Könül, “Ədəbiyyat və incəsənət”

Xəbər tutduq ki, dəyərli söz adamı Bilal Alarlının “Yaşantılarım” adlı yeni kitabı işıq üzü görüb. Bu münasibətlə Cəlilabadda yaşayıb yaradan Bilal müəllimlə əlaqə yaradıb onun fikirlərini aldıq. Buyurub tanış ola bilərsiniz: 

-Altmış beşin igid arxasını yerə vurdum, bu yubiley yaşıma halal əmək haqqımla ərsəyə gətirdiyim yeni kitabımı hədiyyə etdim. Kitab "Elm və təhsil" nəşriyyatında çap olunub.

Tanrı fürsət versin, 70 yaşımadək kompüterimdə yatıb qalan, maddi imkansızlıq üzündən nəşrini həsrətlə gözləyən Cəlilabad, Biləsuvar, Yardımlı və Güney Muğan folklor toplularını, folklora və çağdaş ədəbi prosesə dair elmi kitablarımı, povest və hekayələrimi də işığa çıxara bilim!!! Uğurlarım bol olsun! Yeni kitabım xeyirli olsun! Özümü təbrik edirəm!

* * *

İndi isə kitab bəradə zəruri bilgiləri diqqətinizə çatdırırıq: 

Bilal Alarlı (Hüseynov). YAŞANTILARIM: Tapınaqlar, minacatlar, biratımlar, təsəllilər, qınaqlar, gileyləmələr, hayqırtılar, göynərtilər. 

Redaktor Beynəlxalq Nobel İnformasiya Mərkəzinin vitse-prezidenti, AYB üzvü, tarix elmləri doktoru Bəybala Ələsgərov. Bakı, Elm və təhsil, 2023, 152 s.

Kitabda filologiya üzrə fəlsəfə doktoru, şair Bilal Alarlının 2022 və 2023-cü illərdə yazdığı şeirlər, həmçinin şəhid Vüsal Vəliyevin xatirəsinə həsr etdiyi “Vüsal ağrısı” poeması yer almışdır. Kitab müəllifin 65 illik yubeliyi münasibətilə nəşr olunur. Yubiley günündə müəllifə ünvanlanmış təbriklərin bir qismi də kitaba daxil edilmişdir. 

* * *

Onu da qeyd edək ki, “Yaşantılarım” Bilal Alarlının işıq üzü görən sayca otuz doqquzuncu kitabıdır.  

“Ədəbiyyat və incəsənət”

(28.11.2023)