“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün – Teymur Rəsulova həsr edilmiş şeirlə tanış olacaqsınız.

TEYMUR YAVUZ OĞLU RƏSULOV

(23.03.1988.-21.10.2020.)

Qaradağ rayonunun Sahil qəsəbəsindən olan, ADNA-nın məzunu, Qarabağın azad olunması uğrunda Vətən müharibəsinin şəhidi          

ELİN  İGİD OĞLU TEYMUR

Təmiz  qəlbli,  amallıydı,
Əqidəli,  kamallıydı.
Saf arzulu,  xəyallıydı,
Üzündən  tökülürdü  nur,
Elin  igid  oğlu  Teymur.

Sevirdi  işi,  zəhməti,
Yurda  sonsuz  məhəbbəti.
Dürüstlüyü,  ləyaqəti,
Gətirmişdi  ona  uğur-
Elin  igid  oğlu  Teymur.

Şair  kimi  gəldi səsi,
Vardı,  şeiri, hekayəsi.
Tükənməz  idi  həvəsi,
İstedadı, ilhamı gur,
Elin  igid  oğlu  Teymur.

Bu  Vətənin övladıydı,
Mübarizi,  Poladıydı.
Yenilməzliyin  adıydı,
Qətiyyətli,  həm  də  cəsur,
Elin  igid  oğlu  Teymur.

Pozdu  düşmən növrağını,
Pis  günə  qoydu yağını.
Azad  etdi  torpağını,
Sona  kimi  qaldı  məğrur,
Elin  igid  oğlu  Teymur.

Yaxşısın  bilir  yaradan,
Çox  şeyi  anlamaz  nadan.
Getdi  döyüşə  qorxmadan,
Bir  bax,  gör  necə  vuruşur
Elin  igid  oğlu  Teymur.

Gerçək  edib  nağılları,
Yurdumuzun  oğulları,
Məhv  etdilər  yağıları,
Sizinlə  duyuruq   qürur,
Elin igid  oğlu   Teymur.

Artlq Şuşanı almışıq,
Şərəfli zəfər çalmışıq,
Qalib kim ucalmışıq,
Ölməzlərdən biri budur,
Elin igid oğlu Teymur.

“Ədəbiyyat və incəsənət”

(09.04.2024)