İlhamə Məhəmmədqızı,
“Ədəbiyyat və incəsənət” portalının Sumqayıt təmsilçisi
“Çeşmə” ədəbi məclisinin növbəti yığıncağı Dədə Ələsgərin adını daşıyan məkanda keçirilib.
Tədbiri giriş sözü ilə adı çəkilən məclisin sədri, Azərbaycan Yazıçılar Birliyinin və Azərbaycan Jurnalistlər Birliyinin üzvü, şair-qəzəlxan Lilpar Cəmşidqızı açıb. Azərbaycanın ərazi bütövlüyü və azadlığı uğrunda canlarından keçən şəhidlərin xatirəsi bir dəqiqəlik sükutla yad edilib.
Lilpar Cəmşidqızı tanınmış ədəbiyyat adamlarının bir araya gəlməsinin poeziyaya olan sevginin və ədəbi mühitə bağlılığın göstəricisi olduğunu qeyd edib.
Yığıncaqda ilk söz iki “Divan” müəllifi, tanınmış şair-qəzəlxan və bəstəkar Hüseyn Sözlüyə verilib. Şair çıxışında Aşıq Ələsgərin yaradıcılığından bəhs edib, onun adını daşıyan məkanda belə bir məclisin keçirilməsinin əhəmiyyətini vurğulayıb və şeirlərindən nümunələr təqim edib. Məclis rəhbəri bu yaxınlarda 80 illik yubileyini qeyd edən Hüseyn Sözlünü bir daha təbrik edib.
Sonra Xəzər bölməsinin üzvü, ustad şair-qəzəlxan Əşrəf Pirşağılı qəzəllərini təqdim edib. AYB-nin üzvü, şair Vahid Çəmənli isə tədbir iştirakçılarına uğurlar arzulayaraq belə ədəbi məclislərin milli ədəbiyyatın inkişafına mühüm töhfələr verdiyini bildirib və öz şeirlərini səsləndirib.
Tədbirdə həmçinin peşəkar tənqidçi, AYB və AJB-nin üzvü, şair Xaqani Abbasəli Öztürk ədəbiyyatın inkişaf istiqamətləri, mövcud problemlər və sözün mədəni tərəqqidəki rolu barədə fikirlərini bölüşüb, şeirlərini söyləyib.
Daha sonra şairlər İldırım Əlişoğlu, Əliyar Mərdiyev, Bəradər Səməndərli, Xəlil Mirzə və ilk dəfə məclisdə iştirak edən Vətən müharibəsi qazisi, şair Qafqaz Eyvazov “Çeşmə” Ədəbi Məclisinin fəaliyyətini yüksək qiymətləndirib, şeirlərini diqqətə çatdırıblar.
Jurnalist Cəmil Zəbhulla Dadasov da çıxış edərək məclisin fəaliyyətinə uğurlar arzulayıb və gənclik illərində qələmə aldığı şeirlərdən bir neçəsini deyib.
Yığıncaq maraqlı müzakirələr şəraitində başa çatıb.
Sonda “Çeşmə” ədəbi məclisinin sədri Lilpar Cəmşidqızı tədbirin təşkilinə göstərilən dəstəyə görə “Şahənşah” restoranının rəhbəri Rəşid Süleymanova və Dədə Ələsgər Ocağı İctimai Birliyinin sədri Xətai Ələsgərliyə təşəkkürünü bildirib.
“Ədəbiyyat və incəsənət”
(02.06.2026)
