Amerikalı rejissor Mayk Vaytın səhnələşdirdiyi “The White Lotus” serialı tropik bölgədə yerləşən otelə gələn qonaqların başına gələnlər barədədir. 

Filmdə qonaqlar bir həftə oteldə dincəlir və tətil edirlər. Hər keçən gün onların başına bir macəra gəlir, onlar qaranlıq və mürəkkəb hadisələrlə üzləşir.

Böyük maraq doğuran serialın daha böyük maraqla gözlənilən ikinci sezonunun İtaliyanın Siciliya adasında çəkiləcəyi məlum olmuşdur.

TASS agentliyi xəbər verir ki, “HBO” telekanalı serialın ikinci sezonunun İtaliyada keçiriləcəyi ilə bağlı əvvəlki xəbərləri rəsmi olaraq təsdiqləyib.

Komediya, dram və macəra janrlarında çəkilən filmin baş rollarını tanınmış sənətkarlar Murray Bartlett, Conni Brayton, Jennifer Kollidj və Aleksandra Daddario calandırırlar.

Azərbaycan Dövlət “Yuğ” Teatrının yaradıcı kollektivi ilin ilk səhnə əsəri - “Təklif” tamaşasını yanvarın 23-də Abdulla Şaiq adına Dövlət Kukla Teatrında nümayiş olunub. 

Bu səhnə əsərinin quruluşçu rejissoru Günay Səttar, quruluşçu rəssamı Əməkdar rəssam Rəşid Şerif, bəstəkarı Əməkdar artist Vüqar Camalzadədir.

Tamaşada Xalq artisti Vidadi Həsənov, aktyorlar Zümrüd Qasımova və Elgün Həmidov çıxış ediblər. 

Sözügedən səhnə əsəri təkrar yanvarın 29-da teatrsevərlərin ixtiyarına veriləcək.

Azərbaycanlı rejissor Hilal Baydarovun “Durna çırağı” bədii filmi İtaliyada 33-cü Triest Film Festivalının proqramında yer alıb.

AzərTAC xəbər verir ki, yanvarın 21-dən 30-dək keçirilən festivalın məqsədi audiovizual istehsal sahəsində məlumatların yayılması, müzakirə və əməkdaşlığı təşviq etməkdir. Hilal Baydarovun filmi yanvarın 24-də nümayiş olunacaq.

“Durna çırağı” filmində hüquq təhsili olan qızla dörd qadını oğurlamaqda ittiham edilən kişi arasında münasibətdən bəhs edilir. 

Filmdə Orxan İskəndərli, Elşən Abbasov, Hüseyn Nəsirov, Rəna Əsgərova, Aytəkin Mirişova, Məryəm Nağıyeva, Nigar İsayeva, Səda Həsənova, Kamran Hüseynov və başqaları rol alıblar. Filmin bəstəkarı Kənan Rüstəmlidir.

Qeyd edək ki, sözügedən film 2021-ci ildə 34-cü Tokio Beynəlxalq Film Festivalında “İncəsənətə töhfəyə görə” xüsusi mükafata layiq görülüb.

Yanvarın 23-də Xətai Sənət Mərkəzində “Akvarel təəssüratları” adlı akvarel əsərlərindən ibarət satış sərgisi açılıb. 

Sərgidə iştirak etmək üçün 150-dən çox rəssamın 400-ə yaxın əsəri təqdim edilib. İlkin seçimlərdə 60 rəssam 80 əsəri ilə sərgidə iştirak etmək hüququ qazanıb. 

Beynəlxalq Akvarel Cəmiyyətinin 10 illik yubileyinə həsr olunmuş sərgi Milli Məclisin Mədəniyyət Komitəsi, Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası, Beynəlxalq Akvarel Cəmiyyətinin Azərbaycan nümayəndəliyi və Xətai Sənət Mərkəzinin nəzdindəki Xətai Akvarel Qalereyasının təşkilatçılığı ilə reallaşıb.

İştirakçı rəssamlara hədiyyələr və sertifikatlar təqdim ediləcək.

Azərbaycanın görkəmli bəstəkarı, SSRİ Xalq artisti, Dövlət mükafatları laureatı Fikrət Əmirovun anadan olmasının 100 illiyi münasibətilə “Min bir gecə” baleti dünyaca məşhur Mariinski Teatrında nümayiş olunacaq. 

Bu barədə TASS agentliyi xəbər verir. Baleti Mariinski Teatrında səfərdə olan teatrın Primorski səhnəsinin balet truppası təqdim edəcək.

Mariinski Teatrının Primorsk səhnəsinin baş baletmeysteri, Rusiyanın Əməkdar incəsənət xadimi, azərbaycanlı Eldar Əliyev jurnalistlərə deyib ki, Mariinski Teatrı Azərbaycan musiqi mədəniyyətinin inkişafında mühüm xidmətləri olan bu görkəmli bəstəkarın yubileyinə öz tamaşalarını həsr edən ilk sənət ocağıdır. O əlavə edib ki, yanvarın 23-də nümayiş olunacaq tamaşada Azərbaycandan gələn nümayəndə heyətinin də iştirakı gözlənilir.

Yubiley çərçivəsində Bakıdan dəvət olunmuş Azərbaycanın Əməkdar artisti, Azərbaycan Dövlət Opera və Balet Teatrının baş dirijoru və musiqi rəhbəri Əyyub Quliyevin dirijorluğu ilə 3 tamaşa nümayiş olunacaq.

Belçikanın tarixi Brügge şəhərində yerləşən, Avropa İttifaqının nüfuzlu təhsil müəssisəsi olan Avropa Kollecində 17-21 yanvar tarixlərində Azərbaycan milli günləri keçirilib. 

AzərTAC xəbər verir ki, milli günlər çərçivəsində rəssam Əsmər Nərimanbəyovanın və fotoqraf Maya Bağırovanın sərgiləri təşkil edilib, milli mətbəx təqdimatı və müxtəlif ölkələrdən olan kollecin tələbələri arasında Azərbaycanla bağlı müsabiqə keçirilib, qaliblərə suvenirlər təqdim olunub. 

Tədbir Avropa Kollecində təhsil alan tələbələrimiz Xədicə Hüseynova, Əli-Əşrəf Rəcəbli, Samir Səlimzadə və Nuranə Əhmədovanın təşəbbüsü, Azərbaycanın Belçikadakı və Fransadakı səfirliklərinin dəstəyi ilə baş tutub. 

Tələbələr səfirliklərimizə dəstəyə görə təşəkkürlərini bildiriblər.

Kitabın təbliğatı sahəsində uğurlu layihələrlə yadda qalan “Azərkitab” Kitab Təbliğatı Mərkəzinin keçirdiyi növbəti tədbir “Zəfər” Şəhid Ailələrinə Dəstək İctimai Birliyi ilə birgə olub.

“Ədəbiyyat və incəsənət” portalına “Azərkitab”dan verilən məlumata görə, Vətən müharibəsi şəhidi, polkovnik-leytenant Elzamin Təhməzovun xatirəsinə həsr edilən “Şuşanın qoxusu gəlir” kitabının təqdimatı keçirilib. Azərbaycan Yazıçılar Birliyinin üzvü Mənsurə Qaçayqızının müəllifi olduğu kitabda şəhid polkovnik-leytenantın döyüş yoldaşları və yaxınlarının xatirələri toplanılıb, qəhrəmanın keçdiyi döyüş yolu işıqlandırılıb, Şuşa istiqamətində gedən döyüşlər tərənnüm olunub. 

Tədbir şəhidin xatirəsinə həsr olunmuş videoçarxın nümayişi ilə başlanılıb. 

“Zəfər” Şəhid Ailələrinə Dəstək İctimai Birliyinin sədri Sevinc Alızadə torpaqlarımızın azad edilməsi uğrunda müharibənin qəhrəmanlarının tanıdılması və təbliğində belə əsərlərin əhəmiyyətli rolundan danışıb, xalqımıza möhtəşəm Zəfər sevinci yaşadan igidlərin döyüş yolunun böyüməkdə olan gənc nəsil üçün örnək olacağını qeyd edib.

Şəhid polkovnik-leytenantın döyüş yoldaşları, ədəbi və ictimai xasimlər çıxış edərək Elzamin Təhməzovun  həyat və döyüş yolunun ayrı-ayrı epizodlarını xatırladıblar, kitabın vətənpərvərlik tərbiyəsində müsbət rol oynayacağını bildiriblər.

Geniş oxucu kütləsi üçün nəzərdə tutulan “Şuşanın qoxusu gəlir” kitabının maraqla qarşılanacağına heç bir şübhə yoxdur.

Kaunas şəhəri şənbə günü Avropa mədəniyyət paytaxtı statusunu qəbul etdi. Bu münasibətlə Litvanın böyüklüyünə görə ikinci şəhərində "Oyanış" adlı işıq, musiqi, hərəkət və videoproyeksiya şousu keçiriləcək. 

“Ədəbiyyat və incəsənət” portalı TASS agentliyinə istinadən məlumat verir ki, şouda əsas qəhrəman mifik canlı obrazı olacaq, belə bir əfsanəvi bayram proqramının hazırlanması Kaunasın Avropanın mədəniyyət paytaxtı elan olunması xəbəri gündəmə gələn kimi qərara alınmışdı. 

Şounun, koronavirus pandemiyasına görə açıq hava altında həyata keçirilməsinə qərar verilib. Meydança Neman çayı adasında yerləşən idman arenası olacaq, burada "Jalgiris" basketbol klubu oynayır. Arenanın qarşısındakı ərazi internet vasitəsilə pulsuz yayımlanan biletlərlə tamaşaçılara çatdırılacaq sektorlara bölünüb. Tədbirin təşkilinə 800-ə yaxın könüllü cəlb edilib, bayramda 10 minə yaxın insanın iştirakı gözlənilir.

Kaunası bu münasibətlə Litva rəhbərliyi - Prezident Gitanas Nauseda, Baş nazir İnqrid Şimonite və Seymin (parlamentin) spikeri Viktoriya Çmilite-Nilsen ziyarət edəcək. 

YUNESKO-nun baş direktoru Odre Azule də onlara qoşulacaq. Videoəlaqə ilə Avropa Komissiyasının sədri Ursula fon der Lyayen toplaşanlara müraciət edəcək.

Ümumiyyətlə, 2022-ci ildə Kaunasın Avropa Mədəniyyət paytaxtı olması  proqramına 1 minə yaxın müxtəlif tədbir, o cümlədən 40 festival, 250-dən çox səhnə tamaşası və 250-dən çox konsert daxildir. 

Orada 4 mindən artıq ifaçı iştirak edəcək.

Rusiyanın Soçi şəhərində keçirilən ŞHK (Şən və Hazırcavablar Klubu) komandalarının 33-cü Beynəlxalq Festivalında ("KiViN-2022") Azərbaycanı təmsil edən komandanın rəhbəri Müşfiq Abbasovun hərəkəti ölkədə ciddi etirazlara səbəb olub.

O, ermənilərin təkidi ilə "Şuşa" komandasının adını "Buta" olaraq dəyişdirməyə razılıq verib. 

Azxeber.com saytına açıqlama verən  "Planet Parni iz Baku" KVN teatrının bədii rəhbəri Tahir İmanov məsələyə kəskin iradını bildirib: 

"O komandanı ora göndərəndə KVN-çilərdən, məndən, Bəhram Bağırzadədən, Cabirdən kimsə nəsə soruşdumu? Sualları o komandanı  oraya göndərən dövlət qurumuna  vermək lazımdır. Mənim öz fikrim var, istəyirəm ki, bu komandanı yaradanlar, oraya göndərənlər açıqlama versinlər. Neçə gündür ki, camaat ayağa qalxıb. Sosial şəbəkələrdə aktivləşiblər. Bütün Azərbaycan xalqı gözləyir, mən də gözləyirəm. Üstüörtülü yox, geniş açıqlama versinlər. Desinlər görək, komanda niyə çıxışdan imtina etməyib".

T.İmanov daha sonra əlavə edib: "İnandırım sizi, bunu bizim "Parni İz Baku"ya desəydilər, Anar Məmmədxanov nəinki orada qapını vurub gedərdi, hələ başqa şeylər də edərdi. Ümumiyyətlə, son illər bu KVN-lər fəallaşıb. Bir komanda getdi bizi biyabır etdi, bu da ikincisi oldu".