“Ədəbiyyat və incəsənət” portalının Poetik qiraət rubrikasının daimi aparıcısı, gözəl şairimiz Əlizadə Nuri sizə növbəti şeirini təqdim edir:

Bir az sirr kimiyəm, adam

Bir az aşikar kimiyəm.

Əlindəki o ox nədi-

Yoxsa mən şikar kimiyəm?

Dilini bildiyim quşun,

Qəmi canımda qurğuşun.

Ərimədim… bir koğuşun

İçindəki qar kimiyəm.

Göydə tanrı gəzən quşam,

Yer üzündən qovulmuşam…

Mən də bir az qurumuşam-

Qışa qalan nar kimiyəm…

Kəsib götürdünüz ayı,

Bu yağış- göyün harayı…

Mənə nağıl danışmayın-

Eşitmirəm, kar kimiyəm.

Hansı dərdin adaşıyam?

Qopub düşən dam daşıyam…

Qürbətə adam daşıyan

Üşüyən qatar kimiyəm.

Hər gün neçə dağ aşıram,

Mən dünyayla dalaşıram…

Dərdə yaman yaraşıram-

Əynində paltar kimiyəm.

Mələk yoxmuş, bu şeytanmış,

Qaranlıqda ağ yalanmış…

… Taxtı- tacı yağmalanmış

Zavallı xotkar kimiyəm…

“Ədəbiyyat və incəsənət”

(14.06.2023)