“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Oqtay Ağabəyova həsr edilmiş şeirlə tanış olacaqsınız.

OQTAY BAXŞƏLİ OĞLU AĞABƏYOV

(22.11.1987.-15.10.2020.)

Bakının Nizami rayonundan olan, Azərbaycan Dövlət Neft Akademiyasının məzunu, SOCAR-ın Bakı Neft Emalı zavodunun əməkdaşı olmuş Qarabağın azad edilməsi uğrunda Vətən müharibəsinin şəhidi

O Q T A Y

Oqtay:

“-Bu Vətən canımdan əzizdir  mənə,

Vaxt gəlib, məqamdır, hünər vaxtıdır.

İnsana ağırdır, kinayə, tənə,

İntiqam vaxtıdır, zəfər vaxtıdır.

Neçə il gözlədik hücum əmrini,

Nəhayət, həmin gün yetişib, şükür.

Kəsərik kafirin  səsin-səmrini,

Tale üzümüzə gülübdür, şükür.”

Oqtay gəldi evə, üzündə fərəh,

Ana, bu gündən mən, yenə əsgərəm.

Bu, haqq işimizdir, bu işə gərək

Mən də oğul kimi  payımı verəm.

Ana, bax, ağlama, şükür ki, varam,

Həm sənin, həm də ki, yurdun oğluyam.

Necə də xoşbəxtəm, çox bəxtiyaram,

Gedirəm düşmənin qəlbin dağlıyam.

Ana qucaqlayıb öpdü balasın,

Kədəri sevincə qarışdı o an:

-Allah kafirlərin versin bəlasın,

Çəkilsin yurdumdan bir yolluq duman.

Oqtay yola düşdü,  addımı mətin,

Canında yox idi  nə qorxu-hürkü,

Yağı əlimizdən qurtarar çətin,

Yaxşı tanıyarlar yenilməz Türkü.

Nə qədər döyüşkən, cəsurmuş Oqtay,

Dostlar arasında vardır hörməti.

Qorxmazmış, mərd imiş, məğrurmuş Oqtay,

Yalnız qələbəydi  sözü-söhbəti.

Torpaq azad olsun, var olsun Vətən,

İnamla, qeyrətlə döyüşdü Oqtay,

Burda yaşayammaz hər yoldan ötən,

Yağıyla qalibtək görüşdü Oqtay.

Füzuli uğrunda gedən vuruşda,

Gördülər  yox imiş bu mərdin tayı.

Sonadək aslantək, şirtək vuruşdu,

Mələklər cənnətə çəkdi Oqtayı.

Ucadan ucaya ucalan igid,

Səninlə fəxr edir Azərbaycanım.

Sən xalqın qəlbində yaşayan igid,

Mənim qəhrəmanım, tarix yazanım.

ADNA-nın məzunu, mühəndis idin,

Hərbi xidmət keçdin Murovdağında.

SOCAR-ın işçisi, halal, düz idin,

Ayaq izlərin var Qarabağımda.

“Ədəbiyyat və incəsənət”

(04.03.2024)