İşğaldan azad edilməsini otuz ilə yaxın müddətdə səbirsizliklə gözlədiyimiz doğma Qarabağda həyat canlanır. Hər bir azərbaycanlı üçün əziz olan bu torpaqlara bərpa və yenidənqurma işləri ilə yanaşı, mədəni həyat da qayıdır, müxtəlif tədbirlər, konsertlər keçirilir. Belə tədbirlərdən biri avqustun 31-də Vətənin keşiyində dayanan hərbçilərimiz üçün Kəlbəcər rayonunda yerləşən “N” saylı hərbi hissədə təşkil olunan konsert proqramıdır.

“Ədəbiyyat və incəsənət” portalı AzərTAC-a istinadən  xəbər verir ki, “Yaşa, doğma Azərbaycan!” adlı konsert proqramında tanınmış azərbaycanlı müğənnilər Xalq artisti Emin, eləcə də Ellai, Bahh Tee & Türkan, Jony, Rauf & Faiq, gənc müğənni Cəmilə Həşimova və “The Excellent Music Band” qrupu bir-birindən maraqlı ifaları ilə hərbçilərimizə xoş anlar bəxş ediblər. 

Konsertin açılışında gənc müğənni Cəmilə Həşimova “The Excellent Music Band” qrupunun müşayiəti ilə “Reyhan”, “Bu gün hər şey yaxşı olacaq” və “Sənsiz” mahnılarını ifa edib.

Sonra səhnəyə çıxan tanınmış müğənnilər Bahh Tee & Türkan “Şirin yalan sözlər”, “Кто я без тебя”, “Принцев не существует”, “Нужен”, Ellai “Yar-yar”, “В любви нет чужих”, “Я не перестану”, Rauf & Faiq “Вечера”, “Я люблю тебя”, “Детство”, “Колыбельная”, JONY “Love you're voice”, “Аллея”, “Ты беспощадна”, “Комета”, Xalq artisti Emin “Я лучше всех живу”, “Сбежим в Баку”, “Boomerang”, “Yaşa, doğma Azərbaycan!” mahnılarını oxuyublar. Konsert gənc müğənni Cəmilə Həşimovanın ifasında “Simpy the best”, “В этом городе” mahnıları ilə yekunlaşıb.

Azərbaycanın cənnət məkanı adlandırılan Kəlbəcərdə Vətənə, bayrağa, dövlətə, xalqa sonsuz sədaqətini nümayiş etdirən qəhrəman əsgər və zabitlərimiz konsert proqramı zamanı təqdim olunan rəngarəng musiqi nömrələrini alqışlarla qarşılayıblar. 

Konsertdə jurnalistlərə müsahibə verən Xalq artisti Emin deyib: “Bizə işğaldan azad olunmuş ərazilərdə konsert vermək sevincini yaşatdığı üçün Azərbaycan Ordusuna təşəkkür edirəm. Burada – Kəlbəcərdə əsgər və zabitlərimizin qarşısında çıxış etmək olduqca qürurverici hissdir. Bu gün biz burada çıxış edirik. Çünki bu torpaqlar artıq azad olunub. Prezident, Müzəffər Ali Bas Komandan İlham Əliyevin rəhbərliyi ilə rəşadətli Azərbaycan Ordusu igidlik göstərdi və ərazilərimizi işğaldan azad etdi”. 

Emin Kəlbəcərdən sonra işğaldan azad olunmuş digər ərazilərimizdə də konsert proqramı ilə çıxış edəcəklərini bildirib. 

“İşğaldan azad edilmiş ərazilərdə çıxış etmək doğma diyar qarşısında borcumuzdur”, - bu fikri isə populyar Rauf & Faiq musiqi duetinin üzvləri jurnalistlərə müsahibəsində söyləyiblər. 

Burada çıxış etməyin unudulmaz hisslər doğurduğunu vurğulayan qrup üzvləri bildiriblər: “Sözün düzü, biz buraya gələndə inana bilmirdik. Bu torpaqlar haqqında çox eşitmişik, ailəmizdə tez-tez bu barədə danışırdılar. Fəxr edirik ki, 30 il sonra burada çıxış edənlərdən biri də bizik. Bu, heyrətamiz və çox xoşdur. Buna görə qürur duyuruq. Buraya gələcəyimiz, bu gözəl yerləri görə biləcəyimiz günləri çoxdan gözləyirdik. Adama elə gəlir ki, dünyanın heç bir yerində belə gözəl mənzərə yoxdur. Gördüklərimiz bizi çox duyğulandırır”. 

Doğma diyara gəldiyinə görə özünü hədsiz dərəcədə xoşbəxt hiss etdiyini vurğulayan Jony bildirib: “Torpaqlarımızın işğaldan azad edilməsi qürur hissi doğurur. Kəlbəcərə gəldiyimə görə gözlərimdən sevinc yaşları axır. Kəlbəcərin ab-havası, yol boyunca dağlar qeyri-adi təsir bağışlayır. Doğma diyara gəldiyimə və Azərbaycan əsgərləri qarşısında çıxış etməyimə görə hədsiz dərəcədə xoşbəxtəm”. 

Tanınmış müğənni Ellai də Kəlbəcərin gözəlliyinə heyranlığını xüsusi vurğulayıb. O, müsahibəsində bu barədə deyib: “Kəlbəcərdəki konserti səbirsizliklə gözləyirdim və ona görə bu gün çox həyəcanlıyam. Allah Azərbaycan Ordusunu qorusun! Onlar olmasa idi, biz burada olmazdıq. Mən avtomobillə Kəlbəcərə gələrkən buranın gözəlliyinə heyran oldum. Kəlbəcər çox gözəldir. Konsertdən sonra çox güman ki, İstisuya gedəcəyik”.

Qeyd edək ki, konsert hərbçilərin, xüsusilə gənc əsgərlərin coşqusu, doğma Azərbaycanı vəsf edən mahnıların izdihamla səsləndirilməsi və müğənnilərin müstəqil dövlətimizə, Prezidentimizə, xalqımıza səmimi təbrikləri ilə yadda qalıb.

“Ədəbiyyat və incəsənət” portalı muğam irsimizin tədqiqatçısı, Filologiya üzrə fəlsəfə doktoruGülhüseyn Kazımlının böyük xanəndəmiz Məşədi Məhəmməd Fərzəliyev Şuşalı barədə yazısını oxucularına təqdim edir.

Bildiyiniz kimi, 2022-ci il Azərbaycan Respublikasının Prezidenti İlham Əliyev tərəfindən Şuşa ili elan edilmişdir. 1872-ci ildə Şuşada doğulmuş böyük xanəndəmiz Məşədi Məhəmməd Fərzəliyev Şuşalının150 illik yubileyinin bu ilə təsadüf etməsi də simvolikdir. Onun zəngin irsi (50-dən çox ifası) Azərbaycan Dövlət Səs Yazıları Arxivində böyük diqqət və qayğı ilə qorunub saxlanılmışdır  və tədricən bərpa edilərək müasir səs daşıyıcılarına köçürülür. Azərbaycan muğam irsimizin hamisi, muğam sənətimizin bugünkü səviyyəyə çatmasında misilsiz xidmətləri olan Azərbaycan Respublikasının Birinci Vitse-Prezidenti Mehriban xanım Əliyevaya böyük xəzinəmizə, zəngin sərvətimizə göstərdiyi diqqət və qayğıya görə bütün muğamsevərlər adından səmimi təşəkkürümü bildirirəm. 

Çox yaxşı ki, Azərbaycan Dövlət Səs Yazıları Arxivində əsrin əvvəllərində yaşamış bütün məşhur xanəndələrimizin səs yazıları var. Məşədi Məhəmməd Fərzəliyev haqqında kitab üzərində işləyərkən yenidən Səs Yazıları Arxivində oldum, onun səsi yazılmış onlarla vala qulaq asdım.

Mənə 1914-cü ildə “Sport-Rekord” (Almaniya), “Pate” (Fransa) firmalarının Məşədi Məhəmməd Fərzəliyev Şuşalıya həsr edilmiş kataloqlarını da göstərdilər. Bu böyük xanəndənin Qarabağlı, Şuşalı olmasına şübhə edənlərə deyirəm: Həmin kataloqlara  və vallara diqqətlə baxın.

Şəkillərdə: Azərbaycan Respublikasının Dövlət Səs Yazıları Arxivinin direktoru Xədicə xanım Fərəcullayeva və Gülhüseyn Kazımov; “Sport-Rekord” firmasında Məşədi Məhəmməd Fərzəliyev Şuşalıya həsr edilmiş kataloq (1914); Məşədi Məhəmməd Fərzəliyev Şuşalının ”PATE” firması tərəfindən çap edilmiş kataloqu (1914-cü il).