnətdarlığını bildirib.
Tədbirdə çıxış edən natiqlər diqqətə çatdırıblar ki, Abay xalqını xoşbəxtliyə və rifaha aparan, onlara düzgün yol göstərən dahi övladdır, alimdir və qazaxların fəxridir, onun yaradıcılığı isə bütün bəşəriyyətə, o cümlədən qardaş Azərbaycan xalqına da mənsubdur.
Aksiya geosiyasət, din, ədəbiyyat və incəsənət problemlərini araşdıran məşhur Azərbaycan tarixçisi, publisisti və teoloqu Teymur Atayevin “Abayın dahiliyi və ya XXI əsrdə mütəfəkkir portretinin yaratmaq cəhdi” kitabının təqdimatı ilə davam edib. Bu nəşrdə Abayın məşhur “Qara söz” əsəri təhlil edilir. Müəllif qazax tarixinin şanlı səhifələrinin və Abayın tərcümeyi-halından gələn mühüm epizodların onun şəxsiyyətini necə formalaşdırdığını və bununla görkəmli maarifçinin qazax düşüncəsinə əvəzsiz töhfələr verdiyini dərk etməyə çalışır.
Sözügedən kitabın təqdimatı Qazaxıstanla Azərbaycan arasında diplomatik münasibətlərin qurulmasının 30 illiyinin qeyd edilməsi çərçivəsində Bakıda Dənizkənarı Bulvarda quraşdırılan qazax yurtasında baş tutub.
Tədbir Abayın şeirləri və musiqisi əsasında yazılan məşhur mahnıların və musiqi əsərlərinin ifası ilə tamamlanıb. Qonaqlar həmçinin ənənəvi qazax xörəklərib, Qazaxıstanın müasir inkişafı, mədəni və turizm cəhətdən görməli yerləri haqqında videoçarxı izləyiblər.
Ramil Ələkbərov: “Azərbaycanfilm” kinostudiyası Kino Agentliyinin tabeliyində fəaliyyət göstərəcək
Çox güman ki, bu ilin sonuna qədər Azərbaycan Respublikasının Kino Agentliyi fəaliyyətə başlayacaq. Digər kino qurumları kimi C.Cabbarlı adına “Azərbaycanfilm” kinostudiyası da Kino Agentliyinin tabeliyində fəaliyyət göstərəcək.
Bu sözləri “Azərbaycanfilm” kinostudiyasının mətbuat xidmətinin rəhbəri Ramil Ələkbərov bildirib.
“Strukturun tam olaraq fəaliyyət mexanizmi agentliyin yaradılmasından sonra məlum olacaq”, - deyə R.Ələkbərov vurğulayıb.
Moskvada Müslüm Maqomayevin 80 illiyi qeyd olunacaq
Oktyabrın 29-da Moskvada “Crocus City Hall”da SSRİ və Azərbaycanın Xalq artisti Müslüm Maqomayevin anadan olmasının 80 illiyinə həsr olunan konsert keçiriləcək.
AzərTAC xəbər verir ki, konsert proqramında Rusiya estradasının və operasının ulduzları iştirak edəcəklər. Konsertdə M.Maqomayevin repertuarından mahnı və ariyalar səsləndiriləcək.
Qeyd edək ki, “Crocus City Hall”un ikinci mərtəbəsinin foyesində Müslüm Maqomayevin xatirəsinə həsr olunan muzey var. Muzeyi ziyarət edəcək tamaşaçılar görkəmli ifaçının şəxsi əşyalarını, onun çəkdiyi rəsmləri, ailə arxivindən fotoşəkilləri və musiqi karyerası ərzində aldığı çoxsaylı beynəlxalq mükafatları görmək imkanı əldə edəcəklər.
Azərbaycan Respublikası Mədəniyyət Nazirliyinin Apellyasiya Şurasının növbəti iclası keçirilib
Cari ilin 8 avqust tarixində Azərbaycan Respublikası Mədəniyyət Nazirliyinin Apellyasiya Şurasının növbəti iclası keçirilib. İclasda Azərbaycan Respublikası Mədəniyyət Nazirliyində vakant olan dövlət qulluğu vəzifələrinin tutulması ilə bağlı Dövlət İmtahan Mərkəzinin 21 aprel 2022-ci il tarixində elan etdiyi müsabiqə üzrə keçirilmiş müsahibələrin nəticələrinə yenidən baxılması ilə bağlı Aytən Elxan qızı Rəhimlinin, Səbinə İlqar qızı Əhədlinin və Şəmsiyyə Zakir qızı Əzizlinin apellyasiya şikayətlərinə baxılmışdır.
İclas zamanı adları çəkilən namizədlərin müsahibələrlə bağlı fikirləri dinlənilmiş, Dövlət İmtahan Mərkəzinin 3 avqust 2022-ci il tarixli məktubu ilə təqdim edilmiş müsahibələrin videoçəkilişinə və sənədlərinə əsasən Şura üzvlərinin hazırladığı rəyləri müzakirə olunmuşdur. Sonda Apellyasıya Şurasının üzvlərinin səsverməsinə əsasən iclasda baxılan məsələlərə dair Qərarlar qəbul edilmişdir.
Aytən Elxan qızı Rəhimlinin şikayəti ilə bağlı qəbul edilən Qərara əsasən 15 iyul 2022-ci il tarixində onunla keçirilmiş müsahibənin nəticəsi dəyişdirilərək namizəd iddia etdiyi vakant vəzifəyə uyğun hesab edilmişdir.
Səbinə İlqar qızı Əhədlinin və Şəmsiyyə Zakir qızı Əzizlinin şikayətləri ilə əlaqədar qəbul edilən Qərarlara əsasən isə həmin namizədlərlə müvafiq olaraq 15 və 20 iyul 2022-ci il tarixlərində keçirilmiş müsahibələrin nəticəsinə dair müsahibə komissiyasının qərarları tam obyektiv və əsaslı hesab edilərək dəyişdirilmədən qüvvədə saxlanıl
Nəticələr açıqlanıb
Azərbaycan Respublikasının Mədəniyyət Nazirliyi Dövlət İmtahan Mərkəzi ilə birgə uşaq musiqi, incəsənət, rəssamlıq, muğam, aşıq məktəb və mərkəzlərinə müəllimlərin işə qəbulu üzrə avqustun 7-də keçirilmiş test imtahanının nəticələri açıqlanıb.
Test imtahanında iştirak üçün qeydiyyatdan keçmiş 1992 nəfərdən 283 nəfər imtahana gəlməyib.
İmtahanda iştirak etmiş namizədlərin imtahan nəticələri və cavab kartlarının qrafik təsviri Dövlət İmtahan Mərkəzinin rəsmi internet saytında yerləşdirilmişdir.
Mədəniyyət Nazirliyinin 2022-ci il 20 aprel tarixli 119-f nömrəli əmri ilə təsdiq edilmiş “Azərbaycan Respublikasının Mədəniyyət Nazirliyi tərəfindən uşaq musiqi, incəsənət, rəssamlıq, muğam, aşıq məktəb və mərkəzlərinə müəllimlərin işə qəbulu Qaydaları"nın tələblərinə uyğun olaraq təşkil edilmiş test imtahanında namizədlərə 70 test tapşırığı təqdim olunmuşdur. 40 tapşırıq seçilən müvafiq sahə üzrə ixtisas biliklərini, 10 tapşırıq pedaqoji bacarıqları, 10 tapşırıq məntiqi təfəkkürü, 10 tapşırıq isə ümumi dünyagörüşünü yoxlayan qapalı tipli test tapşırıqlarıdır. Hər düzgün cavab bir balla qiymətləndirilir. Səhv cavablar ümumi nəticəyə təsir göstərmir.
Xatırladaq ki, test imtahanında toplanılması mümkün olan maksimum nəticə 100 faizlə ifadə edilir.
İmtahanda təqdim edilmiş test tapşırıqlarından 50 faizini düzgün cavablandıraraq 35 bal toplamış namizədlər (Bakı, Sumqayıt və Gəncə şəhərlərində, Abşeron rayonunda yerləşən məktəblərdə işə qəbul olunmaq istəyən namizədlər istisna olmaqla) uğur qazanmış hesab edilirlər.
Bakı şəhərində yerləşən məktəblər üzrə işə qəbul üçün imtahanda təqdim edilmiş test tapşırıqlarından 70 faizini düzgün cavablandıraraq 49 bal toplamış namizədlər, Sumqayıt və Gəncə şəhərlərində, Abşeron rayonunda yerləşən məktəblər üzrə isə imtahanda təqdim edilmiş test tapşırıqlarından 60 faizini düzgün cavablandıraraq 42 bal toplamış namizədlər uğur qazanmış hesab edilirlər.
Test mərhələsində tələb olunan keçid balını toplayaraq uğur qazanan namizədlər müsahibə mərhələsinə buraxılırlar.
Test imtahanında tələb olunan keçid balını toplayaraq uğur qazanmış namizədlərlə keçiriləcək müsahibələrin vaxtı və yeri barədə Nazirlik tərəfindən əlavə məlumat veriləcəkdir.
Mədəniyyət Nazirliyində yeni təyinat olub
Azərbaycan Respublikasının mədəniyyət naziri Anar Kərimovun əmri ilə Yusubov Azər Namiq oğlu Mədəniyyət Nazirliyinin Şəki Regional Mədəniyyət İdarəsinin rəisi vəzifəsinə təyin edilib.
A.Yusubov sonuncu təyinata qədər Şəki Apelyasiya Məhkəməsində baş məsləhətçi-sədrin köməkçisi məsul vəzifəsində çalışıb.
A.Yusubov dövlət qulluğunun kiçik müşaviridir.
“İstəyirəm ki, bir yerdə ölək” – dedin... - Çağdaş rumın şeirindən seçmələr
“Ədəbiyyat və incəsənət” portalı sizə çağdaş rumın şeirindən nümunələri tanınmış şair, tərcüməçi, Azərbaycan Yazıçılar Birliyinin katibi Səlim Babullaoğlunun tərcüməsində təqdim edir.
Bu gün siz Ana Blandiana və Daniel Korbunun, sabahsa Adi Kristi və Nikita Danilovun şeirləri ilə tanış olacaqsınız.
Ana Blandiana
Görkəmli rumın şairəsi, adı XX əsrin böyük ədibləri arasında yer almış Ana Blandiana 2016-cı ildə, dekabrın 9-da, öz facebook səhifəsində, ərinin ölümündən bir gün sonra bu sözləri yazmışdı: “Yarım əsrdən artıqdır ki, sevdiyim və sevgisi olmadan sağ qalmayacağım ərim Romulus Rusanın (1935-2016) ölümünü elan edəcəyim heç vaxt ağlıma gəlməzdi...” Əlli altı il bir yerdə yaşamışdılar. Çauşesku rejimində və sonrakı qarışıq zamanda uzun illər bir-birlərinə arxa-dayaq olmuşdular. 1979-cu ildə, Yuneskonun çətiri altında Rumıniyada Siyasi Repressiyalar Memorialını təsis etmişdilər ki, nasir, publisist, xüsusi cazibəyə malik xeyirxah bir adam olan Romulus Rusan Ana Blandiana ilə bərabər insan haqları, hüquq müdafiəçisi kimi fəaliyyətə başlamışdı. “Məhəbbət və ölümün insanları ayıra bilməməsi haqqındadır bu şeirlər. Kitablarımın ən metafizikidir”- öz ağıları, mərsiyələri barədə belə söyləyir Ana Blandiana.
Rumiya PEN təşkilatının fəxri sədri, Stefan Mallarme Akademiyasının və Avropa Poeziya Akademiyasının üzvü, Avropa Azadlıq Şairi”, Qriffin-poeziya, Herder ədəbiyyat ödüllərinin sahibi. “Cəm şəkilçisində birinci şəxs” (1964), “Ölümün sabahı günü” (1996), “Öləziyən hisslər” (2004) və başqa 26 şeir toplusunun müəllifidir. Təqdim edilən şeirlər “Müəyyən mövzu ilə bağlı variasiyalar” (2018) kitabından götürülüb.
***
«Güzgü ilə müqavilə bağlamışam, - demişdin,
-Səni mənim gördüyüm kimi göstərəcək,
qəbrə qədər sədaqətli olacaq sözünə.”
Onillər keçirdi,
Güzgü sözünə sadiqdi:
Məni sığallı, təmiz,
sənin nurunla boyanmış göstərirdi;
Sanki nağıllardakı
dirilik suyu idim, dəyişimirdim.
İndi güzgüyə baxıram
təşvişlə dəyişikliyi gözləyirəm.
Amma görə bilmirəm.
Hələ də mənə baxdığının
başqa nə dəlili olmalıdır ki ?!
***
Əgər evimdə o əvvəlki illərdəki tək yenə də mikrofonlar quraşdırılsaydı,
səs yazanlar, dinləyənlər hökmən dəli sanardılar məni;
yazırlar və səninlə ən adi şeylər haqqında danışdığımı,
hər ehtimala qarşı dediyim sözləri, sənin rəyini bilmək istədiyimi
eşidirlər; arabir, indiki zamanda, elə-belə “səni sevirəm” deyirəm,
işığı söndürməzdən qabaq “gecən xeyrə qalsın” söyləyirəm.
Dinləyənlərin arasında öz işində təzə olanlar var - getdiyini bilməyənlər,
sənin cavabsızlığını şübhəli sanacaqlar, hesab edəcəklər ki,
onlar başa düşməsin deyə əl hərəkətləri,
işarələrlə doldurursan sükutu.
***
“Kişi hardadır? - ilk dəfə sənsiz bazara gələndə turp, cəfəri,
bəxtin gətirsə gicitkan aldığın nənələr soruşurdular.
- Yox, gərək, sizi tək buraxmasın, olmaz”.
“Bazardakı nənələr, evin kişisi hardadır deyib, sənin soruşurdular”
- qayıdanda danışdım sənə, çox xoşuna gəldi, elə məğrur görkəm aldın ki,
məsləhət verdiklərini söyləməyi unutdum, deyirdilər ki,
yox, gərək, sizi tək buraxmasın, olmaz.
***
Özümə sual etdim:
qayıtsaydın sənə nə demək istərdim
və qərara gəldim ki,
bu söz olmayacaqdı,
yalnız şəkillər.
Mən sənə
alatoran vaxtı
pəncərəmdən görünən
ağacların tacı arasından boylanan
göyüzünü göstərərdim.
Ya da tikanlar arasından
qanlı yara kimi görünən,
yanında şəkil çəkdirdiyin bu kolu.
Ya da vaqon pəncərəsindən
ötüb keçən biçilmiş zəmiləri, düzləri,
uzunsov tayaları.
Sigetaya gedirdik onda.
Sözə gəlməz ismarışlar,
sirrin çaparları,
sevənlər üçün
baxışların yetərli olması kimi
ali həqiqətin
dəlilləri.
***
Bayram günləri gəlişini,
varlığını daha yaxşı hiss edirəm,
orda da bayramlar var?
Ya başqaları sevinərkən
məni tək qoymamaq üçün gəlirsən?
Təbəssümün günəşin şüaları kimi
otaqları dolaşır,
pişik də təlaşla arxanca düşür.
Nəsə baş verir, o hiss edir.
***
“İstəyirəm ki, bir yerdə ölək”- dedin.
“Fikirləşirsən ki, səndən yeddi il az yaşamağım düz olardı?”
Ciddiyyətlə cavab verdin ki, əbədiyyətdə də bir yerdə
ola bilməmiz üçün başqa yol yoxdur.
Məntiqin o qədər inandırcı idi ki, razılaşdım,
bir az da elə-belə, hər halda bir yerdə ölmək pis fikir deyil.
Amma, indi, sənin o vaxtkı ciddiyyətinlə özümdən soruşuram ki,
o dünyada səni necə tapacam, necə görüşə bilərik.
Yeganə imkan sərhəddə məni gözləməyindir,
amma nə zaman gələcəyimi söyləyə bilmirəm,
bir də inanmıram ki, səni orda bəlli olmayan bir müddətdə
gözləməyə icazə versinlər.
Belə ehtimal edirəm ki, orda da, o xaosda da
biz eynən bu dünyadakı kimi, yaşanan hər sonsuzluq günü
bir-birimizi axtaracağıq,
bir-birimizi tapmaq sevincini yaşayana qədər.
Daniel Korbu
Şair, nasir, ictimai xadim. 1953-cü ildə anadan olub. 1979-cu ildə “Ədəbi Rumıniya” jurnalındakı publikasiyası ilə ədəbi debüt edib. Onlarla poetik toplunun müəllifidir. FEED BACK festivalının direktorudur. Əsərləri əsas Avropa dillərinə çevrilib. Təqdim edilən şeirlər şairin Parisdə nəşr edilən “Les documents du Chaos” (2002) kitabından götürülüb.
Ürəyin kölgəsində
Əgər işıq nurun kölgəsidirsə,
onda nurun kölgəsindən qovulan kimi
ürəyinin kölgəsindən
qovulacam.
Onun şanına sevinəcəm
və ölümü müşayiət edən sözlər
qırmızı sarğıdan boylanan qan kimi seziləcək.
Tənha evdə tənha adam.
Xoşbəxtlik deyə bir sözü təkrar edir durmadan.
Hər şeyi onu həvəsləndirir və ruhdan salıb iyrəndirir.
Sevgidən nifrətə yol keçib, aldanışları sığallayıb.
Sığal çəkib şehə, sevinib, ağlayıb.
hər dəfə yoxluq özünü göstərəndə
boşluq doğulub,
o boşluqla ürəyini doldurub,
nişan verib məzarını öz-özünə
yoxluğun və boşluğun.
Tənha evdə tənha adam.
Xoşbəxtlik deyə bir sözü təkrar edir durmadan.
Günün fotosu: Avropa İttifaqı Rusiya vətəndaşlarına bağlı qapı elan edəcək
Günün fotosu: Avropa İttifaqı Rusiya vətəndaşlarına bağlı qapı elan edəcək
Estoniya və Finlandiyanın baş nazirləri Ukrayna prezidenti Volodimir Zelenskinin Rusiya vətəndaşları üçün Avropa İttifaqı ölkələrinin qapılarının bağlanması çağırışını dəstəkləmişlər. Bu çağırışın digər ölkəlırdə də dəstəklənəcəyi gözlənilir.
Rusiya prezidentinin mətbuat katibi Peskovun bu aksiyanı nasist Almaniyasının siyasətinin bənzəri adlandırması isə gülüncdür. Bu vəziyyətdə kimin nasist olması sual doğurmur.
Foto: Euronews
Bu gün bütün Azərbaycan məni tanıyır - “Bizim Cəbiş müəllim” filmindəki Makedonun etirafı
“Bəziləri deyir ki, Həsən Seyidbəyli məni yolda görüb, filmə çəkilməyə dəvət edib. Amma bu belə olmayıb. Mən Pirşağıda yaşayırdım, orada mədəniyyət evinin qabağında oturub, dostlarımla zarafatlaşırdım. Hamımız o vaxt onu tanıyırdıq. Onu görən kimi ayağa qalxdıq. Bağı Pirşağıda idi, tez-tez gəlib gedirdi. Gördü ki, stolun üstündə bilyard da var, nərd də. Dedi ki, "gəl nərd oynayaq, əgər uduzsam səni bir gözəl kinoya çəkəcəm, səni bütün Azərbaycanda tanıyacaqlar". Fikri nərddə deyildi, özü bilərəkdən mənə uduzdu ki, filmə çəksin. Bu gün həqiqətən də bütün Azərbaycan məni tanıyır. Allah o kişiyə rəhmət etsin".
“Ədəbiyyat və incəsənət” xəbər verir ki, bunu moderator.az-a açıqlamasında "Bizim Cəbiş müəllim" filminin Makedonu Aqil Ağacanov deyib. O, daha sonra əlavə edib.
"Mən filmdə çəkilə-çəkilə hərbi xidmətə çağırdılar. Çağırış vərəqəsini gətirib rejissor Həsən Seyidbəyliyə göstərdim. Rəhmətlik Muxtar Maniyevin qardaşı da Hərbi Komissarlıqda rəhbər işləyirdi. O kömək etdi, məni əsgərlikdən saxladılar, hərbi xidmətdən möhlət verdilər. Film il yarım çəkildi, daha sonra getdim əsgərliyə" deyə Aqil Ağacanov deyib. O, daha sonra həmkarı, Tanya obrazının ifaçısından danışıb. "Tanya ilə məni illər sonra Telman Adıgözəlov "Kinoklub" verilişində görüşdürdü. Məni o vaxt verilişə dəvət edəndə dedilər ki, sənə sürprizimiz var. Fikirləşdim ki, yəqin Tanya olar da. Gəmiqayırma zavodunda çalışırdı, indi təqaüdə çıxıb. İki qız övladı, nəvələri var. Allah canını sağ etsin" deyə sənətçi bildirib.
Mədəniyyət Baş İdarəsi Xalq artisti Zabit Nəbizadə ilə görüş keçirib
Bakı Şəhər Mədəniyyət Baş İdarəsinin Aşıq Rza Qobustanlı adına Mədəniyyət evində "Qonağımız var" layihəsi çərçivəsində Xalq artisti, muğam ustadı Zabit Nəbizadə və tələbələri ilə görüş keçirilib.
Baş İdarədən verilən məlumata görə, görüşdə Milli Məclisin deputatı Aydın Hüseynov, Qaradağ Rayon İcra Hakimiyyətinin başçısı Süleyman Mikayılov və digər qonaqlar iştirak ediblər.
Qeyd edək ki, rəngarəng konsert proqramı ilə çıxış edən Xalq artisti Zabit Nəbizadə və tələbələrinin ifaları tamaşaçılar tərəfindən alqışlarla qarşılanıb.
