İmran Verdiyev,
Azərbaycan Respublikasının Əməkdar müəllimi. “Ədəbiyyat və incəsənət” portalının Oğuz təmsilçisi
1948-ci il aprelin 7-də Ümumdünya Səhiyyə Təşkilatının (ÜST) yaranması ilə əlaqədar təsis olunan Ümumdünya Sağlamlıq Günü hər il geniş şəkildə qeyd olunur.
Bu münasibətlə Oğuz Rayon Mərkəzi Xəstəxanasında maarifləndirici tədbir keçirilib.
Tədbirdə müəssisənin direktoru Anar Əzizov, Oğuz Rayon İcra Hakimiyyəti Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektoru müdiri Ayaz Ağayev eləcə də xəstəxananın həkim və tibb işçiləri iştirak ediblər.
Tədbirin əsas məqsədi sağlam həyat tərzinin təşviqi, ictimai sağlamlığın qorunması və əhalinin bu istiqamətdə maarifləndirilməsi olub.
İlk olaraq müəssisənin direktoru Anar Əzizov çıxış edərək bildirib ki, Ümumdünya Sağlamlıq Günü cəmiyyətin sağlamlığının qorunması baxımından mühüm əhəmiyyət daşıyır. A.Əzizov qeyd edib ki, səhiyyə işçilərinin əsas məqsədi əhaliyə keyfiyyətli tibbi xidmət göstərməklə yanaşı, sağlam həyat tərzinin təbliğinə dəstək olmaqdır. Direktor kollektivə göstərdikləri fədakar əməyə görə təşəkkür edib və gələcək fəaliyyətlərində uğurlar arzulayıb.
Daha sonra Oğuz Rayon İcra Hakimiyyəti Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektoru müdiri Ayaz Ağayev çıxış edərək belə tədbirlərin əhalinin sağlamlıq mövzusunda maariflənməsində mühüm rol oynadığını vurğulayıb. A.Ağayev sağlam cəmiyyətin formalaşmasında səhiyyə işçilərinin əməyini yüksək qiymətləndirərək, bu istiqamətdə həyata keçirilən təşəbbüslərin davamlı olmasının vacibliyini qeyd edib.
Ardınca İlkin səhiyyə xidmətinin şöbə müdiri Şəlalə Tahirova çıxış edərək sağlamlıq anlayışı, onun fiziki, psixoloji və sosial rifahın vəhdəti kimi əhəmiyyəti barədə ətraflı məlumat verib.
Sonda tibb işçisi Səmra Məhərrəmova çıxış edərək sağlam həyat tərzinin qorunmasının vacibliyindən danışıb, düzgün qidalanma, fiziki aktivlik, zərərli vərdişlərdən uzaq durma və profilaktik müayinələrin əhəmiyyətini vurğulayıb.
“Ədəbiyyat və incəsənət”
(08.04.2026)
