Bəzi təyinatlar öz bəhrəsini dərhal verir. Müasir dövrə uyğun novatorluq, kreativlik, ən əsası isə sürətlə və dəblə ayaqlaşma. 

İnqilabi çevrilişi Xalq artisti Yusif Eyvazov da etməsə kim edər axı? Mədəniyyət naziri Adil Kərimli Yusif Eyvazovu Azərbaycan Dövlət Akademik Opera və Balet teatrına direktor təyin edəndə hamı duydu ki, bu Avropa meyilli, kübar tenor teatrda köhnə heç nə saxlamayacaq. Belə də oldu.

“Ədəbiyyat və incəsənət” portalının diqqətini tək yeniləşmiş repertuar, işin keyfiyyət dəyişikliyi cəlb etmir. Budur, inanılmaz bir addım. Yusif Eyvazovun təşəbbüsü ilə bir neçə gündür ki, tanınmış  italyan opera müğənnisi, lirik tenor Federiko Lonjin teatrda ustad dərsləri keçir. Federiko Lonjin teatrda öz təcrübəsini bölüşməklə yanaşı, sənət ocağının solistləri ilə fərdi məşğələlər də aparır. Nəticə etibarilə teatrın peşəkar kollektivi öz bilik və bacarıqlarını daha da stimullaşdırır.

Xatırladaq ki, layihə teatrın yaradıcı baxımından kadr potensialının və peşəkarlığın yüksəldilməsinə yönəlib və silsilə şəkildə davam edəcək. Teatra daha məşhur opera ulduzlarının gəlişi də istisna deyil.

Sadəcə, möhtəşəm!

Şəkildə: Yusif Eyvazov daim axtarışdadır.

“Ədəbiyyat və incəsənət”

(26.05.2923)