Səməd Vurğunun Ev Muzeyində Ümummilli Lider Heydər Əliyevin anadan olmasının 100 illiyinə həsr olunmuş tədbir və "Heydər Əliyev və Vurğun Ocağı" adlı sərginin açılışı olub. 

“Ədəbiyyat və incəsənət” portalı xəbər verir ki, tədbirdə  Səməd Vurğunun Ev Muzeyinin direktoru Vurğun Vəkilov,  "Qazax" Xeyriyyə İctimai Birliyi İdarə heyətinin sədri, professor İlham Pirməmmədov, İctimai Birliyin üzvləri, mədəniyyət və incəsənət nümayəndələri iştirak ediblər.

Tədbiri giriş sözü ilə Səməd Vurğunun Ev Muzeyinin direktoru Vurğun Vəkilov açaraq Ulu Öndər Heydər Əliyevin Səməd Vurğun yaradıcılığına və Səməd Vurğun irsinə göstərdiyi diqqət və qayğıdan danışıb. Muzeyin əməkdaşı Xanım Şadlinski Səməd Vurğunun həyat yoldaşı Xavər xanımın Heydər Əliyevlə bağlı yazdığı xatirələri tədbir iştirakçılarının diqqətinə çatdırıb.

Sonra tədbir iştirakçılarına Səməd Vurğunun anadan olmasının 90 illik yubileyi ilə əlaqədar olaraq Ulu Öndər Heydər Əliyevin Fəxri Xiyabanda Vurğunun məzarını ziyarət etməsi, Səməd Vurğunun Ev Muzeyini ziyarət etməsi, ailə üzvləri ilə görüşməsi,  qızı Aybəniz Vəkilovanın bələdçiliyi ilə Səməd Vurğun Ev Muzeyində görülən işlərlə tanış olması haqqında videoçarx təqdim olunub.

Daha sonra mədəniyyət və incəsənət nümayəndələri musiqili konsert proqramı ilə çıxış ediblər. Tədbirin sonunda qonaqlar Heydər Əliyevin Səməd Vurğunla bağlı xatirə şəkillərindən hazırlanmış fotostendlərlə tanış olublar.

“Ədəbiyyat və incəsənət”

(30.05.2023)