“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün – Tural Eyyubovahəsr edilmiş şeirlə tanış olacaqsınız.

TURAL YADULLA OĞLU EYYUBOV

(02.07.1992.-25.10.2020.)

Kürdəmir rayonunun Mollakənd kəndindən olan, ADU-nun məzunu, Azərbaycan Silahlı qüvvələrinin leytenantı, Qarabağın azad edilməsi uğrunda Vətən müharibəsinin şəhidi

        ZƏFƏR İLƏ

Sevirdi bu Vətəni, sevirdi bu torpağı,

Hər bir zaman gəlirdi  xoş səsi,  xoş sorağı,

Öpüb aylı-ulduzlu, üç boyalı bayrağı,

Yollandı döyüşlərə, yollandı hünər ilə,

İnanırdı, dönəcək geriyə, zəfər ilə.

Hamı bilir o, necə  mərd idi, igid idi,

Bacarıqlı komandir,  cəsur bir zabit idi,

Qorxmayırdı ölümdən, mələklər şahid idi,

Taleyinə düşmüşdü  döyüş fitnə-şər ilə,

İnanırdı, dönəcək geriyə  zəfər ilə.

Çox qəhrəman yetirib doğulduğun  Mollakənd,

İşğalda qala bilməz nə bir şəhər, nə bir kənd,

Keçdi neçə dağ-dərə, aşdı yamac, bərə, bənd,

Adını tarixlərə yazdı bu səfər ilə,

İnanırdı, dönəcək geriyə, zəfər ilə.

Bu yurdu, bu torpağı suvararaq qanıyla,

Torpağı vətən edir canıyla,

Azərbaycan tanındı şöhrətiylə, şanıyla,

Millət  yenilməz olur, ərən ilə, ər ilə,

İnanırdı, dönəcək geriyə  zəfər ilə.

Yağıları məhv etdi rəşadətli ordumuz,

Tural, səni unutmaz, bil, müqəddəs yurdumuz,

Artıq həyata keçib neçə illik arzumuz,

Xalqımız fəxr eyləyir səntək hünərvər ilə,

Müharibə qurtardı  şanlı bir zəfər ilə!

“Ədəbiyyat və incəsənət”

(18.04.2024)