19 oktyabr 2026-cı il tarixində Türk Mədəniyyəti və İrsi Fondunun prezidenti professor Aktotı Raimkulovanın Qırğız Respublikasına işgüzar səfəri çərçivəsində Yusif Balasaqunlu adına Qırğızıstan Milli Universitetinin rektoru Doqdurbek Çontoyev ilə görüş keçirilib.

Bu barədə “Ədəbiyyat və incəsənət” portalına Fonddan məlumat verilib.

Görüşdə Fond ilə Universitet arasında strateji əməkdaşlığın prioritet istiqamətləri, birgə elmi-mədəni təşəbbüslərin və layihələrin həyata keçirilməsi perspektivləri ətraflı müzakirə olunub.

Səfər çərçivəsində Professor Aktotı Raimkulova Universitetin nəzdində fəaliyyət göstərən Türk İrsi Mərkəzinin yeni inkişaf konsepsiyası ilə yaxından tanış olub. Mərkəzin gələcək fəaliyyət planı, elmi-tədqiqat potensialının gücləndirilməsi və ümumtürk mədəni irsinin akademik səviyyədə tədqiqi və təbliği istiqamətində nəzərdə tutulan addımlar yüksək qiymətləndirilib.

Görüşün yekununda birgə təşəbbüslərin gerçəkləşməsinə verdiyi hərtərəfli dəstəyə və yaradılan səmərəli əməkdaşlıq mühitinə görə Universitet rəhbərliyinə dərin minnətdarlıq ifadə olunub, tərəfdaşlığın gələcəkdə daha da dərinləşəcəyinə əminlik bildirilib.

“Ədəbiyyat və incəsənət”

(20.10.2026)