Azərbaycan kinosunun qızıl fonduna daxil olan bir çox filmlərə operator kimi quruluş verən görkəmli kinooperator, kinorejissor Rasim İsmayılov sağ olsaydı, bu gün 85 illiyini qeyd edərdi.
O, 1936-cı il iyul ayının 13-də Bakıda anadan olub, həyatını milli kinomuzun inkişafına həsr edib. “Sevil”, “Yeddi oğul istərəm”, “Axırıncı aşırım”, “Gün keçdi”, “Nəsimi”, “Dədə Qorqud”, “Babək” və başqa filmlər onun adı ilə bağlıdır. O, 68 illik ömrünün 46 ilini milli kinomuza xərcləyib, bu illər ərzində operator kimi 20 bədii, 10 sənədli film, rejissor və ssenari müəllifi kimi dörd “Mozalan”, iki animasiya filmi çəkib. Quruluş verdiyi son ekran əsəri 1990-cı ildə lentə alınan “Tələ” filmidir.
Rasim İsmayılov həmçinin Azərbaycan televiziyasında animasiya filmlərinin yaradıcılarından biri kimi də tanınır. 1965-ci ildə “Danışan işıqlar”, 1969-cu ildə “Qırmızılar, qaralar və başqaları” cizgi filmlərinə quruluş verib.
Görkəmli kino xadimi 1976-cı ildə Azərbaycan SSR-nin “Əməkdar incəsənət xadimi” fəxri adına, 1978-ci ildə Dövlət mükafatına layiq görülüb.
Rasim İsmayılov 2004-cü il mart ayının 3-də vəfat edib.
Ruhu şad olsun!