Günün fotosu: Qüdsdə yəhüdilərlə ərəblər toqquşdular

Qüdsdə yəhudi polisi ilə fələstinlilərin toqquşması nəticəsində azı 152 nəfər yaralanıb. İnsident Əl-Aska məscidində cümə namazı zamanı baş verib. Polis müsəlman dindarlara hücum edib və bunu onların İsrail dövləti əleyhinə çağırışlar səsləndirmələri ilə izah edib.

Xəbər “Qızıl Aypara” cəmiyyətindən sızıb.

Foto: Euronews

Cümə günü ən çox oxunan xarici xəbərlər sırasında təbii ki, Rusiya - Ukrayna müharibəsi yenə aparıcı yeri tutdu, ən öndəki xəbər isə heç də döyüş xəbəri olmadı. Bu, Rusiyaya gedəsi olan lyuks avtomobillərin taleyi ilə bağlı xəbərdir. 

“Ədəbiyyat və incəsənət” portalı Euronews-a istinadən xəbər verir ki, Belçikanın limanlarında çoxlu sayda əntiq əşyalar yığılıb, onların Rusiyaya yolunu Ukraynaya qarşı aparılan işğalçı müharibə kəsib. Onları başqa ölkələrə satmaq da hələ mümkün deyil. Nəticədə, bu sayaq aşırma məntəqələrində əsl tıxac yaranıb. 

Euronews-un müxbiri Pedro Sakadura hadisə yerindən xəbər verərək deyir:

-Burada, Zeebrugge limanında mənim ətrafımda "lüks" tipli minlərlə maşın dəstəsi düzülüb. Avropa İttifaqının sanksiyaları avtomobillərin ixracını ləngidir və buradakı avtomobillərin ən ucuzu 50 min avrodan bahadır".

Açıq dayanacaqda səkkiz min qəşəng avtomobil hərəkətsiz qalıb və onların üzərinə toz yığılmaqdadır. Avtomobillərin mühafizəsi üçün də böyük pullar tələb edilir. Rusiya gəmilərinə Avropa Birliyi limanlarına daxil olmaq qadağan olunduğundan yüklər daşınmır. Bütün bu təsərrüfatlara Zeebrugge Yeni maşınlar üçün beynəlxalq terminalının direktoru Mark Adriansens nəzarət etməli olub. O deyir:

-Uzaq Şərqdən gələn bu avtomobillər Rusiya üçün nəzərdə tutulub. Amma onlar artıq oraya ixrac olunmur. Gömrük onların burada qalmalarının lazım olduğunu söylədi, onların alqı-satqı əməliyyatı  bloklandı. Biz bilmirik ki, onlar bu dayanacaqda nə qədər olacaqlar. Onların titduqları sahələr genişlənib nəzərdən itməkdədir, demək ki, oğurlana biləcəkləri ehtimalı da var. Güman edirəm ki, biz bu avtomobillərə alternativ bazarlar axtaracağıq. Varlı ruslara bab kimi tapacağıq görən? 

Zeebrugge də digər AB limanlarında olduğu kimi Rusiya üçün nəzərdə tutulan mallarla dolu konteynerlərlə yüklənməkdədir. Alıcılar sərhəddin o tayında pullarını və səbrlərini itirməkdədirlər. Avropa limanları, ticarət şəbəkələri və yük terminalları da zərər verir. 

Amma bu, hələ hamısı deyil. O da var ki, Rusiyanın enerji daşıyıcılarına tam embarqo qoyulsa, hamı üçün itkilər artacaq.

Rusiya özünü də, başqalarını da pis vəziyyətdə qoyub. Görünən isə odur ki, bu xəmir hələ çox su aparacaq.

Azərbaycan Dövlət Akademik Milli Dram Teatrının repertuarında xüsusi yer tutan “Qətibə İnanc” tamaşası bu gün yenidən göstəriləcək.

İkihissəli səhnə əsəri görkəmli Azərbaycan yazıçısı Məmməd Səid Ordubadinin “Qılınc və qələm” romanının motivləri əsasında Çingiz Ələsgərli tərəfindən yeni səhnə versiyasında işlənib.

Xalq artisti Mərahim Fərzəlibəyevin quruluşunda təqdim olunacaq tamaşada rəsmlərinin quruluşu Əməkdar mədəniyyət işçisi İlham Elxanoğluya, səhnə əsərinin musiqi tərtibatı isə Kamil İsmayılova məxsusdur.

Tamaşa Gəncə hakimi Əmir İnancın qızı Qətibə İnancın Şeyx Nizamiyə olan məhəbbətindən bəhs edir. Şeyx tərəfindən məhəbbəti rədd ediləndən sonra Qətibə İnancda hamıya qarşı nifrət yaranır. Bu nifrətinə görə Qətibə sevmədən Məhəmməd Cahan Pəhləvana ərə gedir.

Qeyd edək ki, ilk dəfə 1977-ci ildə görkəmli rejissor Tofiq Kazımov “Qılınc və qələm” əsərini tamaşaya hazırlayıb.

Azərbaycan Dövlət Akademik Milli Dram Teatrının repertuarında maraqlı tamaşalardan olan, görkəmli şair Mikayıl Müşfiqin xatirəsinə ithaf edilmiş “Ah, bu uzun sevda yolu” tamaşası sabah - aprelin 17-də saat 19:00-da nümayiş ediləcək.

Bu səhnə əsəri dramaturq Əli Əmirlinin eyniadlı əsəri əsasında hazırlanan ikihissəli tale dramıdır.

Tamaşanın bədii rəhbəri və quruluşçu rejissoru Akademik Milli Dram Teatrının bədii rəhbər-direktoru, Xalq artisti Azər Paşa Nemətov, rejissoru Anar Sadıqov, rəssamı Əməkdar mədəniyyət işçisi İlham Elxanoğlu, bəstəkarı Xalq artisti Siyavuş Kərimidir.

Mədəniyyət Nazirliyinin sifarişi ilə hazırlanan tamaşada rolları Xalq artisti Hacı İsmayılov, Əməkdar artistlər Anar Heybətov, Münəvvər Əliyeva, Ayşad Məmmədov və başqaları ifa edəcək.

Azərbaycan ABŞ-ın Florida Dövlət Universitetində (FIU) keçirilən VII İllik Ümumdünya Sərgisində təmsil olunub.

Diasporla İş üzrə Dövlət Komitəsindən AzərTAC-a bildiriblər ki, universitetdə fəaliyyət göstərən Azərbaycan-Amerika Gənclər Təşkilatının təşəbbüsü ilə yaradılmış Azərbaycan guşəsində ölkəmizin qədim tarixini, həmçinin zəngin mədəniyyətini əks etdirən kitablar, xalçalar, suvenirlər, fotomateriallar və Azərbaycan brendləri nümayiş olunub. 

Florida Dövlət Universitetində təhsil alan azərbaycanlı tələbələr milli geyimlərdə sərgi iştirakçılarına multikultural dəyərlərə malik ölkəmiz barədə ətraflı məlumat veriblər.

Tədbirdə çıxış edən Azərbaycan-Amerika Gənclər Təşkilatının rəhbəri Aydın Eminov deyib ki, multikulturalizm dünyada ksenofobiya və irqçiliyi aradan qaldırmaq üçün hamımızın can atmalı olduğumuz dəyərdir. Vurğulayıb ki, Azərbaycanda bütün xalqlar mehribanlıq və dostluq şəraitində yaşayırlar. Məhz bunun nəticəsidir ki, 44 günlük Vətən müharibəsi zamanı Azərbaycanda yaşayan bütün xalqların nümayəndələri çiyin-çiyinə vuruşaraq, torpaqlarımızın işğaldan azad olunmasında və ərazi bütövlüyümüzün bərpa edilməsində misilsiz qəhrəmanlıqlar göstəriblər.

Qeyd edək ki, sərgidə Yaponiya, Türkiyə, Pakistan, Hindistan, Venesuela, Keniya, Özbəkistan və digər ölkələr təmsil olunublar.

Bu gün M.Maqomayev adına Azərbaycan Dövlət Akademik Filarmoniyasının Kamera və Orqan Musiqisi zalında “Fortepiano musiqisi axşamı” adlı konsert keçiriləcək.

Konsert proqramı Azərbaycan qadın bəstəkarlarının yaradıcılığına həsr olunacaq.

Dinləyicilər klassik əsərlərdən, Azərbaycan xalq mahnılarının işləmələrindən, həmçinin caz kompozisiyalarından və müasir musiqi janrlarında yazılmış əsərlərdən həzz ala biləcəklər.

Azərbaycan Dövlət Akademik Musiqili Teatrı rus dramaturqu Yevgeni Şvartsın pyesi əsasında, musiqisi görkəmli bəstəkar, Xalq artisti Emin Sabitoğluya məxsus olan “Qırmızı papaq” musiqili nağıl-tamaşasını növbəti dəfə repertuara salıb.

Rusdilli balaca teatr həvəskarları üçün nəzərdə tutulan tamaşanın quruluşçu və bərpaçı rejissoru teatrın qocaman aktyoru – Əməkdar artist Boris Qrafkindir.

Bir-birindən maraqlı nağıl qəhrəmanlarını teatrın sevimli aktyorları – Əməkdar artistlər Boris Qrafkin, Svetlana Bulax, aktyorlar – Firus Məmmədov, Nadejda Povelitsina, Emil Heydərov, Rauf Babayev, Telnaz Hüseynova, Yuliya Heydərova, Mehriban Zaliyeva, Eleonora Mehdiyeva, Eleonora Mustafayeva, Valeriya İsgəndərzadə və Nərmin Əliyeva canlandıracaqlar. Əsərin quruluşçu dirijoru Əməkdar incəsənət xadimi Fəxrəddin Atayev, xormeysteri Əməkdar artist Vaqif Məstanov, quruluşçu baletmeysterləri Əməkdar artistlər Zakir və Yelena Ağayevlər, dirijoru Səməd Süleymanlı, konsertmeysteri Kamil Həsənov rejissor assistenti Sevinc Məmmədovadır.

Bu gün nümayiş ediləcək səhnə əsərini izləmək üçün biletləri şəhərin bütün teatr-konsert kassalarından, “ASAN xidmət” mərkəzlərindən, eləcə də “iticket.az” saytından əldə etmək olar.

1993-cü ildə Cəbrayılın müdafiəsində iştirak etmiş 4 polis əməkdaşı ilə bağlı sənədli film Azərbaycan Televiziyasında (AzTV) nümayiş olunub.

“Azərbaycantelefilm” Yaradıcılıq Birliyinin istehsalı olan ekran əsəri “13-cü gün” adlanır.

“Ədəbiyyat və incəsənət” portalı xəbər verir ki, filmin qəhrəmanları Birinci Qarabağ müharibəsinin iştirakçıları - Nübarək Sevdimalıyev, Pəhləvan Məmmədov, Mədət Hümbətəliyev və Vaqif Məhərrəmovdur. 4 polis əməkdaşı həmin faciələrin canlı şahidləridir.

Polis əməkdaşları 1993-cü il 23 avqust tarixinə qədər Cəbrayılın müdafiəsində iştirak edib, işğaldan sonra iki ay müddətində də əhalini müdafiə edib. Polislər əhali ilə birlikdə Xudafərin körpüsünə qədər sıxışdırılıb, nəhayət insanları İran sərhədindən sağ-salamat keçirməyə müvəffəq olublar. Özləri isə 13 gün mühasirədə qalıblar. Cəbrayıl polisi o ərəfədə 16 şəhid verib. Əhalini qoruyan polislərdən sadəcə 7-si mühasirədən sağ çıxa bilib.

Filmdə həmin 13 gün ərzində baş verənlər - qəfil hücumlar, ağır döyüşlər, qətllər, erməni vəhşiliyi nümayiş olunur.

Məcburi köçkünlərin işğaldan sonrakı dəhşətli həyatı, məskunlaşdıqları çadır şəhərciyi, illərlə dözülməz şəraitdə yaşamaları da filmdə əks olunub.

“13-cü gün”ün qəhrəmanları torpaqlar azad olunandan sonra işğalın təfərrüatını bir-bir xatırlayır, doğma Vətənə ayaq basdıqca döyüş anlarını yada salır, ağrı-acını sanki yenidən yaşayırlar.

Filmin ssenari müəllifi və rejissoru Elvin Mirzəyev, quruluşçu operatoru Elşən Bədəlov, montaj rejissoru Cabir Əliyev, redaktoru Afaq Vasifqızı, prodüseri Fatimə Əzimovadır. Layihənin rəhbəri Elçin Musaoğludur.

Film bir daha sübut edir ki, müharibənin izləri daimidir, heç kim unudulmur, heç nə yaddan çıxmır.

Bildiyiniz kimi, bu il XVIII əsr Azərbaycan şairi, məşhur siyasi və ictimai xadim Molla Pənah Vaqifin anadan olmasının 305 illiyi tamam olur. Bu münasibətlə M.F.Axundzadə adına Azərbaycan Milli Kitabxanasının əməkdaşları tərəfindən “Molla Pənah Vaqif” adlı virtual sərgi hazırlanıb. 

“Ədəbiyyat və incəsənət” portalı xəbər verir ki, virtual sərgidə rəsmi sənədlər, fotolar, görkəmli poeziya ustadının müəllifi olduğu kitablar, eləcə də haqqında yazılan kitab və məqalələr nümayiş olunur.

Virtual sərgi ilə tanış olmaq istəyənlər http://anl.az/el/vsb/Molla_Penah_Vaqif/index.htm linkindən istifadə edə bilərlər.

Qeyd edək ki, 1717-ci ildə Qazax mahalının Salahlı kəndində dünyaya göz açmış Molla Pənah Vaqif öz ənənələri ilə seçilən ədəbi məktəb yaratmış ölməz sənətkardır. O, əhəmiyyətini əsrlərdən bəri qoruyub saxlayan bənzərsiz poeziya nümunələri meydana gətirməklə milli ədəbiyyatın yeni istiqamətdə inkişafına təkan vermişdir. Azərbaycan şeiri Vaqifin sayəsində tarixinin növbəti mərhələsinə qədəm qoymuşdur. Onun klassik bədii fikir salnaməmizin parlaq səhifələrindən birini təşkil edən irsi müasir dövrdə də insanların əxlaqi-mənəvi kamilləşməsinə xidmət göstərir. Azərbaycan tarixinə həmçinin siyasi xadim kimi - Qarabağ xanı İbrahimxəlil xan Cavanşirin baş vəziri kimi daxil olan Vaqif taleyüklü məsələlərin həllində müdriklik və uzaqgörənlik nümayiş etdirmişdir.

Molla Pənah Vaqif şərq poeziyasının bütün klassik formalarından istifadə eləsə də, onun yaradıcılığında əsas yeri qoşma janrı tutub və o, heca vəznində Azərbaycan poeziyasının bir çox parlaq nümunələrini yaradıb. Onun yaradıcılığında məhəbbətin tərənnümü mühüm yer tutur. Təsadüfi deyildir ki, Vaqif öz ədəbi məktəbini sadəlik, xəlqilik, nikbinlik kimi əlamətlərlə ölməzlik qazanan qoşmalarla yaratmışdır.

Virtual sərginin bir eksponatı da dahi şairin dillər əzbəri olan “Hayıf ki, yoxdur” şeirinin səsləndirilməsidir.

Kür qırağının əcəb seyrəngahı var,

Yaşılbaş sonası, hayıf ki, yoxdur!

Ucu tər cığalı siyah tellərin

Hərdən tamaşası, hayıf ki, yoxdur!

Qış günü qışlağı Qıraqbasanın,

Gözüdür Aranın, cümlə-cahanın,

Belə gözəl yerin, gözəl məkanın

Bir gözəl obası, hayıf ki, yoxdur!

Elə gözəl var bunların içində,

Ələ düşməz hərgiz Çinü-Maçində.

Söyləgən, oynağan, dürüst biçimdə

Bəzəyi, libası, hayıf ki, yoxdur!

Çoxdur ağ bədənli, büllur buxaqlı,

Lalə zənəxdanlı, qönçə dodaqlı.

Amma şirin dilli, açıq qabaqlı,

Könül aşinası, hayıf ki, yoxdur!

Havasından torpağının, yerinin,

Dadızmaz dəhanın, ləbi-şirinin,

Pəri çoxdur, nə fayda heç birinin

Adamlıq ədası, hayıf ki, yoxdur!

Ucu əşrəfili, bulut kimi saç,

Dal gərdəndə hər hörüyü bir qulac,

Kəlağayı əlvan, qəsabə qıyğac,

Altından cunası, hayıf ki, yoxdur!

Zər haşiyə al nimtənə üstündə, 

Xallar üz yanında, çənə üstündə, 

Buxağın altında, sinə üstündə, 

Zülfün burulması, hayıf ki, yoxdur!

Laçın təki başda ala tomağa, 

Yaşmağı tutmaya dişə, dodağa, 

Cəllad kimi durub qabaq-qabağa

Baxıb can almağı, hayıf ki, yoxdur!

Çünki yorğunuyam mən bu yolların, 

Qaydasını billəm hər üsülların,

Gümüş biləklərin, bəyaz qolların,

Sarı kəhrəbası, hayıf ki, yoxdur!

Ayna tutub hərdəm camal görməsi, 

Zülfə, zənəxdana sığal verməsi, 

Səhər ala gözün siyah sürməsi,

Əlinin hənası, hayıf ki, yoxdur!

Vaqif haqdan dilər lütfü kərəmlər,

Belə yerdə qalan, vallah, vərəmlər.

Yenə yada düşdü bizim sənəmlər.

Getməyin binası, hayıf ki, yoxdur!