Bu gün Nizami Kino Mərkəzində CINEMO mobil film festivalının açılışı olacaq. 

Bu barədə “Ədəbiyyat və incəsənət” portalına festivalın rəhbəri Ruslan Sabirli məlumat verib. 

Ruslan Sabirli deyib: “Fikir çəkmə, telefona çək!” devizi ilə keçiriləcək mobil film festivalı ilə ölkəmiz adına böyük bir uğura imza atdıq. Bəli, bu gün bir neçə aydır üzərində sıx işlədiyim ölkənin ilk mobil film festivalı olan CINEMO Film Festivalı Günləri başlayır. 

Festival ölkədə bir ilk olmaqla yanaşı həm də Azərbaycanda ilk tədbir olacaq ki, TikTok tərəfindən dəstəklənəcək. Belə ki, canlı olaraq Şərqi Avropa və Mərkəzi Asiya üzrə TikTok yayımçıları icmasının rəsmi səhifəsində https://www.tiktok.com/@tiktoklive_cis yayımlanacaq. Bu canlı yayım Azərbaycan, Qazaxstan, Özbəkistan, Türkmənistan, Qırğızıstan, Tacikistan, Belorusiya, Moldaviya, Gürcüstan və s. ölkələrdə kəşfetə çıxarılacaq.

Oxucularımız üçün festivalın proqramını təqdim edirik:

21 fevral, 14:00-17:00 – Bədii filmlərin nümayişi;

22 fevral, 14:00-17:00 – Sənədli filmlərin və sosial çarxların nümayişi;

23 fevral, 19:00 – Qala Gecə | Qaliblərin elanı və Mükafatlandırma Mərasimi.

Məkan: Nizami Kino Mərkəzi (Bülbül pr. 20)

Xatırladaq ki, Ruslan Sabirli kinoda öncə aktyor kimi parlayıb, o, yazıçı Varisin eyniadlı romanı əsasında səhnələşdirilmiş və “Xəzər” TV-də nümayiş olunan “Sənə inanıram” teleserialında Həmid rolunu məharətlə oynayıb. 

Sonradan o, daha çox prodüsser fəaliyyəti ilə diqqət çəkib, kifayət qədər uğurlu Buktreyler festivalı layihəsi ilə ad eləyib. 

CINEMO film festivalı Ruslan Sabirlinin növbəti uğurlu layihəsidir. 

Xatırladaq ki, festivalın təşkilati dəstəkçiləri arasında AR Mədəniyyət Nazirliyi və AR Kino Agentliyi, informasiya dəstəkçiləri arasında  Trend, Milli.az, Day.az saytları var. 

“Ədəbiyyat və incəsənət”

(21.02.2024)