Super User
7 saatdan az yatırsınızsa, bunları bilməlisiniz
Yuxu bədən sistemlərini yavaşladaraq və rahatladaraq oyandığınızda özünüzü fiziki olaraq daha güclü hiss etməyinizi təmin edir. Müntəzəm və keyfiyyətli yuxu insana güc, enerji verir.
Az yatmaq isə... Əgər 7 saatdan az yatırsınızsa, bu məlumatları mütləq oxuyun.
Az yatmaq insanı həm fiziki, həm də ruhsal olaraq zəiflədir. İnsan özünü daima stresli hiss edir. Əgər qan şəkəriniz qaydasında deyilsə və narahatsınızsa, bunun səbəbi az yatmaq ola bilər.
7 saatdan az yatmaq bu riskləri artırır
İflic
Diabet
Depressiya
Kökəlmək
İnfarkt
Yaddaşsızlıq
Təzyiq
Keyfiyyətli yuxu həm də eyni vaxtda yatıb, eyni vaxtda oyanmaqdır. Bədənin izlədiyi daxili bir saat var, bir gecə gec, bir gecə tez yatmaq bu ritmi poza bilər. Ona görə də çalışın yatmaq və oyanmaq üçün bir proqram yaradın. Bu, daha tez yuxuya getməyə və rahat oyanmağa kömək edəcək.
Keyfiyyətli yuxu üçün bunları bilməlisiniz
Komfort, İşıq səviyyəsi (qara pərdə istifadə edin)
Otaq temperaturu (otağın havası 15.6-19.4 dərəcə arasında olmalıdır)
Keyfiyyətli yastıq
Oyandıqdan sonra 5-15 dəqiqə günəş işığı qəbul edin. Günəş vücudunuza günün başlanğıcı olduğunu hiss etdirəcək və daxili bir gerisayım başladacaq. Bu, yuxu düzəninizi təmin edəcək və gecələr yuxuya getməyi tezləşdirəcək.
Kofe içdiyiniz saatlara diqqət edin
Nəzərə alın ki, kofein yuxunu qaçırdır. Kofeinin orqanizmdən çıxması 10 saat çəkir. Əgər gecə saat 12-də yatacaqsınızsa, 14:00-dan sonra kofe içməyin.
Gec saatlarda idman etməyin
Bədən yuxuya bu şəkildə hazırlanır: Ürək döyüntüsü yavaşlayır, beyin dalğaları yavaşlayır, vücud istiliyi düşür. İdman etmək isə ürək döyüntüsünü artırır, beyini aktivləşdirir, bədənin istiliyini artırır.
Mavi işıq
Yatmazdan əvvəl mavi işıqdan qorunun (telefon, kompüter, süni işıqlar). Mavi işıq beyinə gündüz olduğunu düşündürür və yuxu hormonunu (melatonin) üstələyər.
Düşüncələri kənara qoyun
Gecə yatmağa çalışarkən düşünməyin. Beyinin analitik fəaliyyəti açıq suallar yaradır. Beyin isə həll edilməmiş problemləri sevmir. Bu üzdən həll yolu tapmağa çalışan beyin sizə yatmağa icazə verməyəcək.
Bakıda “Global Woman Awards” mərasimi keçirilib
Zərif cinsin nümayəndələrinin mövcud cəmiyyətlərdəki rolunu ön plana çəkmək, öz bacarıqları ilə müəyyən səviyyə gəlmiş qadınları qlobal səviyyədə tanıtmaq üçün hər il dünyada müxtəlif beynəlxalq tədbirlər keçirilir. Bu il ölkəmizdə təşkil olunan “Global Woman Awards”ın mükafatlandırma mərasimi də bu cür beynəlxalq tədbirlərdən biridir.
“Millionaire Concept Network” və “Reputation” tərəfindən və “Business Woman” jurnalının rəsmi tərəfdaşlığı “Lujo Hotel Bodrum” və “Baku Holiday Travel”in baş sponsorluğu ilə təşkil olunan gecədə ölkəmizlə yanaşı, Ukrayna, Türkiyə, Rusiya, Qazaxıstan, Braziliya, İtaliya, Birləşmiş Ərəb Əmirlikləri, Qətər və digər ölkələrdən olan uğurlu fəaliyyətləri ilə seçilən, ölkənin ictimai-siyasi, mədəni və iş həyatında böyük nüfuza sahib olan xanımlar iştirak ediblər.
“Ədəbiyyat və incəsənət” portalı xəbər verir ki, “Global Woman Awards" layihəsinin əsas məqsədi uğurlu qadınları ictimaiyyətə daha yaxından tanıtmaq, onların işlərini təqdir etməklə digərlərinə ilham vermək, sosial həyata daha böyük işlərə imza atmalarına təkan verməkdir.
“Four Season Hotel”də baş tutan beynəlxalq tədbirdə natiqlər arasında “Estetik İnternational” klinikasinin təsisçisi və rəhbəri, türkiyəli tanınmış estetik cərrah Bülent Cihantimur, “Baku Holiday Travel” şirkətinin rəhbəri Ramil Rzayev və “Liv Hospital” qlobal qrup koordinatoru Meri İstiroti yer alıb.
Gecədə dünyanın bir çox ölkəsindən uğurlu iş xanımları və məşhur simalar iştirak edirdi. Onlar arasında Zehra Oney, Jvana Karim, Noura Akremi, Debbagh, Aziza Tokaşova, Meri İstiroti, ölkəmizdən isə Esmira Həsənova, Leyla İsmayılzadə, Elnarə Nahmədova, Sevinc Gülmalıyeva, Nigar Abbasbəyli, Elnarə de Birbuet, Turan Zülfiqarova, Nigar Rüstəmli, Kamilla Verdiyeva, Leyla İsmayilova, Madonna Alixanova, rəssam Günay Zebiç, moda dizaynerləri Gülnarə Xəlilova və Günel Behbudova, şairə Zəhra Bədəlbəyli, gimnast Zöhrə Ağamirova, psixoloq Təranə Paşayeva, vəkil Sima Yaqubova, tibb sektorundan Rəna Soltanova, Fidan Mustafayeva, Aida Mirzayeva, Şahnaz Quliyeva, Şahnaz Əhədova, Könül Ağamirova, Günel Adıgözəlova, Elnara Tuncay, müğənni Samirə Əfəndi və digərləri yer alıb.
Növbəti tədbirə 2023-cü ilin mart ayında paytaxtımız yenidən ev sahibliyi edəcək.
Tanınmış rəssam Lətafət Məmmədovanın "Rənglərin sirri" adlı fərdi sərgisi açılıb
Mədəniyyət Nazirliyinin təşkilatçılığı ilə Müasir İncəsənət Muzeyində UNESCO nəzdində Beynəlxalq İncəsənət Assosiasiyası, Beynəlxalq Plastik Sənətlər Assosiasiyası və İstanbulda Bakırköy Rəssamlar Dərnəyinin üzvü, azərbaycanlı rəssam Lətafət Məmmədovanın "Rənglərin sirri" adlı fərdi sərgisinin açılış mərasimi keçirilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, tədbirdə millət vəkilləri, tanınmış mədəniyyət və incəsənət xadimləri, ictimaiyyət nümayəndələri və digər qonaqlar iştirak ediblər.
İlk olaraq torpaqlarımızın azadlığı uğrunda şəhid olan igid Vətən övladlarının əziz xatirəsi bir dəqiqəlik sükutla yad edilib.
Sonra çıxış edən mədəniyyət nazirinin müavini Sevda Məmmədəliyeva qonaqları salamlayıb. Qeyd edib ki, Lətafət Məmmədova xaricdə Azərbaycan incəsənətini layiqincə təmsil edən rəssamlardan biridir. 1954-cü ildə tanınmış Azərbaycan rəssamı, Əməkdar mədəniyyət işçisi Hafiz Məmmədovun ailəsində anadan olan Lətafət Məmmədova Əzim Əzimzadə adına Rəssamlıq Məktəbini və Azərbaycan Dövlət İncəsənət İnstitutunu (indiki ADMİU) müvəffəqiyyətlə bitirib. O, 1978-1980-ci illərdə Baltikyanı ölkələrin bir sıra şəhərlərində keçirilən simpoziumlarda iştirak edib və mükafatlara layiq görülüb. Lətafət xanımın ilk fərdi sərgisi 1999-cu ildə Bakı şəhərində keçirilib.
Nazir müavini bildirib ki, Lətafət Məmmədova 2001-ci ildə Türkiyəyə dəvət olunub və İstanbulun müxtəlif bədii sənət ocaqlarında dərs deyib. Rəssam 2005-ci ildə İstanbulun Yaşılköy səmtində öz sənət emalatxanasını yaradıb. 2018-ci ildə Türkiyənin "Şərəf" mükafatına layiq görülüb.
Sevda Məmmədəliyeva çıxışının sonunda yeni fərdi sərgisi münasibətilə Lətafət Məmmədovaya təbriklərini çatdırıb. Deyib ki, Azərbaycan rəssamlıq sənətinə verdiyi töhfələrə görə fırça ustası Mədəniyyət Nazirliyinin fəxri fərmanı ilə təltif olunub. Nazir müavini fəxri fərmanı rəssama təqdim edib.
Azərbaycan Rəssamlar İttifaqının sədri, Xalq rəssamı Fərhad Xəlilov söylədi ki, atası Hafiz Məmmədov ona bir müəllim kimi rəssamlığın bütün sirlərini öyrədib: "Bu səbəbdən Lətafət Məmmədovanın sənətdə ən böyük müəllimi atasıdır. İndinin özündə belə emalatxanasında çalışarkən atasının ona öyrətdiyi texnikalardan istifadə edərək çox gözəl əsərlər ərsəyə gətirir".
Milli Məclisin Mədəniyyət komitəsinin sədri Qənirə Paşayeva vurğuladı ki, dünyada bir milləti və ölkəni ən gözəl təbliğ edən mədəniyyətdir: "Lətafət Məmmədovanın bu sənətdə bir qadın olaraq uğura imza atmağı bizi ikiqat sevindirir. Çünki dünyada və ölkəmizdə daha çox kişi imzalı rəssamlar tanınıb. Ona görə də bir qadın rəssam olaraq ölkəmizi dünyada yüksək səviyyədə təmsil etmək təqdirəlayiqdir".
Lətafət Məmmədovanın Türkiyədəki fəaliyyətinə toxunan Qənirə Paşayeva dedi ki, müstəqilliyimizin ilk illərində sərhədlər açılanda qardaş ölkədən dəvət olunanlar və oraya gedənlər mədəniyyət xadimləri idi. Bizim malik olduğumuz yüksək mədəniyyətin Türkiyədə təbliğ olunmasında bu insanların böyük rolu var. Həmin insanlardan biri də Lətafət Məmmədovadır.
Daha sonra Lətafət Məmmədova çıxış edərək sərginin təşkilində əməyi olan hər kəsə təşəkkürü bildirdi.
Sonda qonaqlar sərgi ilə tanış oldular.
Qeyd edək ki, yaradıcılığında əsasən lirik kompozisiyaların, qadın obrazlarının və təbiət təsvirlərinin üstünlük təşkil etdiyi rəssamın əsərləri Rusiyanın, Avropa ölkələrinin və ABŞ-ın muzeylərində, şəxsi kolleksiyalarda saxlanılır.
Oktyabrın 5-dək davam edəcək sərgidə Lətafət Məmmədovanın müxtəlif janrlarda 70-dən çox əsəri, həmçinin şəxsi kolleksiyasında saxladığı atası Hafiz Məmmədovun bir neçə əsəri nümayiş olunur.
Mexikoda Anar Kərimovun da qatıldığı Mondiacult-2022 öz işinə başlayıb
Xəbər verdiyimiz kimi, 2022-ci il sentyabrın 28-də Meksika Birləşmiş Ştatlarının paytaxtı Mexiko şəhərində UNESCO-ya üzv ölkələrin mədəniyyət nazirlərinin Mədəni Strategiya və Dayanıqlı İnkişafa dair Dünya Konfransı ("Mondiacult 2022") öz işinə başlayıb.
Tədbirə 115 ölkədən yüksək səviyyəli olmaqla, ümumilikdə 160 ölkədən nümayəndə heyəti qatılıb. Üç gün ərzində davam edəcək konfrans çərçivəsində iştirakçılar "İrs və Mədəni müxtəliflik böhran dövründə", "Yenilənmiş və gücləndirilmiş mədəniyyət siyasəti", "Mədəniyyət dayanıqlı inkişaf üçün", "Yaradıcı iqtisadiyyatın gələcəyi" mövzularında müzakirələr aparacaq.
Ölkəmizi bu tədbirdə nazir Anar Kərimovun rəhbərlik etdiyi nümayəndə heyəti təmsil edir. Nazir Anar Kərimovun "İrs və mədəni müxtəliflik böhran dövründə" mövzusunda çıxışı, habelə bir sıra ikitərəfli görüşlərin keçirilməsi nəzərdə tutulur.
Portalımız Mədəniyyət Nazirliyinə istinadən xəbər veeir ki, Konfrans çərçivəsində nazir Anar Kərimovun Macarıstanın Mədəniyyət məsələləri üzrə dövlət katibi Piter Hoppalla görüşü keçirilib. Görüşdə iki ölkə arasında digər sahələrdə olduğu kimi, mədəniyyət sahəsində də əlaqələrin yüksələn xətlə inkişaf etdiyi vurğulanıb. Həmçinin, qeyd olunan sahədə əməkdaşlığı tənzimləyən müqavilə bazasının daha da möhkəmləndirilməsinin zəruriliyinə istinad edilib. Azərbaycanın mədəniyyət paytaxtı olan Şuşanın 2023-cü ildə "Türk dünyasının mədəniyyət paytaxtı" elan edildiyi və növbəti il "Avropanın mədəniyyət paytaxtı" olacaq Macarıstanın Vesprem şəhəri ilə Şuşa arasında birgə mədəni layihələrin həyata keçirilə biləcəyi qeyd olunub. Görüşdə eyni zamanda Azərbaycanın mədəniyyətlərarası dialoq sahəsindəki təşəbbüs və tədbirlərinə Macarıstanın dəstəyi və iştirakının vacibliyinə diqqət çəkilib, UNESCO çərçivəsində fəaliyyətlərdə qarşılıqlı əməkdaşlığın dərinləşdirilməsinin əhəmiyyəti vurğulanıb.
“İnsan heç vaxt bu qədər ucuz olmayıb” – Əkrəm Əylisli Milli Kitab Sərgisində belə dedi
Bakı İdman Sarayında davam edən 4-cü Milli Kitab Sərgisində bu gün – sentyabrın 29-da, saat 12-də yazıçı Əkrəm Əylisli ilə görüş keçirildi. Görüşə oxucularla yanaşı şair və yazıçılar da qatılmışdı.
“Daş yuxular” romanı ilə bütün nüfuzu və titulları əlindən alınmış yazıçı ilə görüşmək həqiqətən də görüşə qatılanlar üçün maraqlı idi. Əkrəm Əylisli bir qədər özü danışdı, sonra sualları cavablandırdı. Qələm əhlindən – Rasim Qaracadan, Əlibala Məhərrəmzadədən, Mübariz Örəndən, Şərif Ağayardan, tədbirin təşkilatçısı Şahbaz Xuduoğlundan suallar gəldi. Əkrəm Əylisli təmkinlə bu sullara cavab verdi. Biz də cavablardan seçdiyimiz bəzi cümlələri ilə yazıçının bugünkü ovqatını və düşündüklərini oxucularımıza çatdırmaq qərarına gəldik.
80 yaşdan sonra bir qədər tələskənlik duyur, yalnız məzar görürsən.
Təskinliyimiz yazılarımızdır.
Mən özümdən əsla razı deyiləm.
Heç vaxt ürəyimə xəyanət etməmişəm.
Müdhiş bir zamana düşmüşük, mənəviyyat çox ucuzlaşıb.
İnsan heç vaxt bu qədər ucuz olmayıb.
Allah qaçdı bizdən, allahsız olduq.
Hardansa güc tapmışam və bütün bu zillətlərə dözmüşəm.
Nobel mükafatını Orxan Pamuka verdilər, anladım ki, hər bir ortabab yazara onu vermək olar.
Nobel əvvəlki Nobel deyil.
Mən Azərbaycanda yeganə yazıçıyam ki, Nobelə namizədliyim verilib.
Niyə yazıçı oldum? Orta məktəbdə bir qızı sevirdim. Düşündüm ki, necə edim ki, hamıdan fərqlənim, qız da məni sevsin. Ağaca dırmaşdım, xeyri olmadı, hündürlüklərdən aşağı hoppandım, xeyri olmadı. Onda dedim, bəlkə yazım, fərqlənim, beləcə şeir yazmağa başladım.
Mən ədəbiyyata “Kirpi” jurnalında şeirlərimin dərci ilə başlamışam.
Mənim uşaqlıqla bağlı detalı, fraqmanı olmayan bircə əsərim də yoxdur.
Yeni nəsil yazarları, elə bil, qəsdən çalışırlar ki, qəliz yazsınlar. Bilmirlər ki, dahilik sadəlikdir.
Ədəbiyyat informasiyadır. İnsan informasiyanı internetdən deyil, özündən gətirməlidir.
Cümlə ağlına gəldi, dərhal yazmaq olmaz, onu işləmək lazımdır. Roman ayrıca cümlə-cümlə işləməklə ərsəyə gəlir.
Niyə müsahibə vermirəm? Gərək adamı dindirələr ki, o da dinə. Desəm öldürərlər, deməsəm ölləm.
Yazıçı insanın var olduğu yerdən çıxır.
“Azərbaycan” jurnalında işləyəndə elə nikbim idim, içəri hər bir yeni yazar əsər gətirib gələndə ümidlənirdim, elə bilirdim, bir Sabir, bir Mirzə Cəlil içəri girir.
“Ədəbiyyat və incəsənət”
Rəsm qalereyası: Klod Mone, “Yaşıl körpü”
Rəsm qalereyası: Klod Mone, “Yaşıl körpü”
Günün fotosu: Rusiyaya qarşı 8-ci sanksiya paketi
Günün fotosu: Rusiyaya qarşı 8-ci sanksiya paketi
Avrokomissiyanın sədri Ursula fon der Lyayen Avropa İttifaqının Rusiyaya qarşı 8-ci sanksiya paketinin anonsunu eləyib. Burada ən əsası, Rusiyanın ixrac etdiyi neftin qiymətinin məddudiyyətinə aiddir.
Foto: Euronews
İbrahim Tatlısəsin 21 yaşlı qızla eşq yaşadığı üzə çıxdı
Türk sənət musiqisinin imperatoru İbrahim Tatlısəsin gənc qızla eşq yaşadığı gün üzünə çıxıb.
“Ədəbiyyat və incəsənət” bizim media-ya istinadən xəbər verir ki, sənətkarın özündən 49 yaş kiçik 21 yaşlı Berka Gül adlı qızla münasibətdə olduğu və yaxın zamanda onunla evlənəcəyi iddia olunub.
Bu iddianı isə jurnalist Onur Akar sosial şəbəkə hesabında paylaşaraq ortalığa çıxarıb.
Jurnalistin yaydığı məlumatda həmçinin bildirilib ki, hətta İbrahim keçən ay Bodrum-Yalıkavak yolunda keçirdiyi qəzada, avtomobildə müğənninin yeni sevgilisi də olub. Hətta Gülün kiçik bədən xəsarətləri aldığı da məlum olub.
Qeyd edək ki, İ.Tatlısəs bir müddət əvvəl sosial şəbəkə hesabında "Xanımla boşandıq. Bağçalı, gözəl bir ev tapıb, yenidən evlənməyi düşünürəm" statusunu yazıb.
Bu gün “Yogev Şetrit” triosu Bakıda konsert verəcək
XVII Bakı Beynəlxalq Caz Festivalına dünyaca məşhur caz ustaları dəvət olunub. Onların sırasında “Yogev Şetrit” triosu da var.
Bu gün - sentyabrın 29-da Yogev Şetrit trio yoldaşları Amir Solomon (bas), Devid Şitrit (fortepiano) ilə “Madrid Restobar”da çıxış edəcək.
Bəstəkar və zərb ifaçısı Yogev Şetrit 1978-ci ildə İsraildə anadan olub. “Yerusəlim İvrit Universiteti”ndə Musiqiologiya üzrə bakalavr dərəcəsi alıb. Şetrit dünyaca məşhur “Coolooloosh” qrupunun yaradıcısı və üzvü olub, Çuçito Valdes, Tia Fuller, Arni Lourens, Paulo Morello və Kevin Mahogany kimi görkəmli sənətçilərlə eyni səhnəni bölüşüb. Bəstəkar qəlbli Şetrit orijinal əsərlərini ifa etmək üçün 2016-cı ildə öz triosunu yaradıb. Qrup rəhbəri kimi ilk studiya albomu "New Path"ı buraxıb. O vaxtdan “Yogev Şetrit” triosu “Beynəlxalq Panama Caz Festivalı”, “The Kennedy Center”, “Casa Del Jazz”, Roma, Vaşinqton da daxil olmaqla dünyanın 30-dan çox ən böyük festival və məkanlarında çıxışlar edib.
