Azərbaycan Respublikasının Prezidenti İlham Əliyevin Sərəncamına əsasən 2024-cü il “Yaşıl dünya naminə həmrəylik ili” elan edilib. Cəfər Cabbarlı adına Respublika Gənclər Kitabxanasında sərəncamdan irəli gələn məsələləri icra etmək məqsədilə “Təmiz planet-sağlam həyat” layihəsi həyata keçirilir. Bu barədə “Ədəbiyyat və incəsənət” portalına kitabxanadan məlumat verilib.
22 Aprel Beynəlxalq Yer Kürəsi Günü ilə əlaqədar olaraq kitabxana əməkdaşları tərəfindən “Təmiz ətraf mühit və yaşıl artım ölkəsi” adlı videomaterial və biblioqrafik icmal hazırlanıb.
Videomaterialda ölkəmizdə ətraf mühitin sağlamlaşdırılması, yaşıllaşmanın bərpası və artırılması, su resurslarından səmərəli istifadənin və dayanıqlı enerji mənbələrinin təmin olunması üzrə layihələrin həyata keçirilməsinə, bərpaolunan enerji ilə bağlı yaxın beş ildə nəzərdə tutulan hədəflər haqqında məlumat verilir. “Təmiz ətraf mühit və yaşıl artım ölkəsi” adlı materialda Naxçıvan Muxtar Respublikası, işğaldan azad edilən Qarabağ və Şərqi Zəngəzur iqtisadi rayonlarında “yaşıl enerji zonaları” elan edilməsindən, “ağıllı şəhər”, “ağıllı kənd” kimi innovativ yanaşmaların tətbiqi, ekosistemin bərpasından bəhs edilir. Videomaterialda Ulu Öndər Heydər Əliyevin, Prezident İlham Əliyevin təmiz ətraf mühit və ekologiyanın qorunması istiqamətində söylədikləri dəyərli fikirlər, müsahibələrindən fraqmentlər təqdim edilir. Kitabxana əməkdaşları tərəfindən hazırlanan materiallarda 22 Aprel Beynəlxalq Yer Kürəsi Gününün təsis edilməsi məqsədi, bu gün ilə əlaqədar olaraq həyata keçirilən tədbirlər haqqında da geniş məlumat verilir.
Biblioqrafik icmalda rəsmi sənədlər, “Mənəvi dəyərlər və ətraf mühitin mühafizəsi”, “Ətraf mühit haqqında infoqrafika”, “Azərbaycan təbiəti - Sözün qüdrətiylə...”, “Azərbaycan təbiəti: dünən, bu gün, sabah”, “Ətraf mühitin iqtisadiyyatı”, “Təbiətdən istifadənin iqtisadi və ekoloji əsasları”, “Təbiətdən istifadənin hüquqi əsasları”, “Ekologiya və müasir hidrosfer” və s. kimi iyirmidən çox kitabın biblioqrafik təsviri və qısa annotasiyası təqdim edilir.
“Ədəbiyyat və incəsənət”
(23.04.2024)