Türk dünyası birləşir, bundan gözəl nə ola bilər. İqtisadi, siyasi və mədəni cəbhələrdə böyük inteqrasiya duyulur.

İyunun 5-dən 11-dək ölkəmizdə II Türk Dünyası Ədəbiyyat və Kitab Festivalı təşkil olunacaq. Ötən il BDU-nun ərazisində türkdilli ölkələrdən alimlərin, yazarların iştirakı ilə 3 gün davam edən ilk festival böyük marağa səbəb olmuşdu. Məqsədi  kitabı təbliğ etmək və kitaba olan marağı artırmaq olan festival bu il də keçiriləcək. 

Festivalın təşkilat komitəsinin sədri, Azərbaycan Yazıçılar Birliyinin mətbuat katibi Xəyal Rza “Ədəbiyyat və incəsənət” portalına açıqlama verib ki, budəfəki festival tədbiri AMEA-nın önündəki park ərazisində təşkil olunacaq. Festival çərçivəsində təşkil olunan kitab yarmarkasında müxtəlif nəşriyyatlar iştirak edəcəklər. Bundan əlavə, orada tədbirlər üçün böyük səhnə qurulacaq. Festival hər gün bir ölkənin adı ilə Azərbaycan, Türkiyə, Qazaxıstan, Qırğızıstan, Türkmənistan, Özbəkistan və Macarıstan günü kimi adlandırılacaq. Eyni zamanda, müxtəlif elmi konfranslar, simpoziumlar, şeir saatları, imza günləri təşkil olunacaq. Bundan başqa uşaqlarla bağlı xüsusi layihələr nəzərdə tutulub. Gündəlik olaraq uşaq saatları keçiriləcək və uşaq tamaşaları nümayiş olunacaq. Bu layihə ilə bağlı müxtəlif qurumlarla əməkdaşlıq nəzərdə tutulur. Həmçinin builki festivalda ilk dəfə olaraq yay kinoteatrı formatında filmlərin nümayişi də gözlənilir. Hər il iyunun 5-də ölkəmizdə "Şairlər günü" layihəsi həyata keçirilir. Bu il də XI "Şairlər günü" layihəsi elə II Türk Dünyası Ədəbiyyat və Kitab Festivalı ilə birləşdirilərək ümumi formatda təşkil olunacaq.

Qapaq şəklində siz I Türk Dünyası Ədəbiyyat və Kitab Festivalından fraqment görürsünüz.

“Ədəbiyyat və incəsənət”

(31.03.2023)