Super User
Milli Dram Teatrı 149-cu mövsümə yekun vurub
Azərbaycan Dövlət Akademik Milli Dram Teatrı 149-cu teatr mövsümünü başa vurub.
Teatrın mətbuat xidmətindən verilən məlumata görə, sənət ocağı 44 günlük Vətən müharibəsinə həsr olunmuş “Zəfər yolu” tamaşası ilə mövsümü yekunlaşdırıb.
Səhnə əsəri Mədəniyyət Nazirliyinin sifarişi ilə hazırlanıb.
Azərbaycanın 44 günlük Vətən müharibəsində qazandığı tarixi Qələbəyə ərməğan olan yeni tamaşanın müəllifi və quruluşçu rejissoru Xalq artisti Azər Paşa Nemətov, rəssamları Azər Paşa Nemətov, Əməkdar mədəniyyət işçisi İlham Elxanoğlu, bəstəkarı Xalq artisti Siyavuş Kərimi, rejissoru Emil Əskərov, rejissor assistenti Nərmin Həsənovadır.
Səhnə əsərində Xalq artistləri Nurəddin Mehdixanlı, Əli Nur, Əməkdar artistlər Hicran Nəsirova, Elxan Quliyev, Mətanət Atakişiyeva, Mirzə Ağabəyli, Elnar Qarayev, Anar Heybətov, Ayşad Məmmədov, Mətləb Abdullayev, Elşən Rüstəmov, Rəşad Bəxtiyarov, aktyorlar Elçin Əfəndi, Xədicə Novruzlu, Rada Nəsibova, İlahə Həsənova, İlyas Əhmədov, Afət Məmmədova, Aylin Həşimova, Elsevər Rəhimov, Corc Qafarov, Tural İbrahimov, Ramin Şıxəliyev, Elnur Qədirov, Cümşüd Zeynalov, Cavidan Novruz və Vüsal Mustafayev çıxış ediblər.
Həvəskarların ifasında “Hamlet” faciəsi nümayiş olunub
Avropa Azərbaycan Məktəbinin beynəlxalq bakalavriat üzrə təhsil alan məzunlarının, eləcə də onuncu sinif şagirdlərinin iştirakı ilə Vilyam Şekspirin “Hamlet” faciəsi təqdim olunub.
Tamaşanın rejissoru və səhnəqrafiyanın müəllifi Sara Kərimli idi. Tamaşa kompozisiya formasında ingilis dilində hazırlanıb.
Və deyək ki, böyük tamaşaçı marağı qazanıb.
Azərbaycanın nümayəndə heyəti UNESCO-da müzakirələrdə iştirak edib
Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərlinin rəhbərlik etdiyi nümayəndə heyəti Silahlı münaqişə zamanı mədəni sərvətlərin qorunması üzrə "ad hoc" alt komitənin iclasında iştirak etmək məqsədilə UNESCO Baş qərargahının yerləşdiyi Paris şəhərinə səfər edib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, iclasda “Silahlı münaqişə zamanı mədəni sərvətlərin qorunması haqqında” 1954-cü il Haaqa Konvensiyasının İkinci Protokolunun implementasiyasının monitorinq və nəzarət mexanizmlərinin gücləndirilməsi, eləcə də sözügedən mexanizmlərin gələcəkdə effektiv tətbiqi istiqamətində müzakirələr aparılıb.
İclasda Azərbaycan Respublikasının UNESCO yanında Daimi Nümayəndəsi Elman Abdullayev də iştirak edib.
Nümayəndə heyəti tərəfindən ölkəmizin mövqeyi iclas iştirakçılarının diqqətinə çatdırılıb. İclasın gündəliyində müzakirə edilən mövzu ilə bağlı müvafiq şərhlər verilib və təkliflər irəli sürülüb.
Qeyd edək ki, Azərbaycan Respublikası Silahlı münaqişə zamanı mədəni sərvətlərin qorunması üzrə Komitəyə 2021-ci ilin dekabr ayında keçirilən İkinci Protokola Tərəf Ölkələrin 9-cu iclası zamanı yekdil qərara əsasən seçilib.
Bu dəfə Şuşa qalası
Mədəniyyət Nazirliyi tərəfindən “Şuşa İli” münasibətilə həyata keçirilən “Şuşa mədəniyyətinin inciləri” layihəsi yeni təqdimatlarla davam edir. Layihənin "Şuşanın memarlıq salnaməsi” bölməsi üzrə növbəti təqdimat Şuşa qalasına həsr olunub.
Pənahəli xanın müdafiə məqsədi ilə tikdirdiyi qala Şuşa ovalığında əlçatmaz, hətta mühasirədə olan yerdə tikilmişdir. Qala hər tərəfdən sıx meşələrlə əhatə olunmuş və bəzi hissələrdə yarğanlarla bitmişdir ki, bu da düşmən tərəfindən keçilməz sədd hesab olunurdu.
Qalanın təmir-bərpa işləri və tikintisinin davam etdirilməsi uzun illər çəkdi.
Gəncə qapısının tikintisi Pənahəli xanın hakimiyyəti dövrünə təsadüf edir və XVIII əsrdən Gəncə və ya Çiləbörd qapısı adlanır. Bu qapı Şuşanı Gəncə şəhəri və Qarabağ xanlığının Çiləbörd mahalı ilə birləşdirirdi. Digər qapılarla müqayisədə bu gün daha yaxşı vəziyyətdədir.
Qalanın qərb tərəfində yerləşən İrəvan və ya Xəlfəli qapısı Şuşanı Xəlfəli kəndi və İrəvan şəhəri ilə birləşdirirdi. Digər qapılardan fərqi hər iki tərəfdə simmetrik şəkildə yerləşdirilmiş iki pilləli döyüş qüllələri ilə möhkəmləndirilməsi idi.
Qalanın şərq tərəfindəki digər qapı isə Muxtar, Topxana və ya Şuşakənd qapısı kimi tanınan Ağoğlan qapısı idi.
“44 gün – tarixi Zəfər” çoxcildliyinin birinci kitabının təqdimatı keçirilib
Mədəniyyət Nazirliyinin tabeliyindəki Respublika Xatirə Kitabı Redaksiyası tərəfindən Vətən müharibəsində həlak olanların adlarının və xatirələrinin əbədiləşdirilməsi məqsədilə “44 gün – tarixi Zəfər” adlı üçcildliyin birinci cildi (“A-Ə” hərfləri üzrə) işıq üzü görüb.
“Ədəbiyyat və incəsənət” portalı xəbər verir ki, Beynəlxalq Muğam Mərkəzində (BMM) nəşrin təqdimat mərasimi keçirilib. Nəşrin birinci cildində Aprel (2016) və Tovuz (2020-ci il, iyul) döyüşlərində, həmçinin Vətən müharibəsində həlak olanlar haqqında ensiklopedik məlumat yer alıb.
Təqdimatda öncə Vətən müharibəsində həlak olan şəhidlərimizin əziz xatirəsi bir dəqiqəlik sükutla yad edilib.
Mərasimdə çıxış edən mədəniyyət naziri Anar Kərimov 44 günlük Vətən müharibəsində Azərbaycan Ordusunun misilsiz qəhrəmanlıq göstərərək torpaqlarımızı işğaldan azad etdiyini bildirib. Respublika Xatirə Kitabı Redaksiyasının Heydər Əliyevin təşəbbüsü ilə yaradıldığını xatırladan nazir redaksiyanın fəaliyyətini yüksək qiymətləndirib. Deyib ki, ümummilli lider şəhidlərin xatirəsini hər zaman əziz tutub, onların adlarının əbədiləşdirilməsi üçün diqqət və qayğısını əsirgəməyib: “Redaksiya tərəfindən indiyədək 20-dən artıq kitab nəşr olunub. Bu kitablarda müstəqilliyimiz uğrunda canından keçən Vətən oğullarının həyat yolu əksini tapıb. Bugünkü təqdim olunan kitab isə 44 günlük müharibədəki Zəfərimizə həsr olunub. Azərbaycan bu Zəfəri 30 ildir gözləyirdi və bu müddət ərzində dövlətimiz də, xalqımız da bu ədalətsizliklə barışmadı. Gün gəldi, Ali Baş Komandanın rəhbərliyi Ordumuz düşmənə qalib gəldi, əzəli torpaqlarımızı əsarətdən qurtardı. Azərbaycan Ordusunun, qəhrəman oğullarımızın göstərdikləri şücaətlər dastanlara sığacaq bir səhifədir. Bu səbəbdən də onların Vətən yolunda qəhrəmanlığı Azərbaycan dövləti tərəfindən hər zaman diqqətdə saxlanılır”.
Dövlət tərəfindən şəhid ailələrinə göstərilən qayğıdan danışan Anar Kərimov bildirib ki, Prezident İlham Əliyevin tapşırığına əsasən, nazirliyin mədəniyyət müəssisələrində 100-ə yaxın şəhid ailəsinin üzvü işlə təmin edilib: “Vətən müharibəsində mədəniyyət sahəsində çalışmış 8 nəfər şəhid olub. Onların xatirəsini əbədi yaşadacağıq. Tarixi Qələbəmizi yeni nəsillərin yaddaşında həkk etdirmək bizim borcumuzdur. Nazirlik tərəfindən şəhidlərimizə həsr olunan bir neçə layihə də həyata keçirilib. Onlardan biri də “Səhnədən səngərə” layihəsidir. Eyni zamanda nazirlik Qələbəmizə həsr edilən filmlərin çəkilməsini, bu mövzuda ədəbi əsərlərin yazılmasını da qarşısına məqsəd qoyub.
İşğaldan azad edilən Qarabağ və Şərqi Zəngəzurda dövlətimiz tərəfindən aparılan geniş yenidənqurma və bərpa işlərindən söz açan nazir bildirib ki, “Böyük qayıdış” Qarabağa ruhumuzun, kimliyimizin qayıdışını təmin edəcək: “Xalqımız tarixi yurd yerlərimizə böyük qayıdışın başlanğıcındadır. Bu başlanğıc həm də mədəniyyətlə bağlıdır. Bu dirçəlişdə də xalqımız birləşərək böyük çiçəklənməyə nail olacaq. Bu gün Qarabağda böyük quruculuq işləri reallaşır bu yolda bizim də üzərimizə böyük məsuliyyət düşür”.
Daha sonra Respublika Xatirə Kitabı Redaksiyasının rəhbəri Nəzakət Məmmədova çıxış edərək fəaliyyətləri haqqında məlumat verib. Bildirib ki, redaksiya Azərbaycan Sovet Ensiklopediyası nəzdində bir şöbə kimi fəaliyyət göstərib, ümummilli lider Heydər Əliyevin xüsusi tapşırığı əsasında Nazirlər Kabinetinin imzaladığı 1 may 1997-ci il tarixli qərarla müstəqil quruma çevrilib. 2016-cı ildən Mədəniyyət Nazirliyinin nəzdində fəaliyyət göstərir. Bu gün redaksiya Prezident İlham Əliyevin diqqət və qayğısı ilə əhatə olunub.
Nəzakət Məmmədova diqqətə çatdırıb ki, redaksiya Azərbaycanın Milli Qəhrəmanları haqqında da kitablar nəşr edib, “Vətən daşı və ya 44 günün dastanı” layihəsi çərçivəsində 8 film istehsal edilib.
Çıxışlardan sonra Respublika Xatirə Kitabı Redaksiyasının hazırladığı “Vətən daşı” sənədli filmi nümayiş olunub. Film Şuşanın azad edilməsi uğrunda şəhadətə yüksələn Ağcabədi rayonundan olan 18 yaşlı əsgər Ömər Rəhimli haqqındadır.
Ekran işinin nümayişindən sonra şəhidin atası Rəşid Rəhimli çıxış edərək şəhidlərin xatirəsinə göstərilən ehtirama görə minnətdarlığını bildirib.
Tədbirin bədii hissəsində BMM-in solistləri və “Muğam” televiziya müsabiqəsinin qalibləri Gülzar Fərəcova, Aytən Məhərrəmova, Pərviz Qasımovun ifasında şəhidlərə həsr edilən mahnılar təqdim edilib. Xanəndələri tarda Rövşən Qurbanov, kamançada Ceyhun Muradov müşayiət edirdi. Həmçinin sənətşünaslıq üzrə fəlsəfə doktoru, bədii qiraət ustası Zülfiyyə Eldarqızı vətənpərvərlik mövzusunda, qazi şairlər Həsən Kür, Oğuz Alparslan və Nicat Ağayev isə müəllifləri olduqları müharibə mövzulu şeirlərini səsləndiriblər.
İnanılmaz! 59 yaşı olan naməlum Azərbaycan filmi aşkarlanıb
Köhnə Azərbaycan filmləri hədsiz sevilir. Demək olar, hamısını süjetbəsüjet əzbər bilirik. Aldığımız yeni xəbər hədsiz sevincimizə səbəb olub. Çünki bu xəbər köhnə filmlərimizlə bağlıdır.
“Ədəbiyyat və incəsənət” portalı xəbər verir ki, bu günədək geniş tamaşaçı kütləsinə naməlum olan “Axırıncı namaz” filmi aşkar olunub. Azərbaycan Dövlət Film Fondunda kinorejissor Zeynəb Kazımovanın 110 illik yubileyinə hazırlıqlarla əlaqədar aparılan yeni araşdırmalar zamanı 1968-ci ildə rus dilində Moskvada çapdan çıxmış “Sovet bədii filmləri. Annotasiyalı kataloq” kitabının 1958-1963-cü illərdə çəkilmiş filmləri əhatə edən IV cildinin 607-ci səhifəsindəki məlumatlara əsasən, rejissorun 1963-cü ildə “Axırıncı namaz” adlı ikihissəli qısametrajlı bədii film çəkdiyi müəyyən edilib.
Dövlət Film Fondunun məlumatına görə, araşdırmaların davamı olaraq, qısametrajlı bədii filmin yeganə nüsxəsi Naxçıvan Dövlət Film Fondunun bazasında aşkara çıxarılıb və həmin nüsxə Azərbaycan Dövlət Film Fondunda elektron bərpa olunub.
Qeyd edək ki, filmin adına bu günədək Azərbaycan kinosu haqqında hazırlanmış heç bir kataloq və siyahıda rast gəlinməyib.
Filmin rejissoru Zeynəb Kazımova, operatoru Əsgər İsmayılov, rəssamı Məmmədağa Hüseynov, bəstəkarı Zakir Bağırovdur. Rolları Ağadadaş Qurbanov, Möhsün Sənani, Ətayə Əliyeva, Münəvvər Kələntərli və digər məşhur Azərbaycan aktyorları ifa edirlər. Aktrisa M.Kələntərlinin “Axırıncı namaz” filmində canlandırdığı epizodik rol kinoda ifa etdiyi sonuncu obrazıdır. Film 1963-cü ildə “Azərbaycanfilm” kinostudiyasında ekranlaşdırılıb.
Şəkildə filmdən fraqmentləri görürsünüz.
Rəsm qalereyası: İlya Repin, “Cırcırama”
Rəsm qalereyası: İlya Repin, “Cırcırama”
Bu cür kişilər də olub!
Şəmkirdə İki nəhəng sənətkar- Üzeyir Hacıbəyli və Əhməd Cavadın xatirəsini əbədiləşdirən belə bir möhtəşəm sənət əsəri var. Biganə qalmaq olmur, mən illərdir, nəğmələrin yaranma tarixlərini, nağıllarını araşdırıram deyə, qeyri- iradi- "Görəsən, hansı əsərin üzərində işləyirlər, bəlkə qürur mənbəyimiz olan himnimizi yaradırlar, bəlkə..." deyə səsləndim.
Bu bəlkələrlə çox çarpışdım. Mən gözümü çəkə bilmirdim bu gözəllikdən, bu möhtəşəmlikdən.
Fəxarət hissi nə gözəl hissdi,- belə kişilər olub, belə babaların övladlarıyıq biz...
Könül Xəlilova
Günün fotosu: İstanbulda gey-parad təşkil edənlərdən 150 nəfəri həbs olunub
Günün fotosu: İstanbulda gey-parad təşkil edənlərdən 150 nəfəri həbs olunub
Ən azı 150 nəfər İstanbulun mərkəzində təşkil edilmiş gey-parad zamanı həbs olunub. Onlar şəhər rəhbərliyindən icazə almadan bu nümayişi təşkil etdikləri üçün cəzalandırılıblar.
Xəbəri yayan Euronews türk vətəndaşlarının pəncərədən küçəyə dəmir boşqab, cam, stəkan, çəngəl və qaşıq atdıqlarını nümayiş iştirakçıları ilə həmrəylik aktı adlandırıb. Amma türk mediası, əksinə, bu aktı mömin türklərin “cəhənnəmə vasil olacaq üzdəniraqlara” qarşı hiddət nümayişi hesab edir.
Bir kənd müəlliminin səssiz fırtınası
Günel Məssalı qızı Quliyeva 14 noyabr 1992-ci ildə İmişli rayonunun Gövhərli kəndində anadan olub. 2011-2015-ci illərdə Bakı Qızlar Universitetinin Filologiya fakültəsində Azərbaycan dili və ədəbiyyat müəllimliyi ixtisası üzrə təhsil alıb. Hal-hazırda İmişli rayon Namiq Abışov adına Qaralar kənd tam orta məktəbində ixtisası üzrə Azərbaycan dilini və ədəbiyyatı tədris edir. Müəllimlik fəaliyyəti ilə yanaşı poeziya vurğunudur. Şeir yazmağı da sevir, ara-sıra şeirlərini sosial şəbəkədə Səssiz Fırtına təxəllüsü ilə dərc etdirir.
Əlbəttə, yazdığı həvəskar şeirlərdir, burda qüsur axtarmaq yersizdir, ürəyinin səsini telefonun not dəftərinə köçürür. Arzusu bu şeirlərinin böyük auditoriyalara çatdırılmasıdır.
“Ədəbiyyat və incəsənət” portalı sizə “Həvəskarların şeirləri” rubrikasında Günel xanımın şeirlərini təqdim edir.
XATİRƏ
Yağmurun altında körpə qızcığaz,
Damladan balaca ovcuna alır.
Hər ovuc açışı, tutduğu damla,
Üzündə xoşbəxt bir cizgi yaradır.
Ayağın yağmurun altda isladır,
O yana, bu yana qaçır, oynayır.
Yağışdan yaranan gölməçələrdə,
Atılıb-düşərək telin oxşayır.
Yumulu gözlərin tutur göylərdə,
Buluddan, səmadan bir ilham alır.
Şən səsin ucaldır yağmur altında,
Zümzümə eyləyir doğma bir şeir:
Yağış yağır, rəqs eləyir gur damlalar,
Sıra-sıra, inci-inci, nur damlalar.
Göydə iki qara bulud çatılaraq ,
İldırımlar şaqqıldayır şaraq-şaraq...
Rəqs edir göylərin göz yaşlarında,
Səsini ucaldır buluda sarı,
Batırmaq istəyir xoş avazında,
Sanki ildırımın gurultusunu.
Yağmurun altında körpə qızcığaz,
Telini oxşayan yağışa dalır.
Uçur xəyalların xoş qanadında,
Böyük arzuları qəlbinə yığır.
Zümzümə eyləyir doğma bir şeir,
Yağmurun altında pərvaz eyləyir.
Dediyi şeirdə, şirin nəğmədə,
Müşfiqi yad edir hər bir cümlədə.
Üzümü bəzədi xoş bir təbəssüm,
Baxarkən başqa cür heyranlıq duydum,
Onun bu bəmbəyaz təmiz dünyasın,
Görərkən içində özüm qeyb oldum.
Anidən yağmurun soyuq damlası,
Üzümə buz təki toxundu birdən.
Acıqla oyatdı məni yuxudan ,
Ayıldım xəyali uşaq dünyamdan.
Baxdım ətrafıma, baxdım hər yana,
Sərpa qərq olmuşdum nur damlalara.
Gözümün yaşları yağmurla birgə,
Qarışıb axırdı nəmli torpağa.
Dilimin ucunda səssiz və həzin,
Səslənir yenə də həmin o şeir:
...Bunlar keçər çarpın, səma, köksüm kimi,
Ey ildırım, səs ver mənə, səsim kimi.
Yağ ey yağış, fikrim kimi, hissim kimi ...
Yu apar sən qəlbimin iniltisini.
QOCA DÜNYA
Əlində əsası yol üstə qoca,
Üzündə taleyin qırışları var.
Yavaşca gedərək baxır yollara,
Elə bil bolluca sualları var.
Üzündə taleyin əzablarını,
Məsum təbəssümlə gizlədir sanki,
Qəlbinin yükünü, ağrılarını,
Sarır gülüşündə itirir sanki.
Əlində əsası yolları keçir.
Zamanla baş-başa ömür bitirir.
Zamana baxırsan qocadan qoca,
Qocaya baxırsan zamandan uca.
Yolunun üstündə dayanır bir an,
Yəqin ki, yüz cürə xatirəsi var.
Ah çəkir keçmişə boylanan zaman,
Bir qalaq ahından hörülüb divar.
Üstünə baxırsan, köhnə parçadan,
Çox miskin görünür libası belə.
Üzünə baxırsan, bir müəmmayla,
Nəyisə gizlədir cizgiləri də.
Min cürə qırışla örtülüb üzü,
Baxıram, tanışdır bu qoca, düzü,
Diqqətlə baxarkən qarşımdakına,
Anlarsan, bu qoca - dünyanın özü.
Olsun ki, çox ağır ittihamdır bu,
İnsandır dünyanın belini qıran,
Dünyadan narazı dünyanı yıxan,
Həyat bir labirint, ömür bir dastan.
Dünyanın dərdi var özündən böyük,
Ürəyi doludur, sözləri bölük,
Dünya narazıdır, narazı bizdən,
Şikayət eylədi nə qədər desən...
Həqiqət sillə tək toxundu üzə,
Söz tapa bilmədim bu həqiqətə.
Son anda dediyi ikicə kəlmə,
Bəlkə də ömrümə işıq tutacaq,
Bəlkə də ömrümə tutduğu işıq,
Min cürə zülməti aydınladacaq.
"Düzgün əqidəni çalış ki, qoru,
Adına sadiq ol bir ömür boyu.
Yaxşılıq eylə ki, bəzənsin hər an,
Getdiyin, tutduğun bu ömür yolu”
Dünya bir labirint, ömür nərdivan,
İnsan bir döyüşçü, həyat bir meydan.
Qalibi, məğlubu nələr gözləyər,
Xəbərdardır bundan yalnız Yaradan.
