Super User
Mədəniyyət Nazirliyi və Heydər Əliyev Fondunun birgə layihəsinə start verilir
Aprelin 5-də Azərbaycan Milli İncəsənət Muzeyində “Four seasons of Shusha” beynəlxalq fotoqrafiya müsabiqəsinin təqdimatına həsr olunan mətbuat konfransı keçirilib.
Mədəniyyət Nazirliyi və Heydər Əliyev Fondunun təşkilatçı olduğu layihədə ilə bağlı mətbuat konfransında Mədəniyyət Nazirliyinin Media və kommunikasiya şöbəsinin müdiri Məryəm Qafarzadə “Şuşa İli”ndə həyata keçirilən layihələrdən danışaraq bildirib ki, Şuşanın mədəni adət-ənənələrinin dirçəldilməsi istiqamətində “Xarıbülbül” Musiqi Festivalı, Vaqif Poeziya Günləri kimi ənənəvi mədəni tədbirlərlə yanaşı, bu il Xurşidbanu Natəvanın 190 illiyi ilə bağlı ədəbiyyat festivalının keçirilməsi də nəzərdə tutulur.
Onun verdiyi məlumata görə, bu il həyata vəsiqə alan yeni layihələrdən bir də “Şuşa söhbətləri” adlanır. Layihə çərçivəsində tanınmış mədəniyyət xadimləri ilə ənənəvi məclislər təşkil olunacaq, eyni zamanda 44 günlük Vətən müharibəsində iştirak edən qazilərlə söhbətlər təşkil ediləcək.
“Şuşa şəhəri 2023-cü il üçün “Türk dünyasının mədəniyyət paytaxtı” elan edilib. Bu haqda qərar TÜRKSOY-un Daimi Şurasının Türkiyənin Bursa şəhərində keçirilən iclasında qəbul edilib. Əvvəlcə Şuşaya həsr olunmuş heykəltəraşlıq müsabiqəsi təşkil olunacaq və müsabiqə iyunun 15-dək davam edəcək. İstedadlı gənclər layihəyə dəvət olunur. Bu yaxınlarda “Danışır Şuşa” adlı layihəyə də başlanılıb. Layihə Şuşanın mədəni irsi, orada yerləşən abidələr, Şuşa muğamı, musiqisi ilə bağlıdır. Layihə xarici dillərdə də yayımlanacaq ki, bu da Şuşanın təbliği baxımından çox vacibdir. Bir sözlə, bu qəbildən olan bir çox layihələrimiz var ki, onları reallaşdırmağı düşünürük”, - deyə nazirliyin şöbə müdiri bildirib.
“Four seasons of Shusha” adlı beynəlxalq fotoqraf müsabiqəsi barədə məlumat verən M.Qafarzadə deyib ki, layihəyə aprelin sonu, mayın əvvəli start veriləcək. Azərbaycana səfər edəcək fotoqraflar Şuşada bir neçə gün qalacaq və şəhərə ekskursiya təşkil ediləcək. Həmin fotoların dünya sərgilərində nümayişi gözlənir.
Yeni layihə barədə iştirakçılara məlumat verən Mədəniyyət Nazirliyinin Muzey, qalereya və sərgilər şöbəsinin müdiri Nərgiz Abdullayeva deyib: “Four seasons of Shusha” adlı beynəlxalq fotoqraf müsabiqəsində tanınmış fotoqrafların iştirakı nəzərdə tutulur. Layihənin kuratoru italiyalı Anjello Buçarellidir. Məqsəd Şuşanın zəngin mədəniyyətini, memarlığını məşhur fotoqrafların əsərlər vasitəsilə dünyada təbliğ etməkdir.
Qeyd edib ki, layihə çərçivəsində azərbaycanlı və xarici fotoqrafların 2022-ci ilin qış, yaz, yay və payız fəsillərində Şuşa şəhərinə səfərləri təşkil olunacaq, hər fəsil üzrə fotoqraflar tərəfindən Şuşanın fotoşəkilləri lentə alınacaq və həmin fotoşəkillərdən ibarət sərgi açılacaq.
Layihənin kuratoru, italiyalı Anjello Buçarelli özü haqda məlumat verib. Bildirib ki, o, dünyanın bir çox ölkələrində mədəni layihələrdə iştirak edib. Çin, Meksika, ABŞ və Avropanın bir neçə ölkələrində çalışıb.
Azərbaycanda belə bir layihədə iştirakından məmnunluğunu ifadə edən A.Buçarelli layihənin yaranma səbəbindən danışıb. Qeyd edib ki, Qarabağı dünyada təbliğ etmək istəyi təsadüfi yaranmayıb. İkinci Qarabağ müharibəsində qazanılan qələbə bütün dünyada Azərbaycan xalqının vətənpərvərliyinə, yurd sevgisinə böyük rəğbət hissi doğurub: “Biz müasir dünyada yaşadığımız üçün şəkillər vasitəsilə məlumatı dünyaya çatdırmağı daha məqsədəuyğun hesab edirik, çünki bütün dünyada baş verənlərə şəkillə baxmaq daha maraqlıdır. Biz Şuşanı 4 fəsildə təqdim etməyi qərara aldıq. Düşündük ki, hər fəsli fərqli fotoqraf lentə alsın. Dörd müxtəlif fotoqraf 4 müxtəlif ölkədən Azərbaycana səfər edəcək. Bu qlobal bir layihədir. Türkiyə, Almaniya, İsveçrə və Finlandiyadan gələcək fotoqraflar layihəyə qoşularaq ümumilikdə 120 şəkil çəkəcəklər. Şəkillər toplandıqdan sonra kataloq halında dərc ediləcək, daha sonra müxtəlif ölkələrdə sərgi şəklində nümayiş olunacaq. Həmçinin şəkillər onlayn formada da yayımlanacaq. Mədəniyyət Nazirliyi bu şəkillərdən istədiyi formada istifadə edəcək”.
Sonra jurnalistləri maraqlandıran suallar cavablandırılıb.
Ekzüperini və Mark Tveni üstələyən Abqaryan, yaxud LitResin 10 ən populyar uşaq kitabı reytinqinə sözardı
Beynəlxalq Uşaq Kitabı günü qeyd edildi. Həmin gün bütün dünyada balaca oxucular, onlara yönəli kitablar aktual oldu, kitab təqdimatları, uşaq yazarları ilə görüşlər, müsabiqə və festivallar geniş vüsət aldı. O cümlədən, ölkəmizdə də 1-ci Uşaq Kitabları Festivalı keçirildi. Beynəlxalq Uşaq Kitabı günündə diqqət çəkən bir cəhət də müxtəlif səviyyədə uşaq kitabları reytinqlərinin təqdim edilməsi idi.
“Ədəbiyyat və incəsənət” portalının diqqətini Postsovet məkanının ən böyük kitab satışı platforması olan LitRes-də hazırlanmış və Postsovet məkanının ən böyük informasiya agentliyi olan TASS tərəfindən yayılmış “10 ən populyar uşaq kitabı” reytinqi cəlb edib.
Bəli, sirr deyil ki, indi işğalçı müharibəyə imza atan Rusiyanın beynəlxalq imici xeyli sarsılıb, ayrı-ayrı məqamlarda ruslar onsuz da dünyaya çıxış imkanlarının məhdudiyyəti şəraitində saman çöpündən yapışıbmış kimi hansısa kart-blanş saydıqları xırdalıqlara əl atırlar. Məhz elə bu sarıdan düşündük ki, bu reytinqdə ruslar ədalətli, sülhsevər əsərlərə üstünlük verərək, guya öz şər rollarını danmış olacaqlar, yaxud da, ümumiyyətlə, əsl obyektiv mövqe tutacaq, oxucularını düşünüb həqiqətən də dünya uşaq ədəbiyyatı şedevrlərinin adlarını sadalayacaqlar.
Beləliklə böyük nağılçı Hans Xristian Andersonun doğum günü münasibəti ilə elan edilmiş Beynəlxalq Uşaq Kitabı günündən bir gün sonra LitRes kompaniyalar qrupunun şef-redaktoru Yekaterina Pisaryevanın başçılığı altında hazırlanmış Top-10-a nəzər salaq.
1.
Məşhur İsveç uşaq yazarı, “Balaca və damda yaşayan Karlsson” kimi kult əsərin müəllifi Astrid Lindqrenin “Mio, mənim Miom!” əsərinin reytinqə başçılıq etməsi təbiidir, dedikcə müdrikcəsinə yazılan və xeyir qüvvələrin tərənnümünə həsr edilmiş populyar əsərin liderliyi şübhə doğurmaya bilər. Ögey valideyinləri ilə bomboz Stokholmda yaşayan balaca Bosse bir gün içərisində Cin olan butılka tapır, Cin onu uzaq Arzular ölkəsinə aparır. Orada Bosse doğma atası ilə - Kralla tanış olur. Məlum olur ki, Bossenin əsl adı Miodur, o, sehirli krallığın şahzadəsidir. Məhz Mio əhalini qorxu işində saxlayan, uşaqları oğurlayan qaniçən, əzazil Kato adlı cəngavərdən qisas almalıdır...
Bu nağılı Lindqren 1954-cü ildə yazıb, tədqiqatçıların fikrincə, cəngavər Kato obrazı Adolf Hitlerin prototipidir.
Yeri gəlmişkən, indiki dövrümüzdə Coan Roulinq məhz bu əsərin təsiri ilə “Harri Potter” əsərini yazıb. Harri Potter Mionun yeni şəkildəyişməsidir.
2.
Nikolay Kunun “Qədim Yunanıstanın mifləri və əfsanələri” kitabı sırada ikinci dayanır. 1914-cü ildə yazılan və məktəblərdə tədris olunan bu əsər məşhur antik qəhrəmanlar barədəki bütün əfsanələri və mifləri bir yerə topladığı üçün çox oxunaqlıdır, uşaqların oxumasına dəyər. Üstəlik, kitabda “Odisseya” və “İlliada”dan fraqmentlər, arqonavtların macəraları da yer alıb.
3.
Çarlz Dikkens, “Oliver Tvistin macəraları”. Söz ola bilməz, uşaqlığımızda ən çox oxuduğumuz əsərlərdən biri, bəlkə də birincisi. Doğuş zamanı anasını itirən, yetimçiliklə böyüyən, yeniyetmə ikən kimsəsiz uşaqların quldur dəstəsinə düşən Oliver özü də istəmədən quldurluqla məşğul olur. Zaman keçir və məlum olur ki, o, kimsəsiz və səfil uşaq deyil, böyük bir sərvətin varisidir. Düzlük və təmizlik imtahanlarından çıxan, əksər halda nümunəvi davranış sərgiləyən Oliveri sonda həyatın təltif etməsi əlbəttə ki, Xeyirin Şər üzərində qələbəsini ehtiva edir.
4.
Qriqoriy Osterin “Ziyanverici məsləhətlər”i. Özünü necə aparmaq barədə möcüzəli kitab. Məşhur yazıçı nadinc, sözə baxmayan uşaqların ümumiləşdirilmiş obrazını yaradır, onların əsas xüsusiyyəti hər şeyi əksinə eləməkdir. Ona görə də əsərdə poetik nümumələr yumor janrında elə gözəl verilir ki, uşaqlar oxuyub bəhrələnirlər, nadinclər isə utanıb düzəlməyə çalışırlar.
5.
Ulf Stark, “Sevgi barədə kişik povest”. Fred adlı bir oğlan Elza adlı qıza – sinif yoldaşına vurulur. Amma cəsarəti çatmır qıza yaxınlaşmağa. Belədə, Fred atasının obrazı ilə danışmağa, ondan məsləhət istəməyə başlayır. Bu o dövrdür ki, İkinci dünya müharibəsi dünyanı öz ağuşuna alıb. Təzada bir baxın: Fredin atası cəbhədə qorxu bilmədən döyüşür, qəhrəmanlıq göstərir, Fred özü isə bir qıza ürəyini açmağa qorxur. Atasının obrazı ilə söhbətləşməsi Fredi dəyişir, onda özünəgüvən yaradır. Həqiqətən də, uşaqlar müəyyən müddətə kimi mütləq valideyinlərinin dəstəyi ilə yaşamalıdırlar.
6.
Mariya Parr, “Vaflidən ürək”. Müasir Norveç yazıçısı bu əsərini çox gənc ikən, cəmi 24 yaşında yazıb. Kitab onlarca xarici dilə çevrilib, onu hər yerdə oxuyur və bəyənirlər. Bu əsər 9 yaşlı Trillenin və rəfiqəsi Lennin hər dəfə çətin vəziyyətlərə düşmələrindən və bu vəziyyətlərdən bacarıqla çıxmalarından bəhs edir.
9.
Biz bütün onluğu təftiş etməyəcəyik. 9-cu pilləyə keçirik. Təbii ki, bir rus nəşrinin təşkil etdiyi reytinqə rus yazıçısının salınması da təəccüblü deyil, bunu qüsur da saymaq olmaz. Aleksandr Volkovun “Zümrüd şəhərin sehirkarı” nağılı həqiqətən də zamanında çox sevilib və oxunub. Elli Smit, onun dostu, Totoşka adlı danışan it, Qorxaq Şir, Dəmir Drovosek və Straşila – obrazlar çox canlı və maraqlıdırlar, uşaqlar 1939-cu ildə yazılan, 1959 və 1973-cü illərdə təkrar çap edilən bu nağıldan faydalı çox şey götürə bilirlər.
Bəs davamız nə ilədir?
10.
Onluğun onuncu pilləsini Narine Abqaryanın “Mnayunya” kitabı zəbt edib. Ən qatı ədədbiyyatçılardan sual etsək ki, belə müəllif eşitmisinizmi, bir ağızdan “yox” deyəcəklər əlbəttə. Bəs onda bu erməni qadın yazar hardan zühur edib ki, belə bir nüfuzlu reytinqdə yer tutub?
Siz LitResin təqdimatına bir baxın: “Narine Abqaryan onun ürəyinə əziz olan Ermənistan barədə, insan xeyirxahlığı barədə, hər şeyin daha yaxşı olacağına inam barədə yazır. Onun qəhrəmanı Manyunya və Nra dünyanı tanımaq istəyən iki rəfiqədirlər. Onlar həyatı daha maraqlı edən nadinclikləri də bilirlər, həyatı daha mükəmməl edən aqillikləri də...”
Bu isə Yekaterina Pisarevanın yazının əvvəlindəki təqdimat yazısından fraqment: “Məşhur klassik kitablarla, dünyaşöhrətli yazarların adları ilə yanaşı onluqda müasirlərimiz, hazırkı bestsellerlərin müəllifləri də yer alıb. Onlardan birini mütləq qeyd edək, Narine Abqaryanın olduqca maraqlı və cəlbedici “Mnayunya” kitabını...”
Həqiqətən də söz tapa bilmirik.
Onu da deyək ki, Abqaryanın onluqda açıq-aşkar yamaq olması sezildiyi kimi, onun kimin yerini zəbt etməsi də açıq-aşkar sezilir. Bu reytinqin səkkiz təmsilçisi azacıq fərqlərlə başqa – digər nəşrlərin reytinqlərində də yer alıb. Aleksandr Volkovun “Zümrüd şəhərin sehirkarı” və Narine Abqaryanın “Mnayunya”sı olsun ki, Mark Tvenin dünyaca məşhur “Tom Soyyerin macəraları” əsərinin, eləcə də digər dünya şedevrinin – Antuan de Sent Ekzüperinin “Balaca şahzadə”sinin yerini zəbt ediblər. Görkəmli Amerika yazıçısını reytinqə salmayan ruslar hazırda onlara qarşı koalisiyanın başında dayanan bir ölkədən acıq çıxırmışlar kimi öz acizliklərini göstərirlər. Dahi fransız yazarını da ruslar saya almırlar, faktdır. Amma dahilərin yerinə rus yazarı salmaqları anlaşılandır, erməninin salınması isə tam absurddur.
Lit-Res kifayət qədər ciddi nəşr olduğundan, inanmırıq ki, Pisareva Abqaryanı, tutalım, öz rəfiqəsi olduğu üçün taxt-taca qaldırsın. Bu saytda həmişə ümumədəbiyyat mövqeyi şəxsi mövqedən üstün olub. Demək, orta səviyyədən də aşağı olan bir erməni “axçı”sindən dünyaşöhrətli bestseller qəhrəmanı düzəltmək çabası hazırkı rus art-siyasəti üçün prioritet imiş. Tarix boyu öz şovinist maraqlarını erməni kimi dırnaqarası müttəfiqləri hesabına reallaşdıran ruslar, görünür, hələ də öz şakərlərindən əl çəkməyiblər, köhnə vərdişlərini yadırğamayıblar. Amma bir şeyin fərqində deyillər ki, bu həna o hənadan deyil. Ruslar hazırda elə dalana dirəniblər ki, o dalandan onları gənc Narine Abqaryan o yana, heç xortdayıb gəlmiş erməni klassiki Xaçatur Abovyan da dartıb çıxarmaq gücündə deyil.
Yazıçılar Birliyində “Vətən bağı al-əlvandır” kitabının təqdimatı olub
Aprelin 5-də Azərbaycan Yazıçılar Birliyində tanınmış şair Gülxani Pənahın tərtib etdiyi “Vətən bağı al-əlvandır” kitabının təqdimatı olub.
“Ədəbiyyat və incəsənət” portalı AzərTAC-a istinadən xəbər verir ki, “SkyE” nəşriyyatında işıq üzü görən kitab İkinci Qarabağ müharibəsində əldə etdiyimiz Qələbəyə həsr edilib.
Təqdimatdan öncə Azərbaycan Yazıçılar Birliyinin birinci katibi, Xalq yazıçısı Çingiz Abdullayev çıxış edərək yeni nəşrlə bağlı fikirlərini bölüşüb, kitabın məziyyətlərindən danışıb.
Kitab müəllifin “Qalib Azərbaycanım” adlı “Ön sözü” ilə başlayır.
Kitabın “Vətən... Vətən... Vətən...” bölümündə Ağabəyim Cavanşir, Abbas Səhhət, Əhməd Cavad, Cəfər Cabbarlı, Məhəmmədhüseyn Şəhriyar, Məhəmməd Hadi, Səməd Mənsur, Almas İldırım, Nigar Rəfibəyli, Mədinə Gülgün, Rəsul Rza, Süleyman Rüstəm, Balaş Azəroğlu, Bəxtiyar Vahabzadə, Qabil və Əliağa Kürçaylının Vətən, Qarabağ, Bayraq mövzularında şeirləri dərc edilib.
Kitabın “Torpaq uğurunda ölən varsa...” bölümündə Anar, Asim Yadigar, Azər Turan, Adil Cəmil, Azadə Taleh, Çingiz Abdullayev, Çingiz Əlioğlu, Fərid Hüseyn, Gülxani Pənah, Elçin Hüseynbəyli, Emin Piri, Əşrəf Veysəlli, Fikrət Qoca, Xəyal Rza, Jalə Əliyeva, İlqar Fəhmi, Səlim Babullaoğlu, Rəşad Məcid, Zeynal Vəfa, Aygün Sultanlı və başqa yazarlarımızın Qarabağ mövzusunda qələmə aldıqları şeir, hekayə və esseləri yer alıb.
Tədbir çərçivəsində gənc ədib Aygün Sultanın “Yaz yağışı” və “Gülxani Pənahın poeziyası” kitablarının təqdimatı da keçirilib.
Beynəlxalq Muğam Mərkəzində Xalq artisti, görkəmli xanəndə Əlibaba Məmmədovun xatirə gecəsi keçirilib
Beynəlxalq Muğam Mərkəzində görkəmli xanəndə, Xalq artisti Əlibaba Məmmədovun xatirəsinə həsr olunmuş gecə keçirilib.
“Ədəbiyyat və incəsənət” portalı AzərTAC-a istinadən xəbər verir ki, Beynəlxalq Muğam Mərkəzinin təşkilatçılığı və Xan Şuşinski Fondunun dəstəyi ilə reallaşan gecə ilk olaraq monitordan xanəndənin öz ifası ilə başlanıb.
Tədbirin aparıcısı, Əməkdar mədəniyyət işçisi, musiqişünas Səadət Təhmirazqızı xanəndənin həyat və yaradıcılığından söz açıb.
Qeyd edilib ki, XX əsrin 50-ci illərində sənət fəaliyyətinə başlayan Əlibaba Məmmədov öz əməlləri və sənətkarlığı ilə xalqın böyük məhəbbətini qazanıb. Onun sənətini və şəxsiyyətini rövnəqləndirən, nurlandıran da məhz bu xalq məhəbbətidir. Bu məhəbbət daim Əlibaba müəllimin sənət yoluna işıq saçıb. Əlibaba Məmmədovun Azərbaycan musiqisinin inkişafında xidmətləri əvəzsizdir. Xanəndənin ifasında olan "Bayatı-Şiraz", "Dəşti", "Şur" və başqa muğam və təsniflər Azərbaycan radiosunun "qızıl fondu"nda qorunub saxlanılır. Ə.Məmmədov 100-dən çox mahnı və təsnifin müəllifidir. Onun bəstəkar kimi müəllifi olduğu mahnılarını muğam ifaçıları sevərək ifa edirlər. Dərin tarixi köklərə malik Azərbaycan xanəndəlik məktəbinin layiqli davamçısı kimi Əlibaba Məmmədov milli musiqi xəzinəsini daha da zənginləşdirmiş böyük sənətkardır.
Klassik muğam irsinin saflığının qorunub saxlanmasını yaradıcılığının başlıca qayəsinə çevirən ustad xanəndənin repertuarındakı muğamlar ifaçılıq sənətinin kamil nümunələri səviyyəsinə yüksəlmiş və musiqi mədəniyyətimizin qızıl fonduna daxil olmuşdur. Özünəməxsus ifa üslubu, məlahətli səsi və yüksək səhnə mədəniyyəti Əlibaba Məmmədova xalqın sevgisini qazandırmışdır. Sənətkarın mahir ifaçısı olduğu rəngarəng muğam və təsniflərlə yanaşı, müəllifi olduğu mahnılar dinləyicilərin qəlbində silinməz izlər qoymuşdur. Muğamın tədrisi sahəsində uzun illər uğurla çalışan tanınmış pedaqoq Əlibaba Məmmədovun yaradıcılıq yolu gənc xanəndələr nəsli üçün bir sənət məktəbidir. Onun mahnıları yalnız özünün deyil, başqa sənətkarların da repertuarına daxil edilib. Xalq mahnısı adı ilə səslənən bu nəğmələr xalqın yaddaşına hopub, dillər əzbəri olub. Onlardan “Gəl bizə, yar”, “Beləyəm”, “Yaşa hələ” s. mahnıların adını çəkə bilərik. Bu mahnılar musiqi tədrisi proqramına daxil edilir.
Tədbirdə Xalq artisti tarzən Fikrət Verdiyev, Əlibaba Məmmədovun “Humayun” ansamblında xanəndə ilə birgə çalışan qarmon ifaçısı Hüseyn Hüseynov çıxış edərək xanəndə ilə bağlı xatirələrini bölüşdülər.
Vurğulanıb ki, Əlibaba müəllimin Azərbaycan mədəniyyətinə, muğamına verdiyi töhfəni xalqımız heç vaxt unutmayacaq.
Xanəndənin ailəsi adından filologiya elmləri namizədi, dosent Əsmətxanım Məmmədova çıxış edərək tədbirin təşkilatçılarına təşəkkür etdi.
Xatirə gecəsində Xalq artistləri Zabit Nəbizadə, Mələkxanım Əyyubova, Əməkdar incəsənət xadimi Aqil Məlikov, Əməkdar artistlər Nuriyyə Hüseynova, Ehtiram Hüseynov, Bəyimxanım Vəliyeva, Sevinc Sarıyeva, Fehruz Səxavət, Təhmiraz Şirinov, xanəndələr Nisbət Sədrayeva, Hüseyn Məlikov, Məmməd Nəcəfov, Vəfa Vəzirova, Anar Quliyev Əlibaba Məmmədovun yaradıcılığından təsnif və mahnılar təqdim ediblər. İfaçıları Xalq artisti Möhlət Müslümovun rəhbərliyi ilə Əhməd Bakıxanov adına Xalq Çalğı Alətləri ansamblı müşayiət edib.
Qeyd edək ki, Beynəlxalq Muğam Mərkəzi tərəfindən təşkil edilən xatirə gecəsində həmçinin Səadət Təhmirazqızının Əlibaba Məmmədov haqqında yazdığı “Bizim ustad” kitabı qonaqlara hədiyyə edilib. Kitabda Əlibaba Məmmədov yaradıcılığının hər üç qolu – xanəndə, bəstəkar və şairliyi müfəssəl şəkildə toplanıb.
Hacı Zeynalabdin Tağıyevə həsr olunmuş inşa müsabiqəsinin qalibləri mükafatlandırılıb
Bakı Kitab Mərkəzi tərəfindən yeniyetmələr arasında elan olunmuş “Hacı Zeynalabdin Tağıyev. Tariximizdə silinməz iz” adında inşa müsabiqəsinə yekun vurulub və qaliblər mükafatlandırılıb.
“Ədəbiyyat və incəsənət” portalı Bakı Kitab Mərkəzinə istinadən xəbər verir ki, müsabiqənin nəticələrinə əsasən Cəlilabad rayon Göytəpə şəhər 1 nömrəli tam orta məktəbinin 10-cu sinif şagirdi İlahə Ağayeva 1-ci, Bakı Avropa Liseyinin 5-ci sinif şagirdi Rauf Abdullayev 2-ci, Binəqədi rayonu Namiq Babayev adına 144 nömrəli tam orta məktəbinin 11 “B” sinif şagirdi Məhəmməd Əliyev isə 3-cü yerə layiq görülüb.
Qaliblərə Bakı Kitab Mərkəzi adından diplom və hədiyyə kartları, qalib olmayan iştirakçılara isə təşəkkürnamə və kitablar verilib.
Mükafatları münsiflər heyətinin üzvləri - Azərbaycan Yazıçılar Birliyinin katibi, yazıçı İlqar Fəhmi, Əməkdar artist, uşaq yazıçısı Bəhram Bağırzadə və Bakı Kitab Mərkəzinin direktoru, yazıçı Günel Rzayeva təqdim ediblər.
Mədəniyyət naziri Anar Kərimov Avropa Şurasının Baş katibi ilə görüşüb
Azərbaycan Respublikasının mədəniyyət naziri Anar Kərimov ölkəmizdə səfərdə olan Avropa Şurasının (AŞ) Baş katibi Mariya Peyçinoviç Buriç ilə görüşüb.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, görüşdə Azərbaycan ilə Avropa Şurası arasında mədəniyyət sahəsində qarşılıqlı əməkdaşlıq, həyata keçiriləcək birgə layihələrin inkişaf perspektivlərdən söhbət açılıb.
Nazir Anar Kərimov Avropa Şurası ilə ölkəmiz arasında birgə fəaliyyətin əhəmiyyətini xüsusi qeyd edərək, Azərbaycan Respublikasının Prezidenti İlham Əliyev tərəfindən 2008-ci ildə irəli sürülən “Bakı Prosesi” təşəbbüsü çərçivəsində 2011-ci ildən ənənəvi keçirilən Dünya Mədəniyyətlərarası Dialoq Forumu çərçivəsində qarşılıqlı uğurlu əməkdaşlığı bir daha vurğulayıb.
Daha sonra Anar Kərimov ölkəmizin irəli sürdüyü "Mədəniyyət naminə sülh" (Peace4Culture) qlobal kompaniyası haqqında söz açıb. Bildirib ki, bu kompaniya mədəni irsin qorunması, dinc və dayanıqlı sülhsevər cəmiyyətlərin qurulması və beynəlxalq sülh sistemlərinin gücləndirilməsi, eləcə də sülhün əldə olunmasında mədəniyyətin rolu ilə yanaşı, mədəniyyətin inkişafında sülhün rolunun öyrənilməsi məqsədi daşıyır. Nazir bu qlobal layihədə Avropa Şurasını da tərəfdaş təşkilat kimi görmək istədiyini dilə gətirib.
Qəbula görə təşəkkürünü bildirən Avropa Şurasının (AŞ) Baş katibi Mariya Peyçinoviç Buriç Azərbaycanın mədəniyyət sahəsində həyata keçirilən təşəbbüsləri yüksək qiymətləndirdiyini bildirib. Nazirlik tərəfindən irəli sürülən qlobal layihələrdə Avropa Şurasının dəstəyini ifadə edib. Baş Katib Avropa Şurası və Azərbaycan arasında qəbul olunması nəzərdə tutulan yeni Fəaliyyət Planının mədəniyyət sahəsində də gələcək əməkdaşlığa dair öz töhfəsini verəcəyinə əminliyini qeyd edib.
Görüş qarşılıqlı maraq doğuran layihələr ətrafında fikir mübadiləsi ilə davam edib.
Mədəniyyət Nazirinin birinci müavini Elnur Əliyev tanınmış bəstəkar Oqtay Rəcəbovla görüşüb
Azərbaycan Respublikası Mədəniyyət Nazirinin birinci müavini Elnur Əliyevin ölkənin tanınmış mədəniyyət xadimlərini doğum günlərində təbrik etməsi artıq bir ənənəyə çevrilib.
“Ədəbiyyat və incəsənət” portalı Mədəniyyət Nazirliyinə istinadən məlumat verir ki, növbəti dəfədə Elnur Əliyev Əməkdar incəsənət xadimi, Prezident təqaüdçüsü, ömrünün 81-ci baharına qədəm qoymuş bəstəkar Oqtay Rəcəbovla görüşüb.
Bəstəkarı doğum günü münasibətilə təbrik edən Elnur Əliyev bəstəkarın Azərbaycan musiqi mədəniyyətində xüsusi xidmətlərini qeyd edib, ona ən xoş arzularını çatdırıb.
Oqtay Rəcəbovun Azərbaycan milli mədəniyyətinin inkişafında bir bəstəkar və pedaqoq kimi layiqli payının olduğunu vurğulayan Elnur Əliyev bəstəkarın operaları, musiqili komediyaları, film musiqisi, elmi məqalələri, kitab və monoqrafiyaları, uşaq mahnıları ilə yanaşı “Xocalı avazları”, “Çingiz” simfoniya rekviyemi, “Xocalı” simfoniyası, ümummilli lider Heydər Əliyevin xatirəsinə həsr olunmuş “Heydər” oratoriyası kimi əsərlərini xüsusi qeyd edib, bəstəkarın dillər əzbəri olmuş “Necə unudum səni”, “Zəfəran” və bir çox digər mahnılarının necə sevildiyinə diqqət çəkib.
Oqtay Rəcəbov bu diqqət və qayğıya görə Mədəniyyət Nazirliyinə və nazirliyin təmsilçisi Elnur Əliyevə minnətdarlıq bildirib.
Məhkəmə yazar Əjdər Ola 8 il 6 ay cəza kəsdi
Bakı Ağır Cinayətlər Məhkəməsində Əmək və Əhalinin Sosial Müdafiəsi Nazirliyinin həbsdə olan sabiq aparat rəhbəri Əjdər Cəbiyevin - tanınmış yazıçı Əjdər Olun cinayət işi üzrə məhkəmə prosesi yekunlaşıb.
“Ədəbiyyat və incəsənət” portalı Trend-ə istinadən xəbər verir ki, prosesdə təqsirləndirilən şəxs son söz deyib.
Əjdər Cəbiyev məhkəmədən xahiş edib ki, şəxsiyyətini və nüfuzunu nəzərə alaraq ədalətli qərar qəbul etsin.
Müşavirədən sonra məhkəmə hökmü elan edilib. Məhkəmənin hökmü ilə Əjdər Cəbiyev 8 il 6 ay müddətinə azadlıqdan məhrum edilib.
Xatırladaq ki, Əjdər Cəbiyev Cinayət Məcəlləsinin 179.3.2-ci (Mənsiməmə, külli miqdarda törədildikdə) 308.2 (vəzifə səlahiyyətlərindən sui-istifadə) 311.3.1, 311.3.2 və 311.3.3-ci (külli miqdarda rüşvət alma) maddələri ilə təqsirli bilinib. Yazıçı eks nazir Səlim Müslümovla cinayət ortaqlığında ittiham edilir.
Azərbaycan Yazıçılar Birliyinin üzvü, Ol təxəllüsü ilə tanınan şair, yazıçı, publisist Əjdər Cəbiyevin bir neçə əsəri həqiqətən də Azərbaycan ədəbiyyatının ən dəyərli nümunələri sırasında yer alıb.
Allah onun qapısını açsın!
Litvalı rejissor Ukraynada öldürülüb
Litvalı kinorejissor Mantas Kvedaraviçius Rusiyanın hücumlarını lentə almaq üçün getdiyi Ukraynada həlak olub.
Milli.Az olay-a istinadən xəbər verir ki, mərhumun rusiyalı həmkarı Vitali Manski məlumat yayıb. Qeyd olunub ki, Mantas Mariupolda iş başındaykən öldürülüb.
Yamyaşıl cənnəti görmək istəyən Lənkərana gəlsin! - Nilado çay plantasiyası və “Nilado Green Hotel & Restoran" sizi gözləyir
Reklam əsaslı@
Lənkərana yolunuz düşsə mütləq İstisu qəsəbəsindəki Nilado çay plantasiyasına baş çəkin. Eləcə də plantasiyanın qucağına sığınmış “Nilado Green Hotel & Restoran"a.
Bu məkan əsla indiyədək almadığınız təəssüratlarla yadınızda qalacaq.
Əvvəla, buranın çayı o qədər ləzzətlidir, ətirlidir ki, ondan doymayacaqsınız. Hazırda istehlak bazarında böyük təlabat duyulan “Qarabağ” və “Xan” çay kolleksiyaları bax buranın məhsuludur. Üstəlik, Niladoda sizə 100 faiz təbii gül çayı da təklif edəcəklər, içdikcə içmək istəyəcəksiniz.
Otelin geniş, işıqlı və komfortlu otaqlarında ürəyiniz istəyən kimi dincələcək, ətrafın sitrus qoxulu sağlamlıqla dolu havasını ciyərlərinizə çəkib bir “oxqay” deyəcəksiniz.
Buranın mətbəxinə isə söz ola bilməz. Siz talış mətbəxinin ən ləziz təamlarını dadacaqsınız.
“Nilado”nu qurub yaradan Araz Yaqubov şəxsən Qoç plov, Boxça plov, Boranı-çörək və daha nələr hazırlayaraq ağzınızı dada gətirəcək.
Niladonun sorağı hər tərəfə yayılıb. Ölkəmizin tanınmış siyasət, iqtisadiyyat, mədəniyyət
xadimlərini daim bu gözəlliyin qoynunda görə bilərsiniz. Buradan ingilis, fransız, ərəb, rus dili də əskik olmur, turistlər də bu məkana həvəslə baş çəkirlər.
İndi sizə qaldı sadəcə qərar vermək və üzü cənuba şütümək.
Əziz yolçu, burdan yan keçmə,
mütləq dayan!
Səni gözləyir
“Nilado Green Hotel & Restoran"
Rezervasiya üçün:
Əlaqə: +994 51 465 77 44
Ünvan: Lənkəran rayonu, İstisu qəsəbəsi.
