İmran Verdiyev, 

Azərbaycan Respublikasının Əməkdar müəllimi. “Ədəbiyyat və incəsənət” portalının Oğuz təmsilçisi

İkinci Dünya Müharibəsi xalqımızın şanlı tarixinin bir parçasıdır. 

1941-1945-ci illərdə 600 mindən çox azərbaycanlı cəbhəyə yollanmışdır. Bu müharibədə Azərbaycanın mərd oğul və qızları özlərinin ən ali keyfiyyətlərindən olan fədakarlığı, vətənpərvərliyi, mərdliyi nümayiş etdiriblər. 

Onların 450 min nəfəri və ya 65 faizi orden və medallarla təltif olunmuş, 130 nəfər Sovet İttifaqı Qəhrəmanı adına layiq görülmüşdür. Müharibədə iştirak edən soydaşlarımızın təxminən yarısı həlak olmuşdur.  

Müharibə iştirakçıları içərisində Oğuz (keçmiş Vartaşen) rayonunun sakinləri də çox olmuşdur. Artıq qələbədən 80 il ötür. 

Ölkəmizin hər yerində olduğun kimi Oğuz rayonunda da faşizm üzərində qələbənin 80-cı ildönümü ilə əlaqədar anım mərasimi keçirilmişdir. 

Mərasimdə Oğuz Rayon İcra Hakimiyyəti aparatının məsul şəxsləri, Səfərbərlik və Hərbi Xidmətə Çağırış üzrə Dövlət Xidmətinin Oğuz Rayon Şöbəsinin rəisi, YAP Oğuz rayon Təşkilatının sədri, Rayon Ağsaqqalar Şurasının sədri, digər idarə, təşkilat və müəssisələrin rəhbərləri və nümayəndələri iştirak etmişlər.

İştirakçılar Oğuz şəhəri “Qəhrəmanlar parkında” İkinci Dünya Müharibəsi iştirakçılarının xatirəsinə tikilən abidənin önünə gül-çiçək dəstələri qoymuş, onların xatirəsini ehtiramla yad etmişlər.

“Ədəbiyyat və incəsənət”

(08.05.2025)