Super User
İlyas Əfəndiyevin 110 illik yubileyi “Boy çiçəyi” tamaşası ilə qeyd edilib
Xalq yazıçısı İlyas Əfəndiyevin anadan olmasının 110 illiyi ilə əlaqədar Şuşa Dövlət Musiqili Dram Teatrı “Boy çiçəyi” tamaşası ilə Azərbaycan Teatr Xadimləri İttifaqının səhnəsində çıxış edib. Səhnə əsəri Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə təqdim olunub.
AzərTAC xəbər verir ki, tamaşanın təqdimatından əvvəl İttifaqın məsul katibi Aida Qafarova İlyas Əfəndiyev milli teatrımıza çox sayda mükəmməl sənət inciləri bəxş etdiyini bildirib: “Onun yaradıcılığı bütün zamanlarda maraqla qarşılanıb, sevilib və bu gün də sevilməkdədir”.
Xalq artisti Mərahim Fərzəibəyova İlyas Əfəndiyevin yaradıcılıq yolundan, onun səhnəmizə bəxş etdiyi mükəmməl əsərlərdən söhbət açıb.
Çıxışdan sonra Şuşa Teatrının təqdimatında “Boy çiçəyi” tamaşası nümayiş olunub.
Üç müxtəlif insan teleyi, üç nakam məhəbbət hekayəsi... Bir tərəfdə Həsənzadənin sevincini və dərdini xəyalən bölüşdüyü, xatirəsini həmişə əziz tutduğu, erkən itirdiyi həyat yoldaşına qarşı olan nakam məhəbbəti, digər tərəfdə Nəzakətin müharibədə itirdiyi ərinə qarşı olan, lakin ikinci əri Fərəcin qorxusundan dilə gətirə bilmədiyi nakam məhəbbəti...Və nəhayət Nargilənin Həsənzadəyə qarşı olan sonsuz və nakam məhəbbəti...
Lirik–psixoloji üslubda yazılmış pyesin yeni, müasir səhnə yozumu ilə tanış olmaq hər bir tamaşaçı üçün maraqlı olub.
Görkəmli Azərbaycan dramaturqu İlyas Əfəndiyevin “Boy çiçəyi” (sonradan “Sən həmişə mənimləsən” adı ilə məşhurlaşmışdır) pyesinin yazılmasından 60 il vaxt keçməsinə baxmayaraq, əsər bu gün də sevilir, bu gün də tamaşaçı zövqünü oxşayır.
Böyük maraq və alqışlarla qarşılanan tamaşadan sonra rejissor, Əməkdar artist Loğman Kərimov uğurlu quruluşa görə, iştirakçılar– Əməkdar artistlər Nazir Rüstəmov, Azad Məmmədov, aktyorlar Zəhra Salayeva və Püstəxanım Zeynalova İttifaqın Fəxri fərmanları ilə təltif olunublar.
Yubiley münasibətilə növbəti tamaşa mayın 26–da Şuşa Dövlət Musiqili Dram Teatrının səhnəsində oynanılacaq.
“Ədəbiyyat və incəsənət”
(21.05.2024)
Kütləvi manqurtlaşma- modern köləlik
Ülviyyə Əbülfəzqızı, “Ədəbiyyat və incəsənət”
Zibil yeşiklərinin yanından keçərkən heç sizin də beyninizdə toplanan qalaq- qalaq zibillərin olduğunu düşündünüzmü?
Bəlkə, düşünənləriniz oldu, bəlkə də, bu suala cavab: "Əbülfəzqızı, sənin bizim beynimizin içində nə işin var?"- söyləyənləriniz də oldu.
Narahat olmayın, "beyninizlə” alış- verişim yoxdur.
Sadəcə, fikirlərimin giriş hissəsinə təsirli ədviyyatlar əlavə edirəm.
Gündəlik lazımsız informasiyaların sizlərə mənfi təsirini, yəqin ki, bilirsiniz. O lazımsız nəhəng aysberqə bənzər informasiya axını beynin şöbələrində lazımsız zibil kimi üst- üstə toplanır. Çünki informasiya axını sürətli olduğu üçün beyin saf-çürük etməyə macal tapmır.
Sosial şəbəkələr, "ev dağıdan" Tik- tok, lazımsız televiziya verilişləri, hansısa "ulduzun" əttökən həyat tərzi - özündən yaşlı, ya cavan həyat yoldaşlarının siyahısı və s. gərəksiz informasiyalar beyni yorur.
Beyni yorulanlar da nə özləri, nə də başqaları haqqında qərar vermə qabiliyyətində olurlar.
Süni intelekt hər suala cavab taparkən insanlar adi vəziyyəti belə analizetmə gücünü əlləri ilə tükətmiş olurlar.
Yapon alimləri tədqiqat nəticəsində bu dəhşətli faktları təsdiqləyiblər.
Telefon uşaqlarımızın sevimli oyuncağıdır, təki səsini kəssin.
Səsini də kəsir, elmini də, savadını da..
Sonra söyləyirik: Ay müəllim, filan qədər pul tökmüşəm, bu uşağın başı niyə boşdur?
Çünki sıyığı yediyi andan körpə telefona aludə olub. İllərlə də bu aludəçilik davam edib. Beyinə daxil olan lazımsız informasiyalar yaddaşı zəiflədir.
İnsanlar düşüncə qabiliyyətini itirib modern qula çevrilirlər. Barmaqlarımız qələm yerinə daha çox telefon tutur. İndi gəl bu beyinlə nə isə yaz. Yaza biləcəyikmi, əlbəttə ki, yox. Yazmaq üçün düşüncə və yaddaş lazımdır. Düşüncəmizi itiririksə, potensial kölələrik, ya da ki, hansısa mexanizm tərəfindən idarə olunan canlı robotlar oluruq.
Niyə özümüz özümüzə qarşı bu qədər qəddarıq, özümüzə qənimik!?
Müasir texnologiyanın müsbət tərəflərini görək, niyə axı lazımsız tərəflərindən limitsiz istifadə edək?
Lazımsız informasiyaları bloklayıb düşüncəmizi sağaldaq, bərpa edək. İnsanlığın sonunu- faciəsini sürətləndirməyək.
“Ədəbiyyat və incəsənət”
(21.05.2024)
Türkiyə Prezidenti “Avroviziya”nı ailə dəyərlərinə təhlükə adlandırıb
“2024-cü ildə Malmödə keçirilən “Avroviziya” mahnı müsabiqəsi ənənəvi ailə dəyərlərinə təhlükə yaradır”.
“Report”un məlumatına görə, bu fikirləri Türkiyə Prezidenti Rəcəb Tayyib Ərdoğan deyib.
“Eurovision Mahnı Müsabiqəsində deseksuallaşdırma siyasəti kimi bir fenomenin qlobal şəkildə tətbiq edilməsinin şahidi olduq. Aydın məsələdir ki, gənclərə hopdurulan qəribə tiplər sosial deqradasiya üçün troya atıdır.
Hamı etiraf edir ki, bu, şüurlu siyasətdir. Biz son 10-12 ildə Türkiyəni bu biabırçılıqdan qoruyub, necə düzgün qərarın verildiyini öz gözlərimizlə görürük”, - deyə Ərdoğan bildirib.
“Ədəbiyyat və incəsənət”
(21.05.2024)
POETİK QİRAƏTdə Əlizadə Nurinin “Mən bir az eşq torpağıyam... “ şeiri
Poetik Qiraətdə bu gün sizlərlə yenidən Əlizadə Nuri görüşür. “Mən bir az eşq torpağıyam” deyir şair.
“Bir ipək köynək kimiyəm-
Yaman tez batır qəm mənə...” - gözəldir, deyilmi?
Xoş mütaliələr!
Mən bir az eşq torpağıyam...
Şirin- şirin al canımı,
Qılıncında şəkər saxla.
Bu gün bir az öldür məni-
Sabaha da şikar saxla!
Bəlkə də eşq torpağıyam-
Bəlkə elə pirəm, zalım?
Hər gün səni çağırsam da
Adını bilmirəm, zalım.
Özgəsini neynirəm ki,
Özün elə sitəm mənə.
Bir ipək köynək kimiyəm-
Yaman tez batır qəm mənə...
“Ədəbiyyat və incəsənət”
(21.05.2024)
“Yığdıqlarınız bəsdir...”
“Ədəbiyyat və incəsənət” portalı sizlərə Xeyrəddin Qocanın miniatür hekayələrinin təqdimini davam etdirir.
Yığdıqlarınız bəsdir...
Rəsul Rzanın anadan olmasının 90 illik yubileyi ilə əlaqədar Ankarada "Əhməd Yasevi fondu" tərəfindən tədbir keçirilirdi. Dəvətlilər arasında Xeyrəddin Qoca da vardı.
Tədbirdən sonra fondun sədri, Türkiyənin tanınmış şəxslərindən biri olan Namiq Kamal Zeybək (şəkildə) ziyafət verirdi. Xalq yazıçısı Anar, Namiq Kamal Zeybək və Xeyrəddin Qoca bir masa arxasında oturub söhbət edirdilər. Söhbət tarixdən, ədəbiyyatdan düşdü. Birdən Xeyrəddin Qoca Namiq Kamal Zeybəkə sual verdi:
-Bağışlayın, siz neçə il nazir vəzifəsində işləmisiniz?
Namiq Kamal qəfil sualdan təəccübləndi:
-Ümumiyyətlə, yeddi ildən artıq bir zaman oldu, sayın baş konsolosum!
X.Qoca zarafatla:
-Eh! O zaman yığdıqlarınız nəvə-nəticələrinə də bəs edər! - dedi.
“Ədəbiyyat və incəsənət”
(21.05.2024)
“İrəvan mətbəxindən nümunələr” layihəsində Acı-qıcı qovurması
Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Axı-qıcı qovurmasının
hazırlanma qaydasını təqdim edəcəyik.
ƏRZAQ:
§ Acı-qıcı – 130 qr
§ Soğan – 26 qr
§ Yumurta – 40 qr
§ Yağ – 30 qr
§ Duz – 4 qr
Xörək əlavəsi:
§ qatıq – 50 qr, sarımsaq – 2 qr
HAZIRLANMASI:
Acı-qıcı i yuyulur, doğranır, pörtlədilir və süzülür. Acı-qıcının sünbüllü hissəsi təmizlənməlidir. Soğan bol yağda qovrulur. Üzərinə mərəçüyüd əlavə edilib vam odda bi- şirilir. Tam yağa düşdükdə üzərinə yumurta vurulur. Süfrəyə sarımsaqlı qatıqla verilir.
Nuş olsun!
“Ədəbiyyat və incəsənət”
(21.05.2024)
Xarici dildə olan və xoşum gələn mahnılar haqqında - ESSE
“Ədəbiyyat və incəsənət” portalı Hümbət Həsənoğlunun “Xarici dildə olan və xoşum gələn mahnılar haqqında” adlı essesini təqdim edir.
Özümdə əvvəllər də müşahidə etdiyim, son zamanlar da fikir verdiyim bir cəhətimi yazıram: Təbii ki, gözəl sözləri və möhtəşəm melodiyaları olan milli musiqimizi çox sevirəm. Amma xarici dildə olduğundan sözlərini başa düşmədiyim mahnılar da xoşuma gəlir. Elə özümün nə vaxtsa yazdığım bir fikri də bura gətirmək istəyirəm. Dünyada Allahın yaratdıqları və insanın yaratdıqları var. İnsanın yaratdıqları arasında Allahın yaratdıqlarına ən yaxın olanı musiqidir.
Bunun səbəbi də yəqin odur ki, musiqi ruha təsir edə bilən vasitədir. Mahnının sözləri ilə bağlı: Sözlər fikri çatdırmaq üçün vasitədir, onlar emosiyaları çatdırmağa qadir deyillər, elə çox bəsit olduqlarından.
Dəfələrlə xoşum gələn xarici mahnının sözlərinin tərcüməsini tapanda, təəssüf hissi keçirmişəm, mənim düşüncəmdə sözlər olduğundan daha möhtəşəm olmalıydı. Hər halda, gözləntim belə olub.
Düşünürəm ki, musiqi ruhumuzu riqqətə gətirdiyindən biz başa düşmədiyimiz, böyük ehtimalla, adi sözlərin əvəzinə öz ən ülvi emosiyalarımızı qoyuruq.
Gözəl melodiya və ülvi emosiyalar isə birləşərək ruhumuzu sevindirir.
Məncə belədir…
“Ədəbiyyat və incəsənət”
(21.05.2024)
Ölmək qadağandır!
1.
Yüksək ölüm faizini görüb Padşah sərəncam imzaladı:
Məmləkətdə ölmək qadağan edilir. Kim qanunu pozsa edam ediləcək.
2.
-Allah sənə şükür, nə yaxşı ki, mən 18-ci əsrdə doğulmamışam.
-Niyə ki?
-Necə niyə ki? 18-ci əsrdə doğulsaydım çoxdan ölərdim. İndisə sağam.
3.
AzTV-nin məşhur “Düşən pullar” şousu. Aparıcı Şəhriyar Əbilov iki tanınmış alimə deyir ki, buyurun mövzu seçin: elm, yoxsa bazar.
Alimlər bir ağızdan deyirlər: Əlbəttə bazar.
4.
Cinli Mürvət kruizə çıxmaq istəyir. Gəmi kapitanından soruşur:
-Bağışlayın, qiymətlər necədir sizdə?
-Birinci klass kayutalar yeməklə birgə günü 100 manat, ikinci klass 70 manat, üçüncü klassa 50 manat.
Bunu deyib kapitan Cinli Mürvətin pəjmürdə simasını görür və zarafat edir:
-Siz gəminin dalınca üzsəniz, pulsuz başa gələcək sizə kruiz.
Cinli Mürvətin eyni açılır:
-Mən razı. Bəs gündə neçə dəfə yemək atacaqsız mənə?
5.
Gədəbəyin dağ kəndində yaşayan 70 yaşlı Müzəffər dayının peycerinə peycinq kompaniyasından mesaj gəlir:
“Ey, başdanxarab, get özünə mobil tələfon al nəhayət ki. Tək sənə xidmətə görə biz 13 ildir şirkəti bağlaya bilmirik.
6.
Kasıbçılıq boş soyuducu demək deyil. Kasıbçılıq soyuducusuzluq deməkdir.
“Ədəbiyyat və incəsənət”
(21.05.2024)
BİR SUAL, BİR CAVAB Təranə Dəmir ilə
Ülviyyə Əbülfəzqızı, “Ədəbiyyat və incəsənət”
SUAL:
Dəyərli Yaradıcımız, A. Şopenhaurun gözəl bir deyimi var: " Hər ayrılıq ölümün əvvəlcədən dadılması kimidir, yenidən qovuşmaq da yenidən dünyaya gəlməyin əvvəlcədən dadını hiss etmək kimidir."
Bəs hər xırda səbəblərə görə küsüb-barışan, münasibət qura bilməyib, " sevgi yoxdur" - deyib sevgini ucuzlaşdıran kəslərə nə söyləyərdiniz?
CAVAB:
Ayrılıq sevgisizlikdən, sevgi tükənəndə düşür ortalığa mənim aləmimdə.
Sevmək səbir, dəyanət, dözüm istər. Əgər bir yola qoşa qədəm qoyursansa, demək, onun bütün çətinliklərini, ağrılarını da gözə almalısan. Əks halda, bu sevgi deyil. Tutqudur. Alışdın və söndün. Bir də sevgi iki ruhun qarşılıqlı hissidir. Biri bitirsə, o biri bunu yürüdə bilməz. Həm də cütlər arasında hörmət, qayğı, diqqət əsasdır. Laqeydlik də sevgini kül edən amillərdən biridir. Hətta ən mükəmməl eşqləri belə soyuda bilir.
Ədəbiyyat və incəsənət”
(21.05.2024)
“Bir doğma ürəyi daşıya bilmədim…” - CAVİD FƏRZƏLİNİN ŞEİRLƏRİ
“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə sevimli şairimiz Cavid Fərzəlinin şeirləri təqdim edilir.
Kamança
Bir qumru dərədə
Bir ana küləyin dilində,
Qarğı qamışlar nəğmə deyəndə,
tikanlı məftillərin üstünə sərdim səsimi.
Səni bülbül səsindən soruşdum, kamança!
Oxuyanda tənha divarlarımı,
hərifləyəndə tanrı barmaqlarımı.
Qulağımın dibində
sular danışanda
dilini öyrəndim çayların...
Məhbəs çiçəklərdə
yağışlar ölümünü sənintək oxuyur,
buludlar sevdasından havalanır.
Yenə ayrılıq düşdü üzümə
Boynuma dolanan kor çöllərdə
Ağaclar ölüm gətirdi əllərimə.
Üsyanım nəğməyə döndü
Küçələrin göz yaşında,
Qapımızın üzünü sevmə daha.
Ovuclarımın azad günündə,
Barmaqlarımın başına dönmə daha, kamança!
Qadın
Səni hər fəsil sevdi,
Mən payızı xatırladım.
Baxdım payızdan sənə;
Ömrün, qız yağışlara,
Ana buludlara qucaq açdı.
Güzgülər üzünü sevərkən,
Sular balıqların dilini öyrənərkən.
Bir kişi üzündən yol saldın ayrılığa.
Dəniz də itirdi gülüşünü,
Sahil də kirlətdi ləpirini.
Hələ canından doymadı çiçəklər,
hər bahar dərildi əllərin,
Qarımış kölgələrin üstünə.
Sonra gözəlliyinə qəfəs qurdu qanadsız küçələr.
Qanadlarının kəklik vaxtı.
Barmaqlarının azad günü.
Üzünü aya bənzətdilər sənin,
Ay deyildin ki, qara pərdələrdən damasan.
Sən elə qadınsan, qadın,
Dəyişə bilmədim ayrılıq adını,
Dəyişə bilmədim kəpənək üzünü.
Mənim
Məni bağışla anamın üzü.
Həyat anam oldu mənim,
Bir doğma ürəyi daşıya bilmədim,
Çiyinlərim ata oldu mənim.
Hər oğul üzünü
bir ana bağışlayır
Vətən boyuna.
Məni bağışla anamın üzü
atam müharibə qədəhində,
Qardaşımın taleyini içdi,
saçların sərxoş oldu sənin.
Qadın olmaq Tanrı adından ayrı düşməkdirsə,
Bəs niyə üzündə yükəm sənin...
Bir də doğulsa gözlərim,
Küçələrə ana deməyəcək əllərim,
Qapımıza ata deməyəcək ayaqlarım.
Axı bir ağac ağrılarıma ana demədi mənim.
“Ədəbiyyat və incəsənət”
(21.05.2024)
