Super User
“Şuşa günləri” bu dəfə qardaş Xivə şəhərində keçirilib
Şuşa Şəhəri Dövlət Qoruğu İdarəsinin təşkilatçılığı ilə Şuşa ilə qardaşlaşmış Xivə şəhərində “Şuşa günləri” keçirilib.
Dövlət Qoruğu İdarəsindən AzərTAC-a bildirilib ki, keçirilən tədbirlər çərçivəsində Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov Xivə şəhərinin hakimi Temur Davletovla görüşüb, qardaşlaşmış iki şəhərin münasibətlərinin daha da möhkəmlənməsi, elm, mədəniyyət, yaradıcılıq sahəsində əlaqələrin inkişafı, təcrübə mübadiləsinin əhəmiyyəti barədə müzakirələr aparıb, sonra tarixi “İçən Qala” ərazisində şəhər gəzintisinə çıxıblar.
Sonra Aydın Kərimov, Şuşa Şəhəri Dövlət Qoruğu İdarəsinin İcraçı direktoru Tural Novruzov və xüsusi nümayəndəliyin baş məsləhətçisi Elşad İskəndərovun iştirakı ilə Urgənc Dövlət Universitetində rektor Bəhram Abdullayevlə görüş keçirilib. Görüşdə 1938-1940-cı illərdə bu universitetdə müəllim kimi fəaliyyət göstərən yazıçı, ictimai xadim Y.V.Çəmənzəminli adına Azərbaycan Mədəniyyəti və Ədəbiyyatı Mərkəzinin yaradılması barədə ətraflı danışılıb. Aydın Kərimov tarixi Şuşa şəhərində aparılan abadlıq, quruculuq, bərpa və yenidənqurma işləri haqqında geniş məlumat verib.
Sonda şuşalı rəssam tərəfindən çəkilən Y.V.Çəmənzəminlinin portreti Mərkəzə hədiyyə edilib. Tələbələrin ifasında kiçik konsert proqramı nümayiş etdirilib.
“Şuşa günləri” “İçən Qala”da maraqlı tədbirlərlə davam edib.
“Şuşa - dünən və bu gün” adlı fotosərgidə Şuşanın tarixi keçmişini, füsunkar təbiətini, işğaldan əvvəl və sonrakı görkəmini, bərpa-quruculuq, yenidənqurma işlərini özündə əks etdirən müxtəlif fotolar sərgilənib, hər biri haqqında ətraflı məlumatlar verilib.
Tədbirdə təqdim edilən XVIII-XIX əsrlərə aid "Qarabağ milli geyimləri" maraqla qarşılanıb. Kolleksiyada əsasən Qarabağın zadəgan xanımlarının geyimləri və kişi libasları sərgilənib.
Özbəkistanda olan müxtəlif ölkələrin səfirləri, Xivə şəhərinin hakimi Temur Davletov, Şuşa rayonunda Azərbaycan Respublikası Prezidentinin xüsusi nümayəndəsi Aydın Kərimov, Şuşa Şəhəri Dövlət Qoruğu İdarəsinin İcraçı direktoru Tural Novruzov, xüsusi nümayəndəliyin baş məsləhətçisi Elşad İskəndərov, Nümayəndəliyin və Qoruğun əməkdaşlarının iştirak etdiyi tədbirdə Azərbaycanın Xalq və Əməkdar artistlərinin ifasında Qarabağı, Şuşanı tərənnüm edən möhtəşəm konsert proqramı alqışlarla qarşılanıb. Azərbaycan Dövlət Rəqs Ansamblı təqdim etdiyi rəqs nümunələri ilə milli rəqslərimizi bir daha dünyada yüksək səviyyədə tanıdıb.
Qeyd edək ki, 2023-cü il fevralın 24-dən etibarən Şuşa ilə Xivə şəhəri qardaşlaşmış şəhərlərdir.
“Ədəbiyyat və incəsənət”
(13.09.2024)
Adil Kərimli: Ölkəmizdə mədəni irs obyektlərinin hər biri dövlət tərəfindən qorunur
Azərbaycan çoxmillətli dövlət kimi zəngin və rəngarəng mədəni irsə malikdir.
AzərTAC xəbər verir ki, bunu Azərbaycanın mədəniyyət naziri Adil Kərimli Sankt-Peterburq Beynəlxalq Birləşmiş Mədəniyyətlər Forumunun nümayəndə heyətləri rəhbərlərinin görüşündə çıxışı zamanı deyib.
Nazir qeyd edib: “Ölkə Prezidenti İlham Əliyevin həyata keçirdiyi dövlət siyasəti dini və etnik mənsubiyyətindən asılı olmayaraq bütün mədəni dəyərlərin qorunub saxlanmasına və təbliğinə yönəlib. Hər bir mədəni irs obyekti dövlət tərəfindən qorunur və beynəlxalq aləmdə fəal şəkildə təbliğ olunur”.
A.Kərimli qlobal iqlim dəyişikliyi şəraitində sıx beynəlxalq əməkdaşlığa və mədəniyyət sahəsində innovativ həllərdən istifadəyə təcili ehtiyac olduğunu vurğulayıb. O, BMT-nin İqlim Dəyişmələri üzrə Çərçivə Konfransı Tərəfləri Konfransının Bakıda keçiriləcək 29-cu sessiyası (COP29) çərçivəsində təşkil ediləcək mədəniyyət nazirlərinin görüşündə iqlim dəyişikliyinin mədəni irsə təsiri mövzusunun diqqət mərkəzində olacağını da diqqətə çatdırıb.
Mədəniyyət naziri tədbirdə iştirak edənləri bu konfransda iştirak etməyə dəvət edib.
Rusiya Federasiyasının mədəniyyət naziri Olqa Lyubimova çıxışında xarici ölkələrlə mədəniyyət mübadiləsi festivallarının qorunub saxlanmasının və təbliğinin vacibliyini qeyd edib. O, həmçinin bildirib ki, ən yüksək səviyyədə dəstəklənən mübadilə - Mədəniyyət illərinin elan edilməsi yaxşı təcrübədir.
Rusiya Federasiyasının şimal paytaxtında keçirilən Sankt-Peterburq Beynəlxalq Birləşmiş Mədəniyyətlər Forumunda 80 ölkədən nümayəndələr iştirak edirlər. Bu il Forumun əsas mövzusu “XXI əsrin mədəniyyəti. Suverenlik və ya qloballaşma?” olub.
“Ədəbiyyat və incəsənət”
(13.09.2024)
“Yeni nəfəs” layihəsi çərçivəsində bu günədək 1000 ağac əkilib
“ASAN xidmət”in Ekologiya və Təbii Sərvətlər Nazirliyi ilə birgə reallaşdırdığı “Yeni nəfəs” adlı ekoloji-sosial layihə başa çatıb.
“Ədəbiyyat və incəsənət” portalına “ASAN xidmət” dən verilən məlumata görə layihə çərçivəsində bu günədək 1000 körpənin adına ağac əkilib və onların valideynlərinə "Yaşıl Gələcək" sertifikatı təqdim olunub.
“Yaşıl dünya naminə həmrəylik ili” çərçivəsində baş tutan layihənin məqsədi ətraf mühitin mühafizəsi və ekoloji maarifləndirməyə diqqətin artırılmasıdır.
“Ədəbiyyat və incəsənət”
(13.09.2024)
Rəsm qalereyası: Klod Mone, “Pişik mürgüləyərkən”
Rəsm qalereyası: Klod Mone, “Pişik mürgüləyərkən”
Gənclər Kitabxanası təklif edir: “Ernest Heminquey – həyat və yaradıcılığından strixlər"
"Ernest Heminquey – həyat və yaradıcılığından strixlər" adlı ön sözlə açılan kitaba yazıçının "Qoca və dəniz", "Ya var, ya yox" romanları, "Qadınsız kişilər", silsiləsindən "Məğlubedilməz", "Yad ölkədə", "Ağ fillər", "Qatillər", "On hindu", "Təqib yürüşü" kimi hekayələri və "Həmişə səninlə olan bayram" avtobioqrafik memuarı daxil edilib.
Bu kitabı oxumaq üçün Cəfər Cabbarlı adına Gənclər kitabxanasına yaxınlaşa bilərsiz.
Kitablar 10 gün müddətinə oxuculara verilir.
“Ədəbiyyat və incəsənət”
(13.09.2024)
İBRƏTAMİZ - Biz niyə qaranı görür, ağı görmürük?
Könül, “Ədəbiyyat və incəsənət”
Bu dəfə İBRƏTAMİZdə sizlər üçün yenə də bir Şərq pritçası əldə edib bölüşürəm. Əminəm ki, həmişəki kimi sizlər üçün çox faydalı olacaq.
Ustad tələbələrini imtahana çəkmək qərarına gəldi. Onlardan üçünü çağıraraq ağ vərəqə bir mürəkkəb damcısı saldı və soruşdu:
-Nə görürsünüz?
Birinci tələbə cavab verdi:
-Qara nöqtə.
İkincisi dedi:
-Ləkə.
Üçüncüsü isə dilləndi:
-Mürəkkəb.
Son dərəcə məyus halda ustad öz otağına çəkildi. Bir müddətdən sonra tələbələri ondan soruşdular:
-Nə üçün cavablarımız sizi bu dərəcədə məyus etdi?
Ustad cavab verdi:
-Çünki heç biriniz ağ vərəqi görmədiniz.
“Ədəbiyyat və incəsənət”
(13.09.2024)
“O ulduzlar uyuyacaq qəbrimdə...” - Nadir Məmmədlinin şeirləri
“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə Nadir Məmmədlinin şeirləri təqdim edilir.
Yaddaşımın məzarlığında
uyuyan dostlar!
Yorulub yolda qalanınız da,
Ömrün baharında solanınız da,
Güzəran davasında həlak olanınız da -
Bir daha keçəməyəcəyim yollar,
Gəlişimə açılmayacaq qollar.
Ömrün bu başından salamlar sizə...
Sevgimin göylərinə
hərəniz adına bir ulduz taxdım,
Yalqızlığın qaranlığından baxdım,
baxdım...
Ömrüm kimi uzun imiş
səbrim də.
O ulduzlar...
O ulduzlar uyuyacaq qəbrimdə.
*
Bu kənddə
məndən qərib adam yox,
Nə də
məndən sevimli bir qonaq.
Bunu kimsə duymasa da,
Anlamış yol üstə quruyan qovaq.
Ürəyim bələdçi,
xatirim ünvansız -
Gəlmişəm -
təmənnasız-filansız...
Bir də axı
dərviş hara, mələk hara?...
Gəldim, eləcə salam deyəm
səni tanıyan yollara,
ağaclara...
*
Ey könül şəhərimin
Əsrarəngiz sakini!
Səni Tanrı atamış -
Oldun şəhər hakimi.
Hüznlü axşamlara
Sən bir əsinti mehsən.
Dan üzünə səcdədə
Kirpiyimdəki şehsən.
Hardandı bu yasaqlar?
Götür, Tanrı eşqinə.
Apar bir keşikçi qoy
Məni saray-köşkünə.
Nə bu güzərgahında
Qadağan saatları?!
Səbrimin üstən keçir
Hər gün fayton atları...
Haralarda qoşarsan,
Kimlərdi sağın, solun?!
Xəyalımda yaşarsan -
Könlümdən keçir yolun...
*
Mən bir xəyalpərəst, sən də utancaq,
Əsir ürəyimdən bir qəm rüzgarı.
Min il də beləcə gözlərdim, ancaq
Həyat bağışlamır utancaqları.
Günlər qanad açıb uçur bir, iki,
Çox da aldatmasın bizi xoş güman.
Bir gün də ayılıb görəcəyik ki,
Ayrılıq nəğməsi oxuyur zaman.
Sükut qaranlıqdır, zülmət nəğməsi,
Susdurub qəlbini durma, danış, din.
Təbəssüm məhəbbət müqəddiməsi,
Səpilsin yoluma təbəssümlərin.
*
Bir də eşidəsən köçüb karvanım -
Yaddaşında açan səhərin olum.
Ahının ucunda adım göynəsin,
"Eyvah"ına dönüm, qəhərin olum.
Ruhum tufansonu kirimiş dəniz,
Xatirəm sahilə çırpılan qayıq...
Küləklə danışan bir sərsərini
Bəs kim ağlayacaq? Qayıt, sən qayıt!
Bir nağıl danış ki yatsın uşaqlar -
Zamanın yelləri acı qəhqəhə.
Denən biri vardı, birisi yoxdu...
Sonra da dərdləri tök bir qədəhə.
*
Sən, ey yaddaşımın üfüqlərində
mürgüləyən xəyal süsü!
Hələ də səslənir ruhumda
o sevda türküsü...
Uğraşma göstərməyə o mələyi
mənə bir qadın qiyafəsində.
Bilirdim bir qadın olacağını,
Hələ
ondan bir az ötəsin də...
“Ədəbiyyat və incəsənət”
(13.09.2024)
GÜLÜŞ KLUBUnda endirimli soğan
Sərtyel, “Ədəbiyyat və incəsənət”
1.
Diqqət.
Hacıqabulda yerləşən “Əfrasiyabla Müşkinazın marketi” inanılmaz, şok bir endirim kampaniyasına başlayır.
Sentyabr ayının 30-dək 1000 manatlıq alış-veriş edən şəxslərə baş soğanın bir kiloqramı 80 qəpik deyil, 65 qəpiyə veriləcək.
2.
“500 manatı 600 manata satıram” elanını vuran şəxsə hamı xəstə diaqnozunu qoydu, halbuki banklar 500 manatı azı 750 manata satırlar.
3.
Aytəkin eyni vaxtda iki kişiyə sms göndərdi: “Sən axı niyə mənə inanmırsan?”
4.
Səsini satırsansa, barı əvəzində nəsə al da, ay zavallı.
5.
-Kapitan!!! Torpaq!!! Mən torpaq görürəm!!!
-Gicbəsər, gəmi hələ tərpənməyib.
“Ədəbiyyat və incəsənət”
(12.09.2024)
“Nizami” Kino Mərkəzində “Şərqin əks sədaları” adlı konsert proqramı təqdim olunub
“Nizami” Kino Mərkəzində “Şərqin əks sədaları” (“Echoes of the East”) adlı konsert proqramı təqdim olunub.
AzərTAC xəbər verir ki, konsertdə gənc musiqiçi, bəstəkar Nigar Əsgərova (“Kengerléa”) tərəfindən yazılmış və ifa olunmuş əsərlər səsləndirilib.
Elektron və akustik musiqi elementlərini ənənəvi Azərbaycan musiqisinin motivləri ilə birləşdirilirdiyi konserdə proqramında, həmçinin N.Əsgərovaya məxsus “Suvenirlər”, “Şərq məskəni” (“East dwell”), “Köhnə truba” (“Old trumpet”) və digər bəstələr ifa olunub.
Qeyd edək ki, Bakı Musiqi Akademiyasının skripka ixtisası üzrə magistr məzunu olan “Kengerléa” hazırda təhsilini Almaniyada davam etdirir. O, həmçinin filmlər, oyunlar və media üçün musiqi yazmaq üzrə ixtisaslaşır. N.Əsgərova indiyədək “Second home” (İkinci ev), “Sınaq” kimi filmlərə musiqi bəstələyib.
“Ədəbiyyat və incəsənət”
(23.09.2024)
BİR SUAL, BİR CAVAB Təranə Dəmir ilə
Ülviyyə Əbülfəzqızı, “Ədəbiyyat və incəsənət”
SUAL
Düma söyləyib ki, " Uğurun iki səbəbi var- səbir və ümid."
Təranə xanım, səbirdən yoxsul olanlara nə tövsiyə verərdiniz?
CAVAB
Baxır səbrə hansı tərəfdən yanaşırsan. Haqsızlığa, bərabərsizliyə qarşı aşırı səbrin əleyhinəyəm. İstər sosial həyatda olsun, istər ailədə, istərsə də sevgidə. Amma səbir etməyənləri də elə hər şeyə üsyan edənləri, bütün sərhədləri çılğıncasına qırıb atanları da, hövsələsizləri, ən sonda demək istədiklərini ən əvvəldə deyənləri də təqdir etmirəm
Səbrin də həddi, sərhəddi olmalıdır.
Ədəbiyyat və incəsənət”
(13.09.2024)
