Könül, “Ədəbiyyat və incəsənət”
Azərbaycan Yazıçılar Birliyinin və Dünya Yazıçılar Təşkilatının (WOW) üzvü Lala Həsənovanın rəhbərliyi ilə həyata keçirilən “Müasir Azərbaycan Şairləri” ədəbi layihəsi çərçivəsində Azərbaycan Xalqlarının Həmrəyliyi Respublika İctimai Birliyində yazıçı və tədqiqatçı Eldar Əhədovla yaradıcılıq görüşü və onun yeni nəşri olan “Avrasiyanın türk toponimikası” adlı kitabının təqdimatı keçirildi.
Tədbirdə filologiya elmləri doktoru, professor Flora Nacə, tanınmış siyasi şərhçi və incəsənət tənqidçisi Abulfəz S. Babazadəh, “Bakı işçisi” qəzetinin jurnalisti və müsahibəçi Xanım Qədirli, şairi Ələddin Yaqubov, şairə Nigar Xəlilova, şair və tərcüməçi Əlviz Əliyev, Azərbaycanın xalq şairi Fikrət Qocanın nəvəsi, Vətən müharibəsi qəhrəmanı, istedadlı şair və qiraətçi Zaur Cəfərov, populyar bloqer Əli Yunisov, gənc şairlər Ləman Həsənova, Renat İlyazov, Aytən Qasapzadə, Olqa Şalayeva və digər qonaqlar iştirak etdilər.
Gecəni “Sodrujestvo” birliyinin sədri Tatyana Kərimova açdı.
Şair, yazıçı və ədəbiyyatşünas Eldar Əhədov Azərbaycan, ingilis, rus, ispan, italyan, çin və serb dillərində 98 kitabın müəllifidir. Bu kitablar Rusiya, ABŞ, Meksika, Kanada, Serbiya, Misir və Hindistanda nəşr olunub. Onun ayrı-ayrı əsərləri dünyanın 45 dilinə tərcümə edilərək dərc olunmuşdur. Azərbaycan Yazıçılar Birliyinin fəxri üzvü və Rusiya Yazıçılar Birliyinin Krasnoyarsk şöbəsinin idarə heyətinin üzvü olan Eldar Əhədov Rusiyada, Almaniyada, İtaliyada, Yunanıstanda, Venesuelada və Livanda bir çox beynəlxalq ədəbi mükafatlara layiq görülmüşdür. 2024-cü ildə o, Dünya Yazıçılar Təşkilatının “Dünya ədəbiyyatının inkişafına töhfəsinə görə” gümüş medalı ilə təltif olunmuşdur.
“Avrasiya’nın türk toponimikası” adlı kitab qədim coğrafi adların qorunması məsələsinə həsr olunmuşdur. Müəllif oxuculara xatırladır ki, qədim coğrafi adlar — keçmişimiz, əcdadlarımız və tariximiz haqqında yaddaşımızdır. O, bu qədim adların bəşəriyyətin qeyri-maddi mədəni irsi kimi tanınması məsələsinin gündəmə gətirilməsini təklif edir…
Tədbirdə Əhədovun nəsr və poeziya nümunələri, həmçinin iştirakçıların ədəbi çıxışları səsləndi. Ümumilikdə gecə səmimi, yaradıcı və dostcasına bir dialoq şəraitində keçdi.
“Ədəbiyyat və incəsənət”
(20.06.2025)
