Milli Məclisin Mədəniyyət komitəsinin sədri Qənirə Paşayeva incəsənət nümayəndələri ilə görüşüb.
AzərTAC xəbər verir ki, görüşdə Milli Qəhrəman Salatın Əsəgərovanın oğlu Ceyhun Əsgərov, Xalq yazıçısı Əzizə Cəfərzadənin oğlu Turan İbrahimov, İspaniyanın Marbella şəhərindəki “Les Roches Global Hospitality Education” Universitetini fəqlənmə diplomu ilə bitirmiş Nigar Şirinli və onun anası Ramilə Şirinova, rəssamlar – Samirə Allahverdiyeva, Hüseyn Osmanlı, Qax Dövlət Kukla Teatrının baş rəssamı Mayis Abdullayev, gənc estrada müğənnisi Şıxəli Bağırzadə, “Zadəgan” milli tekstil brendinin yaradıcısı Aygün Əliyeva və ADMİU-nun qazi tələbəsi Elvin Abbasov iştirak edib.
Komitə sədri görüş iştirakçılarına öz sənət, peşə və araşdırma sahələri üzrə fəaliyyətləri ilə milli irsimizin qorunmasına, mədəniyyət və incəsənətimizin inkişafına, eləcə də, gənc nəslin vətənpərvərlik ruhunda tərbiyəsi işinə, gənclərin motivasiyasına şəxsi nümunələrlə töhfə verdiklərini, məsuliyyətli yanaşdıqlarını vurğulayıb, onlara təşəkkür edib.
Görüşdə cari ilin yekunları, yeni illə bağlı təşəbbüs və təkliflər ətrafında fikir mübadiləsi aparılıb.

Daha bir yaddaqalan tədbir Bakıdakı Rus Evində (Rossotrudniçestvo) baş tutub, “Qafqaz” beynəlxalq fotoklubunun açılışı olub, eləcə də ekspozisiyasında fotoklub üzvlərinin, türkdilli ölkələrdəki “Rus evləri”nin əsərlərinin təqdim olunduğu fotosərgi keçirilib.
Sözügedən fotosərginin açılışında çıxış edən klubun rəhbəri Aleksandr Kalinin “Qafqaz” adlı fotoklubun məqsəd və vəzifələrindən danışıb.
"Klubun adından da göründüyü kimi, o, ilk növbədə, bu diyarın gözəlliyini nümayiş etdirmək məqsədi daşıyır. Fotoklubun loginində məşhur bakılı fotoqraf Fərid Xayrulinin inisialı yer alıb, bu yolla biz bu gözəl mərhum ustadın adını əbədiləşdirməyə çalışdıq”, - deyə A.Kalinin qeyd edib.
Natiq turizmdən başlayaraq məktəbə qədər bir çox istiqamətləri əhatə edən klubun fəaliyyətindən danışaraq, birgə əməkdaşlıq planının işlənib hazırladığı “Rossotrudniçestvo”nun Bakı nümayəndəliyinin rəhbəri İrek Zinnurova minnətdarlığını bildirib.
İrek Zinnurov tədbir iştirakçılarını salamlayaraq, təşəbbüsə görə Aleksandr Kalininə təşəkkür edib: “Artıq biz “Rossotrudniçestvo” nümayəndəliklərinin olduğu hər yerdə, başqa ölkələrdə də Azərbaycanın gözəlliyini göstərə bilərik”.
Sonra A.Kalinin Azərbaycanın ən məşhur fotoqraflarının, eləcə də sponsorların və dostların daxil olduğu fotoklubun komandasını təqdim edib.
Moskvadakı “Rossostrudniçestvo”nun əməkdaşı Nikita Vlasov AzərTAC-ın müxbirinə verdiyi müsahibəsində MDB ölkələri, eləcə də Türkiyə, türkdilli ölkələr və Altay diyarı fotoqraflarının 40-dan çox rəsm əsərinin təqdim olunduğu ekspozisiyanı şərh edib. O qeyd edib ki, sərginin təşkilində “SPUTNİK Azərbaycan”dakı həmkarları böyük köməklik göstəriblər.
Sonda Üzeyir Hacıbəyli adına Bakı Musiqi Akademiyasının tələbə və müəllim heyətinin təşkil etdiyi birgə konsert olub.
Bütün gələnlər Rossotrudniçestvonun binasından xoş ovqatla ayrılıblar.

“Acgöz qonşu".
Kətan, yağlı boya. 107 x 67 sm.

Kentukki ştatında güclü və dağıdıcı tornado nəticəsində onlarca insan həlak olub və itkin düşüb.
Onların xatirəsi ölkə üzrə anılmaqdadır.

Foto: Euronews

Azərbaycanın görkəmli caz pianoçusu və bəstəkarı, ölkəmizdə caz musiqisinin banilərindən biri, Əməkdar incəsənət xadimi Vaqif Mustafazadənin adını daşıyan 2 nömrəli musiqi məktəbində sənətkarın anım günü ilə bağlı konsert proqramı təqdim olunub.
AzərTAC xəbər verir ki, tədbirdə elm, mədəniyyət, incəsənət xadimləri, məktəbin müəllimləri və şagirdləri iştirak ediblər.
Tədbiri məktəbin direktoru Akif Süleyman açaraq sənətkarın həyat və yaradıcılığından danışıb. Bildirib ki, V.Mustafazadə 42 il bundan öncə Daşkənddə qastrol zamanı ürək tutmasından vəfat edib və Bakıda dəfn olunub.
Diqqətə çatdırılıb ki, V.Mustafazadə Azərbaycan musiqisinin, muğamının klassik Amerikan caz musiqisi ilə sintezini yaradıb. Onun musiqi stili "Caz-Muğam" adlanır. Onun musiqimizdə etdiyi bu kimi yeniliklər bu günə qədər öz aktuallığını qoruyub saxlayır. Bu günün özündə belə bir çox musiqiçilər öz ifalarında məhz Vaqif Mustafazadənin yaratdığı caz-muğam sintezindən istifadə edir.
Vaqif Mustafazadənin ev-muzeyinin direktoru Afaq Əliyeva rəhbərlik etdiyi muzeyin fəaliyyətindən və V.Mustafazadə irsinin təbliği istiqamətində görülən işlərdən danışıb.
Azərbaycan Musiqi Mədəniyyəti Dövlət Muzeyinin direktoru, sənətşünaslıq üzrə fəlsəfə doktoru, Əməkdar mədəniyyət işçisi Alla Bayramova çıxış edərək sənətkarın yaradıcılığı ilə bağlı fikirlərin bölüşüb. Qeyd edib ki, Vaqif Mustafazadə dünya musiqi inciləri xəzinəsinə caz-muğamın təkrarolunmaz nümunələrini bəxş edib.
Konsert proqramında məktəbin şagirdləri Vaqif Mustafazadənin “Mart”, “Tənhalıq”, Əzizə Mustafazadənin “Oriental ornamet” və sair əsərlərini səsləndiriblər.

Nizami Gəncəvinin 880 illik yubileyi münasibətilə Azərbaycanın Bolqarıstandakı səfirliyi və Bakı Slavyan Universitetinin Kliment Oxridski adına Sofiya Universiteti nəzdində fəaliyyət göstərən Azərbaycan Dili və Mədəniyyəti Mərkəzinin birgə təşkilatçılığı və Azərbaycan Milli Elmlər Akademiyasının (AMEA) Ədəbiyyat İnstitutunun dəstəyi ilə dahi Azərbaycan şairi və mütəfəkkirinin bolqar dilinə tərcümə olunmuş qəzəllər toplusu kitabının təqdimatı Müqəddəs Kiril və Mefodiy adına Bolqarıstan Milli Kitabxanasında keçirilib.
AzərTAC  xəbər verir ki, təqdimat mərasimində çıxış edən Azərbaycanın Bolqarıstandakı səfiri Hüseyn Hüseynov, Azərbaycan Dili və Mədəniyyəti Mərkəzinin direktoru Sofiya Şıqayeva-Mitreska, Bolqarıstanın Milli Kitabxanasının direktoru Krasimira Aleksandrova, Bolqarıstanın Şərq Dili və Mədəniyyət Mərkəzinin direktoru, professor İvo Panov, Sofiya Universitetinin “Türkologiya və altayşünaslıq” kafedrasının rəhbəri professoru İrina Sarıivanova, şairə Gergina Dvoretska, tərcüməçi, şair Dimitr Xristov, həmçinin videobağlantı vasitəsilə AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli və institutun Nizamişünaslıq şöbəsinin aparıcı elmi işçisi, dosent Zəhra Allahverdiyeva çıxış ediblər.
Çıxışlar zamanı natiqlər Nizami Gəncəvinin həyat və yaradıcılığı, onun dünya, Şərq və Azərbaycan ədəbiyyatındakı yeri, dahi şairin digər dünyaşöhrətli şairlərə, o cümlədən şərq miniatür və musiqi sənətinə təsiri, Nizaminin Şərq və Qərb sivilizasiyaları arasında körpü yaratması, həmçinin onun bolqar alimlər arasında nə dərəcədə tanınması haqqında geniş məlumat veriblər və müzakirələr aparıblar.
Çıxış edənlər Azərbaycanda “Nizami Gəncəvi İli” çərçivəsində çoxsaylı kitabların işıq üzü gördüyünü və bu kitabların müxtəlif dillərə tərcümə olunduğunu, o cümlədən dahi şairin qəzəllərinin bolqar dilinə çevirildiyinin iki ölkənin ədəbi həyatında əlamətdar hadisə olduğunu bildiriblər.
Tədbirin sonunda şairin bir neçə qəzəli bolqar və Azərbaycan dillərində oxunub.
Geniş oxucu marağına səbəb olmuş Nizami Gəncəvinin bolqar dilinə tərcümə olunmuş qəzəllər toplusu kitabının Bolqarıstanın kitabxanaları, ali təhsil müəssisələri və elmi-tədris mərkəzlərində yayılması nəzərdə tutulub.

Bu günə təsadüf edən əsas əlamətdar hadisələri diqqətinizə çatdırırıq:

17 dekabr. Ekzotik Butan Krallığında Kralın taxta çıxmasının ildönümü bayramı

Butan sözü Odlu Əjdahanın torpağı kimi tərcümə olunur. Ölkə bu adı ona görə alıb ki, Himalaydan tez-tez şiddətli çovğunlar gəlib yerlə-göyü bir edir. Bütpərəstliyin ən möhkəm dayaqları olan bir ölkədir Butan. Bu bayram 1907-ci ildən qeyd edilir, onda ki, Vançkuq Butan kralı kimi ilk dəfə taxta əyləşib. Vançkuq müstəqil dövlət qurub, butanlıları birləşdirib, beləcə də tarixə düşüb.

Tximpu Asiyada ikinci paytaxt şəhəridir ki (digəri Pxenyandır) orada işıqfor yoxdur. Və Butan dünyada yeganə ölkədir ki, örda tütün satışı rəsmən qadağan edilib. Butan həm də dünyada yeganə ölkədir ki, öz əhalisinin üzərinə Konstitusiya ilə öhtəlik qoyub ki, ətraf mühiti mühafizə etsinlər. Butanın bir özəlliyi də odur ki, öz adət-ənənəsini, buddizmi, mental dəyərlərini qorumaq üçün uzun illər televiziya və radionun, sonrakı dönəmlərdə də internetin istifadəsinə rəsmən qadağa qoyulmuşdu, yalnız 2001-ci ildən bu izolyasiya aradan qaldırıldı. Burada ilk seçki isə yalnız 2008-ci ildə baş tutub, butanlılar özlərinə deputatlar seçiblər. Özü də karuselsiz, filansız.

Butanda çoxlu Budda məbədləri var, Himalayın əbədi qarla örtülü landşaftının misilsiz gözəlliyi var, buna görə də ölkənin əsas gəlir mənbəyi turizmdir. Qəribədir ki, gəlir üzrə ikinci sırada poçt markaları durur, Butan markalarını dünyada həvəslə alırlar.

Butan əhalisi varlı deyil, amma xöşbəxtdir. Çünki iqliminin dağlıq olması, sərt şaxtalar, əkin torpaqlarının azlığı, təbii sərvətlərin minimum olması səbəbindən ölkə özü kasıb ölkədir, hamının güzəranı oxşardır. Biri də var, elə bir ölkədə yaşayasan ki, ölkə varlı ola, bir ovuc insan milyonlara sahib çıxa, xalq özü isə yoxsulluqdan inləyə.

17 dekabr. “İsgəndər” raketi və Kürd bayrağı

Bu gün Beynəlxalq seks xidmətçilərinin zorakılıqdan qorunması günüdür. Lətifəsi bizdən uzaq, sonrakına keçək. Ruslar Raket qoşunları gününü qeyd edirlər (“İsgəndər”lər də bu qeydetmənin tərkib hissəsidir), ukrainlər Dövlət icra qulluqçuları gününü. Beloruslarda bu gün kino günüdür. Azərbaycanda məskunlaşan, xoş güzəran, gözəl rifah içində yaşayan kürdlər də bu gün bayram edəcəklər, belə ki, bu gün tüm kürdlərin bayramıdır, Kürd bayrağı günüdür; Amerikalılar isə Milli ağcaqayın şirəsi gününü qeyd edirlər.

17 dekabr. Tarixi hadisələrlə zəngin gün

2003-cü ilin bu günündə dünya prokatına “Üzüklərin hökmdarı” filmi daxil olub, sonra da bolluca Oskarlar yığıb. 1992-ci ildə Çexoslovakiya parlamenti ölkənin ləğvi və yerində Çexiya və Slovakiya kimi iki dövlətin yaradılması barədə qanun imzalayıb. 1990-cı ildə Moskvada SSRİ deputatları dördüncü qurultayda Qorbaçovun istefasını tələb ediblər. 1989-cu ildə ABŞ-ın Fox telekanalında “Simpsonlar” multserialının premyerası baş tutub. 1986-cı ildə Kembric hospitalında tarixdə ilk dəfə eyni zamanda bir insana ürək, qaraciyər və ağciyər köçürülməsi edilib. 1962-ci ildə Granada TV-də əfsanəvi Beatles qrupunun ilk teleçıxışı baş tutub. Onlar Love Me Do mahnısını oxuyublar.

Bu gün həm də aviasiya işçiləri üçün önəmli gündür. 1903-cü ilin bu günündə Orvill Rayt özü düzəltdiyi təyyarə ilə tarixdə ilk təyyarə uçuşunu həyata keçirib, bu uçuş 12 saniyəlik olub. 1790-cı ildə Meksikada üzərinə asteklərin təqvimi çizilmiş daş tapılıb. 1777-ci ildə isə amerikalılar üçün çox əhəmiyyətli bir hadisə baş verib: Fransa Şimalı Amerikadakı Britan koloniyalarının müstəqilliyini tanıyıb. Britan koloniyaları da gələcək ABŞ dövlətinini təşkil edib.

17 dekabr. Kimlər gəldi, kimlər getdi...

2011-ci ilin bu günündə Şimali Koreyanın lideri, tarixin ən məşhur diktatorlarından biri Kim Çen İr vəfat edib. 1999-cu ilin 17 dekabrında müstəqil Azərbaycan mətbuatının qurucularından biri, “Azadlıq” qəzetinin yaradıcısı, unudulmaz jurnalist Nəcəf Nəcəfov cəmi 44 yaşında dünyadan köçüb. Allah rəhmət eləsin. 1993-cü ilin bu günündə tanınmış Azərbaycan yazıçısı, Azərbaycan SSR xalq yazıçısı Mirzə İbrahimov, 1987-ci ilin bu günündə isə milyonlarla sovet adamını gözləri yaşarıncaya qədər güldürən komediya aktyoru Arkadiy Raykin dünyadan köçüblər. Milyonlarla kişini əfsunlamış aktrisa Mila Yovoviçinsə bu gün doğum günüdür, 36 yaşı tamam olacaq. 1924-cü ilin bu günündə Nuxada Şirməmməd Hüseynov dünyaya gəlib, Azərbaycanın görkəmli və unudulmaz alimini gəlin yad eləyək, ruhu şad olsun deyək. 1930-cu ildə məşhur Penthouse jurnalının yaradıcısı Bob Quççione doğulub. 1908-ci ildə kimya üzrə Nobel mükafatçısı, Amerika alimi Uillard Libbi dünyaya gəlib. 1905-ci ildə Qazaxın İkinci Şıxlı kəndində Azərbaycan SSR-in xalq yazıçısı Osman Sarıvəlli anadan olub. 1881-ci ildə Amerika etnoqrafı, elmi antropologiyanın banisi Lyuis Henri Morqan dünyasını dəyişib. 1830-cu ildə isə Cənubi Amerikada ispan müstəmləkəçiliyi ilə mübarizə aparan dünyaca məşhur şəxs – Simon Bolivar vəfat edib, yeri gəlmişkən, Boliviya dövləti onun adı ilə adlandırılıb.

18-19 dekabr tarixlərində Azərbaycan Respublikası Mədəniyyət Nazirliyinin dəstəyi və AzerGold Qapalı Səhmdar Cəmiyyətinin baş sponsorluğu ilə Akademik Milli Dram Teatrında “Nizami Gəncəvi ili” çərçivəsində hazırlanmış “İSGƏNDƏRə yeni NAMƏ” tamaşasının premyerası olacaq.
 “İSGƏNDƏRə yeni NAMƏ” layihəsi Nizami irsinin teatr sənəti vasitəsi ilə retranslyasiyasını hədəfləyir.
Ədəbiyyat və incəsənət” portalı Mədəniyyət Nazirliyinə istinadən məlumat verir ki, layihənin əsas məqsədi Nizami Gəncəvinin hər hansı əsərini səhnəyə gətirmək yox, Nizami ruhunu, Nizami fəlsəfəsini müasir sənət düşüncəsi müstəvisində aktuallaşdırmaqdır. Belə ki, yazıçı-dramaturq İlqar Fəhminin Nizami Gəncəvinin “İsgəndərnamə” poemasının motivləri əsasında tərtib etdiyi yeni ədəbi əsas – “İSGƏNDƏRə yeni NAMƏ” poemanın xəyali sequelidir. Tamaşada poemadakı hadisələr xətti alternativ istiqamətdə davam etdirilir. Bəlli olduğu kimi, invariantda İsgəndər Zülqərneynə dirilik suyunu içmək qismət olmur, Xızır dirilik suyunu içib qiyamətə qədər qeybə çəkilir. İsgəndər isə dünyadan köçür.
Poemadan fərqli olaraq, tamaşada Makedoniyalı İsgəndər dirilik suyunu tapıb içir. Tamaşanın əsas hadisələr xətti İsgəndərin əbədi həyat qazanmasından sonra baş verən faciələr, xəyanətlər, sui-qəsdlər, qanlı olaylar üzərində qurulub.
Tamaşa seyrçiləri belə bir sual qarşısında qoyur: Görəsən, Nizaminin İsgəndəri ölüm ayağında, həqiqətən, dirilik suyunu içib, əbədi həyat əldə etsəydi, sonrakı aqibəti necə olardı? Həqiqətənmi, hər şey məhz Nizaminin filosoflarının təsvir elədiyi kimi faciəvi olacaqdı? Yoxsa İsgəndər öz düşündüyü kimi dünyada ali ədaləti bərqərar edə biləcəkdi?
Vahid dövlət ideyasının, yer kürəsini bir qütbdən idarə etmək iddiasının aqibətini təsvir edən tamaşanın yaradıcılarına görə, İnsan ədəbİ həyatın yükünü çəkə bİlməz, çünkİ İnsan Tanrı deyİl.
Mədəniyyət Nazirliyinin dəstəyi və AzerGold Qapalı Səhmdar Cəmiyyətinin baş sponsorluğu ilə hazırlanan tamaşanın quruluşçu rejissoru Əməkdar incəsənət xadimi Mehriban Ələkbərzadə, quruluşçu rəssamı Əməkdar mədəniyyət işçisi İlham Elxanoğlu, ədəbi əsasın müəllifi İlqar Fəhmi, işıq üzrə rəssamı Rafael Həsənov, rejissor assistenti Nihad Qulamzadədir. Tamaşanın səhnə plastikası Xalq artisti Pərviz Məmmədrzayevə, səhnə qrafikası Binyamin Sailova məxsusdur. Səhnə əsərində Xalq artisti Nurəddin Mehdixanlı (Hörmüz), Əməkdar artist Şövqi Hüseynov (Xızır), Ziya Ağa (İskəndər), Fəridə Şahbazova (gənc Rövşənək), Rüstəm Rüstəmov (Ərəstun), Əməkdar artist Elşən Rüstəmov (Əflatun), Vüsal Mustafayev (Dəğyənus), Elçin Əfəndi (Antiqon), Əməkdar artist Kəmalə Müzəffər (yaşlı Rövşənək), Əməkdar artist İlqar Cahangir (İsgəndərus) və Sənan Kazımlı (Vəliəhd Sokrat) çıxış edirlər.