Bu il dünyaşöhrətli kimyaçı alim, Dövlət Mükafatı laureatı, kimya elmləri doktoru, akademik Yusif Məmmədəliyevin anadan olmasının 120 illiyi tamam olur. Azərbaycan Respublikasının Prezidenti İlham Əliyev iyulun 5-də alimin anadan olmasının 120 illiyinin qeyd edilməsi ilə bağlı Sərəncam imzalayıb. Bu Sərəncama uyğun olaraq Cəfər Cabbarlı adına Respublika Gənclər Kitabxanasında akademikın mənalı ömür yolundan və fədakar elmi, ictimai fəaliyyətindən bəhs edən elektron məlumat bazası hazırlanaraq istifadəçilərə təqdim edilib.

“Ədəbiyyat və incəsənət” portalına kitabxanadan verilən məlumata görə, elektron məlumat bazasında Yusif Məmmədəliyevin həyat və fəaliyyətinin əsas tarixləri, bir sıra görkəmli şəxslərin onun haqqında söylədikləri dəyərli fikirlər, layiq görüldüyü mükafatlarla yanaşı, “Dünya elminə töhfələr verən alim”, “Dünya şöhrətli kimyaçı alim”, “Elm fədaisi, müəllim, ziyalı, milli fəxrimiz” kimi məqalələrin tam mətni təqdim edilir.

Elektron bazada görkəmli alimin müəllifi, redaktoru olduğu, Azərbaycan və rus dillərində nəşr edilən kitabların, məqalələrinin eləcə də onun haqqında qələmə alınan kitabların, dövri mətbuat nümunələrinin siyahıları yer alır. Yusif Məmmədəliyevin 120 illik yubileyi ilə əlaqədar hazırlanan məlumat bazasında “Filmoqrafiya”, “Bədii ədəbiyyatda”, “Xatirəsənin əbədiləşdirilməsi”, “Virtual sərgi”, “Foto və videoqalereya” kimi bölmələr də təqdim edilir. Kitabxana əməkdaşları tərəfindən hazırlanan elektron məlumat bazasında Yusif Məmmədəliyevin Azərbaycan Milli Elmlər Akademiyasında rəhbərliyi dövründə bu elm mərkəzində təşkil olunmuş institutlar və akademikın dövlət və ictimai-siyasi fəaliyyəti haqqında  geniş məlumat təqdim edilir. 

“Akademik Yusif Məmmədəliyev – 120” adlı elektron məlumat bazası  kitabxananın rəsmi saytında yerləşdirilib.

https://ryl.az/melumat-bazalari/Akademik_Yusif_Memmedeliyev_el_melumat_bazasi/index.html  

“Ədəbiyyat və incəsənət”

(03.09.2025)