“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Nizami Osmanova həsr edilmiş şeirlə tanış olacaqsınız.

NİZAMİ ELŞAD OĞLU OSMANOV

(29.03.2002.-13.10.2020.)

Kürdəmir rayonunun Şahsevən kəndindən olan, Azərbaycan Silahlı Qüvvələrinin əsgəri, Qarabağ uğrunda Vətən müharibəsinin şəhidi

ZİRVƏDƏSƏN, NİZAMİ

Sən, Şahsevən kəndinin mərd balası Nizami,

Qəhrəmanlıq dastanı, od balası Nizami.

Uşaqlıqdan sevmişdin  hər daşın yurd-obanın,

Dinləmişdin öyüdün  atanın, həm babanın.

Bilirdin ki, torpaqlar  bizə bir əmanətdir,

Torpağı azad etmək  hünərdir, cəsarətdir.

Yağılarda qalammaz vətənin çopur daşı,

Torpaq verən igidin  məgər dik durar başı?

Həm evdə, həm məktəbdə  dürüstdün, hörmətliydin,

Ata-anaya bağlı, saf sözlü, ülfətliydin.

Əsgərlik bir məktəbdir, hər bir kəsin öz yeri,

Hamı sevirdi səni - rabitəçi əsgəri.

Rabitəçi işini öyrənmişdin dərindən,

Yaxşı xəbərdar idin  cihazların sirrindən.

Əsgərliyi qurtarıb hərbçi olacaqdın,

Peşəkar rabitəçi,  orduda qalacaqdın.

Başladı müharibə, “Hücum!,   Əsgər irəli!,

Düşməni cəhənnəmə, vaxtdır, göndər, irəli!”

Minlərlə oğul kimi qorxmayaraq döyüşdün,

Sənin də taleyinə şərəfli bir iş düşdü.

Qana həris olanlar, qan içində boğular,

Qovuldu yurdumuzdan o  qaniçən yağılar.

Sənintək igidlərin sayəsində Qarabağ,

Azaddır, düşmənlərin ürəyinə çəkdik dağ.

Söykənib qəlbindəki zəfər adlı inama.

Sən on səkkiz yaşında  çatdın uca məqama.

Elə zirvədəsən ki, hər kəsə qismət olmaz,

Şəhidlərdən nə qədər yazsa  şair yorulmaz.

“Ədəbiyyat və incəsənət”

(28.02.2024)