İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Kris Kolambus (Chris Columbus) Hollivudun tanınmış rejissor, ssenarist və prodüserlərindən biridir. O, xüsusilə ailə, komediya, macəra və fantastika janrlarında çəkdiyi filmlərlə məşhurlaşıb. Onun adı ən çox “Home Alone”, “Mrs. Doubtfire” və ilk iki “Harry Potter” filmi ilə əlaqələndirilir.

Kris Kolambus 10 sentyabr 1958-ci ildə ABŞ-ın Pensilvaniya ştatında anadan olub. Uşaqlıqdan rəsm çəkməyə və hekayələr yazmağa maraq göstərirdi. Kino sənətinə marağı da erkən yaşlarında formalaşıb. O, Tisch School of the Artsda kino təhsili alıb. Burada ssenaristlik və rejissorluq bacarıqlarını inkişaf etdirib. İlk peşəkar fəaliyyətində əsas diqqəti ssenarilər yazmağa yönəldib.

 Ssenarist kimi ilk uğurları

Kolambusun Hollivuddakı ilk əhəmiyyətli işlərindən biri “Gremlins” (1984) filminin ssenarisidir. Film həm komediya, həm də qorxu-fantastika elementlərini birləşdirib. Daha sonra “The Goonies” (1985) filminin ssenarisini yazıb. Uşaqların xəzinə axtarışından bəhs edən bu macəra filmi sonradan kult əsərlərdən birinə çevrilib. Bu mərhələdə Kolambus göstərdi ki, o, xüsusilə uşaqların dünyasını, macəranı və fantastik elementləri bir araya gətirən hekayələr yaratmaqda bacarıqlıdır.

Kris Kolambusun karyerasının ən mühüm mərhələsi 1990-cı ildə “Home Alone” filminin rejissoru olması ilə başlayıb. Filmdə Macaulay Culkin Kevin MakKallister adlı səkkiz yaşlı uşağı canlandırıb. Ailəsi Milad tətilinə gedərkən Kevini təsadüfən evdə unudub. Evə oğrular girməyə çalışanda isə Kevin müxtəlif tələlər quraraq onları dayandırır.

Film dünya üzrə böyük uğur qazandı və Makoley Kalkini uşaq aktyor kimi beynəlxalq səviyyədə məşhurlaşdırıb. “Home Alone” sonralar Milad dövrünün ən məşhur filmlərindən birinə çevrilib. Kolambus 1992-ci ildə “Home Alone 2: Lost in New York” filmini də çəkdi. Bu dəfə Kevin Nyu-Yorkda tək qalıb və əvvəlki filmdəki oğrular Harri və Marvla yenidən qarşılaşıb.

1993-cü ildə Kolambus Robin Williamsın baş rolda olduğu “Mrs. Doubtfire” filmini çəkib. Film ailəsindən ayrılan bir atanın uşaqları ilə daha çox vaxt keçirmək üçün yaşlı qadın dayə obrazına girməsindən bəhs edib. Komediya ilə yanaşı, əsərdə boşanma, valideyn-övlad münasibətləri və ailə bağları kimi ciddi mövzular da işlənib. Film Kolambusun yalnız uşaqlar üçün deyil, ailə auditoriyası üçün emosional və düşündürücü hekayələr yarada bildiyini göstərib.

Kolambusun karyerasının başqa böyük mərhələsi Harry Potter seriyası olub. 2001-ci ildə o, “Harry Potter and the Sorcerer’s Stone” filminə rejissorluq edib. Film J.K. Rowlingin məşhur romanı əsasında çəkilmişdi və Harri Potterin kino dünyasına ilk böyük çıxışı olub. Bir il sonra Kolambus “Harry Potter and the Chamber of Secrets” filmini də çəkib.

Kolambusun ilk iki “Harry Potter” filmində yaratdığı vizual dünya seriyanın sonrakı filmləri üçün də mühüm təməl olub. O, sehrli dünyanın möhtəşəm, lakin eyni zamanda uşaqlara yaxın və isti görünməsinə xüsusi diqqət yetirib.

Digər məşhur işləri

Kris Kolambusun rejissor kimi digər filmləri arasında:

- “Adventures in Babysitting” (1987)

- “Only the Lonely” (1991)

- “Nine Months” (1995)

- “Stepmom” (1998)

- “Rent” (2005)

- “Percy Jackson & the Olympians: The Lightning Thief” (2010)

xüsusi yer tutur. O, həmçinin prodüser kimi də çoxsaylı layihələrdə iştirak edib. Kolambusun filmlərini fərqləndirən əsas cəhətlərdən biri ailə münasibətlərinə və uşaqların perspektivinə diqqət yetirməsidir. Onun əsərlərində uşaqlar çox vaxt hadisələrin passiv iştirakçısı deyil, süjetin əsas hərəkətverici qüvvəsidir.

“Home Alone”da Kevin ailəsindən uzaqda təkbaşına mübarizə aparır, “Harry Potter”də Harri sehrli dünyanın təhlükələri ilə üzləşir, “The Goonies”də isə uşaqlar böyük macəraya atılıb. Bu baxımdan Kolambusun yaradıcılığında uşaqlıq, ailə, dostluq, cəsarət və özünəinam kimi mövzular xüsusi əhəmiyyət daşıyır.

“Ədəbiyyat və incəsənət”

(10.09.2026)