Rəqsanə Babayeva, “Ədəbiyyat və incəsənət”
3 mart 2026-cı il tarixində Azərbaycan Yazıçılar Birliyinin Beyləqan Bölməsinin təşəbbüsü ilə Beyləqan rayon Peşə məktəbinin akt zalında yaddaqalan ədəbi-mədəni tədbir keçirildi. Tədbirdə AYB-nin Beyləqan Bölməsinin şair və yazıçıları, rayon ziyalıları, məktəbin müəllim və tələbə heyəti iştirak edirdi.
Görüşdən öncə Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edildi. Zalın sükutunda həm ehtiram, həm də mənəvi məsuliyyət duyğusu vardı – çünki sözün dəyəri, azad düşüncənin qiyməti məhz belə fədakarlıqların fonunda daha aydın görünür.
Tədbiri AYB-nin Beyləqan Bölməsinin sədri, şair Fazil Əsəd açaraq ədəbiyyatın gənclərin dünyagörüşündə oynadığı roldan danışdı. O, qeyd etdi ki, söz yalnız estetik zövq deyil, həm də mənəvi dayaqların möhkəmləndirilməsidir. Gənclərlə belə görüşlərin davamlı keçirilməsinin vacibliyini vurğulayan şair, ədəbiyyatın insanı kamilləşdirən, onu cəmiyyətə faydalı fərd kimi formalaşdıran əsas vasitələrdən biri olduğunu bildirdi.
Tədbirdə çıxış edən Azərbaycan Mediasiya Şurasının üzvü, Cəbrayıl 1 saylı Mediasiya Təşkilatının mediatoru Mehman Əliyev mediasiyanın mahiyyəti və cəmiyyət üçün əhəmiyyəti barədə ətraflı məruzə ilə çıxış etdi. O, münaqişələrin hüquqi çərçivədə, qarşılıqlı anlaşma yolu ilə həllinin vacibliyini diqqətə çatdırdı. Mediasiyanın təkcə hüquqi mexanizm deyil, həm də mədəni dialoq platforması olduğunu vurğulayan natiq, gənclərin bu sahədə maariflənməsinin önəmini qeyd etdi.
Daha sonra söz şair və yazıçılara verildi. Raquf Budaqlı, Ağa Savalan, Vəliyəddin Əhmədbəy, Rövşən Qarabudaq, Əlixan Ziya və mətbuat nümayəndəsi Baxşeyiş Şirinov çıxış edərək Beyləqan rayon Peşə məktəbinin tələbələrinin nizam-intizamını və fəallığını yüksək qiymətləndirdilər. Qonaqlar məktəbdə yaradılan sağlam tədris mühitini təqdirlə qeyd etdilər.
Şairlər yeni qələmə aldıqları şeirlərdən nümunələr səsləndirdilər. Sözün ahəngi, misraların səmimiyyəti zalda xüsusi bir ovqat yaratdı. Gənclər üçün canlı müəllif ifasında şeir dinləmək həm estetik zövq, həm də ruhani təcrübə oldu. Ədəbiyyatın kağız üzərində qalmadığını, canlı nəfəsə çevrildiyini hiss etmək tədbirin ən təsirli anlarından idi.
Məktəbin əməkdaşları Sənani Umudov və Natavan xanım, müəllim Seyfəddin Allahverdiyev, eləcə də bir qrup tələbə çıxış edərək belə görüşlərin onların dünyagörüşünə müsbət təsir göstərdiyini bildirdilər. Tələbələr ədəbiyyata və oxu mədəniyyətinə maraqlarını ifadə etdilər, qonaqlara təşəkkürlərini çatdırdılar.
Tədbirin sonunda şair və yazıçılar özləri ilə gətirdikləri bədii kitabları məktəbin kitabxanasına hədiyyə etdilər. Bu jest təkcə kitab bağışı deyil, həm də mənəvi körpü idi – söz adamları ilə gələcəyin qurucuları arasında qurulan səssiz, amma möhkəm bağ.
Belə görüşlər bölgələrdə ədəbi mühitin canlanmasına, gənclərin söz sənətinə marağının artmasına, milli-mənəvi dəyərlərin təbliğinə xidmət edir. Beyləqanda keçirilən bu tədbir bir daha göstərdi ki, ədəbiyyat cəmiyyətin mənəvi nəbzidir və bu nəbz gənclərin ürəyi ilə birgə döyündükcə gələcəyə inam daha da möhkəmlənir.
“Ədəbiyyat və incəsənət”
(04.03.2026)
