Kitabçılar Birliyi tərəfindən 2026-cı ilin fevral ayında “Şeirini təqdim et, imzanı tanıt” adlı şeir müsabiqəsi elan olundu. Münsiflər heyəti Baba Vəziroğlu, İlqar Fəhmli və Samir Əfsəroğludan ibarət müsabiqəyə ümumilikdə 39 nəfər ədəbiyyatsevər qatıldı.
8 aprel tarixində Azərbaycan Yazıçılar Birliyinin Natavan Klubunda müsabiqənin təntənəli mükafatlandırma mərasimi keçirildi. Üç əsas qalib seçildi, üç nəfər fərqlənmə diplomuna layiq görüldü. Digər iştirakçılar təşəkkürnamələrlə təltif olundular.
“Ədəbiyyat və incəsənət” portalı sıra ilə öncə fərqlənmə diplomuna layiq görülənlərin, sonra isə mükafatçıların müsabiqəyə təqdim etdikləri şeirlərini geniş oxucu auditoriyası üçün əlçatan edir.
Beləliklə, tanış olun:
Kitabçılar Birliyinin “Şeirini təqdim et, imzanı tanıt” adlı şeir müsabiqəsində fərlənmə diplomuna layiq görülübdür: İlham Alışzadə
İLHAM ALIŞZADƏ,
“ŞAHİD”
Mən qəhrəman deyiləm.
Sadəcə gördüm.
Gördüm
Səhərin güllə səsi ilə açıldığını,
Çörək qoxusunun barıt qoxusuna qarışdığını.
Bir uşaq atasını səslədi,
Səs cavabsız qaldı.
Dağlar cavab verdi yalnız,
Əks-səda ilə.
Mən torpağın titrədiyini gördüm,
Sanki hər mərmi düşəndə
Bir ana ürəyi silkələnirdi.
Əsgərin gözündə qorxu yox idi,
Yarımçıq qalmış arzular vardı.
Bir məktub vardı cibində,
“Tez qayıt” yazılmışdı.
Mən gördüm
Qəhrəmanlıq necə səssiz olurmuş.
Heç kim “baxın” demir,
Heç kim alqış istəmir.
Sadəcə biri
Başqasının yaşaması üçün
Öz sabahından keçir.
Müharibə xəritədə cizgi deyilmiş,
Müharibə
Evin qapısına qara lent kimi asılan xəbər imiş.
Mən danışmadım uzun-uzadı.
Çünki müharibəni görən adam
Az danışar.
Amma bir həqiqəti bilirəm:
Torpaq qanı unutmur.
Və şahid olan insan
Heç vaxt əvvəlki kimi olmur.
Sabah sizə növbəti Fərqlənmə diplomuna layiq görülən iştirakçı - Samir Əflatunoğlu ilə tanışlıq gözləyir.
“Ədəbiyyat və incəsənət”
(14.04.2026)
