Metyu Makkonahi - tanınmış aktyor amerikalı qanunvericiləri doğulduğu Texasın Yuvalde şəhərində baş vermiş faciədən sonra odlu silahın dövriyyəsinə nəzarəti sərtləşdirməyə çağırıb. 

Xatırladaq ki, Yuvaldedə mayın 18-də bir manyak 18 şagirdi və 2 müəllimi güllələmişdi. 

Co Baydenin dəvəti ilə Ağ evdə çıxış edən aktyor Amerika prezidentinin 21 yaşdan kiçik insanlara hücum tüfənglərinin satışını qadağan etmək təklifini də dəstəkləyib.

Foto: AP

İstedadlı Azərbaycan karikatyraçı rəssamı Soltan Soltanlı ölkəmizi dünya miqyasında uğurla təmsil etməkdədir. 

“Ədəbiyyat və incəsənət” portalı xəbər verir ki, Malayziyada nəşr olunan aylıq "Rossem Cartoon House" sənət dərgisinin iyun sayında onun iki əsəri yer alıb.

“Ədəbiyyat və incəsənət” portalı xəbər verir ki, Türk Ağsaqqalları Birliyinin (TAİB) rəhbərliyi adından "Azərbaycan Televiziya və Radio Verilişləri" QSC-nin sədri Rövşən Məmmədova Təşəkkürnamə verilib.

Təşəkkürnaməni AzTV sədrinə TAİB rəhbərliyində təmsil olunan Elnur Eltürk təqdim edib. 

Qeyd edək ki, Azərbaycan Televiziyası Türk Ağsaqqalları Birliyi yarandığı gündən birliyə öz informasiya dəstəyini əsirgəməyib. 

Rövşən Məmmədov bundan sonra da birliyin ümummilli, Türk dünyası ilə bağlı təşkil etdiyi tədbirlərinin işıqlandırılacağını bildirib.

İntiqam Mehdizadə - yazıçı-publisist, jurnalist, ssenarist ötən gün, ömrünün 77-ci baharında vəfat edib. 

“Ədəbiyyat və incəsənət” portalı xəbər verir ki, İntiqam Mehdizadə 1945-ci ildə İsmayıllı şəhərində anadan olub. BDU-nun Jurnalistika fakültəsini bitirib. 3 il “Azərbaycan gəncləri” qəzetində işləyəndən sonra, 1973-cü ildə Azərbaycan SSR Dövlət Televiziya və Radio Verilişləri Komitəsində redaktor vəzifəsinə təyin olunub. Burada böyük redaktor, şöbə müdiri, baş redaktor vəzifələrinə qədər yüksəlib. "Gənclik və idman" redaksiyasına rəhbərlik edib.

5 kitab müəllifidir. "Karvanın sarvanı" adlı iri həcmli məqalələr toplusu "Ozan" nəşriyyatında çapa hazırlanır. Respublika Mətbuat Fondunun "Dan Ulduzu", Jurnalistlər Birliyinin H.B.Zərdabi adına mükafatları laureatıdır.

Son iş yeri Mədəniyyət və İncəsənət Universitetində mətbuat katibliyi olub, bu  vəzifədə çalışmaqla, həm də tələbələrə ssenari yaradıcılığı, ekran dramaturgiyası, ədəbi iş fənlərindən dərs deyib.

Filmoqrafiyasında 2004-cü ildə lentə alınmış “Lahıc” filmi xüsusi yer tutur. 

İki övladı, dörd nəvəsi ondan yadigar qaldı. Allah rəhmət eləsin!

Abdulla Şaiq adına Azərbaycan Dövlət Kukla Teatrının təmsilçiləri 1-5 iyun tarixlərində Gürcüstanda səfərdə olublar. Beynəlxalq teatr festivalında iştirak məqsədilə baş tutan səfər qarşılıqlı yaradıcılıq əlaqələrinin gələcək perspektivləri baxımından da məhsuldar olub.

Teatrdan verilən xəbərə görə, Gürcüstan Dövlət Kukla Teatrları Birliyi ilə Abdulla Şaiq adına Azərbaycan Dövlət Kukla Teatrı arasında əməkdaşlıq memorandumu imzalanıb.

Birliyin bədii rəhbəri, Gürcüstanın tanınmış teatr mütəxəssisi Nikoloz Sabaşvili ilə Azərbaycan Dövlət Kukla Teatrının direktoru, Əməkdar mədəniyyət işçisi, UNİMA Milli Mərkəzinin rəhbəri Rəşad Əhmədzadənin imzaladığı sənəd hər iki ölkənin teatrları üçün xüsusi əhəmiyyət kəsb edir.

Sənədə əsasən, iki ölkənin nəinki kukla, ümumən teatrları müxtəlif istiqamətlərdə davamlı əməkdaşlıq edəcək və müştərək layihələrə qatılacaqlar. Bu mənada tamaşaların hazırlanması, təcrübə mübadiləsinin tətbiqi, ustad dərslərinin təşkili, eləcə də spesifik istiqamətlərdə kurs və qısamüddətli təlimlərin keçirilməsi də nəzərdə tutulub.

Memorandumun əsas məqsədi tərəflərin qarşılıqlı əməkdaşlığı yolu ilə müxtəlif yaş qrupları üzrə kukla ifaçılıq sənətini daha da təkmilləşdirmək və dünya miqyasında sistemli təbliğinə nail olmaqdır. Belə olduqda əməkdaşlıq edən teatrların həm bədii yaradıcılıq potensialı inkişaf edəcək, həm də sağlam rəqabət mühiti formalaşacaq.

Hər iki ölkənin teatr təmsilçiləri üçün əlverişli olacaq razılaşmaya əsasən birlik azərbaycanlı kuklaçıların Gürcüstanda müxtəlif yaradıcılıq layihələrinə dəstək verəcək, həmçinin hər iki ölkənin teatrları arasında əlaqələndirici missiyanı yerinə yetirəcək.

Qarşılıqlı qastrol səfərləri, dəyirmi masalar, müştərək tamaşalar və bu kimi digər yaradıcı təşəbbüslərə yol açacaq razılaşmada teatrların repertuar siyasəti və təbliğatı məsələləri ilə bağlı da müddəalar yer alır.

Xatırladaq ki, Gürcüstan Mədəniyyət Nazirliyinin eyni profilli teatrların mərkəzləşmiş idarəetməsi və yaradıcılıq baxımından tərəqqisi məqsədilə təsis etdiyi bu birlik öz ətrafına ölkənin ən tanınmış teatr mütəxəssislərini cəlb etməklə bir çox maraqlı layihələrə imza atıb.

Dahi Azərbaycan şairi Nizami Gəncəvinin Almaniyada işıq üzü görmüş “Leyli və Məcnun” əsəri Frankfurtun mərkəzi “Veltenlezer” kitab evində təqdim olunub.

Azərbaycan Dövlət Tərcümə Mərkəzindən verilən açıqlamaya görə, tədbiri giriş sözü ilə tanınmış alman alimi, Vürtsburq Universitetinin professoru Ziqlinde Hartman açaraq Nizami Gəncəvinin zəngin ədəbi irsindən, dünya ədəbiyyatına bəxş etdiyi bəşəri əsərlərinin dərin fəlsəfəsindən danışıb.

Mayns Universitetinin professoru, tanınmış türkoloq-alim Hendrik Boeshoten Nizami yaradıcılığının özünəməxsusluğu, ideya və məna aktuallığı baxımından bu günlə səsləşməsi barədə fikirlərini açıqlayıb və tədbir iştirakçılarının mövzu ilə əlaqədar suallarını cavablandırıb.

Naşir Hans Jürgen Maurer çıxışında dahi ədibin milli mənsubiyyəti ilə bağlı əsl həqiqətlərin dünyaya yayılmasında bu səpkili layihələrin əhəmiyyətini qeyd edib: “Əsl həqiqət isə ondan ibarətdir ki, dahi şair Azərbaycanın hazırda ikinci böyük şəhəri olan Gəncədə anadan olub, heç vaxt doğma şəhərindən kənara çıxmayıb, yalnız orada yazıb-yaradıb və elə Gəncədə də dəfn olunub. Mən özüm də Azərbaycanda olarkən dahi şairin Gəncədəki məqbərəsini ziyarət etmişəm”.

Tədbirin sonunda tanınmış alman aktyoru Stefan Bittoun “Leyli və Məcnun” əsərindən parçalar ifa edib.

Qeyd edək ki, “Leyli və Məcnun” əsərinin alman dilinə tərcümə müəllifi görkəmli alman mütərcimi Rudolf Qelpkedir. İlk dəfə 1963-cü ildə Sürixdə işıq üzü görmüş kitab əsərin müəllifini alman oxucu auditoriyasına “fars şairi” kimi tanıtsa da, əsərin 2021-ci ildə Azərbaycan Dövlət Tərcümə Mərkəzi tərəfindən Almaniyada işıq üzü görmüş yeni nəşri “Leyli və Məcnun”u həmin auditoriyaya dahi Azərbaycan şairi Nizaminin əsəri olaraq təqdim etdi.

Bakı Şəhər Mədəniyyət Baş İdarəsinin təşkilatçılığı ilə dünyaşöhrətli bəstəkar və müğənni, SSRİ Xalq artisti Müslüm Maqomayevin anadan olmasının 80 illiyi münasibətilə Azərbaycan Dövlət Akademik Filarmoniyasında “Ey əziz anam, Azərbaycan” adlı konsert keçirilib. 

Baş İdarədən verilən açıqlamaya görə, konsertdə müğənninin adını daşıyan 26 nömrəli onbirillik musiqi məktəbinin respublika və beynəlxalq mükafatlar laureatı olan şagirdləri və musiqi kollektivləri çıxış edib.

Orxan Həşimovun dirijorluğu ilə Qara Qarayev adına Azərbaycan Dövlət Kamera Orkestrinin müşayiət etdiyi proqramda Azərbaycan, rus və xarici ölkə bəstəkarlarının əsərlərini məktəbin xoru, “Buta” qanunçalanlar ansamblı, “Fantaziya” skripkaçılar ansamblı, eləcə də musiqi məktəbinin müəllim və şagirdləri səsləndiriblər.

Konsertdə dünyaşöhrətli müğənni Müslüm Maqomayevin repertuarından olan mahnılar ifa olunub və onun həyatından bəhs edilən videoçarx nümayiş etdirilib.

Daha sonra məktəbin birləşmiş xorunun L.Mehdiyevanın Müslüm Maqomayevə həsr etdiyi “İthaf” adlı əsərinin ifası böyük sənətkara ehtiramın təcəssümü kimi tamaşaçıların yaddaşında özünəməxsus iz qoyub.

“Ədəbiyyat və incəsənət” portalı xəbər verir ki, yeni ünvanda öz qapılarını oxucuların üzünə açmış “Azərkitab - kitab təbliğatı mərkəzi”ndə bu gün Rusiyada yaşayan ədibimiz Solmaz Qəribelin “Qərib küləklər” və “Saçı ağarmış arzular” adlı kitablarının təqdimatı və imza günü keçiriləcək. 

Tədbir saat 12.00-də başlayacaq. 

Kitab təqdimatlarının, ziyalılarla görüşlərin, sərgilərin, müxtəlif ədəbi-kütləvi tədbirlərin keçirilməsi üçün Ukrayna Ticarət Evi-nin inzibati binasında yerləşən "Azərkitab - kitab təbliğatı mərkəzi” qeyd edək ki, müasir formatda üç zalı ilə fəaliyyət göstərməkdədir.

Ünvan: Nərimanov rayonu, A.Salamzadə küc. 65B(Atatürk prospektində, Gənclik metrosundan Ayna Sultanova abidəsi istiqamətində gedən yolda yerləşən “Zivella” mebel evinin arxası)

Əlaqə: 050 260-90-20, 050 661-11-33

Kitabları sevsək kitablar bizləri ucaldacaqlar!

Özbəkistandakı Heydər Əliyev adına Azərbaycan Mədəniyyət Mərkəzinin “Azərbaycan ədəbiyyatı özbək dilində” layihəsi çərçivəsində tanınmış Azərbaycan yazıçısı Xalidə Hasilovanın hekayələri özbək dilinə tərcümə edilərək Daşkənddəki “Renessans press” nəşriyyatında çap edilib. 

“Ədəbiyyat və incəsənət” portalı AzərTAC-a istinadən  xəbər verir ki, Xalidə Hasilovanın “Siren dastasi” adlanan hekayələr toplusunu özbək dilinə tərcüməçi Şokir Dolimov uyğunlaşdırıb. 

Kitabın “Ön söz” müəllifi Özbəkistandakı Azərbaycan Mədəniyyət Mərkəzinin direktoru Samir Abbasovdur. 

"Ədəbiyyatımızın, nəsrimizin əbədiyaşar Xalidə xanımı” başlıqlı “Ön söz”də Azərbaycan oxucularının əsərlərini sevə-sevə oxuduqları yazıçılardan biri, XX əsr Azərbaycan nəsrinin və publisistikasının tanınmış nümayəndəsi kimi Xalidə Hasilovanın yaradıcılığı haqqında məlumat verilir. 

Qeyd olunur ki, ədəbiyyata xidmət müəllifin kimliyi ilə deyil, ədəbi əsərlərinin uğuru ilə qiymətləndirilir. Xalidə Hasilova ədəbiyyata uşaq yazıçısı kimi gəlsə də, sonralar həm uşaqlar, həm də böyüklər üçün yazdığı maraqlı nəsr əsərləri ilə geniş oxucu kütləsinin qəlbini fəth edib. Çoxsaylı kitablar, dram əsərləri nəşr olunmuş yazıçının hekayələri ilk dəfə olaraq qardaş Özbəkistanda özbək dilinə tərcümə edilərək işıq üzü görür. 

“Siren dastasi” kitabında yazıçı Xalidə Hasilovanın “Həyatın kəsişməsi”, “İradə”, “Uzaq keçmişdə”, “Meşə qızı”, “Xatirə”, “Gecə söhbəti”, “Yağış dayandı”, “Çoxdan gözlənilən məktublar” və başqa əsərləri yer alıb. 

Nəşrin Azərbaycan Mədəniyyət Mərkəzi tərəfindən Daşkənddə təqdimatının keçirilməsi və Özbəkistan kitabxanalarına hədiyyə edilməsi planlaşdırılır.